Reader

XL. Fundatio Henrici sancti imperatoris super Furth, Francofurti in comitiis. ( Kal. Nov. 1007.)[Ludewig, Scrip. rer. Germ., 1281-82.]

In nomine sanctae et individuae Trinitatis, HENRICUS divina favente clementia rex.

Saluberrimis igitur sacri eloquii institutionibus erudimur et admonemur ut, temporalia relinquentes commoda, aeterna et sine fine mansura in coelis studeamus adipisci consistoria. Quapropter nos, Dominicis non surdum auditum praebentes praeceptis, et deificis obtemperando intendentes suasionibus, quemdam nostrae paternae haereditatis locum, Babenberg dictum, in sedem et culmen episcopatus sublimando proveximus, et Romana auctoritate, atque venerabilis Henrici Wurtburgensis episcopi consensu, ac pari communique omnium nostri fidelium, tam archiepiscoporum quam episcoporum abbatumque, nec non ducum et comitum consultu decretoque, in honorem sanctae Dei genitricis Mariae, sanctorumque apostolorum Petri et Pauli, nec non martyrum Kiliani atque Georgii, stabilivimus et corroboravimus, ut et inibi nostrum parentumque nostrorum. et Ottonis tertii videlicet, imperatoris antecessoris et senioris nostri, celebre haberet memoriale et jugis pro omnibus orthodoxis hostia mactaretur salutaris. Proinde noverit omnium nostrorum fidelium tam praesens aetas, quam etiam successura posteritas, quod nos nostrae quondam proprietatis locum, Furth dictum, in pago Nordgoau, in comitatu Berengeri comitis situm, ad stipendium canonicorum in eadem supradicta episcopali sede coenobice Deo servientium, una cum omnibus ejus pertinentiis sive adhaerentiis, videlicet vicis, villis, ecclesiis, servis et ancillis, areis, terris, cultis et incultis, viis, inviis, exitibus et reditibus, quaesitis et inquirendis, sylvis, forestibus, saginis, venationibus, aquis, piscationibus, molis, molendinis, rebus mobilibus et immobilibus, et caeteris omnibus, quae rite scribi aut appellari possunt, quolibet modo, utilitatibus, ac nostra auctoritatis pagina praeceptali, prout firmiter possumus, donamus atque proprietamus, omnium contradictione remota. Praecipientes igitur ut dulcissimi in Christo Banbergenses fratres nostri, ex nostro jure liberam dehinc habeant potestatem eumdem locum, Furth nuncupatum, cum omnibus appenditiis possidendi, vel etiam sibi commodum advocatum ipsi loco supradicto super eligendi, seu quidquid illis libeat, modis omnibus in usum coenobitatae fraternitatis faciendi. Si quis igitur, quod absit! hujus nostrae donationis munificentiam destruere sive violare praesumat, in die judicii coram oculis Dei tormento inextinguibili aeternaliter luat. Quod ne eveniat, sed haec traditio nostra ab omnibus perpetualiter inviolabilis permaneat, hanc cartam inde conscriptam manu propria roborantes, sigilli nostri impressione insigniri jussimus.