Reader

QUI ACCUSARE MATRIMONIUM POSSUNT ET DE JURAMENTO RECONCILIATIONIS. CAP. LXXXV. Consanguinei tantum, vel si progenies defecerit antiqui et veraces propinquitatem in synodo computent Ex Decret. Fabian. pap., c. 8.

Consanguineos extraneorum nullus accuset, vel consanguinitatem in synodo computet, sed propinqui ad quorum notitiam pertinet, id est, pater et mater, soror, frater, patruus, avunculus, amita, matertera, et eorum procreatio. Si autem progenies tota defecerit ab antiquioribus et veneratioribus, quibus eadem propinquitas nota sit, episcopus canonice perquirat, et, si inventa fuerit propinquitas, separentur.

QUI ACCUSARE MATRIMONIUM POSSUNT ET DE JURAMENTO RECONCILIATIONIS. CAP. LXXXVI. Qui jurejurando propinquitatem firmare debent. Urbanus Ricardo Januens. episc.

Notificamus tibi ut postquam tres aut duo ex propinquioribus jam defunctae uxoris ejus qui accusatur, vel vivae, hanc propinquitatem jurejurando firmaverint, vel per quatuor aut per duos ex antiquioribus Januensibus, quibus haec propinquitas nota est, qui bonae famae et veracis testimonii sunt, remoto amore, timore, pretio et omni malo studio, supradicto modo consanguinitatem, sine omni mora conjugia dissolvantur: quod si propinqui vel extranei verbis tantum propinquitatem testantur, et juramento probare noluerint, vel nequiverint, conjugium nullatenus dissolvatur, sed competens eis poenitentia propter infamiam vel peccati maculam, si forte in hac re contraxerint aliquam, injungatur.

QUI ACCUSARE MATRIMONIUM POSSUNT ET DE JURAMENTO RECONCILIATIONIS. CAP. LXXXVII. Juramentum accusatoris Conc. Rom. sub Greg.

De parentela illa quam dicunt esse inter istum et istam ejus conjugem, quidquid inde scis aut audisti a tuis vicinis aut a tuis antiquioribus propinquis, quod tu per nullum ingenium, nec propter amorem, nec propter timorem, aut per praemium, aut per consanguinitatem celabis episcopum tuum, aut ejus missum cui haec requirere jusserit quandocunque te ex hoc interrogaverit:« Sic te Deus adjuvet, et istae sanctorum reliquiae.»

QUI ACCUSARE MATRIMONIUM POSSUNT ET DE JURAMENTO RECONCILIATIONIS. CAP. LXXXVIII. Juramentum tertium.

Illud sacramentum quod iste juravit de illa parentela quae inter filium et ejus conjugem N. computatur, quod tu illud observabis in quantum sapis aut audisti:« Sic te Deus adjuvet.»

QUI ACCUSARE MATRIMONIUM POSSUNT ET DE JURAMENTO RECONCILIATIONIS. CAP. LXXXIX. Sacramentum de incestuoso dissidio, et reconciliationis juramentum.

Ab isto die in antea quod tu per nullum ingenium te sociabis huic tuae consanguineae N., cum qua contra legem et rectam Christianitatem tuam, adulterium et incestum perpetrasti, nec in conjugio, nec in adulterio illam tibi sociabis, nec cum illa ad unam mensam manducabis, nisi forte in ecclesia, aut in aliquo publico loco, ubi nulla mala suspicio possit esse, et ibi coram testibus idoneis pro certa necessitate colloquamini. Nec aliam conjugem accipies, nisi forte post peractam poenitentiam, quae tibi data fuerit ab episcopo tuo, aut ejus misso:« Sic te Deus adjuvet, et istae sanctorum reliquiae.