Reader

Littera formae pacis et compositionis inter dominum Odonem episcopum Parisiensem et abbatem et ecclesiam Sanctae Genovefae.

In nomine sanctae et individuae Trinitatis. Amen. Haec est forma compositionis et pacis inter dominum Odonem episcopum et Ecclesiam Parisiensem ex una parte, et Joannem abbatem et Ecclesiam Sanctae Genovefae ex altera, super querelis quas dictus episcopus movebat de jure parochiali in parochia de Monte et procurationibus quas in parochialibus Ecclesiis canonicorum de Monte petebat, et e contra canonici de Monte adversus episcopum super capella Sanctae Genovefae sita in civitate Parisiensi, scilicet quod Parisiensis episcopus habebit omne jus episcopale seu parochiale in tota parochia de Monte, et presbyter qui illi parochiae spiritualia pro tempore ministrabit, etiamsi sit canonicus regularis, praesentabitur episcopo et ab eo curam recipiet animarum, et parochianos ipsius parochiae ad mandatum episcopi vel archidiaconi citabit, vocabit, ligabit pariter et solvet, chrisma et oleum ad opus parochiae ab Ecclesia Parisiensi recipiet, ad synodum etiam veniet, nec tamen circatam vel synodaticum reddet. Item licebit episcopo et archidiacono in singulos de praedicta parochia et in omnes interdicti et excommunicationis ferre sententiam; quae si lata fuerit, presbyter qui illi parochiae deserviet excommunicatos seu interdictos de ipsa parochia non admittet; tamen, illis exclusis, in altari parochiali quod est intra majorem ecclesiam nihilominus celebrabit. Sed nec alios interdictos vel excommunicatos ab episcopo vel archidiacono, undecunque fuerint, nullo unquam tempore ipse vel alius in altari parochiali recipiet aliquatenus ad divina. Ab hac autem generalitate exceptae erunt ab omni interdictione episcopi et archidiaconi viginti personae inter servitores et garciones infra ambitum canonicorum habitantes, comedentes, cubantes et levantes, scilicet unus janitor, duo quadrigarii, duo cursores, unus hostelarius, unus carpentarius, unus hortolanus, quatuor in servitio furni, quatuor in servitio coquinae, unus sarcinator, unus vigil, unus matricularius, unus infirmarius et extra septa canonicorum sex servitores, scilicet, tres escuerii abbatis, unus serviens capicerii, unus clauserius vinearum, unus tolonearius. Nullus autem viginti sex praedictorum viarius poterit esse vel major burgi, ita ut praedicta gaudeat libertate. In his siquidem praedictis viginti sex personis, aut in illis quae in locum earum per abbatem fuerint subrogatae, nullam episcopus vel archidiaconus potestatem habebit, nisi de earum matrimonio separando agatur. Illa etenim causa pleno jure ad episcopum et archidiaconum pertinebit. Uxores autem praedictorum sex servitorum in parochia de Monte extra canonicorum septa manentium jurisdictioni episcopi et archidiaconi in omnibus spiritualibus subjacebunt; eo salvo ut pro forefactis maritorum suorum interdici vel excommunicari non possint, et quando in parochia positum fuerit interdictum, liceat ipsis sicut et viris earum in altari parochiali audire divina. In praedicta autem parochia de Monte neque episcopo sine consensu canonicorum, neque canonicis sine episcopo, novam ecclesiam seu capellam aedificare licebit. In augmentum vero praedictae parochiae dedit episcopus ad habitandum vineam suam de brunello, ita ut omnes qui in loco illo habitaverint, cum aliis parochianis de Monte a presbytero parochiae supradictae divina percipiant sacramenta, et ad episcopum et archidiaconum pleno jure pertineant. Similiter et illi qui habitabunt in clauso quod dicitur mali vicini, si quando illud inhabitari contigerit. Praeterea ecclesiam de Roissiaco dedit episcopus canonicis memoratis ad eorum usum perpetuo possidendam, cum additamento villae quae dicitur Vallis Derlandi; in qua villa licebit praedictis canonicis de Monte, si voluerint, aedificare capellam, episcopi tamen jurisdictioni subjectam et tam in ecclesia de Roissiaco quam in ipsa capella, sicut et in aliis eorum ecclesiis parochialibus, ad curam animarum recipiendam presbyterum episcopo praesentabunt. De procurationibus autem quas episcopus in eorum ecclesiis exigebat ita statum est, ut ecclesiae de Jausseigny, de Espinolio, de Vaunis, de Nanturra, de Rooneyo, et Sancti Medardi, a procurationibus episcopi liberae sint penitus et immunes. Verum in ecclesia de Roissiaco quatuor libras Parisiensis monetae accipiet praedictus episcopus annuatim; de quibus procurationem sibi parabit episcopus unam vel plures in ipsa ecclesia de Roissiaco vel in qua voluerit praedictarum. Praedicti quoque canonici Sanctae Genovefae, ut omnis amoveatur annuente Domino materia seditionis et scandali, capellam Sanctae Genovefae sitam in civitate Parisiensi dederunt episcopo et successoribus ejus in perpetuum liberam et quietam, nullo sibi in ea jure retento, ut possit ipse vel ejus successores de praedicta capella pro sua voluntate disponere. Praebendam quoque et vicariam quas praedicti canonici in ecclesia Beatae Mariae Parisiensis habebant, praedicto episcopo et ejus successoribus quietaverunt, nihil omnino sibi juris in praedicta praebenda seu vicaria reservantes. Haec autem omnia ita in perpetuum servabuntur, non obstante sententia summi pontificis quam pro se Parisiensis episcopus inducebat, vel aliis quibuslibet munimentis ab alterutra partium impetratis vel in posterum impetrandis. In hujus rei testimonium et perpetuam firmitatem duo scripta in eumdem tenorem confecta sunt; quorum alterum habebit Ecclesia Parisiensis sub sigillis duobus, abbatis videlicet et capituli Sanctae Genovefae; et reliquum habebit ecclesia de Monte similiter sub duobus sigillis, episcopi scilicet et capituli Beatae Mariae Parisiensis.

Actum anno incarnati Verbi 1202, mense Junio.