Reader

XXXVI. Charta qua Ansebertus dona confert ecclesiae Augustodunensi sancti Nazarii, basilicae sancti Symphoriani, oratorio sancti Leodegarii, sorori suae Segolinae, et germano suo Autario ( ann. 696).

Actoribus ecclesiae sancti Nazarii martyris Augustidunensis et sancti Symphoriani martyris, ubi ipse pretiosus in corpore requiescit, Ansebertus peccator, episcopus. Divina nos ammonet lectio, ut quod Christi misericordia in rebus terrenis confert, abundantia de sua largitate, unde in hoc saeculo utimur de ejus pietate in suis pauperibus pro abluenda mole peccaminum offeramus. Ergo dono ad suprascriptam ecclesiam sancti Nazarii martyris, ubi ego, ac si indignus, cura pastorali deservio, de alodo parentum meorum villam cui vocabulum est Hauxiaco, in pago Belnense, cum soliditate et appenditiis, domibus, villarebus, campis, pratis, silvis, vineis, pascuis, aquis, servis, libertis ac colonis accensisque omnibus, et quidquid in ipso pago praesenti tempore possidere valemus, aut quod inante ibidem in Dei nomine acquirere, vel quidquid dici aut nominari potest, cum integra soliditate suprascripta ecclesia sancti Nazarii ut habeat volo. Et pro portione illa quam germanus meus Autarius apud nos ibidem habet, portionem nostram in villa Binago ut habeat volo. Et fortasse( quod non credimus) si ei fuerit contrarietas, in suprascripta villa in Hauxiaco et Binago, quicquid pro portione mea nobis de alodo parentum meorum, tam de paterno quam de materno quod debitum est, ecclesia sancti Nazarii ut habeat volo atque decerno. Villa vero Pagetis, quam ex parte conquisivimus, ecclesia sancti Nazarii ut habeat volo. Villa vero Solempriaco, quam Wlbertus per suum instrumentum nobis dedit, et Leodebertus in usuario tenet, ecclesia sancti Nazarii ut habeat volo atque decerno. Basilica sancti Symphoriani martyris, quae mihi ab adolescentia mea in omnibus unde substantia mea protexit, unde credimus ut et futura ejus intercessio apud aeternam pietatem pro remissione peccatorum meorum intercessor assistat, villa vero Tres- valles in pago Maginontense una cum appendiciis suis, domibus, villaribus, campis, pratis, vineis, silvis, accensisque omnibus quod Wlbertus per sua instrumenta in nostro nomine delegavit, ecclesia sancti Symphoriani ad suos clericos pascendos in eleemosina nostra ut habeat volo. Similiter ad oratorium sancti Leodegarii, qui subtus Sanctum Symphorianum constructus esse videtur, ubi( si Deo placuerit) corpusculus insuper requiesciturus erit, colonicas in pago Maginontense, in Taviniaco, quas Wlbertus per suum strumentum nobis dedit, et colonias illas quas Bertoaldus in Eulnicio per suum strumentum dedit, ad oratorium sancti Leodegarii ut habeat volo. Villa vero Corvillo in pago Autissiodorense, quam nos cumque suis acquisivimus, ipsum oratorium domni Leodegarii ut habeat volo atque decerno. Similiter in pago Augustidunense colonicas quas Beroaldus per venditionem nobis dedit, ipsum oratorium domni Leodegarii ut habeat volo. Villa vero Buxido, quidquid ibidem germanus meus in usuario tenet, ipsum oratorium domni Leodegarii ut habeat volo. Villa vero Muido, quae est prope montem Wavinarum, in pago Vertudensi, cum omnibus quidquid ibi adspiciunt oratorium domni Leodegarii ut habeat volo; sic tamen ut inde lumen et sacrificium ipso oratorio stabiliat, et omnia sub potestate fratrum ipsius ecclesiae sancti Symphoriani in omnibus esse debeant. Et quatuor matricularios qui ad ipsum oratorium domni Leodegarii deserviunt ibidem instituimus ut totum victum atque vestitum de suprascriptis rebus habeant habere, qualiter et illi alii matricularii, qui ad basilicam sancti Symphoriani deservire videntur, portionem victus et vestitum accipiant. Et pro eo quidquid in ista epistola delegavimus, in usuario germanae nostrae Sicolinae concessimus, illos matricularios, et illud lumen ad oratorium domni Leodegarii, et in hoc usu teneat, et debeat procurare: et post ejus discessum, tam pontifex supradictus et ecclesia sancti Nazarii, quam clerici dictae ecclesiae sancti Symphoriani, quantum in ipso strumento instituimus, in Dei nomine debeant procurare. Reliqua vero facultate, quicquid nos tempore nostro conquisivimus, quod in ista epistola incommemoratum nobis remansit in quibuscumque locis adcrescere cupimus, ecclesia sancti Symphoriani ut habeat volo. De alodo parentum meorum, quicquid portio nostra in quibuscumque locis vel territoriis, quod portio nostra tam de paterno quam de materno nobis debitum est sub omne supellectile quicquid dici aut nominari potest, dulcissima germana mea Sigolina, si nobis superstes fuerit, in omnibus recipiat, et ubicumque pro fidelibus Christi atque ad Ecclesiam Dei delegare voluerit, in omnibus habeat potestatem. De mancipiis vero, quae dato pretio comparavimus aut adquisivimus, in omnibus volo ut ingenui esse debeant et ut pro ingenuis suprascripta germana mea, dum modo advivit, in suum debeant adesse obsequium. Post ejus discessum, Christianorum defensorem seu regem, si eligere voluerint, ut habeant in eorum sit potestate. De suprascripta facultate quam ad supradictas ecclesias sancti Nazarii vel sancti Symphoriani delegavimus, dum ipsa germana mea Sigolina saeculum contemsit, et dum cognovimus jugiter se Christo obtulit et sanctae Mariae in ancillam se tradidit, sub usu et beneficio hoc debeat tenere, et, post ejus discessum, ad suprascriptas ecclesias per istam epistolam integra soliditate delegavimus, cum re meliorata ad ipsas ecclesias debeat pervenire. Si quis, quod non futurum esse credimus, si ea quae superius sunt conscripta, quod nos plenissima voluntate decrivimus de heredibus nostris aut quislibet opposita persona refragare voluerit, non hoc valeat vindicare quod repetit, et Judae traditoris similis efficiatur, et insuper inferat actoribus ecclesiae, aut cui hoc per istam epistolam delegavimus, una cum fisco, auri lib. VI, et in argento pondus LX, et haec epistola quam nostra simplicitas plenissima voluntate decrevit, perpetuam obtineat firmitatem.

In Christi nomine Ansebertus, peccator episcopus, hanc epistolam a me factam relegi et subsc.-- Adoneus episcopus rogatus subsc.-- Agnericus episcopus rogatus subsc.-- Aglius episcopus rogatus subsc.-- Winebertus, jubente domno Anseberto episcopo, hanc epistolam scripsi et subscripsi.

Notavi quod fecit mensis Augusti die V, anno secundo regnante domino Childeberto rege.