Reader

GENUINA. ANNO 1194. CLXIII. Ecclesiae S. Petri Eboracensis protectionem suscipit, possessionesque ac privilegia confirmat. (Romae, apud S. Petrum, Jun. 16.)[WILKINS, Concil., I, 503.]

COELESTINUS episcopus servus servorum Dei, dilectis filiis SIMONI, decano et capitulo ecclesiae Sancti Petri Eborum, eorumque successoribus canonice substituendis in perpetuum.

Cum Romana Ecclesia, cui dante Domino praesidemus, justis postulantium votis pia semper consueverit benignitate adesse, dignum est et consonum, ut illi de speciali ejus praesidio et protectione confidant, et ut possint ea contra malignorum incursus, tanquam optatae defensionis clypeo, praemuniri, quorum fides et devotio in honore ipsius et reverentia certo rerum experimento probatur. Eapropter, dilecti in Domino filii, justis postulationibus vestris clementer annuimus, ecclesiam vestram, in qua divino mancipati estis obsequio sub beati Petri et nostra protectione suscipimus, et praesentis scripti privilegio communimus. Propterea quascunque possessiones, quaecunque bona eadem ecclesia impraesentiarum juste et canonice possidet, aut in futurum concessione pontificum, largitione regum vel principum, oblatione fidelium, seu aliis justis modis, praestante Domino, poterit adipisci, firma vobis vestrisque successoribus et illibata permaneant. In quibus haec propriis duximus exprimenda vocabulis:

Scilicet villam de Dalton cum pertinentiis; villam de Cotom cum pertinentiis; villam de Brothton cum ecclesia, molendino et omnibus aliis pertinentiis; villam de Helperby cum pertinentiis; terram de Ulfrikby cum pertinentiis; terram de Gisppesmare cum pertinentiis; terram de Ledesham cum pertinentiis; terram de Hoton cum pertinentiis; ecclesiam de Burgo cum capella et omnibus aliis pertinentiis; ecclesiam de Lanum cum capella et decimis molendinorum archiepiscopi et omnibus aliis pertinentiis; ecclesiam de Burton cum pertinentiis; ecclesiam de Lesyngton cum pertinentiis: ecclesiam de Quetungkebur cum pertinentiis; ecclesiam Sancti Joannis ad pontem Eborum; ecclesiam Sancti Joannis in Marisco; ecclesiam Sancti Laurentii in Walmegut cum pertinentiis infra civitatem et extra; ecclesiam Sancti Andreae in Hecmangergat; ecclesiam Sancti Marci in Conyngstrete; ecclesiam Sanctae Mariae ultra Usam; sexaginta solidos de manerio de Patrington; duas marcas argenti de nundinis Sancti Petri ad Vincula in Eborum; de synodalibus XI solidos ad cantariam, et centum solidos ad cantariam, et centum solidos ad magistrum scholarum spectantes. Antiquas quoque et rationabiles ecclesiae vestrae consuetudines et hactenus observatas vobis et vestris successoribus confirmamus, et decernimus eas in ecclesia vestra futuris temporibus absque contradictione cujuslibet firmiter observandas. Auctoritate apostolica nihilominus prohibemus, ne archiepiscopus vester, qui pro tempore fuerit, in decanum vel aliquam personam, canonicos vel eorum ministros, sive clerici sint sive laici, aliquam excommunicationis, interdicti, seu suspensionis sententiam, contra immunitatem quam praedecessores vestri et vos hactenus habuistis, sine assensu decani et capituli audeat promulgare, vel eos a choro arcere vel ab ecclesiarum ingressu; quod si praesumpserit, eam decernimus non tenere. Statuimus insuper ne decanus, qui secundum Deum in ecclesia vestra fuerit institutus, contra ecclesiae vestrae solitam libertatem et consuetudinem hactenus observatam, homagium obtentu beneficii ecclesiastici archiepiscopo facere teneatur.

Praeterea paterno intuitu providere volentes ne in his quae ad vos spectare noscuntur, laesionem aliquam incurratis, electionem liberam magistri domus hospitalis Sancti Petri Eborum, sicut eam ex antiqua et approbata consuetudine hactenus ecclesia vestra obtinuit, vobis vestrisque successoribus confirmamus; ita quod qui id pro tempore fuerit assumendus, nonnisi per electionem vestram consuetam assumatur. Et ne status ecclesiae vestrae temeritate qualibet circa observantias rationabiles mutationis seu turbationis incurrat, dignitates, libertates, immunitates quae a regibus et principibus seu archiepiscopis vestris vobis et ecclesiae vestrae rationabiliter sunt concessae et Romanis pontificibus approbatae, seu etiam regum seu principum vel archiepiscoporum, necnon episcoporum, Romanorum pontificum authenticis continentur, ratas esse censemus et eas perpetuam obtinere firmitatem.

Prohibemus insuper ne archiepiscopus vel aliquis alius contra antiquam et approbatam Eborum ecclesiae libertatem, personas seu canonicos, aut clericos vel homines vestros in debitis et consuetis excommunicationibus praegravare eos pecuniaria poena mulctare praesumat, nec sine satisfactione debita relaxare sententias quas capitulum vestrum, secundum antiquam et approbatam ecclesiae vestrae consuetudinem, in invasiones rerum seu possessionum suarum illicitos, aut temerarie detentos, et in vestros homines graviter delinquentes, rationabiliter duxerit proferendas. Ordinationem quoque canonicorum seu personarum, sicut ab ipsa fundatione loci hactenus est observatum, liberam esse decernimus: ut videlicet honesta idonea persona, cui archiepiscopus vester vacantem in ecclesia vestra praebendam vel dignitatem duxerit conferendam, secundum antiquam ecclesiae vestrae consuetudinem, decano et capitulo praesentetur. Receptus autem per capitulum in canonicum per librum et panem per manum decani et capituli debeat investiri: postmodum vero in osculo fratrum receptus, de conservanda fidelitate ecclesiae vestrae et libertatibus et consuetudinibus juri consentaneis pro viribus defendendis; secretis capituli non detegendis juramentum consuetum et debitum interponat: et tunc de mandato decani et capituli per manum cantoris, prout moris est, installetur. Si quis vero contra consuetudinem antiquam et approbatam in ecclesia vestra per aliquem fuerit introductus, nec pro persona nec pro canonico habeatur. Si vero archiepiscopus vester vacantem in ecclesia vestra praebendam vel personatum infra Lateranensis concilii secundum formam praescriptam idoneae personae, canonica admonitione praemissa, non contulerit, liceat vobis auctoritate apostolica, nullius contradictione vel appellatione obstante, illam contra ejusdem concilii statuta conferre.

Decrevimus ergo ut nulli omnino hominum liceat praefatam ecclesiam temere perturbare, aut ejus possessiones auferre, vel ablatas retinere, minuere, seu quibuslibet vexationibus fatigare; sed omnia integra conserventur eorum pro quorum gubernatione ac sustentatione concessa sunt, usibus omnimodis profutura, salva sedis apostolicae auctoritate. Si igitur in futurum ecclesiastica saecularisve persona hanc nostrae constitutionis paginam sciens contra eam temere venire tentaverit, secundo tertiove commonita, nisi reatum suum congrua satisfactione correxerit, potestatis honorisque sui dignitate careat, reamque se divino judicio existere de perpetrata iniquitate cognoscat, et a sacratissimo corpore et sanguine Dei et Domini Redemptoris nostri Jesu Christi aliena fiat, atque in extremo examine divinae ultioni subjaceat; cuncti autem ejusdem loci jura servantes, fructum bonae actionis percipiant, et apud districtum judicem praemia aeternae pacis inveniant.

Decernimus ergo ut nulli omnino hominum liceat hanc paginam nostrae protectionis, confirmationis, prohibitionis, atque concessionis infringere, vel ei ausu temerario contraire. Si quis autem hoc attentare praesumpserit, indignationem omnipotentis Dei et beatorum Petri et Pauli apostolorum ejus se noverit incursurum.

Datum Romae, apud S. Petrum, XVI Kalendas Julii, pontificatus nostri anno quarto.