Antikeimenon
Choose a text
id="mobileReaderAuthor" class="mobile-reader-author" href="/authors/julianus-toletanus642690" aria-label="More works by Julianus Toletanus">
—
⋯
Original / primary: 8585 Antike
11.1
EX PROPHETIS MINORIBUS. INTERROGATIO LIX.
11.1
Cum Dominus per Oseam prophetam de reprobis regibus dicat: Ipsi regnaverunt, et non ex me; principes exstiterunt, et non cognovi( Oseae VIII, 4), quomodo e contrario Job dicit: Qui regnare facit hypocritam propter peccata populi? Quis enim recte sentiens dicat, quod fecit Dominus quod minime cognoscit?
11.2
EX PROPHETIS MINORIBUS. RESPONSIO (Ex Greg. Magn., lib. XXV Mor., num. 41).
11.2
Scire Dei, approbare est; nescire, reprobare. Unde quibusdam quos reprobat, dicit: Nescio vos, unde sitis. Et aliquando facere Dei est, id quod fieri prohibet, irascendo permittere. Unde et regis Aegypti cor se obdurare asseruit, quod videlicet obdurari permisit. Miro modo hypocritas Dominus et regnare facit, et nescit: facit sinendo, nescit reprobando.
11.3
EX PROPHETIS MINORIBUS. INTERROGATIO LX.
11.3
Quomodo Amos propheta inquisitus respondit: Non sum propheta, cum et prophetam eum noverimus, et verba prophetiae illius teneamus?
11.4
EX PROPHETIS MINORIBUS. RESPONSIO (Ex Greg., lib. II Mor., num. 89).
11.4
Eadem hora qua requisitus est, prophetiae sibi spiritum deesse sensit, et de semetipso testimonium veraciter intulit dicens: Non sum propheta. Qui tamen secutus adjunxit: Et nunc audi verbum Domini. Haec dicit Dominus: Uxor tua in civitate fornicabitur, et filii tui et filiae tuae in gladio cadent, et humus tua funiculo metietur, et tu in terra polluta morieris( Amos, VII, 16, 17). Quibus prophetae verbis aperte ostenditur, quod dum de se illa loqueretur, impletus est, et mox habere prophetandi spiritum meruit, quia se prophetam non esse humiliter agnovit.
11.5
EX PROPHETIS MINORIBUS. INTERROGATIO LXI.
11.5
Cum Zacharias dicat pro derisoribus Christi: Videbunt in quem pupugerunt, quomodo quasi e contrario de ipsis videtur Isaias dixisse: Tollatur impius, ut non videat claritatem Domini?
11.6
EX PROPHETIS MINORIBUS. RESPONSIO.
11.6
Excaecatur impius, ut aliquid non videat. Visurus est formam hominis, de qua dictum est: Sic veniet; non visurus est formam Dei, de qua dicitur: Ostendam me ipsum illi, quam non impii, sed soli justi videbunt. Unde propter solam formam hominis, quae et a justis et ab injustis videnda est, dictum est: Videbunt in quem pupugerunt; propter formam autem Dei, quae a solis justis videbitur, dictum est: Tollatur impius, ne videat, etc.