Reader

Ut supra. Ascendit Deus in jubilo. Regnabit Deus super gentes.

94 Oratio. Quid est homo, Domine, quod memor es ejus? aut cur es tu filius hominis, nisi ut eum, ne in perpetuum periret, redimeres? Da ergo nobis auxilium necessarium, qui dedisti pro nobis sanguinem pretiosum; et praesta, ut quos mors tua redimit, eorum te vita glorificet.

Secundum nomen tuum, Deus. Exaudivit de templo sancto suo vocem meam. Psallite Deo nostro, quoniam rex omnis terrae Deus.

Oratio. Admirabile nomen tuum, omnipotens Domine, supplices exoramus, ut qui omnem creaturam mundi ad usus hominum subjecisti, nos ad tuae servitutis officium dignos digneris efficere. Per.

Item Oratio. Exaudi, Domine, sancte Pater omnipotens aeterne Deus; orationes nostras, quas pietati tuae fundimus in memoriam sacrae incarnationis, nativitatis, passionis, resurrectionis, ascensionis Domini nostri Jesu Christi, qui pro nobis incarnari, nasci, mori, resurgere, coelosque ascendere, nostram sua virtute captivitatem ducens captivam, dignatus est; ejus gubernatione, protectione, misericordia, a cunctis muniamur diabolicae fraudis insidiis, qui tecum vivit in unitate Spiritus sancti per immortalia saecula saeculorum.

FERIA ITEM VI ORATIO SANCTI CYPRIANI MARTYRIS.

Domine sancte Pater agios, ad te levavi animam meam. Deus meus, quis enim major te? Tibi gratias et laudem refero. Deus Abraham, Deus Isaac, Deus Jacob, Deus patrum nostrorum, Deus apostolorum, Deus prophetarum, Deus martyrum; qui es, et qui fuisti ante mundi constitutionem. Deus vivorum, venturus judicare vivos et mortuos, qui es Deus verax, qui sedes super cherubim, et prospicis abyssos: qui vides cuncta, priusquam nascantur, qui habes potestatem occidere, et rursum restituere; qui habes potestatem de arido viridem facere. Tu omnium Deus dominator, libera me ab hoc saeculo. Exaudi me orantem, sicut exaudisti filios Israel de terra Aegypti, et non tibi crediderunt, nec famulo tuo Moysi. Vae peccatis meis! cum te levaveris confringere terram, sub quam fissuram petrarum me absconsurus sum ante virtutem tuam? Cui monti dicturus sum, cade super me: et cui colli, tege me ante metum Domini, cum te levaveris confringere terram? Rogo, Domine, subveni mihi, et noli secundum actum meum me judicare: nihil enim in praeceptis tuis paravi. Exaudi me rogantem. Sicut exaudisti Jonam de ventre ceti, sic exaudias me et ejicias me de morte ad vitam. Sicut Ninivitae induerunt cinerem et cilicium, et poenitentiam egerunt, ita et ego exhomogesin faciens ante conspectum tuum pro universis peccatis meis, qui es amator poenitentiae, miserere mei. Sed et David dicit: Domine, propter nomen tuum dele peccatum meum; et ego deprecans majestatem tuam: dele universa peccata mea. Exaudi me orantem sicut exaudisti tres pueros de camino ignis, Ananiam, Azariam, Misael: et misisti angelum tuum cum nimbo roris. Confusus est Nabuchodonosor praepositus regni, quoniam tu es Rex regnantium, et Dominus dominantium, qui solus habes immortalitatem, et lucem inaccessibilem, quem nemo hominum videt, nec videre potest. Exaudi me orantem, sicut exaudisti Danielem de lacu leonum, et misisti Habacuc prophetam, et attulit ei prandium, et dixit: Prande prandium quod tibi misit Dominus, Et dixit Daniel: Non relinquit Dominus quaerentes se. Exaudi me orantem, sicut exaudisti Tobiam et Saram, dum orarent in atrio domus suae: tunc obtulit pro eis Raphael angelus orationem eorum; sic exaudias preces meas, et admittas ad aulam sanctam tuam orationes meas: et continenter mittas angelum tuum, qui deleat universa commissa mea, sicut delesti spiritum immundum a Sara, filia Raguel. Illumines cor meum, sicut illuminasti oculos Tobiae. Exaudi me orantem, sicut exaudisti Susannam, et liberasti eam de manibus seniorum, sic et me liberes ab hoc saeculo, quia tu es amator purae conscientiae. Exaudi me orantem, sicut exaudisti Ezechiam regem Judae, et delesti ab eo infirmitatem carnis; sic et a me auferas infirmitatem corporis et animae, et augeas mihi fidem, sicut auxisti illi annos XV ad vitam. Liberes me de medio saeculi hujus, sicut liberasti Theclam de medio 95 amphitheatro; sic liberes me de omni infirmitate carnis. Te deprecor, Pater, qui in fine temporum commemoratus es nostri, mittens nobis Jesum Christum Filium tuum Dominum Salvatorem nostrum, natum ex Maria virgine de Spiritu sancto, annuntiante Gabriel angelo, per quem nos liberasti de periculo mortis imminentis. Et te deprecor, Fili Dei viventis, qui fecisti magnalia in Cana Galilaeae, de aqua vinum fecisti propter Israel: qui caecis oculos aperuisti, qui surdum audire fecisti, qui paralyticos ad sua membra revocasti, linguas blesorum daemonio vexante sanasti, claudos currere fecisti velut cervos, mulierem profluxu sanguinis liberasti, mortuos suscitasti, super aquam pedibus ambulasti: qui mare fundasti, et terminos ei imposuisti in tua virtute. Te deprecor, Fili Dei vivi, propter universa commissa mea, qui es in coelis Filius in Patre, Pater in te sempiterno; qui sedes super cherubim et seraphim, sedem honoris tui. Tibi assistunt angeli, numerus inaestimabilis, timentes et paventes honorem et virtutem tuam, clamantes voce magna, et dicentes: Sanctus, sanctus, sanctus Dominus, Deus Sabaoth. Tu ipse nobiscum testamentum fecisti, et paulo post dixisti: Petite et accipietis, quaerite et invenietis, pulsate et aperietur vobis. Quodcunque a Patre meo petieritis in nomine meo, accipietis. Ego Patrem peto, ut accipiam; ego quaero, ut inveniam; ego pulso, ut aperiatur mihi. Ego in tuo nomine peto, ut tu Patrem petas, et detur mihi venia. Paratus sum propter nomen tuum victimam sanguinis fundere, et quodcunque tormentum sustinere. Tu es adjutor meus, defensor meus, defende ab adversario animam meam. Angelus tuus lucis protegat me, quoniam tu dixisti: Quod credentes petieritis per orationem, dabitur vobis. Omnis homo mendax; tu solus verax. Sicut tu repromisisti, potestatem habes dare. Domine, revela mihi sacramentum tuum coeleste, ut dignus sim faciem sanctorum tuorum videre. Spiritus sanctus in me operetur voluntatem tuam, quam tibi spopondi omnibus diebus vitae meae. Qui passus es sub Pontio Pilato bonam confessionem. Crucifixus es, descendisti, et conculcasti aculeum mortis. Qui dixisti, ubi es mors, quae regnabas? Ubi es, aculeus mortis? Victa es mors, devictus inimicus diabolus. Tu resurrexisti a mortuis, et apparuisti apostolis tuis. Ascendisti ad coelos, sedes ad dexteram Patris, venturus judicare vivos et mortuos. Qui nostri dominaris, libera me de manu quaerentis animam meam. Per nomen sanctum tuum deprecor, libera me ab adversarii parte, ut operam des vincendi inimicum meum; quoniam tu es potens assertor, et advocatus precum; et ad petitionem nostram die et nocte, Domine, interpellans pro peccatis meis, orationem meam perferas ad Patrem tuum. Digneris respicere super preces meas, sicut respexisti super munera Abel justi tui. Digneris me liberare ab igne perenni poenarum, et ab omni tormento, quod parasti iniquis, per bonum et benedictum Jesum Christum Salvatorem nostrum, per quem tibi est honor, virtus, gloria in saecula saeculorum. Amen.

ALIA ORATIO.

Largire mihi, Domine, munditiam labiorum, puritatem et innocentiam cordis, rectitudinem operis. Dona mihi humilitatem, patientiam, abstinentiam, castitatem, sobrietatem, prudentiam, justitiam, fortitudinem, sive temperantiam. Largire mihi spiritum sapientiae et intellectus, consilii et fortitudinis, scientiae et pietatis atque timoris tui. Da mihi irriguum inferius, et irriguum superius. Praebe mihi geminum charitatis effectum, fidem rectam, spem inconcussam. Da mihi benedictionem de rore coeli, et pinguedine terrae. Fac me toto corde meo, tota anima mea exquirere faciem tuam. Concede mihi in tuo conspectu cor habere contritum et humiliatum, tuae charitati nihil praeponere, tuo quandoque amore mundo funditus exstingui. Fac me in tuo sacrificio hostiam vivam fieri, tuae clementiae holocausta medullata offerre. Summa, aeterna, et ineffabilis sapientia, depelle a me caecitatis et ignorantiae tenebras. Summa aeterna virtus, libera me. Summa aeterna fortitudo, adjuva me. Summa et incomprehensibilis lux, illumina me. Summa et infinita misericordia, miserere mei. Amen.

96 COLLECTIO PSALTERII BEDAE.

PSAL. I. Beatus vir qui non abiit in consilio impiorum, et in via peccatorum non stetit, et in cathedra derisorum non sedit. Sed in lege Domini voluntas ejus, et in lege ejus meditabitur die ac nocte. Et erit tanquam lignum transplantatum juxta rivulos aquarum, quod fructum suum dabit in tempore suo. Et folium ejus non defluet, et omne, quod fecerit, prosperabitur.

Nunc ergo, reges intelligite, erudimini judices terrae. Servite Domino in timore, et exsultate ei in tremore. Adorate pure, ne forte irascatur, et pereatis de via.

Tu autem, Domine, clypeus circa me; gloria mea, et exaltans caput meum. Surge, Domine, salvum me fac, Deus meus.

Miserere mei, et exaudi orationem meam.

Verba mea audi, Domine, intellige murmur meum. Rex meus, et Deus meus: quoniam ad te deprecor. Domine, deduc me in justitia tua, propter insidiatores meos: dirige ante faciem meam viam tuam.

Domine, ne in furore tuo arguas me: neque in ira tua corripias me. Miserere mei, Domine, quoniam infirmus sum: sana me, Domine, quoniam conturbata sunt ossa mea. Et anima mea turbata est valde, et tu, Domine, usquequo? Revertere, Domine, et erue animam meam: salva me propter misericordiam tuam.

Domine Deus meus, in te speravi: salva me ab omnibus persequentibus me, et libera me. Ne forte rapiat, ut leo animam meam laceret, et non sit qui eruat.

Domine, dominator noster, grande est nomen tuum in universa terra.

Laetabor, et gaudebo in te, canam nomini tuo, Altissime. Exsurge, Domine Deus, leva manum tuam, noli oblivisci pauperum.

Dominus justum probat.

Salva nos, Domine.

Usquequo exaltabitur inimicus meus super me? Convertere, et exaudi me, Domine Deus meus: ne quando dicat inimicus meus: Praevalui adversus eum.

Exsultabit Jacob, et laetabitur Israel.

Timentes autem Dominum glorificat.

Custodi me, Deus, quoniam speravi in te dicens Deo: Dominus meus es tu, bene mihi non est sine te.

Intende deprecationem meam, sustenta gressus meos in callibus tuis, et non labentur vestigia mea. Inclina aurem tuam mihi: audi eloquium meum. Mirabilem fac misericordiam tuam, Salvator, sperantium in te. Custodi me quasi pupillam intus in oculo, in umbra alarum tuarum protege me. Ego autem in justitia videbo faciem tuam.

Diligam te, Domine, fortitudo mea.

Ab occultis meis munda me, a superbis quoque libera servum tuum. Sint placentes sermones oris mei, Domine, fortitudo mea, et redemptor meus.

Nos autem nominis Domini recordabimur.

Exaltare, Domine, in fortitudine tua, cantabimus et psallemus fortitudines tuas.

Tu autem, Domine, ne longe fias fortitudo mea: in auxilium meum festina. Erue a gladio animam meam, salva me ex ore leonis.

Et benignitas et misericordia tua subsequatur me omnibus diebus vitae.

Et accipiam benedictionem a Domino.

Ad te, Domine, animam meam levo. Vias tuas, Domine, ostende mihi: et semitas tuas doce me. Deduc me in veritate tua, doce me, quia tu es Deus Salvator meus. Peccatorum adolescentiae meae et scelerum meorum ne memineris. Secundum misericordiam tuam recordare mei. Propter nomen tuum propitiare iniquitati meae, quoniam grandis est. Respice in me, et miserere mei: de angustiis meis educ me. Vide afflictionem meam, et porta omnia peccata mea. Custodi animam meam, et libera me. 97

Domine, dilexi habitaculum domus tuae. Ne auferas cum peccatoribus animam meam: redime me, et miserere mei.

Dominus lux mea, et salutare meum, quem timebo? Audi, Domine, vocem meam invocantis: miserere mei, et exaudi me. Ne abscondas faciem tuam a me, ne declines in furore a servo tuo. Auxilium meum fuisti, ne derelinquas me, et ne dimittas me, Deus Salvator meus. Ostende mihi, Domine, viam tuam, et deduc me in semita recta, propter insidiatores meos. Ne tradas me, Domine, animae tribulantium me. Ego autem credo, quod videam bona Domini in terra viventium.

Audi, Domine, deprecationem meam, cum clamavero ad te. Ne tradas me cum impiis, et cum operantibus iniquitatem.

Dominus fortitudo mea, et scutum meum. Adorate Dominum in decore sancto.

Audi, Domine, et miserere mei. Domine, esto adjutor, ut laudet te gloria, et non taceat. Domine Deus meus, in sempiternum confitebor tibi.

In te, Domine, speravi, non confundar in aeternum: in justitia tua salva me. Inclina ad me aurem tuam, velociter libera me: quia petra mea, et munitio mea tu es. In manu tua commendo spiritum meum. In manu tua tempora mea. Libera me de manu inimicorum meorum, et persequentium me. Ostende faciem tuam super servum tuum, salva me in misericordia tua.

Beatus, cui dimissa est iniquitas, et absconditum est peccatum. Peccatum meum notum facio tibi, et iniquitatem meam non abscondo. Tu es protectio mea, ab hoste custodies me.

Ecce oculus Domini super timentes eum, et exspectantes misericordiam ejus. Sit misericordia tua, Domine, super nos, sicut exspectavimus te.

Benedicam Domino in omni tempore, semper laus ejus in ore meo. Magnificate Dominum mecum, et exaltemus nomen ejus pariter. Quaesivi Dominum, et exaudivit me; et de omnibus angustiis meis liberavit me. Gustate, et videte, quoniam bonus est Dominus: beatus vir qui sperat in eo. Timete Dominum sancti ejus, quoniam non est inopia timentibus eum. Quaerentibus autem Dominum non deerit omne bonum. Dominus custodit omnia ossa eorum, unum ex eis non confringetur. Redimet Dominus animas servorum suorum.

Judica, Domine, adversarios meos; pugna contra impugnantes me. Apprehende scutum et hastam, et consurge in auxilium meum. Dic animae meae, salus tua ego sum. Anima autem mea exsultabit in Domino, et laetabitur in salute sua. Confitebor tibi in Ecclesia grandi, et lingua mea meditabitur justitiam tuam, tota die laudem tuam.

Domine, in coelo misericordia tua. Quam pretiosa est misericordia tua, Domine! Quoniam tecum est fons vitae, et in lumine tuo videbimus lumen. Attrahe misericordiam tuam scientibus te, et justitiam tuam rectis corde. Non veniat mihi pes superbiae, et manus impiorum non me commoveat.

Puer fui, siquidem senui: et non vidi justum derelictum. Quia Dominus diligit judicium, et non derelinquet sanctos suos. In aeternum custoditi sunt, et auxiliabitur eis Dominus.

Domine, ne in ira tua arguas me, neque in furore tuo corripias me. Te enim, Domine, exspectabam: tu exaudies, Domine Deus meus. Quia sequebar bonum, ne derelinquas me. Domine Deus meus, ne elongeris a me: festina in auxilium meum, Domine salutis meae.

Praestolatio mea, ut es, ab omnibus iniquitatibus meis libera me. Opprobrium stulto ne ponas me, tolle a me plagas tuas.

Exspectans exspectavi Dominum, et inclinatus est ad me. Et audivit clamorem meum, Domine, ad adjuvandum me festina. Gaudeant et laetentur, qui quaerunt te, auxilium meum et salutare meum tu es, Deus meus, ne moreris.

98 XL. Ego dixi, Domine, miserere mei, sana animam meam, quia peccavi tibi. Tu autem, Domine, miserere mei.

Sicut areola praeparata ad irrigationes aquarum: sic anima mea praeparata est ad te, Deus.

Judica me, Deus, et discerne causam meam a gente non sancta: a viro doloso et iniquo libera me. Tu enim es fortitudo mea, quare projecisti me?

Surge, auxiliare nobis: et redime nos propter misericordiam tuam.

Thronus tuus, Deus, in saeculum: et in aeternum. Propterea populi confitebuntur tibi in saeculum, et in aeternum.

Deus misericors, spes et fortitudo: auxilium in tribulationibus inventus es validum.

Rex magnus super omnem terram. Canite Deo, canite: canite Regi nostro, canite.

Quia ipse est Deus, Deus noster, in saeculum et in perpetuum. Ipse erit dux noster in morte.

Verumtamen Deus redimet animam meam de manu inferiori, cum assumpserit me.

Fortis Deus Dominus locutus est: non propter victimas tuas arguam te: et holocaustomata tua coram me sunt semper. Non accipiam de domo tua vitulum, neque de gregibus hircos: mea sunt enim omnia animalia silvarum. Scio omnes aves montium, et universitas agri mecum est. Si esuriero, non dicam tibi: meus est enim orbis, et plenitudo ejus. Immola Deo laudes, et redde Altissimo vota tua. Et invoca me in die tribulationis: liberabo te, et glorificabis me. Qui immolat confessionem, glorificat me; et qui ordinate ambulat, ostendam ei salutare meum.

Miserere mei, Deus, secundum magnam misericordiam tuam. Juxta multitudinem miserationum tuarum, dele iniquitates meas. Multum lava me ab iniquitate mea, et a peccato meo munda me. Quoniam iniquitates meas cognovi: et peccatum meum contra me est semper. Tibi soli peccavi, et malum coram te feci. Absconde faciem tuam a peccatis meis, et omnes iniquitates meas dele. Cor mundum crea in me, Deus, et spiritum stabilem renova in visceribus meis. Ne projicias me a facie tua, et Spiritum sanctum tuum ne auferas a me. Redde mihi laetitiam Jesu tui, et spiritu potenti confirma me. Libera me de sanguinibus, Deus, Deus salutis meae: laudabit lingua mea justitiam tuam. Domine, labia mea aperies, et os meum annuntiabit laudem tuam. Sacrificium Deo spiritus contribulatus, cor contritum et humiliatum, Deus, non despicies.

Misericordia Dei tota est die. Ego autem sicut oliva virens in domo Dei, speravi in misericordia Dei in saeculum sempiternum.

Exsultabit Jacob, et laetabitur Israel.

Deus, in nomine tuo salva me, et in fortitudine tua ulciscere me. Deus, exaudi orationem meam, auribus percipe verba oris mei.

Exaudi, Deus, orationem meam, et ne despicias deprecationem meam: attende mihi, et exaudi me. Ego autem fiduciam habeo tui.

In quacunque die territus fuero, ego in te confidam. Non timebo, quid faciat mihi caro, hoc scio, quia Deus meus es.

Miserere mei, Deus, miserere mei: quoniam in te sperat anima mea. In umbra alarum tuarum sperabo, donec transeant insidiae. Invocabo Deum altissimum, Deum ultorem meum. Mittet de coelo, et salvabit me.

Vere est Deus judicans in terra.

Erue me de inimicis, Deus meus, et a resistentibus mihi protege me. Fortitudinem meam ad te servabo. Quoniam tu, Deus, elevator meus, Dei mei misericordia praeveniet me. Quoniam factus es fortitudo mea, et refugium meum in die tribulationis meae. Tibi cantabo quoniam Deus adjutor meus, fortitudo mea, Deus misericordia mea.

Da nobis auxilium in tribulatione, vana est enim salus ab homine. In Deo faciemus virtutem, et ipse conculcabit tribulantes nos.

Exaudi, Deus, laudationem meam: intende orationi meae. De novissimo terrae ad te clamabo, cum triste fuerit cor meum. Cum fortis elevabitur adversum me, tu eris ductor meus. 99 Fuisti spes mea, turris munitissima a facie inimici. Habitabo in tabernaculo tuo, jugiter sperabo in protectione alarum tuarum. Tu enim, Deus, exaudisti orationem meam: dedisti haereditatem timentibus nomen tuum. Misericordia et veritas servabunt eum.

Ab ipso enim praestolatio mea, ipse est fortitudo mea et salus mea: susceptor meus, non timebo.

Deus, fortitudo mea tu es, de luce consurgam ad te. Sitivit te anima mea: desideravit te caro mea. Sic in sancto apparui tibi, ut videam fortitudinem tuam et gloriam tuam. Melior misericordia tua quam vita: labia mea laudabunt te. Sic benedicam tibi in vita mea, in nomine tuo levabo manus meas. Quia fuisti auxilium meum, in umbra alarum tuarum laudabo te.

Audi, Deus, vocem meam loquentis, a timore inimici serva vitam meam.

Exaudi nos, Deus salvator noster.

Omnis terra adoret et canet tibi, canet nomini tuo. Benedicite populi Deo nostro, et auditam facite vocem laudis ejus. Qui posuit animam nostram in vita. Benedictus, qui non abstulit orationem meam, et misericordiam tuam a me.

Deus misereatur nostri, et benedicat nobis, illustret faciem suam super nos. Benedicat nobis Deus, Deus noster, benedicat nobis Deus.

Exsurgat Deus, et dispergantur inimici ejus, et fugiant qui oderunt eum a facie ejus. Justi autem laetentur et exsultent in conspectu Dei, gaudeant in laetitia.

Exaudi me, Domine, quoniam bona est misericordia tua; secundum multitudinem miserationum tuarum respice ad me. Et ne abscondas faciem tuam a servo tuo, quoniam tribulor, cito exaudi me. Accede ad animam meam, et redime eam: propter inimicos meos libera me. Salus tua, Deus, suscepit me.

Deus, ut liberes me, Domine, ut auxilieris mihi festina. Gaudeant et laetentur in te omnes, qui quaerunt te. Ego autem egenus et pauper; Deus, festina pro me. Auxilium meum et salvator meus, tu Domine, ne moreris.

In te, Domine, speravi, non confundar in aeternum: in justitia tua erue me, et libera me. Inclina ad me aurem tuam, et salva me. Deus meus, salva me de manu impii, de manu iniqui et nocentis; quia tu es exspectatio mea, Domine. Deus, ne elongeris a me: Deus, ad auxiliandum mihi festina.

Erit nomen tuum in aeternum, ultra solem, perseverabit nomen tuum.

Mihi autem appropinquare Deo bonum est, posui in Domino Deo spem meam.

Deus autem rex meus ab initio. Ne tradas bestiis animam eruditam lege tua: vitae pauperum tuorum ne obliviscaris in perpetuum.

Ego autem annuntiabo in sempiternum, cantabo Deo Jacob.

Cum surrexerit ad judicandum Deus, ut salvos faciat omnes mites terrae.

Voce mea ad Dominum clamavi; voce mea ad Dominum, et exaudivit me. In die tribulationis meae Deum requisivi.

Ipse vero misericors propitiatur iniquitati, et non disperdet.

Ne recorderis iniquitatum nostrarum veterum. Cito anticipent nos misericordiae tuae, quia attenuati sumus nimis. Auxiliare nobis, Deus Jesus noster, propter gloriam nominis tui, et libera nos. Et propitiare peccatis nostris propter nomen tuum.

Suscita fortitudinem tuam, et veni: ut salvos facias nos. Domine Deus exercituum, converte nos, et ostende faciem tuam, et salvi erimus.

Laudate Dominum, fortitudinem nostram.

Judicate pauperi et pupillo, egeno et inopi juste facite. Salvate inopem; et pauperem de manu impiorum liberate.

Deus, ne taceas, ne sileas, et non quiescas, Deus. Et sciunt[ F., sciant], quia nomen tuum est, Domine, solus tu excelsus super omnem terram.

Domine Deus exercituum, exaudi orationem meam: Domine exercituum, beatus homo, qui confidit in te.

100 LXXXIV. Converte nos Jesus noster, et solve iram tuam adversum nos. Noli in aeternum irasci nobis. Ostende nobis, Domine, misericordiam tuam, et salutare tuum da nobis.

Inclina, Domine, aurem tuam, et exaudi me: quia egenus et pauper ego sum. Miserere mei, Domine, quoniam ad te clamabo tota die. Laetifica animam servi tui, quia ad te animam meam levo. Tu enim es, Domine, bonus et propitiabilis: et multus misericordia omnibus, qui invocant te. Exaudi, Domine, orationem meam: et ausculta vocem deprecationum mearum. In die tribulationis meae invocabo te, quia exaudies me. Doce me, Domine, viam tuam: ut ambulem in veritate tua. Unicum fac cor meum, ut timeat nomen tuum. Confitebor tibi, Domine Deus meus, in toto corde meo: et glorificabo nomen tuum in sempiternum. Tu autem, Domine, Deus misericors et clemens, respice ad me, et miserere mei: da fortitudinem servo tuo, et salva filiam ancillae tuae. Fac mecum signum in bonitate, et audiant, qui oderunt me, et confundantur. Quia tu, Domine, auxiliatus es mihi, et consolatus es me.

Et cantabunt, quasi in choris, omnes fortes mei in te.

Ingrediatur ante te oratio mea: inclina aurem tuam ad laudationem meam. Ego autem ad te, Domine, clamavi: et mane oratio mea praeveniet te.

Confitebuntur coeli mirabilia tua, Domine: misericordia et veritas praecedent faciem tuam.

Appareat apud servos tuos opus tuum, et gloria tua super filios eorum. Et sit decor Domini Dei nostri super nos, et opus manuum nostrarum confirma.

Tu enim es, Domine, spes mea.

Quoniam laetificasti me, Domine, in opere tuo.

Testimonia tua fidelia facta sunt nimis

Misericordia tua sustentabat me.

Venite, adoremus et curvemur. Flectamus genua ante faciem Domini factoris nostri: quia ipse est Dominus Deus noster.