Martyrologium
Choose a text
id="mobileReaderAuthor" class="mobile-reader-author" href="/authors/beda672-735" aria-label="More works by Beda">
—
⋯
Original / primary: 8514 Martyr2
1.1.1
EDITIO COLONIENSIS. MENSIS JANUARIUS habet dies XXXI, Lunam XXX. A. KALEND. JANUARII.
1.1.1
-- Circumcisio Domini nostri Jesu Christi secundum carnem, et octava Dominici natalis. Romae natale sancti Almachii martyris, qui jubente Alypio urbis praefecto, cum diceret: Hodie octavae Dominici diei sunt; cessate a superstitionibus idolorum et sacrificiis pollutis: hac de causa captus, et a gladiatoribus occisus est. Item Romae sanctae Martinae virginis, quae sub Alexandro imperatore, post multa tormenta gladio est occisa. Eodem die apud Spoletum civitatem Thusciae, sancti Concordii martyris, qui post plurima tormenta decollatus est. Item Romae via Appia coronae militum triginta. Apud Africam natale sancti Fulgentii, episcopi Ruspensis Ecclesiae, cujus vita virtutibus plena habetur. Apud Alexandriam sanctae Eufrosinae virginis. Ipso die sancti Paragodae, septimi Viennensis episcopi. Item sancti Basilii episcopi et sancti Eugendi abbatis.
1.1.2
EDITIO COLONIENSIS. MENSIS JANUARIUS habet dies XXXI, Lunam XXX. B. IV NON. JANUARII.
1.1.2
-- Natale beati Macharii abbatis; et in Ponto civitate Thomis trium fratrum: Argei, Narcissi, et Marcellini pueri, qui sub Licinio inter tyrones comprehensus, cum nollet militare, caesus ad mortem, et diu in carcere maceratus, in mare mersus martyrium consummavit. Corpus ejus ad litus delatum, et a religiosis viris depositum, magnis coruscat virtutibus. Et sancti Isidori episcopi et martyris.
1.1.3
EDITIO COLONIENSIS. MENSIS JANUARIUS habet dies XXXI, Lunam XXX. C. III NON. JANUARII.--
1.1.3
Romae natale sancti Antherii papae et martyris, qui vicesimus post beatum Petrum, cum duodecim annis, mense uno, diebus duodecim rexisset Ecclesiam, passus est sub Maximiano, et in coemiterio Callisti sepultus est via Appia. In civitate Parisiensi sanctae Genovefae virginis, quae a beato Germano Altissidorensi episcopo Christo dicata, admirandis virtutibus late claruit, et usque ad octoginta annos in Christi servitute consenuit. Eodem die sancti Florentii Viennensis episcopi, et martyris octavi ejusdem urbis. Natale sancti Theogenis, martyris, et sancti Petri martyris. In Thomis civitate natale sancti Filii episcopi, qui post alia tormenta in mare est mersus.
1.1.4
EDITIO COLONIENSIS. MENSIS JANUARIUS habet dies XXXI, Lunam XXX. D. PRID. NON. JANUARII.
1.1.4
-- Natale beati Titi, apostolorum discipuli, qui ordinatus est ab apostolo Paulo Cretensium episcopus; cui scripsit epistolam omni Ecclesiae Dei utilissimam idem apostolus. Demum post praedicationis officium fidelissime consummatum, beatum finem adeptus, sepultus est in ecclesia ubi a beato apostolo fuerat dignus minister constitutus. Apud Africam natale sanctorum, Aquilini, Gemini, Eugenii, Marciani, Quinti, Theodoti et Triphonis, praeclarissimorum martyrum, quorum gesta habentur. Eodem die Romae sanctorum martyrum Prisci presbyteri, et Priscilliani clerici, atque benedictae religiosissimae feminae, tempore Juliani impiissimi Augusti, qui gladio martyrium compleverunt. Item Romae beatae Dafrosae, uxoris B. Fabiani martyris, quae post damnationem viri sui primum relegata est exsilio, deinde ab impio Juliano capite jussa est puniri. Et sancti Ferrutii martyris.
1.1.5
EDITIO COLONIENSIS. MENSIS JANUARIUS habet dies XXXI, Lunam XXX. E. NON. JANUARII.
1.1.5
-- Romae natale sancti Telesphori papae, qui septimus post Petrum apostolum pontifex ordinatus, sedit annos undecim, menses tres, dies viginti unum. Hic constituit, ut septem hebdomatibus ante Pascha jejunium celebraretur, et in nativitate Domini nostri Jesu Christi missae nocte celebrarentur, ac hymnus angelicus, id est, Gloria in excelsis Deo, hora sacrificii missae celebretur, illustreque ad extremum sub Hadriano principe martyrium duxit. Item apud Antiochiam beati Symeonis monachi depositio, qui tertio decimo aetatis suae anno, huic saeculo abrenuntians, monasterium expetiit: ubi vix septimo die cibum sibi indulgens, psalterium infra quatuor menses didicit: postremo in columna, usque ad finem vitae suae stetit. Jerosolymae depositio Symeonis prophetae, qui Dominum Jesum in ulnis portavit.
1.1.6
EDITIO COLONIENSIS. MENSIS JANUARIUS habet dies XXXI, Lunam XXX. F. VIII IDUS JAN.
1.1.6
-- Epiphania Domini. Eodem die passio sanctae Marcae virginis. Quam cum Riciovarus praesens torqueri et in ignem praecipitari jussisset, illaesa permansit. Deinde mamillis abscissis, et squalore carceris afflicta, super testas acutissimas et prunas volutata, orans migravit ad Dominum.
1.1.7
EDITIO COLONIENSIS. MENSIS JANUARIUS habet dies XXXI, Lunam XXX. G. VII IDUS JAN.
1.1.7
-- Relatio pueri Jesu ex Aegypto. Et natale sancti Luciani Antiochenae Ecclesiae presbyteri et martyris, viri doctissimi atque eloquentissimi, qui passus est Nicomediae, sub persecutione Maximini, sepultusque Helenopoli Bithyniae. In Antiochia beati Cleri diaconi et martyris, qui post plurima tormenta decollatus est.
1.1.8
EDITIO COLONIENSIS. MENSIS JANUARIUS habet dies XXXI, Lunam XXX. A. VI IDUS JAN.
1.1.8
-- Neapoli Campaniae sancti Severini episcopi et confessoris, fratris beatissimi Victorini, clarissimi viri in miraculis; qui et ipse fratris imitator, post multarum virtutum perpetrationem, sanctitate plenus quievit: sepultus in loco, ubi priusquam ad episcopatum vocaretur, conversatus fuerat. Bellovaco sanctorum martyrum, Luciani et Messiani, et Timothei in Graecia.
1.1.9
EDITIO COLONIENSIS. MENSIS JANUARIUS habet dies XXXI, Lunam XXX. B. V IDUS JAN.
1.1.9
-- In Mauritania Caesariensi sanctae Marcianae virginis et martyris. Eodem die apud Antiochiam sancti Juliani martyris, et Basilissae conjugis ejus. Hi itaque sanctissimo voto casti conjuges, aliquot annos pariter vixerunt, carnem suam virginem Christo servantes, et monasteria de rebus suis instituerunt, ut ad decem millia monachorum pater beatus Julianus fieret. Basilissa vero multarum virginum mater, quarum multitudinem cum jam victricem praemisisset ad Dominum, ipsa conversatione vitae probatissima, inter verba orationis migravit ad Dominum. Julianus vero postmodum a Marciano praeside, per innumerabilia tormenta et cruciatus ad ultimum feriri jussus est, eum Antonio presbytero et Marcionella, et Celso puero, filio ejus.
1.1.10
EDITIO COLONIENSIS. MENSIS JANUARIUS habet dies XXXI, Lunam XXX. C. IV IDUS JAN.--
1.1.10
Apud Thebaidem natale beati Pauli, primi eremitae, qui a sexto decimo aetatis suae anno, usque ad centesimum tertium decimum solus in eremo permansit: cujus animam inter apostolorum et prophetarum choros ad coelum ferri ab angelis Antonius vidit. Sancti Igini papae, qui sedit Romae annos quatuor. Hic constituit clerum, et distribuit gradus. Sepultus est in Vaticano, tertia idus Jan. Apud Cyprum beati Nicanoris, qui unus fuit de septem primis diaconibus.
1.1.11
EDITIO COLONIENSIS. MENSIS JANUARIUS habet dies XXXI, Lunam XXX. D. III IDUS JAN.
1.1.11
-- Apud Alexandriam natale sanctorum confessorum, Petri, Severi, Leucii, quorum gesta habentur. In Africa natale sancti Salvii. In hujus natali sanctus Augustinus verbum fecit ad populum Carthagine. Eductio Domini de Aegypto.
1.1.12
EDITIO COLONIENSIS. MENSIS JANUARIUS habet dies XXXI, Lunam XXX. E. PRID. IDUS JAN.
1.1.12
-- Apud Achaiam natale sancti Satyri martyris, civis Arabiae, qui transiens arte quoddam idolum, cum exufflasset in illud, signans sibi frontem, statim corruit; ob quam causam decollatus est. Eodem die, sancti Archadii martyris, genere et miraculis clari.
1.1.13
EDITIO COLONIENSIS. MENSIS JANUARIUS habet dies XXXI, Lunam XXX. F. IDUS JAN.
1.1.13
-- Romae via Lavicana coronae militum quadraginta, sub Gallieno imperatore. Pictavis sancti Hilarii episcopi et confessoris, qui ob catholicam fidem quadriennio apud Phrygiam relegatus, inter alias virtutes fertur quod mortuum suscitaverit. Apud Viennam sancti Veri episcopi, qui praesedit Ecclesiae post sanctum Evantium. Treveris sancti Agritii episcopi, et octava Epiphaniae.
1.1.14
EDITIO COLONIENSIS. MENSIS JANUARIUS habet dies XXXI, Lunam XXX. G. XIX KALEND. FEBR.
1.1.14
-- Apud Nolam Campaniae beati Felicis presbyteri. Hic a Maximiano Nolanae urbis episcopo, presbyterii honore praelatus est. Qui cum multa a perfidis pro nomine Christi pateretur, volentibusque omnibus ejusdem urbis, ut episcopus levaretur, non consensit; sed alterum eligens ad pontificatus honorem, ipse duodecim post annos, cessante persecutione, Dominica die mysteriis confectis, data pace omnibus se in pavimentum oraturus projecit: moxque beati viri anima de carnis ergastulo egressa, felicia regna ipse vere felix conscendit: sepultusque est juxta urbem ab Helpido sancto presbytero, in loco qui dicitur Pincis, ubi claris fulget virtutibus. Apud Viennam sancti Cadeoldi episcopi.
1.1.15
EDITIO COLONIENSIS. MENSIS JANUARIUS habet dies XXXI, Lunam XXX. A. XVIII KALEND. FEBR.
1.1.15
-- Abacuc et Micheae prophetarum, quorum corpora sub Arcadio imperatore divina revelatione reperta sunt. Item beati Macharii abbatis, discipuli beati Antonii, vita et miraculis celeberrimi. Ipso die beati Isidori, in sanctitate vitae, fide, ac miraculis praeclari. Apud Bituricas civitatem, translatio sancti Sulpitii episcopi et confessoris, qui a pueritia sacris litteris eruditus, et sanctae conversationis luce conspicuus, etiam laicus virtutibus claruit: post etiam coma deposita monachorum pater exstitit, atque inde ad episcopalem provectus cathedram, vita clarus quievit. Et sancti Mauri abbatis.
1.1.16
EDITIO COLONIENSIS. MENSIS JANUARIUS habet dies XXXI, Lunam XXX. B. XVIII KALEND. FEBR.
1.1.16
-- Romae via Salaria in coemiterio Priscillae, natale sancti Marcelli papae: qui, jubente Maximiano imperatore, primo fustibus caesus, et a facie ejus, quem corripiebat, expulsus est. Hic fecit coemiteria in via Salaria, et viginti quinque titulos in urbe Roma constituit, propter baptismum et poenitentiam multorum, qui convertebantur ex paganis, et propter sepulturas martyrum. Post multos itaque annos in servitio Dei indutus cilicio defunctus est, et conditus aromatibus a Joanne presbytero, et beata Lucina, sepultus est in coemiterio Priscillae. Apud Arelaten sancti Honorati episcopi, cujus vita doctrina et miraculis illustris refulsit. Et sancti Fursei confessoris.
1.1.17
EDITIO COLONIENSIS. MENSIS JANUARIUS habet dies XXXI, Lunam XXX. C. XVI KALEND. FEBR.--
1.1.17
In Aegypto apud Thebaidem beati Antonii monachi, qui sine ulla scientia litterarum Scripturas divinas et memoriter audiendo intellexisse, et prudenter cogitando tenuisse praedicatur, multorumque monachorum pater vita praeclarissimus vixit: cujus corpus sub Justiniano imperatore divina revelatione repertum, Alexandriam delatum est, et in ecclesia B. Joannis Baptistae humatum. Apud Lingonas natale sanctorum geminorum Speusippi, Eleosippi, Meleosippi. Qui cum essent viginti quinque annorum, cum avia sua Leonilla, et Lonella et Neone, martyrio coronati sunt, tempore Aureliani imperatoris; gemini quidem in una arbore suspensi, ligatis manibus sursum, pedibus vero deorsum ita exstenti, ut pene putarentur ab ipsa membrorum compage separari; et post haec in ignem praecipitati, nec tamen laesi, inter verba orationum simul migrabant ad Dominum.
1.1.18
EDITIO COLONIENSIS. MENSIS JANUARIUS habet dies XXXI, Lunam XXX. D. XV KALEND. FEBR.
1.1.18
-- Cathedra sancti Petri apostoli, qua primum Romae sedit. Eodem die natale sancti Publii Athenarum episcopi, qui princeps insulae Mileti, cum navigantem beatum apostolum Paulum Romam sub custodia detentum, per triduum hospitio receptum, humane tractasset( ut beatus Lucas refert) patrem ipsius Publii contigit febribus et dysenteria vexatum jacere; ad quem cum intrasset B. Paulus, et imposuisset illi manus, et orasset, sanavit eum. Quem Publium adhaerentem sibi beatus apostolus postea ordinatum episcopum, ad praedicandum direxit: et praeclarus virtutibus, et doctrina praefulgens, ob Christum martyrio gloriose coronatur. Nam prius Dionysius, inde Publius iste Athenis praefuit. Ipso die natale sanctae Priscae virginis et martyris. Et in Ponto natale sanctorum martyrum, Mosei et Ammonii, qui cum essent milites, primo ad metalla deputati, novissime igni sunt traditi.
1.1.19
EDITIO COLONIENSIS. MENSIS JANUARIUS habet dies XXXI, Lunam XXX. E. XIV KALEND. FEBR.
1.1.19
-- In Smyrna natale sancti Germanici martyris. Qui cum primaevae aetatis venustate floret, per gratiam virtutis Dei metum corporeae fragilitatis excludens, sponte praeparatam sibi bestiam damnatus a judice provocabat; ejus dentibus comminutus, vero pani, id est, Domino Jesu Christo moriens, pro ipso meruit incorporari. Eodem die sancti Pontiani martyris. Ipso die natale sanctorum Marii et Marthae, cum filiis suis, Audiface et Abacuc, nobilium de Persida, qui ad orationem venerunt Romam tempore Claudii principis; e quibus post toleratos fustes, equuleum, ignes, ungues, manuum praecisionem, Martha in puteum projecta necata est, caeteri sunt decollati, et aliorum plurimorum.
1.1.20
EDITIO COLONIENSIS. MENSIS JANUARIUS habet dies XXXI, Lunam XXX. F. XIII KALEND. FEBR.
1.1.20
-- Romae Fabiani episcopi, qui cum quatuordecim annos, menses undecim, dies duodecim Ecclesiae praeesset, passus est martyrium, tempore Decii, et in coemiterio Callisti sepultus. Hic regiones divisit diaconibus, et fecit septem diaconos, qui septem notariis praeeminerent, ut gesta martyrum in integrum colligerent. Eodem die sancti Sebastiani martyris, qui in tantum carus erat Diocletiano et Maximiano imperatoribus, ut principatum ei primae cohortis traderent. Quem Diocletianus ubi Christianum cognovit, jussit ligari in medio campo, quasi signum ad sagittam, et sagittari a militibus. Qui cum sagittis plenus, quasi hericius staret, putantes eum mortuum, abierunt. Nocte autem veniens quaedam mulier, nomine Hirene, tollere corpus, invenit eum vivum, et adduxit in domum suam, et curam ejus egit; qui ubi convaluit, multos in fide confortavit, nec mora, ipsis imperatoribus apparens, hos prout digni erant, corripuit. Tunc jussit eum Diocletianus in hippodromum palatii duci, et fustigari donec deficeret; quem mortuum, in cloacam maximam miserunt. Sed ille apparuit in somnis sanctae matronae Lucinae, dicens, juxta Circum invenies corpus meum pendens in unco, hoc sordes non tetigerunt; et dum levaveris, perduces ad Catacunbas, et sepelies me in crypta, juxta vestigia apostolorum; quae ipsa nocte veniens cum servis, totum ita complevit.
1.1.21
EDITIO COLONIENSIS. MENSIS JANUARIUS habet dies XXXI, Lunam XXX. G. XII KALEND. FEBR.
1.1.21
-- Natale beatissimae Agnetis virginis et martyris, quae tertio decimo aetatis suae anno, in urbe Roma passa est. Haec dum ab scholis revertitur, a praefecti filio adamatur: quam cum nullo modo sibi associare voluisset, post multa tormenta in gutture ejus gladio percussa est. Passa est autem beata Agnes sub praefecto urbis Simphoriano, vicario ejusdem urbis Aspasio. In Hispania civitate Tarracona natale sanctorum Fructuosi episcopi, Auguli et Eulogii diaconorum, qui tempore Gallieni sub Aemyliano praeside, primo in carcerem trusi, deinde flammis injecti, exustis vinculis, manibus in modum crucis expansis, orantes ut urerentur, obtinuerunt, et mox unus e fratribus et filia praesidis, quae assistebat, viderunt sanctorum animas coelum conscendere coronatas. Apud Trecas sancti Patrocli martyris.
1.1.22
EDITIO COLONIENSIS. MENSIS JANUARIUS habet dies XXXI, Lunam XXX. A. XI KALEND. FEBR.
1.1.22
-- In Hispaniis natale sancti Vincentii diaconi et martyris, qui cum Valerio episcopo suo a Caesaraugusta civitate Valentiam usque gravibus nexus catenis, jubente Daciano, perductus est, ibique fame et squalore carceris diu maceratus, tormentis equulei, et ungularum horrenda laceratione vexatus, etiam grabato ferreo diutissime ustulatus, arvinae guttis, et crepitante sale perfusus est; post haec in teterrimum carcerem trusus, divaricatis in nervo cruribus, super acutissima testarum fragmenta projectus est; ubi nocte lux ingens apparuit, et virtute Dei solutus martyr inter angelos, a quibus visitari meruit, hymnum canebat, ita ut ipse custos crederet. Mane autem facto, cum jussisset eum Dacianus in lecto mollissimo reclinari, ut aliquantulum recreatus acrius denuo torqueretur, infatigabilem spiritum Christo reddidit. Tunc Dacianus corpus ejus in campum feris et avibus jussit exponi; sed mox corvus divinitus ad custodiam ejus datus, non solum alias aves arcebat, sed et immanem lupum a sancto corpore repulit. Quod cum nuntiatum Daciano esset, jussit eum insutum culeo, in profundum maris cum gravissimo saxi pondere immergi; sed prius virtute Dei super undas natans ad littus delatus, et arenis conditus est, quam remiges portum tangere potuissent. Inde cum se sanctus martyr cuidam fideli anui Jonicae revelasset, cessante persecutionis rabie, a Christianis reverenter sublatus, et in basilica conditus est. In Galliis civitate Ebreduno, sanctorum martyrum, Vincentii, Orontii et Victoris. Romae ad Aquas Salinas natale sancti Anastasii monachi, et martyris de Persida, qui post plurima tormenta carceris, verberum et vinculorum, quae in Caesarea Palaestinae perpessus fuerat, a Persis postremo in Perside multa poena affectus, atque ad ultimum decollatus est a rege eorum Chosroe, cum aliis septuaginta. Reliquiae corporis ejus prius Hierosolymis ad monasterium suum, deinde Romam delatae, venerantur in monasterio beati Pauli apostoli, quod dicitur ad Aquas Salinas; et sancti Vincentii presbyteri et martyris.
1.1.23
EDITIO COLONIENSIS. MENSIS JANUARIUS habet dies XXXI, Lunam XXX. B. X KALEND. FEBR.
1.1.23
-- Romae sanctae Emerentianae virginis et martyris, quae erat collactanea sanctae Agnetis, et dum oraret ad sepulcrum ejus, ut eam a gentilium laesione defenderet, lapidata est ab eis. Et in Mauritania, civitate Neocaesareae, natale sancti Severiani, et Aquilae uxoris ejus, ignibus combustorum; in Philippis beati Parmenae diaconi, qui unus fuit de septem diaconibus. Qui traditus gratiae Dei a fratribus, injunctum officium praedicationis plena fide consummavit, martyrii gloriam adeptus, Philippis quievit.
1.1.24
EDITIO COLONIENSIS. MENSIS JANUARIUS habet dies XXXI, Lunam XXX. C. IX KALEND. FEBR.--
1.1.24
Apud Ephesum natale sancti Timothei discipuli beati Pauli, qui apud Ephesum a beato apostolo episcopus ordinatus, post multos pro Christo agones dormivit; cujus corpus cum reliquiis beati Andreae et Lucae vicesimo Constantii anno Constantinopolim translatum est. Apud Antiochiam sancti Babylae episcopi, qui persecutione Decii, posteaquam frequenter passionibus suis et cruciatibus glorificaverat Dominum, gloriosae vitae finem sortitus est in vinculis, de quo in decimo Ecclesiasticae historiae libro grande narratur miraculum. Nam cum Julianus imperator ad idolorum cultum conversus, quodam tempore Daphnis in suburbio Antiochiae juxta fontem Castalium litaret Apollini, et nulla ex his quae quaerebat, responsa susciperet, causasque silentii percontaretur a sacerdotibus, responderunt daemones, Babylae martyris sepulcrum prope assistere, et ideo responsa non reddi. Tunc ille venire Galilaeos( hoc enim nomine nostros appellare solitus erat) et auferre sepulcrum martyris jubet. Mox igitur Christiani convenientes magna exsultatione succincti, sustulere arcam martyris, et psallentes in auribus profani principis, per sex millia passuum summis vocibus et cum exsultatione dicebant: Confundantur omnes qui adorant sculptilia, et qui gloriantur in simulacris suis. Et Neocaesarea civitate natale sanctorum martyrum, Martioni, Musonii, Eugenii, Mitelli, qui igni traditi sunt, et reliquiae eorum in Axium fluvium dispersae. Et natale trium parvulorum, Urbani, Prilidani et Eupoloni.
1.1.25
EDITIO COLONIENSIS. MENSIS JANUARIUS habet dies XXXI, Lunam XXX. D. VIII KALEND. FEBR.
1.1.25
-- Conversio sancti Pauli. Eodem die sancti Ananiae apud Damascum, qui beatum Paulum baptizavit. Apud Gabilonem civitatem sancti Severiani episcopi, mirandae sanctitatis et doctrinae viri: item natale Praejecti Arvernensis episcopi, et natale sancti Gregorii theologi.
1.1.26
EDITIO COLONIENSIS. MENSIS JANUARIUS habet dies XXXI, Lunam XXX. E. VII KALEND. FEBR.
1.1.26
-- Natale sancti Polycarpi beati Joannis apostoli discipuli, qui ab eo Smyrnae episcopus ordinatus, totius Asiae princeps fuit; et post dira tormenta ad ultimum positus in medio rogo, mucrone perfossus, tam largus profusus est sanguis, ut ignem exstingueret. Passi sunt cum eo et alii duodecim ex Philadelphia venientes. Tunc etiam Germanicus, athleta Christi insignis, glorioso martyrii agone translatus est; nam cum a judice damnatus fuisset ad bestias, ultro sibi praeparatam bestiam provocavit, despiciens temporalem mortem, et coronam vitae aeternae veloci fine adipisci desiderans. Eodem dic natale sancti Theogenis martyris, et aliorum sex. Apud Bituricas civitatem, sancti Sulpitii episcopi et confessoris.
1.1.27
EDITIO COLONIENSIS. MENSIS JANUARIUS habet dies XXXI, Lunam XXX. F. VI KALEND. FEBR.
1.1.27
-- Natale sancti Joannis episcopi Constantinopolitani, cognomento Chrysostomi, qui verbo atque exemplo plurimum profuit Christianae religioni. Item beati Mauri abbatis monasterii Bobacensis. Et apud Bethleem dormitio beatae Paulae matris Eustachii virginis Christi. Quae cum esset e nobilissimo senatorum genere, abrenuntians saeculo, et opibus suis in pauperes erogatis, Christi consecuta est paupertatem, et apud praefatum oppidum Dominica nativitate gloriosum monasterii virginalis exstitit mater. Hujus vitam virtutibus admirandam sanctus Hieronymus scribens, testatur eam longo coronatam esse martyrio. Et sanctorum Doti, Juliani, Vincentii et aliorum XXVII.
1.1.28
EDITIO COLONIENSIS. MENSIS JANUARIUS habet dies XXXI, Lunam XXX. G. V KALEND. FEBR.
1.1.28
-- Natale sanctae Agnetis secundo. Et in civitate Apollonia, Leucii, Tyrsi, Calenici martyrum, qui tempore Decii imperatoris sub praesidibus Cumbritio, Silvano et Baudo, diversis tormentorum generibus excruciati. Primus et ultimus abscissione capitis, medius coelesti voce evocatus, spiritum reddens martyrium consummaverunt, et in Christo quieverunt. Apud Alexandriam B. Cyrilli episcopi, qui catholicae fidei praeclarissimus exstitit propugnator. Et in monasterio Leomanensi Joannis presbyteri, viri Dei.
1.1.29
EDITIO COLONIENSIS. MENSIS JANUARIUS habet dies XXXI, Lunam XXX. A. IV KALEND. FEBR.
1.1.29
-- Romae natale Papiae et Mauri, militum, tempore Diocletiani, qui videntes constantiam Saturnini et Sisinii martyrum, conversi sunt ad fidem, statimque jussum est a Laodicio urbis praefecto, ut os eorum, qui Christum confitebantur, cum lapidibus contunderentur, et retruderentur in carcerem, ubi baptizati sunt a beato papa Marcello, quos post dies duodecim eductos jussit sterni in terram, et fustibus caedi; deinde levatos de terra plumbatis caedi, donec exspirarent. Quorum corpora colligens nocte Joannes presbyter, sepelivit via Numentana ad nymphas beati Petri, ubi baptizabat. Scriptum est in gestis beati papae Marcelli: Treveris depositio beati Valerii episcopi, discipuli sancti Petri apostoli.
1.1.30
EDITIO COLONIENSIS. MENSIS JANUARIUS habet dies XXXI, Lunam XXX. B. III KALEND. FEBR.
1.1.30
-- Apud Antiochiam passio sancti Hippolyti, qui Novati schismate aliquantulum deceptus, operante gratia Christi correctus, ad charitatem Ecclesiae rediit, pro qua, et in qua, postea illustre martyrium consummavit. Hierosolymis beatissimi Matthiae episcopi, de quo mira et fide plena gesta narrantur, qui multa pro Christo perpessus, ultimo in pace vitam finivit, qui octavus post Jacobum rexit Ecclesiam. Item beati Alexandri. Hic Deciana persecutione pro confessione fidei judiciis sistitur, et vinculis carceris traditur. Qui cum longaevae aetatis veneranda canitie praefulgeret, postquam frequenter passionibus suis glorificaverat Dominum, cum de vinculis ad tribunalia, et a tribunalibus revocaretur ad vincula, inter ipsa vicissim sibi succendentia tormenta bono fine quievit. In Albodio monasterio natale Aldegundae virginis, quae temporibus Dagoberti regis Francorum ex nobili genere progenita, virginitatis propositum elegit, in quo et permansit, saepiusque, illi angelica visio revelata fuit, exhortans eam, ut in proposito permaneret, novissime vero cum magna claritate coelestis luminis ad vitam migravit.
1.1.31
EDITIO COLONIENSIS. MENSIS JANUARIUS habet dies XXXI, Lunam XXX. C. PRID. KALEND. FEBR.--
1.1.31
Apud Alexandriam natale sancti Methrani martyris, quem pagani correptum jubent impia verba proferre. Quod illo recusante, omne corpus ejus fustibus colliserunt, vultumque et oculos acutis calamis terebrantes, extra urbem cum cruciatibus expulerunt, ibique quod in eo supererat spiritus lapidibus ejecerunt. Item Saturnini, Thyrsi et Victoris, et apud Tridentinam urbem, beati Vigilii episcopi et martyris; et natale sanctorum, Rarsi, Zotici, Ammonini, et Publii.
1.2.1
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. D. KALEND. FEBR.
1.2.1
-- Apud Antiochiam passio sancti Ignatii episcopi et martyris. Apud Smyrnam sancti Pionii martyris, qui persecutione Antonini Veri, post insuperabilem responsionum constantiam, et squalorem carceris, ubi multos fratrum ad martyrii tolerantiam suis exhortationibus roboravit, ad ultimum cruciatibus multis vexatus, clavis confixus, et ardenti rogo superpositus, beatum pro Christo vitae finem sortitus est. Passi sunt cum eo et alii XV. Eodem die B. Effrem Edessenae ecclesiae diaconi. Apud Scotiam sanctae Brigidae virginis, cujus vita miraculis claruit. Quae cum lignum altaris in testimonium virginitatis tetigisset, viride factum est. Et natale sancti Pauli episcopi civitatis Trecassinae, cujus et vita virtutibus claruit, et mors pretiosa miraculis commendatur. In Graecia sancti Polycarpi episcopi, et in Ravenna sancti Severi episcopi.
1.2.2
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. E. IV NON. FEBR.
1.2.2
-- Purificatio sanctae Mariae, quando cum infante repraesentata est in templo. Apud Caesaream beatissimi Cornelii centurionis, quem beatus Petrus baptizavit: quique apud praefatam urbem episcopali honore sublimatus, quievit. Romae sancti Aproniani martyris, qui sub persecutione Maximiani imperatoris, cum praesentasset aspectibus Laodicii praefecti beatum Sisinium diaconum eductum de carcere( erat enim commentariensis) et subito factam lucem vidisset, vocemque pariter audisset, tremefactus cecidit ad pedes Sisinii diaconi, dicens: Adjuro te per Christum quem confiteris, ne tardes me baptizare, faciasque me pertingere coronam. Quem beatus Sisinius baptizatum, ad consignandum sacro chrismate Marcello papae obtulit. Quo praefectus comperto, jussit eum capitalem subire sententiam. Perductus est itaque via Salaria milliario secundo, et truncatus capite, martyr victorque decessit. Aurelianis depositio Siccariae virginis Deo sacratae. In foro Sempronii sanctorum Laurentii, Hippolyti, et natale sancti Fortunati.
1.2.3
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. F. III NON. FEBR.
1.2.3
-- Apud Sebasten civitatem Cappadociae, passio sancti martyris Christi Blasii episcopi, qui sub Agricola praeside capite truncatus est cum duobus puerulis, filiis unius mulieris de illis septem, quae per praedicationem ejus confortatae, et sub eodem praeside sunt martyrizatae. Lugduni depositio beati Lupicini episcopi. Viennae sancti Eventii gloriosi episcopi. In Africa beati Celerini diaconi et confessoris; et sanctorum martyrum Celerinae aviae ejus, et Laurentini et Ignatii; quorum prior patruus, sequens avunculus ipsius fuit, de quorum omnium gloriosis laudibus exstat B. Cypriani epistola.
1.2.4
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. G. PRID. NON. FEBR.
1.2.4
-- In civitate Aegypti, quae appellatur Thmuis, passio B. Phileae, ejusdem urbis episcopi; et Philoromi tribuni militum Romanorum, cum quibus etiam innumera multitudo fidelium, ex eadem urbe pastoris sui vestigia sequens persecutione Diocletiani martyrio coronata est. In foro Symfronii natale Gemini, Gelasii, Mamni, Aquilini et Donati. Item Themoi, Gelasii.
1.2.5
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. A. NON. FEBR.
1.2.5
-- In Patras civitate ordinatio episcopatus sancti Andreae apostoli. Apud Siciliam civitatem Cathanensium passio sanctae Agathae virginis sub Quintiano consule, tempore Diocletiani; quae post alapas et carcerem, post equuleum et torsiones, post mammillarum abscissionem, sed a Domino sanationem; post volutationem in testulis et carbonibus, tandem in carcere consummata est. Viennae beati Aviti episcopi, cujus fide et industria atque mirabili doctrina, tempore Godobardi regis, ab infestatione Arianae haereseos Galliae defensae sunt, et sanctorum Felicis, Fortunati et Saturnini.
1.2.6
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. B. VIII IDUS FEBR.
1.2.6
-- Romae via Appia in coemiterio ejusdem passio sanctae Sotheris virginis. In Caesarea Cappadociae natale sanctae Dorotheae virginis, et Theophili sub Apricio praefecto. Quae cum commendata esset duabus sororibus, id est, Christae et Calistae, quae a fide nuper apostatarant, victae doloribus, ut eam averterent a Christo, eas iterum convertit ad Christum, ita ut in cupam missae per praefectum, incensae ad martyrii palmam pervenerint. Postea vero Dorothea ducta ad locum poenarum, ubi et passa est, cum a Theophilo quodam scholastico irrideretur, quod ad paradisum vadens, a sponso suo Christo rosas et mala ei mitteret; quae statim promisit se esse missuram. Ubi ergo ventum est ad locum, in quo jugulanda erat, paulisper oratione facta, protulit orarium suum, et vocato ad se quodam puerulo annorum sex, misit Theophilo, dicens: Dic ei, Dorothea ancilla Dei, mittit tibi mala de paradiso sponsi sui Christi. Is accipiens, et gratias agens, quod petitionem ejus implesset; coepit sibi faciem tergere, tantaque repente suavitate perfusus est, ut tota mente mutaretur; et cum grandi exsultatione et clara voce saepius replicaret: Benedictum nomen Domini mei Jesu Christi, ob hanc confessionem mox et ipse tentus, ac suspensus in equuleo tanta crudelitate tortus est, ut omnes circumstantes horrescerent, novissime caeso capite martyrium consummavit. Apud Arvernam urbem natale sancti Anatholii martyris. In Gallia civitate Aderato, depositio sancti Vedasti episcopi et confessoris. Et in Ellone monasterio depositio sancti Amandi episcopi et confessoris. Romae Zotici, Irenaei, Jacincti et Amantii. In Oriente sanctae Sotheris virginis, quae graviter et diutissime alapis caesa, cum centum quoque, poenarum genera vicisset, gladio martyrium consummavit.
1.2.7
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. C. VII IDUS FEBR.--
1.2.7
In Britanniis civitate Augusta natale sancti Auguli episcopi et martyris; et sancti Moysetis venerabilis episcopi, qui primo quidem in eremo solitariam vitam ducens, meritis et virtutibus ac signis quae faciebat per illum Deus, magnifice innotuit, qui postmodum petente Manvia Saracenorum regina, episcopus gentis illius factus, fidei catholicae custodivit intemerata consortia, et gentem cui datus fuerat episcopus, ex grandi parte ad fidem Christi convertit, sicque in pace quievit.
1.2.8
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. D. VI IDUS FEBR.
1.2.8
-- Romae natale sancti Pauli episcopi, et Julii papae. Apud Armeniam minorem natale sanctorum Dionysii, Aemiliani et Sebastiani. Apud Alexandriam natale sanctae Cointhae martyris. Hanc pagani correptam ad idota perducentes, adorare cogebant. Quae cum illa execrans recusaret, vincula pedibus ejus innectentes, et per plateas totius civitatis eam trahentes, horrendo supplicio discerpserunt. Et sanctae Helenae reginae.
1.2.9
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. E. V IDUS FEBR.
1.2.9
-- In Alexandria sanctae Apolloniae virginis, cui persecutores omnes primum dentes excusserunt; deinde constructo ac succenso rogo, cum comminarentur vivam se eam incensuros, nisi cum eis impia verba proferret. At illa ut rogum vidit esse succensum, paululum quid intra semetipsam deliberans, repente de manibus impiorum prorupit, et in ignem quem paraverant, sponte prosilivit; ita ut perterrerentur etiam ipsi crudelitatis auctores, quod promptior inventa est ad mortem femina, quam persecutor ad poenam. Suevo apud Cyprum natale sancti Alexandri, Ammonii. Item Ammonis, et aliorum triginta octo.
1.2.10
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. F. IV IDUS FEBR.
1.2.10
-- In Campania natale sancti Sylviani episcopi et confessoris. In Bethleem civitate Judaeae, sub Herode rege passio sancti Andreae apostoli. Sanctonis civitate depositio sancti Trojani episcopi et confessoris, et Baldegundis abbatissae. Romae via Lavicana militum decem, et depositio sanctae Scholasticae virginis.
1.2.11
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. G. III IDUS FEBR.
1.2.11
-- Romae Calocerii et Parthemii. Lugduni sancti Desiderii episcopi et martyris. Apud Viennam sancti Simplidis episcopi et confessoris. Item Alexandriae depositio Eufrosinae virginis, quae in monasterio mira virtute abstinentiae et miraculis claruit.
1.2.12
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. A. PRID. IDUS FEBR.
1.2.12
-- In Hispaniis civitate Barcinomae natale sanctae Eulaliae virginis, quae passa est tempore Diocletiani imperatoris, sub praefecto Hispaniarum Datiano; quando sub eodem apud Barcinomam, sanctum Cuxupatem, et apud Gerundam, sanctum Felicem gloriosas constat martyrii accepisse coronas. In Africa passio sancti Damiani militis. In Alexandria Modesti et Ammonii infantum: et depositio Simplicii episcopi et confessoris.
1.2.13
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. B. IDUS FEBR.
1.2.13
-- Apud Antiochiam natale Agabi prophetae, de quo beatus Lucas scribit in Actibus apostolorum. In Militana civitate Armeniae natale sancti Polyocti martyris, qui Latine interpretatur multum orans. Et natale sancti Gregorii papae, qui rexit Ecclesiam annos sedecim, Leonis et Constantini imperatorum tempore. Hic vir castus, et in divinis Scripturis eruditus; hic in Germania per Bonifacium episcopum verbum salutis praedicavit: ille Quadragesimali tempore, ut quinta feria jejunium atque missarum celebritas fieret, quod non agebatur, instituit. Lugduni depositio B. Stephani episcopi.
1.2.14
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. C. XVI. KAL. MARTII.--
1.2.14
Romae natale sancti Valentini presbyteri, qui post multa sanitatum et doctrinae insignia fustibus caesus est, et sic decollatus est sub Claudio Caesare. Eodem die natale sancti Valentini Interamnensis episcopi, qui tentus a paganis ac virgis caesus, post diuturnam caedem custodiae mancipatus, cum superari non posset, medio noctis silentio ejectus de carcere, decollatus est jussu furiosi Placidi, Urbis praefecti. Tunc Proculus, Ephibus et Apollonius, discipuli ejus transferentes corpus ad suam ecclesiam Interamnae urbis, noctu sepelierunt. Ubi cum quotidianis vigiliis incubarent, tenti a gentilibus custodiae sunt traditi consulari Leontio; quos ille jussit noctis medio suis tribunalibus praesentari, et cum a fide revocari, nec blandimentis nec minis possent, jussit capite caedi, qui non longe sunt a corpore sancti Valentini sepulti. Eodem die sanctorum martyrum Vitalis, Feliculae et Zenonis. Apud Alexandriam sanctorum Bassi, Antonii, Protolici, qui immersi sunt mari. Item Cirionis presbyteri, Moseos, Bassiani lectoris, Agathonis exorcistae, qui omnes igni combusti sunt. Item Dionysii, Ammonii decollatorum.
1.2.15
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. D. XV KAL. MARTII.
1.2.15
-- Romae sancti Cratonis martyris. Qui cum haberet filium Cerimonem nomine scholasticum, qui inciderat in aegritudinem gravissimam, eumque beato Valentino episcopo ad sanandum obtulisset, sub tali conditione, ut si puer sanaretur, ipse cum omni domo sua fieret christianus, sanato puero, quod promiserat, implevit; atque cum uxore et universa domo baptizatus, non multis post diebus martyrio est consummatus. In Galliis civitate Vasionense, depositio Quinidii episcopi, cujus mortem in conspectu Domini pretiosam miracula crebra testantur. In Antiochia natale sancti Joseph diaconi, Zenonis. Interamnae, natale sanctae Agapae virginis, Saturnini et Castulae. In civitate Prexia sanctorum Faustini et Ionitae martyrum.
1.2.16
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. E. XIV KAL. MARTII.
1.2.16
-- Natale sancti Onesimi apostoli, de quo B. apostolus Paulus Philemoni familiares litteras mittit. Quem beatus idem apostolus episcopum ordinans, praedicationisque verbum ei committens, apud Ephesiorum civitatem reliquit, cui episcopus post beatum Timotheum et ipse resedit. Hic Romam perductus, atque ibi per fidem Christi lapidatus, sepultus est Christi martyr primum ibi, inde ad loca, ubi fuerat ordinatus episcopus, corpus ejus delatum est. Et in Cumis natale sanctae Julianae virginis, quae tempore Maximiani imperatoris primo a suo patre Africano caesa, et graviter cruciata, deinde et a praefecto Eleusio, quem sponsum habuerat, nuda virgis caesa, et a capillis suspensa est, et plumbo soluto capite perfusa, et rursum in carcerem recepta, ubi palam cum diabolo conflixit, et rursus evocata rotarum tormenta, flammas ignium, ollam ferventem superavit, ac decollatione capitis martyrium consummavit. Quae passa est quidem in Nicomedia, sed post paucum tempus Deo disponente in Campaniam translata. Apud Aegyptum Juliani, cum aliis numero quinque millibus.
1.2.17
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. F. XIII KAL. MARTII.
1.2.17
-- In Babylonia natale Polichronii episcopi ejusdem civitatis, qui praesente Decio persecutore, ore lapidibus caeso, manibus extensis, oculos ad coelum elevans, emisit spiritum. Scriptum est in passione sancti Laurentii.
1.2.18
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. G. XII KAL. MARTII.
1.2.18
-- Hierosolymis beati Symeonis episcopi et martyris, qui traditur propinquus Salvatoris secundum carnem fuisse; constat tamen quia Cleophas, cujus filius iste fuit, frater erat Joseph. Eodem die sanctorum martyrum Claudii, et uxoris ejus Praepedignae, et filiorum Alexandri, et Cutiae, fratris Claudii beati Maximi. Qui cum essent praeclarissimi generis, agente fratre eorum Gabinio presbytero, baptizati sunt a beato Gaio, pontifice Romano, et postmodum tenti sunt, jubente Diocletiano a judice impio Julio; et Claudius quidem cum uxore sua et filiis deportatus in exsilium, deinde incendio concremati odoriferum sacrificium martyrii Deo reddiderunt, ac sic postmodum apud Hostiam in mare jactati sunt, quorum reliquias Christiani perquisitas juxta civitatem sepelierunt.
1.2.19
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. A. XI KAL. MARTII.
1.2.19
-- Romae sancti Gabinii presbyteri, patris beatissimae Susannae: qui a Diocletiano diu in custodia vinculis afflictus, pretiosa morte coeli gaudia comparavit. In Africa natale sanctorum Publii, Juliani, Marubii. Item Juliani, Marcelli, Tuli, Lampasi, Inauli.
1.2.20
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. B. X KAL. MARTII.
1.2.20
-- Romae natale Gaii, papae. Et in Cypro natale Potamiae, Nemersi et Didymi, et alibi Victoris, martyrum, et Coronae, et aliorum viginti. Apud Tyrum, quae est urbs maxima Phoenicis, natale beatorum martyrum, quorum numerum Dei scientia sola colligit, quos jubente Diocletiano Veturius magister militiae diversis tormentorum generibus sibi invicem succedentibus, occidit. Primo flagris per omne corpus martyres Dei dilaniabantur, post haec tradebantur ad bestias; adhibebantur leones, ursi, pardi, apri quoque et tauri; sed a nullo horum laesi, ad ultimum gladiis peragunt, quod bestiis nequiverunt. Hos ducebant Tyrannio et Sylvanus episcopi, qui postea bestiarum morsibus martyrium compleverunt. Pelenus atque Linus episcopi cum plurimis clericis igne consumpti, Zenobius presbyter capite caesus.
1.2.21
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. C. IX KAL. MARTII.--
1.2.21
In Africa natale sanctorum Veroli, Servoli, Secundini, Siricii, Felicis, Saturnini, Fortunati, et aliorum sedecim. Et depositio Eucherii episcopi. Apud Siciliam sanctorum martyrum 79, sub Diocletiano per diversa tormenta confessionis suae coronam a Christo sibi paratam percipere meruerunt.
1.2.22
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. D. VIII KAL. MARTII.
1.2.22
-- Cathedra sancti Petri, qui sedit apud Antiochiam, ubi et primum cognominati sunt discipuli Christiani. Apud Alexandriam Abilii episcopi, qui post B. Marcum secundus episcopus, tredecim annos sacerdotium ministravit. In Ierapoli sancti Papiae episcopi, auditoris Joannis apostoli. Viennae sancti Pascasii episcopi et confessoris. Item beati Aristionis, qui fuit unus de 72 discipulis Christi. In Nicomedia natale sanctae Teclae virginis, discipulae sancti Pauli apostoli, quae sub Nerone imp. pro Christi nomine igni est tradita, sed non exusta: postea serpentibus atque bestiis deputata, sed a nullo eorum est laesa; ad extremum vero in Seleucia cum virginitatis martyrio atque virtutum honore per somnum pacis migravit ad Dominum. Romae via Tiburtina ad sanctum Laurentium natale sanctae Concordiae, quam Deciana persecutio trucidavit.
1.2.23
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. E. VII KAL. MARTII.
1.2.23
-- In Pannoniis natale sanctorum Seroneti, Antigonii, Rutuli, Libi. Ipso die sancti Polycarpi presbyteri et confessoris, qui cum beato Sebastiano plurimos ad fidem Christi convertit, atque ad martyrii gloriam cohortando perduxit. Apud Sirmium natale sancti Syreni monachi, qui tempore Maximiani imperatoris, cum unus ex do mesticis ejus uxorem, hora incongrua in horto, quem ipse sibi excolebat, deambulantem, acrius increpando repulisset, jubente Maximiano tentus, et Christianum se esse confessus, capite caesus est. Item aliorum 62, qui ibidem passi sunt. Et vigilia sancti Matthiae apostoli.
1.2.24
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. F. VI KAL. MARTII.
1.2.24
-- Natale sancti Matthiae apostoli, qui de septuaginta discipulis pro Juda traditore ab apostolis electus, sorte in apostolatum subrogatus, in Judaea Christi Evangelium praedicavit. Et inventio capitis praecursoris, tempore Marciani principis, quando idem praecursor duobus monachis assistens praecepit, ut ad Herodis quondam regis habitaculum accedentes, caput suum ibi requirerent, et inventum digno honore reconderent; quod ab eis inventum et assumptum, sed non multo post culpa incuriae perditum, perlatum est Emessam ab aliis, et in quodam specu in urna sub terra non pauco tempore ignobiliter reconditum est; donec denuo sese suumque caput ostendit Marcello cuidam religioso presbytero, dum in eo specu habitaret. Ex quo tempore coepit in eadem civitate B. Praecursoris decollatio ipso die quo caput inventum sive elevatum est celebrari. Apud Caesaream Cappadociae natale B. Sergii martyris, cujus gesta praeclara habentur.
1.2.25
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. G. V KAL. MARTII.
1.2.25
-- Apud Aegyptum natale sanctorum Victorini, Victoris, Nicofori, Claudiani, Dioscori, Serapionis, et Papiae sub Numeriano, agente Sabino duce. Quorum primus in pilam ex robore cavam, et undique circumforatam missus, ac per singula foramina diutissime transpunctus, et cum nimius sanguis efflueret, eductus e pila, capite caesus est. Secundus manibus ac pedibus amputatis, in eamdem pilam missus, prioris tormenta sustinuit, et novissime gladio caesus est. Tertius cum ultro in pilam fuisset ingressus, indignatus judex jussit eum inde produci, et super craticulam prunis substratam aliquantisper assari et inverti. Cumque in confessione persisteret, sublatus inde minutatim gladio concisus spiritum reddidit. Reliquorum quatuor Claudianus et Dioscorus, flammis incensi, Serapion et Papias gladio consummati sunt. In Africa natale sanctorum Donati, Justi, Rotuli, Herenae, Pisionis, Pamphili, Nestoris et Castae, et sanctae Walpurgae virginis.
1.2.26
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. A. IV KAL. MARTII.
1.2.26
-- In civitate Pergen Pamphyliae, natale sancti Nestoris episcopi, qui sub persecutione Decii cum die noctuque orationi insisteret, postulans ut grex Christi custodiretur; comprehensus a quodam Irenarcho principe civitatis, oblatus est praesidi Pallioni. Et cum nomen Christi confiteretur, deos gentium daemonia memoraret, jussus est a praeside crudelissime torqueri; praeses vero stupens super tolerantiam ejus dixit ei: Vis nobiscum esse, aut cum Christo tuo? Cui sanctus Nestor cum gaudio magno respondit dicens: Cum Christo meo et eram, et sum, et ero. Tunc praeses dictavit sententiam, ut qui Christum crucifixum fateretur, tanquam devotus Deo suo, crucifixus solveretur a vita. Ille gratias agens Deo, cum jam affixus esset patibulo, docebat populum christianum ut in fide persisterent. Post haec petens omnes ut genua flectentes cum eo orarent, expleta oratione, cum dixissent omnes Amen, reddidit spiritum. Eodem die B. Alexandri, Alexandrinae civitatis episcopi, gloriosi senis, qui post beatum Petrum, Arrium presbyterum suum, haeretica impietate depravatum, et divina veritate conjunctum, de Ecclesia ejecit. Item sanctorum Theonis, Opion, Justi, Donati, Ampliati, Ingenii.
1.2.27
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. B. III KALEND. MARTII.
1.2.27
-- Apud Hispaniam, in civitate Hispali, natale sancti Leandri episcopi, ad quem beatus Gregorius libros Moralium scripsit, cujus praedicatione et industria tota Visigothorum gens ab Arriana impietate conversa est. Eodem die in Alexandria natale sancti Juliani martyris. Qui cum ita podagra esset constrictus, ut neque incedere neque stare posset, in sellula judici offertur, cum his qui eum portabant, quorum unus negavit, alter nomine Eunus, cum Juliano sene in confessione Christi perdurat. Quique jubente judice camelis impositi, et per totam circumducti urbem, et flagris hinc inde inspectante populo laniati sunt, usquequo finem ipsis verberibus sortirentur. Apud Lugdunum sancti Baldimeris viri Dei. In Thessalonica natale Alexandri, Androgoni, Abundantii. In Africa Dionysii, et aliorum viginti quatuor.
1.2.28
EDITIO COLONIENSIS. FEBRUARIUS, Habet dies XXVIII, lunam XXIX; in bissextili anno dies XXIX. C. PRID. KAL. MARTII.--
1.2.28
In territorio Lugdunensi locis virentibus beati Romani abbatis, qui primus illic vitam eremiticam duxit, et multis virtutibus ac miraculis clarus, plurimorum postea pater exstitit monachorum. Venerabile corpus ejus positum est in finibus Vesuntionum. In Alexandria sanctorum martyrum Cerealis, Pupuli, Gaii, Serapionis.
1.3.1
EDITIO COLONIENSIS. MARTIUS. Habet dies XXXI, Lunam XXX. D. KAL. MARTII.
1.3.1
-- Andegavis depositio sancti Albani episcopi. Romae sanctorum martyrum ducentorum sexaginta, temporibus Claudii, qui via Salaria arenam fodientes damnati sunt pro Christi nomine: quos jussit Claudius, ut in figlina foris muros Salariae mitterentur, et eo loco inclusi in civitatis amphitheatro, militum sagittis interficerentur. Eodem die depositio sancti Suitberti episcopi et confessoris.
1.3.2
EDITIO COLONIENSIS. MARTIUS. Habet dies XXXI, Lunam XXX. E. VI NON. MARTII.
1.3.2
-- Romae via Latina sanctorum Jovini et Basilei, qui passi sunt sub Gallieno et Valeriano imperatoribus, et Simplicii papae, qui sedit annos quindecim. Hic Acacium Constantinopolitanum episcopum, et Petrum Alexandrinum episcopum, Eutychianos, damnavit. Eodem die martyrum plurimorum sub Alexandro imperatore passorum, quos diu cruciatos impius Alexander capitali sententia in extremo damnavit. In Caesarea Cappadociae Lucae episcopi: in Portu Romano, Pauli, Secundolae, Januariae, et sanctorum Lorgi, Hergli et Absaloni.
1.3.3
EDITIO COLONIENSIS. MARTIUS. Habet dies XXXI, Lunam XXX. F. V NON. MARTII.
1.3.3
-- Natale sanctorum martyrum Emitherii et Celidonii, qui primum apud Legionensem Galatiae civitatem milites, exsurgente persecutionis procella, pro confessione nominis Christi plurimis afflicti tormentis, Callacurrim usque perducti, atque ibi martyrio coronati sunt; cumque capita lictores inciderent, miraculum populis magnum apparuit. Nam unius anulus, orariumque alterius nube susceptum, et in coelos evectum est. Viderunt haec omnes qui aderant, et usquequo acies oculorum intendere potuit, fulgorem auri, candoremque lintei attonito sequebantur intuitu. Scribit haec Aurelianus Clemens, in libro Coronatorum. Apud Caesaream Palaestinae sanctorum martyrum, militis Marini et Asterii senatoris, sub persecutione Valeriani. Scriptum est in Historia ecclesiastica. Et natale sanctorum Felicis, Lucioli, Fortunati, Marciae, Herodis, Antigonii, Januarii, Tutellae, Gabiani, Quiriuli; item Felicis, Floriani, Donati.
1.3.4
EDITIO COLONIENSIS. MARTIUS. Habet dies XXXI, Lunam XXX. G. IV NON. MARTII.
1.3.4
-- Natale sancti Lucii papae et martyris, qui persecutione Valeriani et Galieni, ob fidem Christi exsilio relegatus, et postmodum divino nutu ad Ecclesiam suam redire permissus, martyrium capitis obtruncatione complevit; positus est via Appia ad sanctum Sixtum. Sedit autem in episcopatu annos tres, menses tres, dies tres. Hic praecepit, ut duo presbyteri et tres diaconi, in omni loco episcopum non desererent, propter testimonium ecclesiasticum. Item Romae via Appia sanctorum martyrum nongentorum, qui sunt positi in coemeterio ad sanctam Caeciliam. Eodem die sancti Gaii Palatini, in mare mersi. Romae depositio Julii episcopi et Nicomedis, et passio sanctorum Adriani cum aliis numero triginta tribus.
1.3.5
EDITIO COLONIENSIS. MARTIUS. Habet dies XXXI, Lunam XXX. A. III NON. MARTII.
1.3.5
-- Apud Antiochiam passio sancti Phocae martyris, qui post multas, quas pro nomine Redemptoris est passus, injurias, qualiter de antiquo illo serpente triumphaverit, hodie quoque populis declaratur. Denique si in quempiam locum coluber morsum stringens, venena diffuderit, extemplo qui percussus est, ut januam Basilicae martyris credens attigerit, evacuata virtute veneni salvatur. Item ipso die sancti Eusebii Palatini, et aliorum novem martyrum.
1.3.6
EDITIO COLONIENSIS. MARTIUS. Habet dies XXXI, Lunam XXX. B. PRID. NON. MARTII.
1.3.6
-- Nicomediae natale sanctorum Victoris et Victorini, qui per triennium cum Claudiano et Bassa uxore sua tormentis afflicti, et retrusi in carcerem, ibidem vitae suae cursum impleverunt. Et depositio sancti Quiriaci presbyteri.
1.3.7
EDITIO COLONIENSIS. MARTIUS. Habet dies XXXI, Lunam XXX. C. NON. MARTII.--
1.3.7
In Mauritania, civitate Tuburbinatorum passio sanctorum martyrum Perpetuae et Felicitatis, et cum eis Revocati, Saturnini et Secundoli, quorum ultimus in carcere quievit, reliqui omnes ad bestias traditi sunt, sub Severo principe, die natalis ejus. Quaeque dum adhuc servarentur in carcere, et Felicitas parturiret, omnium sanctorum commilitonum precibus impetratum est, ut octavo mense pareret. Jam vero Perpetuae inter alia concessum est, ut ejus mens quodammodo averteretur a corpore, in quo vaccae impetum pertulit, ita ut adhuc futurum exspectaret, quod in se jam gestum esse nesciret.
1.3.8
EDITIO COLONIENSIS. MARTIUS. Habet dies XXXI, Lunam XXX. D. VIII IDUS MARTII.
1.3.8
-- Apud Carthaginem sancti Pontiani diaconi, beati Cypriani episcopi, qui usque ad diem passionis ejus cum ipso exsilium sustinuit, et egregium volumen Vitae ipsius et Passionis reliquit, atque Dominum in passionibus suis glorificans coronam vitae promeruit. In Nicomedia Quintuli episcopi et Capitulini. In Africa Rogati, Berae, Hermae, Felicitatis, Orbani, Cyrilli episcopi, Sylvani et Mamilli.
1.3.9
EDITIO COLONIENSIS. MARTIUS. Habet dies XXXI, Lunam XXX. E. VII IDUS MARTII.
1.3.9
-- In Sebaste Armeniae minoris quadraginta militum tempore Licinii regis, sub praeside Agricolao, qui post vincula et carceres creberrimos, post caesas lapidibus facies, missi sunt in stagnum, ubi gelu constricta corpora eorum nocte disrumpebantur, et mane crurium fractione martyrium consummaverunt. Deinde corpora eorum combusta, et in fluvium projecta sunt: sed divina dispensatione reliquiae eorum sunt integrae repertae, et honore digno conditae. Erant autem nobiliores inter eos Quirion et Candidus: nomina aliorum, Domitianus, Eunoicus, Sisinius, Eraclius, Alexander, Joannes, Claudius, Athanasius, Valens, Helianus, Melion, Beditas, Achacius, Jubianus, Helius, Theodolus, Cyrillus, Flavius, Severianus, Cirion, Valerius, Chudion, Sacerdon, Priscus, Euthicius, Smaragdus, Philocimon, Aetius, Micallius, Lisymmachus, Domnus, Theophilus, Xantius, Aggius, Leontius, Isitius, Gaius, Gorgonius.
1.3.10
EDITIO COLONIENSIS. MARTIUS. Habet dies XXXI, Lunam XXX. F. VI. IDUS MARTII.
1.3.10
-- Natale sanctorum martyrum Alexandri et Gaii de Eumenia, qui apud Apamiam persecutione Antonini Veri, martyrio coronati sunt, ut scribit Apollinaris Hierosolymitanus, in libro adversum Cataphrygas. In Persida natale sanctorum martyrum numero 42. In Bobio natale Attalae abbatis et confess. In Antiochia Agapae virginis, et Marianae: Smyrnae, Phronis. In Nicomedia Palatini, Firmiani et Rustici.
1.3.11
EDITIO COLONIENSIS. MARTIUS. Habet dies XXXI, Lunam XXX. G. V IDUS MARTII.
1.3.11
-- Apud Nisenam civitatem sancti Gregorii episcopi, fratris beati Basilii Caesariensis, viri doctissimi, et eloquentia clarissimi. Apud Barcinonam Patiani episcopi, tam vita, quam sermone clari; qui optima senectute mortuus est, Theodosii principis tempore. In Alexandria, Eracli, Zosimi, Alexandri.
1.3.12
EDITIO COLONIENSIS. MARTIUS. Habet dies XXXI, Lunam XXX. A. IV IDUS MARTII.
1.3.12
-- Romae sancti Gregorii papae, qui in lege Dei luculentissimus doctor exstitit, et gentem Anglorum per Augustinum et Mellitum atque Joannem, servos Dei, ad fidem Christi convertit, qui sedit ibi annos tredecim, menses sex, dies decem. Hic augmentavit in precatione Canonis:« Diesque nostros in tua pace dispone.» Eodem die beati Innocentii papae, qui rexit Ecclesiam annos quindecim, menses duos, dies viginti unum. Hic constitutum fecit de Ecclesia, et Pelagium atque Celestinum haereticos damnavit: et constituit, ut qui natus fuisset de Christiana, per baptismum renasceretur, quod Pelagius damnabat. Apud Nicomediam beati Petri martyris sub Diocletiano, eo quod de immensis martyris sancti Nomae suppliciis causaretur, appendi jussus est, et flagris totum corpus laniari, et visceribus jam pelle nudatis, perfunditur aceto et sale: novissime in craticula prunis subterstrata vitam finivit. Item Nicomediae natale sanctorum Egdoni presbyteri, et aliorum septem, qui diebus singulis suffocati sunt, ut caeteris metus incuteretur, et passio sancti Maximiliani martyris.
1.3.13
EDITIO COLONIENSIS. MARTIUS. Habet dies XXXI, Lunam XXX. B. III IDUS MARTII.
1.3.13
-- Apud Nicomediam natale sanctorum Macedonii presbyteri, et Patriciae uxoris ejus, et filiae Modestae. In Nicaea civitate natale sanctorum martyrum Teusetae, et Horris filii ejus: Theodorae, Nymphodorae, Marcae, Arabiae, qui omnes igni traditi sunt. Julii episcopi Alexandriae.
1.3.14
EDITIO COLONIENSIS. MARTIUS. Habet dies XXXI, Lunam XXX. C. PRID. IDUS MARTII.--
1.3.14
Romae natale quadraginta septem martyrum, qui baptizati sunt a Petro apostolo, cum teneretur idem apostolus in custodia Mamerti, cum coapostolo suo Paulo, ubi novem menses detenti sunt; qui omnes sub devotissima fidei confessione Neroniano gladio consumpti sunt. In Carthagine sanctorum Donati, Effrosi, Frumini. In Nicomedia natale Felicissimi et Frontinae.
1.3.15
EDITIO COLONIENSIS. MARTIUS. Habet dies XXXI, Lunam XXX. D. IDUS MARTII.
1.3.15
-- In Cappadocia passio sancti Longini martyris, de quo in libello martyrii ejus narratur, quod aliquando militans sub centurione Romano, in passione Domini latus ejus cum lancea in cruce aperuerit, et viso terrae motu et signis quae fiebant, crediderit in Christum, poenitentiam agens de operibus pristinis; postea monachus factus, per triginta et octo annos Christo militaverit, multos convertens ad fidem Dei: ad extremum vero martyrium complevit in Cappadocia sub Octavio praeside, quem propter infidelitatem suam divino judicio percussum corporea caecitate, post martyrium suum illuminavit. Apud Thessalonicam civitatem natale sanctae Matronae: quae cum esset ancilla cujusdam Judaeae, et occulte Christum colens, deprehensa a domina sua, et usque ad mortem caesa, incorruptum spiritum reddidit.
1.3.16
EDITIO COLONIENSIS. MARTIUS. Habet dies XXXI, Lunam XXX. E. XVII. KAL. APRIL.
1.3.16
-- Romae natale sancti Cyriaci, qui post longam carceris macerationem, quam sub Maximiano pertulit, cum Sisinio condiacono suo et Smaragdo et Largo, post multa facta miracula, in quibus etiam filiam Diocletiani Artemiam ipsius rogatu a daemonio curavit ac baptizavit: filiam quoque Saporis regis Persarum Jobiam; missus illo a Diocletiano pro hoc aeque a daemonio liberavit ac baptizavit cum ipso rege et aliis quadringentis triginta: et rediens Romam post mortem Diocletiani, tentus est inter alios Christianos a filio ejus Maximiano, et in custodiam missus, eo quod sororem suam Christianam fecisset. Deinde praecepit, ut inde die processionis suae nudus catenis obligatus, ante rhedam ejus traheretur. Et post hoc eductus de carcere, cum sociis Largo et Smaragdo et Crescentiano, per Carpasium vicarium pice reliquata caput ejus perfusum est; et rursum post dies quatuor eductus denuo de carcere, in catasta extentus ac tractus, nervis et fustibus caesus, post dies aliquot, jubente Maximiano, capite truncatus est, cum Largo et Smaragdo, et aliis viginti. Scriptum est in gestis Marcelli papae. Viennae sancti Isicii episcopi.
1.3.17
EDITIO COLONIENSIS. MARTIUS. Habet dies XXXI, Lunam XXX. F. XVI KAL. APRIL.
1.3.17
-- In Scotia natale sancti Patricii episcopi et confessoris, qui primus ibidem Christum Evangelizavit. Eodem die sanctae Gertrudis virginis, et natale Mariae martyris. Haec quoque cum esset ancilla cujusdam Tertulii praeclari viri, et nollet in natali filii ejus prandiis domini sui interesse, sed magis Christianorum more jejuniis operam dare, flagellis atrocibus ab eodem domino suo lacerata est. Sed cum non posset per hoc ab instantia servitii Christi, ad idolorum cultum revocari, judici publico ad puniendum tradita est. Ubi dum carnifices eam incendio tradere voluissent, propter preces populi datae sunt ei induciae trium dierum. Triduo ergo completo, cum iterum puniri deberet, mirabiliter Domini misericordia erepta est. Nam cum orationem fudisset ad Dominum, petra ingens, quae ante eam fuerat, per medium scissa illam in se recipiebat, et undique concludens ostium furori restitit; ad quam populus concurrens, cum vellet secundum jussum principis ipsum lapidem destruere, fulmine ac tonitru coelitus emisso, plurimi eorum interierunt, ita ut duo millia et septingenti ex ipsis divino judicio exstincti fuerint; pauci vero qui remanserant, conversi ad Dominum, in Christiana religione permanserunt.
1.3.18
EDITIO COLONIENSIS. MARTIUS. Habet dies XXXI, Lunam XXX. G. XV KAL. APRIL.
1.3.18
-- Natale sancti Alexandri episcopi, qui de Cappadocia civitate sua veniens, cum desiderio sanctorum locorum Jerosolymam pergeret, et Narcissus episcopus ejusdem urbis, jam senex regeret Ecclesiam, ipsi Narcisso et multis clericis ejus revelatum est: altera die mane intrare ad episcopum, qui adjutor sacerdotalis cathedrae esse deberet. Itaque re ita completa, ut praedicta fuerat, cunctis in Palaestina in unum congregatis, adnitente vel maxime Narcisso, Hierosolymitanae Ecclesiae cum eo gubernaculum suscepit: quique persecutione Decii cum jam longaevae aetatis veneranda canicie praefulgeret, ductus Caesaream, et clausus carcere, ob confessionem Christi martyrio coronatus est. In Alexandria natale Colestici, et in Nicomedia Aprilis et Cervoli.
1.3.19
EDITIO COLONIENSIS. MARTIUS. Habet dies XXXI, Lunam XXX. A. XIV KAL. APRIL.
1.3.19
-- In Spolitana civitate natale beati Joannis, magnae sanctitatis viri et confessoris, qui peregrinus de Sicilia illuc venit, et in suburbano ejus aedificavit monasterium, et habitavit ibi quadraginta quatuor annis, ubi et requievit in pace, ubi praestantur beneficia Dei usque in hodiernum diem. Eodem die apud Surrentum sanctorum Quinti, Quintilli, Quartillae, Marci, cum aliis novem. Lucaniae, Ingenii, et Rogatae et Timothei.
1.3.20
EDITIO COLONIENSIS. MARTIUS. Habet dies XXXI, Lunam XXX. B. XIII KAL. APRIL.
1.3.20
-- In Britanniis sancti Cuthberti, qui ex anachorita Ecclesiae Lindisfarnensis antistes, totam ab infantia sua ad senium vitam miraculorum signis inclytam duxit; cujus dum undecim annis maneret corpus humatum, incorruptum, quasi eadem hora defuncti, simul cum veste, qua tegebatur, est inventum.
1.3.21
EDITIO COLONIENSIS. MARTIUS. Habet dies XXXI, Lunam XXX. C. XII KAL. APRIL.--
1.3.21
Apud Cassinum castrum natale sancti Benedicti abbatis, cujus vitam miraculis gloriosam in Dialogorum libris beatus papa scribit Gregorius. Eodem die beati Serapionis anachoritae. Et in territorio Lugdunensi sancti Lupicini abbatis, cujus vita sanctitatis et miraculorum gloria illustris fuit.
1.3.22
EDITIO COLONIENSIS. MARTIUS. Habet dies XXXI, Lunam XXX. D. XI KAL. APRIL.
1.3.22
-- In Galliis civitate Narbone sancti Pauli episcopi et confessoris, discipuli apostolorum Christi, quem tradunt eumdem ipsum fuisse Sergium Paulum proconsulem, virum prudentem, a quo ipse Paulus sortitus est nomen, quia ipse eum fidei Christi subegerat; quique ab eodem sancto apostolo cum ad Hispanias praedicandi gratia pergeret, apud praefatam urbem Narbonem relictus, praedicationis officio non segniter impleto, clarus miraculis coronatus sepelitur. In Africa Saturnini, et aliorum novem. In Sebastia Decroni et Alionis.
1.3.23
EDITIO COLONIENSIS. MARTIUS. Habet dies XXXI, Lunam XXX. E. X KAL. APRIL.
1.3.23
-- In Africa sanctorum martyrum Victoriani, Frumentii et alterius Frumentii, et duorum germanorum, qui omnes persecutione Vandalica sub Hunerico rege Arianorum apud Africam pro constantia catholicae confessionis immanissimis suppliciis excruciati, egregie coronati sunt. In Africa natale Felicis, et aliorum viginti.
1.3.24
EDITIO COLONIENSIS. MARTIUS. Habet dies XXXI, Lunam XXX. F. IX KAL. APRIL.
1.3.24
-- Romae sancti Pigmenii presbyteri. Hic Julianum apostatam et impium a puero nutrivit, et litteris etiam sacris erudivit. Sed factus imperator, culturam pietatis postquam reliquit, audito quod corpora sanctorum martyrum, qui ab eo necabantur, idem Pigmenius sepeliret, mandavit ei:« Perge quo volueris, hic enim non mercabitur vita tua, tamen servitiis tuis reddo, non tibi.» Tunc sanctus Pigmenius in Persidam perrexit; ubi demoratus annos quatuor, factus est caecus; inde monetur Pigmenius in somnis, ut reverteretur Romam. Cumque post menses quatuor reversus, clivum Sacrae viae cum uno puero stipem petendo conscenderet, factum est ut offenderet Julianum imperatorem in rheda aurea sedentem; qui eminus conspiciens Pigmenium, vocari eum praecepit, dixitque ei:« Gloria diis deabusque meis, quia te video.« Cui vir Dei illico respondit:« Gloria Domino meo Jesu Christo Nazaraeno crucifixo, quia te non video.» Ad hanc vocem iratus Julianus jussit eum per pontem in Tiberim praecipitari. Cujus corpus inventum et collectum, sepultum est in coemeterio Pontiani, non longe a sanctis Abdon et Senne. Et natale sanctorum Seleucis et Agabi.
1.3.25
EDITIO COLONIENSIS. MARTIUS. Habet dies XXXI, Lunam XXX. G. VIII KAL. APRIL.
1.3.25
-- Apud civitatem Galilaeae Nazareth annunciatio Dominica; et Jerosolymae ubi Dominus noster Christus crucifixus est. Et in Nicomedia natale Dulae ancillae cujusdam militis pagani, quae pro castitate occisa est. Romae Cirini, qui interfectus a Claudio et in Tiberim jactatus, in insula Licaonia inventus, et in caemeterio Pontiani conditus est. Et apud Smyrnam natale sancti Irenaei episcopi, qui a tempore Maximiani imperatoris, sub praeside Probo, primo tormentis acerrimis vexatus, deinde diebus plurimis in carcere cruciatus, novissime abscisso capite consummatus est.
1.3.26
EDITIO COLONIENSIS. MARTIUS. Habet dies XXXI, Lunam XXX. A. VII KAL. APRIL.
1.3.26
-- Romae via Lavicina, in coemeterio ejusdem natale sancti Castuli; qui cum esset cetarius palatii, et hospes sanctorum, a persecutoribus arctatus, et tertio appensus, tertio auditus, in confessione Domini perseverans, missus est in foveam, et dimissa est super eum massa arenaria, atque ita cum palma martyrii migravit ad Christum. Apud Pentapolim Libyae Theodori episcopi, Irenaei diaconi, Serapionis et Ammonii lectorum; et apud Sirmium natale sancti Montani presbyteri, qui cum Maxima uxore tentus, et in fluvium praecipitatus est, corpora eorum non longe ab urbe sub lapide inventa. Et depositio sancti Luitgeri episcopi et confessoris.
1.3.27
EDITIO COLONIENSIS. MARTIUS. Habet dies XXXI, Lunam XXX. B. VI KALEND. APRIL.
1.3.27
-- Hierosolymae resurrectio Domini nostri Jesu Christi. Apud Aegyptum beati Joannis eremitae, admirandae sanctitatis viri, qui etiam prophetico spiritu plenus, Theodosio imperatori Christianissimo victorias de tyrannis praedixit.
1.3.28
EDITIO COLONIENSIS. MARTIUS. Habet dies XXXI, Lunam XXX. C. V KAL. APRIL.--
1.3.28
Apud Caesaream Palaestinae sanctorum martyrum Prisci, Malchi et Alexandri, qui persecutione Valeriani, cum suburbanum agellum supradictae urbis inhabitarent, atque in ea coelestis martyrii proponerentur coronae, divino fidei calore succensi, ultro judicem adeuntes, cur tantum in sanguinem piorum desaeviret, objurgant; quos ille continuo pro Christi nomine bestiis tradidit devorandos. Et apud urbem Cabilonensium depositio Guntrammi regis, qui ita se spiritualibus actionibus mancipavit, ut relictis saeculi pompis thesauros suos Ecclesiis et pauperibus erogaret. Romae Sixti papae, qui sedit Romae annos octo. In Africa natale Rogati, Successi, et aliorum sedecim. In Caesarea sancti Dagalassi.
1.3.29
EDITIO COLONIENSIS. MARTIUS. Habet dies XXXI, Lunam XXX. D. IV KAL. APRIL.
1.3.29
-- Depositio Eustasii abbatis, discipuli sancti Columbani abbatis, qui pater ferme sexcentorum exstitit monachorum, et sanctitate vitae conspicuus, etiam miraculis claruit. Hic criminatorem suum Bassum nomine, nutu divino mortuum manibus suis cum linteaminibus et aromatibus tractans sepelivit apud beatum Petrum. Apud Africam sanctorum confessorum Armogasti, Archinimi et Satyri. Hi tempore Vandalicae persecutionis sub Gensericho rege Ariano, cum essent lucidissima membra Ecclesiae Christi, et pravitatem Arianorum libertate catholica frequenter arguerent, pro confessione veritatis multa et gravia perpessi supplicia atque opprobria, cursum gloriosi certaminis impleverunt, et passio sancti Achartii.
1.3.30
EDITIO COLONIENSIS. MARTIUS. Habet dies XXXI, Lunam XXX. E. III. KAL. APRIL.
1.3.30
-- Apud Paphum Tichici apostolorum discipuli. In Numidia apud Cirenensem coloniam, natale sanctorum martyrum Agapii et Secundini episcoporum; qui persecutione Valeriani post longum exsilium apud praefatam urbem, in qua tunc maxime gentilium caeco furore, et officiis militaribus, ad tentandam justorum fidem, rabies diaboli infestantis inhiabat, ex illustri sacerdotio effecti sunt martyres gloriosi. Passi sunt in eorum collegio Aemylianus miles, Tertulla et Antonia sacrae virgines, et quaedam mulier cum suis geminis. Et natale Domni, Philipponii, et Lacatii, et Nicei episcopi.
1.3.31
EDITIO COLONIENSIS. MARTIUS. Habet dies XXXI, Lunam XXX. F. PRID. KAL. APRIL.
1.3.31
-- Romae sanctae Balbinae virginis, filiae Quirini martyris; qui beatus martyr tollens boiam de collo Alexandri papae, secundum jussionem ejus, cum pergeret ut collo filiae suae strumam habentis imponeret, ecce puer subito cum facula apparuit, quem constat angelum Domini fuisse, et venit ad puellam dicens:« Salva esto, et in virginitate permane, et ego te faciam videre sponsum tuum, qui pro amore tuo sanguinem suum fudit.» Perveniens pater, ut perficeret quod de boia ei jussum fuerat, vidit subito filiam suam sanam, quae postmodum a sancto Alexandro baptizata et instructa, in virginitate plena operibus bonis permansit; quae tamen post devictum saeculi hujus cursum sepelitur juxta patrem suum Quirinum martyrem. In Africa natale Anesii, et depositio Ambrosii episcopi, et natale septem virginum.
1.4.1
EDITIO COLONIENSIS. APRILIS. Habet Dies XXXI, Lunam XXIX. G. KAL. APRIL.
1.4.1
-- Romae beatissimae Theodorae, sororis illustrissimi martyris Hermetis, quem beatus Alexander papa instruxit ac baptizavit, atque fidem Christi docuit. Quae sub Aureliano imperatore martyrium complevit, sepulta juxta fratrem martyrem via Salaria, non longe ab urbe Roma. Eodem die sancti Venantii episcopi et martyris. Et in pago Viunnoense sancti Vualarici confessoris, cujus sepulcrum crebris miraculis illustratur.
1.4.2
EDITIO COLONIENSIS. APRILIS. Habet Dies XXXI, Lunam XXIX. A. IV NON. APRIL.
1.4.2
-- Natale sancti Nicetii episcopi Lugdunensis, cujus et vita miraculis claruit, et pretiosa mors nihilominus miraculis commendatur. Et apud Caesaream Cappadociae passio sanctae Theodosiae virginis, quae tempore Diocletiani cum esset annorum decem et octo, ultro se sanctis confessoribus in custodia socians, tenta est ab Urbano praefecto, et in equuleo cruciata, deinde ferro onusta, et et in carcerem trusa, ubi virtute Dei omnia vincula ejus disrupta sunt. Post haec saxo alligata, in mare mersa est; sed mox incolumis littoribus reddita, bestiis in amphitheatro est projecta, sed ab his intacta, martyrium capitis abscissione promeruit. In Africa, Amphiani, Victoris, et aliorum quatuordecim, et alibi Marcelli, Saturnini, Satulli, Quiriaci, reginae Proculae.
1.4.3
EDITIO COLONIENSIS. APRILIS. Habet Dies XXXI, Lunam XXIX. B. III NON. APRIL.
1.4.3
-- Thessalonicae natale sanctarum virginum, Agapis et Chioniae, sub Diocletiano, quae primo in carcere maceratae, postea in ignem missae sunt, sed intactae a flammis post orationem ad Deum fusam, animas reddiderunt. Apud Scythiam civitatem Thomis, natale sanctorum Evagri et Benigni. Apud Tauromenium Siciliae sancti Pancratii.
1.4.4
EDITIO COLONIENSIS. APRILIS. Habet Dies XXXI, Lunam XXIX. C. PRID. NON. APRIL.--
1.4.4
Mediolani depositio beati Ambrosii episcopi et confessoris, cujus studio inter caetera doctrinae et miraculorum insignia, tempore Arrianae perfidiae tota Italia ad Catholicam fidem conversa est.
1.4.5
EDITIO COLONIENSIS. APRILIS. Habet Dies XXXI, Lunam XXIX. D. NON. APRIL.
1.4.5
-- Thessalonicae natale sanctae Hyrenis virginis, quae post tolerantiam carceris, sagitta percussa est a Sisinio comite, sub quo et sorores ejus simul Agapes et Chionia martyrium compleverunt. Item apud Aegyptum natale sanctorum Marciani, Nicanoris, Apollonii. Apud Caesaream Lyciae, natale sancti Amphiani.
1.4.6
EDITIO COLONIENSIS. APRILIS. Habet Dies XXXI, Lunam XXIX. E. VIII IDUS APRIL.
1.4.6
-- Romae sancti Sixti papae, qui rexit Ecclesiam annos decem, menses duos, diem unum. Passus est autem temporibus Adriani imperatoris. In Sirmio natale Irenaei episcopi ejusdem loci.
1.4.7
EDITIO COLONIENSIS. APRILIS. Habet Dies XXXI, Lunam XXIX. F. VII IDUS APRIL.
1.4.7
-- Egesippi viri sanctissimi, qui vicinus apostolorum temporibus omnes a passione Domini usque ad suam aetatem ecclesiasticorum actuum texens historias, multaque ad utilitatem legentium pertinentia, hinc inde congregans, quinque libros composuit, quibus sermones implicuit eorum, quorum vitam sectabatur. Dicendi quoque exprimebat characterem, asseritque se venisse sub Aniceto Romam, qui decimus post B. Petrum episcopus fuit, et perseverasse usque ad Eleutherium ejusdem urbis episcopum, qui Aniceti quondam diaconus fuerat. Idem quoque Egesippus in libris suis refert de conversatione sua, quam habuit in gentili philosophia; nam et ego ipse, inquit, sectis Platonicis institutus, audiens infamari Christianos, et videns eos impavidos ad suscipiendam mortem atque omne supplicium tolerandum, considerabam quod impossibile esset, in malitia atque in libidine eos conversari. Romae Celestini Papae, qui rexit Ecclesiam annos octo. Hic constituit, ut sacra mysteria non tractarentur nisi a sacris ministris; et quicumque episcopus evocatus fuisset ad sedem apostolicam, rediens ad parochiam suam, non reciperetur, nisi salutatorias litteras, hoc est formatas a sede apostolica, plebi detulisset. Hic etiam constituit, ut intra actionem missarum, Sanctus, Sanctus, Sanctus decantaretur, et ut Psalmi Davidici centum quinquaginta ante sacrificium antiphonatim canerentur; nam antea tantum epistolae recitabantur, et sanctum Evangelium. In Alexandria natale Peleusii presbyteri. In Nicomedia natale Cyriaci cum aliis decem.
1.4.8
EDITIO COLONIENSIS. APRILIS. Habet Dies XXXI, Lunam XXIX. G. VI IDUS APRIL.
1.4.8
-- Turonis sancti Perpetui episcopi admirandae sanctitatis viri, cujus opera templum super reverenda ossa beati Martini episcopi perfectum est, ejusque sacrum corpus de loco ubi primum tumulatum fuerat, ad locum ubi nunc condigne veneratur, translatum. In Africa natale Januarii, Maximae, Macharii et in Carthagine concessae.
1.4.9
EDITIO COLONIENSIS. APRILIS. Habet Dies XXXI, Lunam XXIX. A. V IDUS APRIL.
1.4.9
-- Apud Sirmium natale septem virginum quae in unum meruerunt coronari. Apud Antiochiam beati Prochori diaconi, praeclarissimi fide et miraculis viri, martyrio consummati; qui unus fuit de septem primis diaconibus ibique quiescentibus.
1.4.10
EDITIO COLONIENSIS. APRILIS. Habet Dies XXXI, Lunam XXIX. B. IV IDUS APRIL.
1.4.10
-- Ezechielis prophetae. Romae beatorum martyrum plurimorum, quos beatus Alexander papa et martyr baptizavit, cum teneretur in carcere, et ipsi religati pariter cum illo. Hos omnes Aurelianus imperator navi vetustae impositos, in altum mare deduci, et illic ligatis collis, lapidibus mergi in profundum fecit.
1.4.11
EDITIO COLONIENSIS. APRILIS. Habet Dies XXXI, Lunam XXIX. C. III IDUS APRIL.--
1.4.11
Apud Cretam urbem Cortinae beati Philippi episcopi, qui vita et doctrina claruit temporibus Antonini Veri et Lucii Aurelii Commodi imperatoris.
1.4.12
EDITIO COLONIENSIS. APRILIS. Habet Dies XXXI, Lunam XXIX. D. PRID. IDUS APRIL.
1.4.12
-- Romae via Aurelia milliario tertio, in coemeterio Calepodii, natale sancti Julii episcopi et confessoris, qui sub Constantio Arriano filio Constantini, 10 mensibus tribulationes et exsilia perpessus, post ejus mortem cum magna gloria ad suam sedem reversus est. Hic constituit, ut nullus clericus causam quamlibet in publico ageret nisi in ecclesia; et notitia fidei per notarios colligeretur, et sive cautiones, vel instrumenta, aut donationes, vel commutationes, aut traditiones, vel testamenta, aut allegationes, vel manumissiones a clericis in ecclesia celebrarentur. Apud Veronam civitatem passio sancti Zenonis martyris, de quo beatus Gregorius in libro Dialogorum refert.
1.4.13
EDITIO COLONIENSIS. APRILIS. Habet Dies XXXI, Lunam XXIX. E. IDUS APRIL.
1.4.13
-- Apud Pergamum Asiae urbem sanctorum Carpi episcopi, et Papyrii diaconi, et Agathonicae optimae feminae, aliarumque multarum, quae probatis confessionibus martyrio coronatae sunt, cum quibus et vir mirabilis Justinus philosophus, qui habitu quoque philosophorum incedens, pro religione Christi plurimum laboravit, in tantum ut Antonino Pio, et filiis ejus, et senatui librum contra gentes scriptum daret, ignominiamque crucis non erubesceret. Cumque jam secundum librum successoribus praefati imperatoris, id est Antonino Vero et Aurelio Commodo, pro religionis nostrae defensione porrexisset, remunerationem linguae fidelis martyrii munus accepit. Apud Hispaniam natale Hermingildi, quem pater ejus Leovigildis rex, Arianus, Gothorum ob fidei catholicae confessionem inexpugnabilem videns, in carcerem et vincula conjecit, ubi nocte sancta Dominicae resurrectionis jussu perfidi patris securi percussus, regnum coeleste pro terreno rex et martyr intravit. In civitate Chalcidona natale Euphemiae virginis et martyris.
1.4.14
EDITIO COLONIENSIS. APRILIS. Habet Dies XXXI, Lunam XXIX. F. XVIII KAL. MAII.
1.4.14
-- Romae via Appia in coemeterio Praetextati natale sanctorum martyrum Tiburtii, Valeriani et Maximi, sub Almachio praefecto, quorum primi fustibus caesi et gladio sunt percussi, ultimus tandiu plumbatis verberatus est, donec spiritum redderet. Interamnis sancti Proculi martyris. Item sanctae Domnae virginis, cum sociis virginibus coronatae. Alexandriae beati Frontonis abbatis, cujus vita sanctitate et miraculis exstitit gloriosa, et qui septuaginta ferme pater exstitit monachorum.
1.4.15
EDITIO COLONIENSIS. APRILIS. Habet Dies XXXI, Lunam XXIX. G. XVII KAL. MAII.
1.4.15
-- In civitate Corduba natale Olympiadis et Maximi nobilium, qui jubente Decio fustibus caesi, et deinde plumbatis, ad ultimum capita eorum securibus tusa sunt, donec emitterent spiritum. Et in Hispaniis civitate Caesaraugusta natale sanctorum martyrum, Obtati, Luperci, Successi, Martialis, Urbani, Julii, Quintiliani, Publii, Frontonis, Felicis, Ceciliani, Evoti, Primitivi, Apodemi, et reliquorum quatuor, qui omnes Saturnini vocati esse referuntur. Apud Italiam natale sanctorum martyrum, Romani, Eutychetis et Victorini, quos Aurelianus per varia tormenta occidi fecit.
1.4.16
EDITIO COLONIENSIS. APRILIS. Habet Dies XXXI, Lunam XXIX. A. XVI KALEND. MAII.
1.4.16
-- Apud Corinthum Calisti et Cariffi, cum aliis septem, omnium in mare mersorum. Romae sancti Aniceti papae, qui sedit in episcopatu annos undecim, et temporibus Severi et Marci martyrio coronatus, sepultus est in coemeterio Calisti. Hic constituit, ut clerus comam non nutriret, secundum Apostoli praeceptum.
1.4.17
EDITIO COLONIENSIS. APRILIS. Habet Dies XXXI, Lunam XXIX. B. XV KALEND. MAII.
1.4.17
-- Apud Africam natale sancti Mappalici, qui cum aliis pluribus martyrio coronatus est. Scribit beatus Cyprianus in epistola multa de illo. Apud Antiochiam natale sanctorum Petri diaconi et Hermogenis. Viennae sancti Pantagati episcopi. In Africa Fortunati et Marciani. C. XIV KALEND. MAII. Apud Mesanam Apuliae natale sanctorum martyris Eleutherii episcopi, et Anthiae matris ejus. Hic Eleutherius in Aquileia episcopus ordinatus, sub Adriano imperatore Romae passus est. Hic primum Felicem et Correvum comites ad fidem convertit Christi, pro quo ipse Correvus percussus est gladio. Nam Eleutherius primum vicit lectum ferreum, deinde craticulam, et ignem suppositum, postea sartaginem cum pice et adipe ferventem, dehinc bestias mitigavit, novissime una cum matre jugulatur. Romae sancti Apollonii senatoris, qui sub Commodo principe a servo proditus, quod Christianus esset, et imperatus ut rationem fidei suae redderet, insigne volumen composuit, quod in senatu legit, et nihilominus sententia senatus pro Christo capite truncatus est.
1.4.18
EDITIO COLONIENSIS. APRILIS. Habet Dies XXXI, Lunam XXIX. D. XIII KALEND. MAII.
1.4.18
-- In Armenia civitate Militana natale sanctorum Hermogenis, Gaii, Expediti, Aristonici, Rufi, Galathae, una die coronatorum. In Hispania civitate Caucoliberi natale sancti Vincentii martyris. Apud Corinthum beati Timonis, de illis septem diaconibus primis, qui apud Beroeam primo doctor sedit, deinde verbum Domini disseminans venit Corinthum, ibique a zelantibus Judaeis, et nomen Christi presequentibus Graecis traditur, ut primo flammis( ut ferunt) injectus, sed nihil laesus; deinde cruci affixus, martyrium suum implevit, et sepultus est apud Corinthum gloriose.
1.4.19
EDITIO COLONIENSIS. APRILIS. Habet Dies XXXI, Lunam XXIX. E. XII KALEND. MAII.
1.4.19
-- Romae sancti Victoris episcopi, qui tertius decimus post beatum Petrum rexit Ecclesiam annis decem, et sub Severo principe martyrio coronatur. Hic constituit ut sanctum Pascha die Dominico celebraretur, et a quintadecima luna primi mensis usque ad vicesimam primam observaretur; et constituit ut necessitate faciente, sive in flumine, sive in mari, sive in fontibus, sub Christiana confessione, quicunque hominum ex gentibus venientes baptizarentur. In Galliis civitate Ebredunense natale sancti Marcellini, primi ejusdem urbis episcopi et confessoris. Romae sanctorum Sulpicii et Serviliani.
1.4.20
EDITIO COLONIENSIS. APRILIS. Habet Dies XXXI, Lunam XXIX. F. XI KAL. MAII.
1.4.20
-- Romae sancti Soteris papae, qui sedit in episcopatu annos novem, sepultus est in coemeterio Calisti. Hic constituit, ut nulla monacha pallam sacratam contingeret in ecclesia, neque incensum poneret. Apud Persidem natale sancti Simeonis episcopi Seleuciae, et Thesifontis regalium civitatum, qui persecutione Saporis regis Persarum, jubente eodem tyranno comprehensus, ferroque onustus, cum, iniquis tribunalibus exhibitus, de Domino Jesu Christo voce libera et constantissima testaretur, primum carcerali ergastulo cum aliis centum, e quibus alii episcopi, alii erant presbyteri, alii diversorum ordinum clerici, longo tempore maceratus est; novissime jussus est cum omnibus decollari, ita ut caeteri cum jugularentur, astaret, et ipse ultimus trucidaretur. Passi sunt cum eo etiam Ustazadis eunuchus, nutritius regis, et Abdella atque Ananias, venerabiles senes, et Pusitius, praepositus artificum regalium; eo quod videns praefatum senem Ananiam sub ictu gladii trementem, exclamaverit confidenter, dicens: Paulum, o senex, claude oculos securus, mox Christi videbis aspectum. Filia quoque ejusdem Pusitii, virgo sacra, simul perempta est. Apud Alexandriam natale sanctorum Fortunati, Aratoris presbyteri, Felicis, Silini, Vitalis, qui in carcere quieverunt. In Asia natale Maximini martyris, qui tempore Decii post alia tormenta lapidibus oppressus est.
1.4.21
EDITIO COLONIENSIS. APRILIS. Habet Dies XXXI, Lunam XXIX. G. X KAL. MAII.
1.4.21
-- Romae via Appia in coemeterio Calisti Gaii papae. Hic constituit ut per omnes gradus primum ascenderet, si quis episcopus fieri mereretur, ut esset ostiarius, lector, exorcista, subdiaconus, diaconus, presbyter. Qui cum Ecclesiam undecim annos, menses quatuor, dies duodecim rexisset, martyrio coronatus est sub Diocletiano principe, cum Gabinio fratre et presbytero. Agapiti pontificis, qui sedit Romae menses undecim. Hic ingressus Constantinopolim ad Justinianum imperatorem, Antemium episcopum Constantinopolitanum, qui duas naturas in Christo negabat, deposuit, et in ejus loco Mennam Catholicum consecravit. Apud Persidem sanctorum martyrum plurimorum, qui jubente Sapore rege annuo die, quo passionis Dominicae memoria celebratur, per totam Persidis regionem tenti, ac pro Christi nomine gladio jugulati sunt. In quo fidei certamine passus est Milesius episcopus, sanctitate et miraculorum gloria insignis. Accepsimas episcopus cum presbytero suo Jacobo; et Mareas, et Bicor episcopi cum clericis fere ducentis, et quinquaginta monachis; etiam cum sacratis virginibus plurimis, inter quas etiam et sororem sancti episcopi Simeonis, nomine Tarbud, cum pedisequa sua stipitibus alligantes, ferraque findentes, crudelissime necaverunt. In Corduba civitate natale Parmenii, Helimenae, et Chrysoliti presbyterorum, et Lucae et Mutii diaconorum de Babylonia, quorum primus praecisa etiam lingua loquebatur. Omnes primo in equuleo suspensi, et nexibus attractati sunt, dein laminis ardentibus circa latera appositis ustulati, et ungulis lacerati, ad ultimum gladio trucidati sunt, praesente persecutore Decio. Lugduni Galliae sancti Epipodii martyris, sub Antonino Vero. Viennae sancti Juliani episcopi et confessoris.
1.4.22
EDITIO COLONIENSIS. APRILIS. Habet Dies XXXI, Lunam XXIX. A. IX KALEND. MAII.
1.4.22
-- Natale sancti Georgii martyris, qui sub Datiano, rege Persarum potentissimo, qui dominabatur super septuaginta reges, multis miraculis claruit, plurimosque convertit ad fidem Christi, simul et Alexandriam uxorem ipsius Datiani usque ad martyrium confortavit: ipse vero novissime decollatus martyrium explevit, quamvis gesta passionis ejus inter apocryphas connumerentur scripturas. In Galliis civitate Valentia natale sanctorum Felicis presbyteri, Fortunati et Achillei diaconorum, qui a beato Irenaeo Lugdunensi episcopo et martyre ad praedicandum verbum Dei missi, cum maximam partem supradictae urbis ad fidem convertissent, a duce Cornelio in carcerem trusi, dein durissima nervorum flagellatione diutissime verberati, post etiam vinctis post tergum manibus, cruribusque confractis, circa rotarum vertiginem astricti, fuliginis quoque amaritudine supposita, die ac nocte continuata equulei extensione suspensi, ad extremum gladio consummati sunt. In Fontenella monasterio sancti Vulframmi episcopi, praeclari in miraculis viri; et sancti Adelberti episcopi et martyris.
1.4.23
EDITIO COLONIENSIS. APRILIS. Habet Dies XXXI, Lunam XXIX. B. VIII KALEND. MAII.
1.4.23
-- Lugduni Galliae natale sancti Alexandri, qui tertio post beatum Epipodium die productus e carcere, primo ita laniatus est crudelitate verberantium, ut crate soluta costarum, patefactis visceribus secreta animae panderentur, deinde crucis affixus patibulo beatum spiritum exanimatus emisit. Passi sunt cum eo et alii numero triginta quatuor. Eodem die Mileti episcopi depositio in Britannia, qui tertius post Augustinum episcopum, Dorovernensem Ecclesiam suscepit, quam rexit annos quinque, sepultus in ecclesia beati Petri. Hac die Ananias, Azarias, Misahel, liberati sunt de camino.
1.4.24
EDITIO COLONIENSIS. APRILIS. Habet Dies XXXI, Lunam XXIX. C. VII. KAL. MAII.--
1.4.24
Romae litania major ad sanctum Petrum. Apud Alexandriam natale sancti Marci evangelistae. Hic discipulus et interpres apostoli Petri Romae rogatus a fratribus scripsit Evangelium. Quod cum Petrus audisset, probavit, et Ecclesiis legendum sua auctoritate edidit. Quo assumpto idem Marcus perrexit in Aegyptum, et primus Alexandriae Christum annuntians, constituit Ecclesiam. At postquam constitutis et confirmatis Ecclesiis per Libyam, Marmaricam, Ammonicam, Pentapolim, Alexandriam, atque Aegyptum universam, ad ultimum tentus a paganis, qui remanserant Alexandriae, qui videntes eum die sancto Paschae missas facientem, miserunt funem in collo ejus, et trahebant eum ad loca Buculi, quae erant juxta mare; sub rupibus erat ecclesia constructa, et defluebant carnes ejus in terram, et saxa inficiebantur sanguine. Vespere autem facto miserunt eum in carcerem, ubi circa mediam noctem primo angelica visitatione confortatus est, deinde ipso Domino sibi apparente, ad coelestia regna vocatus est. At mane dum traheretur ad loca Buculi, gratias agens et dicens: Domine, in manus tuas commendo spiritum meum: defunctus est, et a viris religiosis sepultus in loco lapidis excisi cum gloria. Ordinaverat autem pro se Alexandriae episcopum Anianum. D. VI. KAL. MAII. Romae natale sancti Anacleti papae, qui quartus post beatum Petrum cum rexisset Ecclesiam annis novem, persecutione Domitiani martyrio coronatus est. Hic memoriam beati Petri construxit et composuit loca, ubi episcopi reconderentur. Hic presbyter a beato Petro est ordinatus, hic ad sacrificandum ductus sacrificavit, deinde poenitentia ductus, pro confessione verae fidei capite truncatur. Hic constituit, ut quotiescunque Evangelia sancta recitantur, sacerdotes non sedeant, sed curvi stent. Et natale sancti Marcellini papae, qui cum Ecclesiam novem annis, et mensibus quatuor rexisset, temporibus Diocletiani et Maximiani, ab eodem Diocletiano pro fide Christi, cum Claudio et Cirino et Antonino capite truncatus est, et post dies triginta quinque sepultus via Salaria, in cubiculo a Marcello presbytero, et diaconibus cum hymnis. Quo tempore fuit magna persecutio, ut intra unum mensem 18 millia hominum promiscui sexus, per diversas provincias martyrio coronarentur. Viennae sancti Clarentii episcopi et confessoris.
1.4.25
EDITIO COLONIENSIS. APRILIS. Habet Dies XXXI, Lunam XXIX. E. V KAL. MAII.
1.4.25
-- Romae sancti Anastasii papae, qui post beatum Petrum quadragesimus primus sedit annos tres, dies decem. Hic Manichaeos in urbe Romana inveniens damnavit, et constitutum fecit, ut nullus Transmarinus in clericatum susciperetur, nisi quinque episcoporum designaret chirographum. In Nicomedia natale sancti Anthimi episcopi et martyris, qui persecutione Diocletiani, ob confessionem Christi martyrii gloriam capitis obtruncatione promeruit: quem tanquam bonum pastorem universae pene gregis sui multitudines secutae sunt, quorum alios praefatus tyrannus gladio obtruncari, alios ignibus conflagrari, alios naviculis impositos immergi pelago fecit. Scriptum est in Historia ecclesiastica.
1.4.26
EDITIO COLONIENSIS. APRILIS. Habet Dies XXXI, Lunam XXIX. F. IV KAL. MAII.
1.4.26
-- Apud Ravennam natale sancti Vitalis martyris, qui fuit pater sanctorum Gervasii et Prothasii. Hic ergo fuit militans et consularis, et cum Paulino judice suo Ravennam ingressus est; et cum videret in conspectu judicis sui Christianum nomine Ursicinum, arte medicum, natione Ligurum, post nimia tormenta capitalem accepisse sententiam, et cum jam videret eum venisse ad palmam et expavisse, exclamavit: Noli, nisi[ F. noli] Ursicine medice, qui alios curare consuesti, teipsum aeternae mortis jaculo vulnerare: et qui per passiones nimias venisti ad palmam, coronam a Domino tibi praeparatam perdere. Audiens haec Ursicinus genu posuit, et spiculatorem ut feriret, hortabatur: agens poenitentiam quod expavisset. Utque martyrium consummavit idem Ursicinus, Vitalis intra Ravennatium urbem eum sepelivit, ad judicem ultra venire ipse contemnens. Tentus est itaque a Paulino consulari, ob id maxime factum, quod Ursicinum suis exhortationibus roborasset, et post equulei tormenta jussus est perduci ad Palmam( locus autem ubi decollabantur Christiani, hoc habebat vocabulum, eo quod arbores palmae illic essent), et facta fovea, quousque inveniretur aqua, ibi supinus depositus, et terra ac lapidibus est oppressus. Alexandriae sanctae Theodorae virginis, de qua beatus Ambrosius scribit: quae sacrificare contemnens, in lupanar tradita, miro Dei favore est erepta. Astante quippe jam ad ostium cellae multitudine juvenum impudicorum, repente quidam ex fratribus, Didymus nomine, plenus fide, divinitus inspiratus, sumpto militari habitu, primus lupanar irrupit, et sanctae virgini cur venisset, exponens, illi militares imponit exuvias, ipse virginali veste induitur. Sic virgo egressa, et a nullo agnita, ad civitatem fugiens evasit. Didymus praesidi exhibitus, et omne factum constanter exponens, Christianum se esse confessus, absciso capite igni traditus est. Beata quoque virgo, quae pro tuenda integritate ex lupanari profugerat, amore coronae ad stadium regressa, simul cum Didymo percussa, simul coronata est. In Pannoniis sancti Pollionis martyris, et sanctorum Aphrodisii, Caralippi, Agapii et Eusebii martyrum.
1.4.27
EDITIO COLONIENSIS. APRILIS. Habet Dies XXXI, Lunam XXIX. G. III KAL. MAII.
1.4.27
-- Apud civitatem Sanctonas natale sancti Eutropis martyris, qui a B. Clemente episcopo directus in Gallias, ab eodem etiam pontificalis ordinis gratia consecratus, impleto hujus officii ordine, peracta in incredulis praedicatione, insurgentibus paganis, illiso capite victor occubuit. Denique post multa annorum spatia, cum Palladius ejusdem urbis episcopus, et cum eo alii viri Dei corpus ejus honoris debiti gratia in basilicam novam transferrent, reserato sarcophago contemplati sunt cicatricem capitis, qua in parte defixum fuerat securis acumen. Cumque sequenti nocte stravissent sacerdotes membra quieti, apparuit eis per visum dicens: Cicatricem quam contemplati estis in capite, scitote me per eam martyrium consummasse. Item sanctorum Mariani et Jacobi, quorum prior lector, sequens diaconus fuit. Romae sancti Cleti papae, qui tertius post Petrum Romanae urbis episcopatum annis 12 habuit, et ibidem martyrio coronatus est, sub Domitiano imperatore, et sancti Maximi martyris.
1.4.28
EDITIO COLONIENSIS. APRILIS. Habet Dies XXXI, Lunam XXIX. A. PRID. KAL. MAII.
1.4.28
-- Romae sancti Quirini tribuni et martyris, sub Trajano imperatore; qui cum ex praecepto ejus beatum Alexandrum papam, et Hermen praefectum in vincula conjecisset, haberetque filiam cujus collum struma circumdederat, auditis exhortationibus beati Hermae de fide Christi, et visis signis, quae Dominus in martyribus suis Alexandro et Hermae operabatur, ipsam eamdem filiam suam obtulit eis ad sanandum. Cui dixit beatus Alexander: Tolle boiam de collo meo, et impone ei. Quod cum pater obediens exequeretur, divino nutu sanata est subito. Vocabatur autem ipsa Balbina, atque ita pater ejus cum universis, qui in custodia tenebantur, omnique domo sua baptizatus est. Quod ut nuntiavit commentariensis Aureliano judici, iratus, jussit ad se adduci Quirinum, et dixit ei: Ego te quasi filium dilexi; tu autem irrisisti me, deceptus ab Alexandro. Dixit ei Quirinus: Ego christianus sum factus, vis occidere, vis fustigare, vis incendere, aliud non ero. Nam omnes qui erant in carcere, feci fieri christianos, et dimisi eos, et noluerunt usquam ire. Iratus Aurelianus fecit ei linguam abscidi, deinde in equuleo suspendi. Qui dum Aureliani non cederet injuriis, jussit ei manus ac pedes abscindi, et sic eum decollari, et canibus projici. Sed christiani corpus ejus raptum in via Appia, sepelierunt in coemeterio Praetextati. In Alexandria natale Ephrodisii presbyteri, et aliorum triginta: et vigilia apostolorum Philippi et Jacobi.
1.5.1
EDITIO COLONIENSIS. MAIUS. Habet dies XXXI, Lunam XXX. B. KALEND. MAII.
1.5.1
-- Jeremiae prophetae. Et natale sanctorum apostolorum Philippi et Jacobi, filii Mariae, quae fuit soror Matris Domini. Ex quibus Philippus, cum pene Scythiam ad fidem Christi convertisset, diaconibus, presbyteris et episcopis ibi constitutis, reversus est ad Asiam, et apud Hierapolim dormivit in pace. Jacobus vero, qui et frater Domini legitur, post passionem Domini statim ab apostolis Hierosolymorum episcopus ordinatus est. Hic de utero matris sanctus fuit, vinum et siceram non bibit, carnem nullam comedit, nunquam attonsus est, nec unctus unguento, nec usus balneo, huic soli licitum erat ingredi sancta sanctorum; siquidem vestibus laneis non utebatur, sed lineis, solusque ingrediebatur templum, et fixis genibus pro populo deprecabatur in tantum, ut camelorum duritiam ejus genua traxisse viderentur. Hunc scribae et pharisaei praecipitaverunt de pinna templi, fullonis in cerebro percussus fuste occubuit. Triginta annos Hierosolymae rexit ecclesiam, juxta templum sepultus. In Galliis sancti Andeoli subdiaconi, sub Severo Caesare, cujus caput in modum crucis scissum cum ligno est. Agauno passio sancti Sigismundi regis, filii Gundebadi regis Burgundionum, qui cum se cerneret non posse Francis resistere, solus fugiens, contra deposita habitum religionis suscepit, et jejuniis, vigiliis, die nocteque vacans, captus est a Francis cum uxore ac filiis, in puteumque demersus occubuit: postea vero cuidam abbati revelatus est, et ab eo reverenter sepultus, etiam miraculis claruit. Et natale S. Walpurgae virginis. Et in Hierosolymis passio sanctae Judae sive Quiriaci episcopi, cui revelatum est lignum Dominicae crucis.
1.5.2
EDITIO COLONIENSIS. MAIUS. Habet dies XXXI, Lunam XXX. C. VI NON. MAII.--
1.5.2
Natale sancti patris nostri Athanasii, Alexandrinae urbis episcopi et confessoris, qui multas Arrianorum perpessus est insidias, quadragesimo et sexto anno sacerdotii sui, post multos agones, multasque patientiae coronas quievit in pace. Et natale sanctorum Saturnini et Neopolis, qui in carcere quieverunt.
1.5.3
EDITIO COLONIENSIS. MAIUS. Habet dies XXXI, Lunam XXX. D. V NON. MAII.
1.5.3
-- Hierosolymis inventio sanctae Crucis, ab Helena regina, sub Constantino principe, cujus et ipsa exstitit mater. Romae via Numentana, milliario septimo, sancti Alexandri cum Eventio et Theodolo presbyteris, sub Trajano principe, judice Aureliano, qui Romanae Ecclesiae episcopatum quintus post Petrum annos tenuit decem, menses duos, dies decem, sanctitate incomparabilis, fide praeclarissimus: maximam partem senatorum urbis convertit ad Dominum, qui post vincula carceris equuleum, ungulas et ignes, punctis creberrimis per tota membra peremptus est. Sequentes vero post longam carceris continentiam ignibus examinati, ad ultimum sunt decollati. Et natale sancti Juvenalis episcopi, et depositio sancti Philippi confessoris.
1.5.4
EDITIO COLONIENSIS. MAIUS. Habet dies XXXI, Lunam XXX. E. IV NON MAII.
1.5.4
-- In Palaestina civitate Gaza natale sancti Sylvani ejusdem urbis episcopi, qui persecutione Diocletiani cum plurimis clericorum suorum martyrio coronatus. Viennae sancti Justi episcopi. In Metallofanensi sanctorum martyrum quadraginta, quae simul capite caesi sunt. Nicomediae natale sanctae Antoniae, quae nimium torta, et variis afflicta cruciatibus, uno brachio tribus diebus suspensa, et in carcerem biennio trusa, a Priscilliano praeside ad ultimum flammis exusta est. Eodem die in Norico Ripensi loco Lauriaco natale sancti Floriani, qui praesidis Aquilini jussu, ligato ad collum saxo, in flumen Anisi praecipitatus est, et mox omnibus qui circumstabant videntibus oculi praecipitatoris ejus crepuerunt. Ipso die beati Quiriaci episcopi et martyris gloriosi, sub Juliano imperatore. Et sancti Bothehardi episcopi et confessoris.
1.5.5
EDITIO COLONIENSIS. MAIUS. Habet dies XXXI, Lunam XXX. F. III NON. MAII.
1.5.5
-- Apud Alexandriam sancti Euthymii diaconi, in carcere quiescentis. Thessalonicae natale sanctorum Irenaei et Peregrini, et Hyrenes ignibus combustorum. In Galliis civitate Arelatensi sancti Hilarii episcopi, praeclarissimi viri, qui paupertatis amator, et erga inopum provisionem non solum mentis pietate, sed et corporis sui labore sollicitus erat. Nam pro reficiendis pauperibus etiam rusticationem contra vires suas, homo genere clarus exercuit; sed nec in spiritalibus neglexit. Nam et in docendo gratiam habuit, et absque personarum acceptione omnibus castigationem ingessit, vitamque sancti Honorati praedecessoris sui composuit. Moritur sub Valentiniano et Marciano imperatoribus.
1.5.6
EDITIO COLONIENSIS. MAIUS. Habet dies XXXI, Lunam XXX. C. PRID. NON. MAII.--
1.5.6
Natale sancti Joannis apostoli ante portam Latinam Romae, qui ab Epheso jussu Domitiani fratris Titi, secunda persecutione, quam ipse post Neronem exercuit, ad urbem Romam perductus, praesente senatu ante portam Latinam in ferventis olei dolium missus est: sed beatus apostolus tam liber a poena inde exiit, quam a corruptionibus carnis fuerat immunis. Tunc in Pathmum insulam relegatus est exsilio, ubi Apocalypsim vidit. Ad commendandam ergo ipsius memoriam dignam, et pro fidei apostolicae constantia, Christiani ecclesiasticam venerationem ejus gestantem, in supradicto loco ante portam Latinam praeclaro et miro opere construxerunt, ubi festivum concursum pridie nonas Maii usque hodie faciunt. Eodem die B. Evodii Antiochiae episcopi et martyris, qui primus ab apostolis ibi est ordinatus. Item B. Lucii, qui Cirenensem primus episcopus rexit Ecclesiam ab apostolis institutus.
1.5.7
EDITIO COLONIENSIS. MAIUS. Habet dies XXXI, Lunam XXX. A. NON. MAII.
1.5.7
-- Dedicatio ecclesiae sanctae Mariae virginis. Et natale sancti Juvenalis martyris, et beatae Domitillae. Quae cum esset Flavii Clementis consulis ex sorore neptis, et a sancto Clemente sacro velamine ob integritatis perseverantiam consecrata, persecutione Domitiani ob testimonium quod Christo perhibebat, cum aliis plurimis in insulam Pontiam exsilio deportata, longum inibi martyrium duxit; dehinc ad Tarracinam urbem translata, primo Eufrosinam et Theodoram, deinde alios ad fidem Christi convertit, novissime cursum martyrii sui cum praefatis virginibus consummavit, sub persecutione Trajani, ubi morabantur clausae in carcere: in facies enim suas prostratae, orantes Dominum recesserunt; quarum corpora sanctus Caesarius diaconus in sarcophago novo simul condens, in profundo terrae sepelivit. In Nicomedia passio sanctorum martyrum Flavii, Augusti, Augustini fratrum. Romae Benedicti pontificis, qui sedit in episcopatu unum mensem, imperante Constantino, apud beatum Petrum sepultus.
1.5.8
EDITIO COLONIENSIS. MAIUS. Habet dies XXXI, Lunam XXX. B. VIII IDUS MAII.
1.5.8
-- Mediolani sancti Victoris martyris, qui natione Maurus, et a primaeva aetate Christianus, cum esset in imperialibus castris miles, etiam canitie decoratus, compellente Maximiano ut sacrificaret idolis, in confessione Domini fortissime perseverans, primo graviter est caesus, dein liquenti plumbo perfusus, sed nihil penitus laesus, novissime gloriosi martyrii cursum capitis abscissione promeruit. Quod sanctus Martinus audiens factum, collegit corpus ejus, et in praedicta civitate cum honore sepelivit. Viennae sancti Dionysii sexti urbis episcopi.
1.5.9
EDITIO COLONIENSIS. MAIUS. Habet dies XXXI, Lunam XXX. C. VII IDUS MAII.--
1.5.9
Natale sancti Hermae, cujus apostolus Paulus ad Romanos scribens meminit:« Salutate Phlegontem, Hermen, Patrobam, et qui sunt cum eis fratres.» In Perside sanctorum martyrum quadringentorum. Apud Nazanci oppidum beati Gregorii episcopi, qui Theologus dicitur nobilis, Athenis eruditi, collegae beati Basilii, Caesareae Cappadociae postea episcopi; quique cum se totus Dei servitio mancipasset, tantum de collega praesumpsit, ut sedentem Basilium de doctoris dextera deponeret, ac secum ad monasterium manu injecta perduceret, ibique per annos tredecim omnium Graecorum saecularium libris remotis, solis divinae Scripturae voluminibus operam dabant. Constantinopoli natale sancti Timothei, quando ab Epheso ejus sacra ossa delata sunt. In Ariopoli natale Quirilli, Hindei et Genonis. In Tarso Ciliciae Aphrodisii. Romae sancti Beati confessoris.
1.5.10
EDITIO COLONIENSIS. MAIUS. Habet dies XXXI, Lunam XXX. D. VI IDUS MAII.
1.5.10
-- Natale Johel prophetae. Romae via Latina in coemeterio ejusdem natale sanctorum Gordiani et Epimachi. Julianus imperator apostata inter multos Christianos, quos publicis custodiis mancipavit, beatum Januarium, senem presbyterum comprehensum cuidam vicario Gordiano ad audiendum tradidit; qui beatum Januarium patienter audiens, spiritu Dei illuminatus credere coepit; quem protinus beatus presbyter cum uxore Marina nomine, et familia promiscui sexus, numero quinquaginta tres, et eo amplius baptizavit. Quod audiens Julianus, jussit in scriptionibus damnari sanctum Januarium presbyterum, et beatum Gordianum, uxorem ejus ad aquas salinas manere praecepit, in servitio rusticorum. Clementianus autem tribunali residens, beatum Gordianum vinctum catenis sibi praesentari fecit. Ille in confessione Christi fixus, diu plumbatis caeditur, in ultimo capite truncatur. Cujus corpus jussit iniquus judex ante templum Apollinis jactari, ut a canibus roderetur. Quod nocturno tempore Christiani rapientes, milliario uno plus minus ab urbe Roma posuerunt in crypta, ubi jampridem corpus beati martyris Epimachi sepultum fuerat. Hic Epimachus Alexandriam abiit cum collega suo Alexandro, multo tempore in vinculis et in cruciatibus carceris tortus, ignibus postmodum consumitur, reliquiae ipsius deinde Romam sunt translatae. Romae natale Clepodii senis presbyteri, sub Alexandro imperatore, qui eum fecit occidi a Laodiceo, et corpus trahi per civitatem, atque in Tyberim jactari, die Kalendarum Maiarum. Quod inventum piscatores levaverunt, et Galisto episcopo narraverunt. Ille acceptum condivit cum aromatibus et linteaminibus, et sepelivit in coemeterio ejusdem, milliario ab urbe tertio in crypta, sexto Iduum Maiarum. Tunc decollatus est ab Alexandro Palmatius consul, cum uxore et filiis, et aliis promiscui sexus de domo sua quadraginta duobus, cum quibus et Simplicius senator cum uxore, et filiis et familia sua, promiscui sexus sexaginta octo; et similiter cum uxore sua Blanda, qui per doctrinam Calisti papae, et Calepodii presbyteri nuper fuerant baptizati. Item Romae natale sanctorum Quarti et Quinti.
1.5.11
EDITIO COLONIENSIS. MAIUS. Habet dies XXXI, Lunam XXX. E. V IDUS MAII.
1.5.11
-- Romae via Salaria, milliario vicesimo secundo, natale sancti Anthuni, et passio sancti Evellii: qui videns passionem sancti Torpetis martyris, et mirabilia quae fecit, credidit Christo, qui antea consiliarius Neronis imperatoris fuit, qualiter Christiani martyrizarentur. Viennae sancti Mamerti episcopi, qui ob imminentem cladem solemnes ante ascensionem Domini litanias instituit
1.5.12
EDITIO COLONIENSIS. MAIUS. Habet dies XXXI, Lunam XXX. F. IV IDUS MAII.
1.5.12
-- Romae in coemeterio Praetextati natale sanctorum martyrum Nerei et Achillei fratrum. Qui cum essent eunuchi beatae Flaviae, cum ea apud insulam Pontiam longum pro Christo duxerunt exsilium; postmodum vero ab Aureliano sponso Domitillae, quem ipsa ob amorem Christi spreverat, primo verberibus gravissimis arctati, deinde Memmio Rufo consulari sunt traditi, a quo cum equuleo et flammis compellerentur ad immolandum, et dicerent se a B. Petro apostolo baptizatos, nulla ratione posse idolis immolare, capite caesi sunt. Quorum corpora rapuit Auspicius, discipulus eorum, nutritor sanctae virginis Domitillae, et in crypta arenaria sepelivit. Item via Aurelia, milliario secundo, natale sancti Pancratii martyris; qui cum esset annorum quatuordecim, sub Diocletiano martyrium capitis obtruncatione complevit, cujus reverendum corpus Octavilla illustris femina occulte noctu sublatum aromatibus conditum sepelivit. Eodem die B. Dionysii patrui ejusdem B. Pancratii, cujus studio idem Pancratius et baptizatus, et in timore Dei confortatus, ad martyrium animatus est. Apud Cyprum sancti patris nostri Epiphanii Salaminae episcopi.
1.5.13
EDITIO COLONIENSIS. MAIUS. Habet dies XXXI, Lunam XXX. G. III IDUS MAII.
1.5.13
-- Natale sanctae Mariae ad martyres. Phoca imperatore beatus Bonifacius papa in veteri fano, quod Pantheon vocabatur, ablatis idololatriae sordibus, ecclesiam beatae semper virginis Mariae, et omnium martyrum dedicavit, cujus dedicationis sacratissima dies agitur Romae tertio Idus Maii. Ipso die sancti Servatii episcopi Tungrensis Ecclesiae, qui tempore quo Hunni Germaniam vastabant, ne civitatis atque Ecclesiae suae videret excidium, Domini revelatione commonitus, transiit ad vicum Trajectensium, ibique defunctus, atque in medio publici aggeris est sepultus. Ob cujus meritum hominibus demonstrandum, cum tempore hiemis omnia in circuitu nix repleret, nunquam sepulcrum ejus operuit nix nec pluvia, donec a successore suo sancto Munulfo episcopo templum magnum in ejus honore constructum est. Et natale sancti Gangolfi martyris, et sancti Onesii confessoris.
1.5.14
EDITIO COLONIENSIS. MAIUS. Habet dies XXXI, Lunam XXX. A. PRID. IDUS MAII.
1.5.14
-- Sancti patris nostri Pacomii; qui cum esset factis apostolicae gratiae insignis, fundatorque Aegypti coenobiorum, scripsit monachorum regulas, quas Angelo dictante didicerat, simul et de tempore Paschali. In Syria natale Victoris et Coronae, sub Antonino imperatore, duce Alexandriae Sebastiano. Erat autem Victor miles a Cilicia, cui Sebastianus in confessione fidei confringi digitos, et evelli jussit, deinde illum in caminum ignis mitti, ubi triduo permanens, non est laesus: deinde venenum bibere jussus, non est mortuus, sed veneficum potius ad fidem convertit. Deinde jussum est nervos corporis ejus tolli, deinde oleum bulliens mitti in pudendis ejus, post hoc jussit lampades ardentes suspenso ad latera applicari: post hoc acetum et calcem simul misceri, et dari ei; deinde oculos erui, deinde triduo visum[ F. jussum] capite suspendi, et dum adhuc suspirasset, jussit eum excoriari. Tunc Corona, cum esset uxor militis cujusdam, coepit beatificare sanctum Victorem pro gloria martyrii. Et dum hoc faceret, vidit duas coronas de coelo lapsas, unam Victori, et alteram sibi missam. Cumque et hoc cunctis audientibus protestaretur, tenta est a duce, jussum est duas arbores palmae curvari adinvicem, et canabinis funibus ligari Coronam in utraque manibus et pedibus, et sic arbores dimitti. Quod dum fieret, divisa est Corona in duas partes; erat autem annorum sedecim. Tunc quoque Victor decollatur, et ipse victoriae perennis triumphum meruit.
1.5.15
EDITIO COLONIENSIS. MAIUS. Habet dies XXXI, Lunam XXX. B. IDUS MAII.
1.5.15
-- Natale sanctorum confessorum Torquati et Isefontis, Secundi, Indaletii, Caecilii, Esitii, Eufrasii, qui Romae a sanctis apostolis episcopi ordinati, ad praedicandum verbum Dei ad Hispanias, tunc adhuc gentili errore implicatas, directi sunt. Cumque ad civitatem Accitanam venissent, et propter laborem itineris modicum quiescentes, et causa victus emendi discipulos in urbem misissent, mox paganorum multitudo, qui tunc forte diis suis festa celebrabant, eos usque ad fluvium persecuta est; in quo pons mirae magnitudinis et firmitatis exstructus, transeuntibus sanctis, Dei nutu cum omni insequentium multitudine funditus corruit. Ad quod miraculum caeteri territi, et cujusdam magnae senatricis lupariae, quae divinitus inspirata eos benigne suscipiens credidit, exemplum secuti, relictis idolis Christo Domino crediderunt. Post haec diversis urbibus evangelizantes, et innumeras multitudines Christi fidei subjugantes Torquatus Accii, et Isefon Vergii, Secundus Abulae, Indalecius Urci, Caecilius Heliberri, Esicius Carcesae, Eufrasius Eliturgi, quieverunt. Apud insulam Chium, natale sancti Isidori martyris. Apud Damosacum passio sanctorum Petri et Andreae, Pauli et Dionysiae.
1.5.16
EDITIO COLONIENSIS. MAIUS. Habet dies XXXI, Lunam XXX. C. XVII KAL. MAII.--
1.5.16
Apud Isauriam natale sanctorum Aquilini et Victoriani, quorum gesta habentur. Autisiodoro passio sancti Peregrini episcopi primi civitatis ipsius: et sanctae Maximae virginis, quae multis clara virtutibus in pace quievit. In Sirmio natale Timothei, et septem virginum. In Sardinia natale Simplicii presbyteri, et sanctae Rosulae, et sanctorum Diocletiani et Florentii. Intra Casinae depositio Fidoli presbyteri et confessoris.
1.5.17
EDITIO COLONIENSIS. MAIUS. Habet dies XXXI, Lunam XXX. D. XVI KAL. JUNII.
1.5.17
-- In Tuscia sancti Torpetis martyris, sub Nerone principe. Hic magnus in officio Neronis fuit, et a beato Antonio presbytero baptizatus, et in fide Christi est eruditus. Hunc Nero cum cognovisset esse christianum, tradidit eum cuidam propinquo suo Satellico, ut impelleret eum sacrificare. Sed cum spiritu Dei confortatus beatus vir immobilis permaneret, fecit eum Satellicus alapis caedi, et ligatum ad columnam tandiu verberibus affici, quousque sanguis guttatim de corpore ipsius deflueret. Sed subito dum caederetur, columna cadens oppressit judicem, et quinquaginta cum eo. Inde tentus a ministris, positus est in rota, inde feris objicitur a filio Satellici, nomine Sylvio; sed minime ab his est laesus. Post haec jubente Sylvio foras civitatem Pissinam ductus, decollatione capitis martyrium suum complevit, tertio Kalendas Maii. Hujus corpus ministri sceleris imposuerunt pene fractae et cariosae navi, cum quo simul canem et gallum projecerunt in decursum fluminis. Apparens autem angelus Domini cuidam venerabili feminae, cujus nomen Celerina, monuit, ut perquireret sancti martyris corpus, et sepeliret. Quod inventum cum omni reverentia sepelivit, et de facultatibus suis cessante persecutione ecclesiam supra construxit. Agitur festivitas martyris, et conventus civium sexta decima Kalendas Junii. In Alexandria natale Adrionis, Victoris et Basillae.
1.5.18
EDITIO COLONIENSIS. MAIUS. Habet dies XXXI, Lunam XXX. E. XV KAL. JUNII.
1.5.18
-- Apud Aegyptum sancti Dioscori lectoris, in quem praeses multa et varia tormenta exercuit, ita ut ungues ejus effoderet, et lampadibus ejus latera inflammaret; sed coelestis luminis fulgore territi, ceciderunt ministri. Novissime laminis ardentibus adustus, martyrium consummavit. Et natale sanctorum Hortasii et Serapionis, et Marci papae et Potamionis.
1.5.19
EDITIO COLONIENSIS. MAIUS. Habet dies XXXI, Lunam XXX. F. XIV KAL. JUNII.
1.5.19
-- Romae natale sanctae Pudentianae vel Potentianae virginis, quae illustrissimi generis, Pudentis, discipuli beati Pauli apostoli, filia erat; cujus mater Sabinella, soror vero Praxedis, quas pater earum in omni religione Christi erudivit, virginesque Christo dereliquit. Quae post obitum sancti patris in omni exercitatione pietatis ita excreverunt, ut nocte dieque incessanter hymnis et orationibus cum familia sua Domino inservirent, beato Pio urbis episcopo cum eis in laudibus Dei participante. Remunerationem igitur pro piissimis laboribus suis percepturae, post innumeros agones, post multorum martyrum venerabiliter exhibitas sepulturas, post omnes facultates suas in visceribus pauperum inclusas, Christoque fideliter commendatas, tandem de terris ad Christum migraverunt. Potentiana venerabilis, quarta decima Kalendas Junii posita in coemiterio Priscillae, via Salaria; Praxedis vero virgo, aeque sanctissima, duodecima Kalendas Augusti, et ipsa cum sorore juxta patrem sanctum sepulta. Ipso die beati Pudentis, patris earum virginum. Item Romae natale sanctorum Calocerii et Partemii, uxoris Decii imperatoris eunuchorum, qui cum essent unus praepositus cubilis, alter primicerius, nolentes idolis sacrificare, a Decio occisi sunt. Corpora eorum juxta viam Appiam sunt posita. Depositio domni Alchuvini.
1.5.20
EDITIO COLONIENSIS. MAIUS. Habet dies XXXI, Lunam XXX. G. XIII KAL. JUNII.
1.5.20
-- Romae via Salaria natale sanctae Basillae virginis et martyris Christi; quae cum esset ex genere regio, et haberet sponsum illustrissimum nomine Pompeium, per beatam Eugeniam, et sanctos Dei Prothum et Jacinctum conversa ad fidem, accusata est a praefato sponso suo, quod esset Christiana. Decrevit continuo Gallienus Augustus, qui tunc Christi persequebatur Ecclesiam, ut aut sponsum reciperet, aut gladio interiret. Conventa de hoc, respondit se regem regum sponsum habere, qui est Christus Filius Dei. Et cum haec dixisset, gladio transverberata est. In Galliis civitate Nemauso, natale Baudelii, qui a paganis deorum suorum sacrificia celebrantibus comprehensus, cum sacrificare nollet, et in fide Christi immobilis inter verbera et tormenta persisteret, martyrii palmam pretiosa morte percepit.
1.5.21
EDITIO COLONIENSIS. MAIUS. Habet dies XXXI, Lunam XXX. A. XII KAL. JUNII.
1.5.21
-- In Mauritania Caesariense, natale sanctorum Timothei, Polii et Eutychii diaconi, qui apud praefatam regionem verbum Domini disseminantes, pariter coronari meruerunt. Item apud Caesaream Cappadociae natale sanctorum Poliveti, Victorii, Donati. In Africa Casti et Aemilii qui per ignem passionis martyrium consummaverunt. Scribit Cyprianus in libro de Lapsis. Apud Corsicam natale sanctae Juliae, quae crucis supplicio coronata est: et sancti Valentis martyris et pontificis, cum tribus pueris.
1.5.22
EDITIO COLONIENSIS. MAIUS. Habet dies XXXI, Lunam XXX. B. XI KAL. JUNII.
1.5.22
-- Romae natale sanctorum Faustini, Timothei, Venusti. Autisiodori depositio sanctae Helenae virginis; et in Ravenna natale sanctae Martyriae. In civitate Autisiodorense B. Uvalis presbyteri et confessoris.
1.5.23
EDITIO COLONIENSIS. MAIUS. Habet dies XXXI, Lunam XXX. C. X KAL. JUNII.--
1.5.23
Apud Lingones passio sancti Desiderii episcopi; qui cum plebem suam ab exercitu Vandalorum vastari cerneret, ad regem eorum pro ea supplicaturus exivit; a quo statim jugulari jussus, pro ovibus sibi creditis cervicem libenter tetendit, et percussus gladio migravit ad Christum. Percussor vero ejus mox amentia correptus interiit. Sepultus est ibidem B. martyr in basilica, intra urbis muros. Passi sunt cum eo et plures alii de numero gregis sui, apud eamdem urbem conditi. Item Viennae natale sancti Desiderii episcopi, qui passus est in territorio Lugdunensi.
1.5.24
EDITIO COLONIENSIS. MAIUS. Habet dies XXXI, Lunam XXX. D. IX KAL. JUNII.
1.5.24
-- Natale sancti Manahen, Herodis tetrarchae collactanei, doctoris et prophetae sub gratia Novi Testamenti, apud Antiochiam in Christo quiescentis. Item beatissimae Joannae, uxoris Euzae, procuratoris Herodis, quam commemorant Evangelistae. In portu Romano natale sancti Vincentii martyris. In Galliis civitate Nannetis natale sanctorum martyrum, Donatiani et Rogatiani fratrum. In Histria natale sanctorum Zoelli, Servilii, Sylvani et Dioclis.
1.5.25
EDITIO COLONIENSIS. MAIUS. Habet dies XXXI, Lunam XXX. E. VIII KAL. JUNII.
1.5.25
-- Romae via Numentana, in coemeterio Praetextati, natale sancti Urbani episcopi et martyris. Hic sedit in episcopatu annos tres, menses decem, dies decem, cujus doctrina sub persecutione Alexandri multi martyrio coronati sunt. Mediolani sancti Dionysii episcopi et confessoris, qui ab imperatore Constantio apud Cappadociam pro fide catholica damnatus, exsilio ibidem requievit. Reliquias corporis ejus per sanctum Basilium praefatae urbis episcopum receptas, beatus Ambrosius condigno honore condidit. Apud Moesiam civitatem Dorostoro, natale sanctorum martyrum Passicratis, Valentionis, et aliorum simul coronatorum. Item Romae natale Eleutherii papae, qui sedit in episcopatu annos quindecim. Hic accepit epistolas a Lucio, Britannico rege, ut per ejus mandatum christianus fieret, sepultus est juxta corpus beati Petri apostoli.
1.5.26
EDITIO COLONIENSIS. MAIUS. Habet dies XXXI, Lunam XXX. F. VII KAL. JUNII.
1.5.26
-- Natale beati Jacobi apostoli, fratris Joannis Evangelistae, qui decollatus est ab Herode rege Jerosolymis, ut liber Actuum apostolorum docet. Hujus beatissimi sacra ossa ab Hispaniis translata sunt, et in ultimis earum finibus, videlicet contra mare Britannicum condita. Apud Athenas beati Quadrati episcopi, discipuli apostolorum. Hic firmavit, ut nulla esca a Christianis repudiaretur, quae rationalis et humana est. Item Quadrati martyris, in cujus solemnitate sancti Augustini sermones habiti inveniuntur. Romae beatorum martyrum Sinmitrii presbyteri, et aliorum viginti duorum, quos Antoninus imperator gladio pro Christo punire fecit, quorum corpora beata Praxedis sepelivit noctu. Tuderti Tusciae natale sanctorum Felicissimi, Heradii, Paulini. In territorio Autisiodorensi, passio sancti Prisci martyris, cum ingenti multitudine. In Britanniis sancti Augustini episcopi et confessoris, qui missus a B. papa Gregorio, primus genti Anglorum Christi Evangelium praedicavit, atque illic virtutibus et miraculis gloriosus quievit. Viennae passio sancti Zachariae, secundi ejusdem urbis episcopi.
1.5.27
EDITIO COLONIENSIS. MAIUS. Habet dies XXXI, Lunam XXX. G. VI KAL. JUNII.
1.5.27
-- Apud Mesiam civitatem Dorostorensem natale sancti Julii, qui tempore persecutionis cum esset veteranus eremitae militiae comprehensus ab officialibus, et Maximo praesidi oblatus, nolens sacrificare idolis, capitali sententia punitus est. Cumque duceretur ad locum caedis implendae, Esicius quidam miles cum et ipse ob fidem Christi comprehensus detineretur, rogabat eum, dicens:« Memor esto mei, nam et ego subsequar te, primum etiam saluta Passicratem et Valentionem, qui nos jam per bonam confessionem praecesserunt ad Dominum.» Julius vero osculans Esicium dixit:« Frater, festina venire; mandata enim tua jam audierunt quos salutasti.» Sic accepto orario ligans sibi oculos, martyrii palmam gladio caedente percepit. In Galliis civitate Arausica, sancti Eutropi episcopi et confessoris.
1.5.28
EDITIO COLONIENSIS. MAIUS. Habet dies XXXI, Lunam XXX. A. V KAL. JUNII.
1.5.28
-- Natale sancti Joannis papae, quo tempore Theodoricus rex duos senatores praeclaros, et consules Symmachum et Boetium occidit; qui nonagesimo octavo die postquam papa Joannes interiit, subito defunctus est. Quem quia orthodoxus erat, et a Justino imperatore orthodoxo Constantinopolim veniens, gloriose susceptus fuerat, Theodoricus rex Arianus revertentem Ravennam in custodia tentum, ad mortem usque cum aliis aeque catholicis viris perduxit. Hujus meminit sanctus Gregorius in libro Dialogorum. Cujus corpus translatum, sepultum est in basilica sancti Petri apostoli, quinta Kalend. Januarii, Olibrio consule. Apud Parisium sancti Germani episcopi et confessoris, qui post innumeras virtutes octogenarius migravit ad Dominum. In Sardinia sanctorum Aemilii, Felicis, Priami, Luciani.
1.5.29
EDITIO COLONIENSIS. MAIUS. Habet dies XXXI, Lunam XXX. B. IV KAL. JUNII.
1.5.29
-- Romae via Aurelia sancti Restituti. Via Tyburtina septem germanorum. Treveris beati Maximini episcopi et confessoris, a quo Athanasius persecutionem Constantii fugiens, honorifice susceptus est. Item passio sancti Cononis martyris, et filii ejus sub Aureliano imperatore, in Iconio civitate, provinciae Isauriae, judice Domitiano. Hic cum esset fide praeclarus, exhibitus judici cum filio suo annorum duodecim, Spiritum sanctum habitare in se veraci confessione manifestaverunt. Inde frixuram passi sunt, et inde suspensi valido igne sub eis adhibito, malleo ad extremum ligneo manibus eorum contritis, in laude omnipotentis Dei spiritum emiserunt. Eodem die natale sanctorum Sisinii, Martyrii atque Alexandri, qui in Augauniae partibus persequentibus gentilibus viris, martyrii coronam adepti sunt.
1.5.30
EDITIO COLONIENSIS. MAIUS. Habet dies XXXI, Lunam XXX. C. III KAL. JUNII.--
1.5.30
Romae via Aurelia natale sancti Felicis papae. Hic constituit supra memorias martyrum missas celebrari. Qui cum annos quinque rexisset Ecclesiam, sub Claudio principe martyrio coronatus est. Turribus Sardiniae natale sanctorum martyrum Gabinii et Crispuli. In Antiochia sanctorum martyrum Sitini et Palatini, qui multa tormenta propter nomen Christi passi sunt.
1.5.31
EDITIO COLONIENSIS. MAIUS. Habet dies XXXI, Lunam XXX. D. PRID. KAL. JUNII.
1.5.31
-- Romae sanctae Petronellae virginis, quae fuit filia beatissimi Petri apostoli; quae post multa miracula sanitatum, cum eam Flaccus comes suo conjugio vellet sociare, triduo inducias postulans, et cum sancta virgine Felicula collactanea sua continuis jejuniis atque orationibus vacans: tertio die celebratis Dominicae oblationis mysteriis a sancto Nicomede presbytero mox ut Christi sacramenta percepit, reclinans se in lectulo emisit spiritum. Apud Aquileiam natale sanctorum martyrum, Cantii, Cantiani et Cancianillae fratrum. Turribus Sardiniae natale sancti Crescentiani.
1.6.1
EDITIO COLONIENSIS. JUNIUS. Habet dies XXX, Lunam XXXIX. E. KALEND. JUNII.
1.6.1
-- Romae dedicatio Nicomedis martyris et presbyteri, cujus martyrium celebratur septimadecima Kalendarum Octobris. Apud Caesaream Palestinae natale sancti Pamphili presbyteri, viri admirandae fidei et sanctitatis, qui sub persecutione Maximini martyrio coronatus est. Hujus Vitam Eusebius Caesariensis episcopus tribus libris comprehendit. Viennae sancti Claudii, undecimi episcopi. Ipso die sancti Caprasii abbatis monasterii Lirinensis. In Thessalonica natale Octavii. In Antiochia Zosimi. Treveris sancti Simeonis reclusi.
1.6.2
EDITIO COLONIENSIS. JUNIUS. Habet dies XXX, Lunam XXXIX. F. IV NON. JUNII.
1.6.2
-- Romae natale sanctorum Marcellini presbyteri, et Petri exorcistae, qui multos in carcere ad fidem erudientes, post dira vincula, et plurima tormenta decollati sunt sub judice Sereno; et qui eos decollavit, vidit animas eorum splendide ornatas ab Angelis ferri ad coelos, et poenitentiam agens sub Julio papa baptizatus est in senectute sua, nomine Theodorus. Lugduni sanctae Blandinae cum undecim et octo martyribus, cujus a prima luce usque ad vesperam tormenta semper innovantes, ad ultimum victos se tortores confitentur; quae et secundo pulsata, cruciata non superatur. Tertio quoque die religata ad stipitem, atque in crucis modum distenta, bestiis pabulum praeparatur. Quam cum nulla ex bestiis auderet tangere, rursum revocatur ad carcerem; quarto etiam verberibus acta, craticulis exusta, et multa alia perpessa, ad ultimum gladio jugulatur. Tunc et Ponticus puer, annorum quindecim, per omnia tormentorum genera cum ipsa circumactus, et materna ejus cohortatione roboratus, ante illam martyrium consummavit. In Campania beati Erasmi martyris et episcopi, sub Diocletiano imperatore et Maximiano, qui jussu impii Diocletiani imperatoris, primo plumbatis crudeliter caesus, deinde fustibus diutissime mactatus, post resina, sulphure, plumbo, pice, cera, oleoque solutis perfusus, ingenti miraculo illaesus apparuit. Quod cum multi viderent, fidem Christi rejectis idolis susceperunt. Inde immenso pondere ferri constrictus, in carcere reclusus sub dira custodia est, de qua angelica visitatione solutus eripitur. Verum postmodum clarissima ipsius fama vulgante, tentus est ab altero imperatore Maximiano, a quo diversis suppliciis tortus est in tantum, ut tunica ignita aerea vestiretur, iterumque in olla, quae plumbo, pice, cera, resina, oleo fervefacta erat, missus virtute Domini omnia superans illaesus exinde progreditur; sicque tandem ad confirmandum caeteros a Domino servatus, in Campaniam munitus angelico solatio pervenit: ubi cum plurimos sive in fide roborasset, sive ad fidem Christi convertisset, vocante Domino martyrio clarus sancto fine quievit.
1.6.3
EDITIO COLONIENSIS. JUNIUS. Habet dies XXX, Lunam XXXIX. G. III NON. JUNII.
1.6.3
-- Apud Aretium civitatem Tusciae natale sanctorum martyrum Pergentini et Laurentii fratrum, qui persecutione Decii, sub judice Turcio, cum essent pueri, post dura vincula tolerata, et magna miracula ostensa, gladio sunt caesi, et apud eamdem urbem conditi.
1.6.4
EDITIO COLONIENSIS. JUNIUS. Habet dies XXX, Lunam XXXIX. A. PRID. NON. JUNII.
1.6.4
-- Apud Illyricum civitatem Sisciam natale sancti Quirini episcopi, qui persecutione Maximini pro fide Christi( ut Prudentius scribit) ligato ad manum molari saxo, in flumen praecipitatus est; et circumstantibus diu collocutus, ne ejus terrerentur exemplo, vix precibus ut mergeretur obtinuit. Hujus reliquiae translatae sunt Romam, et positae in Catacumbas. In Tuscia sancti Laurentii, et aliorum quadringentorum. Aurelianis civitate depositio sancti Lifardi presbyteri. In Ninive natale Dinoscii, Attali, Camarii, Tyrini, Juliae et Saraciae, Cyprini.
1.6.5
EDITIO COLONIENSIS. JUNIUS. Habet dies XXX, Lunam XXXIX. B. NONAE JUNII.
1.6.5
-- Sancti Bonifacii archiepiscopi, cujus in Fresonis martyrii passio peracta est, cum aliis servis Dei, Vuinthrugae et Walterae, Scirpaldae, et Bosan, Hamondae et Adelherae, Wancarae et Gundacarae, Willeherae et Athaliolfae. Apud Aegyptum natale sanctorum martyrum Martiani, Nicandri et Apollonii, quorum gesta habentur. Eodem die passio sancti Bonifacii martyris, sub Diocletiano et Maximiano, apud Tharsum civitatem passi, sed Romae in via quae Latina nuncupatur, sepulti. Hunc vero sua domina Aglaes a Romana urbe, licet cum ea adulterium perpetraverit, transmisit in loca ubi Christianorum maxima persecutio fuit, ut alicujus sancti corpus pretio acquisitum sibi afferret. Ipse autem dictis obediens dominae suae, perrexit illuc inter Christianos, sicque comprehensus jussu principis primum oleo fervente cum pice perfusus est; sed in nullo laesus, ad ultimum ab spiculatore percussus est: postea vero a comitibus suis, qui secum pergebant, post martyrii palmam ad dominam suam reductus est, quae ipsum accipiens sepelivit Romae via Latina. Beata vero Aglaes abrenuntiavit mundo, distribuens universa quae possidebat egenis ac monasteriis, relaxans universam familiam suam a jugo servitutis, et tantam gratiam a Domino promeruit, ut in nomine ejus virtutum signis claresceret. Supervixit in habitu sanctimoniali annos tredecim, sepulta apud praefatum martyrem.
1.6.6
EDITIO COLONIENSIS. JUNIUS. Habet dies XXX, Lunam XXXIX. C. VIII IDUS JUNII.--
1.6.6
Natale sancti Philippi diaconi, qui fuit unus de septem diaconibus, qui cum B. Stephano statim post ascensionem Domini ab apostolis sunt ordinati; de quo beatus Lucas in Actibus apostolorum refert, quod signa et prodigia faciendo, praedicatione sua Samariam ad fidem Christi convertit, et Candacis reginae Aethiopum baptizavit Eunuchum, quique apud Caesaream requievit; juxta quem tres virgines, filiae ipsius tumulatae jacent; nam quarta filia illius plena Spiritu sancto in Epheso occubuit. Romae sanctorum Arthemii, cum uxore sua Candida, et filia Paulina. Hic Artemius cum esset custos carceris, et clausum teneret Petrum exorcistam in custodia, essetque illi filia unica daemonio vexata, beati Petri precibus mox sanata est, et ipse cum uxore pariter, et eadem filia Christo credens, a beato Marcellino presbytero baptizatus est, omnisque domus ejus, et multi alii, ita ut absque mulieribus virorum fieret trecentorum numerus. Hoc judex Serenus audiens factum, Artemium, Candidam, et filiam ipsorum Paulinam sibi praesentatos, immenso pondere ruderum jussit obrui. Sicque Dei sancti perducti ad passionis locum, beatus quidem Artemius gladio percussus est, sancta vero Candida atque Paulina per limina cryptae praecipitatae, lapidibus sunt obrutae.
1.6.7
EDITIO COLONIENSIS. JUNIUS. Habet dies XXX, Lunam XXXIX. D. VII IDUS JUNII.
1.6.7
-- Constantinopoli natale sancti Pauli ejusdem civitatis episcopi, qui tempore Arianae perfidiae a Constantino imperatore apud civitatulam quamdam Cappadociae, Cucusam nomine, ob catholicam fidem pulsus exsilio, Arianorum insidiis crudeliter strangulatus, ad coelestia regna migravit. In Caesarea Cappadociae natale sancti Luciani martyris. In Africa sancti Amantii, Lucii. In Alexandria, Andreae, Donati et Peregrini, et depositio beati Claudii episcopi.
1.6.8
EDITIO COLONIENSIS. JUNIUS. Habet dies XXX, Lunam XXXIX. E. VI IDUS JUNII.
1.6.8
-- In Gallia Suessionum civitate depositio sancti Medardi episcopi et confessoris, cujus vita plena virtutibus conscripta est. Nam largus fuit in eleemosynis, virtutibus clarus, prophetiae spiritum habuit, ter quinis annis Veromandensium urbis episcopatum tenuit, ad extremum ad coelestia migrans. Tunc ad Suessionum urbem corpus ejus translatum est, ibique sepultum multis virtutum titulis claruit. Andegavis sancti Licinii episcopi et confessoris. Eodem die sancti Carileffi confessoris, et sancti Naboris confessoris. In Tharso Ciliciae martyrum viginti sub Simplicio judice.
1.6.9
EDITIO COLONIENSIS. JUNIUS. Habet dies XXX, Lunam XXXIX. F. V IDUS JUNII.
1.6.9
-- Romae in monte Caelio natale sanctorum martyrum Primi et Feliciani, qui sub Diocletiano et Maximiano imperatoribus pro Christi nomine multa tormenta passi sunt. Nam Promoto praesidi ipsi nequissimi imperatores ad puniendum eos tradiderunt. Qui cum videret eos nullo modo posse a Christi confessione converti, separavit eos abinvicem, et primitus Felicianum octoginta annos habentem, jussit plumbatis tundi, postea vero misit eum in carcerem, et neque cibum, neque aquam ei sinebat praebere tribus diebus; deinde Primum similiter jussit fustibus caedi, dehinc vero in amphitheatro sanctos martyres leonibus tradi praecepit; sed nullo modo ab eis laesi sunt. Quod videntes turbae crediderunt in Christum plus quam mille quingenti. Novissime vero sancti martyres a praedicto comite decollati sunt; quorum corpora noctu a Christianis fidelibus rapta, sepulta sunt ad arcus Numentanos intra harenarium. In Gallis civitate Agino, loco Pompeiaco, passio sancti Vincentii, levitae et martyris. In Scotia sancti Columbae confessoris.
1.6.10
EDITIO COLONIENSIS. JUNIUS. Habet dies XXX, Lunam XXXIX. G. IV IDUS JUNII.
1.6.10
-- Romae via Aurelia, milliario tertio decimo, natale sancti Basilidis martyris. Tripodis et Mandalis sub Aureliano imperatore, Platone praeside, et aliorum viginti martyrum. Eodem die beati Gethulii martyris, temporibus Adriani imperatoris, sub judice Licinio: nam cum esset Christianissimus, et multa bona opera fecisset, traditus est Cereali vicario ad puniendum; sed sanctus Gethulius sana praedicatione convertit ad fidem Christi, sicut fecit Amantium tribunum fratrem ejus. Sanctus vero Sixtus papa baptizavit Cerealem, et confirmavit in fide. Postea vero cum audisset hoc factum praedictus imperator, tradidit sanctum Gethulium Licinio praefecto suo, ut eum cum sociis suis, si nollet sacrificare idolis, mitteret in caminum ignis ardentem. Quod cum factum fuisset, nullo modo ab igne laesi sunt. Tunc fustibus, illiso capite, martyrium compleverunt; quorum corpora collegit beata Simphorosa, uxor Gethulii martyris, et sepelivit in praedio suo. In Africa Aresirogati et aliorum quindecim. In Hispaniis Chrispuli restituti. In Nicomedia sancti Zachariae. In Autissiodoro depositio Censuri episcopi.
1.6.11
EDITIO COLONIENSIS. JUNIUS. Habet dies XXX, Lunam XXXIX. A. III IDUS JUNII.
1.6.11
-- Natale sancti Barnabae apostoli: qui, cum esset Cyprius, cum Paulo gentium apostolus ordinatus est. Hic postea propter Joannem discipulum, qui et Marcus vocabatur, separatus a Paulo, nihilominus Evangelicae praedicationis injunctum sibi opus exercuit. Cujus corpus, tempore Zenonis imperatoris, ipso revelante repertum est. Apud Corinthum sancti Sosthenes, discipuli sancti Pauli apostoli. In Aquileia natale sanctorum martyrum, Felicis et Fortunati, sub persecutione Diocletiani et Maximiani imperatorum, praeside Eusimio. Qui cum essent germani fratres, fide Christi ferventes, primum in equuleo suspensi sunt, ardentibus lampadibus circa latera appositis, sed mox psallentibus martyribus exstinctis; inde per ventrem ferventi oleo superfusi, ad ultimum capite truncantur.
1.6.12
EDITIO COLONIENSIS. JUNIUS. Habet dies XXX, Lunam XXXIX. B. PRID. IDUS JUNII.
1.6.12
-- Romae via Aurelia, milliario quinto, passio sanctorum martyrum, Basilidis, Cyrini, Naboris et Nazarii; quorum Naborem et Nazarium, simul cum Gorgonio martyre transtulit a Roma in Galliam Grodegandus, Metensis episcopus, permittente Paulo papa Romano, anno Dominicae Incarnationis septingentesimo sexagesimo quinto, et collocavit praedictus episcopus sanctum Gorgonium in monasterio quod dicitur Gorzia; sanctum vero Naborem in monasterio quod dicitur Nova cella: sanctum quoque Nazarium in monasterio, quod dicitur Loreshain, ubi signa et miracula in sanitate infirmorum et debilium saepius fiunt. Mediolani natale sanctorum martyrum Nazarii et Celsi pueri. Sanctus namque Nazarius a beato Clemente instructus et baptizatus est, quem Anolinus sub Neronianae persecutionis rabie diu afflictum in carcere cum Celso puero, quem ipse nutrierat, gladio ferire jussit, quorum corpora Christiani furati sepelierunt in propriis hortis, quos beatus Ambrosius Domino revelante reperit. Et depositio sancti Odolfi presbyteri.
1.6.13
EDITIO COLONIENSIS. JUNIUS. Habet dies XXX, Lunam XXXIX. C. IDUS JUNII.--
1.6.13
Romae natale sanctae Felicolae virginis, quam cum Flaccus comes post excessum Petronellae vellet ducere uxorem, atque ad terrendum eam proposuisset dicens: Unum tibi e duobus elige, aut esto uxor mea, aut diis sacrifica; responsum ab ea accipit: Nec uxor tua ero( quia Christo sacrata sum), nec immolabo idolis( quia Christiana sum). Tunc Flaccus tradidit eam vicario, qui fecit eam in tenebroso claudi cubiculo, sine cibo per septem dies. Post haec duxerunt eam ad virgines Vestae, ibique per alteros septem dies sine cibo permansit; eo quod nulla ratione cibum pateretur de eorum manu accipere. Dehinc levata est in equuleum, et tandiu torqueri jussa est, donec emitteret spiritum: et sic praecipitata est in cloacam, quam sanctus Nicomedes presbyter tulit, et sepelivit septimo milliario ab urbe Roma. In Africa, Luciani et Fortunati.
1.6.14
EDITIO COLONIENSIS. JUNIUS. Habet dies XXX, Lunam XXXIX. D. XVIII KALEND. JULII.
1.6.14
-- Helisaei prophetae, qui apud Samariam Palaestini situs est, ubi et Abdias requiescit, et quo major inter natos mulierum non fuit, Joannes Baptista, ubi multa miracula fiunt. Suessionis civitate passio sanctorum martyrum, Valerii et Rufini. Apud Caesaream Cappadociae sancti Basilii episcopi, fratris Gregorii et Petri. Viennae sancti Etherii episcopi.
1.6.15
EDITIO COLONIENSIS. JUNIUS. Habet dies XXX, Lunam XXXIX. E. XVII KALEND. JULII.
1.6.15
-- Apud Siciliam sanctorum martyrum Viti, Modesti et Crescentiae. Qui beatus Vitus in puerilitate virtutibus maturus, primum a patre suo sacrilego Hyla, ut a cultura Dei recederet, tentatus est; deinde a Valeriano judice cathomis caesus, in confessione Christi permansit. Inde redditus patri, cum poenis affligere illum pater meditaretur, monitu angeli navem conscendens, comitantibus secum Modesto et Crescentia nutritoribus, ad Thani Agrithanum territorium devenit; inde propter filiam Diocletiani imperatoris daemonio vexatam, quaesitus et adductus ad eum, ejus filiam oratione curavit. Sed cum imperator impius nequaquam eum ad consensum idolorum persuadere potuisset, vinculis ferreis astrictum in teterrimum induci carcerem jussit, cum Modesto atque Crescentia; quos postea Diocletianus in ollam resina et pice, et plumbo succensam jactari praecepit: egressique de olla illaesi, dimissus eis leo ferocissimus, qui mox pedes eorum lingere coepit; novissime vero juxta fluvium qui dicitur Siler, quiescentes sub arbore, animas suas Domino reddiderunt. Florentia vero femina illustrissima, corpora sanctorum collegit, et in loco qui dicitur Marianus, condita aromatibus sepelivit. Apud Mesiam sancti Esicii, qui sub praeside Maximiano martyrio coronatus est.
1.6.16
EDITIO COLONIENSIS. JUNIUS. Habet dies XXX, Lunam XXXIX. F. XVI KALEND. JULII.
1.6.16
-- Apud urbem Vesontionensem sanctorum Ferreoli presbyteri, et Ferrutionis diaconi, qui a B. Hyreneo Lugdunensi episcopo et martyre ad praedicandum verbum Dei missi, sub Claudio judice ad trochleas extenti, et flagellati sunt; deinde inclusi carcere, mane amputatis linguis praedicabant verbum Dei. Post haec subulae triginta utrisque infixae manibus et pedibus pectore, ad ultimum gladio feriuntur. Et in civitate Moguntiaco passio sanctorum Aurei et Justinae sororis ejus, qui ab Hunis vastantibus Germaniam in Ecclesia occisi sunt. Item in Antiochia sanctorum Cirici et Julitae matris ejus, quorum prior post dira verbera, etiam calcem cum aceto et sinapi in os accepit. Deinde clavis affixi pariter evulsis oculis in carcerem trusi sunt. Post haec decalvati et excoriati super carbones in lecto aereo assati sunt; ad ultimum ferris attriti, amputatis linguis martyrii sui cursum obtruncatione capitis impleverunt. Passi sunt cum eis et alii quadringenti quatuor. Eodem die depositio sancti Alexii confessoris.
1.6.17
EDITIO COLONIENSIS. JUNIUS. Habet dies XXX, Lunam XXXIX. G. XV KALEND. JULII.
1.6.17
-- Romae sanctorum martyrum ducentorum sexaginta duorum, qui positi sunt via Salaria vetere, ad clivum cucumeris. Eodem die sancti Vultmari confessoris, admirandae sanctitatis viri et religionis. In civitate Nannetis sancti Similiani episcopi et confessoris. Lugduni depositio sancti Aureliani, episcopi Arelatentis. Apud Viennam sancti Domnoli episcopi. In Aurelianis civitate sancti Viti presbyteri et monachi, cujus vita miraculis coruscabat. Hic inter alia facta quemdam monachum defunctum in ecclesia, caeteris fratribus somno gravatis, oratione fusa ad Dominum, a morte suscitavit.
1.6.18
EDITIO COLONIENSIS. JUNIUS. Habet dies XXX, Lunam XXXIX. A. XIV KALEND. JULII.
1.6.18
-- Romae via Ardeatina natale sanctorum Marci et Marcelliani fratrum praeclarissimi generis, Tranquillini et Marciae filiorum, qui primo carcerem pro fide passi sunt, postmodum a Fabiano judice tenti, et ad stipitem ligati, in pedibus acutos clavos acceperunt. Cum autem transisset una dies et una nox, et illi laudantes Deum perseverarent, lanceis per latera transfixi, cum gloria martyrii ad siderea regna migrarunt. In Antiochia passio Marinae virginis, quae per Olibrium praefectum multa tormenta passa est pro nomine Christi; vincula, carceres, flagella, equuleum, quam et diabolus in draconis specie, similiter et in Aethiopis tentavit, sed per signum sanctae crucis superatus est. Novissime vero per praedictum praefectum decollata, sacro martyrio vitam finivit.
1.6.19
EDITIO COLONIENSIS. JUNIUS. Habet dies XXX, Lunam XXXIX. B. XIII KALEND. JULII.
1.6.19
-- Mediolano natale sanctorum Gervasii et Protasii; qui cum per decem annos in uno coenaculo conclusi, lectionibus et orationibus atque jejuniis vacassent, undecimo ad palmam martyrii pervenerunt, tenti ab Astachio comite. Qui primum tandiu jussit plumbatis contundi, quandiu exhalaret spiritum: sequentem vero, id est, Protasium, fustibus caesum capite truncari. Quorum corpora Philippus, vir religiosus, una cum filio suo furtim abstulit, et in domo sua in arca marmorea sepelivit: quorumque sepulcra multo post tempore, Theodosio imperatore, Domino revelante, beatus Ambrosius reperit, et ita incorrupta eorum corpora invenit, ac si eodem die fuissent interempti. Quae cum in urbem introducerentur, quidam diu caecus feretri tactu lumen recepit. Apud Ravennam sancti Ursicini martyris, qui sub judice Paulino, post nimia tormenta capite caesus martyrium consummavit.
1.6.20
EDITIO COLONIENSIS. JUNIUS. Habet dies XXX, Lunam XXXIX. C. XII KALEND. JULII.--
1.6.20
Sylverii papae, qui sedit Romae anno uno, qui consentiente Justiniano imperatore, a Vilisario patricio depositus, et monachus factus, in exsilio confessor moritur. Romae sancti Novati fratris Timothei, presbyteri, qui a beatis apostolis eruditi sunt. De quo scribit pastor in gestis Pudentianae et Praxedis virginum. Et translatio sancti Zenonis martyris, et sanctae Florentiae virginis.
1.6.21
EDITIO COLONIENSIS. JUNIUS. Habet dies XXX, Lunam XXXIX. D. XI KALEND. JULII.
1.6.21
-- In Moguntia natale sancti Albani martyris, qui sub Diocletiano imperatore de insula Nansia pergens cum sancto Theonesto et Urso Mediolanum venit: indeque exiens auxiliante Domino pervenit ad Gallias, ibique in servitio Dei manens, ad martyrium pro nomine Salvatoris promptus fuit. Postquam autem in Augusta civitate beatus Ursus martyrium accepit, Theonestus cum Albano Moguntiam pervenit; dumque ibi praedicaret verbum Dei, Albanus discipulus ejus martyrium explevit, et sepultus est ibi juxta praedictam civitatem. Syracusis natale sanctorum martyrum Rufi et Martiae. Romae sanctae Demetriae virginis, quae fuit beati Fausti filia. Haec cum ante impium Julianum pro fide Christi introduceretur, in confessione spiritum emisit: sepulta a beato Joanne presbytero, juxta matrem suam sanctam Daffrosam, et sororem Vivianam, juxta palatium Lucianum.
1.6.22
EDITIO COLONIENSIS. JUNIUS. Habet dies XXX, Lunam XXXIX. E. X KALEND. JULII.
1.6.22
-- In Britannia sancti Albini martyris, qui tempore Diocletiani in Verelamio civitate, post verbera et tormenta acerba capite plexus est. Sed illo in terram cadente, oculi ejus qui eum percussit, pariter ceciderunt. Passus est cum eo etiam unus de militibus, eo quod eum ferire jussus, noluerit: divino utique perterritus miraculo: quia viderat beatum martyrem sibi dum ad coronam martyrii properaret, alveum amnis interpositi orando transmeabilem reddidisse. In civitate Nolana Campaniae natale sancti Paulini episcopi et confessoris, de quo beatus Gregorius in libro Dialogorum narrat. Et depositio beati Nicetae Romatianae civitatis episcopi, et Consortiae virginis. Et passio sanctorum decem millium martyrum.
1.6.23
EDITIO COLONIENSIS. JUNIUS. Habet dies XXX, Lunam XXXIX. F. IX KALEND. JULII.
1.6.23
-- Natale Joannis presbyteri, quem impius Julianus inauditum via Salaria vetere ante simulacrum solis decollari praecepit; ejusque corpus a beato Concordio presbytero collectum et sepultum est juxta concilia martyrum. Apud Britanniam sanctae Ediltrudis virginis et reginae, cujus corpus cum undecim annis esset sepultum, incorruptum inventum est. Et vigilia sancti Joannis Baptistae.
1.6.24
EDITIO COLONIENSIS. JUNIUS. Habet dies XXX, Lunam XXXIX. G. VIII KALEND. JULII.
1.6.24
-- Nativitas beati Joannis Baptistae praecursoris Domini, Zachariae et Elisabeth filii, qui Spiritu sancto repletus adhuc in utero matris suae, ad Israel confortatus, Spiritu agebatur in desertis, vestitus pilis camelorum, habens zonam pelliceam circa lumbos suos; esca autem ejus erat locusta, et mel silvestre edebat. XXX aetatis anno, quintodecimo anno imperii Tyberii Caesaris, cum procurator esset in Judaea Pilatus, jamque regnum Judaeorum in quatuor principatus esset divisum, venit in omnem regionem Jordanis, praedicans baptismum poenitentiae in remissionem peccatorum. Romae Fisci, Luciae, cum aliis viginti duobus. Augustuduno depositio sancti Simplicii.
1.6.25
EDITIO COLONIENSIS. JUNIUS. Habet dies XXX, Lunam XXXIX. A. VII KALEND. JULII.
1.6.25
-- Apud Beroeam sancti Sosipatris, discipuli sancti Pauli apostoli. Apud Alexandriam sancti Gallicani martyris, qui per praedicationem Joannis et Pauli ad fidem Christi conversus, post innumera quae perpetravit bona, a Rauciano comite percussus gladio migravit ad Christum. Romae Luciae virginis, cum aliis viginti duobus, et Acciae regis. Thessalonicae sanctorum, Bigati, Lantani, et dormitio sancti Joannis Evangelistae.
1.6.26
EDITIO COLONIENSIS. JUNIUS. Habet dies XXX, Lunam XXXIX. B. VI KALEND. JULII.
1.6.26
-- Romae Joannis et Pauli fratrum, quorum primus praepositus, secundus primicerius fuit Constantiae virginis, filiae Constantini. Qui cum omni die turmas Christianorum recrearent, ex his opibus, quas sacratissima virgo Christi reliquerat, pervenit hoc ad Julianum; qui misso Terrentiano campi ductore, intra domum propriam decollati sunt; qui tamen postea Christianus factus est. Eodem die sancti Quadrati apostolorum discipuli, qui in locum beati Publii Athenarum episcopi substituitur, et Ecclesiam grandi terrore dispersam fide et industria congregavit.
1.6.27
EDITIO COLONIENSIS. JUNIUS. Habet dies XXX, Lunam XXXIX. C. V KALEND. JULII.--
1.6.27
Apud Galatiam beati Crescentis episcopi, discipuli sancti Pauli apostoli. Apud Tyburtianam urbem Italiae, natale sanctae Simphorosae, beati Gethulii uxoris, cum septem filiis; quorum mater sub Adriano principe maxima constantia pro Christiana fide mortem passa est; qui ipsam jussit palmis caedi, deinde suspendi crinibus. Sed cum superari nullatenus posset, jussit eam alligato saxo in fluvium praecipitari. Cujus frater Eugenius, curiae principalis, colligens corpus ejus sepelivit. Et mane imperator septem jussit figi stipites, ibique filios ejus ad trochleas extendi, et Crescentem in gutture transfigi, Lucianum in pectore, Nemesium in corde, Primitivum per umbilicum, Justinum per membra distentum scindi per singulos corporis nodos atque juncturas, Stacteum lanceis innumerabilibus, donec moreretur in terra configi, Eugenium finili a pectore usque ad inferiores partes. Altera autem die Adrianus praecepit corpora eorum in foveam altam projici. Et pontifices templorum posuerunt nomen loci illius, Ad septem biothanatos. Cordubae sanctorum Zoili, et aliorum decem et novem. In Epheso civitate festivitas celebratur septem fratrum dormientium: hoc est, Maximiani, Malchi, Marciani, Dionysii, Joannis, Serapionis, Constantini.
1.6.28
EDITIO COLONIENSIS. JUNIUS. Habet dies XXX, Lunam XXXIX. D. IV KALEND. JULII.
1.6.28
Leonis papae, qui post Petrum apostolum quadragesimus septimus in urbe Roma sedit annos viginti unum, mensem unum, dies tredecim. Hic cum multis episcopis fidem catholicam exponens, Eutychianam et Nestorianam haeresim damnavit, et sanctissimum concilium Chalcedonense sua industria congregari fecit. Hic constituit intra actionem dicere sanctum sacrificium, et monacham non accipere velamen capitis benedictum ab episcopo, nisi prius probata illius virginitas fuerit. Apud Alexandriam sanctorum martyrum Plutarchi, Sereni, Eraclidis, Herois; item Sereni, Potamienae, Marcellae, Catechuminae, Herae, Nomiae, baptismum martyrii consecutae. Inter quos praecipue emicuit Potamiena virgo, quae post innumeros agones cum venerabili matre Marcella, ignis suppliciis consumpta, e terris migravit ad coelum. Lugduno Galliae sancti Irenaei episcopi, qui cum omni fere civitatis suae populo glorioso coronatus est martyrio, sub Severo principe, sepultusque a Zacharia presbytero in crypta basilicae beati Joannis Baptistae, sub altari. Et vigilia apostolorum Petri et Pauli.
1.6.29
EDITIO COLONIENSIS. JUNIUS. Habet dies XXX, Lunam XXXIX. E. III KALEND. JULII.
1.6.29
Romae natale sanctorum apostolorum Petri et Pauli, qui passi sunt sub Nerone, Basso et Tusco consulibus. Petrus secundo Claudii anno, post episcopatum Antiochensis Ecclesiae, et praedicationem dispersionis eorum qui de circumcisione crediderant, in Ponto, Galatia, Cappadocia, Asia et Bithynia ad expugnandum Simonem magum Romam missus est, ibique viginti quinque annos cathedram sacerdotalem tenuit, usque ad ultimum annum Neronis, a quo affixus cruci martyrio est coronatus, capite ad terram verso, et in sublime pedibus elevatis, asserens se indignum qui crucifigeretur ut Dominus suus. Sepultus autem est in eadem urbe in Vaticano, juxta viam Triumphalem, qui totius orbis veneratur celebratione. Hic ordinavit duos episcopos, Linum et Cletum, qui praesentialiter omne ministerium sacerdotale in urbe Roma populo vel supervenientibus exhiberent; ipse vero orationi et praedicationi operam dabat. F. PRID. KALEND. JULII. Eodem anno, quo passus est Dominus, constat Paulum ad fidem venisse. Paulus quoque post passionem Domini vicesimo quinto anno, id est, secundo Neronis, postquam a Jerusalem usque Illyricum replevit Evangelium Christi, Romam vinctus missus est, et sicut ipse in secunda epistola ad Timotheum scribit, liberatus de ore leonis, videlicet, ferocissimi persecutoris Neronis, Evangelium Christi in Occidentis quoque partibus praedicavit. Et hic ergo quarto decimo Neronis anno, eodem die quo Petrus, Romae pro Christo capite truncatur, sepultusque est in via Ostiensi, anno post passionem Domini tricesimo septimo. Item beatissimae Lucinae discipulae apostolorum, et Lemovicas sancti Martialis episcopi et confessoris. In Agrippina sanctorum Asclyppi, Pamphili.
1.7.1
EDITIO COLONIENSIS. JULIUS, Habet dies XXX, lunam XXX. G. KALEND. JULII.
1.7.1
In monte Hor depositio Aaron sacerdotis. Eodem die Turonis sanctae Monegundis virginis. Viennae beati Martini, tertii ejusdem urbis episcopi, ad praefatam urbem ab apostolis missi. In territorio Lugdunensi depositio beatissimi Domitiani abbatis, qui primus illic eremiticam vitam duxit, et natale Areleffi confessoris. Et octava sancti Joannis Baptistae.
1.7.2
EDITIO COLONIENSIS. JULIUS, Habet dies XXX, lunam XXX. A VI NON. JULII.
1.7.2
Romae in coemeterio Damasi natale sanctorum Processi et Martiniani, qui a beatis apostolis Petro et Paulo baptizati et instructi sunt, cum aliis promiscui sexus, numero quadraginta septem. Quod cum audisset praefectus Paulinus, misit milites, et tenuit eos, jussitque in custodiam retrudi, et sequenti die, ut os eorum cum lapidibus contunderetur, deinde in equuleo suspendi, et attrahi, nervis et fustibus caedi, dehinc ut flammae circa latera eorum apponerentur. Post triduum Paulinus arreptus a daemonio exspiravit. Caesarius vero praefectus haec Neroni intimavit, cui Nero praecepit dicens: Non tardentur, sed celerius exstinguantur. Tunc educti foras muros urbis Romae, gladio sunt caesi. Corpora eorum beata Lucina collegit, et cum aromatibus sepelivit in praedio suo. Item sanctorum martyrum, Aristionis, Crescentiani, Eutychiani, Urbani, Vitalis, Justi, Felicissimi, Felicis, Marciae et Simphorosae, qui omnes apud Campaniam martyrio coronati sunt.
1.7.3
EDITIO COLONIENSIS. JULIUS, Habet dies XXX, lunam XXX. B. V NON. JULII.
1.7.3
Leonis papae, qui sedit Romae menses decem. Hic eloquentissimus et divinis Scripturis sufficienter instructus fuit, Graeca Latinaque lingua eruditus. Hic sanctam sextam synodum fecit, quae in regia urbe celebrata est, ubi damnati sunt Cyrus, Sergius, Honorius, Pyrrhus, Paulus, Petrus, Macharius, Stephanus, Polychronius et novus Simon, qui unam voluntatem et operationem in Domino Jesu Christo praedicabant. Apud Edessam Mesopotamiae translatio corporis sancti Thomae apostoli. Caesareae Ponti natale sancti Gregorii episcopi et martyris, beati Athenodori episcopi fratris, qui orando stagnum quoddam convertit in siccitatem.
1.7.4
EDITIO COLONIENSIS. JULIUS, Habet dies XXX, lunam XXX. C. IV NON. JULII.--
1.7.4
Oseae et Aggaei prophetarum. Turonis translatio sancti Martini episcopi et confessoris, et ordinatio episcopatus ejus, et dedicatio basilicae ipsius. In Africa sancti Jucundiani martyris in mare mersi. Apud Sirmium natale sanctorum Innocentii, Sabbatiae, cum aliis triginta. In Biturica civitate natale sancti Lauriani martyris, et depositio sancti Dalrici episcopi et confessoris.
1.7.5
EDITIO COLONIENSIS. JULIUS, Habet dies XXX, lunam XXX. D. III NON. JULII.
1.7.5
Apud Syriam sancti Domitii martyris, qui virtutibus suis multa incolis beneficia praestat. Romae natale sanctae Zoae, uxoris beati Nicostrati martyris, quae ad confessionem beati Petri apostoli dum oraret, a paganis arctata, ducta est ad patronum Naumachiae, a quo primum in custodiam obscurissimam trusa, et per dies sex omni solatio lucis et victus fraudata, septimo die demum a collo et a capillis in corpore suspensa, adhibito subter fumo in confessione Domini emisit spiritum. In Sicilia natale Agathonis et Triphinae. Et in Thomis, Marini, Theodoti et Sodephae.
1.7.6
EDITIO COLONIENSIS. JULIUS, Habet dies XXX, lunam XXX. E. PRID. NON. JULII.
1.7.6
Isaiae et Joel prophetarum, et octava apostolorum, et primus beati apostoli Pauli ingessus in urbem Romam anno secundo Neronis. Item depositio beati Goaris confessoris, qui in provincia Aquitaniae ortus, temporibus Hildeberti regis Francorum, statim ab infantia verus cultor Dei fuit. Hic postmodum ibi presbyter consecratus, patriam parentesque deseruit, et in provincia, quae ripis Rheni fluminis contigua, Trigoria nuncupatur, atque ad dioecesim pertinet Trevirorum, ibi Deo libere servire delegit, usque in finem vitae suae. Romae natale sancti Tranquillini martyris, patris sanctorum Marci et Marcelliani, qui ad praedicationem beati Sebastiani credens in Dominum Jesum Christum, die octavarum apostolorum dum ad beati Pauli confessionem oraret, tentus a paganis ac lapidatus martyrium consummavit.
1.7.7
EDITIO COLONIENSIS. JULIUS, Habet dies XXX, lunam XXX. F. NON. JULII.
1.7.7
Romae beatorum martyrum, Nicostrati primiscrinii, Claudii commentariensis, Castorii Victorini, Simphoriani, quos beatus Sebastianus credere Christum docuit, et sanctus Polycarpus presbyter baptizavit. Qui cum corpora sanctorum per ora Tiberina requirunt, tenti sunt, et ad Urbis praefectum perducti. Erat enim judex Fabianus, qui eos hortabatur ad sacrificandum, per decem dies minis eos et blanditiis agens, et nullum penitus potuit commovere. Tunc fecit de eis suggestionem imperatoribus quique jussere eos tertio torqueri. Cumque nulla ratione compulsi cederent, jusserunt eos in mare praecipites dare. Immensis itaque arctati ponderibus, pelagi fluctibus dati sunt, ut in loco mundo inter aquas coronam martyrii celebrarent. In Alexandria sancti Panteni, viri apostolici. Viennae Eooldi episcopi. Item in Alexandria natale Parnieni, Eracli, Eliae, Apollonii, Anovi, et aliorum decem et novem. Eodem die sancti Wilibaldi confessoris.
1.7.8
EDITIO COLONIENSIS. JULIUS, Habet dies XXX, lunam XXX. G. VIII IDUS JULII.
1.7.8
In pago Austriae, et castro nomine Wirciburg., juxta Menum fluvium sito, natale sancti Kiliani martyris, et duorum sociorum ejus, qui ab Hibernia Scotorum insula venientes, nomen Christi in praedictis locis praedicaverunt, ibique ob veritatis confessionem sub quodam judice Gozberto trucidati sunt, et multis postea signis veri Christi martyres esse claruerunt. In Palaestina natale sancti Procopii, qui a Nicopoli ductus Caesaream, ad primam responsionum confidentiam, irato judice Fabiano, capite caesus est. Apud Asiam minorem sanctorum Aquilae et Priscillae uxoris ejus, quorum Lucas in Actibus apostolorum meminit. A. VII IDUS JULII. Romae ad Guttam manantem sancti Zenonis martyris, et aliorum decem millium ducentorum et trium. In civitate Tyro natale sanctorum Anatholiae et Audacis, sub Decio imperatore. Qnorum Anatholia cum multos in Piceno oppido infirmos, lunaticos ac daemoniacos curasset, ducta est, jubente Faustiniano, ad civitatem Tyrum, et diversis plagarum generibus vexata; deinde cum serpente tota nocte inclusa, nihil laesa est, quin et ipsum Marsum, qui serpentem dimiserat, nomine Audacem. mane a suo serpente devorandum, eripuit, et ad Christum martyriumque convertit. Nam ipse post haec ob confessionem veritatis in custodiam datus, nec mora capitali sententia est coronatus. Ipsa quoque virgo Christi transverberata, cum staret extensis manibus in oratione, ita ut per dextrum latus gladius missus, per sinistrum exiret, sepulta est mane a civibus Tyriensibus, quae passa est septima Idus Julii; Audax vero quia de Oriente erat, ab uxore sua et filiis illo translatus est.
1.7.9
EDITIO COLONIENSIS. JULIUS, Habet dies XXX, lunam XXX. B. VI IDUS JULII.
1.7.9
Romae septem fratrum, filiorum sanctae Felicitatis: id est, Januarii, Felicis, Philippi, Silvani, Alexandri, Vitalis et Martialis, sub praefecto urbis Publio, tempore Antonini principis. E quibus Januarius post verbera virgarum et carcerum, plumbatis occisus est: Felix et Philippus fustibus mactati, Silvanus praecipitio interemptus est, Alexander, Vitalis et Martialis capitali sententia puniti sunt. In Africa natale sanctorum Januarii, Marini, Naboris et Felicis decollatorum, quorum corpora Mediolanum translata sunt.
1.7.10
EDITIO COLONIENSIS. JULIUS, Habet dies XXX, lunam XXX. C. V IDUS JULII.--
1.7.10
Translatio sancti Benedicti abbatis. Postquam enim, sicut ipse vivens praedixit, monasterium ejus a gentibus vastatum est, Domino revelante, repertum est corpus ejus, et in Gallias translatum, atque in monasterio quod vocatur Floriacum, condigne sepultum. Translatum est pariter etiam corpus beatae Scholasticae, sororis ejus, atque in partibus Cenomanensium religiosorum devotione conditum. In Armenia minore, civitate Nicopoli, natale sanctorum martyrum, Januarii et Pelagiae, qui in equuleo ungulis et testarum fragmentis diebus quatuor cruciati, martyrium implevere. Romae sancti Pii papae, qui sedit in episcopatu annos decem et novem.
1.7.11
EDITIO COLONIENSIS. JULIUS, Habet dies XXX, lunam XXX. D. IV IDUS JULII.
1.7.11
Apud Aquilegiam natale sancti Hermagorae, primi ejusdem civitatis episcopi, discipuli sancti Marci evangelistae. Apud Cyprum natale beati Nasonis antiqui Christi discipuli. In Caesarea sancti Dii. Romae sancti Cleti papae, qui sedit ibi annos duodecim. Hic ex praecepto beati Petri, viginti quinque presbyteros in urbe Roma ordinavit, qui sepultus est juxta corpus beati Petri. Lugduno Galliae depositio sancti Juvencioli episcopi.
1.7.12
EDITIO COLONIENSIS. JULIUS, Habet dies XXX, lunam XXX. E. III IDUS JULII.
1.7.12
Natale sancti Silae apostoli; qui cum esset unus de primis fratribus, et ab apostolis ad Ecclesias gentium destinatus, cum Barnaba et Juda, postea ab apostolo Paulo assumptus, praedicationis officium gratia Domini plenus instanter consummavit, atque apud Macedoniam in passionibus suis Christum clarificans, postmodum requievit. In Antiochia passio sanctae Margaretae virginis.
1.7.13
EDITIO COLONIENSIS. JULIUS, Habet dies XXX, lunam XXX. F. PRID. IDUS JULII.
1.7.13
Apud Pontum natale sancti Phocae episcopi civitatis Sinopis, qui sub Trajano imperatore, praefecto Africano, carcerem, vincula, ferrum, ignem etiam pro Christo superavit: cujus reliquiae in basilica apostolorum in Vienna civitate Galliae habentur. Lugduno Galliae natale sancti Justi episcopi et confessoris.
1.7.14
EDITIO COLONIENSIS. JULIUS, Habet dies XXX, lunam XXX. G. IDUS JULII.
1.7.14
Nisibi natale sancti Jacobi episcopi, magnae virtutis viri, ita ut ad ejus preces saepe urbs discrimine liberata sit. Romae in portu Eutropii, Zosimae et Bonosae sororum. In Alexandria sanctorum Philippi, Zenonis, Narsei, et infantum decem. Eodem die sublevatio corporis sancti Henrici imperatoris. In Carthagine natale sanctorum Florentii, Catulini diaconi Januarii, Juliae et Justae, qui sunt positi in basilica Fausti, et in Sirmio Agrippini, Secundini, Maximini Martialis et Jacobi episcopi. Eodem die sanctae Reginswindae virginis, et dispersio apostolorum.
1.7.15
EDITIO COLONIENSIS. JULIUS, Habet dies XXX, lunam XXX. A. XVII KALEND. AUGUST.
1.7.15
In Ostia natale sancti Hilarini, qui sub persecutione Juliani cum nollet sacrificare, fustibus caesus martyrium sumpsit. Apud Antiochiam Syriae natale sancti Eustachii episcopi et confessoris, qui sub Constantio principe ob catholicam fidem in Trajanopolim civitatem Thraciae pulsus exsilio, ibidem requievit.
1.7.16
EDITIO COLONIENSIS. JULIUS, Habet dies XXX, lunam XXX. B. XVI KALEND. AUGUST.
1.7.16
In Carthagine natale sanctorum Scillitanorum, id est, Sperati, Narthali, Cythini, Bethurii, Felicis, Aquilini, Letacii, Januariae, Generosae, Beffiae, Donatae et Secundae, sub Saturnino praefecto, qui post primam confessionem Christi in carcerem missi, et in ligno confixi, mane gladio decollati sunt. Horum reliquiae cum ossibus beati Cypriani, et capite sancti Pantaleonis martyris, ex Africa in Gallias translatae, venerantur Lugduni in basilica beati Joannis Baptistae, et sancti Alexis confessoris. C. XV KALEND. AUGUST. Apud Carthaginem natale sanctae Gundenes, quae Plautiano et Zeta consulibus, jussu Rufini proconsulis, quater diversis temporibus equulei extensione vexata, et ungularum horrenda laceratione cruciata; carceris etiam squalore diutissime afflicta, novissime gladio caesa est. Apud civitatem Metensium sancti Arnolfi episcopi et confessoris, qui sanctitate et miraculorum gratia illustris, eremiticam vitam diligens beato fine requievit. Et sancti Materni episcopi et confessoris Mediolano.
1.7.17
EDITIO COLONIENSIS. JULIUS, Habet dies XXX, lunam XXX. D. XIV KALEND. AUGUST.
1.7.17
Apud Thebaidam sancti Patris nostri Arsenii, de quo in verbis seniorum refertur, quia propter redundationem lacrymarum tergendam sudarium semper in sinu vel in manu habuerit. Apud Hispaniam in civitate Hispali natale sanctarum Justae et Rufinae, quae a Diogeniano praeside comprehensae, equulei extensione et ungularum laniatione vexatae sunt; deinde trusae in carcerem, inedia et doloribus afflictae. Post haec jussit praeses, ut quocumque iret ipse, nudis pedibus sequerentur. Tandem Justa in carcere spiritum exhalavit: corpus ejus in puteum projectum, et a Sabino episcopo levatum, in Hispalensi coemeterio conditum est. Rufinae cervix confracta, et corpus ejus igni traditum est; cujus reliquiae a fidelibus curatae sunt.
1.7.18
EDITIO COLONIENSIS. JULIUS, Habet dies XXX, lunam XXX. E. XIII KALEND. AUGUST.
1.7.18
Natale sancti Epaphrae, qui a beato Paulo Collossensis episcopus ordinatus, clarus virtutibus martyrii palmam pro ovibus sibi commendatis virili agone percepit; sepultus in eadem urbe. Et natale beati Joseph, qui cognominatus est Justus, quique cum beato Matthia, ut numerum duodecimum impleret, ab apostolis statuitur; sed Matthia locum Judae praevaricatoris implente, beatus Joseph nihilominus praedicationis et sanctitatis officio inserviens, multamque pro fide Christi persecutionem a Judaeis sustinens, victoriosissimo fine in Judaea quievit. De quo refertur quod venenum biberit, et nihil ex hoc triste, propter Domini fidem, pertulerit. In Damasco sanctorum Sabini, Maximini, Juliani, Macrobii, Cassiae, Paulae, cum aliis decem. In Africa natale Luciani, Petri, Amabilis, Nunnae, et Thebaidae Victoris.
1.7.19
EDITIO COLONIENSIS. JULIUS, Habet dies XXX, lunam XXX. F. XII KALEND. AUGUST.
1.7.19
Sancti Danielis prophetae, Romae sanctae Praxedis virginis. Haec cum sorore sua Potentiana, a beato Pudente patre erudita in omni castitate et lege divina, post multas eleemosynas et sepulturas sanctorum, quas fecit, beato fine quievit, sepulta juxta sororem suam Romae via Salaria. Eodem die passio sancti Victoris Massiliensis episcopi, qui, sub Diocletiano et Maximiano imperatoribus, propter fidem Christi per Arterium praesidem trucidatus est, simul cum militibus Alexandro, Feliciano, Longino et Deutherio.
1.7.20
EDITIO COLONIENSIS. JULIUS, Habet dies XXX, lunam XXX. G. XI KALEND. AUGUST.
1.7.20
-- Natale sanctae Mariae Magdalenae, de qua, ut Evangelium refert, septem daemonia ejecit Dominus: quae etiam inter alia dona insignia, Christum a mortuis resurgentem prima videre meruit. Et obdormitio beatae Syntychae, quae Philippis dormit sepulta, de qua beatus Apostolus Philippensibus scribit: Evodiam rogo, et Syntychem deprecor, id ipsum sapere in Domino. Ancyrae Galatiae natale Sancti Platonis martyris, cujus gesta habentur. In Antiochia Cyrilli episcopi, et Andreae.
1.7.21
EDITIO COLONIENSIS. JULIUS, Habet dies XXX, lunam XXX. A. X KALEND. AUGUST.
1.7.21
Apud Ravennam sancti Apollinaris episcopi. Hic Romae ordinatus a beato Petro apostolo, Ravennam directus est. Qui etiam in Aemilia praedicavit, et partibus Corinthiorum, et in Mysia, et in ripa Danubii, et in partibus Thraciae, in quibus locis exsilio relegatus est, et ubicunque pervenit, innumeras virtutes fecit, et passiones sustinuit. Nam cum nimia caede esset, et rursum diutius fustibus caesus, ac nudis pedibus super prunas impositus, rursum caesus, et equuleo suspensus, tortus est, et saxo os ejus contusum, et gravissimo ferri pondere inclusus, in carcere horrifico, atque in ligno extensus est, ubi ab hominibus quidem neglectus, sed ab angelico publice pastus est; deinde catenatus in exsilium directus est, in quo rursum diutius fustibus caesus, et rursum ligatus a paganis, caesus est et vulneratus, et iterum in carcerem missus, et caesus martyrium consummavit, sub Vespasiano Caesare, Demosthene patricio. Rexit Ecclesiam annos viginti octo, dies quatuor.
1.7.22
EDITIO COLONIENSIS. JULIUS, Habet dies XXX, lunam XXX. B. IX KALEND. AUGUST.
1.7.22
Romae natale sancti Vincentii. Apud Emeritam Hispaniae civitatem natale sancti Victoris militaris, qui cum duobus fratribus Trichino, et Antinogeno diversis examinatus suppliciis, martyrium consummavit. In Tyro apud Italiam, quae est circa lacum Vulsinum, natale sanctae Christinae virginis, quae in Christum credens, deos aureos et argenteos Urbani praefecti patris sui confregit, pauperibusque distribuit. Ob hoc jubente patre afflicta alapis, verberibusque dilaniata, ferro onusta, in carcerem est conjecta. Post haec cum diutissime et crudelissime dilaniaretur, de carnibus suis patri in faciem projecit. Cumque alligata rotae igni supposito et fuso desuper oleo torreretur, erumpens flamma mille gentilium interfecit. Iterum carceri tradita, angelo visitante sanata est et refecta; dein cum magno saxi pondere in mare jactata, angelico praesidio liberata est. Cum autem propter scelera sua pater ejus fuisset exstinctus, successor ejus Dion multis eam suppliciis afflixit. Novissime successor praedicti, Julianus nomine, post fornacem candentem, ubi quinque diebus illaesa permansit, post serpentes a venefico immissos, sed fide Christi superatos, post abscissionem linguae, sagittis eam configi praecepit, sicque martyrii sui cursum complevit, anno aetatis undecimo. Eodem die vigilia S. Jacobi Apostoli. C. VIII KALEND. AUGUST. Natale S. Jacobi apostoli, filii Zebedaei. In Cilicia, civitate Samon, natale sancti Christophori martyris, qui sub Dagno rege virgis ferreis attritus, a flammis aestuantis incendii Christi virtute salvatus est, ad ultimum sagittarum ictibus confossus, martyrium capitis obtruncatione complevit. In Hispaniis, civitate Barcinona, natale S. Cucuphatis martyris, qui ex civitate Scillitana oriundus fuit, et Barcinonae sub Galerio et Maximiano et Rufino passus, primo gravissime tortus et caesus est, dein catenis astrictus, in craticula insuper extentus, aceto et sinape perfusus est. Cumque illaesus ab igne apparuisset, iterum ferro vinctus, in custodiam retrusus est; ubi divino splendore consolatur, et tunc nervis ferreis et taurinis crudelissime est caesus. In ultimo dictata est sententia:« Cucuphatem rebellem gladio ferire jubemus.» Cujus corpus a Christianis sepelitur.
1.7.23
EDITIO COLONIENSIS. JULIUS, Habet dies XXX, lunam XXX. D. VII KALEND. AUGUST.
1.7.23
Natale beati Herasti, qui Philippis a beato Paulo episcopus relictus, ibi martyrio coronatus quievit. Romae in portu lacincti, sub consulari Leontio, Luxurio, primo civitatis Terracinae, tradente, qui missus in ignem nullo modo laedi potuit. Inde praecipitatus in validissimum torrentem, incolumis ejectus est ad littus. Nuntiantur haec consulari Leontio, qui misit spiculatorem cum militibus, ut eum comprehensum gladio ferirent. Cujus corpus Julia cum servis suis nocte collegit, et cum honore sepelivit in praedio suo, juxta urbem Romam. In Phrygia sanctorum Joviani et Juliani.
1.7.24
EDITIO COLONIENSIS. JULIUS, Habet dies XXX, lunam XXX. E. VI KALEND. AUGUST.
1.7.24
Apud Nicomediam civitatem natale sancti Hermolai presbyteri, cujus doctrina beatus Pantaleon ad fidem conversus est. Qui tentus a Maximiano cum duobus germanis suis Hermippo et Hermocrate, capitali sententia ob confessionem Christi punitus est. In Sicilia Simeonis monachi. In civitate Nolana, Felicis, Juliae et Jucundae. Antissiodoro natale sancti Etherii episcopi.
1.7.25
EDITIO COLONIENSIS. JULIUS, Habet dies XXX, lunam XXX. F. V. KALEND. AUGUST.
1.7.25
Nicomediae passio sancti Pantaleonis martyris, qui cum, jubente Maximiano, artem disceret medicinae, a presbytero Hermolao ad fidem Christi conversus, multa miracula fecit, patremque suum senatorem Eustorgium Christi fidei subjugavit. Ob quam causam tentus est ab eodem Maximiano, equulei poena, et lampadum exustione cruciatus. Sed inter haec Domino sibi apparente refrigeratus, tandem ictu gladii martyrium consummavit. Lugduno sancti Peregrini presbyteri.
1.7.26
EDITIO COLONIENSIS. JULIUS, Habet dies XXX, lunam XXX. G. IV KALEND. AUGUST.
1.7.26
Romae sancti Felicis pontificis. Hic declaravit Constantium filium Constantini esse haereticum, cum secundo rebaptizaretur ab Eusebio Nicomediense episcopo, et juxta praeceptum ejusdem Constantii Augusti capite detruncatur. Sedit autem in episcopatu annum unum, menses tres, dies duos. Eodem die passio sanctorum Simplicii, Faustini germanorum, qui sub Diocletiano et Maximiano in urbe Romana propter fidem Christi, post multa ac diversa supplicia decollati sunt; et germana eorum Beatrix nomine, eo quod corpora eorum cum Crispo et Joanne presbyteris sepelivit, a Lucretio praefecto praefocata, tradidit spiritum. Lucretius vero ab immundo spiritu arreptus, in convivio suo expiravit. Item depositio beati Lupi episcopi, qui cum germano venit in Britanniam, et quinquaginta duobus annis sacerdotio functus est, qui tempore regis Attilae, qui Galliam vastabat, sicut in hymno ejus canitur, dum bella cuncta perderent, orando Trecas munivit. Et depositio beati Prosperi episcopi.
1.7.27
EDITIO COLONIENSIS. JULIUS, Habet dies XXX, lunam XXX. A. III KALEND. AUGUST.
1.7.27
Romae Abdon et Sennen subreguli Persarum. Qui cum Corduba civitate Persarum vincula paterentur a Decio, ad ultimum duxit eos Romam catenis obligatos, et diversis poenis maceratos, ubi primo plumbatis caesi, dein gladio interfecti sunt. Apud Africam civitatem Taburbo, lucernaria passio sanctarum virginum, Maximae, Donatillae et Secundae, sub Anylino proconsule: quae post plurimas quas sustinuerunt pro Christo passiones, gladio caesae martyrium consummaverunt. Antissiodoro depositio sancti Ursi episcopi.
1.7.28
EDITIO COLONIENSIS. JULIUS, Habet dies XXX, lunam XXX. B. PRID. KAL. AUGUST.
1.7.28
Caesareae passio sancti Fabii; qui cum ferre vexilla praesidialia recusaret, primum in carcerem trusus est, deinde productus atque interrogatus, in Christi confessione perdurat. Qui mox a furibundo judice capitali sententia condemnatur. Post haec corpus reticulo insutum, in maris profunda seorsum caput, seorsumque cadaver immergitur. Sed Domini virtute integritati redditum corpus, ad Carenitanum littus evectum, et condigno cultu a fidelibus in basilica tumulatum. In Africa natale sanctorum Democriti, Secundi, Dionysii, Tirsi. Ravennae translatio sancti Germani episcopi et confessoris.
1.8.1
EDITIO COLONIENSIS. AUGUSTUS. Habet dies XXXI, lunam XXIX. C KALEND. AUGUST.
1.8.1
Sanctorum Machabaeorum septem fratrum cum matre sua, qui passi sunt sub Antiocho rege. Romae dedicatio primae ecclesiae a beato Petro constructae et consecratae. Viennae sancti Veri episcopi, qui unus fuit de discipulis apostolorum, et sancti Nectari episcopi. Vercellis Eusebii episcopi, qui moventibus persecutionem Arianis, sub Constantio principe martyrium passus est. Philadelphia civitate natale sanctorum martyrum, Cyrilli, Aquilae, Petri, Domitiani, Rufi, Menandri, una die coronatorum. In civitate Gerunda natale sancti Felicis martyris, qui tandiu jussus est laniari a Rufino, usque dum vitam finiret. D. IV NON. AUGUST. Romae sancti Stephani papae, et martyris, sub Valeriano et Gallieno imperatoribus. Qui cum persecutio saeva grassaretur, congregato universo clero suo, hortatur ut pro Christo coronam martyrii alacriter susciperent. Hic constituit ut sacerdotes et levitae vestes sacras in quotidiano usu non haberent, nisi tantum in ecclesia. Ordinaverat tres presbyteros, et septem diaconos, et clericos decem, cum quibus de regno Dei assidue docebat. Beatus igitur Stephanus, post multa quae operatus est bona, missis a Valeriano militibus, jussus est decollari; qui venientes invenerunt eum sacrificium Deo offerentem, et decollaverunt eum in eodem loco. Cujus corpus Christiani sepelierunt in eadem crypta, ubi astantis effusus est sanguis ejus, in loco qui appellatur coemeterium Calisti. Sedit autem in episcopatu septem annos, menses quinque, dies tres. Eodem die natale sanctae Theodotae, cum tribus filiis suis in provincia Bithynia, urbe Nicaea, tempore Diocletiani, sub comite Leucadio, qui hanc ferro vinctam cum filiis, consulari Bithyniae Nicetio destinavit. At ille filium ejus primogenitum Evodium Christum fiducialiter confitentem fecit fustibus caedi, deinde illam cum omnibus filiis igne consumi. Scriptum est in Passione S. Anastasiae.
1.8.2
EDITIO COLONIENSIS. AUGUSTUS. Habet dies XXXI, lunam XXIX. E. III NON. AUGUST.
1.8.2
Jerosolymis inventio corporis sancti Stephani protomartyris, et sanctorum Gamalielis, Nicodemi et Abibon, sicut revelatum est a Domino beato Luciano presbytero, septimo Honorii principis anno. Item in Antiochia sancti Stephani protomartyris, ubi haberi dicitur unus de lapidibus, quibus in brachio percussus est, et multas ex eo virtutes sanitatum fieri. Constantinopoli natale sancti Hermelli martyris.
1.8.3
EDITIO COLONIENSIS. AUGUSTUS. Habet dies XXXI, lunam XXIX. F. PRID. NON. AUGUST.
1.8.3
Natale beati Aristarchi, de quo beatus Paulus apostolus Colossensibus scribit: Salutat vos Aristarchus concaptivus meus. Qui comes individuus Apostolo permansit usque ad ejus confessionem, qui constitutus Thessalonicensium episcopus, post longos ac beatissimos agones a Christo coronatus quievit. Romae in crypta arenaria beati Tertulliani martyris, quem beatus Stephanus baptizatum in albis presbyterum consecravit, qui non longe post abscissione capitis martyrium promeruit, sepultus est a beato Stephano pontifice. Et natale sancti Justini confessoris, Lugduni adventus corporis sancti Justi episcopi de eremo.
1.8.4
EDITIO COLONIENSIS. AUGUSTUS. Habet dies XXXI, lunam XXIX. G. NON. AUGUST.
1.8.4
Augustuduno sancti Cassiani episcopi. In civitate Catalaunicae depositio Memmii episcopi et confessoris; et alibi sanctorum Floriani et Philistinae. Et natale sancti Oswaldi regis, martyrio coronati. A. VIII IDUS AUGUST. Romae in coemeterio Calisti, via Appia natale sancti Sixti episcopi et martyris, sub Decio imperatore et Valeriano praefecto, et sanctorum Felicissimi et Agapiti diaconorum ejusdem, quos simul jussit Decius ante templum Martis decollari. Noctu vero venerunt clerici, et maxima pars Christianorum, sepelierunt sanctorum corpora cum digno honore. Decollati sunt cum eis et alii quatuor, ut in Gestis pontificalibus legitur, Januarius, Magnus, Vincentius, Stephanus, subdiaconi. Passus est cum eis et beatus Quartus, ut scribit sanctus Cyprianus. Hic beatus Sixtus apud Athenas natus et doctus, primum quidem philosophus, postea Christi discipulus fuit: sedit in episcopatu annum unum, menses decem, dies viginti tres. In Hispaniis civitate Compluto, Justi et Pastoris fratrum, qui cum adhuc pueri litteris imbuerentur, projectis in schola tabulis, sponte ad martyrium cucurrerunt: qui mox jussu Daciani a carnificibus jugulati sunt, ubi etiam in basilica sui nominis quiescunt. Et natale Hormisdae papae, qui sedit Romae annos decem et septem. Hic composuit clerum, et psalmos erudivit. Sub hujus tempore Anastasius imperator haereticus percussus fulmine interiit. Sepultus est idem pontifex in ecclesia beati Petri.
1.8.5
EDITIO COLONIENSIS. AUGUSTUS. Habet dies XXXI, lunam XXIX. B. VII IDUS AUGUST.
1.8.5
Apud Tusciam civitatem Aretio, natale sancti Donati episcopi et martyris, qui tentus est tempore Juliani imperatoris a Quadratiano Augustali, simul cum Hilarino monacho, jussusque est idolis sacrificare; quo renuente, jussit Hilarinum tandiu fustibus caedi in conspectu ipsius, donec emitteret spiritum, deinde beatum Donatum gladio percuti. Quorum corpora Christiani venerabiliter juxta civitatem sepelierunt. Cujus meminit beatus Gregorius, quod fractum calicem orando restauraret. Romae sanctorum martyrum Petri, Julianae, cum aliis decem et octo. Mediolani sancti Faustini, tempore Aurelii Commodi martyrizati. Apud provinciam Rhetiae, civitatem Augustam, natale sanctae Afrae martyris.
1.8.6.1
EDITIO COLONIENSIS. AUGUSTUS. Habet dies XXXI, lunam XXIX. C. VI IDUS AUG.--
1.8.6.1
Romae via Ostiensi, milliario septimo, natale sancti Cyriaci martyris, quem beatus Marcellus cum Lucina matrona christianissima, cum aliis qui cum eo passi sunt sanctorum corporibus, transtulit in praedium suum, condiens aromatibus, et linteaminibus recondens in sarcophagis lapideis, octava die mensis Augusti. Beatorum martyrum passiones, id est, Cyriaci, Largi et Smaragdi, suit locis notatae sunt, hoc est, septima decima Kalendarum Aprilis. Apud Viennam natale sancti Severi presbyteri et confessoris, qui etiam ingentem paganorum multitudinem verbo et miraculis ad fidem Christi convertit.
1.8.6.2
D. V IDUS AUG. Romae sancti Romani militis, qui confessione sancti Laurentii compunctus, petiit se ab eo baptizari, et mox jubente Decio cum fustibus exhibitus, ac decollatus est. In Verona civitate passio sanctorum Firmi et Rustici, qui tempore Maximiani imperatoris et Annolini consularis passi sunt. Et vigilia sancti Laurentii.
1.8.6.3
E. IV IDUS AUG. Natale sancti Laurentii archidiaconi sub Decio, qui post plurima tormenta carceris, verberum diversarum laminarum ardentium, ad ultimum in craticula ferrea assatus, martyrium complevit. Mane autem primo adhuc crepusculo rapuit corpus ejus Hippolytus, et condivit cum linteis et aromatibus, cum beato Justino presbytero, jam vespertina hora, et sepelierunt in agro Verano. Romae militum LXV. Tunc passi sunt Claudius, Severus, Crescentius et Romanus ipso die.
1.8.6.4
F. III IDUS AUG. Romae inter duas lauros natale sancti Tiburtii martyris, qui jussu Fabiani praesidis super prunas ardentes nudis pedibus incedens, in nullo laesus est. Postea vero a praedicto Fabiano, machinante Torquato apostata, gladio transverberatus, martyrium explevit. Item Romae natale sanctae Susannae virginis, quae fuit filia Gabinii presbyteri, fratris Gaii papae. Haec ergo sub Diocletiano imperatore passa est, eo quod nollet Maximo filio ejus in conjugio sociari, sed in virginitate permanere, hortante eam Gaio papa, nec non et Serena Augusta, ut stabilis permaneret in fide et castitate perpetua. Propter hoc jussit eam Diocletianus post alia tormenta in domo propria gladio percuti, et sic martyrium consummavit. Praedicta vero Serena Augusta collegit corpus sanctae virginis, et sanguinem quem suderat, in eodem loco cum suo velamine tersit, et posuit in capsa argentea in palatio suo, ubi die noctuque furtivis vicibus orare non cessabat. Corpus autem sanctae Susannae ipse manibus suis ornavit, cum linteaminibus et aromatibus, et posuit juxta corpora sanctorum in coemeterio Alexandri. Et depositio Gaugerici episcopi et confessoris, qui XXXIII annos Cameracorensem rexit Ecclesiam.
1.8.6.5
G. PRID. IDUS AUG. In Sicilia civitate Catinensium natale Eupli diaconi. Qui cum diutissime torqueretur, decollatus est a Calvisiano consulari, tempore Diocletiani et Maximiani. Eodem die sanctae Hilariae, matris sanctae Afrae martyris. Quae cum ad sepulcrum ejus excubaret, ibidem pro fide Christi a persecutoribus igni tradita est, cum Digna et Eumenia, et Euprepia, quae fuerunt puellae sanctae Afrae. In Syria natale sanctorum Macharii et Juliani.
1.8.6.6
A. IDUS AUG. Romae sancti Hippolyti, qui tempore Decii ligatis pedibus ad colla indomitorum equorum, et sic per carduos et tribulos tractus emisit spiritum. Et Natale Concordiae nutricis ejus, quam ante ipsum plumbatis caesam martyrizavit, et aliorum decem et novem de domo ejus, qui simul decollati sunt. Eodem die natale sancti Cassiani Romae. Qui cum adorare idola nollet, interrogatus a persecutore quid artis haberet, respondit quia pueros notas doceret, et mox spoliatus vestibus, ac manibus post terga revinctis, statuitur in medio, vocatisque pueris, quibus docendo exosus factus fuerat, data est facultas eum perimendi. At illi quantum doluerant discentes, tantum se ulcisci gaudentes, alii eum tabulis ac buxis feriebant, alii stylis vulnerabant. Quanto quorum infirmior erat manus, tanto graviorem poenam martyrii dilata morte faciebant. Pictavis civitate depositio sanctae Radegundis reginae. In Germania provincia natale sancti Wigberti presbyteri et confessoris.
1.8.7
EDITIO COLONIENSIS. AUGUSTUS. Habet dies XXXI, lunam XXIX. B. XIX KALEND. SEPTEMB.
1.8.7
Natale sancti Eusebii presbyteri et confessoris, qui sub Constantio imperatore Ariano, machinante Liberio praesule, similiter haeretico, confessionem suam complevit. Nam a praedicto Constantio includitur in quodam cubiculo domus suae, habente in latitudine pedes quatuor: ubi multos dies in oratione perseveravit, et bono decimo Kalendarum Septembris, post menses septem, adhuc tamen inclusus dormitionem accepit. Cujus corpus collegit Gregorius et Orosius presbyteri, et sepelierunt in crypta juxta corpus beati Sixti episcopi et martyris, via Appia, in coemeterio Calisti, ubi et titulum ipsius scribentes posuerunt ita: Eusebio homini Dei. Audiens Constantius, quod Gregorius et Orosius sepelissent corpus beati Eusebii, in eadem crypta, ubi illud condiderant, praecepit vivum includi Gregorium. Hunc semivivum nocte Orosius excepit inde, et post paululum defunctum juxta corpus sancti Eusebii sepelivit. Factaque est gravissima persecutio in catholica Ecclesia ab Arianis, sedem apostolicam tenente Liberio. Et vigilia assumptionis Mariae virginis.
1.8.8
EDITIO COLONIENSIS. AUGUSTUS. Habet dies XXXI, lunam XXIX. C. XVIII KALEND. SEPTEMB.--
1.8.8
Assumptio sanctae Dei genitricis et perpetuae virginis Mariae. Eodem die sancti Tharsicii acolyti et martyris. Quem pagani cum invenissent Christi corporis sacramenta portantem, coeperunt discutere quid gereret. At ille indignum judicans porcis prodere margaritas, tandiu fustibus ac lapidibus mactatus, quousque exhalaret spiritum. Et revoluto ejus corpore sacrilegi discussores nihil invenire potuerunt sacramentorum Christi. Christiani autem collegerunt corpus martyris, et sepelierunt in coemeterio Calisti. In Nicomedia sanctorum Stratonis, Philippi et Eutychiani, cum eorum sociis.
1.8.9
EDITIO COLONIENSIS. AUGUSTUS. Habet dies XXXI, lunam XXIX. D. XVII KALEND. SEPTEMB.
1.8.9
In Nicaea Bithyniae natale sancti Ursatii confessoris, sub Licinio persecutore, qui relicta militia solitariam vitam in quadam turri praefatae urbis elegit: tantisque virtutibus claruit, ut et daemones expulisse, et ingentem draconem orando interemisse legatur. Romae sanctae Serenae, uxoris quondam Diocletiani Augusti. In Alexandria sanctorum Orionis, Aemilii et Ignatii. In Persida sanctorum Tyrsi cum sociis suis. Metis civitate sancti Arnulfi confessoris.
1.8.10
EDITIO COLONIENSIS. AUGUSTUS. Habet dies XXXI, lunam XXIX. E. XVI KALEND. SEPTEMB.
1.8.10
Apud Africam sanctorum martyrum, Liberati abbatis, Bonifacii diaconi, Servi et Rustici subdiaconorum, Rogati et Septimi monachorum, et Maximi pueri: qui persecutione Vandalica, jussu crudelissimi regis Hunerici, de territorio Caspensis civitatis, ex habitaculo monasterii abstracti, atque ad urbem Carthaginem sunt producti, ubi pro confessione fidei carcerali custodiae mancipati, et crudelibus ferri ponderibus arctati: novissime tyrannus jussit navem lignorum manipulis adimpleri, atque in ea omnes pariter alligatos in medio pelagi igne supposito accremari, qui Dei nutu exstinctus est. Tunc praecepit eos remorum vectibus in modum canum cerebris comminutis singulos extingui. Corpora eorum in mare jactata sunt, sed eadem hora littoribus reddita, a Christiano populo in monasterio Celerinae sunt condita. Apud Caesaream Cappadociae natale sancti Mammetis martyris, qui passus est imperante Aureliano sub Alexandro praeside. Ipso die octava sancti Laurentii martyris et confessoris.
1.8.11
EDITIO COLONIENSIS. AUGUSTUS. Habet dies XXXI, lunam XXIX. F. XV KALEND. SEPTEMB.
1.8.11
Apud Praenestinam civitatem natale sancti Agapiti martyris, qui sub Antiocho rege, cum esset puer annorum quindecim, pro Christo passus est. Hic nervis caedebatur, et flagellis atrocissimis, et nudus suspensus est, capite deorsum verso, et atro subter fumo facto, et tunc aquam bullientem fuderunt super ventrem ejus. Postea leonibus projectus, sed nihil ab eis est laesus, ad ultimum decollatus est. Corpus ejus nocte sublatum est a Christianis, et positum in sarcophago novo, nutu divino ibi invento. Romae beatorum Joannis et Crispi presbyterorum, qui multa corpora sanctorum in persecutione officiosissime sepelierunt et ipsi postmodum in pace quieverunt.
1.8.12
EDITIO COLONIENSIS. AUGUSTUS. Habet dies XXXI, lunam XXIX. G. XIV KALEND. SEPTEMB.
1.8.12
Natale sancti Magni. In Gallia sancti Donati presbyteri, qui anachoreticam vitam multis annis duxit. Romae beati Julii senatoris martyris. Hunc docuerunt beati martyres, Eusebius, Vincentius, Peregrinus, Pontianus, per quorum manus etiam facultates suas pauperibus distribuens, a beato Rufino presbytero baptismum percepit. Quod audiens Commodus imperator, iratus tradidit eum Vitellio judici, ut facultates ejus requireret, et ad sacrificandum impelleret. Quique conjecit eum in carcerem, et post triduum catenis vinctum fecit sibi praesentari; et auditum eum, tandiu jussit fustibus caedi, donec emitteret spiritum. Cujus corpus collegerunt noctu supradicti sancti martyres, et sepelierunt in coemeterio Calepodii.
1.8.13
EDITIO COLONIENSIS. AUGUSTUS. Habet dies XXXI, lunam XXIX. A. XIII KALEND. SEPTEMB.
1.8.13
Samuelis prophetae, cujus sacra ossa Augustus Arcadius de Judaea transtulit in Thraciam portantibus episcopis, et omnium ecclesiarum populis tanta laetitia occurrentibus, quasi viventem susciperent. Eodem die beati Porphyrii, qui sanctum martyrem Agapitum erudivit in fide et doctrina Christi. In Alexandria natale Dioscori, et alibi Philiberti abbatis. In Luciana sanctorum Valentini, Leonti. In Sinnida civitate sanctorum Valenti, Piricii, Arci, Maximi, Pamphili et Colovi confessoris, et sancti Bernardi abbatis.
1.8.14
EDITIO COLONIENSIS. AUGUSTUS. Habet dies XXXI, lunam XXIX. B. XII KALEND. SEPTEMB.
1.8.14
In territorio Gamalitanae civitatis, natale sancti Privati martyris et episcopi, qui passus est persecutione Valeriani et Gallieni. Eodem die natale sanctorum Bonosi et Maximiani, quorum gesta habentur. In civitate Salona natale Anastasii martyris: qui cum videret beatum Agapitum inter tormenta fortiter Christum confitentem, exclamavit: Magnus est Christianorum Deus, et non est alius praeter eum. Erat autem cornicularius miles. Ad quem praeses: Sicut video, inquit, seductus es. Ex quo praeses imperatori Aureliano renuntiavit, qui mox perire illum jubet; et ita martyr factus, migravit ad Dominum. In Hispaniis Vincentii, Juliani. In Sardinia sanctorum Luxurii et Trajani.
1.8.15
EDITIO COLONIENSIS. AUGUSTUS. Habet dies XXXI, lunam XXIX. C. XI KALEND. SEPTEMB.--
1.8.15
Natale sancti Timothei, qui ab Antiochia veniens Romam, sub Melchiade papa susceptus est in hospitium a Sylvestro papa, qui postea episcopus factus est. Qui cum annum totum et aliquot menses praedicans, multos ad Christum convertisset, tentus a Tarquinio urbis praefecto, et longa carceris custodia maceratus, cum sacrificare idolis noluisset, tertio caesus, et gravissimis suppliciis attrectatus, ad ultimum decollatus, et juxta beatum Paulum apostolum sepultus est. Augustuduno sancti Simphoriani, qui tempore Aureliani imperatoris sub Heraclio consulari, cum idolis sacrificare nollet, primo verberibus afflictum, deinde carceri mancipatum, ad ultimum abscisso capite martyrio effecit. In portu Romano, sanctorum peregrinorum martyrum, Martialis, Epicteti, Saturnini, Aprilis et Felicis, cum sociis eorum. Item Romae beati Antonini martyris; qui cum esset carnifex, vidit stantem juvenem cum spongia, et detergentem latera sanctorum martyrum Eusebii, Pontiani, Peregrini atque Vincentii, cum suspensi in equuleo caederentur, exclamare coepit: Vere Deus est Christus, quem hi praedicant; et fugiens occulte a Rufino presbytero baptizatus est; et reversus ad Vitellium cum se Christianum libere fateretur, capitali sententia damnatus, via Aurelia sepultus est. Eodem die octava Assumptionis sanctae Mariae.
1.8.16
EDITIO COLONIENSIS. AUGUSTUS. Habet dies XXXI, lunam XXIX. D. X KALEND. SEPTEMB.
1.8.16
Natale sanctorum martyrum Donati, Restituti, Valeriani, Fructuosae, cum aliis duodecim in Antiochia coronatis. Eodem die beati Zachaei episcopi, qui quartus a Jacobo Jerosolymorum rexit Ecclesiam. Lugduni sanctorum martyrum Minervi et Eleazari cum filiis octo. In portu urbis Romae sanctorum Hippolyti, Quiriaci et Archillai. Remis civitate, sanctorum Timothei et Apollinaris, qui ibidem martyrizati sunt. In Alexandria beati Theonae venerabilis. Passio trium fratrum in civitate Aegaea sub Lysia praeside, id est, Claudii, Asteris, Neonis. Et vigilia sancti Bartholomaei apostoli.
1.8.17
EDITIO COLONIENSIS. AUGUSTUS. Habet dies XXXI, lunam XXIX. E. IX KALEND. SEPTEMB.
1.8.17
Natale S. Bartholomaei apostoli, qui apud Indiam Christi Evangelium praedicans, vivens a barbaris decoriatus est, atque jussu regis Astragis decollatus martyrium complevit. Hujus apostoli sacratissimum corpus primum ad insulam Liparis, quae Sicilia vicina est, deinde Beneventum translatum, pia fidelium veneratione celebratur. Apud Carthaginem sanctorum qui passi sunt tempore Valeriani et Gallieni. Ferunt enim inter alia supplicia, tunc a praeside clibanum calcis accensum, et ante ora illius prunas cum thure exhibitas, et praesidem dixisse Christianis: Eligite e duobus unum: aut thura super his carbonibus offerte Jovi, aut in calcem demergemini. Tunc trecenti viri fide armati, se ictu rapidissimo Christum Dei Filium Deum fatentes, jecerunt in ignem, et inter vapores calcis in pulverem sunt conversi. Ex quo etiam candidatus ille exercitus beatorum Massa candida meruit nuncupari. F. VIII KALEND. SEPTEMB. Passio Genesii martyris, sub Diocletiano imperatore, qui fuit primum sub gentilitate minus, Thymelicae artis magister; sed postea Christi confessor factus, modis multis a persecutoribus est cruciatus, hoc est, fustibus caesus, equuleo suspensus, flammis adustus, novissime decollatus. Romae natale sanctorum quatuor martyrum, Eusebii, Pontiani, Peregrini et Vincentii, imperante Commodo, Vitellio judice: qui primum levati in equuleo, ac nervis distenti, fustibusque sunt caesi, et flammae ad latera eorum appositae, nec tamen superati, Eusebius praecisa lingua loquebatur, novissime plumbatis usque ad emissionem spiritus mactati sunt. Quorum corpora collegit beatus Rufinus presbyter, et sepelivit. Item sancti Genesii Arelatensis, qui in ripa Rhodani fluminis decollatus, et proprio cruore baptizatus, martyrii gloriam accepit. Eodem die sancti Sandradi abbatis.
1.8.18
EDITIO COLONIENSIS. AUGUSTUS. Habet dies XXXI, lunam XXIX. G. VII KALEND. SEPTEMB.
1.8.18
Romae sancti Zepherini papae, qui rexit ecclesiam annos octo, menses septem, dies decem. Hic constituit ut praesentibus omnibus clericis et laicis fidelibus, sive diaconus, sive sacerdos ordinaretur, et astantibus sacerdotibus missae celebrarentur. Item natale sanctorum Irenei et Abundii Romae, quos Deciana persecutione jussit Valerianus incloacari, eo quod corpus beatae Concordiae in cloacam missum levaverunt. Et ipsorum quoque corpora levavit Justinus presbyter, et sepelivit in crypta juxta beatum Laurentium. Apud Victimilium, castrum Italiae, sancti Secundi martyris ex legione Thebeorum. Et Pergamis sancti Alexandri martyris, qui et ipse erat ex legione praedictorum sanctorum, qui decollatione martyrium explevit.
1.8.19
EDITIO COLONIENSIS. AUGUSTUS. Habet dies XXXI, lunam XXIX. A. VI KALEND. SEPTEMB.
1.8.19
Apud Capuam natale sancti Rufi martyris, quem beatus Apollinaris Petri apostoli discipulus docuit et baptizavit, cum esset idem Rufus patriciae dignitatis. Thomis sanctorum martyrum Marcellini tribuni, et uxoris ejus Manneae, et filii ipsius Joannis et Serapionis clerici, et Petri militis. In Galliis civitate Arelatensi sancti Caesarii episcopi et confessoris, viri mirae sanctitatis. Augustuduno sancti Siagri episcopi et confessoris. B. V KALEND. SEPTEMB. Natale beati Hermeti martyris. Hunc beatus Alexander papa urbis Romae cum esset praefectus, baptizavit cum uxore et filiis ac sorore Theodora, et cum eo pariter mille ducentos quinquaginta servos ejus, uxores quoque et filios eorum, prius ingenuitate illis concessa, ac non multo post ab Aureliano gladio plectitur. Cujus corpus collegit beata Theodora, atque in via Salaria sepelivit. In Africa depositio sancti Augustini episcopi, qui primo de civitate sua propter barbaros in Sardiniam translatus est, et nuper a Luitprando rege Longobardorum Ticinum relatus, et honorifice conditus est. Constantinopoli sancti Alexandri episcopi et confessoris, cujus virtute orationis Arius divino judicio condemnatus crepuit medius, et effusa sunt viscera ejus. Apud Sanctonas sancti Juliani episcopi et confessoris. Et natale sancti Juliani martyris. Item natale sancti Pelagii martyris.
1.8.20
EDITIO COLONIENSIS. AUGUSTUS. Habet dies XXXI, lunam XXIX. C. IV KALEND. SEPTEMB.--
1.8.20
Passio et decollatio, vel potius inventio capitis beati Joannis Baptistae, quem Herodes, ut evangelistae referunt, decollari praecepit. Romae in Aventino oppido Vindmense, ad arcum Faustini beatae Sabinae martyris, quae fuit uxor praeclarissimi quondam Valentini. Hanc beata virgo Serapia vera fide instruxit. Passa est autem famula Christi Sabina sub Adriano imperatore, sub praefecto quoque Elpidio, cum in confessione Christi perduraret, decollatione capitis martyrii palmam adepta est. Cujus corpus sepultum est in sepulcro quod sibi ipsa paraverat, ubi et magistram Serapiam ipsa ante condiderat. In Venusio civitate Apuliae natale Felicis episcopi. Civitate Tubzozense Januarii presbyteri, et Fortunatiani et Septimi lectorum, qui sub Diocletiano imperatore a Magdelliano procuratore gladio consummati sunt.
1.8.21
EDITIO COLONIENSIS. AUGUSTUS. Habet dies XXXI, lunam XXIX. D. III KALEND. SEPTEMB.
1.8.21
Romae via Ostiensi sancti Felicis presbyteri, sub Diocletiano et Maximiano imperatoribus, praefecto et judice Dracone. Hic cum ad secretarium judicis esset perductus, juxta templum Serapis, dum cogeretur ad sacrificandum, exsufflavit in faciem statuae aereae, et statim cecidit. Item ductus ad Mercurii statuam, quae simili modo cecidit. Item ad simulacrum Dianae, quod pari modo cecidit. Tunc praeses jussit eum decollari. Quidam ergo vir Christianus obvius ei fuit, hominibus quidem absconsus. Deo vero manifestus; hic coepit clamare: Ipsum quem hic sanctus Pater confitetur, Dominum Jesum Christum colo. Mox et ipse ab officio praefecti comprehensus, pariter dato sibi prius osculo pacis cum beato Felice decollatus est. Hujus nomen quia non invenerunt postmodum Christiani, Adauctum eum appellaverunt, eo quod sancto martyri Felici auctus sit ad coronam. Christiani vero noctu venientes, ibi in eodem loco sepelierunt eos. Quorum corpora voluerunt pagani exinde effodere, sed quicunque manus apposuerunt a diabolo correpti sunt, ubi postea pacis tempore basilica fabricata est. Et natale sanctae Gaudentiae virginis, cum aliis tribus. Et depositio Agili abbatis.
1.8.22
EDITIO COLONIENSIS. AUGUSTUS. Habet dies XXXI, lunam XXIX. E. PRID. KALEND. SEPTEMB.
1.8.22
Treviris natale sancti Paulini episcopi et confessoris, qui tempore Arianae infestationis, a Constantino imperatore, ob catholicam fidem exsilio relegatus, et extra Christianum nomen usque ad mortem mutando exsilia fatigatus est, ad ultimum apud Phrygiam defunctus, beatae passionis coronam percepit a Domino. Apud Athenas beati Aristidis confessoris.
1.9.1
EDITIO COLONIENSIS. SEPTEMBER Habet dies XXX, lunam XXX. F. KALEND. SEPTEMB.
1.9.1
Natale beatae Annae prophetissae, filiae Phanuel de tribu Aser, de qua evangelistae narrant, Jesu Nave et Gedeon prophetarum. Apud Capuam natale sancti Prisci martyris, qui unus fuit de illis antiquis Christi discipulis. Apud Senonas beati Lupi episcopi, sanctitate insignis, et beati Longini martyris. Scinomannis civitate Galliae, natale Victoris episcopi. Nam dum sanctus Martinus Turonis episcopus pergeret ad sepeliendum Leporinum episcopum supradictae urbis, et venisset ad oppidum, respiciens vidit hominem operantem in vinea( eratque subdiaconus) revelatum est sancto Dei, eo quod ipse successurus esset in episcopalem locum. Vocavitque illum sanctus Martinus ad se dicens illi: Benedic, domine Victor. Cui ille: Benedic mihi, domine tu mi, et benedictus sermo tuus. Sicque jussu sancti viri secutus est eum: quem convocata plebe ordinavit episcopum, eique filium Victorinum nomine baptizavit, et secum ad nutriendum ad Dei servitium tulit, quem etiam post obitum patris eidem civitati ordinavit episcopum. Ad aquas duras natale sanctae Verenae virginis, et sancti Egidii abbatis et confessoris.
1.9.2
EDITIO COLONIENSIS. SEPTEMBER Habet dies XXX, lunam XXX. G. IV NON. SEPTEMB.
1.9.2
Natale sancti Justi Lugdunensis episcopi, mirae sanctitatis et prophetici spiritus viri. Hic clam episcopatum suum relinquens, ascensa navi, comitante secum uno tantum puero, qui officio lector erat, nomine Viator, pervenit ad Aegyptum, ubi per aliquot annos sanctis monachis coelum solum exspectantibus, consociatus, humilitate et sanctitate non mediocri vixit. Cursu itaque temporis consummato, coronam justitiae percepturus migravit ad Dominum, pridie Idus Octobris. Corpus ejus a religiosis civibus Lugdunum cum ossibus beati Viatoris ministri ejus relatum, et condigno cultu in basilica sanctorum Machabaeorum conditum est, quarta Nonas Septemb. Item apud praefatam urbem beati Elpidii episcopi et confessoris. Apud Apamiam sancti Antonini martyris.
1.9.3
EDITIO COLONIENSIS. SEPTEMBER Habet dies XXX, lunam XXX. A. III NON. SEPTEMB.
1.9.3
Natale sanctae Phoeben, de qua beatus Apostolus Romanis scribit. Romae passio sanctae Serapiae virginis, sub Adriano imperatore, judice Beryllo. Haec Antiochena fuit genere, et cum in domo Sabinae commaneret, exhibita est in conspectu praesidis; cui ille dixit: Sacrifica diis. Quae respondit: Timeo et colo Deum omnipotentem, non sacrifico daemonibus. Tunc praeses jussit eam quinque juvenibus lascivis tradi, ut ei nocturno furto insultarent. A quibus perducta in cubiculum valde obscurum, cum vellent eam tangere, subito terrae motus factus est magnus: cecideruntque exanimes in terram membris omnibus resolutis. Post haec praecepit eam fustibus caedi, et ardentes lampades lateribus ejus apponi, sed qui ea tenebant, ceciderunt retrorsum. Tunc percuti gladio jubetur. Passa est autem quarta Kalendas Augusti, sepulta a beata Sabina, prid. Kalend. Augusti. Compositum et ornatum est ibi venerabile sarcophagum ambarum, et locus orationis condigne dedicatus, tertio Non. Septemb. In Capua sanctorum martyrum, Antonini pueri viginti annorum, et Aristaei episcopi, quorum gesta habentur.
1.9.4
EDITIO COLONIENSIS. SEPTEMBER Habet dies XXX, lunam XXX. B. PRID. NON. SEPTEMB.
1.9.4
Moysi prophetae. Et apud Ancyram Galatiae sanctorum martyrum, trium puerorum, Rufini, Sylvani et Vitalicae. Cabilone natale sancti Marcelli, qui sub Antonino imperatore per Priscum praesidem passus, hunc immolantem diis suis incurrit. Cumque ab eo ad convivium profanum fuisset invitatus, et hujusmodi exsecrans epulas, omnes qui aderant, cur idolis deservirent, libera increpatione corriperet, inaudito crudelitatis genere defodi eum cingulo tenus erectum praeses jussit. Sicque sanctus Dei martyr triduo in laudibus Dei omnipotentis perseverans, incontaminatum spiritum reddidit.
1.9.5
EDITIO COLONIENSIS. SEPTEMBER Habet dies XXX, lunam XXX. G. NON. SEPTEMB.
1.9.5
In suburbano Romae beati Victorini martyris, qui dum eremiticam vitam duceret, diaboli suasionibus est lapsus, sed per Dei gratiam recuperatus, et postea sacerdotium Aminterninae urbis adipiscitur. Inde postmodum sub imperatore Nerva, cum aliis Dei servis, Eutice et Maronae ab Aureliano judice primo relegatur apud eum locum, ubi putentes aquae et sulphureae emanant: in ipsis capite deorsum per tres horas suspendi jussus, et teneri ab impio judice jussus est. Quod cum per triduum pro nomine Christi passus fuisset, gloriose coronatus victor migravit ad Dominum. Cujus corpus Aminternenses populi rapientes, honorificata sepultura condiderunt. Romae sancti Herculiani martyris. Capuae sanctorum Quinti, Arcontii et Donati, Taurini, Nimpi et Saturnini, et depositio Ingenii episcopi.
1.9.6
EDITIO COLONIENSIS. SEPTEMBER Habet dies XXX, lunam XXX. D. VIII IDUS SEPTEMB.
1.9.6
Zachariae prophetae. Et natale beati Onesiphori, apostolorum discipuli, de quo ait Apostolus: Det misericordiam Dominus Onesiphori domui. Apud Africam beatorum confessorum et episcoporum Donatiani, Praesidii, Mansueti, Germani, Fusculi, qui persecutione Vandalica, jussu Hunerici regis Ariani, pro assertione catholicae veritatis durissime fustibus caesi, et exsilio sunt damnati: inter quos etiam episcopum, nomine Letum, incendio concremavit. Tunc etiam episcopis, quasi ad consilium congregatis Carthagine, una die universae Africae ecclesias clausit, universamque substantiam episcoporum et ecclesiarum suis episcopis condonavit. Sancti Magni confessoris, discipuli sancti Galli. Romae Eleutherii episcopi. Cappadocia civitate sancti Cuttidi episcopi et Eugenii, et sociorum ejus.
1.9.7
EDITIO COLONIENSIS. SEPTEMBER Habet dies XXX, lunam XXX. D. VII IDUS SEPTEMB.
1.9.7
Apud Nicomediam natale beati Joannis sub Diocletiano imperatore. Cujus cum jam viscera in suppliciis defecissent, nunquam efficere potuerunt ut eum ne aestuantem aliquis in poenis videret. Et natale sancti Euritii episcopi et confessoris, et depositio Clodoaldi confessoris. Arelati sancti Augustalis episcopi et confessoris, et sanctae Reginae martyris F. VI IDUS SEPTEMB. Nativitas beatissimae Dei genitricis Mariae perpetuae virginis. Apud Nicomediam natale sancti Adriani martyris, cum aliis viginti tribus, quos Maximianus post innumeras poenas jussit, ut vecte ferreo magno confringerentur tibiae ipsorum. Confractis itaque cruribus, ac pedibus incisis insuper et beato Adriano incisa manu orantes et gratias agentes Deo spiritum emiserunt. Corpora eorum jussit tyrannus incendi; sed subito factae sunt coruscationes et tonitrua, ac pluviae, et exstinctus est ignis. Tunc Christiani rapientes martyrum reliquias, ascensis navibus, fugerunt Byzantium, et reverenti honore sepelierunt. Non longo post tempore beati Adriani corpus est Romam translatum. In suburbanis Moguntiacensis ecclesiae natale sancti Disboti confessoris, et Frisingae depositio sancti Corbiniani episcopi.
1.9.8
EDITIO COLONIENSIS. SEPTEMBER Habet dies XXX, lunam XXX. G. V IDUS SEPTEMB.
1.9.8
-- Sergii papae qui sedit Romae annos tredecim. Hic invenit mirae magnitudinis portionem ligni salutaris Dominicae crucis, in sacrario beati Petri. Hic statuit in tempore Dominici corporis confractionis, Agnus Dei a clero et a populo decantari, et constituit ut diebus annuntiationis Domini, dormitionis, et nativitatis sanctae Dei genitricis Mariae, ac sancti Simeonis, quod hypanti Graece dicitur, litaniae exeant a Sancto Adriano, et ad Sanctam Mariam populus occurrat. Passio beatorum martyrum, Dorothei et Gorgonii. Apud Nicomediam, sub Diocletiano imperatore, quos jussit appendi, et flagris toto corpore laniari, et visceribus jam pelle nudatis aceto et sale perfundi. Post haec jubetur craticula prunis subterstrata in medio poni, ibique quod in eo reliquum fuerat, absumpti hominis supponi, et non subito, sed paulatim succendi; ad ultimum laqueo appenso jussit necari. Interjecto tempore beatus Gorgonius Romam transfertur. In Sabinis sanctorum Jacincti, Alexandri, Tyburcii. Eodem die sanctae Kunegundis virginis.
1.9.9
EDITIO COLONIENSIS. SEPTEMBER Habet dies XXX, lunam XXX. A. IV IDUS SEPTEMB.
1.9.9
-- Apud Africam sanctorum episcoporum Nemesiani, Felicis. Item Felicis, Littei, Poliani, Victoris, Jaderis et Datii, qui sub Diocletiano et Maximiano passi sunt. In Chalcedonia sanctorum Sosthenis et Victuris martyrum, sub Prisco consule, Romae depositio Hilarii papae, per quem Victurius ordinem paschalem conscripsit. Et depositio Salvii episcopi, de cujus sanctitate Gregorius Turonis episcopus scripsit, narrans quod per revelationem vidisset divinae vocis evaginatum gladium imminere super tegulum, quod Hilpericus rex praecepit construi, cui visioni veritas statim subsecuta est. Nam post dies viginti duos, filii regis mortui sunt.
1.9.10
EDITIO COLONIENSIS. SEPTEMBER Habet dies XXX, lunam XXX. B. III IDUS SEPTEMB.
1.9.10
-- Romae natale sanctorum, Prothi et Jacincti, qui erant eunuchi beatae Eugeniae virginis. Cumque ab Heleno episcopo baptizati essent, aliquanto tempore divinis solum eruditionibus vacantes, in servorum Dei monasterio mira humilitate versati sunt, et hoc apud Aegyptum, inde cum beata virgine Romam reversi, sub Gallieno imperatore, quod essent Christiani deprehensi, coguntur sacrificare, sed non consentientes, durissime verberabantur. Cumque Deo fidem servantes gauderent, pariter decollantur. Et sanctorum Felicis et Regulae.
1.9.11
EDITIO COLONIENSIS. SEPTEMBER Habet dies XXX, lunam XXX. C. PRID. IDUS SEPTEMB.--
1.9.11
Apud urbem Ticinum, quae et Papia dicitur, sanctorum confessorum Siri et Iventii, qui a beato Hermagore Aquileiensi episcopo, discipulo sancti Marci evangelistae, ad praefatam urbem directi, primo illic Christi Evangelium praedicantes, et magnis virtutibus ac miraculis coruscantes, etiam vicinas urbes Veronensem scilicet et Brixenam, et Laudensem, divinis operibus illustrarunt; sicque in pontificali honore, fundata et confirmata fide credentium populorum glorioso fine quieverunt in pace. In Antiochia natale Timothei. Catenas sancti Eupli. Lugduno depositio Sacerdotis episcopi. Augustoduno beati Eventii episcopi.
1.9.12
EDITIO COLONIENSIS. SEPTEMBER Habet dies XXX, lunam XXX. D. IDUS SEPTEMB.
1.9.12
-- In Alexandria beati Philippi episcopi et martyris, qui praefectus primum fuit, deinde baptismi gratia sanctificatus, episcopatus dignitatem, suffragium ferentibus populis Christianis assequitur, et sub Volusiano et Gallieno imperatoribus, Perhemmius, praefectus Alexandriae, cogitavit eum occidere. Sed cum hoc implere non posset, propter populum Christianum, immisit quosdam qui se fingerent Christianos. Quique ingredientes percusserunt eum in oratione constitutum. Sedit autem in episcopatu annum unum, menses tres. Et sancti Amati presbyteri, et abbatis monasterii sancti Romarici. Turonis depositio beati Licronis episcopi.
1.9.13
EDITIO COLONIENSIS. SEPTEMBER Habet dies XXX, lunam XXX. E. XVIII KALEND. OCT.
1.9.13
-- Romae via Appia natale sancti Cornelii episcopi, sub persecutione Decii; cui primo os cum plumbatis est caesum, et decollatus est eum aliis viginti uno promiscui sexus, cum quibus et Cerealis miles cum Salustia uxore sua, quam Cornelius ab infirmitate sanavit orando. Beatus itaque Cornelius rogatus a beata Lucina, corpora apostolorum beati Petri et Pauli de catacumbis levavit noctu: primum quidem corpus beati Pauli beata Lucina accepit, et posuit in praedio suo via Ostiensi, ad latus ubi decollatus fuit, beati Petri vero corpus sanctus Cornelius accepit episcopus, et posuit juxa locum ubi crucifixus est, inter corpora sanctorum, in templo Apollinis, in monte Aurelio Vaticani palatii Neroniani, tertio Kalend. Julii. Item sancti Cypriani episcopi, qui sub Valeriano principe post longum exsilium detruncatus capite martyrium consummavit, sexto milliario a Carthagine juxta mare. Eodem die exaltatio sanctae crucis. Treveris depositio sancti Materni episcopi et confessoris.
1.9.14
EDITIO COLONIENSIS. SEPTEMBER Habet dies XXX, lunam XXX. F. XVII KALEND. OCT.
1.9.14
-- Natale sancti Nicomedis martyris, quem Flaccus comes, eo quod corpus sanctae virginis Feliculae, quam ipse pro Christo punierat, sepelisset, jussit duci ad sacrificandum. Quo renuente, plumbatis diutissime caesus migravit ad Dominum. Cujus corpus in Tiberim jactavit, quod a clerico ipsius, nomine Justo, est collectum, et sepultum juxta muros via Numentana. Cabilonensi castro Trenorcio sancti Valeriani martyris, sub praeside Prisco, quem jussit suspendi, ac gravi ungularum laceratione cruciari, ac deinde gladio percuti. Et natale sancti Apri episcopi, et sancti Leobini confessoris. In Alexandria sanctorum Serapionis, Leontii. In Cyra Galatiae sancti Eleuci, Valerii et Cyrionis, Stratonis, Macrobii et Constantii. In Ancyra sancti Pauli episcopi. Lugduno depositio Albini episcopi, et octava natalis sanctae Mariae virginis.
1.9.15
EDITIO COLONIENSIS. SEPTEMBER Habet dies XXX, lunam XXX. G. XVI KALEND. OCT.
1.9.15
-- Natale sanctae Eufemiae virginis, quae martyrizata est sub Diocletiano imperatore, proconsule autem Prisco, in civitate Chalcedona. Quae tormenta et carceres, verbera et argumenta rotarum, ignes et pondera lapidum angularium, bestias et plagas virgarum, serras acutas et sartagines ignitas vicit. In ultimo sancta virgo precibus obtinuit, ut una ex bestiis morsum sibi infigeret, et ita immaculatum spiritum Domino reddidit. Cujus corpus Philophronus pater ejus, et Theodora mater ejus curatum sepelierunt, quasi mille passus a civitate Chalcedona. Romae sanctorum Luciae et Geminiani, imperatore Diocletiano, judicibus Apofrasio et Megasio. Manserat autem beata Lucia in viduitate annos triginta sex; totius enim vitae suae anni fuere septuaginta quinque. Quae accusata a filio suo quod christiana viveret, primo in carcerem missa est, ubi consolationem divinam promeruit; dein fustibus diutissime caesa, et subito terrae motus factus est magnus, et templum Jovis ita subrutum, ut nec lapis super lapidem remaneret. Tunc in ollam aeream missa est, pice et plumbo ferventem, ubi triduo illaesa permansit. Postea plumbo et ferro onerata, et per plateas civitatis ducta, quidam vir Geminianus vidit sibi patere coelum, et statim associatus est sanctae Luciae in carcere, et ibi, monente angelo, a presbytero, nomine Prothasio, baptizatus Deinde sancta Lucia cum Geminiano Amegasio consulari arctati, novissime gladio animadversi sunt. Quorum corpora rapuit quaedam mulier christiana, nomine Maxima, et ut decuit, sepelivit.
1.9.16
EDITIO COLONIENSIS. SEPTEMBER Habet dies XXX, lunam XXX. A. XV KALEND. OCT.
1.9.16
-- Tungrensi dioecesi Leodio villa publica natale sancti Lamberti episcopi; qui dum regiam domum zelo religionis increpasset, cum rediens orationi incumberet, ab iniquissimis viris de palatio regio missis ex improviso conclusus intra domum ecclesiae occiditur. Cujus sepulcrum creberrimis miraculis illustratur. In Britannia Socratis Stephani. Novioduno sancti Valeriani, Macrini et Gordiani. Romae beati Justini presbyteri, quem beatus Sixtus ordinavit. Hic beatos Laurentium, Hippolytum, et Concordiam, Irenaeum, Abundium, et Cyrillam filiam Decii Caesaris martyres, et alios plurimos sepulturis condidit. Item Romae sanctorum martyrum Narcissi et Crescentionis.
1.9.17
EDITIO COLONIENSIS. SEPTEMBER Habet dies XXX, lunam XXX. B. XIV KALEND. OCT.
1.9.17
-- Natale sancti Methodii, Olympii, Lucii, et postea Tyri episcopi, qui sub Diocletiano in Chalcide Graeciae martyrio coronatus est. Viennae sancti Ferreoli, qui persecutionis tempore, cum esset tribunitiae potestatis, jussu praesidis tentus primo crudelissime est caesus, deinde gravi catenarum onustus pondere, in teterrimum carcerem trusus est; unde solutus Dei nutu, postea ab insequentibus captus, martyrii palmam capitis obtruncatione percepit; cujus corpus cum capite beati Juliani ad urbem Viennensium relatum, et condigno honore conditum est. Mediolani depositio beati Eustorgii episcopi, et Satyri, Theophimi, Jociani.
1.9.18
EDITIO COLONIENSIS. SEPTEMBER Habet dies XXX, lunam XXX. C. XIII KALEND. OCT.--
1.9.18
In Neapoli Campaniae natale sanctorum Januarii, Beneventanae civitatis episcopi, cum Sosio diacono Mesenatae civitatis, et diacono suo Festo, et lectore suo Desiderio, qui post vincula et carceres capite sunt caesi in civitate Puteolana, sub Diocletiano principe, et judice Dracontio. Qui cum ducerentur ad mortem, viderunt inter alios, Proculum Puteolanae civitatis diaconum, et duo laici Eutyches et Achatius, interrogaverunt quare justi juberentur occidi. Quos judex ut vidit Christianos, jussit decollari cum illis. Sic omnes septem pariter sunt decollati, et tulerunt nocte eorum corpora populi Christianorum. Neapolitani Januarium posuerunt juxta civitatem in basilica, Mesenates Sosium aeque in basilica, Puteolani Proculum Eutychen et Achatium, juxta basilicam sancti Stephani. Festum et desiderium Beneventani collegere. In Palaestina sanctorum Pelei et Nili episcoporum, qui persecutione Diocletiani cum plurimis clericis igne consumpti sunt pro Christo. Apud Nuceriam sanctorum Felicis et Constantiae, qui sub Nerone passi sunt. Lingonas Sigoni presbyteri, et Florentii episcopi et martyris, et natale sancti Eustochii.
1.9.19
EDITIO COLONIENSIS. SEPTEMBER Habet dies XXX, lunam XXX. D. XII KALEND. OCT.
1.9.19
-- In Cyzico natale Faustae virginis, et Ejulasii sub Maximiano imperatore, quam idem Ejulasius, cum esset primus palatii, jussit decalvari, et radi ad turpitudinem, dein suspendi ac torqueri. Quo tempore coruscatio de coelis multos ministrorum percussit. Deinde jussit loculos afferri, et eam immissam ac fixam, quasi lignum secari mediam: sed non eam carnifices ferris laedere valebant. Inter quae stupens Ejulasius Christo credere coepit. Et hoc ubi imperatori nuntiatum est, misit praefectum, qui eum suspensum fortiter torqueret. Qui etiam jussit Faustam nudam, et sine maforte flagellatam, incarceratam, caput terebrari, ac oculos infigi, cui postmodum non solum caput et facies, sed et pectus et totum corpus usque ad tibias clavis impletum est. Post haec sartaginem jussit igniri, sed haec psallente illa refriguit. Haec interveniens vox de coelo vocavit eos, et sic tradiderunt spiritum. Erat autem Fausta annorum tredecim, et Ejulasius octoginta. Et vigilia sancti Matthaei apostoli.
1.9.20
EDITIO COLONIENSIS. SEPTEMBER Habet dies XXX, lunam XXX. E. XI KALEND. OCT.
1.9.20
-- Natale sancti Matthaei apostoli et evangelistae, qui primus in Judaea Evangelium Christi Hebraeo sermone conscripsit. Post vero apud Aethiopiam praedicavit, et multos ad fidem convertit: missusque est spiculator ab Hirtaco rege, qui eum gladio feriebat efficiens martyrem Christi: cujus Evangelium stylo scriptum, Hebraeo ipso revelante, tempore imperatoris cujusdam inventum est.
1.9.21
EDITIO COLONIENSIS. SEPTEMBER Habet dies XXX, lunam XXX. F. X KALEND. OCT.
1.9.21
-- In Gallia civitate Ceduno, loco Agauno, natale sanctorum martyrum Thebeorum, Mauricii, Candidi, Exuperii, Victoris, Innocentii, Vitalis cum sociis suis, nempe sex millibus, sexcentis, et sexaginta sex, qui sub Maximiano passi, pro Christo gloriosissime coronati sunt. Victor vero martyr, nec legionis ejusdem fuit, neque miles, sed emeritae jam militiae veteranus. Hic cum iter agens incidisset in hos, qui passim epulabantur laeti martyrum spoliis, atque ab his ad convescendum invitatus, prolatam ab exsultantibus per ordinem causam cognovisset, detestatus convivas refugiebat. Qui mox ab eis captus et jugulatus est, ac caeteris martyribus honore conjunctus est. At vero beatissimorum martyrum corpora post multos passionis annos, sancto Theodoro episcopo revelantur, et in honore eorum basilica honeste componitur. Apud Ratisponam beati Emmerami episcopi et martyris, cui singulariter omnia membra abscissa sunt.
1.9.22
EDITIO COLONIENSIS. SEPTEMBER Habet dies XXX, lunam XXX. G. IX KALEND. OCT.
1.9.22
-- Natale sancti Sosii diaconi Mesenatae civitatis in Campania; qui cum esset annorum XXX cum beato Januario Beneventano episcopo capitis decollationem suscepit, tempore Diocletiani imperatoris. Is cum quodam tempore Evangelium legeret in ecclesia Mesenatae civitatis, praesente episcopo Januario( frequenter enim eum pro sanctitate et prudentia ejus visitare consueverat) vidit subito idem episcopus de capite ejus flammam exsurgere, quam nemo alius vidit, et pronunciavit eum martyrem futurum; et non post multos dies idem diaconus tentus, et in carcerem missus est. Ad quem visitandum cum venisset episcopus cum diacono Festo et lectore suo Desiderio, et ipse cum eis simul tentus est, ac pariter omnes cum aliis tribus occisi sunt. Eodem die natale sanctae Teclae virginis, de civitate Iconio, quae a beato Paulo apostolo instructa est; quae sub Nerone imperatore pro Christi nomine igni est tradita, sed non exusta; postea bestiis atque serpentibus deputata, sed a nullo eorum est laesa; ad extremum vero in Seleucia cum duplici corona virginitatis et martyrii per somnum pacis migravit ad Dominum, Secunda assumptio sanctae Mariae virginis.
1.9.23
EDITIO COLONIENSIS. SEPTEMBER Habet dies XXX, lunam XXX. A. VIII KALEND. OCT.
1.9.23
-- Conceptio sancti Joannis Baptistae. Augustuduno natale Andochii presbyteri, Tyrsi diaconi, et Felicis, qui a sancto Polycarpo episcopo ab oriente directi ad docendam Galliam, sub Aureliano principe sunt gloriosissime coronati. Siquidem flagellis caesi, in ultimo tota die inversis manibus suspensi, in ignem missi, sed non combusti, tandem vectibus colla feriuntur, atque ita martyrium suum compleverunt. Eodem die depositio solemnis episcopi. Hic cum quadam die obvium haberet hominem a nativitate caecum et surdum, eum complexus collo, osculatus est, et statim sanum reddidit. Hic etiam Carnotensium episcopus Ludovicum regem cum trecentis septuaginta nobilibus sacro fonte regeneravit: sicque Dei sanctus tres olympiades gerens in episcopatu, migravit ad Dominum. Romae Priscillae et Liberii episcopi et confessoris. Arvernis depositio Rustici episcopi et sancti Ruperti confessoris.
1.9.24
EDITIO COLONIENSIS. SEPTEMBER Habet dies XXX, lunam XXX. B. VII KALEND. OCT.
1.9.24
-- Natale beati Cleophae, qui unus fuit de septuaginta discipulis Christi, cui post resurrectionem Dominus, eunti cum alio condiscipulo in castellum Emmaus, quod Nicopolis nunc dicitur, apparuit. Quem tradunt in eadem urbe, in eademque domo, in qua mensam quasi peregrino Domino paraverat, pro confessione illius quem ibi ipse cognoverat, a Judaeis occisum, et gloriosa memoria etiam sepultum. Lugduno sancti Lupi episcopi, ex anachoretis, et natale sancti Firmini martyris. In Asia Bardomiani, Eucarpi et aliorum viginti sex.
1.9.25
EDITIO COLONIENSIS. SEPTEMBER Habet dies XXX, lunam XXX. C. VI KALEND. OCT.--
1.9.25
Natale sanctorum martyrum Cypriani episcopi et Justinae virginis. Quorum Justina sub Diocletiano multa propter Christum perpessa, ipsum quoque Cyprianum cum esset magus, et magicis artibus eam dementare conaretur, convertit ad Christum. Cum quo jam episcopo et nobili doctore facto, martyrizata est sub Claudio principe, et judice Eutelmio, et cum eis Theognitus quidam: quorum corpora jacuerunt projecta foris sex diebus insepulta. Quidam autem nautae Christiani nocte rapuerunt ea, et deportaverunt ad urbem Romam, et matrona venerabilis Rufina reverenter excipiens illa sepelivit in praedio suo.
1.9.26
EDITIO COLONIENSIS. SEPTEMBER Habet dies XXX, lunam XXX. D. V KALEND. OCT.
1.9.26
-- Apud Aegaeam civitatem, natale sanctorum martyrum Cosmae et Damiani, persecutione Diocletiani, sub praeside Lysia, qui post multa tormenta, vincula et carceres toleratos, post mare et ignes, cruces, lapidationes et sagittas, capite plectuntur cum Anthimo, Leontio et Euprepio. Quorum corpora religiosi viri sepelierunt in loco venerabili, non longe a civitate Aegaea. Duorum autem fratrum Cosmae et Damiani memoria etiam templo praeclaro opere, nomini eorum aedificato solemniter agitur.
1.9.27
EDITIO COLONIENSIS. SEPTEMBER Habet dies XXX, lunam XXX. E. IV KALEND. OCT.
1.9.27
-- In Hispaniis Corduba civitate natale sanctorum Fausti, Januarii et Martialis, qui primum equulei poena cruciati, deinde rasis superciliis, et auribus ac naribus praecisis, dentibus quoque superioribus evulsis, deturpati, ad ultimum ignis passione martyrium consummavere. In Germania sanctae Liobae virginis, quae de Britannia insula a sancto Bonifacio archiepiscopo Moguntiacensis Ecclesiae advocata, ut famulas Dei in monasteriis Germaniae divinis Scripturis instrueret, ubi non solum multa miracula vivens fecit, imo post obitum in Buchonia silva in monasterio Fulda, juxta decretum sancti Bonifacii sepulta, non paucis miraculis claret. Eodem die passio sancti Wenslai martyris. Romae natale Stertei. In Africa Martialis, Laurentii et aliorum viginti. Autissiodoro depositio sancti Alodi episcopi, et in Gallia Solornis episcopi.
1.9.28
EDITIO COLONIENSIS. SEPTEMBER Habet dies XXX, lunam XXX. F. III KALEND. OCT.
1.9.28
-- In monte Gargano venerabilis memoria beati archangeli Michaelis, ubi ipsius consecrata nomine habetur ecclesia, vili facta schemate, sed coelesti praedita virtute. Vertice siquidem montis excelsi posita, de corpore ejusdem saxi speluncae ad instar praecavata ostenditur. Romano itaque pontifice, et Sipontino episcopo de consecratione loci ipsius quaerentibus, ac propterea triduanum jejunium cum civibus celebrantibus, nocte jejunii suprema sanctus Michael episcopo Sipontino per visionem apparens monuit, ut intrarent ecclesiam, quam ipse dedicavit, et missas ibi juxta morem agerent. Innumera quoque ibi praestantur beneficia, per sanctorum archangelorum merita. In Thracia civitate Eraclae, natale Eutici, Plati. Autissiodoro depositio Fraterni episcopi.
1.9.29
EDITIO COLONIENSIS. SEPTEMBER Habet dies XXX, lunam XXX. G. PRID. KALEND. OCT.
1.9.29
-- In Bethleem Judaeae depositio sancti Hieronymi presbyteri, cujus vita et doctrina ubique in ecclesiis Christi laudabilis exstat, quomodo divinos libros ex Hebraea lingua in Latinam transtulit, propheticosque sensu allegorico exposuit, tandem perfectam placitamque Deo post conversationem, nonagesimo octavo aetatis suae anno, apud Bethleem in pace quievit, duodecimo Honorii imperatoris anno. In Galliis castro Solodoro sanctorum martyrum Victoris et Ursi, ex gloriosa legione Thebeorum, qui jussu Maximiani tyranni, ab Hirtaco exsecutore, primo duris suppliciis excruciati, sed coelesti lumine super eos coruscante, ruentibus in terram ministris erepti sunt. Deinde in ignem missi sunt, sed veniente mox pluvia vehementi exstincta pyra, in nullo penitus sunt laesi, novissime gladio consummati sunt.
1.10.1
EDITIO COLONIENSIS. OCTOBER, Habet dies XXX, lunam XXVIII. A. KALEND. OCTOB.
1.10.1
-- Apud Autissiodorum natale sancti Germani episcopi et confessoris, qui multis virtutibus et doctrina, continentiaque clarus exstitit. Rhemis civitate sancti Remigii episcopi et confessoris, viri praeclarissimae virtutis et sanctitatis. Hic gentem Francorum idolorum culturis deditam convertit ad Christum, rege ipsorum sacro fonte baptismatis et sacramentis fidei prius initiato, septuaginta et eo amplius annos in episcopatu explevit. Hic inter caetera facta, puellam a morte corporis suscitavit. Treveris sancti Nicetii episcopi et confessoris, qui de utero matris sanctus fuit. Nam ab ipso ortus sui tempore mirabiliter clericus designatus est. Cum partu itaque fuisset effusus, toto capite, ut est consuetudo nascentium, a capillis nudo egressus est, in circuitu modicorum ordine pilorum apparente. Adradis civitate beati Vedasti episcopi et confessoris, et Babonis episcopi. Item sancti Fronti episcopi, cujus gesta miraculis plena conscripta habentur. Thomis civitate natale sanctorum Prisci, Crescentii et Evagri.
1.10.2
EDITIO COLONIENSIS. OCTOBER, Habet dies XXX, lunam XXVIII. B. VI NON. OCT.
1.10.2
-- Natale sancti Eusebii papae, qui sedit in episcopatu annos septem, sepultus est via Appia, in coemeterio Calisti. Sub hujus tempore inventa est crux Domini nostri Jesu Christi, quinta Nonas Maii. Hic haereticos invenit in urbe, quos ad manuum impositionem reconciliavit. In territorio Atrebatensi, villa Syricinio passio sancti Leodegarii Augustudunensis episcopi, quem variis injuriis et diversis suppliciis pro veritate afflictum Hebroinus major regiae domus interfecit. Cujus sacratissimum corpus in dioecesi Pictavorum translatum, in monasterio beati Maxentii honorifice est humatum. In Nicomedia sancti Eleutherii martyris, sub Diocletiano, qui per varia tormentorum genera examinatus migravit ad Christum.
1.10.3
EDITIO COLONIENSIS. OCTOBER, Habet dies XXX, lunam XXVIII. C. V NON. OCT.--
1.10.3
Natale sancti Dionysii Areopagitae, qui ab apostolo Paulo instructus credidit Christo, et primus Athenis ab eodem apostolo episcopus est ordinatus, et sub Adriano principe, post clarissimam confessionem fidei, post gravissima tormentorum genera glorioso martyrio coronatur. Apud antiquos Saxones natale sanctorum duorum Evaldorum presbyterorum, qui cum beato Willibrordo episcopo venientes in Germaniam, transiere ad Saxones, et cum praedicare ibi Christum coepissent, comprehensi sunt a paganis et occisi. Ad quorum corpora noctu multa diu lux apparens, et ubi essent et cujus essent meriti declaravit.
1.10.4
EDITIO COLONIENSIS. OCTOBER, Habet dies XXX, lunam XXVIII. D. IV NON. OCT.
1.10.4
-- Apud Corinthum beatorum Crispi et Gaii, quos beatus Apostolus se dicit baptizasse, cujus Gaii meminit idem Apostolus ad Romanos: Salutat vos, inquit, Gaius hospes meus, et universae Ecclesiae. Cujus beatus Joannes Epistolam scribens meminit ita: Senior Gaio charissimo, quem ego diligo in veritate. Apud Aegyptum sanctorum martyrum Marci et Martiani fratrum, et cum eis innumerabiles alii non inferiori gloria tam viri quam feminae, sed et pueri ac senes, pro fide Domini nostri Jesu Christi, praesentem vitam parvi pendentes futurae gloriae beatitudinem quaesivere: quidam ex ipsis post verbera aliosque diversi generis horribiles cruciatus, flammis traditi sunt, alii in mare praecipitati, nonnulli inedia consumpti, alii patibulis affixi, nonnulli etiam capite caesi, ita ut sponte cervices suas securibus darent. In quibus quidam more perverso capite deorsum presso, et pedibus in sublime sublatis, beatissimam coronam passionis meruerunt. In Africa Audacti, Romae Marcelli papae, Autissiodoro depositio Marsi presbyteri. Eodem die sancti Francisci confessoris.
1.10.5
EDITIO COLONIENSIS. OCTOBER, Habet dies XXX, lunam XXVIII. E. III NON. JAN.
1.10.5
-- Apud Siciliam natale sanctorum Placidi, Eutychii et aliorum triginta. In Gallia civitate Valentia, natale sancti Apollinaris episcopi, cujus vita et virtutibus insignis fuit, et mors nihilominus signis et prodigiis decoratur. Apud Eumeniam beati Praseae episcopi, apud Smyrniam martyrio consummati, qui unus ex antiquis quasi ex traditione priorum se accepisse asseruit, Salvatorem praecepisse apostolis suis, ut infra duodecimum annum a Jerosolymis non discederent. Autissiodoro depositio sanctorum Germanorum, et Firmati diaconi, et Flavinae virginis Deo sacratae.
1.10.6
EDITIO COLONIENSIS. OCTOBER, Habet dies XXX, lunam XXVIII. F. PRID. NON. OCT.
1.10.6
-- Apud Capuam natale sanctorum Marcelli, Casti, Aemilii, Saturnini. In Galliis civitate Agavino natale Fidei virginis et martyris, cujus exemplo beatus Caprasius ad agonem martyrii animatus est. Eodem die beati Sagaris martyris et episcopi Laodicensis, qui unus fuit de antiquis Pauli apostoli discipulis. Depositio Romani Antissiodorensis episcopi. Eodem die octava sancti Michaelis archangeli.
1.10.7
EDITIO COLONIENSIS. OCTOBER, Habet dies XXX, lunam XXVIII. G. NON. OCT.
1.10.7
-- Romae via Appia natale sancti Marci episcopi et confessoris, qui sedit in episcopatu annos duos, menses novem, dies viginti, qui etiam sepultus est in coemeterio Balbinae via Ardeatina. Item sanctorum martyrum Sergii et Bachi, qui sub Maximiano pro Christi nomine passi sunt. Nam Sergius primicerius erat scholae gentilium, amicus imperatoris, beatus vero Bachus secundicerius erat ejusdem scholae. Hi enim ab Antiocho duce pro Christi nomine, jussu Maximiani imperatoris passi sunt, ita ut Bachus dum extensus crucis flagellis caederetur, emitteret spiritum; Sergius vero post multa tormenta gladio caesus est, et sic migravit ad Dominum. Item sanctorum martyrum Marcelli et Apulei, qui quidem primo adhaeserunt Simoni Mago; sed videntes mirabilia quae Dominus operabatur per apostolum suum Petrum, relicto Simone, doctrinae apostolicae se tradiderunt, et post martyrium apostolorum sub Aureliano consulari martyrii coronam compleverunt, sepulti non longe ab urbe Roma.
1.10.8
EDITIO COLONIENSIS. OCTOBER, Habet dies XXX, lunam XXVIII. A. VIII IDUS OCT.
1.10.8
-- Natale beati Simeonis, qui Dominum nostrum Jesum Christum praesentavit in templum. Item natale sanctae Reparatae virginis, quae passa est in Caesarea urbe Palaestinae, sub Decio praeside. Haec cum nollet idolis sacrificare, primum adhibita est illi olla plumbo fervente impleta, postea abscissae sunt illi mamillae, et lampades ardentes adhibitae, deinde in caminum ignis missa est. Quae cum in nullo ibi fuisset laesa, decollata est, et continuo de collo ejus exivit columba alba. Cujus corpus rapuerunt Christiani, et conditum aromatibus sepelierunt. Apud Cretam urbem Cortinae beati Philippi episcopi. Thessalonicae sanctorum Demetrii et Pelagiae. Eodem die sancti Amoris confessoris.
1.10.9
EDITIO COLONIENSIS. OCTOBER, Habet dies XXX, lunam XXVIII. B. VII IDUS OCT.
1.10.9
-- Abrahae patriarchae. Apud Parisium natale sanctorum martyrum Dionysii episcopi, Eleutherii presbyteri, et Rustici diaconi. Qui beatus episcopus a pontifice Clemente Romano in Gallias directus, ut praedicationis operam populis a fide Christi alienis exhiberet, tandemque ad Parisiorum civitatem devenit, et per annos aliquot sanctum opus fideliter et ardenter exsecutus, a praefecto Fescennino Sisinio comprehensus est, et cum eo sanctus presbyter Eleutherius, et Rusticus diaconus gladio animadversi martyrium compleverunt. Item sancti Donini, qui sub Maximiano imperatore propter fidem Christi decollatus est.
1.10.10
EDITIO COLONIENSIS. OCTOBER, Habet dies XXX, lunam XXVIII. C. VI IDUS OCT.--
1.10.10
Lot prophetae. Apud Coloniam Agrippinam natale sanctorum martyrum, Gereonis cum aliis trecentis decem et octo, quos ferunt Thebaeos fuisse, et cum legatione illa beati Mauricii, jussu Maximiani imperatoris in Gallias transitum fecisse, atque circa Rheni littora consedisse, et funestum tyranni imperium respuendo pro vera pietate colla patienter gladiis subdidisse. Apud Cretam beati Piniti episcopi. In Britannia beati Paulini episcopi Eboraci, qui gentem Northumbrorum, eam videlicet nationem Anglorum quae ad Aquilonem Humbri fluminis habitabat, cum rege suo Edwino praedicando verbum fidei convertit ad Dominum.
1.10.11
EDITIO COLONIENSIS. OCTOBER, Habet dies XXX, lunam XXVIII. D. V IDUS OCT.
1.10.11
-- Apud Tharsum metropolim Ciliciae natale sanctorum martyrum Tharaci, Probi et Andronici, qui persecutione Diocletiani et Maximiano praeside longo tempore carcerali squalore afflicti sunt, et tertio diversis suppliciis exanimati. Nam nervis crudis graviter caesi, et testis asperrimis defricati, etiam papyro ardente circa ventrem et latera adusti, post mamillarum confractionem, post tormenta tibiarum, post aceti et sinapis infusionem, post obolos ignitos, post confixionem digitorum clavis acutissimis, post oculorum transpunctionem, ac linguae abscissionem, novissime in amphitheatro ursis et leonibus projecti sunt. Sed cum nulla ex bestiis sanctorum corpora auderet attingere, Maximianus ira succensus jussit eos gladio jugulari, et corpora eorum inter corpora gladiatorum projici. Noctu venientes fideles, et deprecantes Dominum, ut ostenderet eis sanctorum reliquias, viderunt subito velut stellam splendidam de coelo missam super singula sanctorum corpora residentem, sicque cum ingenti gaudio rapientes ea, praecedente se ejusdem stellae splendore, gloriosos Christi athletas loco aptissimo condiderunt.
1.10.12
EDITIO COLONIENSIS. OCTOBER, Habet dies XXX, lunam XXVIII. E. IV IDUS OCT.
1.10.12
-- Apud Ravennam via Laurentiana natale sancti Edisti. Apud Africam sanctorum confessorum et martyrum quatuor millium nongentorum septuaginta sex, qui, persecutione Vandalica, cum essent Ecclesiarum Dei episcopi, presbyteri, diaconi, associatis sibi turbis fidelium populorum, jussu Hunerici regis Ariani, pro defensione catholicae veritatis in horribile eremi exsilium trusi, et inter Mauros ferocissimos sunt deputati. Inter quos erant Cyprianus et Felix praecipui Domini sacerdotes. E quibus plurimi cum crudeliter ducerentur, et hastilium cuspidibus ad currendum, ac lapidibus sibi alligatis dum tunderentur, sive ligatis pedibus velut cadavera per dura et aspera loca traherentur, tam diro supplicio per singula membra discerpti, per gladios acutos petrarum, huic caput loris terebrabatur, alii latera findebantur, inter manus trahentium spiritum exhalabant. Exstat per totum aggerem publicum loquentibus tumulis sepultura sanctorum. In Syria Eustati presbyteri, et Eucharisti, Burri, Donati, Fortunatae.
1.10.13
EDITIO COLONIENSIS. OCTOBER, Habet dies XXX, lunam XXVIII. E. III IDUS OCT.
1.10.13
-- Natale sancti Carpi, discipuli apostoli Pauli. Apud Troadam Antiochiae Theophili, qui sextus ab apostolis Ecclesiae pontificium tenuit, viri eruditissimi. In Hispaniis natale Faustini, Marci et Adriae. In Chalcedonia Marcelli. In Alexandria natale sancti Anastasii episcopi et sancti Lupentii presbyteri, et sancti Geraldi confessoris.
1.10.14
EDITIO COLONIENSIS. OCTOBER, Habet dies XXX, lunam XXVIII. G. PRID. IDUS OCT.
1.10.14
-- Natale sancti Callisti papae, qui sedit in episcopatu annos septem, menses duos, dies decem. Hic constituit jejunium die Sabbati ter in anno fieri, frumenti, vini et olei, secundum prophetiam. Qui persecutione Alexandri imperatoris diutius fame in carcere cruciatus, et quotidie fustibus caesus, per visionem a presbytero suo Calepodio, qui antea martyrium consummaverat, confortatus est, qui in carcere eodem positus quemdam militem nomine Privatum, ab ulcerum dolore ac foeditate simul et ab infidelitate curavit. Quod audiens Alexander, ipsum quidem militem fecit plumbatis deficere, beatum vero Callistum per fenestram domus praecipitari, et ligato ad collum ejus saxo in puteum demergi, et in eum per rudera cumulari. Post vero dies quatuordecim presbyter ejus Asterius, cum clericis noctu veniens levavit corpus, et sepelivit in coemeterio Calepodii. Corduba in civitate sancti Lupi Aureliae. Lugduno Galliae transitus sancti Justi in eremo. Eodem die translatio sancti Burchardi episcopi et confessoris.
1.10.15
EDITIO COLONIENSIS. OCTOBER, Habet dies XXX, lunam XXVIII. A. IDUS OCT.
1.10.15
-- In Gallia apud Coloniam Agrippinam sanctorum Maurorum de militibus, qui ex illa legione sacra Thebaeorum cum essent trecenti quadraginta, apud eamdem urbem martyrium consummantes, conditi sunt in basilica, quae admirabili opere ex Musivo quodammodo deaurata resplendet. Unde et incolae ad sanctos aureos vocitare consueverunt. Viennae sanctorum episcoporum Agrati, Costori. In Capua, Libuli et sanctae Fortunatae.
1.10.16
EDITIO COLONIENSIS. OCTOBER, Habet dies XXX, lunam XXVIII. B. XVII CALEND. NOVEMB.
1.10.16
-- Depositio sancti Galli confessoris, cujus vita plena virtutibus conscripta habetur. Apud Lugdunum beati Antiochi episcopi. Apud Viennam sancti Theodati episcopi, item Heronis, qui post beatum Ignatium Antiochenam rexit Ecclesiam. Erat enim hic beati martyris Ignatii diaconus; qui episcopus factus, viam magistri pius imitator sequitur, et pro commendato grege amator Christi occubuit. In Galliis civitate Arausica, sancti Florentii episcopi, qui multis clarus virtutibus in pace quievit. In Nicomedia Alexandri. In Mauritania, Nini, Victorii, Nobilitani, Mariani, Lucii, Mittini et Crescentiani, et sancti Eliphii martyris.
1.10.17
EDITIO COLONIENSIS. OCTOBER, Habet dies XXX, lunam XXVIII. C. XVI KAL. NOVEMB.--
1.10.17
In Africa sanctorum martyrum ducentorum septuaginta pariter coronatorum, et sanctorum martyrum Martiani et Satyriani, cum duobus fratribus eorum, et egregiae Christi ancillae Maximae virginis, qui tempore Vandalicae persecutionis sub Genserico rege Ariano, pro constantia fidei catholicae primum nodosis fustibus caesi, et usque ad ossa laniati. Cumque multo tempore talia paterentur, sequenti semper die incolumes inveniebantur. Novissime ligatis pedibus post terga currentium quadrigarum, inter spinosa loca silvarum pariter jussi sunt interire. Cumque ducta atque reducta a dumosis lignorum aculeis innocentium corpora carperentur, e vicino currentibus indomitis, vale sibi invicem his verbis dicebant: Frater, ora pro me, implevit Deus desiderium nostrum, taliter pervenitur ad regnum coelorum. Sicque orando et psallendo gaudentibus angelis pias animas emiserunt. Item beati Aristonis, qui unus fuit de septuaginta Christi discipulis.
1.10.18
EDITIO COLONIENSIS. OCTOBER, Habet dies XXX, lunam XXVIII. D. XV KAL. NOVEMB.
1.10.18
-- Natale sancti Lucae Evangelistae, qui fuit natione Syrus, Antiochensis, arte medicus, apostolorum discipulus, Paulum secutus usque ad confessionem ejus, serviens Domino sine crimine, neque unquam uxorem habens neque filios, septuaginta et trium annorum obiit in Bithynia plenus Spiritu sancto. Sepultus est autem nunc Constantinopolim, ad quam urbem vicesimo Constantii anno ossa ejus cum reliquiis Andreae apostoli translata sunt. Romae sanctae Triponiae, uxoris Decii Caesaris, quae, viro suo post interfectionem beatorum Sixti, Laurentii et Hippolyti divinitus punito, se petiit baptizari cum filia Decii Cyrilla, a Justino presbytero, et alia die defuncta est, et juxta sanctum Hippolytum in crypta sepulta. Item sancti Asclepiadis Antiocheni episcopi.
1.10.19
EDITIO COLONIENSIS. OCTOBER, Habet dies XXX, lunam XXVIII. E. XIV KALEND. NOVEMB.
1.10.19
-- Apud Antiochenam Syriae, natale sanctorum Beronici et Pelagiae, quae primum fuit sub gentilitatis ritu meretricis officio functa, et mundanis illecebris dedita, postea vero per gratiam Dei, et sancti Nonni episcopi dogmata ad fidem Christi conversa, et ab eodem episcopo baptizata, totam substantiam suam et supellectilem pauperibus erogavit; ipsaque cilicio induta, et vili indumento vestita, in peregrinationem perrexit, et in Jerosolymis sub virili habitu monasticam vitam duxit. Construxerat enim sibi parvam cellulam in monte Oliveti, ubi Dominus coelum ascendit, et ibi vitam praesentem finivit, atque ad vitam aeternam feliciter migravit. Item beatorum martyrum Ptolemaei et Lucii, sub Antonino Pio, et filio ejus passorum, et sancti Aquilini episcopi et confessoris.
1.10.20
EDITIO COLONIENSIS. OCTOBER, Habet dies XXX, lunam XXVIII. F. XIII KALEND. NOVEMB.
1.10.20
-- In Galliis civitate Agauno sancti Caprasii martyris, qui cum rabiem persecutionis declinans lateret in spelunca, audiens beatam virginem Fidem pro Christo fortiter agonizare, animatus ad tolerantiam passionum, oravit ad Dominum, ut si pro certo eum dignum gloria martyrii judicaret, ex lapide speluncae illius aqua limpidissima emanaret. Quod cum Dominus continuo praestitisset, ille securus ad aream certaminis properavit, et palmam martyrii fortiter dimicando promeruit. Item natale Simplicii.
1.10.21
EDITIO COLONIENSIS. OCTOBER, Habet dies XXX, lunam XXVIII. G. XII KALEND. NOVEMB.
1.10.21
-- Apud Nicomediam natale sanctorum martyrum Dasii, Zotici, Gaii, cum duodecim militibus. Eodem die sancti patris nostri Hilarionis, cujus vitam Hieronymus virtutibus plenam conscripsit. Item natale sancti Asterii presbyteri, Callisti papae, qui cum corpus ejus levatum de puteo sepelisset, post dies sex audiens hoc Alexander imperator, praecepit eum per pontem praecipitari. Cujus corpus inventum est, et a quibusdam Christianis in eadem civitate sepultum. Scriptum est in passione sancti Callisti, et transitus sancti Viatoris lectoris. In Colonia sanctarum virginum undecim millium.
1.10.22
EDITIO COLONIENSIS. OCTOBER, Habet dies XXX, lunam XXVIII. A. XI KALEND. NOVEMB.
1.10.22
-- Jerosolymis beati Marci, qui primus Jerosolymis ex gentibus post episcopos ex circumcisione sacerdotium civitatis illius accepit, clarissimi et doctissimi viri, ac non multo post martyrio consummati. Item beata Salomae, quae in Evangelio legitur cum reliquis sanctis feminis circa Domini sepulturam sollicita. Apud Adrianopolim Thraciae passio sanctorum Philippi episcopi, Severi presbyteri, atque Hermetis diaconi, et Eusebii, qui persecutione saeviente Christianorum, ecclesias claudere et spoliare, jussu imperatoris Juliani, per iniquos praesides contradicebant, et ob hoc per Bassum praesidem, nec non et Justinum multis tormentis afficiebantur, hoc est, carceribus, vinculis, flagellis, ad ultimum vero flammarum incendio; sed Domini virtute roborati, usque in finem in confessione nominis ejus perseveraverunt.
1.10.23
EDITIO COLONIENSIS. OCTOBER, Habet dies XXX, lunam XXVIII. B. X KALEND. NOVEMB.
1.10.23
-- Apud Antiochiam Syriae natale sancti Theodori presbyteri, qui persecutione impii Juliani sub praefecto et avunculo ejus Juliano, cum ab eo Antiochenorum ecclesia spoliata, et religiosi quique fuissent ejus terrore dispersi, in ecclesia permansit intrepidus, atque ab eo teneri jussus, post equulei poenam, et multos ac durissimos cruciatus, etiam lampades circa ejus latera appositae sunt. Sed his divina virtute restinctis, cum milites qui eas tenebant, angelorum aspectu territi ruissent in faciem, et credentes in Christo impium ministerium recusarent, jussit eos Julianus pelago immergi. Quibus B. Theodorus ait: Praecedite, fratres; ego vero superans inimicum sequar Dominum. Sicque occisione gladii martyrium consummavit. In Hispaniis natale sanctorum Servandi et Germani, qui post verbera squalorem carceris, et famis ac sitis injuriam, et longissimi itineris, quem jubente Viatore praeside ferro onusti pertulerunt laborem, novissime martyrii sui cursum ferro caesis cervicibus impleverunt. Coloniae sancti Severini archiepiscopi et confessoris. Viennae sancti Joditii episcopi. Item sancti Venantii abbatis.
1.10.24
EDITIO COLONIENSIS. OCTOBER, Habet dies XXX, lunam XXVIII. C. IX KALEND. NOVEMB.--
1.10.24
In Venusia civitate Apuliae natale sanctorum Felicis episcopi civitatis Tubrocensis, Audacti et Januarii presbyterorum, et Fortunatiani et Septimi lectorum, qui temporibus Diocletiani in sua civitate Tyci, a Magnelliano procuratore multis diu vinculis et carceribus macerati, et in Africa et in Sicilia, tandem in occisione gladii consummati sunt. Sunt autem honorifice sepulturae traditi inter Carthaginem et Uticam. In Nicomedia natale Severi et Dorothei.
1.10.25
EDITIO COLONIENSIS. OCTOBER, Habet dies XXX, lunam XXVIII. D. VIII KALEND. NOVEMB.
1.10.25
-- Bonifacii papae, qui sedit Romae annos tres. Hic sepultus est via Salaria, juxta corpus sanctae Felicitatis. Hic constituit servum clericum non fieri, nec obnoxium curiae, vel cujuslibet rei. In Gallia civitate Suessionis, natale sanctorum Crispini et Crispiniani, qui persecutione Diocletiani et Maximiani ad trochleas extenti et fustibus caesi, postquam digiti eorum subulis transfixi sunt, et de dorso eorum lora praecisa, ad ultimum gladio trucidati, coronam martyrii adepti sunt. Petragoricas civitate natale sancti Frontonis, qui Romae a beato Petro episcopus ordinatus, cum Georgio presbytero ad praedicandum Evangelium missus est. Cumque tertio die itineris idem Georgius fuisset mortuus, moerens Fronto reversus est ad Apostolum, acceptoque ejus baculo, et super corpus defuncti posito, socium de morte recepit; sicque ad praedictam civitatem veniens, magnam gentis illius multitudinem convertit ad Christum, et multis clarus virtutibus in pace quievit. Romae via Salaria natale quadraginta sex militum qui simul baptizati sunt a beato Dionysio papa, et mox jubente Claudio imperatore decollati sunt.
1.10.26
EDITIO COLONIENSIS. OCTOBER, Habet dies XXX, lunam XXVIII. E. VII KALEND. NOVEMB.
1.10.26
-- Apud Africam natale sanctorum martyrum, Rogatiani presbyteri, et Felicissimi, qui persecutione Decii et Valeriani illustri martyrio sunt coronati. Scribit beatus Cyprianus in epistola ad confessores, his verbis: Ut sequamini, inquit, in omnibus Rogatianum presbyterum gloriosum senem, viam vobis ad gloriam nostri temporis religiosa virtute, et divina dignatione facientem; qui cum Felicissimo fratre nostro quieto semper et sobrio excipiens ferocientis populi impetum, primum hospitium vobis in carcere praeparavit, et metator quodammodo vester, nunc quoque vos antecedit. In Nicomedia natale Luciani et Filori, Heraclidae et Martialis. Eodem die sancti Amandi confessoris.
1.10.27
EDITIO COLONIENSIS. OCTOBER, Habet dies XXX, lunam XXVIII. F. VI KALEND. NOVEMB.
1.10.27
-- In Hispaniis Abula civitate natale sanctorum Vincentii, Sabinae et Cristestes, qui primo adeo in equuteo sunt extenti, ut omnes compages membrorum eorum laxarentur; deinde capita eorum lapidibus supposita, et usque ad excussionem cerebri validis sunt vectibus contusa, atque ita martyrium compleverunt, agente praeside Datiano. Apud Thylae castrum, natale sancti Florentii martyris: Romae Evaristi papae, qui sedit annos novem, sub Trajano martyrio coronatur, sepultus est in Vaticano. Hic constituit duos in urbe presbyteros, et septem ordinavit diaconos, qui custodirent episcopum praedicantem. Et vigilia apostolorum Simonis et Judae.
1.10.28
EDITIO COLONIENSIS. OCTOBER, Habet dies XXX, lunam XXVIII. G. V KALEND. NOVEMB.
1.10.28
-- Natale sanctorum apostolorum, Simonis Chananaei, qui et Zelotes scribitur, et Thadaei, qui etiam Judas Jacobi legitur, et alibi appellatur Lebbaeus, quod interpretatur corcuculus. E quibus Thadaeus apud Mesopotamiam, Simon vero apud Aegyptum traditur praedicasse: inde simul Persidam ingressi, cum fidei innumeram gentis illius multitudinem subdidissent, et Ecclesiam Dei late jam fundatam viderent, martyrium ibi cursu temporis explentes, beato certamine consummaverunt, honorifice sepulti a populis Christianis, quos Domino ipsi genuerant. Romae sanctae Cyrillae, filiae Decii Caesaris, quae a Claudio principe jugulata est gladio, et sepulta a Justino presbytero, cum matre sua, juxta sanctum Hippolytum. Item sancti Fidelis martyris.
1.10.29
EDITIO COLONIENSIS. OCTOBER, Habet dies XXX, lunam XXVIII. A. IV KALEND. NOVEMB.
1.10.29
-- Natale sancti Narcissi Jerosolymorum episcopi, viri sanctitate et patientia, ac fide laudabilis. Accidit aliquando in die solemni vigiliarum Paschae oleum deesse luminaribus; tum praecepit repente naturam aquae in oleum verti. Qui centum et sedecim annorum migravit ad Dominum. Apud Sidonem urbem sancti Zenobii presbyteri, qui persecutione Diocletiani martyrio coronatur. Viennae depositio beati Theodori abbatis. In Lucania sanctorum Jacincti, Quintini, Felicianae, Lucinii. Eodem die sancti Felicis diaconi et martyris.
1.10.30
EDITIO COLONIENSIS. OCTOBER, Habet dies XXX, lunam XXVIII. B. III KALEND. NOVEMB.
1.10.30
-- Romae natale sancti Pontiani papae et martyris, qui ab Alexandro imperatore cum Hippolyto presbytero in exsilium deputatus est in Sardiniam insulam, ubi est defunctus. Civitate Tingintina passio sancti Marcelli centurionis qui, capitis abscissione martyrium consummavit, sub Agricolano agente vices praefectorum praetorio. Apud Africam martyres numero ducentorum viginti. In Antiochia beati Serapionis episcopi.
1.10.31
EDITIO COLONIENSIS. OCTOBER, Habet dies XXX, lunam XXVIII. C. PRID. KALEND. NOVEMB.--
1.10.31
Romae beati Nemesii diaconi, et Lucillae filiae ejus quos sanctus pontifex Stephanus baptizavit, quique ipsum Nemesium diaconem constituit. Qui decollatione quidem capitis martyrium complevit, simul cum filia, sub Valeriano et Gallieno, octava Kalendas Septembris: ejusque corpus a beato Stephano papa in eodem loco sepultum; sed a beato Sixto pontifice postea levatum, pridie Kalendas Novembris, et in crypta venerabiliter curatum. In Gallia oppido Viromandensi natale sancti Quintini, qui sub Maximiano imperatore passus est, et post annos quinquaginta quinque inventum est, revelante corpus ejus angelo, et sepultum octava Kalendas Julii. Et vigilia Omnium Sanctorum Eodem die sancti Volfgangi episcopi et confessoris.
1.11.1
EDITIO COLONIENSIS. NOVEMBER, Habet dies XXX, lunam XXX. D. KALEND. NOVEMB.
1.11.1
-- Festivitas Omnium Sanctorum. Petente namque papa Bonifacio, jussit Phocas imperator in veteri fano, quod Pantheon vocabatur, et a Domitiano prius factum erat, ablatis idololatriae sordibus, ecclesiam beatae semper virginis Mariae, et omnium fieri martyrum, ut ubi quondam omnium non deorum, sed daemonum cultus agebatur, ibi deinceps omnium fieret memoria sanctorum: quae ab illo tempore in Kalendis Novembris, in urbe Roma celebris et generalis agitur, sed in Galliis, monente sanctae recordationis Gregorio pontifice, piissimus Ludovicus imperator omnibus regni sui et imperii episcopis consentientibus, statuit ut solemniter festivitas Omnium Sanctorum in praefata die annuatim perpetuo ageretur. Quam sanctam constitutionem reverenti animo suscepit omnis Ecclesia. In castro Divione natale sancti Benigni presbyteri, qui cum Antiocho compresbytero, et Tyrso diacono missus est a sancto Polycarpo ab Oriente in Galliam: cujus praedicatione comes Terentius comperta vinctum eum et caesum ad se adduci praecepit; et rursum audita sermonum ejus constantia, nervis durissimis caedi fecit. Post haec ad trochleas extensus et caesus, et rursum carceri mancipatus, mane idola orando destruxit, et reductus est in carcerem: cui subulas decem calentes in manibus infixerunt, et cum plumbo remisso pedes in lapide perforato fixerunt, et canes duodecim feroces incluserunt cum eo per sex dies. Et angelus attulit panem coelestem ei, subulas abstulit, et eum de plumbo ac ferro eripuit. Post hoc collum ejus vecte ferreo tundi praecepit, et corpus ejus lancea perforari. Quo facto columba nivea de carcere Christianis aspicientibus ad coelos ascendit, et odor suavissimus quasi de paradiso secutus est. Venit autem beata Leonilla, et conditum aromatibus corpus non longe ab ipso carcere sepelivit. Item sanctorum Caesarii diaconi, et Juliani presbyteri; qui, videlicet, Caesarius tempore Claudii veniens ex Africa ad Terracinam Campaniae civitatem, dum contra idololatras proclamaret, in publico tentus est a Firmino pontifice, et in custodiam reclusus; ubi diebus multis maceratus, deinde traditus est Leontio consulari Campaniae: quem ille cum verbis superare nequiret, jussit vinctum ante carpentum suum ducere ligatis manibus nudum usque ad templum Apollinis. Quo cum pervenisset, ad orationem ejus corruit templum, et occidit pontificem Firminum. Post hoc reclusus a Luxurio in carcere primo civitatis, fuit ibi annum unum et mensem; deinde eductus in forum ab eo, dum oraret, coelesti est lumine circumdatus, ita ut ipse Leontius crederet, et Caesarium qui erat nudus, sua chlamyde indueret et baptizaretur, ac corpus et sanguinem Domini acciperet de manu Juliani presbyteri. Nec mora, dicta super eum oratione, tradidit spiritum, tertia Kalendas Novembris. Tunc Luxurius jussit Julianum et Caesarium mitti in saccum, et praecipitari in mari. Qui eodem die rejecti sunt ad littus, et sepulti ab Eusebio homine Dei, juxta urbem Terracinam, et idem Eusebius postea martyrium passus est cum Felice presbytero. Et depositio sancti Severini monachi de Tyburtina civitate, et sanctae Mariae martyris.
1.11.2
EDITIO COLONIENSIS. NOVEMBER, Habet dies XXX, lunam XXX. E. IV NON. NOVEMB.
1.11.2
-- Natale sancti Victorini Pictaviensis episcopi, qui persecutione Diocletiani martyrio coronatus est. Apud Laoditiam beati Theodoti episcopi, viri non solum verbis, sed et rebus et virtutibus ornati. Hic arte medicus fuit quidem, sed ad animarum a Domino translatus est medicinam, vere incomparabilis, qui super omnes pene homines fide, misericordia, studio, vigilantia, atque omnibus optimis institutionibus claruit. In Scripturis quoque divinis laboribus quamplurimum gessit, quievit, sepultus in senectute bona. Item sancti Ambrosii abbatis monasterii Agaunensis. Viennae sancti Georgii ejusdem urbis episcopi. In Africa sanctorum Publii, Victoris, Hermetis, Justi et Papiae.
1.11.3
EDITIO COLONIENSIS. NOVEMBER, Habet dies XXX, lunam XXX. F. III NON. NOVEMB.
1.11.3
-- Natale sancti Quarti apostolorum discipuli. Apud Caesaream Cappadociae natale sanctorum martyrum Germani, Theophili, Caesarii et Vitalis, qui optime duxerunt martyrium sub Deciana persecutione. Viennae sancti Domini episcopi gloriosi. Eodem die depositio sancti Pirminii episcopi et confessoris, et sancti Hugberti episcopi et confessoris.
1.11.4
EDITIO COLONIENSIS. NOVEMBER, Habet dies XXX, lunam XXX. G. PRID. NON. NOVEMB.
1.11.4
-- Apud Alexandriam beati Hierii presbyteri, viri acris ingenii. In Gallia civitate Rhedonis natale sancti Amantii episcopi et confessoris, cujus vita sanctitate et miraculis exstitit gloriosa. Augustuduno beati Proculi episcopi. In Galliis Bituricas depositio beati Illusoris pueri et confessoris. In Africa natale Primi, Caesaris, Gregorii, Porphyrii, Amantis, Saturnini, Victorinae.
1.11.5
EDITIO COLONIENSIS. NOVEMBER, Habet dies XXX, lunam XXX. A. NON. NOVEMB.
1.11.5
-- Zachariae prophetae, patris Joannis Baptistae. In Terracina Campaniae civitate natale sanctorum Felicis presbyteri, et Eusebii monachi, temporibus Claudii imperatoris. Qui, videlicet, Eusebius cum sepelisset sanctos martyres, Julianum et Caesarium, et ad sepulcra eorum orans multos converteret ad fidem, quos Felix presbyter baptizavit, tenti sunt ambo a Leontio, filio Leontii consularis, ob eam maxime causam, quia Caesarius patrem ejus Christianum fecisset. Et ad forum ejus ducti non sunt superati; inde carcere inclusi, nocte eadem cum sacrificare nollent, decollati sunt, atque in fluvium jactati. Quorum corpora venerunt usque ad mare, et relicta sunt ad littus, atque a presbytero quodam, nomine Quarto, de Capua, inventa, qui ea mox imposita vehiculo duxit in casam suam, et curiose quaerens etiam capita invenit, adjunctaque corporibus sepelivit juxta sanctum Caesarium.
1.11.6
EDITIO COLONIENSIS. NOVEMBER, Habet dies XXX, lunam XXX. B. VIII IDUS NOVEMB.
1.11.6
-- Tumissa Africae natale sancti Felicis. In hujus solemnitate quemdam psalmum beatus Augustinus videtur exponere ad populum ita dicens: Felix martyr vere felix, et nomine et corona, cujus hodie diei est festivitas. In Oriente civitate Theopoli sanctorum decem martyrum, qui sub Saracenis passi leguntur in Gestis sanctorum quadraginta. In civitate Lemovicensi, in provincia Aquitaniae sancti Leonardi confessoris, discipuli sancti Remigii episcopi.
1.11.7
EDITIO COLONIENSIS. NOVEMBER, Habet dies XXX, lunam XXX. C. VII IDUS NOVEMB.--
1.11.7
Apud Alexandriam beati Achilleae episcopi, eruditione, fide, conversatione et moribus insignis. Item apud Perusinam Italiae urbem sancti Herculiani episcopi, et sancti Amaranti, qui apud Albiensem urbem martyrizatus est. Depositio Willibrordi episcopi, de gente Anglorum, viri sanctissimi, et miraculorum gratia admodum insignis, qui a Sergio papa Romae ordinatus est, et in Germaniam ad praedicandum destinatus, ibidemque requievit. Item sancti Rufi Metensis episcopi et confessoris, qui translatus est a praedicta urbe, consentiente Drogone praesule, in Vormatiensem pagum, in villam quae vocatur Oternheim, temporibus Lotarii imperatoris, et Ludovici regis; ubi etiam sanctitas ejus multis virtutibus claruit. In Africa natale Rogati, Donati.
1.11.8
EDITIO COLONIENSIS. NOVEMBER, Habet dies XXX, lunam XXX. D. VI IDUS NOVEMB.
1.11.8
-- Romae natale sanctorum martyrum, Claudii, Nicostrati, Symphoriani, Castorii et Simplicii, qui tempore Diocletiani Augusti pro Christi nomine passi sunt, eo quod nollent deos paganorum colere. Nam cum essent insignes artifices, et in lapidibus marmoreis imagines sculpere super omnes artifices regios nossent, et artis eorum peritia multum imperatori placuisset, tamen accusantibus eos philosophis, eo quod falsos deos adorare renuerant, jussit eos Diocletianus loculis plumbeis inclusos omnes praecipitare in fluvium. Passus est autem cum eis et Simplicius, quem a gentilitatis ritu converterunt ad fidem Christi. Post dies autem quadraginta duos, venit quidam Nicodemus Christianus, et levavit cum ipsis loculis corpora martyrum, et in domo sua honorifice posuit. Passi sunt autem sexta Idus Novembris. Ipso die natale sanctorum Quatuor Coronatorum, id est, Severi, Severiani, Carpophori et Victorini. Hi cum impellerentur ad sacrificandum, reluctantes, nec omnino consensum impiis praebentes, perstiterunt in fide. Nuntiatum est hoc imperatori Diocletiano: quos illico jussit ut ante simulacrum Asclepii ictibus plumbatarum caesi deficerent; quorum corpora jussit in platea canibus jactari, quae jacuerunt ibi diebus quinque illaesa. Tunc Christiani venerunt, et collecta corpora sepelierunt. Via Lavicana, milliario ab urbe tertio, in arenario juxta corpora sanctorum martyrum Claudii, Nicostrati, Simphoriani, Castorii et Simplicii. Post duos tamen annos passionis horum quinque martyrum, cum nomina eorum minime reperirentur, statuit beatus Melchiades episcopus ut anniversarius Quatuor Coronatorum dies sub nominibus sanctorum quinque martyrum recoleretur. Intercurrentibus tamen annis, cuidam sancto viro etiam nomina eorum revelata sunt. Festivitas vero, ut fuerat statuta, celebris in aliorum martyrum festivitate permansit, ac locus Quatuor Coronatorum nomine insignis. Eodem die commemoratio Omnium Sanctorum.
1.11.9
EDITIO COLONIENSIS. NOVEMBER, Habet dies XXX, lunam XXX. E. V IDUS NOVEMB.
1.11.9
-- Natale beati Theodori martyris, tempore Maximiani et Maximini imperatorum. Qui cum esset miles sub Brycha praeposito legionis, missus est in carcerem, signatoque ostio ibi divina visitatione consolatur. Post aliquot dies adductus iterum ante praesidem, suspensus est in ligno, et ungulis ferreis latera ejus rasa, quousque costae ejus nudarentur; deinde manibus post tergum ligatis, in focum missus est, et circumspiciens vidit in turba lacrymantem Cleonicum, qui cum eo tyro adductus fuerat, et exclamans dixit: Cleonice, exspecto te, festina et sequere me. Et cum jam flammarum globis undique vallaretur beatus martyr, orationem fudit, laudans Patrem, et Filium ac Spiritum sanctum, sicque sanctam animam Christo reddidit. Quaedam autem mulier Eusebia nomine, collegit corpus ejus, et sindone munda involvens transtulit in possessionem suam, in locum appellatum Euchata. Apud Bituricas sancti Ursicini, qui Romae ordinatus a successoribus apostolorum, primus ipsi urbi destinatur episcopus.
1.11.10
EDITIO COLONIENSIS. NOVEMBER, Habet dies XXX, lunam XXX. F. IV IDUS NOVEMB.
1.11.10
-- In territorio Agatensi natale sanctorum martyrum Tiberii, Modesti et Florentiae, qui tempore Diocletiani variis tormentis cruciati martyrium compleverunt. Eodem die sancti Martini papae, qui ob fidem catholicam ab imperatore Constantio haeretico, per Theodorum exarchum de ecclesia raptus, ac productus Constantinopolim, relegatur apud Chersonam Lyciae provinciae, ibidemque vitam finivit, multis in eodem loco virtutum signis usque hodie refulgens. Romae depositio sancti Leonis episcopi. In Antiochia natale Demetrii episcopi, Amnesi, Eustochii et sociorum ejus. Aurelianis depositio beati Monitoris episcopi.
1.11.11
EDITIO COLONIENSIS. NOVEMBER, Habet dies XXX, lunam XXX. G. III IDUS NOVEMB.
1.11.11
-- In Gallia Turonis civitate natale sancti Martini episcopi et confessoris, cujus vita et doctrina per miracula quae Dominus per eum fecit, pene omnibus fidelibus claret; nec necesse est a nobis hic aliquid exinde commemorari, quia ipsius vitam, virtutes et signa Sulpitius manifeste luculento sermone descripsit, necnon et Gregorius ejusdem urbis episcopus in Miraculorum libris plenissime disseruit. In Scythia metropoli Phrygiae passio sancti Mennae martyris, qui persecutione Diocletiani et Maximiani cum esset miles nobili genere ex Aegyptiorum provincia ortus, abrenuntians terrenae militiae, primum coelesti Regi secreta conversatione in eremo militavit; deinde in natalitiis praefatorum imperatorum procedens ad publicum, ac se Christianum libera coram ipsis voce declarans, traditus est Pyrrho duci torquendus: qui jussit eum carcere includi, quandiu imperatorum natalitia celebrabantur. Peracta igitur festivitate, jubente duce, et nervis bubulis manibus ligatis, tandiu a militibus virgis caesus, donec sanguine ipsius plateae replerentur; deinde in equuleo exungulatus, et lampadibus circa latera adustus, cilicioque plagae ejus fricatae et carbones ignis super plagas impositi, per tribulos quoque et sudes ferreos ligatis manibus ac pedibus tractus, plumbatis etiam collo et maxillis graviter caesus, in laude Dei omnipotentis immobilis permansit. Novissime gladio animadverti jussus est, et corpus igne comburi. Quod furtim a Christianis e medio ignis ereptum, et mundis linteaminibus aromatibusque conditum, debita veneratione curatum est. Lugduni natale sancti Verani episcopi.
1.11.12
EDITIO COLONIENSIS. NOVEMBER, Habet dies XXX, lunam XXX. A. PRID. IDUS NOVEMB.
1.11.12
-- Apud Africam commemoratio sanctorum Arcadii, Paschasii, Probi et Eutychiani, qui ex Hispania oriundi, cum apud Genserichum Vandalorum regem merito sapientiae, et fidelis obsequii chari clarique haberentur, nec Marrianam[ F. in Arianam] perfidiam, cui ipse deditus erat, ullatenus declinari paterentur, excitato in rabidissimam iram barbaro, primum proscripti, deinde in exsilium acti, atrocissimis suppliciis excruciati, ad postremum diversis mortibus interempti, illustri martyrio mirabiliter occubuerunt. Puer Paulinus nomine, frater Eutychiani et Paschasii, fustibus diu caesus, et ad infimam servitutem damnatus est: Coloniae sancti Cuniberti episcopi et confessoris. Item sancti Melani Rhedonicae civitatis episcopi. Viennae sancti Isicii episcopi. In Africa sanctorum martyrum Auruli, Publii. In Caesaraea Cappadociae sanctorum Germani et Theophili, Caesaris et Eusebii B. IDUS NOVEMB. Ravennae natale sanctorum martyrum Valentini, Solutoris, Victoris. Turonis depositio sancti Bricii episcopi et confessoris. In provincia apud Aquis civitatem beati Metrii clarissimi martyris.
1.11.13
EDITIO COLONIENSIS. NOVEMBER, Habet dies XXX, lunam XXX. C. XVIII KAL. DECEMB.--
1.11.13
Apud Thraciam civitatem Heracleam, natale sanctorum martyrum Clementini, Theodoti, Philomini. Apud Alexandriam beati Serapionis, quem persecutores sub Decio in domo sua crudelissimis affecerunt suppliciis, ita ut, omnes juncturas ei membrorum prius solventes, de superioribus ejus praecipitarent, ac sic Christi martyr efficeretur. Item Heracli, Martialis, Donati, et aliorum multorum.
1.11.14
EDITIO COLONIENSIS. NOVEMBER, Habet dies XXX, lunam XXX. D. XVII KAL. DECEMB.
1.11.14
Natale sancti Felicis episcopi, qui a quinto decimo aetatis suae anno miraculorum gloria insignis fuit, et sub Martiano praeside cum aliis triginta martyrium complevit. Corpus ejus Elypidius presbyter in Nolensi ecclesia sepelivit. In Africa natale sanctorum Secundi, Fidentiani, Varici martyrum. E. XVI KAL. DECEMB. Natale sancti Eucherii, Lugdunensis episcopi, admirandae fidei, vitae et doctrinae viri. In Capua natale sancti Augustini. In Africa Vitalis, Januarii, et depositio beati Othmari abbatis.
1.11.15
EDITIO COLONIENSIS. NOVEMBER, Habet dies XXX, lunam XXX. F. XV KALEND. DECEMB.
1.11.15
Apud Alexandriam beati Dionysii episcopi, in multis saepe confessionibus satis clari, et pro passionum tormentorumque diversitate magnifici, Valeriani et Gallieni imperatorum temporibus. In Hispaniis Corduba civitate passio sanctorum martyrum Aciscli et Victoriae. Aurelianis civitate Galliae depositio sancti Aniani episcopi et confessoris. Viennae sancti Mamati episcopi et confessoris. Sancti patris nostri Gregorii miraculorum libri factoris Turonicae.
1.11.16
EDITIO COLONIENSIS. NOVEMBER, Habet dies XXX, lunam XXX. G. XIV KAL. DECEMB.
1.11.16
Antiochiae natale sancti Romani, qui temporibus Diocletiani cum Asclepiades praefectus ecclesiam irrumperet, caeteros Christianos hortatus est, ut ei contradicerent. Unde eum primum equuleo extendi, deinde plumbatis graviter caedi, post haec etiam novacula acutissima maxillas ejus radi fecit, tunc ad petitionem ejus puerum parvulum induci praecepit. Quem Romanus Christi nomine invocato, utrum unum, an plures deos melius esset colere, interrogavit, ut ex ejus confessione praefectus confunderetur; cumque puer in unum Deum solum credendum dixisset, indignatus Asclepiades, cathamo eum suspendi, ac verberari, ac postremo etiam decollari jussit, cui nomen Baralas. Romanus vero rursus equuleo suspensus, ungulisque exaratus, ad rogum ardentem, in quem praecipitaretur, perductus est. Sed orante eo, venit repente imber inundans, et exstinxit. Post haec jussit ei linguam abscindi. Quo facto, cum Christum voce clarissima laudaret, reclusus in carcere, ad extremum vero laqueo strangulatus est, sicque sanctus martyr migravit ad Christum. Item in eadem urbe natale sancti Hesychii, qui sub praefato imperatore cum esset miles, et praeceptum audisset, ut quisquis non sacrificaret idolis, cingulum solveret, ob hanc causam imperator colobio muliebri indutum, primo eum in gynaecium dedit; deinde ligato in dextera ejus saxo ingenti, inde in fluvium praecipitari jussit. Octava sancti Martini episcopi et confessoris. A. XIII KAL. DECEMB. Romae via Appia natale sancti Maximi presbyteri et martyris, qui persecutione Maximini passus, positus est ad sanctum Sixtum. Gelasii papae, qui sedit in episcopatu annos quatuor. Hic revocavit Mesenum episcopum, quem Felix antecessor illius damnaverat, et communioni Ecclesiaeque suae restituit. Hic libros adversus Eutychen et Nestorium composuit. Viennae sanctorum martyrum, Severini, Exuperii et Feliciani. Item sancti Fausti diaconi, cui tantam Deus contulit gratiam, cum nullus ad sanctos qui affligebantur, accedere praesumpsisset, isti una cum collega suo Eusebio nomine, invitis omnibus hostibus, ad confessores Christi non negabatur ingressus. Grandaevus igitur beatus Faustus obtruncatione capitis consummatus est. Eodem die in Marburch beatae Elisabeth Landgraviae.
1.11.17
EDITIO COLONIENSIS. NOVEMBER, Habet dies XXX, lunam XXX. B. XII KAL. DECEMB.
1.11.17
Romae sancti Pontiani papae, qui Maximino adversus Ecclesiarum sacerdotes persecutionem commovente cum Hippolyto presbytero, in Sardiniam deportatur, ibique fustibus mactatus, martyrium consummavit. Corpus ejus a Fabiano papa relatum, atque in coemeterio Callisti sepultum est. Sedit in episcopatu annos novem, menses quinque, dies duos. Apud Siciliam civitatem Mesanam, sanctorum Ampeli et Gagi. Apud Cabillonem Silvestri episcopi. In Heraclea Bassi, Dionysii, Agapiti, et aliorum quadraginta.
1.11.18
EDITIO COLONIENSIS. NOVEMBER, Habet dies XXX, lunam XXX. C. XI KAL. DECEMB.--
1.11.18
Natale beati Rufi, de quo beatus Paulus apostolus ad Romanos scribit: Salutate Rufum electum, et matrem ejus et meam. Item natale sancti Mauri martyris, qui ab infantia Christianus fuit, orationibus et jejuniis vacans; qui sub Numeriano imperatore et Celerino praefecto diversis poenis maceratus, hoc est, primum fustibus nodosis caesus, deinde plumbatis jussum est maxillas ejus contundi; postea in equuleo suspendi, atque ungulis radi, et lampades ardentes lateribus ejus applicari, ad extremum vero caput ejus amputari. Cujus corpus nocte nautae Africani cognoscentes, ex sua patria ortum, rapuerunt, et volventes eum linteaminibus mundis, cum aromatibus posuerunt in sarcophagum, scripseruntque ad caput ejus: Dei et Christi Jesu famulus Maurus, hoc saeculum pro Christi fide relinquens, vitam aeternam acquisivit. Celerinus namque praefectus, nautas jussit comprehendi; at illi omnes fugerunt. Tunc jussit navem, in qua martyris corpus erat, sarmentis impleri, et igne supposito, in medio mari comburi; sed gubernante Domino, martyrem suum, ubi voluit, ad portum salutis perduxit. D. X KAL. DECEMB. Natale sanctae Ceciliae virginis, Marci, Aurelii, et Commodi imperatorum temporibus, quae sponsum suum Valerianum, et fratrem ejus Tiburtium, ad credendum Christo perdocuit, ac deinde ad martyrium incitavit. Hanc Almachius urbis praefectus post martyrium eorum teneri fecit, et ut thura daemonibus poneret, impelli. Apparitores vero attendentes decorem et prudentiam ejus, rogabant eam ne tale decus omitteret. At illa consilium pietatis eis sufficienter insinuans, cum ad credendum Christo permotos cerneret, dicit eis: Ite, dicite infelici Almachio quod ego inducias peto, et intra domum meam faciam venire qui vos omnes vitae aeternae faciat participes. Veniens igitur papa Urbanus, baptizavit plusquam quadringentos promiscui sexus homines. Iterum Almachius beatam Caeciliam sibi praesentari jussit. Et cum insuperabilem eam in confessione fidei permanere videret, jubet ut ad domum suam duceretur, et ibi flammis balnearibus concremaretur. Ubi inclusa die integro et nocte, quasi in loco frigido integra perstitit sanitate, cum semper incendia lignis congestis ministrarentur. Quod audiens Almachius, misit qui eam decollaret: quam spiculator tertio ictu percussit, sed caput ejus amputare non potuit, supervixit autem triduo. Tunc sanctus Urbanus corpus ejus auferens nocte, sepelivit eam inter collegas suos episcopos. Item sanctae Mederasmae virginis.
1.11.19
EDITIO COLONIENSIS. NOVEMBER, Habet dies XXX, lunam XXX. E. IX KAL. DECEMB.
1.11.19
Natale sancti Clementis. Hic quartus post Petrum Romae episcopus ordinatus est. Hic septem regiones divisit notariis fidelibus, qui gesta martyrum sollicite perquirerent. Hic ex praecepto beati Petri, Ecclesiae suscepit pontificatum. Linus et Cletus ideo ante eum scribuntur, quia ab ipso principe apostolorum ad ministerium sacerdotale episcopi sunt ordinati. Qui jubente Trajano, missus est in exsilium trans Pontum mare, in eremo, ubi multis ad fidem vocatis per miracula et doctrinam ejus, praecipitatus est in mare, ligata ad collum ejus anchora; sed recessit mare orantibus discipulis per tria millia, et invenerunt corpus in arca saxea, in marmoreo templo, et anchoram juxta, talique martyrio Petri discipulus coronatur. Item natale sanctae Felicitatis matris septem filiorum martyrum, quae jubente Antonino decollata est pro Christo. In Italia, monasterio Bobio, depositio sancti Columbani abbatis, qui multorum coenobiorum fundator, et innumerabilium pater exstitit monachorum, multisque virtutibus clarus quievit in senectute bona. Et sancti Drudonis confessoris.
1.11.20
EDITIO COLONIENSIS. NOVEMBER, Habet dies XXX, lunam XXX. F. VIII KAL. DECEMB.
1.11.20
Natale sancti Ignatii episcopi et martyris, qui tertius post Petrum apostolum Antiochenam rexit Ecclesiam, persecutione Trajani damnatus ad bestias, Romam vinctus mittitur; ubi praesente Trajano, circumsedente senatu, pilis plumbeis scapulae ejus primum contusae, deinde ungulis latera ejus dilaniata, et lapidibus asperis confricata; post expansae manus ejus, et igni repletae, papyro oleo infuso et incenso, latera ejus adusta, post super carbones pavimento aspersos, ubi sanctae plantae illius steterunt. Post lectum flammantem, post dorsum ejus ungulis discissum et dilaceratum, post acetum et salem, quibus plagae ejus infusae sunt, post vinculis ferreis beata illius astricta, et pedes in ima carceris in ligno conclusos; ubi tribus diebus ac noctibus panem non comedens, et aquam non bibens mansit. Sedente pro tribunali Trajano, in amphitheatro, concurrente omni turba Romanorum, ligatus duobus objicitur leonibus. Cumque jam projectus bestias rugientes audiret, ardore patiendi, ait: Viri Romani qui hoc certamen spectatis, non sine causa laboravi, quia non propter pravitatem haec patior, sed propter pietatem frumentum Christi sum, dentibus bestiarum molar, ut panis Dei mundus inveniar. Haec illo dicente, accurrerunt ad eum leones, et ex utraque parte super eum incidentes, praefocaverunt eum tantummodo, et non tetigerunt carnes ejus. Item Romae natale sancti Chrysogoni martyris, qui per biennium jussu Diocletiani conjectus est in vincula; ubi multa perpessus sanctae Anastasiae alimoniis fovebatur, ad ultimum decollatus est, et in mare projectus. Corpus ejus Zoilus senex presbyter inventum, adunato capite in cubiculo suo collocavit. Et natale sancti Crescentiani martyris, sub persecutione Maximiani.
1.11.21
EDITIO COLONIENSIS. NOVEMBER, Habet dies XXX, lunam XXX. G. VII KAL. DECEMB.
1.11.21
Natale sancti Petri Alexandrini episcopi, inter praecipuos egregii. Hic duodecimo episcopatus sui anno martyrii coronam capitis obtruncatione promeruit, tempore Maximiani imperatoris; cum quo simul et alii plures ex Aegypto episcopi trucidantur, fere cum clericis et laicis sexcentis sexaginta. Hic dum in carcere servaretur, et universus populus Alexandriae urbis fores carceris observaret amore patris sui, Arius infelix, qui a beato Petro excommunicatus et degradatus propter dogma erroris habebatur, cognita sententia Maximiani adversus beatum Petrum, festine pervenit ad ecclesiam, obsecrans ut pro eo clerus et populus apud episcopum intercederet, putans quod post discessum ejus ipse levaretur episcopus. Venientes igitur qui rogaturi fuerant, coeperunt pro Ario beato episcopo supplicare; quibus sanctus episcopus cum magno suspirio respondit: Quia jam Arius Deo mortuus, a facie Dei projectus esset, quia graviter in essentia Deitatis blasphemasset, dogmatizans Patrem, et Filium ac Spiritum sanctum non esse unius essentiae et naturae. Et apprehendens duos presbyteros, Alexandrum et Achillam, de turba seorsum, ait illis secrete: Ego quidem etsi peccator sum, tamen scio me vocatione coelesti ad hunc agonem martyrii esse vocatum. Vobis igitur confiteor mysterium Dei, quod mihi revelatum est, quia vos post martyrium meum sedem et episcopatum meum consecuturi estis, et tu quidem primus Achilla, post te vero Alexander. In hac hora noctis, ut vobis totum de Ario aperiam, cum solemni consuetudine Deo sacrificium orationum consummassem, ecce subito apparuit mihi in habitu pueri Christus Dominus meus; ad cujus praesentiam splendore nimio illustratus, vultum majestatis ejus non valebam aspicere. Erat autem indutus colobio nimis candido, quod conscissum a summo usque deorsum, ambabus manibus conjungebat circa pectus suum, quodammodo cooperiens nuditatem suam. Quem ut vidi, timore nimio correptus, tandem confortatus aio ad eum: Quid est? domine, quod video tunicam tuam scissam a summo usque deorsum? Qui respondens dixit mihi: Quotidie inde tractas, et nescis quomodo scissa est. Arius namque hoc fecit, qui separavit a me populum haereditatis meae, comparatum sanguine meo. Praecipio nunc, et moneo, ne eum recipias in communionem; nec rogantibus his qui venturi sunt ad te, quos ille direxerit, veniam ei ne praestes. Haec quae tibi manifestavi, duobus presbyteris tu notum facias, ut ipsi post te, eum anathematizando abjiciant, ne populus illius errore decipiatur. Exhortationis igitur sermonem eis faciens, et in catholicae fidei unitate ut manerent, commendans eos Domino, in quem crediderant, dimisit in pace. Eodem die passio sanctae Catharinae virginis et martyris Christi, et aliorum.
1.11.22
EDITIO COLONIENSIS. NOVEMBER, Habet dies XXX, lunam XXX. A. VI KAL. DECEMB.
1.11.22
Natale sancti Lini papae, qui post apostolum Petrum primus Romanam Ecclesiam tenuit annos duodecim, menses tres, dies duodecim. Hic ex praecepto beati Petri constituit ut mulier in ecclesiam velato capite introiret, et martyrio coronatus, sepultus est in Vaticano. Apud Alexandriam natale sanctorum martyrum, Fausti presbyteri, et Dii, et Ammonii, qui cum beato Petro ejusdem episcopo jubente Maximiano trucidati sunt. Eodem die beati episcopi et martyris, sub Antonino imperatore, qui inter alia facta miracula mortuum suscitavit. Romae Syricii episcopi, et in Capua Nicanoris, Cassiani et Felicissimi. Augustuduno depositio sancti Amatoris episcopi. In Nicomedia beati Marculi sacerdotis et martyris, qui temporibus Constantis regis tyranni persecutiones maximas pertulit, ad extremum ab alta rupe praecipitatus est.
1.11.23
EDITIO COLONIENSIS. NOVEMBER, Habet dies XXX, lunam XXX. B. V KAL. DECEMB.
1.11.23
Natale sanctorum martyrum Vitalis et Agricolae, qui apud Bononiam urbem Italiae post alia tormenta ultimo crucifixi, martyrium compleverunt: quorum corpora postmodum, cum essent posita inter sepulcra Judaeorum, et populo Christiano prorsus incognita, beatus Ambrosius ipsis sanctis martyribus revelantibus, apud Bononiensem civitatem reperit, quaeque exstructa ecclesia cum magna fidelium laetitia et daemonum poenis confitentium merita martyrum, sub altare deposuit. In Gallia civitate Regensi, natale sancti Maximi episcopi, qui primaeva aetate virtutum omnium gratia praeditus, primum Liriniensis coenobii Pater, deinde Regensis Ecclesiae episcopus, signis et prodigiis inclytus extitit. Denique inter alia gesta magnifica tres mortuos vivens, unum tactu, quo ad sepulcrum vehebatur loculi, mortuum suscitavit. In Nicomedia natale Marcelli, Petri, Numeri, Hierenae, et Melosi. Et depositio Optati episcopi.
1.11.24
EDITIO COLONIENSIS. NOVEMBER, Habet dies XXX, lunam XXX. C. IV KALEND. DECEMB.--
1.11.24
Natale sancti Sosthenes, discipuli apostolorum et Trophimi, de quo scribit Apostolus ad Timotheum: Trophimum autem reliqui infirmum Meleti. Hic ab apostolis Romae ordinatus episcopus, primus ad Arelatem urbem Galliae illuc ob Christi evangelium praedicandum missus est: ex cujus fonte, ut beatus papa Zosimus scribit, tota Gallia fidei rivos accepit, qui apud eamdem urbem in pace quievit, Gregorii papae, qui rexit Ecclesiam annos decem. Hic constituit in canone a sacerdote dicendum: Quorum solemnitas hodie in conspectu tuae Majestatis celebratur, Domine Deus noster, toto in orbe terrarum, inter quorum nos consortia, et caetera. Sepultus est in ecclesia beati Petri apostoli. Eodem die sancti Rufi martyris, quem Dominus Jesus Christus cum omni domo sua per Chrysogonum martyrem lucratus est, et cum omni domo sua Diocletianus punitum Christo martyrem fecit. Apud Africam natale sanctorum martyrum Papii et Mansueti episcoporum, qui tempore Vandalicae persecutionis sub Genserico rege Ariano, pro fidei catholicae defensione, candentibus ferri laminis toto corpore adusti, gloriosum agonem consummaverunt. Quo in tempore etiam alii sancti episcopi, id est, Quodvultdeus, Carthaginensis Valeanus, Urbanus, Crescens, et qui vocatur Habetdeum, et Eustachius, Cresconius et Crescentianus, et Felix, et Hortulanus, et Florentianus, damnati exsilio cursum vitae suae consummaverunt. Viennae sancti Philippi ejusdem urbis episcopi. In Syria Trophimi, Theodoli, Expicati, Eruceri, Eusebii et Julii.
1.11.25
EDITIO COLONIENSIS. NOVEMBER, Habet dies XXX, lunam XXX. D. III KAL. DECEMB.
1.11.25
-- Romae natale sancti Saturnini martyris, et Sisinnii diaconi, sub Maximiano, a quo primo inter alios servos Dei damnati, ad fodiendam arenam, ad faciendas thermas Diocletiani, deinde in carcere diu sunt macerati; ubi multos gentiles docentes baptizabant, et denuo educti, vincti catenis ac nudis pedibus ante praefectum urbis Laodicium jussi sunt in equuleo levari, et attrahi nervis, et fustibus ac scorpionibus caedi. Quibus etiam postmodum flammas ad latera jussit apponi, et depositos de equuleo capite truncari. Quorum corpora colligens Trason cum Joanne presbytero sepelivit in praedio suo via Salaria. Apud Tholosam natale sancti Saturnini episcopi, qui temporibus Decii in Capitolio ejusdem urbis tentus a paganis, eo quod ad ejus praesentiam omnes dii ipsorum obmutefacti, nullum sacrificantibus possent dare responsum, tauro ad victimam praeparato funibus religatus est. Quo vehementius stimulato, a summa Capitolii arce per omnes gradus praecipitatus est, capite colliso, excussoque cerebro, et omni corpore dilaniato dignam Christo animam exhalavit. Cujus corpus in ecclesia digno honore veneratur. Et vigilia sancti Andreae Apostoli.
1.11.26
EDITIO COLONIENSIS. NOVEMBER, Habet dies XXX, lunam XXX. E. PRID. KAL. DECEMB.
1.11.26
-- In civitate Patras provinciae Achaiae, natale beati Andreae Apostoli, qui interpretatur virilis, vel decorus, frater Petri. Hic praedicavit in Scythia, qui ab Egea proconsule comprehensus, cum perseveranter in fide Christi et Evangelio duraret, carcere clausus primum, inde coram proconsule gravissime caesus, ad ultimum cruce ligatis manibus et pedibus, funibusque toto corpore tensus, ut longius cruciaretur, biduo inibi supervixit, non cessans ea quae Dei sunt, populum docere. Cumque hi qui Christo crediderant Domino satis agerent, ut deponeretur, Egeamque ut hoc perficerent, nolentem impellerent, Apostolus Domini circumstante populo, et Egea proconsule, ut solveretur agente, post verba orationis fulgore coelesti fere una desuper circumfulsus hora, cum ipso lumine abscedente emittens spiritum perrexit ad Dominum. Cujus corpus Maximilla potentissima matronarum reverenter depositum sepelivit. Apud Sanctonas natale sancti Trophiani episcopi, virtutis viri. Romae Castuli, Euprepitis.
1.12.1
EDITIO COLONIENSIS. DECEMBER. Habet dies XXXI, lunam XXIX. F. KALEND. DECEMB.
1.12.1
-- Natale sanctorum martyrum Chrysanti et Dariae, qui tempore Numeriani, judice Celerino Romae passi sunt. Chrysanti pater Polemius vir illustris fuit: hic filium suum cuidam virgini conjunxit, quam ex nobilissimis Romanis fuisse constat; hanc Chrysantus ad fidem Christi convertens, baptizari fecit. Factumque est ut per Chrysantum multitudo virorum et per Dariam innumerabiles feminae ad Christi gratiam confluerent. Praefectus namque Celerinus, comprehensos tradidit Claudio tribuno, qui septuaginta milites ad torquendum dedit, qui nervis crudis eum astringunt, sed mox ligamenta omnia resoluta sunt. Deinde in cippum, ita ut in tertio puncto ejus tibiam coarctarent, eum mittunt, mox ligneus cippus in cinerem resolvitur. Tunc perfundunt eum lotio humano putentissimo, ut maleficia, inquiunt, amittas; sed fetor in suavem odorem mutatus est. Deinde corio recenti vitulino nudum eum constringunt, et ad solem ferventem componunt, sed virtute Domini corium ut erat, molle permansit. Deinde collum, manus ac pedes, catenis ferreis constringentes, recludunt in obscurissimo loco, et statim catenae solutae sunt, et magna lux infulsit. Daria vero in publico meretricum lupanari ponitur, sed leo de cavea veniens ad tutelam Domini virtute ei donatur. Qui ingressus cellam, in qua sancta Dei in oratione prostrata jacebat, juxta prosternitur, ut venientes a se repelleret. Dum haec omnia Celerinus imperatori indicasset, ille jussit eos duci via Salaria in arenario, et vivos deponi, et terra ac lapidibus obrui. Contigit ut ad diem natalis eorum infinita populi multitudo concurreret: hoc nuntiatum est imperatori, qui jussit ut in introitu cryptae paries levaretur; ac sic factum est ut omnes dum sacramenta Christi perciperent, martyrii gloriam celebrarent; inter quos erant Diodorus presbyter et Martinianus diaconus, et plurimi clericorum. Ipso die beati Egilii Noviomensis episcopi. Romae Candidae, Umboni.
1.12.2
EDITIO COLONIENSIS. DECEMBER. Habet dies XXXI, lunam XXIX. G. IV NON. DECEMB.
1.12.2
-- Natale sanctae Vinianae martyris, beatorum martyrum Fausti et Dafrosae filiae, quae jubente Juliano imperatore sacrilego tandiu plumbatis caesa est, donec spiritum redderet; cujus corpus jussione imperatoris biduo in foro jacuit, tandem raptum nocte a Joanne presbytero, sepultum est in domo, ubi mater et soror ejus Demetria jam sepultae erant, juxta palatium Licievanum. Romae natale sanctorum Primenti, Pontiani, Pimini, Dimetri, Jubiani. In Mauritania, Severi, Securi, Januarii, Victorini.
1.12.3
EDITIO COLONIENSIS. DECEMBER. Habet dies XXXI, lunam XXIX. A. III NON. DECEMB.
1.12.3
-- Tingi metropoli Mauritaniae natale sancti Cassiani presbyteri, gloriosi martyris. Item sanctorum martyrum Claudii tribuni, et uxoris ejus Hilariae, ac filiorum Jasonis et Mauri, et sexaginta militum, qui omnes ad praedicationem beati Chrysanthi crediderunt in Christo. Quod ut nuntiatum est imperatori Numeriano, jussit Claudium tribunum ingenti saxo alligatum praecipitem in medio mari dari, milites vero septuaginta, cum quibus Jasonem et Maurum filios Claudii capitali sententia puniri. Erat autem in loco ubi decollati sunt colliculus antiquus, hunc emundantes nocte Christiani, simul in unum omnia corpora sepelierunt via Salaria. Corpora autem Jasonis et Mauri collegit sancta Hilaria, relicta martyr, ubi dum assiduis orationibus vacaret, migravit ad Dominum. In oriente Mecrobi, Claudici et Felicis. In Nicomedia Ambici, Victoris et Julii. In Africa Claudii, Crispini, Maginae, Joannis, Stephani. In Pannonia sancti Agricolae.
1.12.4
EDITIO COLONIENSIS. DECEMBER. Habet dies XXXI, lunam XXIX. B. PRID. NON. DECEMB.
1.12.4
-- Romae natale sanctorum martyrum, Simphronii et Olympii, temporibus Valeriani et Gallieni imperatorum. Hic Simphronius traditur Olympio tribuno, ut ab eo facultates Nemesii requireret, sub poenarum examinatione: qui interrogatus a praefecto respondit: Si facultates quaeris Nemesii domini mei, jam eas tradidi Christianis pauperibus, quoniam ipsius erant; si autem sacrificium me offerre compellis, sacrifico Christo Jesu Deo meo sacrificium laudis. Iratus Olympius, fecit eum extendi in catasta et fustibus mactari, deinde simulacrum Martis aureum una cum tripoda deferri. Quod statim ad verba Simphronii liquefactum sicut lutum. Hoc videns Olympius cum uxore sua Exuperia, et filio Theodolo, prostraverunt se ad pedes Simphronii, agentes poenitentiam. Vocatusque beatus Stephanus papa, venit nocte ad domum Olympii, baptizavit eos, et omnes qui crediderunt in domo Olympii. Quod dum praedicti audirent imperatores, miserunt ut adducerentur. Simphronius namque adducitur ferreis vinculis onustus, nudusque ac capistratus, cum Olympio et uxore et filio. Gallienus dixit Olympio: Adhuc differo poenarum tibi inferre supplicia, quia de tua conscientia dubius sum. Olympius respondit: Ego quidem non feci quasi Olympius, sed quasi impius et crudelis: pro quibus poeniteo commissis, et effundo lacrymas in conspectu cui credo vivo et vero. Tunc data est sententia, ut igne consumerentur. Ducti sunt itaque ante statuam Solis, fixisque in terram stipitibus, ligatis manibus devincti sunt, ac in congerie sarmentorum spinarumque ignis est suppositus, statimque in ipso ignis initio gratias Christo decantantes emiserunt spiritum; quorum colligens sanctus Stephanus episcopus corpora sepelivit. Item Eracli, Christiani, Pudenti.
1.12.5
EDITIO COLONIENSIS. DECEMBER. Habet dies XXXI, lunam XXIX. C. NON. DECEMB.--
1.12.5
In Africa apud Coloniam Thebestinam natale sanctae Crispinae, quae tempore Diocletiani et Maximiani cum sacrificare nollet, jussu Anolini proconsulis decollata est. Item natale sancti Dalmatii martyris, et sanctorum Crispini, Felicis, Julii, Potamiae, Grati et aliorum septem, et Zeloti, Fortunati et Gatti.
1.12.6
EDITIO COLONIENSIS. DECEMBER. Habet dies XXXI, lunam XXIX. D. VIII IDUS DECEMB.
1.12.6
-- Natale sancti Nicolai Myrensis Ecclesiae metropolitani episcopi. Apud Africam sanctarum Dionysiae, Dativae, Leontis, Aemiliani medici, et religiosi viri nomine Tertii, Bonifacii, Servii, Victricis et Majorici adolescentis, qui omnes persecutione Vandalica sub Hunerico Ariano rege, pro confessione catholicae fidei, et ne ab Arianis rebaptizarentur, gravissimis et innumeris suppliciis excruciati, confessorum Christi numero sociari meruerunt; e quibus Majoricus cursum palmiferum in certamine consummavit
1.12.7
EDITIO COLONIENSIS. DECEMBER. Habet dies XXXI, lunam XXIX. E. VII IDUS DECEMB.
1.12.7
-- Apud Alexandriam beati Agathonis martyris. Qui cum esset militaris, et assisteret ubi beati martyres laniabantur, inter quos erat Julianus et Eunus in Domini Jesu Christi confessione perdurantes, et quosdam volentes etiam illudere mortuis cadaveribus martyrum, prohiberet, clamor adversus eum totius vulgi extollitur. Offertur judici fortissimus miles jam Domini, et nunquam se inferior factus in confessione persistens, capite pro pietate damnatur. Apud Sanctonas beati Martini abbatis, discipuli sancti Martini Turonicae urbis episcopi, qui in monasterio quod aedificavit, in pace quiescit. In Antiochia natale Polycarpi et Theodori. Eodem die octava sancti Andreae.
1.12.8
EDITIO COLONIENSIS. DECEMBER. Habet dies XXXI, lunam XXIX. F. VI IDUS DECEMB.
1.12.8
-- Conceptio sanctae Mariae perpetuae virginis. Romae natale sancti Eutychiani papae, qui rexit Ecclesiam annum unum, et sub Aureliano imperatore martyrio coronatus, sepultus est in coemeterio Callisti, qui et ipse per diversa loca trecentos quadraginta duos martyres manu sua sepelivit. Hic constituit fruges super altare tantum fabas et uvas benedici. Apud Alexandriam beati Macharii sub Decio, qui gente Pibycus, cum multis verbis a judice ad negandum suaderetur, et eo majore constantia fidem suam profiteretur, vivus ad ultimum jubetur exuri. In civitate Verona natale sancti Zenonis martyris.
1.12.9
EDITIO COLONIENSIS. DECEMBER. Habet dies XXXI, lunam XXIX. G. V IDUS DECEMB.
1.12.9
-- Natale sanctae Leocadiae virginis, quae tempore Diocletiani et Maximiani a praefecto Hispaniarum Daciano, apud Toletum dira carceris custodia macerata est. Ubi cum gravissimos beatae Eulaliae, et reliquorum martyrum, qui a Daciano interficiebantur, audisset cruciatus, genibus in oratione positis, impollutum Christo spiritum reddidit. Ipso die beati Cypriani abbatis Petragorici magnificae sanctitatis viri. In Africa natale Petri, Successi, Primitivi, Publicini et aliorum viginti. Treviris depositio sancti Eucharii episcopi et confessoris.
1.12.10
EDITIO COLONIENSIS. DECEMBER. Habet dies XXXI, lunam XXIX. A. IV IDUS DECEMB.
1.12.10
-- Romae sancti Melchiadis papae, qui sedit in episcopatu annos tres, sepultus est in coemeterio Callisti. Hic constituit ut die Dominico, aut feria quinta nullus jejunaret, quia ipsos dies pagani, quasi sacro jejunio celebrant. Et hic constituit, ut ex consecratu episcopi, oblationes propter haereticos per ecclesias dirigerentur. Apud Emeritam Hispaniae civitatem natale sanctae Eulaliae. Quae cum esset annorum tredecim, jussu Daciani praesidis, plurima tormenta perpessa, novissime in equuleo suspensa et exungulata, faculis ardentibus ex utroque latere appositis, hausto igne spiritum reddidit, et cernentibus Christianis in specie columbae niveae ejus anima coelum petiit. Cujus corpus per triduum jussu praesidis pependit in ligno. Sed cui non humana fuerant, divina sunt concessa munera. Nam nix desuper puellae corpus aspersit, ut quod ex utraque parte appositus ignis ardoris sui incendio conflagraverat, nivali candore coopertum divina gratia dealbaret. Sicque a Christianis reverenter ablata, et devotione debita sub sacro altari deposita, miraculorum gratia illustratur. Apud praefatam urbem passio sanctae Juliae, quae fuit convirginalis beatae Eulaliae, quaeque illi ad passionem properanti individua comes et sodalis adhaesit. Item apud Hispalim civitatem, sanctorum martyrum Carcophori presbyteri, et Abundii diaconi, qui persecutione Diocletiani, sub judice Martiano in confessione Christi primo fustibus crudelissime caesi sunt, deinde in carcerem, negato cibo et potu, retrusi; unde per angelum ducti, et verbum Dei praedicantes iterum tenti sunt, et ora ipsorum lapidibus contusa, rursumque equuleo torti, et post haec diu in carceri macerati, novissime gladio sunt percussi. Vienna sancti Sindulfi episcopi et confessoris.
1.12.11
EDITIO COLONIENSIS. DECEMBER. Habet dies XXXI, lunam XXIX. B. III IDUS DECEMB.
1.12.11
-- Danielis prophetae. Romae Damasi papae, qui rexit Ecclesiam annos decem et octo, menses tres, dies duos. Hic constituit ut Psalmi diu noctuque canerentur per omnes ecclesias. Hic multa corpora sanctorum requisivit, et invenit, quorum memoriam etiam versibus declaravit. Item Romae natale sanctorum martyrum Pontiani, Praetextati atque Tarsonis, qui potens et locuples de facultatibus suis cum esset Christianus, sanctis martyribus in carceribus et in metallis damnatis, victum ministrabat, per beatum Sisinium et Cyriacum, non post multo et ipse tentus a Maximiano palmam martyrii cum duobus aliis percipere meruit. In civitate Ambianis Galliae, sanctorum martyrum Victorici et Fusciani. In Hispania sancti Eutychii, cujus gesta habentur, et sancti Gentiani martyris.
1.12.12
EDITIO COLONIENSIS. DECEMBER. Habet dies XXXI, lunam XXIX. C. PRID. IDUS DECEMB.--
1.12.12
Sanctorum martyrum Hermogenis, Donati et aliorum viginti duorum. Apud Alexandriam beatorum martyrum Epimachi et Alexandri, qui multo tempore et magnis cruciatibus vinculorum et carceris torti, ignibus ad postremum consumi jubentur. Item sanctarum quatuor mulierum, Ammonariae, Mercuriae, Dionysiae; et item aliae Ammonariae, quae dum nimia constantia uterentur apud judicem, et ille erubesceret vinci a feminis, inauditis tormentorum generibus toleratis, finem omnium ferro caedente suscipiunt, gloriose apud Alexandriam sepultae.
1.12.13
EDITIO COLONIENSIS. DECEMBER. Habet dies XXXI, lunam XXIX. D. IDUS DECEMB.
1.12.13
-- Apud Syracusas Siciliae civitatem sanctae Luciae virginis et martyris, quae passa est persecutione Diocletiani et Maximiani sub Paschasio consulari. Haec nobilissima Syracusanorum, postquam omnia sua quae de parentibus ei remanserant, pauperibus, viduis, orphanis, peregrinis, et Deo servientibus distraxit, a sponso suo, quod esset Christiana, Paschasio delata, impellebatur ad sacrificandum daemonibus. Quae cum nullo modo consentiret, traditur lenonibus, ut populum ad castitatem ejus invitarent, et tandiu deluderetur, donec mortua nuntiaretur. Quam lenones nullatenus movere poterant. Tunc praecepit Paschasius ut ignem copiosum circa eam accenderent, et picem et resinam, et fervens oleum super eam jactarent; sed illa in nomine Domini stetit immobilis. Tandem gladio in gutture merso percussa, quandiu voluit turbam circumstantem allocuta est, nec omnino mortua est, donec venientibus sacerdotibus communionem dominici corporis et sanguinis acciperet; sepulta in loco in quo percussa est, basilica supra corpus ejus postmodum aedificata.
1.12.14
EDITIO COLONIENSIS. DECEMBER. Habet dies XXXI, lunam XXIX. E. XIX KALEND. JAN.
1.12.14
-- Apud Antiochiam sanctorum martyrum Drusi, Zosimi, Arsenii et Isidori atque Theodori. Apud Alexandriam beatorum martyrum Heronis, Dioscori, qui sub Deciana persecutione variis tormentis dilaniati, novissime ignibus sunt traditi. Item beati Lupicini Viennensis Ecclesiae octavi episcopi. Apud Cyprum natale sancti Spiridonis episcopi admirandae beatitudinis viri, qui unus fuit de illis confessoribus, quos Maximianus dextris oculis effossis, et sinistro poplite succisso, per metalla damnaverat, qui etiam propheticam vitam duxit. Lugduno Galliae sancti Viatoris episcopi. Rhemis Nicasii episcopi, et Eutropiae, Aspediae et Theodoli.
1.12.15
EDITIO COLONIENSIS. DECEMBER. Habet dies XXXI, lunam XXIX. F. XVIII KALEND. JAN.
1.12.15
-- Apud Africam sancti Valeriani episcopi et confessoris, qui tempore Vandalicae persecutionis cum ex praecepto Genserici regis Ariani ad tradendum divina mysteria vel libros arctarentur cuncti Domini sacerdotes, ita ut idem impii Ariani de ipsis palliis altaris camisias sibi et femoralia facerent, viriliter ne sacramenta divina traderet dimicans, extra civitatem singulariter expelli jussus est, et ita praeceptum, ut nullus eum neque in domo, neque in agro dimitteret habitare. Cumque esset annorum plusquam octoginta, in strata publica multo tempore jacuit nudus sub aere, sicque in confessione catholicae veritatis cursum beatae vitae implevit. Aurelianis beati Maximini presbyteri. In Africa natale Faustini, Lucii, Candidi, Caeliani, Marci, Januarii et Fortunati.
1.12.16
EDITIO COLONIENSIS. DECEMBER. Habet dies XXXI, lunam XXIX. G. XVII KALEND. JAN.
1.12.16
-- Martyrium trium virorum sanctorum Ananiae, Azariae et Misaelis. In Tuscia sanctae Barbarae virginis, quae tempore Maximiniani imperatoris passa est pro Christo. Haec primum a patre suo Dioscoro diu afflicta sub dira custodia, deinde tradita praesidi Marciano, et exspoliata, nervis taureis valde caesa et discerpta est, et cilicio plagae ejus defricatae; inde reclusa in carcerem, ubi luce divina consolata est. Deinde circa latera ejus lampades applicatae, et malleis caput ejus caesum, et mamillae ejus praecisae; deinde per plateas circumducta, et flagellis diutissime afflicta est, ad extremum vero gladio martyrium consummavit. Ravennae Valentini, Navalis, Agricolae, Concordi. Viennae beati Adonis episcopi. Eodem die translatio sanctorum martyrum Simplicii, Faustini et Beatricis.
1.12.17
EDITIO COLONIENSIS. DECEMBER. Habet dies XXXI, lunam XXIX. A. XVII KALEND. JAN.
1.12.17
-- Translatio sancti Ignatii martyris, qui tertius post Petrum apostolum Antiochenam rexit Ecclesiam. Apud urbem Romam passus, sed Antiochiae postmodum sepultus. Eodem die beati Lazari, quem Dominus suscitavit a mortuis, et beatae Marthae sororis ejus, quorum venerabilem memoriam exstructa ecclesia non longe a Bethania, ubi e vicino domus eorum fuit, conservat. In Oriente apud Eleutheropolim civitatem passio sanctorum martyrum quinquaginta, qui sub Saracenis passi sunt.
1.12.18
EDITIO COLONIENSIS. DECEMBER. Habet dies XXXI, lunam XXIX. B. XV KALEND. JAN.
1.12.18
-- Beatorum martyrum Rufi et Zozimi, qui de illis primis discipulis erant, per quos primitiva Ecclesia in Judaeis et Graecis fundata est. Hi requiescunt apud civitatem Macedoniam Philippis. Apud Africam natale sancti Moysitis martyris. Turonis sancti Gratiani episcopi, qui ad praefatam urbem ab urbe Roma transmissus, multis clarus virtutibus ibi quievit in pace. Laodicea civitate Theotini, Basiliani. In Africa Quinti, Simplicii.
1.12.19
EDITIO COLONIENSIS. DECEMBER. Habet dies XXXI, lunam XXIX. C. XIV KALEND. JAN.--
1.12.19
Apud Aegyptum beati Nemesii martyris, qui primo per calumniam quasi latro judici delatus est Aemiliano. Quo crimine absoluto, postea quod Christianus esset, defertur. In hoc vero nulla a judice miseratio reservatur, sed geminatis suppliciis excruciatum cum latronibus jussit incendi, ignorans quod crudelitate sua optimo martyri similitudinem Salvatoris detulit, qui pro salute humani generis una cum latronibus pertulit crucem. Aurelianis sancti Viti abbatis, qui spiritu prophetiae illustris fuit. In Nicomedia Cyriaci, et Palili, Secundi, Anastasii, ac Syddimi episcoporum, et Gregorii papae.
1.12.20
EDITIO COLONIENSIS. DECEMBER. Habet dies XXXI, lunam XXIX. D. XIII KAL. JAN.
1.12.20
-- Beatorum martyrum Ammonis, Zenonis, Ptolomaei, Ingenii et Theophili, qui tribunalibus apud Alexandriam astantes, cum quidam Christianus a judice torqueretur, et jam pene ad negandum suaderetur, disrumpebantur intra semetipsos, et vultu, oculis ac nutibus velut erigere conabantur illum qui in suppliciis positus trepidabat. Interdum etiam manus protendere, ac totius reliqui corporis motibus et habitu diverse inclinati, tanquam sublevare lapsantis animos gestiebant. Conversi vero ad eos omnes, et quid de semetipsis profiterentur, ex eorum motibus agnoscentes, prius pene quam in eos vulgus clamoribus insiliret, ipsi in medium prorumpunt, ac se Christianos esse testantur. Per quorum victoriam gloriosissime Christus de inimico triumphavit. Romae Zefenni episcopi, sanctorumque Liberati et Bajuli. Et vigilia sancti Thomae apostoli.
1.12.21
EDITIO COLONIENSIS. DECEMBER. Habet dies XXXI, lunam XXIX. E. XII KALEND. JAN.
1.12.21
-- Natale beati Thomae apostoli, qui Parthis et Medis Evangelium praedicans, passus est in India. Corpus ejus in civitatem, quam Syri Edessen vocant, translatum, ibique digno honore conditum est. Catalaunis sancti Maximi episcopi, primi illi civitati ab urbe Roma directi, qui inter alia innumera miracula mortuum suscitavit. In Tuscia natale sanctorum Joannis et Festi.
1.12.22
EDITIO COLONIENSIS. DECEMBER. Habet dies XXXI, lunam XXIX. F. XI KALEND. JAN.
1.12.22
-- Romae via Lavicana inter duas lauros, natale triginta martyrum, qui omnes una die persecutione Diocletiani coronati sunt. Apud Alexandriam beati Chiridonis martyris. Is namque cum rem cujusdam potentis sub mercede procuraret, jubetur ab eo idolis immolare. Recusans cogebatur injuriis; persistens rursum blanditiis mulcebatur. Cum vero utrumque contemneret, praeacuta sude validissima transverberatur per media viscera, et neci traditur. Ipsos die aliorum quamplurimorum martyrum, qui in desertis et montibus apud Aegyptum oberrantes, fame, siti, frigore, languore, latronibus, bestiisque consumpti sunt, qui omnes imitati electos Dei prophetas, gloria martyrii coronati sunt. Inter quos et venerandus senex Cheremon. Hic episcopus urbis Aegypti, quae dicitur Nicopolis, cum ad Arabicum montem una cum grandaeva conjuge discessisset, nulli ultra apparuit. Romae depositio sancti Felicis episcopi. In Antiochia natale sancti Basilei, et alibi passio Theodosiae virginis, et Didymi monachi.
1.12.23
EDITIO COLONIENSIS. DECEMBER. Habet dies XXXI, lunam XXIX. G. X. KALEND. JAN.
1.12.23
-- Romae natale sanctae Victoriae virginis, persecutione Decii imperatoris. Quae cum esset desponsata viro pagano Eugenio, et nec nubere vellet, nec sacrificare, propter draconem pestiferum de illis locis expulsum, et alia facta miracula, et propter virgines quas ad serviendum Domino aggregaverat, percussa est gladio in corde a carnifice Thaliarcho. Corpus ejus cum omni reverentia curatum est. Apud Nicomediam sanctorum martyrum viginti, quos Diocletiana persecutio gravissimis tormentis martyres Christo fecit. Item Romae beati Servuli, cujus beatus meminit Gregorius in homeliis. In alio loco Evaristi, Victoris et aliorum octingentorum triginta duorum.
1.12.24
EDITIO COLONIENSIS. DECEMBER. Habet dies XXXI, lunam XXIX. A. IX KALEND. JAN.
1.12.24
-- Vigilia Domini nostri Jesu Christi. Apud Antiochiam Syriae sanctarum virginum quadraginta, quae persecutione Deciana per diversa tormenta martyrium consummaverunt. Eodem die sancti Gregorii presbyteri et martyris: apud Spoletum, tempore Diocletiani et Maximiani imperatorum, sub judice Flacco. Qui dum perseveranter in fide maneret, fustibus nodosis dorsum ejus verberatum rumpitur, rigiratus venter ejus dissipatur, inde ligatus manus et pedes in craticula superponitur, lignis suppositis. Continuo terraemotu facto, cecidit una regio in civitate Spoletana, et oppressit plusquam trecentos idolis servientes. Post ferro constrictus, sub custodia militum in carcerem truditur, ubi angelica visitatione consolatur. Eductus e carcere carduis ferreis genua illius percussa sunt: sed et ardentibus lampadibus latera ejus incensa, dicente beato martyre judici impio: Si totum corpus meum perdas, praesto est Dominus meus Jesus Christus, qui me sanat et corroborat. Tunc Flaccus jussit Tircano cuidam, ut beatum Gregorium tractum in amphitheatrum decollaret. Quo facto jussit Tircanus feras terribiles dimitti, ut corpus sancti martyris absorberent, sed nulla earum corpus sanctum attigit. Quaedam autem mulier Abundantia nomine, petiit corpus sancti martyris; sed quia aliter obtinere non potuit, datis triginta quinque aureis Tircano, corpus recepit et, ut decuit, martyrem sepelivit juxta pontem lapideum. In Thropoli civitate, sancti Luciani, Metrobi, Pauli, Zenoti, Theutini, Drusi.
1.12.25
EDITIO COLONIENSIS. DECEMBER. Habet dies XXXI, lunam XXIX. B. VIII KALEND. JAN.
1.12.25
-- JESUS CHRISTUS FILIUS DEI IN BETHLEEM JUDAEAE NASCITUR, ANNO CAESARIS AUGUSTI OCTAVIANI QUADRAGESIMOSECUNDO, OLYMPIADIS VERO CENTESIMAE NONAGESIMAE TERTIO ANNO, AB URBE AUTEM CONDITA SEPTINGENTESIMO QUINQUAGESIMO SECUNDO, compressis cunctarum per orbem terrae gentium motibus, et firmissima pace ordinatione Dei a Caesare Augusto Octaviano composita, quando Cyrenius ex consilio senatus, in Judaeam missus, census hominum possessionumque describebat, sextam mundi aetatem suo piissimo consecravit adventu. Eodem die natale sanctae Anastasiae, quae tempore Diocletiani primo durissimam et immitem custodiam a viro suo Publio perpessa, in qua tamen a Chrysogono confessore Christi multum consolata et confortata est, deinde a praefecto Illyrico in gravissima, atque diutina custodia macerata est, in qua duobus mensibus refecta est coelestibus escis per sanctam Theodoram, quae martyrium prius passa est. Deinde navi imposita cum ducentis viris, et quingentis feminis, ut demergerentur in mare; sed perlata est ad insulas Palmarias, ubi per manus et pedes extensa, et ligata ad palos fixos, et circa medium ejus ignis accensus, in quo martyrium consummavit, et omnes qui cum illa venerant, variis interfectionibus martyrium celebrarunt. Inter quos omnes unus erat innocentissimae naturae, nomine Eutychianus. Qui sublatis sibi, cum dives esset, omnibus facultatibus, tacuit nihil cogitans, nihilque metuens nisi hoc, ne facultates ac divitias fidei perderet. Quotiescunque fuisset auditus, quotiescunque interrogatus, nihil aliud dicebat: Christum mihi non tollit, etiam qui caput abstulerit. Tunc Apollonia Christiana matrona tollens corpus beatae Anastasiae, exosculabatur, et aromatibus et linteaminibus mundis obvolvens, intra viridarium domus suae fabricata basilica, ut decuit, martyrem sepelivit. Ipso die Romae in coemeterio Aproniani passio sanctae Eugeniae virginis, quae tempore Gallieni imperatoris post multa insignia virtutum, et sacros virginum choros, quos Christo Domino aggregaverat, sub Nycetio urbis praefecto alligato saxo, et praecipitata in Tiberim, sed mergi non potuit. Inde thermis ignitis inclusa, illaesa reperta est, novissime in die natalis Domini sicut ipse Salvator ei ante revelavit, per spiculatorem in custodia gladio jugulatur. Et sublatum est corpus ejus a Christianis, et positum non longe ab urbe via Latina, in praedio ejus proprio, ubi multorum ipsa sepelierat membra.
1.12.26
EDITIO COLONIENSIS. DECEMBER. Habet dies XXXI, lunam XXIX. C. VII KALEND. JAN.--
1.12.26
In oppido Jerosolymitano Caphargamala passio sancti Stephani protomartyris Christi, qui non multo post ascensionem Domini ab apostolis diaconus ordinatus est. Scribit beatus Lucas evangelista ejus passionem in Actibus apostolorum. Eodem die sancti Ignatii, Rufi et Zosimi papae, qui sedit Romae annum unum. Hic constituit ut diaconus laevam tegeret palliis, et praecepit ut nullus clericus poculum in publico propinaret, nisi tantum in cellis fidelium et clericorum. De quorum agone felici, sanctus Polycarpus in epistola ad Philippenses scribit, dicens:« Deprecor autem omnes vos obedientiae dare operam, ac meditari patientiam, quam vidistis in Ignatio, et Rufo, et Zosimo beatis viris, scientes quod hi non in vacuum, sed per fidem et justitiam cucurrerunt, donec venirent ad locum sibi a Domino praeparatum, quoniam quidem passionum ejus participes exstiterunt; nec dilexerunt praesens saeculum, sed Christum, qui pro ipsis et pro omnibus mortuus est, et resurrexit.»
1.12.27
EDITIO COLONIENSIS. DECEMBER. Habet dies XXXI, lunam XXIX. D. VI KAL. JAN.
1.12.27
-- Natale beati Joannis evangelistae, quem Dominus Jesus amavit plurimum; qui secundam post Neronem persecutionem movente Domitiano, posteaquam in oleo ignito demersus nihil passus est, in Pathmum insulam relegatus vidit Apocalypsim. Interfecto autem Domitiano, et actis ejus ob nimiam crudelitatem rescissis a senatu, sub Pertinace principe rediit Ephesum: et quia concussam se absente per haereticos vidit Ecclesiae fidem, confestim hanc descriptam in Evangelio suo Verbi Dei aeternitatem stabilivit. Rogatus siquidem ab Asiae episcopis adversus Cerinthum, aliosque haereticos, et maxime contra Ebionitarum tunc dogma surgens, qui asserunt Christum ante Mariam non fuisse, unde compulsus est scribendi Evangelii sanctum opus suscipere. Ipse autem usque ad Trajani principis tempora perseverans, totas Asiae fundavit, rexitque Ecclesias, et confectus senio sexagesimo octavo post passionem Domini anno, aetatis autem suae nonagesimo nono mortuus, juxta eamdem urbem est sepultus. Romae Dionysii papae, qui sedit in episcopatu annos sex; sepultus via Appia, in coemeterio Callisti. Hic Ecclesias presbyteris dedit, et parochias dioecesis dedit, atque constituit. Et episcopatus sancti Jacobi fratris Domini, qui ab apostolis primus ex Judaeis est ordinatus Jerosolymis.
1.12.28
EDITIO COLONIENSIS. DECEMBER. Habet dies XXXI, lunam XXIX. E. V KAL. JAN.
1.12.28
-- Bethlehem Judaeae natale sanctorum Innocentum, quos Herodes cum Christi nativitatem magorum indicio cognovisset, tricesimo quinto anno regni sui interfici jussit, qui anno tricesimo sexto morbo intercutis aquae, et scatentibus toto corpore vermibus, miserabiliter et digne mortuus.
1.12.29
EDITIO COLONIENSIS. DECEMBER. Habet dies XXXI, lunam XXIX. F. VI KAL. JAN.
1.12.29
-- David regis. Item apud Arelaten natale sancti Trophimi episcopi et confessoris, discipuli apostolorum Petri et Pauli. Eodem die sancti Crescentii apostoli Pauli discipuli, Viennensis Ecclesiae primi doctoris. In Africa natale Domini, Victoris, Primiani, Lybosi episcopi. Romae Callisti, Felicis et Bonifacii episcopi in coemeterio Callisti. Eodem die sancti Thomae archiepiscopi et martyris Cantuariensis.
1.12.30
EDITIO COLONIENSIS. DECEMBER. Habet dies XXXI, lunam XXIX. G. III KAL. JAN.
1.12.30
-- Apud Spoletum passio sancti Sabini episcopi, Exuperantii et Marcelli diaconorum, et Venustiani cum uxore ac filiis, sub Maximiano Augusto. Qui beatus Sabinus cum esset in omnibus divinis instructionibus clarus, tentus est a praeside Tusciae Venustiano, cum duobus diaconibus Exuperantio et Marcello, et multis clericis. Cui Venustianus deum Jovem suum, quem habebat in cubiculo ex lapide mire formatum, vestimentis aureis ad adorandum obtulit. Quem beatus Sabinus in manibus acceptum, facta oratione continuo elisit in pavimento, et confregit. Quod factum videns Venustianus, cum furore jussit ut praeciderentur ei manus, et in conspectu ejus Marcellum et Exuperantium equuleo suspendi, ac fustibus caedi, et unguibus radi latera eorum, ignem etiam supponi. Hoc facto in confessione Domini spiritum emiserunt. Sabinum vero episcopum jussit retrudi in carcerem. Audientes autem quidam piscator et presbyter, collegerunt corpora sanctorum, et sepelierunt juxta viam pridie Kalendas Januarii. Serena vero Christiana vidua curam habens sancti Sabini episcopi, adduxit in carcerem nepotem suum Priscianum, qui erat caecus. Tunc sanctus Sabinus truncas manus super oculos ejus posuit, et illuminavit. Videntes autem qui in custodia erant, miserunt se ad pedes ejus, numero undecim, et baptizati sunt. Quod cum nuntiatum esset Venustiano praesidi, indoluerant oculi ejus, et prae dolore neque cibum, neque potum, neque somnum capere poterat, misitque uxorem suam, et duos filios, ut adducerent beatum Sabinum ad domum ejus de carcere. Adductus itaque prostravit se ad pedes ejus Venustianus cum fletu, uxorque ac filii agentes poenitentiam, et rogantes se baptizari. Mox baptizatus ut de pelvi levatus est, nullum dolorem sensit oculorum: nuntiatum est autem hoc Maximiano, qui iratus praecepit Sabinum damnari, et ipsum Venustianum capite truncari. Veniens autem Lucius tribunus, sine auditione beatum Venustianum cum uxore et filiis necavit, in civitate Assisina; Sabinum vero episcopum adduxit in civitatem Spoletum, et tandiu praecepit caedi, donec deficeret. Cujus corpus collegit venerabilis Serena, quae manus ejus in dolio vitreo cum aromatibus condiverat, et infra domum suam posuerat, sepelivitque eum a civitate Spoletana milliario plus minus uno, sub die septimo Idus Decembris. Festivitas tamen ejus et supra nominatorum martyrum, tertio Kalendas Januarii agitur.
1.12.31
EDITIO COLONIENSIS. DECEMBER. Habet dies XXXI, lunam XXIX. A. PRID. KAL. JAN.
1.12.31
-- Romae natale Sylvestri papae et confessoris, qui post beatum Petrum tricesimus quintus sedit annos viginti quatuor, menses decem, dies undecim. Cujus industria synodus praeclarissima toto orbe terrarum trecentorum decem et octo Patrum, apud Nicaeam urbem Bithyniae celebratur, sub consulatu Constantini Augusti, et Licinii, tertio decimo Kalendarum Juliarum. Julii tamen papae tempore consummatur, et constituit ut nullus clericus propter causam quamlibet in curiam introiret, nec ante judicem causam diceret, nisi ut Ecclesiae et altaris sacrificium in sindone lintea celebraret. Fecit autem ordinationes sex mense Decembri, presbyteros quadraginta duos, diaconos viginti quinque, episcopos per diversa loca sexaginta quinque. Sepultus est in coemeterio Priscillae, via Salaria. Hic constituit chrisma ab episcopo confici, et ut baptizatum liniat presbyter. Et constituit ut nullus laicus crimen audeat inferre de clerico, et dalmaticas in ecclesia, ut eorum laeva tegeretur, scilicet, diaconorum. Senonis sanctae Columbae virginis sub Aureliano imperatore, quae superato igne gladio caesa est. Item Senonis beatorum Sabini et Potentiani, qui a beatis apostolis ad praedicandum directi, praefatam urbem martyrii sui confessione illustrem fecerunt.