Reader

XII. IN DEDICATIONE TEMPLI.

Haec prosa uniformem servat rhythmicae menturae legem. In singulis siquidem versibus quatuor habet clausulas rhythmicas, quarum tres primae consimilem inter se habent syllabarum desinentiam, et unaquaeque earum decem complectitur syllabas, penultimamque brevem. Quarta vero clausula( quae semper versum terminat) quatuor tantum continet syllabas, neque certam quantitatis regulam in penultima, neque responsum in exitu syllabarum ad aliam clausulam observans. Auctor ejus, Adam de Sancto Victore. In ea vero dulce canit epithalamium, carmenque nuptiale desponsationis Christi sponsi, et Ecclesiae suae sponsae, quam proprio acquisivit sanguine, ut esset sancta, et immaculata in conspectu ejus, neque maculam habens, neque rugam. Ostenditur item Ecclesia multis antiqui Testamenti figuris esse praesignata, quae mirabilem ejus dignitatem, fecunditatem et ornatum praemonstrarunt, sed mirabilius ea omnia in ipsa esse completa, secundum mysticum sensum dignoscuntur. Jerusalem et Sion filiae: Coetus omnis fidelis curiae: Melos pangat jugis laetitiae. Haleulia.

Christus enim desponsat hodie Matrem nostram norma justitiae, Quam de lacu traxit miseriae Ecclesiam.

In Spiritus sancti clementia; Sponsa sponsi laetatur gratia. A reginis laudis cum gloria Felix dicta.

Dos ut datur, crescit laetitia. Quae dos, quanta? triplex potentia Tangens coelum, terram, et stygia Judicia.

Mira loquor et sana credere. Foederatam tam largo munere: De proprio produxit latere Deus homo.

Formaretur ut sic Ecclesia, Figuratur in pari gloria. Adae costis formata femina: Hostis Eva.

Eva fuit noverca posteris: Haec est mater electi generis. Vitae portus, asylum miseris Et tutela.

Pulchra, potens, partu mirabilis: Ut luna, sol fulget spectabilis. Plus acie multo terribilis Ordinata.

Multiplex est, singularis, una. Generalis et individua. Omnis aevi sexus simul una Parit turmas.

Haec signata Jordanis fluctibus. Haec quae venit a terrae finibus: Scientiam audire cominus Salomonis.

Haec typicis descripta sensibus: Nuptiarum induta vestibus: Coeli praeest hodie civibus Christo juncta.

O solemnis festum laetitiae, Quo unitur Christus Ecclesiae. In quo nostrae salutis nuptiae Celebrantur.

Coetus felix, dulce convivium: Lapsis ubi datur solatium, Desperatis offertur spatium Respirandi.

Justis inde solvuntur praemia. Angelorum novantur gaudia. Lata nimis quod facit gratia Charitatis.

Ab aeterno fons sapientiae Intuitu solius gratiae. Sic praevidit in rerum serie Haec futura.

Christus ergo nos suis nuptiis Recreatos veris deliciis. Interesse faciat sociis Electorum. Amen.