Lupus Protospatarus
Chronicon
Chro 3.67
Choose a text
More by Lupus Protospatarus
—
10548 Chroni31
3.1
LUPUS PROTOSPATARIUS.
3.1
Anno 1000. ab incarnatione Domini indict. 13. captus est praedictus Smaragdus a Trachamoti mense Julii 11. die, et in ipso anno obiit rex Otto in Roma.
3.1
Obsedit Sapi caytus Barum astante Maio 2. die usque ad sanctum Lucam mense Octobris; tuncque liberata est per Petrum ducem Venetorum.
3.2
Obsederunt Sarraceni Montem Caveosum mense Martii.
3.3
Rediit Durachium in manus imperatoris per Theodorum.
3.4
Descendit Siphea catepanus mense Julii.
3.5
Defunctus est praefatus catepanus in civitate Bari.
3.6
Descendit Curcua patritius in mense Maii.
3.7
Cecidit maxima nix, ex qua siccaverunt arbores olivae, et pisces et volatilia mortua sunt. Et in mense Maii incepta est rebellio, et in mense Augusti comprehenderunt Sarraceni civitatem Cosentiae rupto foedere nomine cayti Sati.
3.8
Obiit Curcua, et descendit Basilius catepanus Marsedonici mense Martii; et Sillictus incendit ipsos homines in civitate Trani.
3.9
Venit Henricus imperator Romam mense Februarii, et Cassanum incensum in mense Augusti.
3.10
Apparuit stella cometae mense Februarii, et Samuel rex obiit, et regnavit filius ejus.
3.11
Occisus est ipse filius praefati Samuelis a suo consobrino, filio Aronis, et regnavit ipse. Et civitas Salerni obsessa est a Sarracenis per mare et per terram.
3.12
Obiit in Butruntio Marsedonici catepanus, et in mense Novembrio interfectus est Leo, frater Argiro. Et in hoc anno descendit Turnichi catepani mense Maii. Et fecit proelium cum Mele et Normannis Leo Patiano exubitus. Iterum in mense Junii 22. die proelium fecit praefatus Turnichi catepani, et vicit Melem et Normannos, et mortuus est Patiano ibi; Condoleo descendit in ipso anno.
3.13
Descendit Basilius catepanus, qui et Bugianus, et Abalanti patricius mense Decembris. Et Ligorius Tepoterici fecit proelium in Trane, et occisus est ibi Joannatius prothospatarius, et Romoald captus est, et in Constantinopolim deportatus est.
3.14
Fecit proelium supradictus Bugiano in mense Octobris cum Francis et vicit. Et Mel fugit cum aliquantis Francis ad Enerichum imperatorem.
3.15
Descenderunt Sarraceni cum Rayca, et obsederunt Bisinianum et apprehenderunt eam; et mortuus est ipse admira et Melis dux Apuleae.
3.16
Captus est Dactus et intravit in civitatem Bari equitatus in asina 15. mensis Junii.
3.17
Venit Enerich imperator in Beneventum mense Martii, et obsedit civitatem Trojorum.
3.18
Venit Rayca cum Jaffari criti in civitate Bari in mense Junii, et obsedit eam uno die; et amoti exinde comprehenderunt Palagianum oppidum, et fabricatum est castellum Mutulae.
3.19
Factum est signum magnum in episcopatu Acherontino sub praesule secundo Stephano Materiensi in sancto die paschae: crucifixus magnus argenteus concussus est tribus vicibus capite, brachiis et pedibus, cunctis hoc aspicientibus. Et in hoc anno cecidit nix magna. Et in hoc anno transfretavit Bugiano in Chorvatia, et comprehendit ipsam Patrocissam uxorem Cismigi, et direxit illam Constantinopolim. Et hoc anno mortuus est Enerich imperator, et surrexit Conus, nepos ejus.
3.20
Descendit Oresti chetoniti in mense Aprilis, et tunc obiit Barensis episcopus Joannes, et factus est Bisancius archiepiscopus.
3.21
Venit Eustachius cum filiis Basilisco et Mandatora, et adduxit honorem catepani ad Christoforum; et Orestes praefatus descendit in Constantinopolim cum Bugiano. Et hoc anno mortuus Constantinus imperator in vigilia sancti Martini, et se vivente imposuit in sede sua Romano, et dedit ei uxorem Zoi, filiam suam. Tandem Raycha et Zaffari obsiderunt castellum Obbianum; qui Obbianenses, extraneos tradentes, pacificaverunt cum ipsis. Et in mense Julii venit Potho catepani, fecitque pugnam cum Raycha in Baro. Hoc anno obiit Guamarius princeps Salerni.
3.22
In mense Junii Sarraceni comprehenderunt civitatem Cassani; et tertia die astante mense Julii fecit proelium Potho cum Sarracenis, et ceciderunt Graeci.
3.23
Descendit Hychiacon ketoniti, et secum adduxit ipsos Anatolichi.
3.24
Prima die intrante Maio descendit Constantinus prothospatarius, qui et Opo vocabatur, catepani Italiae.
3.25
11. die intrante mense Aprilis obiit Romanus imperator, et surrexit Michael imperator. Et Argiro Barensis obiit Constantinopoli.
3.26
Descendit Michael patricius et dux, qui et Sfrondili vocabatur, et transfretavit cum Maniachi patricio in Sicilia.
3.27
In mense Februarii descendit Nichiforus catepani, qui et Dulchiano dicebatur.
3.28
Praedictus Dulchianus excussit conteratos 201 de Apulia, et praedicti conterati occiderunt Chirisfactira critiri imperator 204 subtus Mutulam et Romano Materiense mense Maii. Eodemque mense obsedit Argiro, filius Melis, Barum civitatem, et percussit Musandum, et ligavit eum vinculo, et introivit cum eo in Baro. Et conterati dispersi sunt.
3.29
Descendit Dulchiano a Sicilia ivitque Ascolum, et in mense Martii Arduinus Lombardus convocavit Normannos in Apuliam in civitate Malfiae, et praedictus Dulchianus fecit proelium cum Normannis fere tribus milibus, et ceciderunt Graeci; et mense Maii iterum proeliati sunt Normanni feria 4. cum Graecis, et fugit Dulchianus in Baro.
3.30
Venit Exaugusto fecitque bellum cum Normannis 3. die intrante mense Septembris, et comprehensus est ille ibi et in Melfia deportatus est. Et in mense Decembris obiit Michail imperator, et elevatus est caesar nepos ejus nomine Michail imperator. Et in mense Febr. factus est Argiro Barensis princeps et dux Italiae. Et in mense Aprilis descendit Maniaki magistro Tarentum, et in mense Junii deportavit Monopolim civitatem, abiitque in civitatem Matheriem, et fecit ibi grande homicidium. Et in mense Septembris Guilelmus electus est comes a Matera. Et hoc anno depositus est praefatus caesar Michail a regno, caecatusque et Zoi et Theodorae sororum jussione, et Constantinus Monomachus factus est imperator. Et 3 die intrante Julio captum est Juvenatium ab Argiro duce; et in mense Augusti ivit praedictus Argiro ad obsidendum Tranem, seditque super eam mense uno.
3.31
Reversum est Barum ad manus imperatoris. Et in mense Septembris descendit Pardus patricius cum multo auro, quem Maniaki fecit occidi, seque imperatorem ab omnibus appellari. Et mense Octobris venit Barum, minimeque illum recepit. In mense vero Februarii descendit Theodorus Canus magister et cathepanus, et Maniaki praedictus perrexit Durachium.
3.32
Guilelmus, filius Tancredi, descendit cum Guarimari principe in Calabriam, feceruntque ipsam Stridulam castellum.
3.33
Perrexit Argiro patricius Constantinopolim, et Palatinus cathepanus, qui et Eustasius, revocavit omnes exiliatos in Barum; perrexitque Tarentum. Et 8 die intrante mense Maii commisit praelium cum Normannis, et ceciderunt Graeci. Et hoc anno venit Conus rex Alomannorum Romam, eo quod erant ibi tres papae, Silvester in ecclesia sancti Petri, in Laterano Gregorius, et Benedictus in Tusculano; quibus ejectis, consecratus est Clemens a praedicto imperatore; deinde praedictus imperator venit Beneventum. Beneventani vero ad ejus injuriam absciderunt strennas equi ejus. Et hoc anno obiit Guilelmus, et frater ejus Drago factus est comes.
3.34
Comprehensum est oppidum Stira a Guarangis in mense Octobris, et in mense Decembris depopulaverunt Liccem, et in mense Junii supradictus papa Benedictus per poculum veneni occidit papam Clementem.
3.35
Obiit Zoi imperatrix, soror Theodorae, quae fuerunt filiae Constantini imperatoris. Zoi enim habuit viros tres, primum Romanum, secundum Michail, tertium Constantinum Monomachum; regnavit cum his tribus viris annis 22. Post mortem vero praedictae Zoi regnavit ipse Constantinus imperator cum Theodora, sua cognata, jam annis novem.
3.36
Descendit Argiro magister vesti et dux Italiae, filius Melis, in mense Martii et abiit Barum; et non receperunt illum Adralistus et Romoaldus cum Petro ejus germano. Sed non post multum tempus Barenses receperunt illum sine voluntate Adralisti et aliorum; sed Adralistus fugiit. Romoaldus vero et Petrus fratres ab Argiro sunt comprehensi, ac catenis vincti Constantinopolim deportati sunt. Hoc anno Drago occisus est in monte Ilari a suo compatre Concilio, et frater ejus Umfreda factus est comes.
3.37
In feria 6. de mense Junii Normanni fecerunt bellum cum Alamannis, quos papa Leo conduxerat, et vicerunt. Et hoc anno fuit magna fames.
3.38
Obiit Sico prothospatarius Materiensis.
3.39
Obiit Constantinus imperator, qui et Monomachus.
3.40
Coepit regnare praedicta Theodora augusta, soror Zoi imperatricis. Et Umfreda obiit, et Robertus, frater ejus, factus est dux. Et hoc anno obiit Petrus archiepiscopus Cosentinus.
3.41
Mortua est Theodora augusta, et Michail Bringa factus est imperator.
3.42
Trombi patricius fecit occidere Scribones in Cutroni civitate.
3.43
Mortuus est Michail Bringa, et Isaki o Comni factus est imperator.
3.44
Elevatus est imperator Constantinus o Ducos.
3.45
Robertus dux cepit civitatem Acherontinam.
3.46
Factus est papa Alexander Lucanus. Et in hoc anno intravit Robertus dux in civitatem Oriem, et iterum apprehendit Brundusium et ipsum miriarcham.
3.47
Comprehensum est Tarentum a Normannis.
3.48
Comprehensa est Matera a Roberto mense Aprilis.
3.49
Robertus dux intravit Siciliam, et interfecit Agarenorum multitudinem, et tulit obsides ex civitate Panhormi.
3.50
Lofredus comes, filius Petronii, voluit ire in Romaniam cum multa gente, sed obstitit illi quidam ductor Graecorum nomine Mambrita. Et hoc anno princeps Ricardus intravit terram Campaniae, obseditque Ciperanum, et comprehendit eam, et devastando usque Romam pervenit.
3.51
In mense Maii mortuus est Constantinus o Ducos imperator, et Michail, filius ejus, suscepit imperium. Et hoc anno apparuit stella cometis; et comes Normannus Robertus fecit bellum cum Araldo rege Anglorum, et vicit Robertus, qui et factus est rex super gentem Anglorum.
3.52
In 16 die mensis Februarii Robertus dux obsedit civitatem nomine Montempillosum; ubi nihil proficiens, cum paucis abiit Obianum, et cepit eam. Et ex traditione cujusdam Gotifredi intravit ipse dux in praefatam civitatem Montispillosi.
3.53
In mense Septembris praefatus dux Robertus obsedit civitatem Bari; et Romano Diogenis, qui cum praefato Michail privigno suo tenebat imperium, fraude praedicti Michail privigni sui apud quandam civitatem Armeniae comprehensus et caecatus est.
3.54
Mense Januarii magnum homicidium factum est in civitate Brundusii; nam Normanni volentes eam comprehendere, tenti sunt ex eis quadraginta cum aliis eorum ministris quadraginta tribus, et capita omnium praedictorum ad imperatorem deportata sunt.
3.55
Robertus dux intravit Brundusiapolim, dimissa ante Barum obsidione; nam ipse dux fecit fieri pontem in mari, quatenus concluderet portum praefatae urbis Bari. Hoc etiam anno dolo cujusdam Argirichi, filii Joannaci, occisus est Bisantius cognomento Guirdeliku in Baro. Et in 15 die mensis Aprilis cepit Robertus dux civitatem Bari, et in mense Julii dux praedictus transmeavit Adriatici maris pelagus perrexitque Siciliam cum 58 navibus.
3.56
Mense Januarii die 10 introivit Robertus dux in Panhormum civitatem Siciliae.
3.57
Intraverunt primo Normanni in Tranem in octava epiphaniae cum Petrono comite. Sed Robertus dux, ejecto Petrono, introivit in ipsam civitatem in purificatione sanctae Mariae.
3.58
Comprehensus est quidam nepos Africani regis a Rogerio, fratre ducis Roberti, qui praeerat Siciliae, cum 150 navibus in civitate Mazaria. Et hoc anno dedit praefatus dux filiam suam nurum imperatori Constantinopolis.
3.59
Obsessa est civitas Salerni a Roberto duce Normannorum, et comprehensa est ab eo.
3.60
Obsessa est Neapolis a Ricardo principe, et minime comprehensa; et Robertus dux obsedit Beneventum, sed ejus obsessio dissipata est a Rodulfo Pipino comite. Et hoc anno obiit praefatus Ricardus princeps.
3.61
Intravit Petronus in Tranem; et Barum rebellavit, ejecto exinde praesidio ducis. Et Bajalardus, filius Umfredae, comprehendit Ascolum. Et in hoc anno ejectus est imperator praedictus Michail a regno, et Botoniati quidam factus imperator, qui abstulit praefato Michail uxorem, et abusus est ea. Hoc anno fuit mortalitas hominum in Matera.
3.62
Inventum est corpus beati Canionis in Acheruntia ab Arnaldo archiepiscopo, et idem archiepiscopus construere coepit novum episcopium, id est ecclesiam sanctae Dei Matris Mariae. Hoc anno civitas Bari reversa est in potestate Roberti ducis; et idem dux obsedit civitatem Tarenti, et in mense Aprilis comprehendit eam; et iterum obsedit Castellanetam, et cepit eam. Et hoc anno imperator Michail descendit in Apuliam, quaerendo auxilium a Roberto duce contra Botaniati. Et in mense Julii 26 die ejusdem mensis mortuus est Robertus comes eximius, et ejecti sunt Normanni de Matera secundo; et coepit regnare Lofredus comes, filius ejus, pro eo in Matera, in vigilia sanctae Mariae mense Augusti.
3.63
Robertus dux intravit Tricarim mense Octobris. Et in mense Aprilis Archirici perrexit ad Michalam regem Sclavorum, deditque ejus filio suam filiam uxorem, et Robertus dux cum praefato Michaele imperatore perrexit Idrontum; missisque antea navibus in insula Corifo, quae apprehenderunt eam, ubi et ipse post paululum una cum imperatore transfretavit, posueruntque in mense Julii ante Duracmum obsidionem per mare et per terram; quam stolus Veneticorum veniens dissipavit, apertumque est mare Durachii. Hoc anno Botaniatim factus est monachus, et Alexius factus est imperator. Et Alamannorum rex Henricus venit Romam, ut ejiceret exinde papam Gregorium.
3.64
Hoc anno complentur ab initio mundi 6281 et ab Urbe condita 1824. Et hoc anno Alexius imperator collecto grandi exercitu iniit bellum cum Roberto duce aut longe a Durachio, et terga versus fugit, cecideruntque in ea pugna plus quam 6000 ex suis; fuerunt autem in ejus exercitu 70 milia hominum.[ Et dominante isto Alexio imperatore episcopus Rubensis nomine Guislibertus donavit priori Montispilosi ecclesiam sancti Sabini, quae est in civitate Rubi; qui prior tenebatur omni anno ad quatuor libras cerae in die sabbati sancti, et mittere unum hominem equestrem ad suas expensas, quando episcopus Rubensis ibat ad Barensem civitatem seu ad Canusium]. Et in mense Januarii Robertus dux cepit civitatem Durachii traditione quorumdam Veneticorum. Et hoc tempore praedictus rex Henricus obsedit Romam, ut ibi introiret et faceret ibidem papam Ravennensem archiepiscopum. Et dux Robertus rediens ab Epidauro, relicto ibi Boamundo filio suo, perrexit Romam, ferens auxilium papae Gregorio, cum jam rex in partibus moraretur Liguriae ad debellandum Mathildae provinciam, quae cum papa tenebat Gregorio. Hoc anno Bajalardus perrexit ad Constantinopolitanum imperatorem Alexium causa auxilii. Et in eodem anno 16 die intrante mense Maii dedicatum est in Matera novum templum in honore sancti Eustachii ab Arnaldo archiepiscopo sub domno Stephano abbate, auctore ipsius templi.
3.65
Hoc anno complentur 517 anni, ex quo intraverunt Longobardi in Italiam. Hoc anno cyclus solaris 28 extitit et cyclus lunaris 17 et cyclus novennalis primus, et epacta luna nulla. Et hoc tempore Romani a papae Gregorii societate discedentes, legatos ad praedictum direxerunt regem, quo eum Romae mitteret. sed dux hoc anticipans, direxit plus quam triginta milia solidorum Romanis, quatenus sibi eos papaeque reconciliaret; quod et factum est. Attamen rex Romam adveniens, cepit totam regionem trans Tyberim, in qua apostolorum principis eminet templum. Et in mense Junii, relicto ibidem suo praesidio ac filio in castellum, quod ille illic construxit, ad debellandum Gregorium papam, qui in Laterano ac in Coelio monte se continebat, ablatis secum quadraginta a Roma obsidibus, secessit in partes Tusciae; et dux in mense Maii posuit ante Cannas civitatem Apuleae obsidionem, et in mense Junii comprehendit eam.
3.66
Robertus dux, collecta multitudine Normannorum, Longobardorum aliarumque gentium, perrexit Romam, ut papam Gregorium dura obsidione retentum liberaret; quod et factum est; nam Romam adveniens, Urbis maximam partem cepit, et papam exinde viriliter abstrahens, secum adduxit Salernum.
3.67
Praedictus dux grandem apparatum navium multitudinemque hominum innumerabili exercitu Brundusiopolim venit, et disposita ibidem navali machinatione, ingressus est Adriaticum pelagus, perrexitque in insulam nomine Cassopim, ubi stolus Veneticorum et filius ducis Venetiarum cum plurimis navibus erat infestus duci Roberto; sed bello in mari inter eos confecto, victoria ad Normannos concessit. Caesi sunt in ea pugna plus quam mille hominum, praeterea naves quinque captae; duae cum hominibus submersae sunt, ita ut qui gladium potuerunt evadere bellatoris, pelagi eos vorago glutiret. Hoc anno mense Maii praedictus papa Gregorius dum moraretur Salerni, diem clausit extremum; quo moriente, tanta fertur grandinum tonitruumque extitisse procella, ut omnes illic positi hujus terribilitatis procella putarent interire. Mense Julii dum jam dictus dux Robertus[ Guiscardus] moraretur in loco, qui dicitur...... devictis Veneticis, exercitusque ejus ob quandam civitatem capiendam in Cefalonia moraretur insula, ipse autem in praedicto loco cum parte exercitus resideret, praeparans se, qualiter cum grandi apparatu navium et militum innumera multitudine ad regiam tenderet navigio urbem, jussu misericordissimi omnipotentis Dei, qui dissipat ac reprobat cogitationes atque consilia principum non ex suo procedentia, profluvio ventris extinctus est.
3.68
Rogerius, filius praedicti Roberti ducis, factus est dux.
3.69
In mense Maii corpus beatissimi Nicolai Mirrensis episcopi a quibusdam Barensibus a praedicta Mirrea ablatum, in Barum devectum, caput civitatum Apuleae. Hoc anno abbas Desiderius Sancti Benedicti montis Casini, consensu quorumdam nobilium Romanorum, factus est papa Romanus, vivente adhuc Clemente papa, qui fuerat Ravennae archiepiscopus.
3.70
Mense Septembris factus est grandis terremotus per totam Apuleam, ita ut in quibusdam locis turres ac domos subruisse fertur; tunc enim coepta est guerra inter Rogerium ducem et Boamundum, fratrem ejus. Hoc anno comprehensa est Syracusa, Siciliae condam caput, a Rogerio comite; in qua fertur homines comestos ac infantes ob diuturnitatem obsidionis.
3.71
Facta est synodus omnium Apuliensium, Calabrorum ac Bruziorum episcoporum in civitate Malfiae, ubi affuit etiam dux Rogerius et universi comites Apuleae et Calabriae aliarumque provinciarum. Qua statutum est, ut sancta treuva Dei teneretur ab omnibus sibi subjectis. Hoc anno obiit Ursus Barensis archiepiscopus; et papa Urbanus nomine venit in civitatem Bari, et consecravit illic confessionem sancti Nicolai et Heliam archiepiscopum, qui venerat adhuc cum praedicto papa Clemente, et consecravit Brundusinam ecclesiam praefatus papa Urbanus.
3.72
Mense Augusti Acheruntia cremata est a se ipsa. Et hoc anno mortuus est Jordanus princeps.
3.73
Jurata est treuva Dei a Normannis, et complentur ab initio mundi anni 6291, epacta 29.
3.74
Dum obsideretur Ories civitas a Boamundo, auxilio quorumdam Orietani dissipaverunt ejus obsidionem, et ipse Boamundus fugam petens, cunctum ejus apparatum et signa ceperunt.
3.75
Obiit abbatissa Eugenia Sancti Benedicti monasterii Materiensis mense Octobris. Et in eodem mense ipsius anni Urbanus papa venit Materiem, et applicuit coenobium sancti Eustachii cum grandi plebe hominum suorum.
3.76
De mense Aprilis in nocte quinta feria subito visi sunt igniculi cadere de coelo quasi stellae per totam Apuliam, qui repleverunt universam superficiem terrae. Et ex tunc coeperunt Galliae populi pergere, immo totius Italiae, ad sepulchrum Domini cum armis, ferentes in humero dextro crucis vexillum.
3.77
Rogerius comes Siciliae cum 20 milibus Sarracenorum et cum innumera multitudine aliarum gentium, et universi comites Apuleae obsederunt Amalfim, et cum ibi perseverarent, subito inspiratione Dei Boamundus cum aliis comitibus et plus quam 500 equitibus, facientes sibi signum crucis super pannos in humero dextro, reliquerunt obsidionem; et transfretantes perrexerunt in regiam urbem, quatenus cum Alexii imperatoris auxilio bellandum cum paganis pergerent Hierusalem ad sanctum sepulchrum domini Jesu Christi, redemptoris nostri.
3.78
Boamundus cum comite Sancti Egidii et cum comite Normanniae et aliis comitibus occidentis cum innumera multitudine in mense Aprilis a regia urbe se moventes transfretaverunt, et ceperunt terras, quas Turchi imperatoribus abstulerant; et facto bello cum Turchis, victoriamque Christus suis concessit christianis; fertur enim fuisse de paganis 140 milia. Hoc autem est juxta Nicenam civitatem.
3.79
De mense Octobris apparuit stella cometis, et christiani bellando venerunt usque Antiochiam, et obsederunt eam. Et de mense Aprilis comprehendentes interfecerunt ibi plus quam 60 milia hominum. Iterumque commissa pugna, christiani vicerunt, et ceperunt multa spolia Turcorum. Et hoc anno comprehensa est Capua a Rogerio comite mense Maii.
3.80
De mense Octobris papa Urbanus congregavit universalem synodum in civitate Bari, in qua fuerunt 185 episcopi. Et hoc anno in mense Junii in festivitate sancti Petri apostoli comprehensa est civitas Hierusalem per pugnam a christianis, et omnes, quos ibi invenerunt, occiderunt. Fertur autem occisa esse ibi 200 milia hominum. Et tunc levaverunt sibi christiani regem Gotofredum, qui fuerat Suevorum dux. Et de mense Julii praedictus papa Urbanus obiit, et electus est Pascalis papa.
3.81
Mortuus est Gotofredus praedictus ab urso, egrediens a saltu, quem antea eum fortiter feriens.
3.82
Comprehensa est Caesarea a christianis et ad solum usque perducta. Et in hoc anno de mense Septembris mortuus est Goffridus comes, et Alexius, filius ejus, intravit Materiem, et superiora coeperunt habitari a Montensibus. Hoc anno obiit Arnaldus archiepiscopus Acherontinus, et Rogerius comes Siciliae in mense Junii.
3.83
De mense Novembris obiit Stephanus abbas Materiensis, et Symeon abbas successit ei. Et in mense Maii electus est Petrus Acherontinus archiepiscopus.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).