Anselmus Laudunensis et schola; Glossa ordinaria-1117
Evangelium secundum Joannem
Joan 10.17
Choose a text
More by Anselmus Laudunensis et schola; Glossa ordinaria
—
8999 Evsejo2
10.1
CAPUT IX.
10.1
VERS. 1.-- Et praeteriens. Non stans in via peccatorum, sed secus viam nostrae mortalitatis. Caecum. Caecus significat humanum genus, in quo caecitas naturalis, quia peccante primo homine, vitium propter naturam inolevit, unde secundum mentem omnis homo caecus natus est.
10.2
VERS. 3.-- Neque hic peccavit. Peccaverunt quidem, sed non illo peccato factum est, ut caecus nasceretur, sed haec est causa, ut manifestentur opera Dei in illo. Ut eum illuminando et per eum quid in caecitate humani generis facturus sit significando, Filius Dei manifestetur; unde subdit: Me oportet operari.
10.3
VERS. 5.-- Quandiu sum in mundo. Non solum tunc Christus lumen erat in mundo, sed et semper usque ad consummationem saeculi per fidem est cum electis, et est tempus operandi. Nox illa est infernalis, in qua nulli licet operari, ut nec ardenti diviti licuit, sed tantum est tempus recipiendi.
10.4
VERS. 6.-- Et fecit lutum. Sicut primum hominem de limo terrae formavit, ita per idem genus luti genus humanum reformavit. De saliva lutum fecit, quia Verbum caro factum est. Saliva est sapientia quae ex ore Altissimi prodiit. Terra est caro Christi. Unxit oculos. Id est, catechumenum fecit, qui credit Verbum carnem factum. Unctus nondum videt, sed mittitur ut lavet, id est, baptizetur in Misso, id est in Christo, propter quod nomen piscinae interpretatur. Baptizatus a peccatis lumen recepit.
10.5
VERS. 7.-- Et venit videns, etc. Quaeritur quomodo istum sine fide sanaverit, cum legatur neminem sine sanatione interiore, exterius sanasse? Sed hoc dicitur de illis qui propter peccata infirmabantur: iste non propter peccatum, sed propter gloriam Dei languebat.
10.6
VERS. 16.-- Non est hic homo a Deo, etc. Ille spiritualiter custodit sabbatum, qui est sine peccato; illi non, qui servi sunt peccati.
10.7
VERS. 17.-- Tu quid dicis, etc. Quaerunt calumniam, ut ille de synagoga pelleretur, sed a Christo inveniretur. Ille autem dixit, etc. Adhuc inunctus in corde, qui confitetur, non tamen mentitur.
10.8
VERS. 18.-- Donec vocaverunt, etc. Mystice: Parentes, id est diabolus vel vitia, qui dicunt. Aetatem habet, ipse de se loquatur, qui nolunt hominem confiteri Christum.
10.9
Da gloriam Deo: Nos scimus, etc. Dare gloriam Deo, est veritatem de aliquo quasi praesente Deo dicere, hoc est: Confiteri istum non esse Deum sicut nos, sed peccatorem.
10.10
VERS. 27.-- Quid iterum, etc. Stomachatur contra duritiam eorum, de caeco factus videns, et caecos jam non ferens.
10.11
VERS. 28.-- Maledixerunt ergo ei. Secundum cor eorum maledictio est. Sed quod dicitur optabile est omnibus, ut discipuli Christi sint.
10.12
VERS. 29.-- Hunc autem nescimus. Superius dixerant: Hunc scimus: unde hinc dicunt se nescire, sed nescire nos dicimus quae abjicimus. Ille nescitur, latet humilitate, proditur signorum virtute: nescitur unde sit, et ut Deus caecos illuminat.
10.13
VERS. 33.-- Nisi esset hic a Deo, etc. Spreta eorum ira, libere veritatem confitetur. Haec enim non nisi a Domino, nec a discipulis fierent, nisi Deus in eis.
10.14
VERS. 34.-- In peccatis natus est totus. Id est, cum clausis oculis, quod dicunt esse pro peccatis parentum, sed Christus totum sanat, extra oculos, intus cor aperit. Et tu doces nos? Et ejecerunt eum foras. Toties interrogando ut discerent, magistrum fecerant, sed ingrati docentem projecerunt. Sed quia expulsus, magis factus est Christianus.
10.15
VERS. 36.-- Quis est, etc. Adhuc inunctus his verbis ostendit se jamdudum cor ad credendum habuisse paratum, sed in quem credere debeat, ignorasse.
10.16
VERS. 37.-- Et vidisti. Jam Dominus lavat faciem inuncti, jam cordis oculos illuminat et ille non tantum Filium hominis, sed etiam confitetur Filium Dei.
10.17
VERS. 39.-- Ut qui non vident. Id est, qui se videre putant, quaerunt ut videant, et qui vident, id est, qui se videre putant, et medicum non quaerunt, et hoc est judicium, id est discretio quod discernit causam credentium a superbis. Judicium enim damnationis non modo, sed in fine faciet; unde: Ego non judico quemquam.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).