Reader

CAP. V.-- De Quadragesima.

Quadragesima ideo vocatur, quia ab hac dominica sunt quadraginta dies usque in Coenam Domini. Populus Dei in Aegypto affligebatur a Pharaone, et per Moysen liberatus mare Rubrum sicco vestigio transivit: sed hostiliter eos insequens in undis interiit. Post hoc Deus legem populo dedit, quadraginta annis coelesti manna pavit, aquam de petra produxit, deinde in terram fluentem lac et mel introduxit. Aegyptus est iste mundus, Pharao diabolus, Haebraicus populus est Christianus populus, quem Moyses, id est Christus, de potestate Pharaonis, id est diaboli, liberavit. Per mare Rubrum, id est per baptismum, sanguine Christi rubicundum duxit; hostes, id est peccata submersit. Legem dat, quia peccata vetat: quadraginta annis per desertum ducit, quia quatuor Evangelia per decem praecepta legis implere praecipit. Manna, id est corpore suo pascit: fontem de petra, id est sanguinem latere suo tribuit, in terram repromissionis, id est in paradisum inducit. In Quadragesima aliqua pars pugnae peracta est; hoc dicit nobis, quem in missa Protectorem invocamus: Invocavit me, etc. Et in Epistola: Tempore accepto exaudivi te, etc. Et in responsorio: Angeli Domini nos custodiant. In tractu, Scuto veritatis circumdati sumus. In Evangelio ad triumphum tendimus, ut inimico dicamus? Vade, Satanas in interitum.

Moyses jejunavit quadraginta diebus, Elias totidem, Christus similiter. Lex per Moysen, prophetia per Eliam, Evangelium per Christum designatur: hoc est, lex et prophetiae, et Evangelium nos hortantur ad jejunium quadraginta dierum, ut videlicet quatuor qualitates corporis maceremus decem praeceptis legis, scientes quod per multas tribulationes oportet nos introire in regnum Dei.

Ab ista Dominica sunt quadraginta dies et duo usque ad baptismum: tot mansiones habuerunt filii Israel, quando baptizati sunt in mari et in nube; quando exierunt de terra Aegypti de dura servitute, et pervenerunt ad terram repromissionis. Tot etiam generationes sunt in genealogia Christi. Qui ad coelestem patriam tendunt quadraginta mansionibus ut filii Israel, illuc quadraginta diebus istis perveniunt, qui ad Christum per baptismum transeunt, eodem numero ad eum perveniunt, quo Christus ad nos pervenit. Christus a primo patriarcha Abraham per quadraginta duas generationes ad Virginem descendit: nos per Christum, qui est princeps patriarcharum, implendo quatuor Evangelia per decalogum legis ad regnum coelorum ascendimus. Quater decies fiunt quadraginta. Mundus iste quatuor climata habet, orientem, occidentem, meridiem, septentrionem; annus quatuor tempora habet, ver, aestatem, autumnum, hiemem; homo constat quatuor elementis, terra, aqua, igne, aere. Porro ab uno usque ad quatuor arithmetice decem numerantur, hoc significat quod homo in quatuor mundi partibus per quatuor tempora anni decalogum legis et quatuor Evangelia erat impleturus. Luna secunda tertii mensis, id est Martii inchoatur Quadragesima, quia in tertio tempore, id est sub gratia data sunt duo praecepta charitatis, quibus homo quasi duabus alis volaret ad coelum.

A Septuagesima sunt sexaginta dies usque in feriam quartam ante coenam Domini: sexaginta hi dies peregrinationem nostram ad memoriam nobis reducunt, qua peregrinamur a Domino. Tres dies, qui supersunt, triduanum jejunium Ninivitarum significant. Ut peccata nostra, quibus affligimur, in resurrectione Domini aboleantur, necesse est triduo nos compati morti Christi, ut non irretiamur per concupiscentiam oculorum et superbiam vitae. Per sex dies, qui supersunt usque ad Sabbatum, bona opera recoluntur, in Sabbato, id est in requie, animarum perfectae libertati reddimur.

Quadragesima ideo ante passionem Domini celebratur, quia haec laboriosa vita per quadraginta figuratur, qua ab amicitia hujus mundi jejunare debemus; quia si compatimur, et conregnabimus. Vela in Ecclesiis suspenduntur, quia in hac vita secreta coelorum nobis absconduntur.