Reader

LX. Privilegium pro ecclesia SS. Petri et Ursi Augustensi (prov. Tarentas. ) (Januae, Febr. 22.) Hist. patriae Monum., Chart., I, 822.

ALEXANDER episcopus, servus servorum Dei, dilectis filiis GAUTERIO et universis canonicis Ecclesiae Sanctorum Petri et Ursi, tum praesentibus quam futuris canonicam vitam professis, in perpetuum.

Religiosis votis annuere, et ea operis exhibitione complere, officium nos invitat suscepti regiminis et ordo videtur exigere rationis. Ea propter, dilecti in Domino filii, vestris justis postulationibus clementor annuimus, et praefatam ecclesiam in qua divino mancipati estis obsequio, sub beati Petri et nostra protectione suscipimus et praesentis scripti privilegio communimus; inprimis siquidem statuentes ut ordo canonicus qui secundum Dei timorem et beati Augustini Regulam in ipsa ecclesia institutus esse dignoscitur, perpetuis ibidem temporibus inviolabiliter observetur. Praeterea quascunque possessiones, quaecunque bona eadem ecclesia in praesentiarum juste et canonice possidet, aut in futurum concessione pontificum, largitione regum vel principum, oblatione fidelium, seu aliis justis modis, praestante Domino, poterit adipisci, firma vobis vestrisque successoribus et illibata permaneant. In quibus haec propriis duximus exprimenda vocabulis: ecclesiam Sancti Albani cum pertinentiis suis; ecclesiam Sancti Laurentii de Monte- Giraldi cum omnibus ad eamdem ecclesiam pertinentibus; hospitale de monasterio cum omnibus pertinentiis suis caeterisque rebus et decimis quas venerabilis frater noster Petrus Tarentasiensis archiepiscopus intuitu pietatis concessit et scripto authentico confirmavit.

Statuimus quoque ut nemini liceat in ecclesiam vel personas vestras absque rationabili causa excommunicationis sententiam aliquatenus promulgare vel interdicto supponere. Liceat etiam vobis clericos et laicos liberos et absolutos de saeculo fugientes in ecclesia vestra ad conversionem recipere, qui secundum consuetudinem vestri ordinis nulli nisi priori ejusdem ecclesiae obedientiam debeant promittere. Decernimus ergo ut nulli omnino hominum liceat praefatam ecclesiam temere perturbare, aut ejus possessiones auferre, vel ablatas retinere, minuere, aut aliquibus vexationibus fatigare; sed omnia integra conserventur..... pro quorum gubernatione et sustentatione concessa sunt, usibus omnimodis profutura, salva in omnibus apostolicae sedis auctoritate, et dioecesani episcopi canonica justitia.

Si qua igitur in futurum ecclesiastica saecularisve persona hanc nostrae constitutionis paginam sciens, contra eam temere venire tentaverit, secundo tertiove commonita, si non satisfactione congrua emendaverit, potestatis honorisque sui dignitate careat, reamque se divino judicio existere de perpetrata iniquitate cognoscat, et a sacratissimo corpore ac sanguine Dei et Domini Redemptoris nostri Jesu Christi aliena fiat, atque in extremo examine districtae ultioni subjaceat. Cunctis autem eidem loco sua jura servantibus sit pax Domini nostri Jesu Christi, quatenus et hic fructum bonae actionis percipiant, et apud districtum judicem praemia aeternae pacis inveniant. Amen, amen, amen.

Bene valete. Ego Alexander catholicae Ecclesiae episcopus subscripsi. Ego Hubaldus presbyter cardinalis tit. Sanctae Crucis in Jerusalem subscripsi. Ego Joannes presbyter cardinalis tit. Sanctae Anastasiae subscripsi. Ego Albertus presbyter cardinalis tit. Sancti Laurentii in Lucina subscripsi. Ego Gregorius Sabiniensis episcopus subscripsi. Ego Hubaldus Ostiensis episcopus subscripsi. Ego Bernardus Portuensis et Sanctae Rufinae episcopus subscripsi. Ego Gualterius Albanensis episcopus subscripsi. Ego Jacintus diaconus cardinalis Sanctae Mariae in Cosmedin subscripsi. Ego Ardicio diaconus cardinalis Sancti Theodori subscripsi. Ego Boso diaconus cardinalis Sanctorum Cosmae et Damiani subscripsi. Ego Cinthius diaconus cardinalis Sancti Adriani subscripsi. Ego Joannes diaconus cardinalis Sanctae Mariae in Porticu, subscripsi.

Datum Januae per manum Hermanni Sanctae Romae Ecclesiae subdiaconi et notarii, VIII Kalendas Martii, indictione X, Incarnationis Dominicae anno 1161, pontificatus vero domni Alexandri papae III, anno tertio.