Reader

CONTINUATIO SECUNDA. Ex codice Lond.

[ MLXXXIII] 27. Heinricus urbem Romae infregit et cepit, Wicbertum in sede apostolica constituit. Hiltebrandus vero Beneventum adiit, ubi usque ad obitum suum deguit. Heinricus vero in Teutonicam patriam rediit.

[ MLXXXIV] 28. Hildebrandus obiit.

[ MLXXXV] 29. Heinricus Saxones bello vicit, patriam obtinuit, eosque sibi jurare et obsequi coegit; sed postquam exercitum dimisit, Saxones occulte ceperunt congregari adversus imperatorem Heinricum, dolo volentes eum occidere. Ille autem, dolo comperto, declinavit iusidias eorum, egrediendo de illa provincia.

[ MLXXXVI] 30. Heinricus juxta Wirzeburgum Suevis et Saxonibus bello congressus et quorundam suorum perfidorum, in ipso conflictu se ad hostem convertentium, presidio desertus, a quodam etiam collaterali suo in vertice ense percussus, dedit se cum paucis in fugam. Hostes vero insecuti usque ad urbem predictam, ceperunt eam, et episcopum Alberonem a Heinrico ob perfidiam expulsum ibidem restituerunt, expulso Mainardo episcopo ibidem a Heinrico constituto. Paulo post Heinricus eandem urbem congregató exercitu obsedit et cepit, episcopoque Alberoni, quia suus erat patrinus, concessit, ut remaneret sibi fidelis et episcopus urbis. Illo autem nolente Heinrico subesse, Heinricus, quia nimium pius erat, liberum illum permisit abire.-- Wilelmus rex Angelorum fecit describi omnes totius Angliae possessiones in agris, in hominibus, in animalibus omnibus, in omnibus mansionibus a majori usque ad minimam et in omni censu, qui ex omnium terris posset reddi; et vexata est terra multis cladibus inde procedentibus.

[ MLXXXVII] 31. Wilelmus rex Anglorum obiit 5 Idus Septembris; Wilelmus, filius ejus, unctusque est in regem 4 Non. Octobris.