Meditationes de passione Jesu Christi
Choose a text
id="mobileReaderAuthor" class="mobile-reader-author" href="/authors/auctor-incertus" aria-label="More works by Auctor incertus">
—
⋯
Original / primary: 10290 Medepaj
19.1
Eucharistiam instituit.
19.1
O quid ego faciam, massa peccatorum, Omnium miserrimus qui sum miserorum, Dum tu flectis genua, Rex universorum, Ac lavas vestigia tuorum servorum?
19.2
Jesu clementissime, fons amoris casti, Tu mortales homines in tantum amasti, Quod te ipsum credulis in cibum donasti, Et ut tui memores te sumant, mandasti.
19.3
Christe benignissime, Fili summi Dei, Precor indignissimus miserere mei, Tantum charitatis da, fidei atque spei, Ut digne mysterium sumam tantae rei.
19.4
Quid hinc reddam gratiae, qui me sic dotasti? Qui tuo mysterio tanto deputasti? Ac indignum miserum semper tolerasti, Et cum tuis famulis manere donasti?
19.5
Heu! mihi quid faciam, o summa dulcedo? Cur sic indevotus sum, dum te ipsum edo? Heu! nimis culpabilis, et durus accedo: Heu! illic durus sum, durusque recedo.
19.6
O Jesu, quid faciam vermis et putredo? Cujus mentem opprimit peccati nigredo, Me ministrum dignum fac, Deus, in quem credo, Pro amore Virginis Matris intercedo.
19.7
Mirum est certissime quod te comedendo Anima non liquescit pure diligendo: Sed, heu! esurio, duraque rependo, Nec molliri valeo paululum deflendo.
19.8
Parce mihi, Domine pie, tribuendo, Ut compungi jugiter queam te sumendo, Semper Matrem Virginem atque te colendo, Tuam coenam ultimam mente recolendo.
19.9
O si mea Domina tunc praesens fuisset, Et tradendum Filium hac nocte audivisset: Cibum ut existimo, prorsus non sumpsisset, Sed amaris lacrymis statim se dedisset.
19.10
Heu! mihi, charissima, heu! dilecta mea, Laus sanctorum omnium, nunquam semel rea Utinam existeres nunc in Galilaea, Ne videres Filium passum in Judaea!
19.11
Pie Jesu, supplico pro Matris amore, Reple me gravissimo tuo nunc dolore, Ut tibi compatiens maximo fervore, Suspirando rugiam fletu largiore.
19.12
Cernam cordis oculis te tanquam praesentem, Passiones singulas pro me sufferentem, Tuam Matrem juxta te tibi condolentem, Ad tormenta singula quasi morientem.
19.13
Virgo Dei Genitrix, prae cunctis beata, Pro misericordia precor ex te nata, Pande mihi qualiter fuisti gravata, Tua prole coram te tantum cruciata.
19.14
Mea, mea Domina, plena gratiarum, Dona mihi, obsecro, tuum cor amarum, Et abundantissimos rivos lacrymarum, Ut tuarum sentiam vim angustiarum.
19.15
Utinam ex munere tuo, Jesu Christe Torqueat me quotidie nimis dolor iste, Sicut Matris Virginis cor torquebat triste, Dum te crucifixerant crudeles lanistae!
19.16
Deus homo, quis de te cogitet intente, In nimis passibili corpore manente, Passo tot angustias corpore et mente, Et totus in lacrymas non fluat repente?
19.17
Quis, o Dei Genitrix, potest meditari, Te deflente Filium poenis cruciari, Ac tantis angustiis jam jam fatigari, Et non potest subito ad fletum mutari?
19.18
Heu! mihi durissimo cur ego non comploro? Heu! ut quid tam durus sum, dum te Matrem oro? Domina circumdata supernorum choro, Lacrymas uberrimas da mihi, te imploro.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).