Operaetdies
Choose a text
id="mobileReaderAuthor" class="mobile-reader-author" href="/authors/hesiod" aria-label="More works by Hesiod">
—
⋯
Original / primary: Textus receptus
1.0.1
Μοῦσαι Πιερίηθεν ἀοιδῆισι κλείουσαι,
1.0.2
δεῦτε Δί᾽ ἐννέπετε, σφέτερον πατέρ᾽ ὑμνείουσαι.
1.0.3
ὅν τε διὰ βροτοὶ ἄνδρες ὁμῶς ἄφατοί τε φατοί τε,
1.0.4
ῥητοί τ᾽ ἄρρητοί τε Διὸς μεγάλοιο ἕκητι.
1.0.5
ῥέα μὲν γὰρ βριάει, ῥέα δὲ βριάοντα χαλέπτει,
1.0.6
ῥεῖα δ᾽ ἀρίζηλον μινύθει καὶ ἄδηλον ἀέξει,
1.0.7
ῥεῖα δέ τ᾽ ἰθύνει σκολιὸν καὶ ἀγήνορα κάρφει
1.0.8
Ζεὺς ὑψιβρεμέτης, ὃς ὑπέρτατα δώματα ναίει.
1.0.9
κλῦθι ἰδὼν ἀίων τε, δίκηι δ᾽ ἴθυνε θέμιστας
1.0.10
τύνη· ἐγὼ δέ κε Πέρσηι ἐτήτυμα μυθησαίμην.
1.0.11
Οὐκ ἄρα μοῦνον ἔην Ἐρίδων γένος, ἀλλ᾽ ἐπὶ γαῖαν
1.0.12
εἰσὶ δύω· τὴν μέν κεν ἐπαινήσειε νοήσας,
1.0.13
ἣ δ᾽ ἐπιμωμητή· διὰ δ᾽ ἄνδιχα θυμὸν ἔχουσιν.
1.0.14
ἣ μὲν γὰρ πόλεμόν τε κακὸν καὶ δῆριν ὀφέλλει,
1.0.15
σχετλίη· οὔ τις τήν γε φιλεῖ βροτός, ἀλλ᾽ ὑπ᾽ ἀνάγκης
1.0.16
ἀθανάτων βουλῆισιν Ἔριν τιμῶσι βαρεῖαν.
1.0.17
τὴν δ᾽ ἑτέρην προτέρην μὲν ἐγείνατο Νὺξ ἐρεβεννή,
1.0.18
θῆκε δέ μιν Κρονίδης ὑψίζυγος, αἰθέρι ναίων,
1.0.19
γαίης τ᾽ ἐν ῥίζηισι καὶ ἀνδράσι πολλὸν ἀμείνω·
1.0.20
ἥ τε καὶ ἀπάλαμόν περ ὁμῶς ἐπὶ ἔργον ἐγείρει·
1.0.21
εἰς ἕτερον γάρ τίς τε ἴδεν ἔργοιο χατίζων
1.0.22
πλούσιον, ὃς σπεύδει μὲν ἀρόμεναι ἠδὲ φυτεύειν
1.0.23
οἶκόν τ᾽ εὖ θέσθαι· ζηλοῖ δέ τε γείτονα γείτων
1.0.24
εἰς ἄφενος σπεύδοντ᾽· ἀγαθὴ δ᾽ Ἔρις ἥδε βροτοῖσιν.
1.0.25
καὶ κεραμεὺς κεραμεῖ κοτέει καὶ τέκτονι τέκτων,
1.0.26
καὶ πτωχὸς πτωχῶι φθονέει καὶ ἀοιδὸς ἀοιδῶι.
1.0.27
Ὦ Πέρση, σὺ δὲ ταῦτα τεῶι ἐνικάτθεο θυμῶι,
1.0.28
μηδέ σ᾽ Ἔρις κακόχαρτος ἀπ᾽ ἔργου θυμὸν ἐρύκοι
1.0.29
νείκε᾽ ὀπιπεύοντ᾽ ἀγορῆς ἐπακουὸν ἐόντα.
1.0.30
ὤρη γάρ τ᾽ ὀλίγη πέλεται νεικέων τ᾽ ἀγορέων τε
1.0.31
ὧιτινι μὴ βίος ἔνδον ἐπηετανὸς κατάκειται
1.0.32
ὡραῖος, τὸν γαῖα φέρει, Δημήτερος ἀκτήν.
1.0.33
τοῦ κε κορεσσάμενος νείκεα καὶ δῆριν ὀφέλλοις
1.0.34
κτήμασ᾽ ἐπ᾽ ἀλλοτρίοις. σοὶ δ᾽ οὐκέτι δεύτερον ἔσται
1.0.35
ὧδ᾽ ἔρδειν· ἀλλ᾽ αὖθι διακρινώμεθα νεῖκος
1.0.36
ἰθείηισι δίκηις, αἵ τ᾽ ἐκ Διός εἰσιν ἄρισται.
1.0.37
ἤδη μὲν γὰρ κλῆρον ἐδασσάμεθ᾽, ἄλλα τε πολλὰ
1.0.38
ἁρπάζων ἐφόρεις μέγα κυδαίνων βασιλῆας
1.0.39
δωροφάγους, οἳ τήνδε δίκην ἐθέλουσι δικάσσαι.
1.0.40
νήπιοι, οὐδὲ ἴσασιν ὅσωι πλέον ἥμισυ παντὸς
1.0.41
οὐδ᾽ ὅσον ἐν μαλάχηι τε καὶ ἀσφοδέλωι μέγ᾽ ὄνειαρ.
1.0.42
Κρύψαντες γὰρ ἔχουσι θεοὶ βίον ἀνθρώποισιν.
1.0.43
ῥηιδίως γάρ κεν καὶ ἐπ᾽ ἤματι ἐργάσσαιο,
1.0.44
ὥστε σε κεἰς ἐνιαυτὸν ἔχειν καὶ ἀεργὸν ἐόντα·
1.0.45
αἶψά κε πηδάλιον μὲν ὑπὲρ καπνοῦ καταθεῖο,
1.0.46
ἔργα βοῶν δ᾽ ἀπόλοιτο καὶ ἡμιόνων ταλαεργῶν.
1.0.47
ἀλλὰ Ζεὺς ἔκρυψε χολωσάμενος φρεσὶ ἧισιν,
1.0.48
ὅττι μιν ἐξαπάτησε Προμηθεὺς ἀγκυλομήτης·
1.0.49
τοὔνεκ᾽ ἄρ᾽ ἀνθρώποισιν ἐμήσατο κήδεα λυγρά,
1.0.50
κρύψε δὲ πῦρ· τὸ μὲν αὖτις ἐὺς πάις Ἰαπετοῖο
1.0.51
ἔκλεψ᾽ ἀνθρώποισι Διὸς παρὰ μητιόεντος
1.0.52
ἐν κοίλωι νάρθηκι, λαθὼν Δία τερπικέραυνον.
1.0.53
τὸν δὲ χολωσάμενος προσέφη νεφεληγερέτα Ζεύς·
1.0.54
« Ἰαπετιονίδη, πάντων πέρι μήδεα εἰδώς,
1.0.55
χαίρεις πῦρ κλέψας καὶ ἐμὰς φρένας ἠπεροπεύσας,
1.0.56
σοί τ᾽ αὐτῶι μέγα πῆμα καὶ ἀνδράσιν ἐσσομένοισιν.
1.0.57
τοῖς δ᾽ ἐγὼ ἀντὶ πυρὸς δώσω κακόν, ὧι κεν ἅπαντες
1.0.58
τέρπωνται κατὰ θυμὸν ἑὸν κακὸν ἀμφαγαπῶντες.»
1.0.59
Ὣς ἔφατ᾽, ἐκ δ᾽ ἐγέλασσε πατὴρ ἀνδρῶν τε θεῶν τε·
1.0.60
Ἥφαιστον δ᾽ ἐκέλευσε περικλυτὸν ὅττι τάχιστα
1.0.61
γαῖαν ὕδει φύρειν, ἐν δ᾽ ἀνθρώπου θέμεν αὐδὴν
1.0.62
καὶ σθένος, ἀθανάτηις δὲ θεῆις εἰς ὦπα ἐίσκειν
1.0.63
παρθενικῆς καλὸν εἶδος ἐπήρατον· αὐτὰρ Ἀθήνην
1.0.64
ἔργα διδασκῆσαι, πολυδαίδαλον ἱστὸν ὑφαίνειν·
1.0.65
καὶ χάριν ἀμφιχέαι κεφαλῆι χρυσέην Ἀφροδίτην
1.0.66
καὶ πόθον ἀργαλέον καὶ γυιοβόρους μελεδώνας·
1.0.67
ἐν δὲ θέμεν κύνεόν τε νόον καὶ ἐπίκλοπον ἦθος
1.0.68
Ἑρμείην ἤνωγε, διάκτορον Ἀργεϊφόντην.
1.0.69
Ὣς ἔφαθ᾽, οἳ δ᾽ ἐπίθοντο Διὶ Κρονίωνι ἄνακτι...
1.0.70
αὐτίκα δ᾽ ἐκ γαίης πλάσσε κλυτὸς Ἀμφιγυήεις
1.0.71
παρθένωι αἰδοίηι ἴκελον Κρονίδεω διὰ βουλάς·
1.0.72
ζῶσε δὲ καὶ κόσμησε θεὰ γλαυκῶπις Ἀθήνη·
1.0.73
ἀμφὶ δέ οἱ Χάριτές τε θεαὶ καὶ πότνια Πειθὼ
1.0.74
ὅρμους χρυσείους ἔθεσαν χροΐ· ἀμφὶ δὲ τήν γε
1.0.75
Ὧραι καλλίκομοι στέφον ἄνθεσι εἰαρινοῖσιν·
1.0.76
πάντα δέ οἱ χροῒ κόσμον ἐφήρμοσε Παλλὰς Ἀθήνη·
1.0.77
ἐν δ᾽ ἄρα οἱ στήθεσσι διάκτορος Ἀργεϊφόντης
1.0.78
ψεύδεά θ᾽ αἱμυλίους τε λόγους καὶ ἐπίκλοπον ἦθος
1.0.79
τεῦξε Διὸς βουλῆισι βαρυκτύπου· ἐν δ᾽ ἄρα φωνὴν
1.0.80
θῆκε θεῶν κῆρυξ, ὀνόμηνε δὲ τήνδε γυναῖκα
1.0.81
Πανδώρην, ὅτι πάντες Ὀλύμπια δώματ᾽ ἔχοντες
1.0.82
δῶρον ἐδώρησαν, πῆμ᾽ ἀνδράσιν ἀλφηστῆισιν.
1.0.83
αὐτὰρ ἐπεὶ δόλον αἰπὺν ἀμήχανον ἐξετέλεσσεν,
1.0.84
εἰς Ἐπιμηθέα πέμπε πατὴρ κλυτὸν Ἀργεϊφόντην
1.0.85
δῶρον ἄγοντα, θεῶν ταχὺν ἄγγελον· οὐδ᾽ Ἐπιμηθεὺς
1.0.86
ἐφράσαθ᾽ ὥς οἱ ἔειπε Προμηθεὺς μή ποτε δῶρον
1.0.87
δέξασθαι πὰρ Ζηνὸς Ὀλυμπίου, ἀλλ᾽ ἀποπέμπειν
1.0.88
ἐξοπίσω, μή πού τι κακὸν θνητοῖσι γένηται·
1.0.89
αὐτὰρ ὃ δεξάμενος, ὅτε δὴ κακὸν εἶχ᾽, ἐνόησε.
1.0.90
Πρὶν μὲν γὰρ ζώεσκον ἐπὶ χθονὶ φῦλ᾽ ἀνθρώπων
1.0.91
νόσφιν ἄτερ τε κακῶν καὶ ἄτερ χαλεποῖο πόνοιο
1.0.92
νούσων τ᾽ ἀργαλέων, αἵ τ᾽ ἀνδράσι κῆρας ἔδωκαν.
1.0.93
αἶψα γὰρ ἐν κακότητι βροτοὶ καταγηράσκουσιν.
1.0.94
ἀλλὰ γυνὴ χείρεσσι πίθου μέγα πῶμ᾽ ἀφελοῦσα
1.0.95
ἐσκέδασ᾽, ἀνθρώποισι δ᾽ ἐμήσατο κήδεα λυγρά.
1.0.96
μούνη δ᾽ αὐτόθι Ἐλπὶς ἐν ἀρρήκτοισι δόμοισιν
1.0.97
ἔνδον ἔμεινε πίθου ὑπὸ χείλεσιν οὐδὲ θύραζε
1.0.98
ἐξέπτη· πρόσθεν γὰρ ἐπέμβαλε πῶμα πίθοιο
1.0.99
αἰγιόχου βουλῆισι Διὸς νεφεληγερέταο.
1.0.100
ἄλλα δὲ μυρία λυγρὰ κατ᾽ ἀνθρώπους ἀλάληται·
1.0.101
πλείη μὲν γὰρ γαῖα κακῶν, πλείη δὲ θάλασσα·
1.0.102
νοῦσοι δ᾽ ἀνθρώποισιν ἐφ᾽ ἡμέρηι, αἳ δ᾽ ἐπὶ νυκτὶ
1.0.103
αὐτόματοι φοιτῶσι κακὰ θνητοῖσι φέρουσαι
1.0.104
σιγῆι, ἐπεὶ φωνὴν ἐξείλετο μητίετα Ζεύς.
1.0.105
οὕτως οὔ τί πη ἔστι Διὸς νόον ἐξαλέασθαι.
1.0.106
Εἰ δ᾽ ἐθέλεις, ἕτερόν τοι ἐγὼ λόγον ἐκκορυφώσω
1.0.107
εὖ καὶ ἐπισταμένως· σὺ δ᾽ ἐνὶ φρεσὶ βάλλεο σῆισιν
1.0.108
ὡς ὁμόθεν γεγάασι θεοὶ θνητοί τ᾽ ἄνθρωποι.
1.0.109
Χρύσεον μὲν πρώτιστα γένος μερόπων ἀνθρώπων
1.0.110
ἀθάνατοι ποίησαν Ὀλύμπια δώματ᾽ ἔχοντες.
1.0.111
οἳ μὲν ἐπὶ Κρόνου ἦσαν, ὅτ᾽ οὐρανῶι ἐμβασίλευεν·
1.0.112
ὥστε θεοὶ δ᾽ ἔζωον ἀκηδέα θυμὸν ἔχοντες
1.0.113
νόσφιν ἄτερ τε πόνων καὶ ὀιζύος, οὐδέ τι δειλὸν
1.0.114
γῆρας ἐπῆν, αἰεὶ δὲ πόδας καὶ χεῖρας ὁμοῖοι
1.0.115
τέρποντ᾽ ἐν θαλίηισι, κακῶν ἔκτοσθεν ἁπάντων·
1.0.116
θνῆισκον δ᾽ ὥσθ᾽ ὕπνωι δεδμημένοι· ἐσθλὰ δὲ πάντα
1.0.117
τοῖσιν ἔην· καρπὸν δ᾽ ἔφερε ζείδωρος ἄρουρα
1.0.118
αὐτομάτη πολλόν τε καὶ ἄφθονον· οἳ δ᾽ ἐθελημοὶ
1.0.119
ἥσυχοι ἔργ᾽ ἐνέμοντο σὺν ἐσθλοῖσιν πολέεσσιν.
1.0.120
ἀφνειοὶ μήλοισι, φίλοι μακάρεσσι θεοῖσιν.
1.0.121
αὐτὰρ ἐπεὶ δὴ τοῦτο γένος κατὰ γαῖα κάλυψε,
1.0.122
τοὶ μὲν δαίμονες ἁγνοὶ ἐπιχθόνιοι τελέθουσιν
1.0.123
ἐσθλοί, ἀλεξίκακοι, φύλακες θνητῶν ἀνθρώπων,
1.0.124
οἵ ῥα φυλάσσουσίν τε δίκας καὶ σχέτλια ἔργα
1.0.125
ἠέρα ἑσσάμενοι πάντη φοιτῶντες ἐπ᾽ αἶαν,
1.0.126
πλουτοδόται· καὶ τοῦτο γέρας βασιλήιον ἔσχον.
1.0.127
Δεύτερον αὖτε γένος πολὺ χειρότερον μετόπισθεν
1.0.128
ἀργύρεον ποίησαν Ὀλύμπια δώματ᾽ ἔχοντες,
1.0.129
χρυσέωι οὔτε φυὴν ἐναλίγκιον οὔτε νόημα·
1.0.130
ἀλλ᾽ ἑκατὸν μὲν παῖς ἔτεα παρὰ μητέρι κεδνῆι
1.0.131
ἐτρέφετ᾽ ἀτάλλων, μέγα νήπιος, ὧι ἐνὶ οἴκωι·
1.0.132
ἀλλ᾽ ὅτ᾽ ἄρ᾽ ἡβήσαι τε καὶ ἥβης μέτρον ἵκοιτο,
1.0.133
παυρίδιον ζώεσκον ἐπὶ χρόνον, ἄλγε᾽ ἔχοντες
1.0.134
ἀφραδίηις· ὕβριν γὰρ ἀτάσθαλον οὐκ ἐδύναντο
1.0.135
ἀλλήλων ἀπέχειν, οὐδ᾽ ἀθανάτους θεραπεύειν
1.0.136
ἤθελον οὐδ᾽ ἔρδειν μακάρων ἱεροῖς ἐπὶ βωμοῖς,
1.0.137
ἧι θέμις ἀνθρώποις κατὰ ἤθεα. τοὺς μὲν ἔπειτα
1.0.138
Ζεὺς Κρονίδης ἔκρυψε χολούμενος, οὕνεκα τιμὰς
1.0.139
οὐκ ἔδιδον μακάρεσσι θεοῖς οἳ Ὄλυμπον ἔχουσιν.
1.0.140
αὐτὰρ ἐπεὶ καὶ τοῦτο γένος κατὰ γαῖα κάλυψε,
1.0.141
τοὶ μὲν ὑποχθόνιοι μάκαρες θνητοὶ καλέονται,
1.0.142
δεύτεροι, ἀλλ᾽ ἔμπης τιμὴ καὶ τοῖσιν ὀπηδεῖ.
1.0.143
Ζεὺς δὲ πατὴρ τρίτον ἄλλο γένος μερόπων ἀνθρώπων
1.0.144
χάλκειον ποίησ᾽, οὐκ ἀργυρέωι οὐδὲν ὁμοῖον,
1.0.145
ἐκ μελιᾶν, δεινόν τε καὶ ὄβριμον· οἷσιν Ἄρηος
1.0.146
ἔργ᾽ ἔμελε στονόεντα καὶ ὕβριες, οὐδέ τι σῖτον
1.0.147
ἤσθιον, ἀλλ᾽ ἀδάμαντος ἔχον κρατερόφρονα θυμόν.
1.0.148
ἄπλαστοι· μεγάλη δὲ βίη καὶ χεῖρες ἄαπτοι
1.0.149
ἐξ ὤμων ἐπέφυκον ἐπὶ στιβαροῖσι μέλεσσι.
1.0.150
τῶν δ᾽ ἦν χάλκεα μὲν τεύχεα, χάλκεοι δέ τε οἶκοι,
1.0.151
χαλκῶι δ᾽ εἰργάζοντο· μέλας δ᾽ οὐκ ἔσκε σίδηρος.
1.0.152
καὶ τοὶ μὲν χείρεσσιν ὑπὸ σφετέρηισι δαμέντες
1.0.153
βῆσαν ἐς εὐρώεντα δόμον κρυεροῦ Ἀίδαο,
1.0.154
νώνυμνοι· θάνατος δὲ καὶ ἐκπάγλους περ ἐόντας
1.0.155
εἷλε μέλας, λαμπρὸν δ᾽ ἔλιπον φάος ἠελίοιο.
1.0.156
Αὐτὰρ ἐπεὶ καὶ τοῦτο γένος κατὰ γαῖα κάλυψεν,
1.0.157
αὖτις ἔτ᾽ ἄλλο τέταρτον ἐπὶ χθονὶ πουλυβοτείρηι
1.0.158
Ζεὺς Κρονίδης ποίησε, δικαιότερον καὶ ἄρειον,
1.0.159
ἀνδρῶν ἡρώων θεῖον γένος, οἳ καλέονται
1.0.160
ἡμίθεοι, προτέρη γενεὴ κατ᾽ ἀπείρονα γαῖαν.
1.0.161
καὶ τοὺς μὲν πόλεμός τε κακὸς καὶ φύλοπις αἰνὴ
1.0.162
τοὺς μὲν ὑφ᾽ ἑπταπύλωι Θήβηι, Καδμηίδι γαίηι,
1.0.163
ὤλεσε μαρναμένους μήλων ἕνεκ᾽ Οἰδιπόδαο,
1.0.164
τοὺς δὲ καὶ ἐν νήεσσιν ὑπὲρ μέγα λαῖτμα θαλάσσης
1.0.165
ἐς Τροίην ἀγαγὼν Ἑλένης ἕνεκ᾽ ἠυκόμοιο.
1.0.166
ἔνθ᾽ ἦ τοι τοὺς μὲν θανάτου τέλος ἀμφεκάλυψε
1.0.167
τοῖς δὲ δίχ᾽ ἀνθρώπων βίοτον καὶ ἤθε᾽ ὀπάσσας
1.0.168
Ζεὺς Κρονίδης κατένασσε πατὴρ ἐς πείρατα γαίης.
1.0.169
τηλοῦ ἀπ᾽ ἀθανάτων· τοῖσιν Κρόνος ἐμβασιλεύει.
1.0.170
καὶ τοὶ μὲν ναίουσιν ἀκηδέα θυμὸν ἔχοντες
1.0.171
ἐν μακάρων νήσοισι παρ᾽ Ὠκεανὸν βαθυδίνην,
1.0.172
ὄλβιοι ἥρωες, τοῖσιν μελιηδέα καρπὸν
1.0.173
τρὶς ἔτεος θάλλοντα φέρει ζείδωρος ἄρουρα.
1.0.174
Μηκέτ᾽ ἔπειτ᾽ ὤφελλον ἐγὼ πέμπτοισι μετεῖναι
1.0.175
ἀνδράσιν, ἀλλ᾽ ἢ πρόσθε θανεῖν ἢ ἔπειτα γενέσθαι.
1.0.176
νῦν γὰρ δὴ γένος ἐστὶ σιδήρεον· οὐδέ ποτ᾽ ἦμαρ
1.0.177
παύσονται καμάτου καὶ ὀιζύος οὐδέ τι νύκτωρ
1.0.178
φθειρόμενοι· χαλεπὰς δὲ θεοὶ δώσουσι μερίμνας.
1.0.179
ἀλλ᾽ ἔμπης καὶ τοῖσι μεμείξεται ἐσθλὰ κακοῖσιν.
1.0.180
Ζεὺς δ᾽ ὀλέσει καὶ τοῦτο γένος μερόπων ἀνθρώπων,
1.0.181
εὖτ᾽ ἂν γεινόμενοι πολιοκρόταφοι τελέθωσιν.
1.0.182
οὐδὲ πατὴρ παίδεσσιν ὁμοίιος οὐδέ τι παῖδες
1.0.183
οὐδὲ ξεῖνος ξεινοδόκωι καὶ ἑταῖρος ἑταίρωι,
1.0.184
οὐδὲ κασίγνητος φίλος ἔσσεται, ὡς τὸ πάρος περ.
1.0.185
αἶψα δὲ γηράσκοντας ἀτιμήσουσι τοκῆας·
1.0.186
μέμψονται δ᾽ ἄρα τοὺς χαλεποῖς βάζοντες ἔπεσσι,
1.0.187
σχέτλιοι, οὐδὲ θεῶν ὄπιν εἰδότες· οὐδέ κεν οἵ γε
1.0.188
γηράντεσσι τοκεῦσιν ἀπὸ θρεπτήρια δοῖεν·
1.0.189
χειροδίκαι· ἕτερος δ᾽ ἑτέρου πόλιν ἐξαλαπάξει·
1.0.190
οὐδέ τις εὐόρκου χάρις ἔσσεται οὐδὲ δικαίου
1.0.191
οὐδ᾽ ἀγαθοῦ, μᾶλλον δὲ κακῶν ῥεκτῆρα καὶ ὕβριν
1.0.192
ἀνέρα τιμήσουσι· δίκη δ᾽ ἐν χερσί· καὶ αἰδὼς
1.0.193
οὐκ ἔσται, βλάψει δ᾽ ὁ κακὸς τὸν ἀρείονα φῶτα
1.0.194
μύθοισι σκολιοῖς ἐνέπων, ἐπὶ δ᾽ ὅρκον ὀμεῖται.
1.0.195
ζῆλος δ᾽ ἀνθρώποισιν ὀιζυροῖσιν ἅπασι
1.0.196
δυσκέλαδος κακόχαρτος ὁμαρτήσει στυγερώπης.
1.0.197
καὶ τότε δὴ πρὸς Ὄλυμπον ἀπὸ χθονὸς εὐρυοδείης
1.0.198
λευκοῖσιν φάρεσσι καλυψαμένω χρόα καλὸν
1.0.199
ἀθανάτων μετὰ φῦλον ἴτον προλιπόντ᾽ ἀνθρώπους
1.0.200
Αἰδὼς καὶ Νέμεσις· τὰ δὲ λείψεται ἄλγεα λυγρὰ
1.0.201
θνητοῖς ἀνθρώποισι· κακοῦ δ᾽ οὐκ ἔσσεται ἀλκή.
1.0.202
Νῦν δ᾽ αἶνον βασιλεῦσιν ἐρέω φρονέουσι καὶ αὐτοῖς·
1.0.203
ὧδ᾽ ἴρηξ προσέειπεν ἀηδόνα ποικιλόδειρον
1.0.204
ὕψι μάλ᾽ ἐν νεφέεσσι φέρων ὀνύχεσσι μεμαρπώς·
1.0.205
ἣ δ᾽ ἐλεόν, γναμπτοῖσι πεπαρμένη ἀμφ᾽ ὀνύχεσσι,
1.0.206
μύρετο· τὴν ὅ γ᾽ ἐπικρατέως πρὸς μῦθον ἔειπεν·
1.0.207
« δαιμονίη, τί λέληκας; ἔχει νύ σε πολλὸν ἀρείων·
1.0.208
τῆι δ᾽ εἶς ἧι σ᾽ ἂν ἐγώ περ ἄγω καὶ ἀοιδὸν ἐοῦσαν·
1.0.209
δεῖπνον δ᾽, αἴ κ᾽ ἐθέλω, ποιήσομαι ἠὲ μεθήσω.
1.0.210
ἄφρων δ᾽, ὅς κ᾽ ἐθέληι πρὸς κρείσσονας ἀντιφερίζειν·
1.0.211
νίκης τε στέρεται πρός τ᾽ αἴσχεσιν ἄλγεα πάσχει».
1.0.212
ὣς ἔφατ᾽ ὠκυπέτης ἴρηξ, τανυσίπτερος ὄρνις.
1.0.213
Ὦ Πέρση, σὺ δ᾽ ἄκουε δίκης μηδ᾽ ὕβριν ὄφελλε·
1.0.214
ὕβρις γάρ τε κακὴ δειλῶι βροτῶι, οὐδὲ μὲν ἐσθλὸς
1.0.215
ῥηιδίως φερέμεν δύναται, βαρύθει δέ θ᾽ ὑπ᾽ αὐτῆς
1.0.216
ἐγκύρσας ἄτηισιν· ὁδὸς δ᾽ ἑτέρηφι παρελθεῖν
1.0.217
κρείσσων ἐς τὰ δίκαια· δίκη δ᾽ ὑπὲρ ὕβριος ἴσχει
1.0.218
ἐς τέλος ἐξελθοῦσα· παθὼν δέ τε νήπιος ἔγνω.
1.0.219
αὐτίκα γὰρ τρέχει Ὅρκος ἅμα σκολιῆισι δίκηισιν·
1.0.220
τῆς δὲ Δίκης ῥόθος ἑλκομένης ἧι κ᾽ ἄνδρες ἄγωσι
1.0.221
δωροφάγοι, σκολιῆις δὲ δίκηις κρίνωσι θέμιστας·
1.0.222
ἣ δ᾽ ἕπεται κλαίουσα πόλιν καὶ ἤθεα λαῶν,
1.0.223
ἠέρα ἑσσαμένη, κακὸν ἀνθρώποισι φέρουσα,
1.0.224
οἵ τέ μιν ἐξελάσωσι καὶ οὐκ ἰθεῖαν ἔνειμαν.
1.0.225
οἳ δὲ δίκας ξείνοισι καὶ ἐνδήμοισι διδοῦσιν
1.0.226
ἰθείας καὶ μή τι παρεκβαίνουσι δικαίου,
1.0.227
τοῖσι τέθηλε πόλις, λαοὶ δ᾽ ἀνθεῦσιν ἐν αὐτῆι·
1.0.228
εἰρήνη δ᾽ ἀνὰ γῆν κουροτρόφος, οὐδέ ποτ᾽ αὐτοῖς
1.0.229
ἀργαλέον πόλεμον τεκμαίρεται εὐρύοπα Ζεύς·
1.0.230
οὐδέ ποτ᾽ ἰθυδίκηισι μετ᾽ ἀνδράσι λιμὸς ὀπηδεῖ
1.0.231
οὐδ᾽ ἄτη, θαλίηις δὲ μεμηλότα ἔργα νέμονται.
1.0.232
τοῖσι φέρει μὲν γαῖα πολὺν βίον, οὔρεσι δὲ δρῦς
1.0.233
ἄκρη μέν τε φέρει βαλάνους, μέσση δὲ μελίσσας·
1.0.234
εἰροπόκοι δ᾽ ὄιες μαλλοῖς καταβεβρίθασι·
1.0.235
τίκτουσιν δὲ γυναῖκες ἐοικότα τέκνα γονεῦσι·
1.0.236
θάλλουσιν δ᾽ ἀγαθοῖσι διαμπερές· οὐδ᾽ ἐπὶ νηῶν
1.0.237
νίσονται, καρπὸν δὲ φέρει ζείδωρος ἄρουρα.
1.0.238
οἷς δ᾽ ὕβρις τε μέμηλε κακὴ καὶ σχέτλια ἔργα,
1.0.239
τοῖς δὲ δίκην Κρονίδης τεκμαίρεται εὐρύοπα Ζεύς.
1.0.240
πολλάκι καὶ ξύμπασα πόλις κακοῦ ἀνδρὸς ἀπηύρα,
1.0.241
ὅστις ἀλιτραίνηι καὶ ἀτάσθαλα μηχανάαται.
1.0.242
τοῖσιν δ᾽ οὐρανόθεν μέγ᾽ ἐπήγαγε πῆμα Κρονίων,
1.0.243
λιμὸν ὁμοῦ καὶ λοιμόν, ἀποφθινύθουσι δὲ λαοί·
1.0.244
οὐδὲ γυναῖκες τίκτουσιν, μινύθουσι δὲ οἶκοι
1.0.245
Ζηνὸς φραδμοσύνηισιν Ὀλυμπίου· ἄλλοτε δ᾽ αὖτε
1.0.246
ἢ τῶν γε στρατὸν εὐρὺν ἀπώλεσεν ἢ ὅ γε τεῖχος
1.0.247
ἢ νέας ἐν πόντωι Κρονίδης ἀποτείνυται αὐτῶν.
1.0.248
Ὦ βασιλῆς, ὑμεῖς δὲ καταφράζεσθε καὶ αὐτοὶ
1.0.249
τήνδε δίκην· ἐγγὺς γὰρ ἐν ἀνθρώποισιν ἐόντες
1.0.250
ἀθάνατοι φράζονται ὅσοι σκολιῆισι δίκηισιν
1.0.251
ἀλλήλους τρίβουσι θεῶν ὄπιν οὐκ ἀλέγοντες.
1.0.252
τρὶς γὰρ μύριοί εἰσιν ἐπὶ χθονὶ πουλυβοτείρηι
1.0.253
ἀθάνατοι Ζηνὸς φύλακες θνητῶν ἀνθρώπων,
1.0.254
οἵ ῥα φυλάσσουσίν τε δίκας καὶ σχέτλια ἔργα
1.0.255
ἠέρα ἑσσάμενοι, πάντη φοιτῶντες ἐπ᾽ αἶαν.
1.0.256
ἡ δέ τε παρθένος ἐστὶ Δίκη, Διὸς ἐκγεγαυῖα,
1.0.257
κυδρή τ᾽ αἰδοίη τε θεοῖς οἳ Ὄλυμπον ἔχουσιν,
1.0.258
καί ῥ᾽ ὁπότ᾽ ἄν τίς μιν βλάπτηι σκολιῶς ὀνοτάζων,
1.0.259
αὐτίκα πὰρ Διὶ πατρὶ καθεζομένη Κρονίωνι
1.0.260
γηρύετ᾽ ἀνθρώπων ἀδίκων νόον, ὄφρ᾽ ἀποτείσηι
1.0.261
δῆμος ἀτασθαλίας βασιλέων οἳ λυγρὰ νοεῦντες
1.0.262
ἄλληι παρκλίνωσι δίκας σκολιῶς ἐνέποντες.
1.0.263
ταῦτα φυλασσόμενοι, βασιλῆς, ἰθύνετε μύθους,
1.0.264
δωροφάγοι, σκολιέων δὲ δικέων ἐπὶ πάγχυ λάθεσθε.
1.0.265
οἷ αὐτῶι κακὰ τεύχει ἀνὴρ ἄλλωι κακὰ τεύχων,
1.0.266
ἡ δὲ κακὴ βουλὴ τῶι βουλεύσαντι κακίστη.
1.0.267
πάντα ἰδὼν Διὸς ὀφθαλμὸς καὶ πάντα νοήσας
1.0.268
καί νυ τάδ᾽, αἴ κ᾽ ἐθέληισ᾽, ἐπιδέρκεται, οὐδέ ἑ λήθει
1.0.269
οἵην δὴ καὶ τήνδε δίκην πόλις ἐντὸς ἐέργει.
1.0.270
νῦν δὴ ἐγὼ μήτ᾽ αὐτὸς ἐν ἀνθρώποισι δίκαιος
1.0.271
εἴην μήτ᾽ ἐμὸς υἱός, ἐπεὶ κακὸν ἄνδρα δίκαιον
1.0.272
ἔμμεναι, εἰ μείζω γε δίκην ἀδικώτερος ἕξει.
1.0.273
ἀλλὰ τά γ᾽ οὔπω ἔολπα τελεῖν Δία μητιόεντα.
1.0.274
Ὦ Πέρση, σὺ δὲ ταῦτα μετὰ φρεσὶ βάλλεο σῆισι
1.0.275
καί νυ δίκης ἐπάκουε, βίης δ᾽ ἐπιλήθεο πάμπαν.
1.0.276
τόνδε γὰρ ἀνθρώποισι νόμον διέταξε Κρονίων,
1.0.277
ἰχθύσι μὲν καὶ θηρσὶ καὶ οἰωνοῖς πετεηνοῖς
1.0.278
ἔσθειν ἀλλήλους, ἐπεὶ οὐ δίκη ἐστὶ μετ᾽ αὐτοῖς·
1.0.279
ἀνθρώποισι δ᾽ ἔδωκε δίκην, ἣ πολλὸν ἀρίστη
1.0.280
γίνεται· εἰ γάρ τίς κ᾽ ἐθέληι τὰ δίκαι᾽ ἀγορεῦσαι
1.0.281
γινώσκων, τῶι μέν τ᾽ ὄλβον διδοῖ εὐρύοπα Ζεύς·
1.0.282
ὃς δέ κε μαρτυρίηισιν ἑκὼν ἐπίορκον ὀμόσσας
1.0.283
ψεύσεται, ἐν δὲ δίκην βλάψας νήκεστον ἀασθῆι,
1.0.284
τοῦ δέ τ᾽ ἀμαυροτέρη γενεὴ μετόπισθε λέλειπται·
1.0.285
ἀνδρὸς δ᾽ εὐόρκου γενεὴ μετόπισθεν ἀμείνων.
1.0.286
Σοὶ δ᾽ ἐγὼ ἐσθλὰ νοέων ἐρέω, μέγα νήπιε Πέρση·
1.0.287
τὴν μέν τοι κακότητα καὶ ἰλαδὸν ἔστιν ἑλέσθαι
1.0.288
ῥηιδίως· λείη μὲν ὁδός, μάλα δ᾽ ἐγγύθι ναίει·
1.0.289
τῆς δ᾽ ἀρετῆς ἱδρῶτα θεοὶ προπάροιθεν ἔθηκαν
1.0.290
ἀθάνατοι· μακρὸς δὲ καὶ ὄρθιος οἶμος ἐς αὐτὴν
1.0.291
καὶ τρηχὺς τὸ πρῶτον· ἐπὴν δ᾽ εἰς ἄκρον ἵκηται,
1.0.292
ῥηιδίη δὴ ἔπειτα πέλει, χαλεπή περ ἐοῦσα.
1.0.293
Οὗτος μὲν πανάριστος, ὃς αὐτῶι πάντα νοήσει
1.0.294
φρασσάμενος τά κ᾽ ἔπειτα καὶ ἐς τέλος ἦισιν ἀμείνω·
1.0.295
ἐσθλὸς δ᾽ αὖ κἀκεῖνος ὃς εὖ εἰπόντι πίθηται·
1.0.296
ὃς δέ κε μήτ᾽ αὐτῶι νοέηι μήτ᾽ ἄλλου ἀκούων
1.0.297
ἐν θυμῶι βάλληται, ὃ δ᾽ αὖτ᾽ ἀχρήιος ἀνήρ.
1.0.298
ἀλλὰ σύ γ᾽ ἡμετέρης μεμνημένος αἰὲν ἐφετμῆς
1.0.299
ἐργάζευ, Πέρση, δῖον γένος, ὄφρα σε Λιμὸς
1.0.300
ἐχθαίρηι, φιλέηι δέ σ᾽ ἐυστέφανος Δημήτηρ
1.0.301
αἰδοίη, βιότου δὲ τεὴν πιμπλῆισι καλιήν·
1.0.302
Λιμὸς γάρ τοι πάμπαν ἀεργῶι σύμφορος ἀνδρί·
1.0.303
τῶι δὲ θεοὶ νεμεσῶσι καὶ ἀνέρες ὅς κεν ἀεργὸς
1.0.304
ζώηι, κηφήνεσσι κοθούροις εἴκελος ὀργήν,
1.0.305
οἵ τε μελισσάων κάματον τρύχουσιν ἀεργοὶ
1.0.306
ἔσθοντες· σοὶ δ᾽ ἔργα φίλ᾽ ἔστω μέτρια κοσμεῖν,
1.0.307
ὥς κέ τοι ὡραίου βιότου πλήθωσι καλιαί.
1.0.308
ἐξ ἔργων δ᾽ ἄνδρες πολύμηλοί τ᾽ ἀφνειοί τε,
1.0.309
καί τ᾽ ἐργαζόμενος πολὺ φίλτερος ἀθανάτοισιν
1.0.310
ἔσσεαι ἠδὲ βροτοῖς· μάλα γὰρ στυγέουσιν ἀεργούς.
1.0.311
ἔργον δ᾽ οὐδὲν ὄνειδος, ἀεργίη δέ τ᾽ ὄνειδος.
1.0.312
εἰ δέ κεν ἐργάζηι, τάχα σε ζηλώσει ἀεργὸς
1.0.313
πλουτεῦντα· πλούτωι δ᾽ ἀρετὴ καὶ κῦδος ὀπηδεῖ.
1.0.314
δαίμονι δ᾽ οἷος ἔησθα, τὸ ἐργάζεσθαι ἄμεινον,
1.0.315
εἴ κεν ἀπ᾽ ἀλλοτρίων κτεάνων ἀεσίφρονα θυμὸν
1.0.316
ἐς ἔργον τρέψας μελετᾶις βίου, ὥς σε κελεύω.
1.0.317
αἰδὼς δ᾽ οὐκ ἀγαθὴ κεχρημένον ἄνδρα κομίζει,
1.0.318
αἰδώς, ἥ τ᾽ ἄνδρας μέγα σίνεται ἠδ᾽ ὀνίνησιν·
1.0.319
αἰδώς τοι πρὸς ἀνολβίηι, θάρσος δὲ πρὸς ὄλβωι.
1.0.320
χρήματα δ᾽ οὐχ ἁρπακτά, θεόσδοτα πολλὸν ἀμείνω·
1.0.321
εἰ γάρ τις καὶ χερσὶ βίηι μέγαν ὄλβον ἕληται,
1.0.322
ἢ ὅ γ᾽ ἀπὸ γλώσσης ληίσσεται, οἷά τε πολλὰ
1.0.323
γίνεται, εὖτ᾽ ἂν δὴ κέρδος νόον ἐξαπατήσηι
1.0.324
ἀνθρώπων, αἰδῶ δέ τ᾽ ἀναιδείη κατοπάζηι,
1.0.325
ῥεῖα δέ μιν μαυροῦσι θεοί, μινύθουσι δὲ οἶκον
1.0.326
ἀνέρι τῶι, παῦρον δέ τ᾽ ἐπὶ χρόνον ὄλβος ὀπηδεῖ.
1.0.327
Ἶσον δ᾽ ὅς θ᾽ ἱκέτην ὅς τε ξεῖνον κακὸν ἔρξει,
1.0.328
ὅς τε κασιγνήτοιο ἑοῦ ἀνὰ δέμνια βαίνηι
1.0.329
κρυπταδίηις εὐνῆις ἀλόχου, παρακαίρια ῥέζων,
1.0.330
ὅς τέ τευ ἀφραδίηις ἀλιταίνητ᾽ ὀρφανὰ τέκνα,
1.0.331
ὅς τε γονῆα γέροντα κακῶι ἐπὶ γήραος οὐδῶι
1.0.332
νεικείηι χαλεποῖσι καθαπτόμενος ἐπέεσσι·
1.0.333
τῶι δ᾽ ἦ τοι Ζεὺς αὐτὸς ἀγαίεται, ἐς δὲ τελευτὴν
1.0.334
ἔργων ἀντ᾽ ἀδίκων χαλεπὴν ἐπέθηκεν ἀμοιβήν.
1.0.335
ἀλλὰ σὺ τῶν μὲν πάμπαν ἔεργ᾽ ἀεσίφρονα θυμόν.
1.0.336
Κὰδ δύναμιν δ᾽ ἔρδειν ἱέρ᾽ ἀθανάτοισι θεοῖσιν
1.0.337
ἁγνῶς καὶ καθαρῶς, ἐπὶ δ᾽ ἀγλαὰ μηρία καίειν·
1.0.338
ἄλλοτε δὲ σπονδῆισι θύεσσί τε ἱλάσκεσθαι,
1.0.339
ἠμὲν ὅτ᾽ εὐνάζηι καὶ ὅτ᾽ ἂν φάος ἱερὸν ἔλθηι,
1.0.340
ὥς κέ τοι ἵλαον κραδίην καὶ θυμὸν ἔχωσιν,
1.0.341
ὄφρ᾽ ἄλλων ὠνῆι κλῆρον, μὴ τὸν τεὸν ἄλλος.
1.0.342
Τὸν φιλέοντ᾽ ἐπὶ δαῖτα καλεῖν, τὸν δ᾽ ἐχθρὸν ἐᾶσαι·
1.0.343
τὸν δὲ μάλιστα καλεῖν ὅστις σέθεν ἐγγύθι ναίει·
1.0.344
εἰ γάρ τοι καὶ χρῆμ᾽ ἐγκώμιον ἄλλο γγένηται,
1.0.345
γείτονες ἄζωστοι ἔκιον, ζώσαντο δὲ πηοί.
1.0.346
πῆμα κακὸς γείτων, ὅσσον τ᾽ ἀγαθὸς μέγ᾽ ὄνειαρ·
1.0.347
ἔμμορέ τοι τιμῆς ὅς τ᾽ ἔμμορε γείτονος ἐσθλοῦ·
1.0.348
οὐδ᾽ ἂν βοῦς ἀπόλοιτ᾽, εἰ μὴ γείτων κακὸς εἴη.
1.0.349
εὖ μὲν μετρεῖσθαι παρὰ γείτονος, εὖ δ᾽ ἀποδοῦναι,
1.0.350
αὐτῶι τῶι μέτρωι, καὶ λώιον αἴ κε δύνηαι,
1.0.351
ὡς ἂν χρηίζων καὶ ἐς ὕστερον ἄρκιον εὕρηις.
1.0.352
μὴ κακὰ κερδαίνειν· κακὰ κέρδεα ἶσ᾽ ἄτηισι.
1.0.353
τὸν φιλέοντα φιλεῖν, καὶ τῶι προσιόντι προσεῖναι.
1.0.354
καὶ δόμεν ὅς κεν δῶι καὶ μὴ δόμεν ὅς κεν μὴ δῶι·
1.0.355
δώτηι μέν τις ἔδωκεν, ἀδώτηι δ᾽ οὔ τις ἔδωκεν·
1.0.356
δὼς ἀγαθή, ἅρπαξ δὲ κακή, θανάτοιο δότειρα·
1.0.357
ὃς μὲν γάρ κεν ἀνὴρ ἐθέλων, ὅ γε καὶ μέγα, δώηι,
1.0.358
χαίρει τῶι δώρωι καὶ τέρπεται ὃν κατὰ θυμόν·
1.0.359
ὃς δέ κεν αὐτὸς ἕληται ἀναιδείηφι πιθήσας,
1.0.360
καί τε σμικρὸν ἐόν, τό γ᾽ ἐπάχνωσεν φίλον ἦτορ.
1.0.361
εἰ γάρ κεν καὶ σμικρὸν ἐπὶ σμικρῶι καταθεῖο
1.0.362
καὶ θαμὰ τοῦτ᾽ ἔρδοις, τάχα κεν μέγα καὶ τὸ γένοιτο·
1.0.363
ὃς δ᾽ ἐπ᾽ ἐόντι φέρει, ὃ δ᾽ ἀλέξεται αἴθοπα λιμόν.
1.0.364
οὐδὲ τό γ᾽ εἰν οἴκωι κατακείμενον ἀνέρα κήδει·
1.0.365
οἴκοι βέλτερον εἶναι, ἐπεὶ βλαβερὸν τὸ θύρηφιν.
1.0.366
ἐσθλὸν μὲν παρεόντος ἑλέσθαι, πῆμα δὲ θυμῶι
1.0.367
χρηίζειν ἀπεόντος· ἅ σε φράζεσθαι ἄνωγα.
1.0.368
Ἀρχομένου δὲ πίθου καὶ λήγοντος κορέσασθαι,
1.0.369
μεσσόθι φείδεσθαι· δειλὴ δ᾽ ἐν πυθμένι φειδώ.
1.0.370
μισθὸς δ᾽ ἀνδρὶ φίλωι εἰρημένος ἄρκιος ἔστω·
1.0.371
καί τε κασιγνήτωι γελάσας ἐπὶ μάρτυρα θέσθαι·
1.0.372
† πίστεις δ᾽ ἄρα† ὁμῶς καὶ ἀπιστίαι ὤλεσαν ἄνδρας.
1.0.373
μηδὲ γυνή σε νόον πυγοστόλος ἐξαπατάτω
1.0.374
αἱμύλα κωτίλλουσα, τεὴν διφῶσα καλιήν·
1.0.375
ὃς δὲ γυναικὶ πέποιθε, πέποιθ᾽ ὅ γε φιλήτηισιν.
1.0.376
μουνογενὴς δὲ πάις εἴη πατρώιον οἶκον
1.0.377
φερβέμεν· ὣς γὰρ πλοῦτος ἀέξεται ἐν μεγάροισιν·
1.0.378
γηραιὸς δὲ θάνοι ἕτερον παῖδ᾽ ἐγκαταλείπων.
1.0.379
ῥεῖα δέ κεν πλεόνεσσι πόροι Ζεὺς ἄσπετον ὄλβον·
1.0.380
πλείων μὲν πλεόνων μελέτη, μείζων δ᾽ ἐπιθήκη.
1.0.381
σοὶ δ᾽ εἰ πλούτου θυμὸς ἐέλδεται ἐν φρεσὶ σῆισιν,
1.0.382
ὧδ᾽ ἔρδειν, καὶ ἔργον ἐπ᾽ ἔργωι ἐργάζεσθαι.
1.0.383
Πληιάδων Ἀτλαγενέων ἐπιτελλομενάων
1.0.384
ἄρχεσθ᾽ ἀμήτου, ἀρότοιο δὲ δυσομενάων.
1.0.385
αἳ δή τοι νύκτας τε καὶ ἤματα τεσσαράκοντα
1.0.386
κεκρύφαται, αὖτις δὲ περιπλομένου ἐνιαυτοῦ
1.0.387
φαίνονται τὰ πρῶτα χαρασσομένοιο σιδήρου.
1.0.388
οὗτός τοι πεδίων πέλεται νόμος οἵ τε θαλάσσης
1.0.389
ἐγγύθι ναιετάουσ᾽ οἵ τ᾽ ἄγκεα βησσήεντα
1.0.390
πόντου κυμαίνοντος ἀπόπροθι, πίονα χῶρον,
1.0.391
ναίουσιν· γυμνὸν σπείρειν, γυμνὸν δὲ βοωτεῖν,
1.0.392
γυμνὸν δ᾽ ἀμάειν, εἴ χ᾽ ὥρια πάντ᾽ ἐθέληισθα
1.0.393
ἔργα κομίζεσθαι Δημήτερος, ὥς τοι ἕκαστα
1.0.394
ὥρι᾽ ἀέξηται, μή πως τὰ μέταζε χατίζων
1.0.395
πτώσσηις ἀλλοτρίους οἴκους καὶ μηδὲν ἀνύσσηις.
1.0.396
ὡς καὶ νῦν ἐπ᾽ ἔμ᾽ ἦλθες· ἐγὼ δέ τοι οὐκ ἐπιδώσω
1.0.397
οὐδ᾽ ἐπιμετρήσω· ἐργάζευ, νήπιε Πέρση,
1.0.398
ἔργα τά τ᾽ ἀνθρώποισι θεοὶ διετεκμήραντο,
1.0.399
μή ποτε σὺν παίδεσσι γυναικί τε θυμὸν ἀχεύων
1.0.400
ζητεύηις βίοτον κατὰ γείτονας, οἳ δ᾽ ἀμελῶσιν.
1.0.401
δὶς μὲν γὰρ καὶ τρὶς τάχα τεύξεαι· ἢν δ᾽ ἔτι λυπῆις,
1.0.402
χρῆμα μὲν οὐ πρήξεις, σὺ δ᾽ ἐτώσια πόλλ᾽ ἀγορεύσεις,
1.0.403
ἀχρεῖος δ᾽ ἔσται ἐπέων νομός. ἀλλά σ᾽ ἄνωγα
1.0.404
φράζεσθαι χρειῶν τε λύσιν λιμοῦ τ᾽ ἀλεωρήν.
1.0.405
Οἶκον μὲν πρώτιστα γυναῖκά τε βοῦν τ᾽ ἀροτῆρα,
1.0.406
κτητήν, οὐ γαμετήν, ἥτις καὶ βουσὶν ἕποιτο,
1.0.407
χρήματα δ᾽ εἰν οἴκωι πάντ᾽ ἄρμενα ποιήσασθαι,
1.0.408
μὴ σὺ μὲν αἰτῆις ἄλλον, ὃ δ᾽ ἀρνῆται, σὺ δὲ τητᾶι,
1.0.409
ἡ δ᾽ ὥρη παραμείβηται, μινύθηι δέ τοι ἔργον.
1.0.410
μηδ᾽ ἀναβάλλεσθαι ἔς τ᾽ αὔριον ἔς τε ἔνηφι·
1.0.411
οὐ γὰρ ἐτωσιοεργὸς ἀνὴρ πίμπλησι καλιὴν
1.0.412
οὐδ᾽ ἀναβαλλόμενος· μελέτη δέ τοι ἔργον ὀφέλλει·
1.0.413
αἰεὶ δ᾽ ἀμβολιεργὸς ἀνὴρ ἄτηισι παλαίει.
1.0.414
Ἦμος δὴ λήγει μένος ὀξέος ἠελίοιο
1.0.415
καύματος ἰδαλίμου, μετοπωρινὸν ὀμβρήσαντος
1.0.416
Ζηνὸς ἐρισθενέος, μετὰ δὲ τρέπεται βρότεος χρὼς
1.0.417
πολλὸν ἐλαφρότερος· δὴ γὰρ τότε Σείριος ἀστὴρ
1.0.418
βαιὸν ὑπὲρ κεφαλῆς κηριτρεφέων ἀνθρώπων
1.0.419
ἔρχεται ἠμάτιος, πλεῖον δέ τε νυκτὸς ἐπαυρεῖ·
1.0.420
τῆμος ἀδηκτοτάτη πέλεται τμηθεῖσα σιδήρωι
1.0.421
ὕλη, φύλλα δ᾽ ἔραζε χέει, πτόρθοιό τε λήγει·
1.0.422
τῆμος ἄρ᾽ ὑλοτομεῖν μεμνημένος ὥρια ἔργα·
1.0.423
ὄλμον μὲν τριπόδην τάμνειν, ὕπερον δὲ τρίπηχυν,
1.0.424
ἄξονα δ᾽ ἑπταπόδην· μάλα γάρ νύ τοι ἄρμενον οὕτω·
1.0.425
εἰ δέ κεν ὀκταπόδην, ἀπὸ καὶ σφῦράν κε τάμοιο.
1.0.426
τρισπίθαμον δ᾽ ἅψιν τάμνειν δεκαδώρωι ἀμάξηι,
1.0.427
πόλλ᾽ ἐπικαμπύλα κᾶλα· φέρειν δὲ γύην, ὅτ᾽ ἂν εὕρηις,
1.0.428
εἰς οἶκον, κατ᾽ ὄρος διζήμενος ἢ κατ᾽ ἄρουραν,
1.0.429
πρίνινον· ὃς γὰρ βουσὶν ἀροῦν ὀχυρώτατός ἐστιν,
1.0.430
εὖτ᾽ ἂν Ἀθηναίης δμῶος ἐν ἐλύματι πήξας
1.0.431
γόμφοισιν πελάσας προσαρήρεται ἱστοβοῆι.
1.0.432
δοιὰ δὲ θέσθαι ἄροτρα, πονησάμενος κατὰ οἶκον,
1.0.433
αὐτόγυον καὶ πηκτόν, ἐπεὶ πολὺ λώιον οὕτω·
1.0.434
εἴ χ᾽ ἕτερον γ᾽ ἄξαις, ἕτερόν κ᾽ ἐπὶ βουσὶ βάλοιο.
1.0.435
δάφνης δ᾽ ἢ πτελέης ἀκιώτατοι ἱστοβοῆες.
1.0.436
δρυὸς ἔλυμα, πρίνου δὲ γύην. βόε δ᾽ ἐνναετήρω
1.0.437
ἄρσενε κεκτῆσθαι· τῶν γὰρ σθένος οὐκ ἀλαπαδνόν·
1.0.438
ἥβης μέτρον ἔχοντε· τὼ ἐργάζεσθαι ἀρίστω.
1.0.439
οὐκ ἂν τώ γ᾽ ἐρίσαντε ἐν αὔλακι κὰμ μὲν ἄροτρον
1.0.440
ἄξειαν, τὸ δὲ ἔργον ἐτώσιον αὖθι λίποιεν.
1.0.441
τοῖς δ᾽ ἅμα τεσσαρακονταετὴς αἰζηὸς ἕποιτο
1.0.442
ἄρτον δειπνήσας τετράτρυφον, ὀκτάβλωμον,
1.0.443
ὅς κ᾽ ἔργου μελετῶν ἰθείην αὔλακ᾽ ἐλαύνοι,
1.0.444
μηκέτι παπταίνων μεθ᾽ ὁμήλικας, ἀλλ᾽ ἐπὶ ἔργωι
1.0.445
θυμὸν ἔχων· τοῦ δ᾽ οὔ τι νεώτερος ἄλλος ἀμείνων
1.0.446
σπέρματα δάσσασθαι καὶ ἐπισπορίην ἀλέασθαι·
1.0.447
κουρότερος γὰρ ἀνὴρ μεθ᾽ ὁμήλικας ἐπτοίηται.
1.0.448
Φράζεσθαι δ᾽, εὖτ᾽ ἂν γεράνου φωνὴν ἐπακούσηις
1.0.449
ὑψόθεν ἐκ νεφέων ἐνιαύσια κεκληγυίης,
1.0.450
ἥ τ᾽ ἀρότοιό τε σῆμα φέρει καὶ χείματος ὥρην
1.0.451
δεικνύει ὀμβρηροῦ, κραδίην δ᾽ ἔδακ᾽ ἀνδρὸς ἀβούτεω·
1.0.452
δὴ τότε χορτάζειν ἕλικας βόας ἔνδον ἐόντας·
1.0.453
ῥηίδιον γὰρ ἔπος εἰπεῖν·« βόε δὸς καὶ ἄμαξαν·
1.0.454
ῥηίδιον δ᾽ ἀπανήνασθαι· πάρα δ᾽ ἔργα βόεσσιν».
1.0.455
φησὶ δ᾽ ἀνὴρ φρένας ἀφνειὸς πήξασθαι ἄμαξαν·
1.0.456
νήπιος, οὐδὲ τὸ οἶδ᾽· ἑκατὸν δέ τε δούρατ᾽ ἀμάξης,
1.0.457
τῶν πρόσθεν μελέτην ἐχέμεν οἰκήια θέσθαι.
1.0.458
Εὖτ᾽ ἂν δὴ πρώτιστ᾽ ἄροτος θνητοῖσι φανήηι,
1.0.459
δὴ τότ᾽ ἐφορμηθῆναι, ὁμῶς δμῶές τε καὶ αὐτός,
1.0.460
αὔην καὶ διερὴν ἀρόων ἀρότοιο καθ᾽ ὥρην,
1.0.461
πρωὶ μάλα σπεύδων, ἵνα τοι πλήθωσιν ἄρουραι.
1.0.462
ἔαρι πολεῖν· θέρεος δὲ νεωμένη οὔ σ᾽ ἀπατήσει·
1.0.463
νειὸν δὲ σπείρειν ἔτι κουφίζουσαν ἄρουραν.
1.0.464
νειὸς ἀλεξιάρη παίδων εὐκηλήτειρα.
1.0.465
Εὔχεσθαι δὲ Διὶ χθονίωι Δημήτερί θ᾽ ἁγνῆι
1.0.466
ἐκτελέα βρίθειν Δημήτερος ἱερὸν ἀκτήν,
1.0.467
ἀρχόμενος τὰ πρῶτ᾽ ἀρότου, ὅτ᾽ ἂν ἄκρον ἐχέτλης
1.0.468
χειρὶ λαβὼν ὅρπηκι βοῶν ἐπὶ νῶτον ἵκηαι
1.0.469
ἔνδρυον ἑλκόντων μεσάβων. ὁ δὲ τυτθὸς ὄπισθε
1.0.470
δμῶος ἔχων μακέλην πόνον ὀρνίθεσσι τιθείη
1.0.471
σπέρμα κατακρύπτων· εὐθημοσύνη γὰρ ἀρίστη
1.0.472
θνητοῖς ἀνθρώποις, κακοθημοσύνη δὲ κακίστη.
1.0.473
ὧδέ κεν ἁδροσύνηι στάχυες νεύοιεν ἔραζε,
1.0.474
εἰ τέλος αὐτὸς ὄπισθεν Ὀλύμπιος ἐσθλὸν ὀπάζοι,
1.0.475
ἐκ δ᾽ ἀγγέων ἐλάσειας ἀράχνια, καί σε ἔολπα
1.0.476
γηθήσειν βιότου αἰρεύμενον ἔνδον ἐόντος.
1.0.477
εὐοχθέων δ᾽ ἵξεαι πολιὸν ἔαρ οὐδὲ πρὸς ἄλλους
1.0.478
αὐγάσεαι· σέο δ᾽ ἄλλος ἀνὴρ κεχρημένος ἔσται.
1.0.479
Εἰ δέ κεν ἠελίοιο τροπῆις ἀρόωις χθόνα δῖαν,
1.0.480
ἥμενος ἀμήσεις ὀλίγον περὶ χειρὸς ἐέργων,
1.0.481
ἀντία δεσμεύων κεκονιμένος, οὐ μάλα χαίρων,
1.0.482
οἴσεις δ᾽ ἐν φορμῶι· παῦροι δέ σε θηήσονται.
1.0.483
ἄλλοτε δ᾽ ἀλλοῖος Ζηνὸς νόος αἰγιόχοιο,
1.0.484
ἀργαλέος δ᾽ ἄνδρεσσι καταθνητοῖσι νοῆσαι.
1.0.485
εἰ δή κ᾽ ὄψ᾽ ἀρόσηις, τόδε κέν τοι φάρμακον εἴη·
1.0.486
ἦμος κόκκυξ κοκκύζει δρυὸς ἐν πετάλοισι
1.0.487
τὸ πρῶτον, τέρπει δὲ βροτοὺς ἐπ᾽ ἀπείρονα γαῖαν,
1.0.488
τῆμος Ζεὺς ὕοι τρίτωι ἤματι μηδ᾽ ἀπολήγοι,
1.0.489
μήτ᾽ ἄρ᾽ ὑπερβάλλων βοὸς ὁπλὴν μήτ᾽ ἀπολείπων·
1.0.490
οὕτω κ᾽ ὀψαρότης πρωιηρότηι ἰσοφαρίζοι.
1.0.491
ἐν θυμῶι δ᾽ εὖ πάντα φυλάσσεο· μηδέ σε λήθοι
1.0.492
μήτ᾽ ἔαρ γινόμενον πολιὸν μήθ᾽ ὥριος ὄμβρος.
1.0.493
Πὰρ δ᾽ ἴθι χάλκειον θῶκον καὶ ἐπαλέα λέσχην
1.0.494
ὥρηι χειμερίηι, ὁπότε κρύος ἀνέρα ἔργων
1.0.495
ἰσχάνει, ἔνθα κ᾽ ἄοκνος ἀνὴρ μέγα οἶκον ὀφέλλοι,
1.0.496
μή σε κακοῦ χειμῶνος ἀμηχανίη καταμάρψηι
1.0.497
σὺν πενίηι, λεπτῆι δὲ παχὺν πόδα χειρὶ πιέζηις.
1.0.498
πολλὰ δ᾽ ἀεργὸς ἀνήρ, κενεὴν ἐπὶ ἐλπίδα μίμνων,
1.0.499
χρηίζων βιότοιο, κακὰ προσελέξατο θυμῶι.
1.0.500
ἐλπὶς δ᾽ οὐκ ἀγαθὴ κεχρημένον ἄνδρα κομίζει,
1.0.501
ἥμενον ἐν λέσχηι, τῶι μὴ βίος ἄρκιος εἴη.
1.0.502
δείκνυε δὲ δμώεσσι θέρευς ἔτι μέσσου ἐόντος·
1.0.503
« οὐκ αἰεὶ θέρος ἐσσεῖται, ποιεῖσθε καλιάς.»
1.0.504
Μῆνα δὲ Ληναιῶνα, κάκ᾽ ἤματα, βουδόρα πάντα,
1.0.505
τοῦτον ἀλεύασθαι καὶ πηγάδας, αἵ τ᾽ ἐπὶ γαῖαν
1.0.506
πνεύσαντος Βορέαο δυσηλεγέες τελέθουσιν,
1.0.507
ὅς τε διὰ Θρήικης ἱπποτρόφου εὐρέι πόντωι
1.0.508
ἐμπνεύσας ὤρινε, μέμυκε δὲ γαῖα καὶ ὕλη·
1.0.509
πολλὰς δὲ δρῦς ὑψικόμους ἐλάτας τε παχείας
1.0.510
οὔρεος ἐν βήσσηις πιλνᾶι χθονὶ πουλυβοτείρηι
1.0.511
ἐμπίπτων, καὶ πᾶσα βοᾶι τότε νήριτος ὕλη·
1.0.512
θῆρες δὲ φρίσσουσ᾽, οὐρὰς δ᾽ ὑπὸ μέζε᾽ ἔθεντο·
1.0.513
τῶν καὶ λάχνηι δέρμα κατάσκιον· ἀλλά νυ καὶ τῶν
1.0.514
ψυχρὸς ἐὼν διάησι δασυστέρνων περ ἐόντων·
1.0.515
καί τε διὰ ῥινοῦ βοὸς ἔρχεται οὐδέ μιν ἴσχει,
1.0.516
καί τε δι᾽ αἶγα ἄησι τανύτριχα· πώεα δ᾽ οὔτι,
1.0.517
οὕνεκ᾽ ἐπηεταναὶ τρίχες αὐτῶν, οὐ διάησι
1.0.518
ἲς ἀνέμου Βορέω· τροχαλὸν δὲ γέροντα τίθησιν
1.0.519
καὶ διὰ παρθενικῆς ἁπαλόχροος οὐ διάησιν,
1.0.520
ἥ τε δόμων ἔντοσθε φίληι παρὰ μητέρι μίμνει,
1.0.521
οὔπω ἔργα ἰδυῖα πολυχρύσου Ἀφροδίτης,
1.0.522
εὖ τε λοεσσαμένη τέρενα χρόα καὶ λίπ᾽ ἐλαίωι
1.0.523
χρισαμένη μυχίη καταλέξεται ἔνδοθι οἴκου,
1.0.524
ἤματι χειμερίωι, ὅτ᾽ ἀνόστεος ὃν πόδα τένδει
1.0.525
ἔν τ᾽ ἀπύρωι οἴκωι καὶ ἤθεσι λευγαλέοισιν·
1.0.526
οὐ γάρ οἱ ἠέλιος δείκνυ νομὸν ὁρμηθῆναι,
1.0.527
ἀλλ᾽ ἐπὶ κυανέων ἀνδρῶν δῆμόν τε πόλιν τε
1.0.528
στρωφᾶται, βράδιον δὲ Πανελλήνεσσι φαείνει.
1.0.529
καὶ τότε δὴ κεραοὶ καὶ νήκεροι ὑληκοῖται
1.0.530
λυγρὸν μυλιόωντες ἀνὰ δρία βησσήεντα,
1.0.531
φεύγουσιν, καὶ πᾶσιν ἐνὶ φρεσὶ τοῦτο μέμηλεν,
1.0.532
οἷ σκέπα μαιόμενοι πυκινοὺς κευθμῶνας ἔχουσι
1.0.533
κὰκ γλάφυ πετρῆεν· τότε δὴ τρίποδι βροτοὶ ἶσοι,
1.0.534
οὗ τ᾽ ἐπὶ νῶτα ἔαγε, κάρη δ᾽ εἰς οὖδας ὁρᾶται·
1.0.535
τῶι ἴκελοι φοιτῶσιν, ἀλευόμενοι νίφα λευκήν.
1.0.536
Καὶ τότε ἕσσασθαι ἔρυμα χροός, ὥς σε κελεύω,
1.0.537
χλαῖνάν τε μαλακὴν καὶ τερμιόεντα χιτῶνα·
1.0.538
στήμονι δ᾽ ἐν παύρωι πολλὴν κρόκα μηρύσασθαι·
1.0.539
τὴν περιέσσασθαι, ἵνα τοι τρίχες ἀτρεμέωσι
1.0.540
μηδ᾽ ὀρθαὶ φρίσσωσιν ἀειρόμεναι κατὰ σῶμα·
1.0.541
ἀμφὶ δὲ ποσσὶ πέδιλα βοὸς ἶφι κταμένοιο
1.0.542
ἄρμενα δήσασθαι, πίλοις ἔντοσθε πυκάσσας·
1.0.543
πρωτογόνων δ᾽ ἐρίφων, ὁπότ᾽ ἂν κρύος ὥριον ἔλθηι,
1.0.544
δέρματα συρράπτειν νεύρωι βοός, ὄφρ᾽ ἐπὶ νώτωι
1.0.545
ὑετοῦ ἀμφιβάληι ἀλέην· κεφαλῆφι δ᾽ ὕπερθεν
1.0.546
πῖλον ἔχειν ἀσκητόν, ἵν᾽ οὔατα μὴ καταδεύηι.
1.0.547
ψυχρὴ γάρ τ᾽ ἠὼς πέλεται Βορέαο πεσόντος,
1.0.548
ἠῶιος δ᾽ ἐπὶ γαῖαν ἀπ᾽ οὐρανοῦ ἀστερόεντος
1.0.549
ἀὴρ πυροφόροις τέταται μακάρων ἐπὶ ἔργοις,
1.0.550
ὅς τε ἀρυσσάμενος ποταμῶν ἀπὸ αἰεναόντων,
1.0.551
ὑψοῦ ὑπὲρ γαίης ἀρθεὶς ἀνέμοιο θυέλληι,
1.0.552
ἄλλοτε μέν θ᾽ ὕει ποτὶ ἕσπερον, ἄλλοτ᾽ ἄησι,
1.0.553
πυκνὰ Θρηικίου Βορέω νέφεα κλονέοντος.
1.0.554
τὸν φθάμενος ἔργον τελέσας οἶκόνδε νέεσθαι,
1.0.555
μή ποτέ σ᾽ οὐρανόθεν σκοτόεν νέφος ἀμφικαλύψηι,
1.0.556
χρῶτα δὲ μυδαλέον θήηι κατά θ᾽ εἵματα δεύσηι·
1.0.557
ἀλλ᾽ ὑπαλεύασθαι· μεὶς γὰρ χαλεπώτατος οὗτος,
1.0.558
χειμέριος, χαλεπὸς προβάτοις, χαλεπὸς δ᾽ ἀνθρώποις.
1.0.559
τῆμος τὤμισυ βουσίν, ἐπ᾽ ἀνέρι δὲ πλέον εἴη
1.0.560
ἁρμαλιῆς· μακραὶ γὰρ ἐπίρροθοι εὐφρόναι εἰσίν.
1.0.561
ταῦτα φυλασσόμενος τετελεσμένον εἰς ἐνιαυτὸν
1.0.562
ἰσοῦσθαι νύκτας τε καὶ ἤματα, εἰς ὅ κεν αὖτις
1.0.563
γῆ πάντων μήτηρ καρπὸν σύμμικτον ἐνείκηι.
1.0.564
Εὖτ᾽ ἂν δ᾽ ἑξήκοντα μετὰ τροπὰς ἠελίοιο
1.0.565
χειμέρι᾽ ἐκτελέσηι Ζεὺς ἤματα, δή ῥα τότ᾽ ἀστὴρ
1.0.566
Ἀρκτοῦρος προλιπὼν ἱερὸν ῥόον Ὠκεανοῖο
1.0.567
πρῶτον παμφαίνων ἐπιτέλλεται ἀκροκνέφαιος.
1.0.568
τὸν δὲ μέτ᾽ ὀρθογόη Πανδιονὶς ὦρτο χελιδὼν
1.0.569
ἐς φάος ἀνθρώποις ἔαρος νέον ἱσταμένοιο·
1.0.570
τὴν φθάμενος οἴνας περιταμνέμεν· ὣς γὰρ ἄμεινον.
1.0.571
Ἀλλ᾽ ὁπότ᾽ ἂν φερέοικος ἀπὸ χθονὸς ἂμ φυτὰ βαίνηι
1.0.572
Πληιάδας φεύγων, τότε δὴ σκάφος οὐκέτι οἰνέων,
1.0.573
ἀλλ᾽ ἅρπας τε χαρασσέμεναι καὶ δμῶας ἐγείρειν·
1.0.574
φεύγειν δὲ σκιεροὺς θώκους καὶ ἐπ᾽ ἠόα κοῖτον
1.0.575
ὥρηι ἐν ἀμήτου, ὅτε τ᾽ ἠέλιος χρόα κάρφει·
1.0.576
τημοῦτος σπεύδειν καὶ οἴκαδε καρπὸν ἀγινεῖν
1.0.577
ὄρθρου ἀνιστάμενος, ἵνα τοι βίος ἄρκιος εἴη.
1.0.578
ἠὼς γὰρ τ᾽ ἔργοιο τρίτην ἀπομείρεται αἶσαν,
1.0.579
ἠώς τοι προφέρει μὲν ὁδοῦ, προφέρει δὲ καὶ ἔργου,
1.0.580
ἠώς, ἥ τε φανεῖσα πολέας ἐπέβησε κελεύθου
1.0.581
ἀνθρώπους πολλοῖσί τ᾽ ἐπὶ ζυγὰ βουσὶ τίθησιν.
1.0.582
Ἦμος δὲ σκόλυμός τ᾽ ἀνθεῖ καὶ ἠχέτα τέττιξ
1.0.583
δενδρέωι ἐφεζόμενος λιγυρὴν καταχεύετ᾽ ἀοιδὴν
1.0.584
πυκνὸν ὑπὸ πτερύγων, θέρεος καματώδεος ὥρηι,
1.0.585
τῆμος πιόταταί τ᾽ αἶγες, καὶ οἶνος ἄριστος,
1.0.586
μαχλόταται δὲ γυναῖκες, ἀφαυρότατοι δέ τοι ἄνδρες
1.0.587
εἰσίν, ἐπεὶ κεφαλὴν καὶ γούνατα Σείριος ἄζει,
1.0.588
αὐαλέος δέ τε χρὼς ὑπὸ καύματος· ἀλλὰ τότ᾽ ἤδη
1.0.589
εἴη πετραίη τε σκιὴ καὶ βίβλινος οἶνος
1.0.590
μάζα τ᾽ ἀμολγαίη γάλα τ᾽ αἰγῶν σβεννυμενάων
1.0.591
καὶ βοὸς ὑλοφάγοιο κρέας μή πω τετοκυίης
1.0.592
πρωτογόνων τ᾽ ἐρίφων· ἐπὶ δ᾽ αἴθοπα πινέμεν οἶνον,
1.0.593
ἐν σκιῆι ἑζόμενον, κεκορημένον ἦτορ ἐδωδῆς,
1.0.594
ἀντίον ἀκραέος Ζεφύρου τρέψαντα πρόσωπα·
1.0.595
κρήνης δ᾽ ἀενάου καὶ ἀπορρύτου ἥ τ᾽ ἀθόλωτος
1.0.596
τρὶς ὕδατος προχέειν, τὸ δὲ τέτρατον ἱέμεν οἴνου.
1.0.597
Δμωσὶ δ᾽ ἐποτρύνειν Δημήτερος ἱερὸν ἀκτὴν
1.0.598
δινέμεν, εὖτ᾽ ἂν πρῶτα φανῆι σθένος Ὠρίωνος,
1.0.599
χώρωι ἐν εὐαεῖ καὶ ἐυτροχάλωι ἐν ἀλωῆι.
1.0.600
μέτρωι δ᾽ εὖ κομίσασθαι ἐν ἄγγεσιν· αὐτὰρ ἐπὴν δὴ
1.0.601
πάντα βίον κατάθηαι ἐπάρμενον ἔνδοθι οἴκου,
1.0.602
θῆτά τ᾽ ἄοικον ποιεῖσθαι καὶ ἄτεκνον ἔριθον
1.0.603
δίζησθαι κέλομαι· χαλεπὴ δ᾽ ὑπόπορτις ἔριθος·
1.0.604
καὶ κύνα καρχαρόδοντα κομεῖν, μὴ φείδεο σίτου,
1.0.605
μή ποτέ σ᾽ ἡμερόκοιτος ἀνὴρ ἀπὸ χρήμαθ᾽ ἕληται.
1.0.606
χόρτον δ᾽ ἐσκομίσαι καὶ συρφετόν, ὄφρα τοι εἴη
1.0.607
βουσὶ καὶ ἡμιόνοισιν ἐπηετανόν. αὐτὰρ ἔπειτα
1.0.608
δμῶας ἀναψῦξαι φίλα γούνατα καὶ βόε λῦσαι.
1.0.609
Εὖτ᾽ ἂν δ᾽ Ὠρίων καὶ Σείριος ἐς μέσον ἔλθηι
1.0.610
οὐρανόν, Ἀρκτοῦρον δὲ ἴδηι ῥοδοδάκτυλος Ἠώς,
1.0.611
ὦ Πέρση, τότε πάντας ἀποδρέπεν οἴκαδε βότρυς,
1.0.612
δεῖξαι δ᾽ ἠελίωι δέκα τ᾽ ἤματα καὶ δέκα νύκτας,
1.0.613
πέντε δὲ συσκιάσαι, ἕκτωι δ᾽ εἰς ἄγγε᾽ ἀφύσσαι
1.0.614
δῶρα Διωνύσου πολυγηθέος. αὐτὰρ ἐπὴν δὴ
1.0.615
Πληιάδες θ᾽ Ὑάδες τε τό τε σθένος Ὠρίωνος
1.0.616
δύνωσιν, τότ᾽ ἔπειτ᾽ ἀρότου μεμνημένος εἶναι
1.0.617
ὡραίου· πλειὼν δὲ κατὰ χθονὸς ἄρμενος εἴη.
1.0.618
Εἰ δέ σε ναυτιλίης δυσπεμφέλου ἵμερος αἱρεῖ·
1.0.619
εὖτ᾽ ἂν Πληιάδες σθένος ὄβριμον Ὠρίωνος
1.0.620
φεύγουσαι πίπτωσιν ἐς ἠεροειδέα πόντον,
1.0.621
δὴ τότε παντοίων ἀνέμων θυίουσιν ἀῆται·
1.0.622
καὶ τότε μηκέτι νῆα ἔχειν ἐνὶ οἴνοπι πόντωι,
1.0.623
γῆν δ᾽ ἐργάζεσθαι μεμνημένος ὥς σε κελεύω·
1.0.624
νῆα δ᾽ ἐπ᾽ ἠπείρου ἐρύσαι πυκάσαι τε λίθοισι
1.0.625
πάντοθεν, ὄφρ᾽ ἴσχωσ᾽ ἀνέμων μένος ὑγρὸν ἀέντων,
1.0.626
χείμαρον ἐξερύσας, ἵνα μὴ πύθηι Διὸς ὄμβρος.
1.0.627
ὅπλα δ᾽ ἐπάρμενα πάντα τεῶι ἐγκάτθεο οἴκωι,
1.0.628
εὐκόσμως στολίσας νηὸς πτερὰ ποντοπόροιο·
1.0.629
πηδάλιον δ᾽ εὐεργὲς ὑπὲρ καπνοῦ κρεμάσασθαι.
1.0.630
αὐτὸς δ᾽ ὡραῖον μίμνειν πλόον εἰς ὅ κεν ἔλθηι·
1.0.631
καὶ τότε νῆα θοὴν ἅλαδ᾽ ἑλκέμεν, ἐν δέ τε φόρτον
1.0.632
ἄρμενον ἐντύνασθαι, ἵν᾽ οἴκαδε κέρδος ἄρηαι,
1.0.633
ὥς περ ἐμός τε πατὴρ καὶ σός, μέγα νήπιε Πέρση,
1.0.634
πλωίζεσκ᾽ ἐν νηυσί, βίου κεχρημένος ἐσθλοῦ·
1.0.635
ὅς ποτε καὶ τεῖδ᾽ ἦλθε πολὺν διὰ πόντον ἀνύσσας,
1.0.636
Κύμην Αἰολίδα προλιπὼν ἐν νηὶ μελαίνηι,
1.0.637
οὐκ ἄφενος φεύγων οὐδὲ πλοῦτόν τε καὶ ὄλβον,
1.0.638
ἀλλὰ κακὴν πενίην, τὴν Ζεὺς ἄνδρεσσι δίδωσιν.
1.0.639
νάσσατο δ᾽ ἄγχ᾽ Ἑλικῶνος ὀιζυρῆι ἐνὶ κώμηι,
1.0.640
Ἄσκρηι, χεῖμα κακῆι, θέρει ἀργαλέηι, οὐδέ ποτ᾽ ἐσθλῆι.
1.0.641
τύνη δ᾽, ὦ Πέρση, ἔργων μεμνημένος εἶναι
1.0.642
ὡραίων πάντων, περὶ ναυτιλίης δὲ μάλιστα.
1.0.643
νῆ᾽ ὀλίγην αἰνεῖν, μεγάληι δ᾽ ἐνὶ φορτία θέσθαι·
1.0.644
μείζων μὲν φόρτος, μεῖζον δ᾽ ἐπὶ κέρδεϊ κέρδος
1.0.645
ἔσσεται, εἴ κ᾽ ἄνεμοί γε κακὰς ἀπέχωσιν ἀήτας.
1.0.646
Εὖτ᾽ ἂν ἐπ᾽ ἐμπορίην τρέψας ἀεσίφρονα θυμὸν
1.0.647
βούληαι δὲ χρέα τε προφυγεῖν καὶ λιμὸν ἀτερπέα,
1.0.648
δείξω δή τοι μέτρα πολυφλοίσβοιο θαλάσσης,
1.0.649
οὔτε τι ναυτιλίης σεσοφισμένος οὔτε τι νηῶν.
1.0.650
οὐ γάρ πώ ποτε νηὶ γ᾽ ἐπέπλων εὐρέα πόντον,
1.0.651
εἰ μὴ ἐς Εὔβοιαν ἐξ Αὐλίδος, ἧι ποτ᾽ Ἀχαιοὶ
1.0.652
μείναντες χειμῶνα πολὺν σὺν λαὸν ἄγειραν
1.0.653
Ἑλλάδος ἐξ ἱερῆς Τροίην ἐς καλλιγύναικα.
1.0.654
ἔνθα δ᾽ ἐγὼν ἐπ᾽ ἄεθλα δαΐφρονος Ἀμφιδάμαντος
1.0.655
Χαλκίδα τ᾽ εἰσεπέρησα· τὰ δὲ προπεφραδμένα πολλὰ
1.0.656
ἄεθλ᾽ ἔθεσαν παῖδες μεγαλήτορες· ἔνθα μέ φημι
1.0.657
ὕμνωι νικήσαντα φέρειν τρίποδ᾽ ὠτώεντα.
1.0.658
τὸν μὲν ἐγὼ Μούσηισ᾽ Ἑλικωνιάδεσσ᾽ ἀνέθηκα
1.0.659
ἔνθα με τὸ πρῶτον λιγυρῆς ἐπέβησαν ἀοιδῆς.
1.0.660
τόσσον τοι νηῶν γε πεπείρημαι πολυγόμφων·
1.0.661
ἀλλὰ καὶ ὣς ἐρέω Ζηνὸς νόον αἰγιόχοιο·
1.0.662
Μοῦσαι γάρ μ᾽ ἐδίδαξαν ἀθέσφατον ὕμνον ἀείδειν.
1.0.663
Ἤματα πεντήκοντα μετὰ τροπὰς ἠελίοιο,
1.0.664
ἐς τέλος ἐλθόντος θέρεος, καματώδεος ὥρης,
1.0.665
ὡραῖος πέλεται θνητοῖς πλόος· οὔτε κε νῆα
1.0.666
καυάξαις οὔτ᾽ ἄνδρας ἀποφθείσειε θάλασσα,
1.0.667
εἰ δὴ μὴ πρόφρων γε Ποσειδάων ἐνοσίχθων
1.0.668
ἢ Ζεὺς ἀθανάτων βασιλεὺς ἐθέληισιν ὀλέσσαι·
1.0.669
ἐν τοῖς γὰρ τέλος ἐστὶν ὁμῶς ἀγαθῶν τε κακῶν τε.
1.0.670
τῆμος δ᾽ εὐκρινέες τ᾽ αὖραι καὶ πόντος ἀπήμων·
1.0.671
εὔκηλος τότε νῆα θοὴν ἀνέμοισι πιθήσας
1.0.672
ἑλκέμεν ἐς πόντον φόρτον τ᾽ ἐς πάντα τίθεσθαι·
1.0.673
σπεύδειν δ᾽ ὅττι τάχιστα πάλιν οἶκόνδε νέεσθαι
1.0.674
μηδὲ μένειν οἶνόν τε νέον καὶ ὀπωρινὸν ὄμβρον
1.0.675
καὶ χειμῶν᾽ ἐπιόντα Νότοιό τε δεινὰς ἀήτας,
1.0.676
ὅς τ᾽ ὤρινε θάλασσαν ὁμαρτήσας Διὸς ὄμβρωι
1.0.677
πολλῶι ὀπωρινῶι, χαλεπὸν δέ τε πόντον ἔθηκεν.
1.0.678
ἄλλος δ᾽ εἰαρινὸς πέλεται πλόος ἀνθρώποισιν·
1.0.679
ἦμος δὴ τὸ πρῶτον, ὅσον τ᾽ ἐπιβᾶσα κορώνη
1.0.680
ἴχνος ἐποίησεν, τόσσον πέταλ᾽ ἀνδρὶ φανήηι
1.0.681
ἐν κράδηι ἀκροτάτηι, τότε δ᾽ ἄμβατός ἐστι θάλασσα·
1.0.682
εἰαρινὸς δ᾽ οὗτος πέλεται πλόος· οὔ μιν ἔγωγε
1.0.683
αἴνημ᾽, οὐ γὰρ ἐμῶι θυμῶι κεχαρισμένος ἐστίν·
1.0.684
ἁρπακτός· χαλεπῶς κε φύγοις κακόν· ἀλλά νυ καὶ τὰ
1.0.685
ἄνθρωποι ῥέζουσιν ἀιδρείηισι νόοιο·
1.0.686
χρήματα γὰρ ψυχὴ πέλεται δειλοῖσι βροτοῖσιν.
1.0.687
δεινὸν δ᾽ ἐστὶ θανεῖν μετὰ κύμασιν· ἀλλά σ᾽ ἄνωγα
1.0.688
φράζεσθαι τάδε πάντα μετὰ φρεσὶν ὡς ἀγορεύω.
1.0.689
μηδ᾽ ἐν νηυσὶν ἅπαντα βίον κοίληισι τίθεσθαι,
1.0.690
ἀλλὰ πλέω λείπειν, τὰ δὲ μείονα φορτίζεσθαι·
1.0.691
δεινὸν γὰρ πόντου μετὰ κύμασι πήματι κύρσαι·
1.0.692
δεινὸν δ᾽ εἴ κ᾽ ἐπ᾽ ἄμαξαν ὑπέρβιον ἄχθος ἀείρας
1.0.693
ἄξονα καυάξαις καὶ φορτία μαυρωθείη.
1.0.694
μέτρα φυλάσσεσθαι· καιρὸς δ᾽ ἐπὶ πᾶσιν ἄριστος.
1.0.695
Ὡραῖος δὲ γυναῖκα τεὸν ποτὶ οἶκον ἄγεσθαι,
1.0.696
μήτε τριηκόντων ἐτέων μάλα πόλλ᾽ ἀπολείπων
1.0.697
μήτ᾽ ἐπιθεὶς μάλα πολλά· γάμος δέ τοι ὥριος οὗτος·
1.0.698
ἡ δὲ γυνὴ τέτορ᾽ ἡβώοι, πέμπτωι δὲ γαμοῖτο.
1.0.699
παρθενικὴν δὲ γαμεῖν, ὥς κ᾽ ἤθεα κεδνὰ διδάξηις,
1.0.700
τὴν δὲ μάλιστα γαμεῖν, ἥτις σέθεν ἐγγύθι ναίει
1.0.701
πάντα μάλ᾽ ἀμφὶς ἰδών, μὴ γείτοσι χάρματα γήμηις.
1.0.702
οὐ μὲν γάρ τι γυναικὸς ἀνὴρ ληίζετ᾽ ἄμεινον
1.0.703
τῆς ἀγαθῆς, τῆς δ᾽ αὖτε κακῆς οὐ ῥίγιον ἄλλο,
1.0.704
δειπνολόχης, ἥ τ᾽ ἄνδρα καὶ ἴφθιμόν περ ἐόντα
1.0.705
εὕει ἄτερ δαλοῖο καὶ ὠμῶι γήραϊ δῶκεν.
1.0.706
εὖ δ᾽ ὄπιν ἀθανάτων μακάρων πεφυλαγμένος εἶναι.
1.0.707
μὴ δὲ κασιγνήτωι ἶσον ποιεῖσθαι ἑταῖρον·
1.0.708
εἰ δέ κε ποιήσηις, μή μιν πρότερος κακὸν ἔρξαι
1.0.709
μηδὲ ψεύδεσθαι γλώσσης χάριν· εἰ δέ σέ γ᾽ ἄρχηι
1.0.710
ἤ τι ἔπος εἰπὼν ἀποθύμιον ἠὲ καὶ ἔρξας,
1.0.711
δὶς τόσα τείνυσθαι μεμνημένος· εἰ δέ κεν αὖτις
1.0.712
ἡγῆτ᾽ ἐς φιλότητα, δίκην δ᾽ ἐθέληισι παρασχεῖν,
1.0.713
δέξασθαι· δειλός τοι ἀνὴρ φίλον ἄλλοτε ἄλλον
1.0.714
ποιεῖται· σὲ δὲ μή τι νόος κατελεγχέτω εἶδος.
1.0.715
μηδὲ πολύξεινον μηδ᾽ ἄξεινον καλέεσθαι,
1.0.716
μηδὲ κακῶν ἕταρον μηδ᾽ ἐσθλῶν νεικεστῆρα.
1.0.717
μηδέ ποτ᾽ οὐλομένην πενίην θυμοφθόρον ἀνδρὶ
1.0.718
τέτλαθ᾽ ὀνειδίζειν, μακάρων δόσιν αἰὲν ἐόντων.
1.0.719
γλώσσης τοι θησαυρὸς ἐν ἀνθρώποισιν ἄριστος
1.0.720
φειδωλῆς, πλείστη δὲ χάρις κατὰ μέτρον ἰούσης·
1.0.721
εἰ δὲ κακὸν εἴποις, τάχα κ᾽ αὐτὸς μεῖζον ἀκούσαις.
1.0.722
μηδὲ πολυξείνου δαιτὸς δυσπέμφελος εἶναι·
1.0.723
ἐκ κοινοῦ πλείστη τε χάρις δαπάνη τ᾽ ὀλιγίστη.
1.0.724
μηδέ ποτ᾽ ἐξ ἠοῦς Διὶ λείβειν αἴθοπα οἶνον
1.0.725
χερσὶν ἀνίπτοισιν μηδ᾽ ἄλλοις ἀθανάτοισιν·
1.0.726
οὐ γὰρ τοί γε κλύουσιν, ἀποπτύουσι δέ τ᾽ ἀράς.
1.0.727
μηδ᾽ ἄντ᾽ ἠελίου τετραμμένος ὀρθὸς ὀμιχεῖν,
1.0.728
αὐτὰρ ἐπεί κε δύηι, μεμνημένος, ἔς τ᾽ ἀνιόντα,
1.0.729
μὴ δ᾽ ἀπογυμνωθείς· μακάρων τοι νύκτες ἔασιν.
1.0.730
μήτ᾽ ἐν ὁδῶι μήτ᾽ ἐκτὸς ὁδοῦ προβάδην οὐρήσηις·
1.0.731
ἑζόμενος δ᾽ ὅ γε θεῖος ἀνήρ, πεπνυμένα εἰδώς,
1.0.732
ἢ ὅ γε πρὸς τοῖχον πελάσας εὐερκέος αὐλῆς.
1.0.733
μηδ᾽ αἰδοῖα γονῆι πεπαλαγμένος ἔνδοθι οἴκου
1.0.734
ἱστίηι ἐμπελαδὸν παραφαινέμεν, ἀλλ᾽ ἀλέασθαι.
1.0.735
μηδ᾽ ἀπὸ δυσφήμοιο τάφου ἀπονοστήσαντα
1.0.736
σπερμαίνειν γενεήν, ἀλλ᾽ ἀθανάτων ἀπὸ δαιτός.
1.0.736a
μηδ᾽ ἐπὶ κρηνάων οὐρεῖν, μάλα δ᾽ ἐξαλέασθαι.
1.0.737
μηδέ ποτ᾽ ἀενάων ποταμῶν καλλίρροον ὕδωρ
1.0.738
ποσσὶ περᾶν πρίν γ᾽ εὔξηι ἰδὼν ἐς καλὰ ῥέεθρα
1.0.739
χεῖρας νιψάμενος πολυηράτωι ὕδατι λευκῶι.
1.0.740
ὃς ποταμὸν διαβῆι κακότητ᾽ ἰδὲ χεῖρας ἄνιπτος,
1.0.741
τῶι δὲ θεοὶ νεμεσῶσι καὶ ἄλγεα δῶκαν ὀπίσσω.
1.0.742
μηδ᾽ ἀπὸ πεντόζοιο θεῶν ἐν δαιτὶ θαλείηι
1.0.743
αὖον ἀπὸ χλωροῦ τάμνειν αἴθωνι σιδήρωι.
1.0.744
μηδέ ποτ᾽ οἰνοχόην τιθέμεν κρητῆρος ὕπερθεν
1.0.745
πινόντων· ὀλοὴ γὰρ ἐπ᾽ αὐτῶι μοῖρα τέτυκται.
1.0.746
μηδὲ δόμον ποιῶν ἀνεπίξεστον καταλείπειν,
1.0.747
μή τοι ἐφεζομένη κρώξηι λακέρυζα κορώνη.
1.0.748
μηδ᾽ ἀπὸ χυτροπόδων ἀνεπιρρέκτων ἀνελόντα
1.0.749
ἔσθειν μηδὲ λόεσθαι· ἐπεὶ καὶ τοῖς ἔπι ποινή.
1.0.750
μηδ᾽ ἐπ᾽ ἀκινήτοισι καθίζειν, οὐ γὰρ ἄμεινον,
1.0.751
παῖδα δυωδεκαταῖον, ὅ τ᾽ ἀνέρ᾽ ἀνήνορα ποιεῖ,
1.0.752
μηδὲ δυωδεκάμηνον· ἴσον καὶ τοῦτο τέτυκται.
1.0.753
μηδὲ γυναικείωι λουτρῶι χρόα φαιδρύνεσθαι
1.0.754
ἀνέρα· λευγαλέη γὰρ ἐπὶ χρόνον ἔστ᾽ ἐπὶ καὶ τῶι
1.0.755
ποινή. μηδ᾽ ἱεροῖσιν ἐπ᾽ αἰθομένοισι κυρήσας
1.0.756
μωμεύειν ἀίδηλα· θεός νύ τι καὶ τὰ νεμεσσᾶι.
1.0.757
μηδέ ποτ᾽ ἐν προχοῆις ποταμῶν ἅλαδε προρεόντων
1.0.758
μηδ᾽ ἐπὶ κρηνάων οὐρεῖν, μάλα δ᾽ ἐξαλέασθαι·
1.0.759
μηδ᾽ ἐναποψύχειν· τὸ γὰρ οὔ τοι λώιόν ἐστιν.
1.0.760
ὧδ᾽ ἔρδειν· δεινὴν δὲ βροτῶν ὑπαλεύεο φήμην·
1.0.761
φήμη γάρ τε κακὴ πέλεται κούφη μὲν ἀεῖραι
1.0.762
ῥεῖα μάλ᾽, ἀργαλέη δὲ φέρειν, χαλεπὴ δ᾽ ἀποθέσθαι.
1.0.763
φήμη δ᾽ οὔ τις πάμπαν ἀπόλλυται, ἥντινα πολλοὶ
1.0.764
λαοὶ φημίξουσι· θεός νύ τίς ἐστι καὶ αὐτή.
1.0.765
Ἤματα δ᾽ ἐκ Διόθεν πεφυλαγμένος εὖ κατὰ μοῖραν
1.0.766
πεφραδέμεν δμώεσσι τριηκάδα μηνὸς ἀρίστην
1.0.767
ἔργα τ᾽ ἐποπτεύειν ἠδ᾽ ἁρμαλιὴν δατέασθαι.
1.0.768
Αἵδε γὰρ ἡμέραι εἰσὶ Διὸς παρὰ μητιόεντος,
1.0.769
εὖτ᾽ ἂν ἀληθείην λαοὶ κρίνοντες ἄγωσιν·
1.0.770
πρῶτον ἔνη τετράς τε καὶ ἑβδόμη ἱερὸν ἦμαρ·
1.0.771
τῆι γὰρ Ἀπόλλωνα χρυσάορα γείνατο Λητώ·
1.0.772
ὀγδοάτη δ᾽ ἐνάτη τε δύω γε μὲν ἤματα μηνὸς
1.0.773
ἔξοχ᾽ ἀεξομένοιο βροτήσια ἔργα πένεσθαι·
1.0.774
ἑνδεκάτη δὲ δυωδεκάτη τ᾽ ἄμφω γε μὲν ἐσθλαὶ
1.0.775
ἠμὲν ὄις πείκειν ἠδ᾽ εὔφρονα καρπὸν ἀμᾶσθαι·
1.0.776
ἡ δὲ δυωδεκάτη τῆς ἑνδεκάτης μέγ᾽ ἀμείνων·
1.0.777
τῆι γάρ τοι νεῖ νήματ᾽ ἀερσιπότητος ἀράχνης
1.0.778
ἤματος ἐκ πλείου, ὅτε τ᾽ ἴδρις σωρὸν ἀμᾶται·
1.0.779
τῆι δ᾽ ἱστὸν στήσαιτο γυνὴ προβάλοιτό τε ἔργον.
1.0.780
Μηνὸς δ᾽ ἱσταμένου τρεισκαιδεκάτην ἀλέασθαι
1.0.781
σπέρματος ἄρξασθαι· φυτὰ δ᾽ ἐνθρέψασθαι ἀρίστη.
1.0.782
ἕκτη δ᾽ ἡ μέσση μάλ᾽ ἀσύμφορός ἐστι φυτοῖσιν,
1.0.783
ἀνδρογόνος δ᾽ ἀγαθή· κούρηι δ᾽ οὐ σύμφορός ἐστιν
1.0.784
οὔτε γενέσθαι πρῶτ᾽ οὔτ᾽ ἂρ γάμου ἀντιβολῆσαι.
1.0.785
οὐδὲ μὲν ἡ πρώτη ἕκτη κούρηι γε γενέσθαι
1.0.786
ἄρμενος, ἀλλ᾽ ἐρίφους τάμνειν καὶ πώεα μήλων,
1.0.787
σηκόν τ᾽ ἀμφιβαλεῖν ποιμνήιον ἤπιον ἦμαρ·
1.0.788
ἐσθλὴ δ᾽ ἀνδρογόνος· φιλέοι δ᾽ ὅ γε κέρτομα βάζειν
1.0.789
ψεύδεά θ᾽ αἱμυλίους τε λόγους κρυφίους τ᾽ ὀαρισμούς.
1.0.790
Μηνὸς δ᾽ ὀγδοάτηι κάπρον καὶ βοῦν ἐρίμυκον
1.0.791
ταμνέμεν, οὐρῆας δὲ δυωδεκάτηι ταλαεργούς.
1.0.792
Εἰκάδι δ᾽ ἐν μεγάληι, πλέωι ἤματι, ἵστορα φῶτα
1.0.793
γείνασθαι· μάλα γάρ τε νόον πεπυκασμένος ἔσται.
1.0.794
Ἐσθλὴ δ᾽ ἀνδρογόνος δεκάτη, κούρηι δέ τε τετρὰς
1.0.795
μέσση· τῆι δέ τε μῆλα καὶ εἰλίποδας ἕλικας βοῦς
1.0.796
καὶ κύνα καρχαρόδοντα καὶ οὐρῆας ταλαεργοὺς
1.0.797
πρηΰνειν ἐπὶ χεῖρα τιθείς· πεφύλαξο δὲ θυμῶι
1.0.798
τετράδ᾽ ἀλεύασθαι φθίνοντός θ᾽ ἱσταμένου τε
1.0.799
ἄλγεα· θυμοβορεῖν μάλα τοι τετελεσμένον ἦμαρ.
1.0.800
Ἐν δὲ τετάρτηι μηνὸς ἄγεσθ᾽ εἰς οἶκον ἄκοιτιν
1.0.801
οἰωνοὺς κρίνας οἳ ἐπ᾽ ἔργματι τούτωι ἄριστοι.
1.0.802
Πέμπτας δ᾽ ἐξαλέασθαι, ἐπεὶ χαλεπαί τε καὶ αἰναί·
1.0.803
ἐν πέμπτηι γάρ φασιν Ἐρινύας ἀμφιπολεύειν
1.0.804
Ὅρκον γεινόμενον, τὸν Ἔρις τέκε πῆμ᾽ ἐπιόρκοις.
1.0.805
Μέσσηι δ᾽ ἑβδομάτηι Δημήτερος ἱερὸν ἀκτὴν
1.0.806
εὖ μάλ᾽ ὀπιπεύοντα ἐυτροχάλωι ἐν ἀλωῆι
1.0.807
βάλλειν, ὑλοτόμον τε ταμεῖν θαλαμήια δοῦρα
1.0.808
νήιά τε ξύλα πολλά, τά τ᾽ ἄρμενα νηυσὶ πέλονται.
1.0.809
τετράδι δ᾽ ἄρχεσθαι νῆας πήγνυσθαι ἀραιάς.
1.0.810
Εἰνὰς δ᾽ ἡ μέσση ἐπὶ δείελα λώιον ἦμαρ·
1.0.811
πρωτίστη δ᾽ εἰνὰς παναπήμων ἀνθρώποισιν·
1.0.812
ἐσθλὴ μὲν γάρ θ᾽ ἥ γε φυτευέμεν ἠδὲ γενέσθαι
1.0.813
ἀνέρι τ᾽ ἠδὲ γυναικί, καὶ οὔποτε πάγκακον ἦμαρ.
1.0.814
Παῦροι δ᾽ αὖτε ἴσασι τρισεινάδα μηνὸς ἀρίστην
1.0.815
ἄρξασθαί τε πίθου καὶ ἐπὶ ζυγὸν αὐχένι θεῖναι
1.0.816
βουσὶ καὶ ἡμιόνοισι καὶ ἵπποις ὠκυπόδεσσι,
1.0.817
νῆα πολυκλήιδα θοὴν εἰς οἴνοπα πόντον
1.0.818
εἰρύμεναι· παῦροι δέ τ᾽ ἀληθέα κικλήσκουσιν.
1.0.819
Τετράδι δ᾽ οἶγε πίθον· περὶ πάντων ἱερὸν ἦμαρ
1.0.820
μέσση· παῦροι δ᾽ αὖτε μετ᾽ εἰκάδα μηνὸς ἀρίστην
1.0.821
ἠοῦς γεινομένης· ἐπὶ δείελα δ᾽ ἐστὶ χερείων.
1.0.822
Αἵδε μὲν ἡμέραι εἰσὶν ἐπιχθονίοις μέγ᾽ ὄνειαρ·
1.0.823
αἱ δ᾽ ἄλλαι μετάδουποι, ἀκήριοι, οὔ τι φέρουσαι.
1.0.824
ἄλλος δ᾽ ἀλλοίην αἰνεῖ, παῦροι δὲ ἴσασιν.
1.0.825
ἄλλοτε μητρυιὴ πέλει ἡμέρη, ἄλλοτε μήτηρ.
1.0.826
τάων εὐδαίμων τε καὶ ὄλβιος ὃς τάδε πάντα
1.0.827
εἰδὼς ἐργάζηται ἀναίτιος ἀθανάτοισιν,
1.0.828
ὄρνιθας κρίνων καὶ ὑπερβασίας ἀλεείνων.