Sacramenta Romanae Ecclesiae
Choose a text
id="mobileReaderAuthor" class="mobile-reader-author" href="/authors/leo-i440-461" aria-label="More works by Leo I">
—
⋯
Original / primary: 7641 Saroec
33.1
XL. MENSE DECEMBRI. VIII KALENDAS JANUARII. Natale Domini, et martyrum, Pastoris, Basilei, et Joviani, et Victorini, et Eugeniae, et Felicitatis, et Anastasiae.
33.1
Deus, qui humanae substantiae dignitatem et mirabiliter condidisti et mirabilius reformasti, da, quaesumus, nobis( Jesu Christi Filii tui) ejus Divinitatis esse consortes, qui humanitatis nostrae fieri dignatus est particeps. Per, etc.
33.2
Da nobis, quaesumus, omnipotens et misericors Deus et sempiterne Pater, ut Nativitatis Domini nostri Jesu Christi solemnia, quae praesentibus officiis praevenimus, sic nova sint nobis, et continuata permaneant, sic perpetua perseverent, ut pro sui miraculo nova semper existant. Per, etc.
33.3
Vere dignum. Quoniam quidquid Christianae professionis devotione celebratur, de 149 hac sumit solemnitate principium, et in hujus muneris mysterio continetur. Hoc in ipsis generis humani parentibus declaratum est, Apostolo protestante, cum de primis hominibus loqueretur: Sacramentum hoc magnum est. Ego autem dico in Christo et in Ecclesia. Hoc patriarchae diversis actionibus et vocibus signaverunt. Hoc illa legis observantia figuralis asseruit. Hoc praedixerunt cunctorum praeconia prophetarum. In hoc caeremoniarum veterum plenitudo est. In hoc praesens coelestium ministratio gratiarum. In hoc bonorum pollicitatio futurorum. In quo, dum manifestissime comprobantur quae fuerant praedicta compleri, rationabiliter credimus et prudenter quae promittuntur esse ventura. Per, etc.
33.4
Da nobis, quaesumus, Domine Deus noster, ut qui Nativitatem Domini nostri Jesu Christi nos frequentare gaudemus, dignis conversationibus ad ejus mereamur pertinere consortium. Per, etc.
33.5
Largire, quaesumus, Domine, famulis tuis fidei, spei et charitatis augmentum, ut qui de Nativitate Domini nostri tui Filii gloriantur, et adversa mundi, te gubernante, non sentiant, et quae temporaliter celebrare desiderant, sine fine percipiant. Per, etc.
33.1.1
Item alia.-- Deus, qui beatae Virginis partum, sine humana concupiscentia procreatum, in Filii tui membra venientem paternis fecisti praejudiciis non teneri, praesta, quaesumus, ut hujus creaturae novitate suscepta, vetustatis antiquae contagiis exuamur. Per, etc.
33.1.2
Vere dignum. Ecce enim, sicut per os locutus est prophetarum, Virgo in utero accepit, et peperit Filium, et vocatum nomen ejus Emmanuel, et nobiscum Deus est; quia Verbum caro factum habitavit in nobis. Ecce puer natus est hodie; parvulus datus est nobis, et factus est principatus, cujus potestas super humeros ejus; et vocabitur admirabilis, consiliarius, Deus fortis, pater futuri saeculi, princeps pacis. Multiplicabitur ejus imperium, et pacis non erit finis, super solium David et super regnum ejus, ut confirmet illud et corroboret amodo et usque in sempiternum. In quibus omnibus evidenter Deum hominemque cognoscimus, qui suscipiendo quod nostrum est, dignatus est nobis conferre quod suum est. Unde profusis gaudiis, etc. 150
33.2.1
Item alia. Munus populi tui, Domine, placatus intende, quo non altaribus tuis ignis alienus, nec irrationabilium cruor effunditur animantum, sed sancti Spiritus operante virtute, sacrificium jam nostrum, corpus et sanguis est ipsius sacerdotis. Per, etc.
33.2.2
Vere dignum. Hoc praesertim die quo ipsum salutis nostrae sacramentum in lucem gentium revelasti, et ab uteri virginalis arcano ineffabili editione promisisti: Erigens nobis cornu salutis in domo David pueri tui, ad dandam scientiam salutis populo tuo in remissionem peccatorum eorum, per viscera misericordiae tuae, in quibus visitavit nos Oriens ex alto. Benedictus qui venit in nomine Domini; qui tamquam sponsus procedens de tlalamo suo, Deus Dominus et illuxit nobis, ut nos de tenebris et de umbra mortis, regnum perpetuae lucis efficeret. Unde profusis, etc.
33.2.3
Omnipotens sempiterne Deus, qui in Domini nostri Jesu Christi Filii tui Nativitate tribuisti totius religionis initium perfectionemque constare, da nobis, quaesumus, in ejus portione censeri, in quo totius salutis humanae summa consistit. Per, etc.
33.3.1
Item alia.-- Grata tibi sit, Domine, quaesumus, hodiernae festivitatis oblatio, ut tua gratia largiente, per haec sacrosancta commercia in illius inveniamur forma, in quo tecum est nostra substantia. Per, etc.
33.3.2
Vere dignum. Tuae laudis hostiam jugiter immolantes, cujus figuram Abel justus instituit, agnus quoque legalis ostendit, celebravit Abraham, Melchisedech sacerdos exhibuit; sed verus agnus et aeternus Pontifex, hodie natus, Christus implevit. Unde profusis, etc.
33.3.3
Concede, quaesumus, Domine Deus noster, ut qui ad destructionem diaboli, et remissionem natus est hodie peccatorum, et a culparum subreptione nos expiet, et ab hostium incursione defendat. Per, etc.
33.3.4
Da, quaesumus, Domine, populo tuo inviolabilem fidei firmitatem, ut qui Unigenitum tuum in tua tecum gloria sempiternum, in veritate nostri corporis natum de matre Virgine confitentur, et a praesentibus liberentur adversis, et mansuris gaudiis inserantur. Per, etc. 151
33.4.1
Item alia.-- Da nobis, omnipotens Deus, ut sicut adoranda Filii tui Natalitia praevenimus, sic ejus munera capiamus sempiterna gaudentes. Per, etc.
33.4.2
Tanto nos, Domine, quaesumus, promptiore servitio haec praecurrere concede solemnia, quanto in his constare principium nostrae redemptionis ostendis. Per, etc.
33.4.3
Vere dignum. Solemnitas enim, Domine, coelestis pacis ingreditur. Quaesumus ut per eam gratiam, per quam tibi reconciliatus est mundus peccatorum remissione cunctorum, nos quoque delictis omnibus expiati, remediis tuae pietatis aptemur, et mysterium quod exstitit mundo salutare, principalis recordatione muneris assequamur. Per, etc.
33.4.4
Deus, qui nos sacramenti tui participatione contingis, virtutis ejus effectus in nostris cordibus operare, ut suscipiendo muneri tuo per ipsum munus aptemur. Per, etc.
33.4.5
Benedictio tua, Domine, super populum supplicantem copiosa descendat, ut qui, te factore conditus, te est reparatus auctore, te jugiter operante salvetur. Per, etc.
33.5.1
Item alia.-- Deus, qui restaurationem conditionis humanae mirabilius operaris, quam substantiam condidisti, tribue, quaesumus ut simul perficiatur in nobis et quod creavit Verbi tui divina generatio, et quod ejus hominis facti gloriosa Nativitas reformavit. Per, etc.
33.5.2
Tot sensibus hodiernum, Domine, sacrificium celebramus, quo nobis ipsius sacrificii sunt nata primordia. Per, etc.
33.5.3
Vere dignum. Quoniam magnificum nostrae commercium reparationis effulsit, cum de homine veteri homo novus curatus existit; cum de mortalitate mortalitas, cum humana conditio de ipsius humanae conditionis confecta medicatione sanatur, et de obnoxia generatione peccato, totius peccati nescia proles exoritur; ac non solum nostra a Verbo tuo suscepta fragilitas perpetui sit honoris, sed nos quoque mirando consortio reddis aeternos. Per, etc. 152
33.6.1
Item alia.-- Exsultantes, Domine, cum muneribus ad altaria veneranda concurrimus, quia et omnium nobis hodie summa votorum, et causa nostrae redemptionis exorta est. Per, etc.
33.6.2
Vere dignum. Quoniam vere magnum, quod sine exemplo est singulare, quod sine humana ratiocinatione mirabile, tuae pietatis editum sacramentum. Atque ideo sicut primis fidelibus exstitit in sui credulitate pretiosum, ita nunc excusabilem conscientiam non relinquit, quae salutaris mysterii veritatem, toto etiam mundo testificante, non sequitur. Ut enim in principio difficile videretur, cum ad hoc sacramentum genus humanum diceretur esse venturum, sic opus majestatis immensae negari nefas est, cum cernitur ubique conspicuum. Unde profusis, etc.
33.6.3
Concede nobis, Domine, quaesumus, ut sancta tua tibi placito corde sumamus, et quidquid in nostra mente vitiosum est, ipsius doni medicatione curetur. Per, etc.
33.7.1
Item alia.-- Deus, qui humanum genus, a suo principe lethaliter sauciatum, Christi tui nativitate salvare dignatis, praesta, quaesumus, ut non haereamus in perditionis auctore, sed ad Redemptoris nostri consortia transferamur. Per, etc.
33.7.2
Oblatio tibi sit, Domine, hodiernae festivitatis accepta, qua et nostrae reconciliationis processit perfecta placatio, et divini cultus nobis est indita plenitudo, et via veritatis et vita regni coelestis apparuit. Per, etc.
33.7.3
Vere dignum. Quia nostri Salvatoris hodie lux vera processit, quae clara nobis omnia et intellectu manifestavit et visu. Quibus non solum praesentem vitam suo splendore dirigeret, sed ad ipsam nos majestatis immensae gloriam perduceret intuendam. Per, etc.
33.7.4
Da nobis, Domine, quaesumus, ipsius recensita nativitate vegetari, cujus coelesti mysterio pascimur et potamur. Per, etc. 153
33.8.1
Item alia.-- Ut ad salutaris hodiernae generationis exordium pertinere mereamur, apostolicis tribue nos, Domine, quaesumus, precibus adjuvari. Per, etc.
33.8.2
Praesenti sacrificio, Domine, tua generaliter exsultet Ecclesia, quo infirmitatis ejus sunt assumptae primitiae, ut divinae particeps fieret ipsa potentiae. Per, etc.
33.8.3
Vere dignum. In die solemnitatis hodiernae, quo licet ineffabile, tamen utrumque conveniens editur sacramentum, quia et mater Virgo non posset nisi sobolem proferre divinam, et Deus, homo nasci dignatus, congruentius non deberet nisi Virgine matre generari. Propterea, etc.
33.8.4
Praesta, misericors Deus, ut natus hodie Salvator mundi, sicut divinae nobis generationis est auctor, ita et immortalitatis sit ipse largitor. Per, etc.
33.8.5
Deus, qui creationem conditionis humanae diabolicis non es passus perire nequitiis, remedia tuae propitationis exsequere, ut in eadem non praevaleat inimica subreptio, sed redemptio tuae miserationis obtineat. Per, etc.