Reader

CCLX. Privilegium pro ecclesia SS. Apostolorum in Monte Cornelio Leodiensi. (Anno 1148, Mart. 16.)[HUGO, Annal. Praem., I, Preuv., p. 275.]

EUGENIUS episcopus, servus servorum Dei, dilectis filiis LUCAE abbati ecclesiae Sanctorum Apostolorum in Monte Cornelio juxta Leodium sitae, ejusque fratribus tam praesentibus quam futuris regularem vitam professis, in perpetuum.

Quoties illud a nobis petitur, quod religioni et honestati convenire dignoscitur, animo nos decet libenti concedere et petentium desideriis congruum impertiri suffragium. Eapropter, dilecti in Domino filii, praedecessoris nostri felicis memoriae papae Innocentii vestigiis inhaerentes, vestris justis postulationibus clementer annuimus, et praefatam Sanctorum Apostolorum ecclesiam, in qua divino mancipati estis obsequio, sub beati Petri et nostra protectione suscipimus, et praesentis scripti patrocinio communimus; statuentes ut quascunque possessiones, quaecunque bona eadem ecclesia in praesentiarum juste et canonice possidet, aut in futurum concessione pontificum, largitione regum vel principum, oblatione fidelium, seu aliis justis modis, Deo propitio poterit adipisci, firma vobis vestrisque successoribus et illibata permaneant; in quibus haec propriis duximus exprimenda vocabulis: in urbe Leodii viginti quinque solidos, quos bonae memoriae Obertus Leodiensis episcopus, de theloneo suo singulis annis vobis persolvendos concessit; domum quam dedit vobis Lambertus de Mosa cum grenario juxta forum Leodiense, domum Mariae de Coir in eodem foro septem mensae tam panes quam subterales vendentium; domum extra castellum, vineam Radulphi apud villare episcopi; terram Udelini camerarii supradicti episcopi; terram Gisleberti, terram Illini cum domibus, hortis et pratis; terram Bovonis presbyteri, terram Frederici, terram Joannis filii ejus, terram Joannis generi ejusdem Frederici; terram Godefridi militis in villa quae dicitur Latin, terram quam praefatus Lambertus de Mosa vobis donavit, terram Frederici villici et uxoris ejus Mabiliae in villa quae dicitur Holonia super Jecoram, et in villa quae dicitur Hastaples, terras quas Gislebertus de Insula cum uxore sua vobis donavit, et quod habetis in villa quae dicitur Richen in ecclesia, in censu denariorum, in terra arabili, in silvis, pratis, terris cultis et incultis; quidquid etiam habetis in villa quae dicitur Mecheroul, et in sarto quod appellatur Roliers, in loco qui dicitur Heis, sive curtis Aufridi, molendinum cum terra quam ibi habetis in villa quae dicitur Guntheries, scilicet in ecclesia Beati Petri et Sancti Georgii, in decima in censu denariorum, terra arabili, silvis, pratis, pascuis, terris cultis et incultis; in villa quae appellatur Radenchen domum hospitalem, cum pertinentiis suis, quam Gislebertus miles vobis concessit; quotidianum quoque usum in lignorum silva qui dicitur Brues, sive in alia ad curiam Jupiliae pertinentem, quam venerabilis frater noster Albero Virdunensis episcopus ecclesiae suae consensu vobis concessit et scripto suo firmavit; totum alodium quod appellatur Bofoith, tam in silvis, quam in pratis, pascuis, terris cultis et incultis, cum ecclesia iu eodem alodio sita, et decima, et dote ad eamdem ecclesiam pertinente; terram quam tenetis in villa quae appellatur Borsoith; mansum terrae quam habetis inter Hesbines et Halincurth cum familia; terram Walteri militis de Bassines cum familia; praeterea ordinem et propositum vestrum canonice vivendi secundum beati Augustini Regulam et institutionem Praemonstratensis Ecclesiae nullus audeat immutare vel super vos ordinem alterius professionis inducere; nulli etiam fratrum vestrorum, post factam ibidem professionem, absque abbatis et capituli sui licentia, liceat ex eodem claustro discedere; discedentem vero nullus audeat retinere. Oleum autem infirmorum, consecrationes altarium vel ecclesiarum ac ordinationes clericorum, a dioecesano episcopo accipiatis, si gratiam sedis apostolicae habuerit, et ea vobis gratis et sine exactione aliqua exhibere voluerit; alioquin eadem a quolibet catholico accipiatis episcopo qui nostra fultus auctoritate, quod postulatur, indulgeat. Porro libertatem ecclesiae vestrae ab episcopis Oberto et Alberone privilegio determinatam atque firmatam assensu Leodiensis Ecclesiae, vobis auctoritate apostolica confirmamus. Decernimus ergo, etc.

Ego Eugenius Catholicae Ecclesiae episcopus.

Datum Remis per manum Guidonis sanctae Romanae Ecclesiae diaconi card. et bibliothecarii, IV Nonas Maii, indictione VI, Incarnationis Dominicae anno 1147, episcopatus vero domni Eugenii papae III anno tertio.