Excerpta ex liturgicis codicibus Fontavellanensibus
Choose a text
id="mobileReaderAuthor" class="mobile-reader-author" href="/authors/auctor-incertus" aria-label="More works by Auctor incertus">
—
⋯
Original / primary: 10411 Exexlic
15.3
Communio. Divinis, quaesumus, Domine, redempti mysteriis, ut beatae Brigidae virginis tuae suffragiis sublevemur, et a praesentis vitae adversitatibus liberemur, et aeternae beatudinis praemia consequamur. Per.
16.1
PURIFICATIO SANCTAE MARIAE. Collecta ad sanctum Adrianum. In primis cantetur tertia; postea benedicantur candelae, deinde dicit sacerdos.
16.1
Oremus. Exaudi, quaesumus Domine, plebem tuam, quae extrinsecus annua tribuis devotione venerari, interius assequi gratiae tuae luce concede.
16.2
Per omnia saecula saeculorum. Amen. Dominus vobiscum. Et cum spiritu tuo. Sursum corda. Habemus ad Dominum, Gratias agamus Domino Deo nostro. Dignum et justum est.
16.3
Praefatio. Vere dignum et justum est, aequum et salutare nos tibi semper et ubique gratias agere, Domine sancte, Pater omnipotens, aeterne Deus, Creator coeli et terrae, Rex regum, et Dominus dominantium, nos supplices tuos, ad te clamantes et exorantes, clementer exaudire dignare. Qui omnia ex nihilo creasti, et jussu tuo per opera apum hunc liquorem ad perfectionem cerei venire fecisti, et qui hodierna die petitionem justi Simeonis implesti, te humiliter deprecamur, ut has candelas ad usum hominum et ad sanitatem corporum et animarum, sive in terra, sive in aquis accensae fuerint per invocationem tui sanctissimi nominis et per intercessionem sanctae Mariae genitricis Filii tui, cujus hodie festa devote celebrantur, ac per preces omnium sanctorum tuorum bene+ dicere et sancti+ ficare digneris, ut hujus plebis tuae, quae illa honorifice in manibus portat, teque cantando laudat, exaudias voces de coelo sancto tuo et de sede majestatis tuae, propitiusque sis omnibus clamantibus ad te, quos redemisti pretioso sanguine Filii tui, qui tecum vivit et regnat Deus in unitate Spiritus sancti, per omnia saecula saeculorum. Amen. Oremus. Praeceptis salutaribus moniti et divina institutione formati, audemus dicere: Pater noster, qui es in coelis, usque Et ne nos inducas in tentationem. Sed libera nos a malo.
16.4
Hic mutat vocem quasi legens: Oremus: Benedic, Domine Jesu Christe, hanc creaturam cerei supplicationibus nostris, et infunde ei per virtutum sanctae crucis bene+ dictionem coelestem, ut qui eam ad repellenda tenebras humano generi tribuisti, talem signaculo crucis tuae fortitudinem et bene+ dictionem accipiat, ut in quibuscunque locis accensa sive posita fuerit, discedat diabolus et contremiscat, et fugiat pallidus cum omnibus ministris suis de habitationibus illis, nec praesumat amplius inquietare vel illudere servientibus Deo. Proinde supplices, quaesumus te, Domine, ut emittas sanctum angelum tuum Raphaelem, qui evulsit et repulit a Sara et Tobia daemonium mortiferum eos infestantem, et conterat illum et perdat de cunctis habitationibus colentium Deum, de basilicis, de domibus, de angulis, de lectibus, de refectoriis, de universis locis, in quibuscunque Deo famulantes habitant et requiescunt, dormiunt, vigilant, ambulant, et consistunt; nec valeat ille malignus amplius inquietare vel pavores mittere super illos, quos sancti chrismatis tui unctione fecisti esse munitos. Bene+ dico te, cera, in nomine Dei Patris omnipotentis, et Filii ejus unigeniti, et Spiritus sancti paracleti, ut sis ubique diaboli effugato, atque omnium contubernalium suorum exterminatio, adjuvante eadem sancta et individua Trinitate, quae in Unitatis essentia vivit et conregnat in saecula saeculorum. Amen.
16.5
Finita benedictione sacerdos accipiat aquam benedictam, et aspergat super candelas, et sumat de cereis et accendat. Cum coeperint accendi, cantor inchoet hanc antiphonam. Lumen ad revelationem gentium. Psalmus: Nunc. Repetita antiphona per omnes versus ejusdem psalmi. Gloria Patri. Sicut erat; usque dum accendantur omnes candelae. Accensis vero dicant hanc orationem.
16.6
Oratio. Omnipotens sempiterne Deus, qui hodierna die Unigenitum tuum ulnis sancti Simeonis in templo sancto tuo suscipiendum praesentasti, te supplices deprecamur, ut hos cereos tuos, quos nos fideles tui omni magnificentia suscipientes gestare cupimus luce accensos, bene+ dicere et sancti+ ficare, atquo lumine supernae benedictionis accendere digneris, quatenus eos tibi Domino Deo nostro offerentes, digni et sancto igne tuae dulcissimae charitatis succensi in templo sancto gloriae tuae repraesentari mereamur. Per eumdem.
16.7
Finita oratione pergant ad sanctam Mariam canendo antiphonam: Ave, Maria, gratia plena, Dei genitrix virgo. Adorna thalamum tuum, Sion, et suscipe.
16.8
Oratio. Perfice in nobis, Domine, quaesumus, gratiam tuam, qui justi Simeonis exspectationem implesti, ut, sicut ille mortem non vidit, priusquam Christum Dominum videre mereretur, ita et nos vitam obtineamus aeternam. Per eumdem.
17.1
IN FESTO SANCTI BLASII.
17.1
Oratio. Deus qui praesentem diem honorabilem nobis in beati Blasii martyris tui solemnitate fecisti, da populis tuis spiritualium munus gaudiorum, et omnium fidelium mentes dirige in viam salutis aeternae. Per.
17.2
Secreta. Hostias, Domine, quas nomini tuo consecrandas offerimus, sancti Blasii martyris tui prosequatur oratio, per quam nos expiari tribuas quaesumus et defendi. Per.
17.3
Communio. Beati Blasii martyris tui, quaesumus, Domine, intercessione nos adjuva, pro cujus solemnitate percepimus tua sancta laetantes commercia. Per.
18.1
N FESTO SANCTI BENEDICTI.
18.1
Oratio. Deus, qui beatum Benedictum comessorem tuum in terris vita laudabili decorasti, et in coelis aeterna gloria sublimasti, ejus quaesumus suffragantibus meritis vita nostra apud te commendetur. Per.
18.2
Secreta. Benedictio tua, Domine, beati Benedicti confessoris intercessione super has hostias descendat, quae et benedictionem nobis clementer operetur, et beatae immortalitatis dona conciliet. Per.
18.3
Communio. Beati Benedicti confessoris tui, Domine, precibus confidentes, quaesumus, clementiam tuam, ut per ea, quae sumpsimus, aeterna remedia capiamus. Per.
19.1
IN ANNUNTIATIONE SANCTAE MARIAE.
19.1
Deus, qui hodierna die Verbum tuum beatae Virginis alvo coadunari voluisti, fac nos ita peragere, ut tibi placere valeamus. Per eumdem.
19.2
Secreta ut in editis.
19.3
Communio. Adesto, Domine, populo tuo, ut quae sumpsit fideliter, et mente sibi et corpore beatae Mariae semper virginis intercessione custodiat. Per.
20.1
IN FESTO SANCTAE EUPHEMIAE.
20.1
Oratio. Concede nobis, omnipotens Deus, sanctae martyris tuae Euphemiae et exsultare meritis, et beneficia referre suffragiis. Per.
20.2
Secreta. Muneribus nostris, Domine, te magnificantes, quaesumus, ut in sanctae nobis solemnitatibus Euphemiae gaudia superna concilies et patrocinia sempiterna largiaris. Per.
20.3
Communio. Sanctae martyris tuae Euphemiae nos, Domine, grata comitetur oratio, et tuam nobis indulgentiam poscere non desistat. Per.
21.1
IN FESTO SS. LAURENTINI ET PERCENTINI.
21.1
Oratio. Tuorum nos, Domine, precibus tuere sanctorum, ut festa martyrum tuorum Laurentini et Pergentini sine cessatione venerantes, et fidei muniamur auxilio et magnifico proficiamus exemplo. Per.
21.2
Secreta. Martyrum tuorum Laurentini et Pergentini, Domine, festa venerantes munera nomini tuo dicata offerimus, praesta, quaesumus, ut illis reverentiam deferentes nobis veniam impetremus. Per.
21.3
Communio. Protege, Domine, plebem tuam, et festivitatem martyrum tuorum Laurentini et Pergentini, quam nobis tradidisti, assidue debitam tibi solvi precibus concede sanctorum. Per.
22
IN FESTO SANCTI BONIFACII CUM SOCIIS SUIS.
22
Deus, qui beatum Bonifacium pontificem constantiae in passione roborasti, quique illi ad praedicandum gentibus gloriam tuam Heobanem et Adhelarium sociare dignatus es, etc.
23.1
IN FESTO SANCTORUM ALBINI, PAULINI ET NICETAE, CUM NONGENTIS OCTOGINTA NOVEM.
23.1
Oratio. Propitiare, Domine, supplicationibus nostris, et sanctorum martyrum tuorum Albini, Paulini et Nicetae episcopi cum nongentis octoginta novem, qui passi sunt propter nomen tuum, eorum suffragantibus meritis, preces nostras dignanter exaudi, ut dimittantur nobis peccata nostra, et tecum vivere in aeternum mereamur. Per.
23.2
Secreta. Suscipe, Domine, propitius, orationes nostras cum oblationibus hostiarum, et martyrum tuorum, quorum notabilia gloriosa celebramus, deprecationem pietatis tuae perfice benigno affectu; et illam, quae in eis flagravit fortis dilectio. in nobis respirare benignus concede. Per.
23.3
Communio. Sanctorum tuorum, Domine, quorum festa celebramus, intercessione opem misericordiae nobis tribue, ut qui coronam martyrii tui non meremur, saltem a venia non repellamur. Per.
24.1
IN VIGILIA SANCTI JOANNIS BAPTISTAE.
24.1
Oratio, ut in editis.
24.2
Secreta. Munera populi tui, quaesumus, Domine, propitiatus intende, et beati Joannis Baptistae, cujus nos tribuis praeire solemnia, fac gaudere suffragiis. Per.
24.3
Missa mane primo.
24.4
Oratio. Concede, quaesumus, omnipotens Deus, ut qui beati Joannis Baptistae solemnia colimus, ejus apud te intercessionibus muniamur. Per.
24.5
Secreta. Munera, quaesumus, Domine, etc., ut in editis.
24.6
Communio. Praesta, quaesumus, omnipotens Deus, ut qui coelestia alimenta percepimus, intercedente beato Joanne Baptista, per haec contra adversa omnia muniamur. Per.
24.7
Alia ad Vesperas. Deus, qui nos annua beati Joannis Baptistae solemnia frequentare concedis, praesta, quaesumus, ut et devotis eadem mentibus celebremus, et ejus patrocinio promerente plene capiamus securitatis augmentum. Per.
25.1
IN VIGILIA APOSTOLORUM PETRI ET PAULI.
25.1
Oratio. Deus, qui nobis beatorum apostolorum tuorum Petri et Pauli natalitia gloriosa praeire concedis, tribue, quaesumus, eorum nos semper et beneficiis praeveniri et orationibus adjuvari. Per.
25.2
Secreta, ut in editis.
25.3
Communio. Deus, qui ecclesiam tuam apostoli tui Petri fide et nomine consecrasti, quique beatum illi Paulum ad praedicandum gentibus gloriam tuam sociare dignatus es, concede ut omnes, qui ad apostolorum tuorum solemnia convenerunt, spirituali remuneratione ditentur. Per.
26.1
IN FESTO APOSTOLORUM PETRI ET PAULI.
26.1
Oratio. Omnipotens sempiterne Deus, qui Ecclesiam tuam in apostolica soliditate fundatam ab internarum eruis terrore portarum, praesta in tua veritate persistens, nulla recipiat consortia perfidorum. Per.
26.2
Secreta. Familiam tuam, Domine, propitius intuere, et apostolicis defende praesidiis, ut eorum precibus gubernetur, quibus nititur te constituente principibus. Per.
26.3
Communio. Exaudi nos, Deus salutaris noster, et apostolorum tuorum nos tuere praesidiis, quorum donasti fideles esse doctrinis. Per.
26.4
Ad Vesperum.
26.5
Oratio. Praesta, quaesumus, omnipotens Deus, ut qui jugiter apostolica defensione munimur, nec succumbamus vitiis, nec opprimamur adversis. Per.
27.1
IN OCTAVA SANCTI JOANNIS BAPTISTAE.
27.1
Oratio. Praesta, quaesumus, omnipotens Deus, ut Ecclesia tua, quae iterato nativitatem praecursoris Filii tui Domini nostri Jesu Christi Joannis Baptistae in octavo veneratur, eo ipso pro ea apud misericordiam tuam praeveniente, a peccatis omnibus te miserante liberari mereamur. Per.
27.2
Secreta. Sancti Joannis Baptistae honorabilem nativitatem muneribus, o piissime Domine, geminatis in octavo Ecclesia tua die devotissime consequitur, praesta solita clementia tua ut ipso pro ea interveniente id munus salutare sibi penes te fieri mereatur. Per.
27.3
Communio. Munera tua, quae in honorem nominis tui in solemnitate iterata Joannis Baptistae praecursoris Filii tui Domini nostri Jesu Christi sumpta sunt, quaesumus, omnipotens Deus, praestent auxilium Ecclesiae tuae, ut expiata ab omni immissione insidiatoris te benedicat, tibi serviat, et, te protegente, ab omnibus malis semper sit libera. Per.
28.1
IN FESTO SANCTAE MUSTIOLAE.
28.1
Oratio. Crescat in nobis, Domine, semper sanctae jucunditatis effectus, ut beatae Mustiolae martyris tuae veneranda festivitas augeatur. Per.
28.2
Secreta. Sanctae Mustiolae martyris tuae, Domine, festa celebrantes, preces offerimus, hostiam immolamus, praesta, quaesumus, ut cum praesidio temporali et vitam nobis praebeant, et incrementa perpetua. Per.
28.3
Communio. Deus virtutum coelestium, quaesumus ut sacrificia, pro sanctae Mustiolae martyris tuae passione delata, desideriorum nos temporalium doceant habere contemptum, et amare dona coelestium gaudiorum. Per.
29.1
IN OCTAVA APOSTOLORUM PETRI ET PAULI.
29.1
Oratio et secreta ut in editis.
29.2
Communio. Beatorum apostolorum tuorum, Domine, Petri et Pauli desiderata solemnia recensentes, praesta, quaesumus, ut eorum supplicantionibus mundemur, quorum regimur principatu. Per.
30
IN FESTO SANCTORUM SEPTEM FRATRUM.
30
Oratio. Praesta, quaesumus, omnipotens Deus, ut qui gloriosos martyres Januarium, Felicem, Philippum, Silvanum, Alexandrum, Vitalem atque Martialem, fortes in sua confessione cognovimus, etc., ut in editis, etiam quoad secretam et postcommunionem.
31
IN FESTO SANCTI PATERNIANI.
31
Oratio. Deus, qui per angelum tuum Raphaelem iter ostendisti beato Paterniano, et obitum demonstrasti, exaudi preces quas in ejus tibi solemnitate deferimus, etc., ut in editis, in secunda missa confessoris pontificis.
32.1
IN FESTO SANCTAE MARGARITAE.
32.1
Oratio. Deus, qui beatam Margaritam virginem hodierna die ad coelos per martyrii palmam venire fecisti, concede propitius ut, ejus exempla sequentes, ad te pervenire mereamur. Per.
32.2
Secreta. Haec victima, Domine, quaesumus, pro beatae virginis Margaritae martyrio oblata, et mentium nobis puritatem, et corporum obtineat sanctitatem. Per.
32.3
Communio. Hujus, Domine, sacramenti perceptione et beatae Margaritae virginis intercessione, et tu in nobis manere dignare, et nos in te vicissim manere concede. Per
33.1
IN FESTO SANCTORUM QUIRICI ET JULITTAE.
33.1
Oratio. Deus, qui sanctorum tuorum Quirici et Julittae cordibus flammam tuae dilectionis accendis, da cordibus nostris eamdem fidei charitatisque virtutem, ut quorum gaudemus triumphis, provocemur exemplis. Per.
33.2
Secreta. Illa nos veritas, Domine, semper illuminet, quae sanctorum tuorum cordibus flammam tuae dilectionis accendit. Per
33.3
Communio. Deus, qui sanctis tuis martyribus Quirico et Julittae vincendi solatium, et immensam vincentibus gloriam aeternam concedis, et laceratas carnes eorum, tanquam odorem bonum suavitatis assumis, tribue, quaesumus, ut sicut eis coronam martyrii praestitisti, ita nobis peccatorum nostrorum veniam largiaris. Per.
34.1
IN FESTO SANCTORUM ERMAGORAE ET FORTUNATI.
34.1
Oratio. Intervenientibus, Domine, sanctis martyribus tuis Ermagora et Fortunato, Ecclesiae tuae voces placatus admitte, ut, destructis adversitatibus universis, secura tibi serviat libertate. Per.
34.2
Secreta. Munera humilitatis nostrae, Domine, pro sanctorum martyrum tuorum Ermagorae et Fortunati gloriosa passione et solemnitate offerentes, quaesumus, propitius respicere dignare, et ipsorum intercessione tam ad profectum vitae quam animae salutaria nobis consueta miseratione pervenire concede. Per.
34.3
Communio. Sumentes, Domine, coelestia dona mysterii, quaesumus ut sanctorum martyrum tuorum Ermagorae et Fortunati adjuvemur meritis, quorum solemnitatem debita veneratione celebramus. Per.
35.1
IN FESTO SANCTAE PRAXEDIS VIRGINIS ET MARTYRIS.
35.1
Oratio. Deus, qui inter caetera potentiae tuae miracula etiam in sexu fragili victoriam castitatis et martyrii contulisti, da, quaesumus, ut beatae et sanctae martyris tuae Praxedis adjuvemur meritis, cujus beatitudinis irradiamur exemplis. Per.
35.2
Secreta. Accipe, Domine, munera quae in beatae martyris tuae Praxedis solemnitate deferimus, quia ad tua praeconia recurrit et laudem, quod talis est orta mortalis assumpta. Per.
35.3
Communio. Haec in nobis, Domine, gratia tua, quaesumus, semper exerceat, ut et divinis instauret nostra corda mysteriis, et sanctae martyris tuae Praxedis commemoratione laetificet. Per.
36.1
IN FESTO SANCTAE MARIAE MAGDALENAE.
36.1
Oratio et secreta ut in editis.
36.2
Communio. Vivifica, Domine, animam et spiritum nostrum peccati vulnere sauciatum, intercedente beata Maria Magdalena, qui ejus precibus tua invicta virtute quatriduanum Lazarum resuscitasti de monumento. Qui vivis.
37.1
IN FESTO SANCTI APOLLINARIS.
37.1
Oratio ut in editis.
37.2
Secreta. Respice, Domine, super has hostias nostras quas nomini tuo sacrandas offerimus, et beati Apollinaris martyris tui atque pontificis prosequatur oratio, per quam nos expiari facias et defendi. Per.
37.3
Communio. Praesta nobis, quaesumus, Domine, ut tua sancta quae sumpsimus, praesidia mentis et corporis....., et, intervenientibus beati Apollinaris meritis, ab omnibus absolve peccatis. Per.
38.1
IN FESTO SANCTAE CHRISTINAE,
38.1
Oratio. Crescat in nobis, Domine, semper sanctae jucunditatis effectus, ut beatae Christinae martyris tuae veneranda festivitas augeatur. Per.
38.2
Secreta. Sanctae Christinae martyris tuae, Domine, preces offerimus, hostiam immolamus, praesta, quaesumus, ut cum praesidio temporali, et vitam nobis praebeant, et incrementa perpetua. Per.
38.3
Communio. Deus virtutum coelestium, quaesumus ut sacrificia pro sanctae Christinae martyris tuae passione delata, desideriorum nos temporalium doceant habere contemptum, et dona habere faciant coelestium gaudiorum. Per.
39.1
IN VIGILIA SANCTI JACOBI APOSTOLI.
39.1
Oratio. Concede nobis, omnipotens Deus, venturam beati apostoli tui Jacobi solemnitatem congruo praevenire honore, et venientem digna celebrare devotione. Per.
39.2
Secreta. Accepta tibi sit, Domine, nostrae devotionis oblatio, et ad sancti Jacobi apostoli tui venturam puriores faciat nos venire festivitatem. Per.
39.3
Communio. Praesta nobis, aeterne Salvator, beati Jacobi apostoli tui nos ubique pia protegi oratione, cujus natalitia per haec sancta quae sumpsimus, votivo praevenimus obsequio. Per.
40.1
IN FESTO SANCTI CHRISTOPHORI.
40.1
Oratio, ut in editis.
40.2
Secreta. Hujus tibi precibus, Domine, quaesumus, grata haec reddatur oblatio, pro cujus est festivitate immolanda. Per.
40.3
Communio. Repleti sumus, Domine, munere solemnitatis optatae, qua beati Christophori martyris tui et celebritate vivamus et precibus. Per.
41.1
IN FESTO NAZARII ET CELSI.
41.1
Oratio, ut in editis.
41.2
Secreta. Sanctorum martyrum tuorum, Domine, Nazarii et Celsi intercessione placatus, praesta, quaesumus, ut quae temporali celebramus actione, perpetua salvatione capiamus. Per.
41.3
Communio. Exaudi, Domine, preces nostras, et populus tuus, qui sub tantis sanctorum martyrum tuorum Nazarii et Celsi patrociniis est constitutus, et a suis offensionibus liberetur, et ab omnibus tueatur adversis. Per.
42.1
IN NATALI SANCTARUM VIRGINUM FLORAE ET LUCILLAE.
42.1
Oratio. Da nobis, Domine Deus noster, in sanctarum martyrum tuarum Florae et Lucillae incessabili veneratione laetari, ut quod digna mente non possumus celebrare, humilibus saltem frequentemus obsequiis. Per.
42.2
Secreta. Offerimus, Domine, preces et munera in honorem sanctarum virginum tuarum Florae et Lucillae gaudentes, praesta, quaesumus, ut et convenienter haec agere mereamur, et remedium sempiternum valeamus acquirere. Per.
42.3
Communio. Sacramentis, Domine, muniamur acceptis, et sanctorum tuarum virginum Florae et Lucillae intercessione contra omnes nequitias irruentes armis coelestibus protegamur. Per.
43.1
IN INVENTIONE SANCTI STEPHANI PROTOMARTYRIS.
43.1
Oratio. Deus, qui es sanctorum tuorum splendor mirabilis, qui hodierna die corpora sanctorum tuorum Stephani, Nicodemi, Gamalielis atque Abibon inventione gloriosa revelasti, da nobis in aeterna laetitia de eorum societate gaudere. Per.
43.2
Secreta ut in editis plurimorum martyrum tempore Paschali.
43.3
Communio. Sumpsimus, Domine, sanctorum tuorum Stephani, Nicodemi, Gamalielis atque Abibon solemnia celebrantes sacramenta coelestia; praesta, quaesumus, ut quod temporaliter gerimus, aeternis gaudiis consequamur. Per.
44
BENEDICTIO UVAE.
44
Bene+ dic, Domine, et hos fructus novos uvae, quos tu Domine rore coeli et inundantia pluviarum et temporum serenitate atque tranquillitate ad maturitatem perducere dignatus es, et dedisti eam ad usus nostros, cum gratiarum actione percipere in nomine Domini Jesu Christi, per quem haec omnia, Domine, semper bona creas. Per.
45.1
IN FESTO SANCTI DONATI EPISCOPI ET MARTYRIS
45.1
Oratio. Deus, qui in beati Donati martyris tui atque pontificis manibus poculi fragmenta restaurare dignatus es, supplicantium preces benignus exaudi, ut quod fiducia non habet meritorum, ejus nobis intercessione donetur. Per.
45.2
Secreta Deus, qui in beati Donati episcopi et martyris tui manibus poculi fragmenta restaurare dignatus es, munera plebis tuae propitiatus intende, ut ejus nobis fiat supplicatio salutaris pro cujus solemnitate hodiernam diem celebramus. Per.
45.3
Communio. Omnipotens et misericors Deus, etc.; ut in editis.
46.1
IN VIGILIA ASSUMPTIONIS SANCTAE MARIAE.
46.1
Oratio, ut in editis.
46.2
Secreta. Magna, quaesumus, Domine, apud clementiam tuam pro nobis interveniat Dei Genitricis oratio, quam idcirco de praesenti saeculo transtulisti, ut pro peccatis nostris fiducialiter intercedat. Per eumdem.
46.3
Communio. Concede, quaesumus, omnipotens Deus, ad beatae Mariae semper virginis gaudia aeterna pertingere, de cujus nos veneranda assumptione tribuis annua solemnitate gaudere. Per eumdem.
47.1
IN ASSUMPTIONE SANCTAE MARIAE.
47.1
Oratio. Veneranda nobis, Domine, hujus diei festivitas opem conferat salutem, in qua sancta Dei genitrix mortem subiit temporalem, nec tamen mortis nexibus deprimi potuit, quae Filium tuum Dominum nostrum de se genuit incarnatum. Qui tecum.
47.2
Secreta. Subveniat, Domine, quaesumus, etc., ut in editis, etiam quoad postcommunionem.
48.1
IN OCTAVA SANCTI LAURENTII.
48.1
Oratio. Beati Laurentii nos faciat, Domine, passio veneranda laetantes, et ut eum sufficienter recolamus, dignus efficiat. Per.
48.2
Secreta. Beati Laurentii martyris nos, Domine, precibus protege, cujus honorabilem passionem muneribus geminatis exsequamur, quae licet propriis sit memoranda principiis, indesinenter tamen permanet gloriosa. Per.
48.3
Communio. Solemne nobis intercessio beati Laurentii martyris, quaesumus, Domine, praestet auxilium ut coelestis mensae participatio, quam sumpsimus, tribuat Ecclesiae tuae recensitam laetitiam. Per.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).