Reader

Carceri mancipantur, ubi eos confortat S. Eulogius.

Suscipiunt denique abdita carceris sponsarum Christi membra tuenda magis quam eliminanda, quae semper pudico honestata decore ab ipsis cunabulis actu sanctimoniae praepollentes, praecipua virtutum gratia reluxerunt. In quibus aliquandiu sanctae virgines permanentes, insistunt jejunio, orationi incumbunt, totumque illum horrorem ergastuli coelestium meditatione hymnorum expediunt. Tunc nos etiam ex antro deducti, cum isti carceri deputarentur, Deo favente, ad instructionem illarum, librum Documentum Martyrii condimus; eisque jam pene a proposito suasione quorumdam labentibus, in solatium meditandi et consummandi praelia inchoata dicavimus, connectentes in finem opusculi orationem suo certamini, omnique Ecclesiae congruentem.