Reader

Littera G. abbatis sancti Benedicti Floriacensis, cantoris Carnotensis et J. magistri scholarum Aurelianensium, judicum a Domino papa datorum super quadam sententia ab ipsis data inter episcopum Parisiensem et abbatem Sanctae Genovefae Parisiensis.

G. Dei gratia Sancti Benedicti Floriacensis abbas, G. cantor Carnotensis, et J. magister scholarum Aurelianensium, omnibus ad quos litterae istae pervenerint, salutem in Domino.

Mandatum summi pontificis ad nos sub hac forma descendit: INNOCENTIUS episcopus, servus servorum Dei, dilectis filiis Floriacensi abbati, magistro scholarum Aurelianensium et cantori Carnotensi, salutem et apostolicam benedictionem.-- Inter venerabilem fratrem nostrum Parisiensem episcopum et dilectum filium abbatem Sanctae Genovefae super possessione juris parochialis in parochia de Monte controversia quondam mota et per delegatos apostolicae sedis ad nos instructa causa remissa, eam, salva quaestione proprietatis, curavimus sententialiter definire, sicut ex rescripto apostolico perpenditur evidenter. Ne autem videamur inutiliter laborasse si sententia nostra non fuerit adimpleta, exsecutionem ipsius vobis de consensu partium duximus committendam, per apostolica vobis scripta mandantes quatenus utramque partem ad parendum legitime inducentes, monitione praemissa, per censuram ecclesiasticam, appellatione remota, compellere procuretis; contradictores, si qui fuerint, vel rebelles ut a sua praesumptione desistant, districtione simili compellentes; nullis obstantibus litteris, si quae apparuerint praeter assensum partium a sede apostolica impetratae. Quod si non omnes iis exsequendis potueritis interesse, tu ea, fili abbas, cum eorum altero nihilominus exsequaris.-- Datum Anagniae IX Kal. Januarii, pontificatus nostri anno quarto. Inspecta igitur sententia summi pontificis, intelleximus inter Parisiensem episcopum et Ecclesiam suam ex una parte et abbatem et Ecclesiam de Monte ex altera, super possessione juris parochialis in parochia de Monte controversiam emersisse, talem scilicet: Dicebat enim episcopus quod presbyter qui parochianis de Monte divina pro tempore ministrabat, etiamsi esset canonicus regularis, a Parisiensi episcopo curam parochiae recipiebat, et parochianos de Monte ad nutum episcopi vel archidiaconi citabat, vocabat, ligabat pariter et solvebat, et si quis excommunicatus esset ab episcopo vel archidiacono vel etiam interdictus, presbyter ipse eum non admittebat aliquatenus ad divina; et in possessione totius juris parochialis se et praedecessores suos integre fuisse dictus episcopus asserebat. Cum itaque dominus papa possessionem juris episcopalis seu parochialis tam in praedictis quam in omnibus aliis in tota parochia de Monte adjudicasset episcopo memorato, exceptis duntaxat interdicto burgi et institutione et destitutione sacerdotis, in quibus duobus articulis abbas fuerat absolutus, convenientes in Ecclesia Sanctae Genovefae, populo parochiae convocato, deinde in capitulo Sanctae Genovefae praesentibus abbate et canonicis, taliter sumus mandatum apostolicum exsecuti. Praecepimus siquidem praedicto Parisiensi episcopo auctoritate apostolica ne burgum Sanctae Genovefae interdicto supponeret et ne presbyterum in praedicta parochia institueret vel destitueret; abbati vero et canonicis ne impediant episcopum vel archidiaconum Parisiensem, qui in omnibus quae supra petita dicuntur et aliis parochialibus, exceptis duobus supradictis, in quibus abbas fuerat absolutus, possessione sibi a domino papa adjudicata et eidem episcopo praesenti a nobis auctoritate apostolica assignata libere utantur. De presbytero etiam, quicunque ipsi parochiae divina pro tempore ministrabit, praecepimus ut in his quae supra diximus fuisse petita et omnibus aliis ad jus episcopale vel parochiale spectantibus, exceptis supradictis duobus, episcopi vel archidiaconi mandatum adimpleat et fideliter exsequatur. Salva utrique partium quaestione proprietatis, sicut in apostolica sententia continetur. Ut autem mandatum apostolicum et exsecutionis nostrae series in omnibus supradictis inviolabiliter observetur, tam praedictos episcopum et archidiaconum quam abbatem et canonicos de Monte, presbyterum etiam qui pro tempore illi parochiae ministrabit et omnes alios tam clericos quam laicos qui praedictae sententiae apostolicae vel huic exsecutioni nostrae rebelles seu contradictores exstiterint excommunicavimus.

Actum Parisius anno incarnati Verbi 1201, mense Martio.