Reader

Sequentem quoque epistolam Innocentii III, qua, post relationem Eliae abbatis Sanctae Columbae Senonensis et J. magistri scholarum Aurelianensium, quos in hac causa delegaverat, compositionem istam confirmat, visum est isthic addere, quamvis data sit anno sexto pontificatus. Addentur etiam litterae Odonis episcopi Parisiensis, ex quibus constat eum decano et capitulo Parisiensi concessisse praebendam et vicariam quam abbas et capitulum Sanctae Genovefae habebant antea in cathedrali ecclesia Parisiensi.

INNOCENTIUS episcopus, servus servorum Dei, venerabili fratri episcopo Parisiensi et dilectis filiis abbati Sanctae Genovefae eorumque capitulis, salutem et apostolicam benedictionem.

Cum inter vos super jure parochiali in parochia de Monte, super capella Sanctae Genovefae sita in civitate Parisiensi, et super procurationibus quas tu, frater episcope, in parochialibus ecclesiis tuae dioecesis ad praedictam ecclesiam Sanctae Genovefae de Monte spectantibus requirebas, fuisset quaestio diutius agitata, et post labores varios et expensas multiplices quas propter hoc sustinuistis utrinque, mediantibus bonis viris, salva tamen apostolicae sedis reverentia, amicabili fuerit compositione sopita, tandem vobis humiliter postulantibus ut eidem compositioni vobis et ecclesiis vetris nostrae manum confirmationis apponere dignaremur, dilectis filiis Eliae abbati S. Columbae Senonensis et J. magistro scholarum Aurelianensium nostris dedimus litteris in mandatis ut si compositionem ipsam sine pravitate provide factam cognoscerent et hinc inde sponte receptam, nec in praejudicium apostolicae sedis, ad quam ecclesia Sanctae Genovefae nullo mediante pertinere dignoscitur, redundaret, vice nostra eam auctoritate apostolica confirmarent, id nobis postmodum per suas litteras insinuantes, ut et nos confirmaremus eamdem cum essemus plenius per eorum relationem instructi. Qui, sicut obedientiae filii, legitime in commisso sibi negotio procedentes, forma compositionis ejusdem et privilegiis ecclesiae Sanctae Genovefae diligenter inspectis, compositionem ipsam invenientes secundum quod praemisimus factam et hinc inde receptam, eam auctoritate nostra confirmare curarunt, sicut in eorum litteris plenius perspeximus contineri. Unde pari desiderio et unanimi voluntate nobis humiliter supplicastis ut eidem compositioni manum confirmationis nostrae de benignitate sedis apostolicae apponere dignaremur. Nos igitur quod per delegatos eosdem secundum formam mandati nostri factum est ratum et firmum habentes, saepedictam compositionem sine pravitate provide factam et a vobis sponte receptam, ut in scriptis authenticis exinde confectis plenius continetur, auctoritate apostolica confirmamus. Nulli ergo, etc.

Datum Laterani, VII Kal. Aprilis, pontificatus nostri anno sexto.

ODO Dei gratia Parisiensis episcopus, omnibus Christi fidelibus ad quos praesens scriptum pervenerit, aeternam in Domino salutem.

Ad universorum notitiam volumus pervenire quod cum venerabiles viri abbas et capitulum Sanctae Genovefae praebendam et vicariam quam in ecclesia Beatae Mariae Parisiensis habebant, nobis et successoribus nostris ratione compositionis quae inter nos et ipsos intercesserat contulissent penitus et quitassent, nos postmodum tam praebendam quam vicariam memoratam dilectis fratribus nostris Hugoni decano et capitulo Parisiensi concessimus et quittavimus perpetuis temporibus possidendam, ut tam de praebenda quam vicaria eisdem prout voluerint liceat ordinare; ita tamen quod capitulum supradictum, praeter decem libras Parisiensis monetae quas matriculariis sacerdotibus in Ecclesia nostra a nobis noviter institutis habendas perpetuo contulerunt, eisdem matriculariis septem libras Parisienses, et post cessionem vel decessum magistri Alberti sexaginta solidos ejusdem monetae annuatim solvere tenebuntur. Ut igitur donatio ista et concessio perpetuo robore convalescat, praesentem chartam sigilli nostri fecimus impressione muniri.

Actum anno incarnati Verbi 1204, pontificatus nostri anno septimo.