Reader

CAP. LXXXIV.-- De cereis ad Evangelium.

Duo cerei portantur ante Evangelium, quia lex et prophetia praecessit evangelicam doctrinam. Thuribulum est opinio bonarum virtutum de Christo: thus ascendit in thuribulo, ante Evangelium Christi opera praecesserunt doctrinam, ut dicitur: Quia coepit Jesus facere et docere. Diaconus dum legit Evangelium, stat versus aquilonem, quia frigidis in fide praedicatur Evangelium. Evangelium legitur ex celsiori loco, cerei stant in inferiori, quia major est auctoritas Evangelii, quam legis et prophetarum. Post Evangelium cerei exstinguuntur; quia finita praedicatione Evangelii lex et prophetia cessabunt.

Evangelium jacens in altari significat illud tempus quo necesse est illud praedicari. Praecedens officium praedicationem Christi usque ad horam passionis demonstrat et suorum praedicatorum usque in finem mundi et ultra. Sequens, opus passionis Christi et resurrectionis atque ascensionis, similiter suorum vel sacrificium vel mortificationem, et resurrectionem atque suspirium in coelum indicat, ubi audituri sunt: Venite, benedicti Patris mei.