Reader

LIBER PRIMUS. EPISTOLA XVIII.

Cononi vitae laudabilis episcopo, sanctae, apostolicae sedis legato 9 frater Goffridus ejusdem sedis alodarius, et servus, dilectionem et totius dilectionis servitutem.

Vindocinense monasterium, alodium B. Petri et patrimonium, quid libertatis, 35 vel immunitatis, seu dignitatis nunc usque habuerit, et usque in finem saeculi, Deo patrocinante, habebit; beatissimorum apostolorum Petri et Pauli auctoritas sancta per venerabiles eorum successores eidem loco concessa vos melius edocebit, et vobis, ut credimus, majorem diligendi nos occasionem praebebit. Nos enim non potest non diligere, nisi qui eorum irretractabilem auctoritatem non diligit. Quaedam Ecclesiae nostrae privilegia vobis idcirco mittimus transcripta; quia quam speciali, imo quam singulari dignitate sancta catholica Romana Ecclesia locum nostrum ab ipso suae creationis initio sibi conjunxerit, bonitatem vestram nolumus ignorare. Nam, quidquid illa sublimavit et dilexit, vos omnino diligere credimus, et velle honorare nullatenus dubitamus. Optimae memoriae papa Urbanus, et qui nunc est, dominus Paschalis papa in Ecclesia nostra, ubi suae charitatis gratia per undecim dies manserunt, ista et multa alia privilegia nostra viderunt, et ore proprio legerunt, et suae auctoritatis decreto firmaverunt. Sancta itaque octo catholicorum Romanorum pontificum auctoritate, et confirmatione monasterium nostrum viguit, et quietum mansit, et nulli penitus personae, nisi soli papae potestatem aliquam aut dominationem in eo exercere vel ejus rectores qualibet occasione sollicitare licuit. Et quidem satis juste; quia ab ipso sui principio per venerabiles et religiosos fundatores suos ab apostolica sede hanc inviolabilem 36 dignitatem obtinuit. Hac tanta a successoribus B. Petri praedecessoribus nostris dignitate concessa, nullus eorum alicui concilio unquam adfuit, quod ab ipso summo Romano pontifice non exstitit celebratum. Illis tamen temporibus, Hildebrandus archidiaconus Romanae Ecclesiae, deinceps papa factus, Giraldus Ostiensis episcopus, Stephanus, et Raimbaldus atque multi postea magnae auctoritatis viri a latere B. Petri in legationem missi, ad has partes venerunt, et monasterium nostrum, et libertatem ejus atque dignitatem dilexerunt, et illibatam omnino servaverunt. Nos siquidem ad vos venire, quem charissimum dominum et amicum credimus, et vobis honorifice servire desideravimus, et desideramus: et desiderium nostrum diligenter compleretur, si necessitas corporis et quorumdam perversitas hominum pateretur. Sunt etenim in itinere quidam Ecclesiae nostrae inimici quorum injurias, quia res B. Petri nobis commissas eis relinquere nolumus, usque ad proprii corporis captionem jam sumus experti: qui nunc etiam nobis captionem solummodo non minantur, sed mortem: Viziliacensis abbatis nobis obitum exprobrantes, quem sine vindicta capite dicunt fuisse truncatum. Unde discretioni vestrae humiliter supplicamus, quatenus aut conductum nobis quaeratis, aut locum significetis securum, ubi possimus vobis occurrere, et quaedam ad utilitatem domini papae vestrae dilectioni revelare.