Reader

A. D. MCXVIII.

Domnus apostolicus Paschalis secundus, diutina purificatus aegritudine, presentem in Domino vitam finivit( Jan. 21). Pro quo Johannes Cajetanus, vir prudens et venerandus[ et] in Romana semper aecclesia inreprehensibiliter eidem apostolico collaborans, eligitur et cunctorum catholicorum unanimi consensu rite consecratur.

Balduvinus rex Hierosolimitanus in expeditione contra Arabes positus, cum languorem, quo, licet lenius, tamen diu, vexabatur, ad vitalia pervenisse sentiret, alterum Balduvinum de Rohâs pro se regem designavit, ipseque Christo domino, pro quo multa jam bella praeliatus est, animam suam fide plena et confessione bona tradidit. In dominica palmarum( Apr. 7) juxta fratrem suum Gotefridum, loco Calvariae, mausoleum, germani mausoleo simillimum, cum maximo diversorum populorum planctu suscepit.

Valde mane dominicae resurrectionis( Apr. 14) die coelum a parte meridiana apertum tantam lucis effudit abundantiam, ut lunae, quae tunc clarissima nimirum videbatur, lumen inestimabili fulgore detergeret et per unam vel amplius horam-- quod multis testibus comprobamus-- omni solis luce clarior permaneret. Ipso tamen spatio crux non modica per idem foramen dependens apparuit; cujus tam auri quam gemmarum varietas evidenter discerni potuit.

Heinricus imperator, dum Paduanis regionibus immoraretur audito transitu apostolici, Romam properavit, et primo quidem in electione domni Johannis, qui et Gelasius II dictus est, assensum prebens, postea vero eodem a sua se communione subtrahente, non sine quorundam Romanorum favore alterum quendam Burdinum, ex Hispania supervenientem, apostolicae sedi imposuit; sicque scisma, quod jam sperabatur emortuum, crudeliter revixit. Nam eodem Romanae kathedrae libere potito, Gelasius cum his qui secum abierant cardinalibus caeterisque catholicis quos congregare poterat, apud Capuam, juxta quod litterae ab ipso circumquaque transmissae testantur, caesarem una cum ydolo suo dampnavit. Hinc per Campaniam cum suis ad Burgundiam transmigravit, ac Viennae synodum congregari constituit[ non sine quorundam Romanorum favore alterum quendam Mauricium, ex Hispania supervenientem, apostolicae sedi imposuit; sicque scisma, quod jam sperabatur emortuum, crudeliter revixit. Nam eodem Romanae kathedrae libere potito, Gelasius cum his qui secum abierant cardinalibus ceterisque quos congregare poterat catholicis, apud Capuam, juxta quod literae ab ipso circumquaque transmissae testantur, caesarem una cum papa suo dampnavit. E.].