Reader

O magne rerum Christe rector inclyte, Parent Olympi perpetim cui sidera; Et vota festis annuis faventia, Largire nobis casta, praebe et sobria, Placare possint quae tuam clementiam. Plebs ecce cuncta debitum recursibus Solvit dierum, prona corde, et corpore; Confisa mente deprecans suffragia, Ut singulorum ponderata questibus, Sustollat alma pectora indulgentia. Laetum rependit carminum concentibus Cantum, sonoro pangit ore, faucibus; Tua potenter supplices ut dextera Probrosa tollens acta nostra corrigas, Sis et malorum fautor intus flentium. Semper petentes impetrare possumus Nostris medelam expiatos moribus; Si nos benignus, et pius respexeris, Qui tanta tantis contulisti servulis, Ut nil patrono isti desit gratiae. Culpas gementes pandimus miserrimi, Non obsequelam perdituri credimus; Cum copiosa pascitur potentia Regis; et astat supplicator optimus, Qui flectere iram poteratque noxiam. Ne quod beatis sentiat cohortibus, Hostis duellis pullulare casibus: Ne vel caducum germinare et odia, Fraudem dolumve permoveri machinis, Flamma pudicis conflagrare filiis. Haec mente fixa clara dum revolvimus, Libet dicatum praedicare servulum; Tuum ministrum, Christe Jesu, vernulum. Et festa mixtis gaudiis cum pangimus Sequatur inde tota te laudatio. Tu sacra templa, tu, Pater, coelestia Habes sacrata tu, Deus, per saecula: Regno potiris, et regis praesentia In sanctos sanctis cerneris mirabilis, Regnansque solus mira factis exeris. Hinc obsecramus expiari munera, Redire prorsus per synaxin perditos, Coeli receptes collocesque in regia: Qui das resurgant ut perempta corpora, Concede corda ut convalescant gratia. Nostrum reatum confitentes prodimus, Frenatus ictus occidat, sententia Quae reddit atram dira conscientiam: Rogare donat cum voluntas prospera Tua patentem proditos, ac januam. Momenta nulla transvolant in tempora, Quae non sint nostri sordidata criminis: Succedat ante, quaesumus, contagia, Sic digna nostris pessimis purgatio, Quam reddat ultor poenam factis debitam. Videmus orbes restitutos lumini, Claudosque plantis exilire tumidis; Consumpta tabe membra convalescere, Mortis sopore pressa; demum surgere, Laetos deinde convenire sospites. Repelli torvos et fugari daemones Tormenta poenis ejulantes Tartari. Adire et coelum versipellis angeli Suo latenter confodique vulnere, Suisque telis sauciatum conteri. Ut Conditoris haec patent miracula, Sic claudicantes mentis aegritudine Serpens repulsus deserat nequissimus; Sic nigra corda nubilo socordiae Fulgore suo praemicent clarissima. Haec nempe virtus Christus est tutissima, Aemilianum quae tulit per ardua Vitae tropaea, quae corona: praemio, Nostris ut esset saeculis sectabilis; Floretque fortis advocatus infimis. Inite mecum consonantes carmina, Narrate cuncta, praedicate, et psallite, Regi perenni, cujus haec sunt omnia, Nostri clamoris et resultent cantica, Polique templa resonent concentibus. Offerte Summo gloriam et Sublimi, Offerte honorem Trinitati maximum, Offerte grates saeculorum Principi, Offerte psalmum vocibus, vel actibus, Offerte laudem sempiterna in saecula. Amen.