Reader

Leges

« Extendite, fratres, simul vestras ad Deum dextras, et ad meos attendite sermones, quos volo ut vestrae fidei sacramento confirmetis, hoc meum maximum et primum sit decretum, ut vestra connubia, quae hactenus habuistis ut lupanaria, amodo juxta canonum scita sint legitima, sint privata, sint insolubilia, ut una vir conjuge, conjux uno viro contenti vivant. Si autem conjux virum, aut vir conjugem spreverit, et rixa inter eos usque ad dissidium efferbuerit, qui ex his in priorem copulam redire noluerit, nolo ut, secundum nostrae terrae ritum, in servitudinem redigatur, sed per hujus decreti angariam redigatur in Ungariam, qualiscunque sit persona, nec liceat ut pretio se redimat, aut in hanc terram redeat, ne contagio unius oviculae totum serpat per ovile.» Severus episcopus dixit:« Quicunque aliter fecerit, anathema sit. Eadem sententia sint plectendae virgines, et viduae, et adulterae, quae nomen bonum amisisse, ac per scortum concepisse noscuntur.» Tunc dux subjungens ait:« Si vero mulier proclamaverit pari vice non amari, sed inclementer a viro affligi, detur inter eos judicium Dei, et qui inventus fuerit reus, poenas solvat. Similiter de his qui homicidiis infamantur, archipresbyter comiti illius civitatis nomina eorum ascribat, et comes eos conveniat, et si sunt rebelles, in carcerem redigat, donec aut poenitentiam dignam agant, aut si negant, ignito ferro, sive adjurata aqua examinentur. Fratricidas autem et parricidas, sive sacerdotum interfectores et hujusmodi capitalium criminum reos archipresbyter assignet comiti, vel duci, qui per manum et ventrem ferratos, de regno ejiciat, ut instar Cain jugi et profugi circumeant terram. Tabernam quoque, quae est radix omnium malorum, et parari et paratam comparari prohibemus. Et qui fuerit hujus decreti violator tabernarius, in foro ad palum suspensus, et usque ad praeconis fastidium caesus, depiletur; res tamen ejus non infiscentur, sed potus tantum in terram projiciatur, ne quis eo polluatur; potatores autem deprehensi non prius de carcere exeant, quam in fiscum ducis unusquisque tercentos nummos componat. Fora vero Dominicis diebus fieri interdicimus, quae imo maxime in his celebrant regionibus, ut caeteris diebus suis vacent operibus. Si quis autem Dominicis diebus vel festis publice ad ecclesiam feriari indictis, in servili opere inventus fuerit, ipsum opus, et quod in opere inventum fuerit, archipresbyter tollat, et tercentos nummos in fiscum ducis componat. Et qui in agris, vel silvis sepeliunt mortuos, ab hujusmodi archipresbyter bovem tollat, et tercentos nummos in fiscum ducis solvant; mortuum tamen in polyandrio fidelium condemnat denuo. Haec sunt quae Deus odit, haec sunt quae S. Adalbertus pertaesus, non suas deseruit oves, et ad exteras maluit ire docturus gentes.» Severus episcopus dixit:« Ista ducis deliberatio justa sit anathemate firma.»