Reader

SANCTISSIMI PATRIS BERNARDI Quingentesimum jubilaris gloriae annum inter coelites agentis Sapientissimo confratri Ex una matre (monasterio et ordine Cisterciensi) progenito, melliflui Spiritus haeredi ALANO MAGNO DOCTORI UNIVERSALI. Anno lustro-saeculari, id est a morte B. Bernardi quingentesimo jubilari in orbem e typis prodeunti, felicibus auspiciis, studio, industria, labore Rdi ac eruditissimi domini D. Caroli de WISCH, S. theologiae professoris, monasterii Dunensis dignissimi prioris D. Balduinus WINNCEL Ejusdem monasterii Religiosus ac sacerdos accinebat.

Quis mihi det te fratrem sugentem ubera matris meae. Cant VIII. Quanta triumphalis dat quinquagesimus annus Gaudia quanta polo jubila nardus agit! Annos si numeres, numerum, Bernarde, notabis, Queis defessa solo, mens tua rapta polo est. Sed quia conspicimus se diffundentia plausu Sidera, cur plausus contegat ordo suos? Jubilet ordo sacer, Patri conjubilet orbis Sit par, ut coelo, sic et in orbe melos. Prodeat e prelo pietatis amator Alanus, Fraterna ut fratris jubila fonte fluant. An Fratrem, Bernarde, tuum dignoscis? amore Una duos suxit divite lacte parens. Ut Cistertiadum primoribus ortus uterque est, Sic domus una, parens una duobus erat. Conspiceres volitare pari super aethera gressu, Mellifluos dices, cuique subesse favos. Nam sugens, matris si pendet ad ubera Nardus, Nec minus haec felix ubera Alanus habet. Pendulus ora movet Bernardus ad ubera dextrae; Alano nectar dulce sinistra dedit. Suxit uterque pari tractu, saturatus uterque: Si satur esse potest quem satiarit amor. Mella dedit Nardus, sed mellea donat Alanus, Mellea mellifluo hoc promis, Alane, libro. Desine nunc fratrem, sugentemque ubera Matris Quaerere, Narde: tibi frater Alanus adest. Frater adest, matris quia dividit ubera tecum, Ubera, quae gnatis ubere lacte fluunt. Hunc dum producit Bernardi ad jubila fratrem, Carolus hoc libro jubila liber agit. Carole, quanta tibi laudum argumenta tuarum! Res tibi, dum vives plena decoris erit. Jubila Bernardi splendore voluminis ornas, Frater honoratur posteriore prior. Ergo, Bernardo fratrem dat, quisquis Alanum Producit: Caroli sed labor iste fuit. Iste liber fuit iste labor, liber iste laboris Partus, nec vestri parcus honoris erit. Carole, in Alano vives post fata superstes, Non poterit calamus, non manus ista mori. Tempus erit( tacita meditabor caetera mente) Cum dabitur scriptis gloria summa tuis. Sed sileo: laudemque grave est audire modestis Hanc alii spectent: his meruisse sat est.

CHRONOGRAPHICA: 1. beato bernarDo, haeC aLani sCrIpta CaroLI Labore et Dono ConseCrantur, 3. bernarDo, et sCrIptorI gLorIaM. 2. aLano Magno, feLICI CantiCo, honores, CaroLe, Canes..