Meditationes de passione Jesu Christi
Choose a text
id="mobileReaderAuthor" class="mobile-reader-author" href="/authors/auctor-incertus" aria-label="More works by Auctor incertus">
—
⋯
Original / primary: 10290 Medepaj
40.1
Crucifigitur.
40.1
Item vide, anima, in Jesum bacchantes Super crucem asperam duriter locantes, Membra horribiliter ferro perforantes Christumque durissime in ligno clavantes.
40.2
Condolendo respice populum vesanum, Nudum corpus premere tenerum, non sanum, Super lignum jacere asperum, non planum, Et crasso transfigere clavo pulchram manum.
40.3
Contemplare manum hanc longam, et decentem Perfossam arctissime pro te patientem, Sanguinem largissime pro te effluentem, Vulnus amarissimum pro te sufferentem.
40.4
O manus sanctissima, pro me penetrata, Clavi crassitudine multum laniata, Percussorum impetu dire lacerata, Scribe in me qualiter es angustiata.
40.5
Pensa haec, durissime, qui nunquam flevisti, Voca instantissime magnae poenae isti. Plorabis, si senseris hunc dolorem Christi, Vel quod ex eis contingit ejus Matri tristi.
40.6
Nempe Mater videns hoc, multo plus languescit, Et commota acriter in se contabescit, Sensu fere perdito semetipsam nescit, Sed in fletu diffluens quasi jam liquescit.
40.7
Proh dolor! molestia hujus plagae dirae Matrem poenis Filii videtur ferire, Curre, curre, anima, nunc festina ire, Ut tu possis Dominam cadentem fulcire.
40.8
Heu, haec est, Domina, dies tibi dura, Nam circumdederunt te modo matris jura, Nunc plusquam parturiens sentis mala plura, Quae carebas pariens materna pressura.
40.9
O dolor! o gemitus! quo te es versura, Undique afflicta es ex nati tortura? Qualiter mensura es stigmata futura, Quae in tantum deficis pro ista fixura?
40.10
Porro tam flebiliter manu hac firmata, Altera distenditur ut sit conclavata, Sed nimis foramina sunt inordinata, Ultra longitudinem corporis formata.
40.11
O dolor! o gemitus! quid nunc sunt facturi. Gemant qui considerant jam non corde duri, Cum festinant trahere pravi perituri Ad loca foraminum membra Christi puri.
40.12
Ut legisti, anima, cerne diras gentes, Inhumanos milites, heu! nimis furentes, Membra tui Domini cum vi distendentes, Et in modum pellium hinc inde trahentes.
40.13
Quis effari potest, quod tantum tetenderunt Ut membratim Dominum pene diviserunt, Pene ossa omnia ejus nudaverunt, Ac clavis crassissimis membra transfixerunt?
40.14
O quis loqui poterit horribilitatem, Aut crucifigentium hanc crudelitatem, Patientis Domini hanc poenalitatem, Matris et amantium hanc anxietatem?
40.15
Hic nostrae duritiae penitus frangantur, Medullae in lacrymas sanguinis vertantur, Cuncta desideria in Jesum figantur, Et sic corda valido dolore scindantur.
40.16
Sive fletu pudeat nos haec praeterire, Hic a cordis gemitu decet nos rugire, At cum flente Domino dolorem sentire, Vel si ipse dederit, cum eo obire.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).