Reader

Responsoria de Sapientia Salomonis.

Resp. Emitte, Domine, sapientiam de sede magnitudinis tuae; ut mecum sit, et mecum laboret: ut sciam quid acceptum sit coram te omni tempore. Vers. Da mihi, Domine, sedium tuarum assistricem sapientiam. Ut. Resp. Domine Pater, et Deus vitae meae, ne derelinquas me in cogitatu maligno. 859 Extollentiam oculorum meorum ne dederis mihi, et desiderio[ desiderium] maligno averte a me, Domine. Aufer a me concupiscentiam, et animo irreverenti et infrunito ne tradas me, Domine. Vers. Da mihi, Domine, ut supra. Et animo. Resp. Da mihi, Domine, sedium tuarum assistricem sapientiam; et noli me reprobare a pueris tuis, quoniam servus tuus sum ego, et filius ancillae tuae. Vers. Domine Pater, et Deus vitae meae, ne derelinquas me in cogitatu maligno. Resp. Gyrum coeli circuivi sola, et in fluctibus maris ambulavi. In omni gente et in omni populo primatum tenui, superborum et sublimium colla propria virtute calcavi. Vers. Ego in altissimis inhabitavi, et thronus meus in columna nubis. Superborum. Resp. Initium sapientiae timor Domini; intellectus bonus facientibus eam: laudatio ejus manet in saeculum saeculi. Vers. Dispersit, dedit pauperibus. Laudatio. Resp. Verbum iniquum et dolosum longe fac a me, Domine; divitias et paupertates ne dederis mihi, sed tantum victui meo tribue necessaria. Vers. Ne forte satiatus evomam illud, et perjurem nomen Dei mihi. Sed. Resp. Ne derelinquas me, Domine Pater, et dominator vitae meae, ut non corruam in conspectu adversariorum meorum, ne gaudeat de me inimicus meus. Vers. Apprehende arma et scutum, ut supra. Ne gaudeat. Resp. Magna enim sunt judicia tua, Domine et inenarrabilia verba tua: magnificasti populum, et honorasti. Vers. Deduxisti sicut oves populum tuum, in manu Moysi et Aaron. Magnificasti. Resp. Super salutem et omnem pulchritudinem dilexi sapientiam, et proposui pro luce habere illam. Venerunt mihi omnia bona pariter cum illa. Vers. Dixi sapientiae: Soror mea es, et prudentiam vocavi, anima mea. Venerunt. Resp. Quae sunt in corde hominum oculi tui vident, Domine, et in libro tuo omnia scribentur. Homo videt in facie, Deus autem in corde. Vers. Imperfectum meum viderunt oculi tui. Et in. Resp. Praebe, fili, cor tuum mihi, et oculi tui vias meas custodiant, ut addatur gratia capiti tuo. Vers. Attende, fili mi, sapientiam meam, et ad eloquium meum inclina aurem tuam. Ut addatur. Resp. In principio Deus antequam terram faceret, priusquam abyssos constitueret priusquam produceret fontes aquarum, antequam montes collocarentur, ante omnes colles generavit me Dominus. Vers. Ego in altissimis habito. Ante omnes colles.