Reader

ICY COMENCE LE LIVRE DES LIGNAGES DECA MER. CHAPITRE I. Ci dit des rois de Jérusalem.

La sainte cité de Jerusalem, où il plot à nostre Sauvour souffrir mort et passion pour nous racheter des peines d' enfer, fu conquise sur les ennemis de nostre foi par un vendredy à oure de None à 15 jours dou mois de juignet l' an de l' Incarnation de nostre seignor Jesu Crist M. XCIX et fut remise el pooir des feaus de Crist. Li baron et li pelerin ehleurent à roy et à seignor Godefroi de Buillon duc de Lorraine, lequel ne se vost coroner, ne porter corone, car il dit que en la cité où nostre Sauvour porta corone d' espines le jour de sa passion, ne porteroit corone d' or, et que celui coronement que nostre sauvour ot en passion pour nostre rédemption suffisoit pour tous les roys qui devroient estre de celui saint royaume. Lequel Godefroi de Buillon ne regna que un an, et moru sans heir de son cors. Aprez la mort doudit Godefroi fu rois de Jerusalem Bauduin ses frères, lequel estait conte de Rohais, et dona le conté à un sien cousin qu' il avoit nomé Bauduin dou Bourc qui estoit fis au conte Huet de Retel, et de la contesse Melissent. Li dessus dis rois Bauduins fu mout prod' hom et moru sans heir, et furent escrit sur sa sépulture ces vers qui dient enci. Rex Bauduinus alter Judas Machabaeus, spes patriae, tutor Ecclesiae, quem formidabant, cui dona et tributa reddebant Cesar Dam Egiptus ac homicida Damascus, proh dolor! ut tam modico clauditur hoc tumulo. Aprez la mort dou devant dit roy Bauduin fu roy de Jerusalem Bauduin dou Bourc conte de Bohais, qui fu fis au conte Huon de Retel et de la contesse Melissent com a esté dit, lequel dona le conté de Rohais à un sien parent qui avait nom Jocelin de Courtenai. Le devant dit roy Bauduin esposa feme la fille d' un riche home de Ermenie qui estoit sire de Meletin, et nom avoit Gabriel, laquele estoit nomée Morfie, et ot d' elle 4 filles Melissent, Aalis, Odiart et Joie. Melissent esposa Fouques le conte d' Anger, Aalis esposa Beimont prince d' Antioche, Odiart fu feme dou conte Reimont de Triple, Joie fu nonain, et fu pour lui estorce l' abaie de saint Ladre de Betanie. Aprez la mort dou dit roy Bauduin fu roy de Jerusalem Fouques ses gendres, maris de sa fille Melissent, et ores deus fis Bauduin et Amauri. Le roy Fouques chassait un lievre au plain d' Acres, et ses chevaus li chei sur le cors et fu mors. Puis sa mort fu roy de Jerusalem Bauduin ses fis, et Amauri fu cuens de Jaffe. Li rois Bauduin envoia en Grece pour avoir feme, et ot Jodore la niesse de l' empereour Manuel, et n' en orent nul heir. Puis la mort dou roy Bauduin, Amauri ses frères fu rois, mais le patriarche ne le vost coroner tant que il se parti de Agnés, la fille dou conte Jocelin de Rohais, laquele estoit sa cousine, ceste Agnés avoit fiancé Hues de Ibelin, et si com elle venoit au royaume elle arriva à Jaffe, le cuens Amauri par le conseil de ses homes la prit à force et l' esposa, et ot d' elle un fils et une fille, Bauduin et Sibelle; pour ce ne le vost le patriarche coroner tant qu' il la laissast, laquelle vint à Hue de Ibelin, et dit qu' il estoit ses maris, et il la prit. Li rois Amauri esposa feme de Grece Marie la niece de l' empereour Manuel, et orent une fille qui ot nom Isabeau. Aprez la mort dou roi Amauri fu roi de Jerusalem Bauduin se fis lequel il avoit eu de la susdite Agnés et fu Mezel. Sebille sa seur fu femme dou marquis de Monferrat, et orent un fis qui ot nom Bauduin, et puis la mort dou dit marquis elle esposa Gui de Leseignau. Isabeau la fille dou roy Amauri et de la royne Marie esposa Gaufroi dou Thoron. Puis la mort dou roy Mezel fu roy de Jerusalem Bauduin ses niés, qui estoit fis au marquis si com vous avez oy, lequel son oncle le roy Mezel avoit fait coroner en l' aage de 7 ans, lequel fut nomé le petit roy et moru enfant. Puis fu rois de Jerusalem Gui de Leseignau maris de la susdite Sebille, jaçoit ce que li baron offrirent à Aufroi dou Thoron qui estoit mari de Isabeau la fille dou roy Amauri et de la royne Marie qui le feroient roy, et il fu si chatif qu' il ne le vost, ains ala au roy Gui, et il li fit homage. Au tens de celui roi Huis fu la terre perduë, puis aprez au siège d' Acre moru la royne Sebille sa feme, et fu royne Isabeau sa seur qui fu feme de Hauffroy dou Thoron, et esposa Conrar le marquis de Monferrat, et orent une fille qui ot nom Marie que l' on apelloit la Marquise. Les Hassissins occirent le dessusdit marquis, et la royne Isabel esposa le comte Henry de Champagne, et orent 2 filles Aalis et Phelippe. Aalis esposa le roy Hugue de Chipre, et Phelippe esposa Gerart de Briene, et ot 5 filles et un fis. L' une fille fu dame de Hauteville, et l' autre fu dame de Montmoreli, et la tierce contesse de Grant- pré, et la quarte de Bieuvres, la quinte fut abaiesse de une abaie en Champagne, en une vile qui a nom de Nerru, laquelle abaie a nom la Pitié. Le fils a nom Gerart si comme son pere. Le conte Henri de Champagne dessusdit chei d' une fenestre dou Chasteau d' Acre au fossé, et moru, et la royne susdit Isabel esposa le roy Eimeri de Chipre, et orent 2. filles Sebille et Melissent, Sebille esposa le roy Luion d' Ermenie, Melissent fu feme dou prince Reimont d' Antioche, que l' on apelloit le prince Borgne. Puis la mort de la susdite royne Isabeau escheit le royaume à Marie sa fille, laquelle elle avoit eu dou marquis de Monferrar, ci com est dessus dit, laquele exposa Johan de Briene et ce fu le roy Johan d' Acre et orent une fille qui ot nom Isabeau qui esposa l' empereor Frederic, et orent une fille et un fis qui ot nom Conrat, et ce fu le roy Conrat qui fut pere de Conradin, à cui le roy Charles fit coper la teste à Naples.