Reader

CAP. XVI.-- De quinquaginta diebus ab octava paschae ad octavam Pentecostes.

Illi quinquaginta dies, qui sequuntur a Sabbato Paschae usque ad octavam Pentecostes, alteram vitam informant, quam nondum percepimus: ubi non erit Responsorium: quia nemo ibi praedicabit, sed erunt omnes docibiles Dei. Alleluia tamen ibi celebrabitur, id est laetitia animarum de percepta immortalitate et receptione corporum et gratiarum actione Deo in aeternum. Eamdem laetitiam numerus quinquagenarius significat, qui apud Hebraeos Jubilaeus appellatur; id est jubilatione plenus.

Quotidiani dies informant eos, qui presbytero confitentur peccata sua, ut ab ipso corripiantur, et consilium accipiant poenitendi. Ipsi dies sine Alleluia transigunt, quia non est pulchra laus in ore peccatoris.