Reader

EPISTOLA XX. AD AGLEMARUM ABBATEM.

FROTHARIUS, gratia Dei episcopus Tullensis Ecclesiae, AGLEMARO venerabili abbati perpetuam in Christo opto salutem.

Noverit me dilectio tua corporis incolumitate utcunque vigere, et pro sospitate cordis ac corporis tui supernae pietatis clementiam saepius flagitare. Cupio enim te longaeva felicitate potiri, et post hujus vitae calcem supernae quietis charismate perenniter recreari. Caeterum sciat me fraternitas vestra in novis ecclesiae nostrae aedificiis vestro suffragio indigere. Unde peto ut nobis mittas ad decorandos parietes colores diversos, qui ad manum habentur, videlicet auri pigmentum, folium Indicum, minium, lazur, atque prusinum, et de vivo argento juxta facultatem. Haec nobis dirigito, et a nobis debitum servitium iterum exigito. Charitatis enim indissolubili nexu astricti vicissim nobis famulari, et fraterna obsequia redhibere compellimur. Valete in Domino semper.

Vestra dudum largissima a Deo data providentia ovile sanctae Ecclesiae ita manibus meis commisit, ut irruentium luporum morsus contrairem, eosque pariter quanta voluissem virtute comprimerem atque necarem. Sed quia adhuc de eodem certamine tempus rationem reddendi non est, referam tamen interim vestrae industriae in nece luporum corporalium qualiter decertavi. Postquam enim illud episcopium mihi commendastis, interfeci in vestris forestibus lupos CCXL; interfeci dico, quia me jubente et ingeniante capti fuerunt. Explicit. Amen.