Sacramenta Romanae Ecclesiae
Choose a text
id="mobileReaderAuthor" class="mobile-reader-author" href="/authors/leo-i440-461" aria-label="More works by Leo I">
—
⋯
Original / primary: 7641 Saroec
10.1
XVII. MENSE JULIO. VI IDUUM JULIARUM. Natale sanctorum martyrum Felicis, Philippi, in coemeterio Priscillae. Vitalis, et Martialis, et Alexandri, in coemeterio Jordanorum. Et Silani, in coemeterio Maximi, via Salaria. Et Januarii, in coemeterio Praetextati, via Appia.
10.1
Exaudi, Domine, preces nostras, et intervenientibus sanctis tuis, preces nostras placatus admitte. Per, etc.
10.2
Suscipe, Domine, propitius oblationes nostras, et tuorum deprecatione sanctorum, pietati tuae perfice benignus acceptas. Per, etc.
10.3
Item alia.-- Beatorum martyrum tuorum nos, Domine, precibus et intercessione defende; ut qui nostrae conscientiae fiduciam non habemus, placentium tibi meritis protegamur. Per, etc.
10.4
Suscipe, quaesumus, Domine, tuorum munera famulorum, quae intercedentibus sanctis tuis, prosint nobis et ad piae devotionis officium, et ad tuae sanctificationis effectum. Per, etc.
10.5
Repleti, Domine, benedictione coelesti, sanctorum tuorum concede suffragiis, ut quae humiliter gerimus, salubriter sentiamus. Per, etc.
10.6
49 Item alia.-- Deus, qui nos sanctorum tuorum et solemnitate laetificas, et imitatione suscitas ad profectum, praesta ut quos veneramur officio, etiam piae conversationis sequamur exemplo, etc.
10.7
In jejunio.
10.1
-- Sint tibi, quaesumus, Domine, nostri munera grata jejunii, quia tunc eadem in sanctorum tuorum digna commemoratione deferimus, si et actus illorum pariter subsequamur. Per, etc.
10.8
Vere dignum. Quia tu es mirabilis in omnibus sanctis tuis, quos et nominis tui confessione praeclaros et suscepta pro te fecisti passione gloriosos. Unde sicut illi jejunando orandoque certarunt ut hanc possent obtinere victoriam, ita nos potius quae exercuere sectantes, convenientius eorum Natalitia celebramus. Per, etc.
10.9
Repleti, Domine, munificentia gratiae tuae, benedictione copiosa, et pro nostrae servitutis obsequiis, et pro celebritate sanctorum, coelestia dona sumentes, gratias tibi referimus. Per, etc.
10.10
Familiam tuam, Domine, supplicantem oculis tuae miserationis intende; ut quae, te inspirante, deposcit, sanctorum martyrum patrocinio consequatur. Per, etc.
10.2.1
Item alia.-- Protector noster aspice, Deus, et misericordiam tuam humiliter implorantes clementer exaudi. Per, etc.
10.2.2
Ad humilitatis nostrae preces, Domine, placatus intende; nec nos in foveas et diaboli laqueos patiaris incidere, quos tantis sanctorum martyrum praesidiis munire dignaris. Per, etc.
10.2.3
Omnipotens et misericors Deus, qui nos sacramentorum tuorum et participes efficis et ministros, praesta, quaesumus, ut in iisdem proficiamus et fidei consortio, et digno servitio. Per, etc.
10.2.4
Vere dignum. Qui nos ideo frequentibus sanctorum martyrum festivitatibus benignus exerces, ut ad constantiam fidei et ad perseverantiam pietatis beata commemoratione perducas, pariter nobis in eorum contemplatione constituens et salutiferae confessionis exemplum, et copiosae protectionis auxilium; atque ad spem nostrae per eos promissionis invitans, quorum adhuc latentem gloriam jam tamen etiam in hujus vitae regione manifestas. Per, etc.
10.2.5
50 Domine Deus noster, multiplica super nos gratiam tuam, et quorum celebramus gloriosa certamina, tribue subsequi in sancta professione victoriam. Per, etc.
10.2.6
Erudi, Domine, quaesumus, populum tuum spiritalibus instrumentis, et quorum praestas solemnia venerari, fac eorum et consideratione devotum, et defensione securum. Per, etc.
10.3.1
Item alia.-- Praesta nobis, omnipotens et misericors Deus, ut sanctorum martyrum tuorum copiosa victoria, sicut eis perpetuum dat triumphum, ita nobis continuum praestet auxilium. Per, etc.
10.3.2
Accipe, quaesumus, Domine, munera populi tui pro martyrum festivitate sanctorum; et sincero nos corde fac eorum Natalitiis interesse. Per, etc.
10.3.3
Vere dignum. Quia licet in omnium sanctorum tuorum tu sis, Domine, provectione mirabilis, in his tamen speciale tuum munus agnoscimus, quos et fratres sorte nascendi, et magnifica praestitisti passione germanos; ut simul esset et veneranda gloria genitricis et florentissima proles Ecclesiae. Per, etc.
10.3.4
Coelesti munere satiati, quaesumus, Domine Deus noster, ut haec nos dona martyrum tuorum deprecatione sanctificent. Per, etc.
10.4.1
Item alia.-- Da nobis, quaesumus, Domine, sanctorum martyrum passionibus gloriari; ut eorum semper et patrociniis confidamus, et fidem congrua devotione sectemur. Per, etc.
10.4.2
Offerimus, Domine, munera tuorum tibi solemnitatibus grata sanctorum, suppliciter exorantes ut quod ad illorum pertinet gloriam, nobis prosit ad veniam. Per, etc.
10.4.3
Vere dignum. Qui sic tribuis, Ecclesiam tuam sanctorum martyrum commemoratione proficere, ut eam semper illorum et festivitate laetifices, et exemplo piae confessionis exerceas, et grata tibi supplicatione tuearis. Per, etc.
10.4.4
Et sanctorum tuorum exsultatione gaudentes, et sacramenti tui perceptione satiati, gratias tibi referimus, Domine sancte, Pater omnipotens, aeterne Deus. Per, etc.
10.5.1
Item alia.-- Omnipotens sempiterne Deus, qui in sanctis tuis es ubique mirabilis, quaesumus clementiam 51 tuam, ut sicut illis eminentem gloriam contulisti, sic ad consequendas misericordias tuas eorum nos facias precibus adjuvari. Per, etc.
10.5.2
Plebis tuae munera, quaesumus, Domine, propitiatus intende; et quae sanctis mysteriis exsequendis temporaliter nos offerre docuisti, ad aeternam nobis proficere fac salutem. Per, etc.
10.5.3
Vere dignum. Qui non solum pro salute mundi persecutionem sustinuit impiorum, sed fidelibus suis etiam haec dona concessit, ut ejus fierent aut passione aut confessione consortes. Per, etc.
10.6.1
Item alia.-- Omnipotens sempiterne Deus, qui inter innumera beneficia, sanctorum tuorum nos solemnitatibus praecipue consolaris, praesta, quaesumus, ut ad coelestis operis instituta, et recordatio beata nos incitet, et oratio justorum digna perducat. Per, etc.
10.6.2
Concede, quaesumus, Domine Deus noster, ut inter adversa quae peccatorum debitis sustinemus, quod fiducia nostra non obtinet, martyrum tuorum nobis intercessio consequatur. Per, etc.
10.6.3
Sanctis intervenientibus, Domine, tibi servitus nostra complaceat, et obsequia munerum fiant praesidia devotorum. Per, etc.
10.6.4
Vere dignum. Quoniam martyrum beatorum pro confessione nominis tui venerabilis sanguis effusus, sicut tua mirabilia manifestat, qui perficis in infirmitate virtutem, ita nostris studiis dat profectum, et infirmis apud te praestat auxilium. Per, etc.
10.7.1
Item alia.-- Aspice, quaesumus, Domine, quae oculis tuae majestatis offerimus, ut tuorum deprecatione sanctorum et tuitionem nobis praebeant et medelam. Per, etc.
10.7.2
Vere dignum. Congaudet namque totum corpus Ecclesiae de sublimium glorificatione membrorum, et quaelibet ejus infirmae portiones 52 ad suam quoque pertinere non ambigunt dignitatem quidquid excellit partium in eadem compage magnarum: quia sicut superioribus ima connexa sunt, ita summa debent humilibus unitatis effectum. Per, etc.