Horae canonicae
Choose a text
id="mobileReaderAuthor" class="mobile-reader-author" href="/authors/auctor-incertus" aria-label="More works by Auctor incertus">
—
⋯
Original / primary: 8232 Horcan
33.1
Hymnus dicendus diebus Dominicis.
33.1
Christe, qui lux es, et dies, Noctis tenebras detege: Lux ipse lumen praeferens, Vitam beatam praedicans.
33.2
[ CXLI] Precamur, Sancte Domine, Defende nos in hac nocte: Sit nobis in te requies, Quietam noctem tribue.
33.3
Ne gravis somnus inruat, Nec hostis nos subrepat; Nec caro illi consentiens, Et nos reos statuat.
33.4
Oculi somnium capiant: Cor ad te semper vigilet: Dextera tua protegat Famulos, qui te diligunt.
33.5
Defensor noster aspice, Insidiantem reprime: Guberna tuos famulos, Quos sanguine mercatus es.
33.6
Memento nostri Domine In gravi isto corpore; Qui es defensor animae, Adesto nobis Domine.
33.7
Tetrae noctis insidias Hujus timoris libera: Tuae lucis magnalibus Totum Clerum inlumina.
33.8
Gloria Patri ingenito, Gloria Unigenito, Una cum Sancto Spiritu, In sempiterna saecula. Amen.
33.9
Psalmus L.
33.10
V\. Scuto circumdabit te veritas ejus: non timebis a timore nocturno.
33.11
Kyrie eleison. Christe eleison. Kyrie eleison.
33.12
Pater noster. Et ne nos. Sed libera nos a malo.
33.13
Deinde dicantur Miserationes in qualibet Feria, pro ut sequuntur per ordinem in secunda, et tertia, et quarta, quinta, sexta, et sabbato Feria. Et quia capitulae praecedunt Miserationes: ideo sic ordinantur, prout debent dici in qualibet Feria.
33.14
Secunda Feria, Capitula. Noctem nostram illumina, aeterne omnipotens Deus, effice nos famulos tuos obdormire quietibus, et virtutibus sanctorum excitare: ut ab omni inquietudine tenebrarum, te auxiliante, ad diem clarum pervenire mereamur.
33.15
Pater noster.
33.16
Benedictio. Crux Domini nostri Jesu Christi a timore nos defendat inimici. R\. Amen. Lux veritatis expellat a nobis omnes tenebras caecitatis; R\. Amen. Ut ejus illuminatione salvati, aeternam benedictionem percipere mereamur. R\. Amen.
33.17
Tertia Feria, Capitula. Deus, lumen aeternum, splendor siderum, claritas noctium, illuminatio incomprehensa tenebrarum da nobis hanc noctem securam, tranquillam, ac quietam; et siqua hodie peccata contraximus, tu pius, et misericors indulge propitius: preces quoque famulorum libenter exaudi, et postulata concede.
33.18
Pater noster.
33.19
Benedictio. Manus Dei Patris omnipotentis auxilietur nobis; R\. Amen. Brachium sanctum ejus confortet nos. R\. Amen. Nihil in nobis praevaleat inimicus: R\. Amen. Sed in omnibus nobis aurem suam inclinet Dominus noster Jesus Christus. R\. Amen.
33.20
Quarta Feria, Capitula. Siqua, Domine, in die peccata contraximus opere, sermone et cogitatione: tu dimitte: et hanc nobis noctem tranquillam, pacificam, ac sine peccato concedere digneris.
33.21
Pater noster, qui es.
33.22
Benedictio. Dominus Jesus Christus, qui nos redemit: in hac nocte custodiat: R\. Amen. Sanctificet corda, et corpora nostra; R\. Amen. Et in bonis actibus compleat desideria nostra. R\. Amen.
33.23
Quinta Feria, Capitula. Custodi, Domine, animas nostras, ac de manu tentatoris erue: elonga a nobis nocturnum furem, et insidias falsitatis ejus a nobis repelle; quia milleformis in nocturnis temporibus adest, quaerens decipere dormientem, quem vigilantem superare non potest. Sed tu, Domine, ut bonus pastor, ac piissimus gubernator, gregem tuum ne deseras: animam tuam pro ovibus posuisti; et quos tuo pretioso sanguine redemisti, salva nos.
33.24
Pater noster, qui es.
33.25
Benedictio. Gregem tuum, Pastor bone, placatus adtende: et hos famulos tuos de tuis benedictionibus reple. R\. Amen. Columitatem mentis, et corporis tribue: et perpetuam salutem concede. R\. Amen. Dona nobis tempora quieta, et pacifica, ut tibi serviamus mente devota. R\. Amen.
33.26
Sexta Feria, Capitula. Custodi nos quiescentes in hac nocte, et velociter exaudire digneris, quas coram te fundimus preces; et ut in tenebris non[ CXLII] timeamus inimicum tentatorem, circumvalla nos fortitudinis Cruce.
33.27
Pater noster.
33.28
Benedictio. Benedictionum suarum super nos Dominus imbrem infundat; et Trinitas inseparabilis a nobis numquam recedat. R\. Amen. Angelica visitatione nos protegat, et nocturnum furem de cubilibus nostris expellat: R\. Amen. Ut cingulo castitatis adstrictos, in nulla nos ludificationis suae arte deterreat inimicus. R\. Amen.
33.29
Sexta Feria, Capitula. Custodi nos, Domine, sicut exaudire, et custodire dignatus fuisti sanctum Danielem orantem in lacu leonum, et non tetigerunt illum bestiae; quia fortissima eum tua tegebat dextera: ferae feroces ante eum se solvebant, et odorantes fugiebant: Fulgeat in nobis, Domine, tuus Christus; et fugiat a cordibus, et a cubilibus nostris perfidus inimicus.
33.30
Pater noster.
33.31
Benedictio. Omnipotens Deus, qui es lumen aeternum; inlabere, quaesumus, sensibus famulorum tuorum: R\. Amen. Custodi gregem tuum; et lupum insidiatorem repelle. R\. Amen. Omnium corda, et pectora conserva; et nocturnum furem cum Angelis suis ab eis procul effuga. R\. Amen.
33.32
Sabbato, Capitula. Amove a nobis, Domine, scandalum noctis; ut non timeamus ambulare in medio umbrae mortis: apprehendat nos virga tua, et baculus tuus: virga Jesse per Beatam Mariam: ipse nos perducat ad vigiliam matutinam, qui nos docuit orare, et dicere:
33.33
Pater noster, qui es.
33.34
Benedictio. Exaudiat nos Dominus, et benedicat. R\. Amen. Protegat ab hoste callido, et ab omni malo defendat; R\. Amen. Et sub umbra alarum suarum, nos in hac nocte, et in omni tempore custodiat. R\. Amen.
33.35
His peractis, qualibet die totius anni, finitis Completoriis in hunc modum, ante aspersionem aquae benedictae, debet dici iste Versiculus, qui sequitur, et Oratio, quae sibi jungitur.
33.36
V\. Custodi nos, Domine, ut pupillam oculi: sub umbra alarum tuarum protege nos.
33.37
Sequitur Oratio. Salvasti nos, Domine Jesu Christe per diem vigilantes; custodi nos in hac nocte requiescentes. quod si nos obdormierimus, Spiritus tuus Sanctus vigilet super nos; et custodiat in hac nocte, et in omni tempore, et maneat semper nobiscum. R\. Amen.
33.38
Per misericordiam tuam, etc.
33.39
Dominus sit semper vobiscum. R\. Et cum Spiritu tuo.
33.40
In nomine Domini nostri Jesu Christi in hac nocte dormiamus, et quiescamus cum pace. R\. Deo gratias.
33.41
Et quando spargitur Aqua benedicta super altare, dicat Presbyter: Benedicat vos Pater, et doceat Filius, et illuminet Spiritus Sanctus. R\. Amen.
33.42
Et quando spargitur Aqua benedicta fidelibus Christianis, debet Presbyter dicere: Gratia Sancti Spiritus mundet vos a delictis omnibus. Vel sic: Filius Dei Patris omnipotentis purget vos omnibus inquinamentis.
33.43
Secunda Feria, Miserationes. Miserere nobis, Deus, miserere nobis. P. Miserere nobis, et esto placatus. V\. Audi pie, Rex aeterne, preces supplicantium, et averte iram. Facinus remitte cunctis, et quietem dona populo fideli. P. Miserere nobis Deus: V\. Omnes simul te precamur, Jesu bone Deus, adtende misertus nostri, precibus exoratus: et quaesita praebe populo tuo fideli. P. Miserere nobis Deus. V\. Praebe pacem, da quietem, et tranquillitatem temporum. Precamur: mitte Angelum salutis, et precantibus fave de tuis excelsis. P. Miserere nobis Deus. V\. Esto nobis, Deus pie, jugiter defensor, simul et protector: sume arma, et exurge, et fer opem nobis, et adesto clemens. P. Miserere nobis Deus.
33.44
Tertia Feria, Miserationes. Miserere Miserator, et esto placatus: miserantem te ostende, et peccata dimitte: ex Maria natus homo, in natura Deus, P. Remitte iniquitates, quas tibi peccavimus: V\. Per quem te semper in coelis credimus regnantem; ita careamus malis, te auxiliante. P. Remitte iniquitates. V\. Te rogamus, te precamur, Sancte pie Deus; ut nos respicias, Christe, miseros placatus. P. Remitte. V\. Grex tuus tibi fatetur mala, quae commisit: tu Pater Sancte, ab hostis voratu. V\. Aggravati sumus: nostra peccata ploramus: non sinas, quod adquisisti, ab Angelis deleri. V\. Ecclesiae catholicae totius conventus ad te proclamantes: praebe pietatis locum. V\. Peregrinis, sive egenis patriam[ CXLIII] redde: aegris pristinam salutem, defunctisque requiem.
33.45
Quarta Feria Miserationes. Miserere Domine, miserere nobis: tibi soli peccavimus, P. Indulge nobis, rogamus. V\. Lapsi sumus graviter in peccatis magnis; veniam precamur. Christe parce nostris delictis. V\. Scelus flemus admissum; non reddas, ut meremur. Pater pie, dele noxam, et peccata relaxa. V\. Poenitentibus conversis redde cor contritum: et elisis jam succurre, Rex coelestis. V\. Pauperibus, egenis, itinerantibus, naufragis, lapsis, viduis, pupillis jam succurre, Rex coelestis. V\. Peregrinis, oppressis, dispersis, et captivis, vinctis, aegris, et defunctis jam succurre, Rex coelestis. V\. Si peccavimus in te, tui sumus, Deus, expectantes, Domine, misericordiam tuam. V\. Quid est homo, Domine, ut ei indigneris: aut genus corruptibile, ut ita de ipso amare irascaris? V\. Nemo de genitis est, qui non impie gessit; nec de confitentibus, qui tibi non deliquit. V\. In hoc nuntiabitur bonitas tua, Deus, cum misertus fueris iniquitatibus nostris.
33.46
Quinta Feria. Miserationes. Miserere, miserere, P. Domine: nos peccavimus; tu dimitte, P. Domine. V\. Nos erramus; tu emenda, P. Domine. V\. Pro infirmis te precamur, P. Domine. V\. Pro defunctis te rogamus, P. Domine. V\. Pro captivis te rogamus, P. Domine. V\. Pro itinerantibus te postulamus, P. Domine. V\. Pro navigantibus te precamur, P. Domine. V\. Pro poenitentibus te exoramus, P. Domine. V\. Indulgentiam postulamus, P. Domine.
33.47
Sexta Feria, Miserationes. Domine, miserere nobis: Domine, miserere nobis; P. Et averte iram tuam a nobis. V\. Domine, audi lachrymantes; Domine, veniam petentes; P. Et averte. V\. Domine, pupillorum precibus subveni misertus, et clemens; P. Et averte. V\. Domine, propter temetipsum suscipe singulorum preces; P. Et averte. V\. Domine, ne spernas plebem; qui tuam pietatem exquirunt; P. Et averte iram.
33.48
Sabbato, Miserationes. Miserere, miserere, miserere, Jesu bone. P. Peccatis nostris finem pone: V\. Audi pie, et intende, et gementes consolare, Pater pie, Rex aeterne. V\. Auctor noster, et Redemptor, plebis tuae sis protector, peccatorumque indultor. V\. Prostrati omnes rogamus: ut agnoscas, supplicamus; ut dimittas, exoramus; V\. Qui pro nobis formam servi induere voluisti, poenitentes jam exaudi; V\. Qui latronem confitentem paradiso collocasti; et alium condemnasti; V\. Qui pro nobis sustulisti passionem quoque Crucis, jam memento servis tuis. V\. Cruce tua jam protege, quos per eam redemisti: dextera tua jam custodi; V\. Qui Lazarum jam putentem de sepulchro suscitasti, oves tuas tu custodi. V\. Rex aeterne, Jesu bone, a macula nos absolve, et in bonis nos confirma; V\. Defunctis dona requiem: dona paradisum: colloca vinctos Sanctorum catervae.
33.49
In tempore Traditionis Domini, Miserationes. Deus miserere, Deus miserere, miserere Deus, miserere. P. Christe miserere: V\. Tu caecis lumen, surdis auditum, mutis eloquium, atque claudis gressum, virtus debilium: V\. Tu pastor et ovis in via salutis: tu passus pro nobis: tu victor perennis: Christe, parce nobis. V\. Audi viduas: rege pupillos: orphanis, et vinctis, fidelibus cunctis, solamen tribue. V\. Adtende, et audi precantes: subveni: furorem remove: praesidium praebe, Redemptor aeterne.
33.50
Oratio. Miserere nobis Domine, miserere nobis: et iniquitatum nostrarum clemens copiam digneris abolere: ut quicquid, suadente inimico, in hujus diei spatio, cogitatu, dicto, vel facto deliquimus, tu qui pius es, et misericors, indulge propitius: ut nocturnam evadentes decipulam, ad constitutum ministeriorum ordinem exurgentes, laudationis tibi jubilum persolvamus indemnes. R\. Amen.
33.51
Oratio. Miserere nobis Domine, miserere nobis: et pupillis, atque egenis, elisis, seu peregrinis, moestis, ac lapsis solamen tribue clemens: oppressos releva, dispersos congrega, captivos revoca, infirmos visita, poenitentibus, reisque dele crimina: et universis christianis congrua largire subsidia; itinerantibus, et vinctis, seu fidelibus cunctis sospitatem animarum et corporum, accumula: innumerosa nostra dele scelera; et propter magnam misericordiam tuam defunctis omnibus sempiternam requiem dona. R\. Amen.
33.52
Et istae duae Orationes debent dici in tempore Quadragesimali post Miserationes; una ipsarum una die, et altera in alia die: et[ CXLIV] his finitis, Presbyter debet spargere Aquam benedictam, ut supra dictum est.
33.53
Sequitur Benedictio mensae.
33.54
V\. Oculi hominum in te sperant Domine: et tu das escam illis in tempore opportuno. V\. Gloria, et honor. V\. Aperis tu manum tuam: et imples omnem animam benedictione. V\. Gloria et honor. V\. Edent pauperes, et saturabuntur: et laudabunt Dominum qui requirunt eum: et vivet cor eorum in saeculum saeculi. Et hic non dicitur Gloria;
33.55
Et sic accedens Minister, qui panes mensae intulit, et imponit hunc versum:
33.56
Qui dat escam omni carni: quoniam in saeculum misericordia ejus. Gloria, et honor Patri, et Filio, et Spiritui Sancto: Sicut erat in principio, et nunc, etc.
33.57
Benedictio. Sanctifica, Domine, hanc escam et potum, quae sumpturi sumus: ut per manus sancti Angeli tui sanctificata, utraque sumere mereamur. R\. Amen.
33.58
Per misericordiam tuam, Deus noster; qui vivis, et omnia regis in omnia saecula saeculorum. Amen.
33.59
In nomine Domini nostri Jesu Christi; sanctificatum, et benedictum: reficiamur cum pace. R\. Deo gratias.
33.60
Et dum prandium, vel coena fit, omnes silentium debent habere: et inter Regulares personas liber regulae debet legi, ne fabulae vulgares intermittantur: quo prandio peracto, vel coena imponitur ista Lauda:
33.61
Vox laetitiae et salutis Alleluia P. In tabernaculis justorum. Alleluia, alleluia. Ecce quam bonum, et quam jocundum, habitare fratres in unum. P. In tabernaculis justorum. V\. Gloria, et honor Patri. P. In tabernaculis.
33.62
Imponitur iste versiculus.
33.63
Refecisti nos Domine in factura tua: et in operibus manuum tuarum exultabimus. V\. Gloria, et honor Patri.
33.64
Oratio. Tibi gratias agimus, et te benedicimus, Domine Jesu Christe: qui nos satiare dignatus es esca et potu carnali; refice nos dono spirituali, et libera nos ab omni nexu peccati; ut tibi semper serviamus illaesi. R\. Amen.
33.65
Per misericordiam tuam, Deus noster; qui vivis, et omnia regis in saecula saeculorum. R\. Amen.
33.66
In nomine Domini nostri Jesu Christi: Dominus abundare faciat servis suis omni benedictione, et pace. Amen. V\. Semper laetitia in domo ista cum fratribus istis. Amen.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).