Reader

CAPUT LXVII.-- De expulsis templo vendentibus et ementibus, quemadmodum tres isti non repugnent Joanni qui hoc idem longe alibi dicit.

Sequitur Matthaeus, et dicit: Et cum intrasset Jerosolymam, commota est universa civitas, dicens: Quis est hic? Populi autem dicebant: Hic est Jesus propheta a Nazareth Galilaeae. Et intravit Jesus in templum Dei, et ejiciebat omnes vendentes et ementes in templo, etc., usque ad eum locum ubi ait, Vos autem fecistis illam speluncam latronum. Hoc de turbis vendentium ejectis e templo, omnes commemorant, sed Joannes longe diverso ordine. Nam post testimonium Baptistae Joannis de Jesu, cum eum commemorasset isse in Galilaeam, quando aquam convertit in vinum, inde post commemorationem paucorum in Capharnaum dierum, dicit eum ascendisse in Jerosolymam, cum esset Pascha Judaeorum, et facto flagello de resticulis expulisse de templo vendentes. Unde manifestum est, non semel, sed iterum hoc esse a Domino factum: sed illud primum commemoratum a Joanne, hoc ultimum a caeteris tribus.