Reader

SERMO LXVI. De octo beatitudinibus oppositis tolidem peccatis.

Eodem ordine quo praecessit culpa, subsecuta est etiam culpae medicina. Primum peccatum est factum in coelo per superbiam praevaricatoris angeli, qui dixit in corde suo: In coelum conscendam, super astra Dei exaltabo solium meum: sedebo in monte testamenti, in lateribus aquilonis: ascendam super altitudinem nubium, ero similis Altissimo. In se ipso tumuit, et de sorte beatorum spirituum ejectus, coelorum regnum amisit. Contra hoc peccatum dictum est: Beati pauperes spiritu, quoniam ipsorum est regnum coelorum. Secundum peccatum commissum est per inobedientiam mulieris in paradiso. Ex hoc peccato facta est caro rebellis spiritui, ut, quoniam spiritus ejus non fuit subjectus Creatori, nec caro sit subjecta spiritui. Contra hoc est dictum: Beati mites, quoniam ipsi possidebunt terram( Matth. V, 4). Horum duorum peccatorum comprehendit Dominus medicinam, dicens: Discite a me quia mitis sum et humilis 1196 corde. Tertium peccatum fuit, quod ipsa mulier virum quoque secum traxit in culpam. Debuit quidem illa peccatum suum deflere, nec addere peccatum peccato; sed in hoc se putavit habere consolationem, si virum faceret peccati sui participem. Quodammodo enim naturale est unumquemque velle, sive in vitiis, sive in virtutibus, associare sibi consortem. Contra hoc peccatum est istud remedium: Beati qui lugent, quoniam ipsi consolabuntur.

Quartum peccatum commisit Adam, qui consensit. Adam enim, sicut ait Apostolus, non est seductus; mulier autem seducta in praevaricatione fuit. Illa per ignorantiam, iste peccavit per infirmitatem. Peccavit autem nimis diligendo uxorem, non quia ejus voluntatem fecit, sed quia eam voluntati praetulit divinae. Unde et a Domino ei dictum est: Pro eo quod obedisti voci uxoris tuae plus quam meae, maledicta terra in opere tuo. Justum quippe erat ut illius magis voluntatem faceret, cui plus debebat. Quis vero ambigat plus eum debere conditori, quam uxori? Siquidem uxori erat astrictus tantum per amorem, Deo autem per timorem simul et amorem. Plus ergo debuerunt valere duo vincula ad tenendum eum erga Dei praeceptum, quam unum tantum erga conjugis affectum. Contra hoc quartum peccatum adhibitum est remedium: Beati qui esuriunt et siliunt justitiam, quoniam ipsi saturabuntur. Habuit quidem Adam justitiam, a justo Deo creatus justus; sed quia non eam ex libero arbitrio direxit, facile ab ea per idem liberum arbitrium defluxit. Quo contra dicitur per Psalmistam de Christo: Dilexisti justitiam, et odisti iniquitatem. Quintum aeque peccatum commisit, qui propriam culpam retorsit in uxorem, cum ait: Mulier quam dedisti mihi sociam, dedit mihi de ligno, et comedi. Primo quidem crudelis in se, qui peccatum suum excusavit; secundo in uxorem, quam accusavit. Et utique satis sumpla est digna de peccato vindicta, quando eam accusavit, cujus amore peccavit. Contra hoc peccatum dictum est: Beati misericordes, quoniam ipsi misericordiam consequentur.

Sextum peccatum fecit Eva quae, cum increparetur a Domino cur hoc fecisset, respondit ei: Serpens decepit me, et comedi. Sic declinavit et ipsa in verba malitiae, ad excusandas excusationes in peccatis, refundens culpam in serpentem, quasi immunis a crimine, cum nil obfuisset suggestio serpentis, si illa negasset assensum propriae voluntatis: et forte praecessit in ea aliquis motus superbiae, unde seduci meruit a serpente. Contra quod dictum est? Beati mundo corde, quoniam ipsi Deum videbunt. Septimum peccatum factum est extra paradisum, quando Cain consurrexit adversus Abel fratrem suum, et interfecit eum. Ex eo jam tempore inveteratum est ut mali insurgant in bonos, et opprimant eos. Hujus peccati remedium est illud: Beati pacifici, quoniam filii Dei vocabuntur. Quod si ab infestatione cessare noluerint iniqui, patienter tolerent eos justi, audientes consolationem quae sequitur, et dicit: Beati qui persecutionem patiuntur propter justitiam, quoniam ipsorum est regnum coelorum. Ecce quam necessarius fuit adventus Christi, qui carnem subjiceret spiritui, hominem pacificaret sibi, Deum reconciliaret homini.