Reader

II. Litterae Gilduini de ecclesia S. Petri de Monte Letherico concessa monachis Longi Pontis, et de compensatione facta canonicis S. Victoris, qui in ea praebendam, et annualia possidebant.

G. coenobii S. Victoris dictus abbas cum fratribus suis omnibus fidelibus tam posteris quam praesentibus in perpetuum.

Omnium bonorum et maxime religiosorum proprium est totius sanctitatis et religionis propagationi et profectui congaudere. Gaudium hoc nostris, Deo miserente, temporibus in mutatione ecclesiae B. Petri de Monte Letherico piis desideriis oblatum est donatum. Siquidem ipsa ecclesia per Dei gratiam et piissimi Ludovici Francorum regis voluntatem, consilio et assensu, de saeculari statu in religionis statum promota est, et ad haec servis Dei monachis scilicet de Longo Ponte assignata est, et in perpetuum donata. Nos itaque qui in praedicta S. Petri ecclesia praebendam unam et integram et aliarum praebendarum annualia habemus, mutationem illam in melius volumus et approbamus, et per manum domini nostri Theobaldi Parisiensis episcopi supradictam praebendam et annualia ecclesiae de Longo- Ponte in perpetuum habenda concedimus. Ne autem ecclesia nostra pro illius ecclesiae mutatione et nostra benevola concessione redituum suorum diminutione nimia gravaretur, consulente, mediante, imo faciente praedicto Parisiensi episcopo, in cujus arbitrio et potestate, utriusque partis assensu, totum in hoc consistebat negotium, monachi de Longo- Ponte nobis recompensationem vicariam reddiderunt, et rebus ecclesiae suae et ecclesiae S. Petri ea quae subscripta sunt ecclesiae nostrae communi assensu perpetuo possidenda dederunt. Apud Athegias terras, vineas, decimam et quidquid omnino ecclesia de Longo Ponte ibidem habebat. Apud eamdem villam duos solidos census, quos praedicta ecclesia S. Petri ibidem habebat. Haec omnia, sicut dictum est, ecclesia de Longo- Ponte ecclesiae nostrae libere et quiete semper habenda donavit, et donum semper commendans sigilli sui impressione firmavit. Ut autem mutationis praedictae ecclesiae S. Petri et praebendae et annualium nostra concessio rata in perpetuum habeatur, chartulam istam concessionis nostrae tenorem continentem conscripsimus, eamque sigilli nostri impressione firmavimus, et monachis de Longo Ponte habendam et conservandam tradidimus. Nomina etiam fratrum nostrorum, ad hujus rei testimonium et ad majorem firmitatem subscripsimus. Signum G. abbatis, etc.