Reader

Libellus abdicationis

Ego Arnulfus, quondam Remorum archiepiscopus, recognoscens fragilitatem meam et pondera peccatorum meorum, testes confessores meos, Siguinum archiepiscopum, Dalbertum archiepisc., Arnulfum episcopum, Gotesmannum episcopum, Herveum episcopum, Ratbodum episcopum, Gualterium episcopum, Brunonem episcopum, Milonem episcopum, Adalberonem episcopum, Odonem episcopum, Guidonem episcopum, Heribertum episcopum, constitui mihi judices delictorum meorum, et puram ipsis confessionem dedi, quaerens remedium poenitendi, et salutem animae meae, ut recederem ab officio et ministerio pontificali, quo me recognosco esse indignum, et alienum me reddens pro reatibus meis, in quibus peccasse me secreto ipsis confessus sum, et de quibus publice arguebar: eo scilicet modo, ut illi sint testes alii succedendi et consecrandi in loco meo, qui digne praeesse et prodesse possit Ecclesiae cui hactenus indignus praeful; et ut inde ultra nullam repetitionem aut interpellationem auctoritate canonica facere valeam, manu propria subscribens firmavi. Quo perlecto, ita subscripsit. Ego Arnulfus quondam archiepiscopus subscripsi.