Nonnus of Panopolis
Dionysiaca
Dion 47.79
Choose a text
More by Nonnus of Panopolis
—
Perseus Grc2
47.0
ἔρχεο τεσσαρακοστὸν ἐς ἕβδομον, ὁππόθι Περσεὺς καὶ μόρος Ἰκαρίοιο καὶ ἁβροχίτων Ἀριάδνη.
47.1
ἤδη δʼ ἔνθα καὶ ἔνθα διʼ ἄστεος ἵπτατο Φήμη
47.2
ἄγγελος αὐτοβόητος ἐρισταφύλου Διονύσου
47.3
Ἀτθίδι φοιτήσαντος· ἀκοιμήτου δὲ Λυαίου
47.4
εἰς χορὸν εὐώδινες ἐβακχεύθησαν Ἀθῆναι.
47.5
καὶ πολὺς ἔβρεμε κῶμος· ὁμηγερέες δὲ πολῖται
47.6
εἵμασι δαιδαλέοισιν ἀνεχλαίνωσαν ἀγυιὰς
47.7
χερσὶ πολυσπερέεσσιν· ἀεξιφύτοιο δὲ Βάκχου
47.8
ἡμερίδων πετάλοισιν ἐμιτρώθησαν Ἀθῆναι
47.9
αὐτόματοι· φιάλας δὲ σιδηροφόρων διὰ μαζῶν
47.10
στήθεσι μυστιπόλοισιν ἀνεζώννυντο γυναῖκες,
47.11
παρθενικαὶ δʼ ἐχόρευον, ἐπεστέψαντο δὲ κόρσης
47.12
ἄνθεϊ κισσήεντι περίπλοκον Ἀτθίδα χαίτην.
47.13
Ἰλισσὸς δʼ ἐλέλιξε περὶ πτόλιν ἔμπνοον ὕδωρ
47.14
κυδαίνων Διόνυσον· ὁμοζήλῳ δὲ χορείῃ
47.15
εὔιον ἐκρούοντο μέλος Κηφισίδες ὄχθαι.
47.16
φυταλιὴ δʼ ἀνέτελλεν, ἀπὸ χθονίοιο δὲ κόλπου
47.17
αὐτοφυὴς γλυκεροῖο πεπαινομένου τοκετοῖο
47.18
βότρυς ἐλαιήεντος ἐφοινίχθη Μαραθῶνος,
47.19
καὶ δρύες ἐψιθύριζον, ἀνοιγομένων δὲ πετήλων
47.20
δίχροον ἠρεύγοντο ῥόδον λειμωνίδες Ὧραι,
47.21
καὶ κρίνον αὐτοτέλεστον ἐμαιώσαντο κολῶναι.
47.22
καὶ Φρυγίοις αὐλοῖσιν ἐπέκτυπεν αὐλὸς Ἀθήνης,
47.23
καὶ δίδυμον κελάδημα δόναξ ἐλίγαινεν Ἀχαρνεὺς
47.24
θλιβόμενος παλάμῃσιν· ὁμογλώσσων δʼ ἀπὸ λαιμῶν
47.25
Μυγδονίῃ βαρύδουπος ὁμόθροος ἄζυγι κούρῃ
47.26
δίθροον ἁρμονίην ἐπιδήμιος ἴαχε Βάκχη
47.27
πῆχυν ἐπικλίνουσα νέῃ Πακτωλίδι νύμφῃ,
47.28
καὶ φλόγα νυκτιχόρευτον ἀνέσχεθε δίζυγι πεύκῃ
47.29
ἀρχεγόνῳ Ζαγρῆι καὶ ὀψιγόνῳ Διονύσῳ·
47.30
μνησαμένη δʼ Ἰτύλοιο καὶ ἱστοπόνου Φιλομήλης
47.31
σύνθροος αἰολόδειρος ἀνέκλαγεν Ἀτθὶς ἀηδών,
47.32
καὶ Ζεφύρου λάλος ὄρνις ὑπωροφίην χέε μολπήν,
47.33
μνῆστιν ὅλην Τηρῆος ἀπορρίψασα θυέλλαις.
47.34
οὐδέ τις ἦν ἀχόρευτος ἀνὰ πτόλιν. αὐτὰρ ὁ χαίρων
47.35
Βάκχος ἐς Ἰκαρίου δόμον ἤλυθεν, ὃς πέλεν ἄλλων
47.36
φέρτερος ἀγρονόμων ἑτερότροπα δένδρα φυτεύειν.
47.37
ἀγραύλοις δὲ πόδεσσι γέρων ἐχόρευεν ἀλωεὺς
47.38
ἀθρήσας Διόνυσον ἐπήλυδα, καλλιφύτων δὲ
47.39
κοίρανον ἡμερίδων ὀλίγῃ ξείνισσε τραπέζῃ·
47.40
Ἠριγόνη δʼ ἐκέρασσεν ἀψυσσαμένη γλάγος αἰγῶν·
47.41
ἀλλά ἑ Βάκχος ἔρυκε, φιλοστόργῳ δὲ γεραιῷ
47.42
ὤπασε λυσιπόνοιο μέθης ἐγκύμονας ἀσκούς,
47.43
δεξιτερῇ δʼ εὔοδμον ἔχων δέπας ἡδέος οἴνου
47.44
ὤρεγεν Ἰκαρίῳ· φιλίῳ δʼ ἠσπάζετο μύθῳ·
47.45
Δέξο, γέρον, τόδε δῶρον, ὃ μὴ δεδάασιν Ἀθῆναι.
47.46
ὦ γέρον, ὀλβίζω σε· σὲ γὰρ μέλψουσι πολῖται
47.47
τοῖον ἔπος βοόωντες, ὅτι κλέος εὗρεν ἐλέγξαι
47.48
Ἰκάριος Κελεοῖο καὶ Ἠριγόνη Μετανείρης.
47.49
ζῆλον ἔχω προτέρης Δημήτερος, ὅττι καὶ αὐτὴ
47.50
ἄλλῳ γειοπόνῳ στάχυν ὄμπνιον ὤπασε Δηώ.
47.51
Τριπτόλεμος στάχυν εὗρε, σὺ δʼ οἴνοπα βότρυν ὀπώρης·
47.52
ἴλαος οὐρανίῳ Γανυμήδεϊ μοῦνος ἐρίζεις,
47.53
Τριπτολέμου προτέροιο μακάρτερε· θυμοβόρους γὰρ
47.54
οὐ στάχυες λύουσι μεληδόνας, οἰνοτόκοι δὲ
47.55
βότρυες ἀνδρομέης παιήονές εἰσιν ἀνίης.
47.56
τοῖον ἔπος κατέλεξε, φιλοξείνῳ δὲ γεραιῷ
47.57
ἁβρὸν ἐγερσινόοιο δέπας πόρεν ἔμπλεον οἴνου·
47.58
καὶ πίεν ἄλλο μετʼ ἄλλο γέρων φυτοεργὸς ἀλωεύς,
47.59
οἶστρον ἔχων ἀκόρητον ἐυρραθάμιγγος ἐέρσης·
47.60
κούρη δʼ ἀντὶ γάλακτος ἀφυσσαμένη χύσιν οἴνου
47.61
ὤρεγε χειρὶ κύπελλον, ἕως ἐμέθυσσε τοκῆα.
47.62
ἀλλʼ ὅτε δὴ κόρον εὗρε κυπελλοδόκοιο τραπέζης,
47.63
δόχμιος ἀμφιέλικτος ἐρισφαλὲς ἴχνος ἑλίσσων
47.64
ποσσὶν ἀμοιβαίοισιν ἀνεσκίρτησεν ἀλωεύς,
47.65
Ζαγρέος Εὔιον ὕγνον ἀνακρούων Διονύσῳ.
47.66
ἀγρονόμῳ δὲ γέροντι φυτηκόμος ὤπασε δαίμων
47.67
κλήματα βοτρυόεντα, φιλεύια δῶρα τραπέζης·
47.68
καί μιν ἄναξ ἐδίδαξεν ἀεξιφύτῳ τινὶ τέχνῃ
47.69
κλάσσαι βοθριάσαι τε βαλεῖν τʼ ἐνὶ ἐνὶ κλήματα γύροις.
47.70
ἄλλοις δʼ ἀγρονόμοισι γέρων φυτοεργὸς ἀλωεὺς
47.71
δῶρα φέρων Βρομίοιο καὶ ἀμπελόεσσαν ὀπώρην
47.72
οἰνοφύτους ἐδίδαξε φυτηκομίας Διονύσου·
47.73
καὶ νομίῳ κρητῆρι βαλὼν ῥόον ἄσπετον οἴνου
47.74
δαινυμένους ηὔφραινεν ἐπασσυτέροισι κυπέλλοις,
47.75
οἰνοδόκων θυόεσσαν ἀναπτύξας χύσιν ἀσκῶν.
47.76
καί τις ἐγερσινόοιο πιὼν ῥόον ἡδέος οἴνου
47.77
Ἠριγόνης γενετῆρα φίλῳ μειλίξατο μύθῳ·
47.78
Εἰπέ, γέρον, πόθεν εὗρες ἐπὶ χθονί νέκταρ Ὀλύμπου;
47.79
οὐκ ἀπὸ Κηφισοῖο φέρεις ξανθόχροον ὕδωρ,
47.80
οὐκ ἀπὸ Νηιάδων μελιηδέα δῶρα κομίζεις·
47.81
οὐ γὰρ ἀναβλύζουσι μελίρρυτα χεύματα πηγαί,
47.82
οὐ ῥόος Ἰλισσοῖο χυτῷ φοινίσσεται ὁλκῷ·
47.83
οὐ ποτὸν ἔπλετο τοῦτο φιλοπτόρθοιο μελίσσης,
47.84
ὀξύτατον μερόπεσσι φέρον κόρον· ἀλλοφυὲς δὲ
47.85
καὶ μέλιτος γλυκεροῖο φέρεις γλυκερώτερον ὕδωρ·
47.86
πάτριον οὐ πόμα τοῦτο λοχεύεται Ἀτθὶς ἐλαίη·
47.87
λαρότερον δὲ γάλακτος ἔχεις ποτὸν ἐμμενὲς αἰεὶ
47.88
συμφερταῖς λιβάδεσσι μελικρήτου κυκεῶνος.
47.89
εἰ δὲ ποτὸν μερόπεσσιν ἀεξιφύτων ἀπὸ κήπων
47.90
ἐκ καλύκων δεδάασιν ἄγειν ῥοδοπήχεες Ὧραι,
47.91
καί κεν ἐγὼ καλέεσκον Ἀδώνιδος ἢ Κυθερείης
47.92
εἰαρινὸν πόμα τοῦτο, ῥόδων εὔοδμον ἐέρσην.
47.93
λυσίπονον καὶ ξεῖνον ἄγεις ποτόν· ἠερίοις γάρ
47.94
πλαζομένας ἀνέμοισιν ἐμὰς ἐκέδασσε μερίμνας.
47.95
μή σοι δῶρον ἔδωκεν ἀπʼ αἰθέρος ἄμβροτος Ἥβη;
47.96
μή σοι τοῦτο κόμισσε τεὴ πολιοῦχος Ἀθήνη;
47.97
οὐρανόθεν κρητῆρα τίς ἥρπασεν, ἔνθεν ἀφύσσει
47.98
Ζηνὶ καὶ ἀθανάτοισι δέπας κεράσας Γανυμήδης;
47.99
ξεινοδόκου Κελεοῖο μακάρτερε, μὴ σὺ καὶ αὐτὸς
47.100
ἵλαον οὐρανόθεν ναέτην ξείνισσας Ὀλύμπου;
47.101
πείθομαι, ὡς θεὸς ἄλλος ἐκώμασε σεῖο μελάθρῳ,
47.102
καὶ φιλίης πόμα τοῦτο τεῆς διὰ δεῖπνα τραπέζης
47.103
Ἀτθίδι δῶρον ἔδωκεν, ἄτε στάχυν ὤπασε Δηώ.
47.104
ἔννεπε θαμβήσας γλυκερὸν ποτόν· ἐκ στομάτων δὲ
47.105
ἡδυμανὴς ἀλάλαζε χέων ἄγραυλον ἀοιδήν.
47.106
ἀγρονόμοι δʼ ἀρύοντες ἐπασσυτέροισι κυπέλλοις
47.107
πάντες ἐβακχεύθησαν ἀμερσινόῳ φρένας οἴνῳ·
47.108
ὄμματα δʼ ἐπλάζοντο, φιλακρήτοις δὲ κυπέλλοις
47.109
ἄργυφα πορφύροντο παρήια, γειοπόνων δὲ
47.110
στήθεα θερμαίνοντο, ποτῷ δʼ ἐβαρύνετο κόρση,
47.111
καὶ φλέβες οἰδαίνοντος ἐκυμαίνοντο καρήνου·
47.112
τοῖσι δὲ δερκομένοισιν ἐσείετο κόλπος ἀρούρης
47.113
καὶ δρύες ὠρχήσαντο καὶ ἐσκίρτησαν ἐρίπναι·
47.114
καὶ σφαλεραῖς λιβάδεσσιν ἀήθεος ἔμπλεος οἴνου
47.115
ὕπτιος αὐτοκύλιστος ἐπὶ χθόνα κάππεσεν ἀνήρ.
47.116
καὶ χορὸς ἀγρονόμων φονίῳ δεδονημένος οἴστρῳ
47.117
τλήμονος Ἰκαρίοιο κατέτρεχε θυιάδι λύσσῃ,
47.118
οἶά τε φαρμακόεντα κερασσαμένου δόλον οἴνου,
47.119
ὃς μὲν ἔχων βουπλῆγα σιδήρεον, ὃς δὲ μακέλλῃ
47.120
θωρήξας ἕο χεῖρας, ὁ δὲ σταχυητόμον ἅρπην
47.121
κουφίζων, ἕτερος δὲ λίθον περίμετρον ἀείρων,
47.122
ἄλλος ἀνεπτοίητο καλαύροπα χειρὶ τιταίνων,
47.123
γηραλέον πλήσσοντες· ἑλὼν δέ τις ἐγγὺς ἱμάσθλην
47.124
Ἰκαρίου τέτρηνε δέμας ταμεσίχροϊ κέντρῳ.
47.125
καὶ μογέων χθονὶ πῖπτε γέρων φυτοεργὸς ἀλωεὺς
47.126
τυπτόμενος ῥοπάλοισιν, ἐπισκαίρων δὲ τραπέζῃ
47.127
τύψε μέθης κρητῆρα, καὶ αἴθοπος εἰς χύσιν οἴνου
47.128
ἡμιθανὴς κεκύλιστο· βαρυνομένου δὲ καρήνου
47.129
ἀγρονόμων πληγῇσιν ἀμοιβαίῃσι τυπέντος
47.130
αἱμαλέη φοίνιξεν ὁμόχροον οἶνον ἐέρση.
47.131
καὶ μόγις ἐκ στομάτων ἔπος ἴαχεν Ἄιδι γείτων·
47.132
Οἶνος ἐμοῦ Βρομίου, βροτέης ἄμπαυμα μερίμνης,
47.133
ὁ γλυκὺς εἰς ἐμὲ μοῦνον ἀμείλιχος· εὐφροσύνην γὰρ
47.134
ἀνδράσι πᾶσιν ὄπασσε, καὶ Ἰκαρίῳ πόρε πότμον·
47.135
ὁ γλυκὺς Ἠριγόνῃ πολεμήιος· ἡμετέρην γὰρ
47.136
νηπενθὴς Διόνυσος ἐθήκατο πενθάδα κούρην.
47.137
οὔ πω μῦθος ἔληγε· μόρος δέ οἱ ἔφθασε φωνήν.
47.138
καὶ νέκυς αὐτόθι κεῖτο, σαόφρονος ἔκτοθι κούρης,
47.139
ὄμμασι πεπταμένοισιν. ἐν ἀστρώτῳ δὲ χαμευνῇ
47.140
νήδυμον ὕπνον ἴαυον ὑπὲρ δαπέδοιο φονῆες
47.141
οἰνοβαρεῖς, νεκύεσσιν ἐοικότες· ἐγρόμενοι δέ,
47.142
ὃν κτάνον ἀγνώσσοντες, ἀνέστενον· ὑψόθι δʼ ὤμων
47.143
νεκρὸν ἐλαφρίζοντες ἀνήγαγον εἰς ῥάχιν ὕλης
47.144
ἔμφρονα θυμὸν ἔχοντες, ἐν εὐύδρῳ δὲ ῥεέθρῳ
47.145
ὠτειλὰς ἐκάθηραν ὀρεσσιχύτῳ παρὰ πηγῇ·
47.146
καὶ νέκυν ἀρτιδάικτον, ὃν ἔκτανον ἄφρονι λύσσῃ,
47.147
ἀνδροφόνοις παλάμῃσιν ἐτυμβεύσαντο φονῆες.
47.148
ψυχὴ δʼ Ἰκαρίοιο πανείκελος ἔσσυτο καπνῷ
47.149
εἰς δόμον Ἠριγόνης· βροτέῃ δʼ ἰσάζετο μορφῇ
47.150
κοῦφον ὀνειρείης σκιερῆς εἴδωλον ὀπωπῆς,
47.151
ἀνδρὶ νεουτήτῳ πανομοίιος, εἶχε δὲ δειλὴ
47.152
στικτὸν ἀσημάντοιο φόνου κήρυκα χιτῶνα,
47.153
αἵματι φοινίσσοντα καὶ αὐχμώοντα κονίῃ,
47.154
ῥωγαλέον πληγῇσιν ἀμοιβαίοιο σιδήρου.
47.155
καὶ παλάμας ὤρεξε· νεοσφαγέων δὲ δοκεύειν
47.156
ὠτειλὰς μελέων ἐπεδείκνυε γείτονι κούρῃ.
47.157
παρθενικὴ δʼ ὀλόλυξε φιλοθρήνοις ἐν ὀνείροις,
47.158
ὡς ἴδεν ἕλκεα τόσσα καρήατος, ὡς ἴδε δειλὴ
47.159
λύθρον ἐρευθομένοιο νεόρρυτον ἀνθερεῶνος·
47.160
καὶ σκιόεις γενέτης ἔπος ἔννεπε πενθάδι κούρῃ·
47.161
Ἔγρεο, δειλαίη, καὶ δίζεο σεῖο τοκῆα·
47.162
ἔγρεο, καὶ μεθύοντας ἐμοὺς μάστευε φονῆας·
47.163
εἰμὶ τεὸς γενέτης βαρυώδυνος, ὃν χάριν οἴνου
47.164
ἀγρονόμοι δασπλῆτες ἐδηλήσαντο σιδήρῳ.
47.165
ὦ τέκος, ὀλβίζω σε· σὺ γὰρ κταμένοιο τοκῆος
47.166
οὐ καναχὴν ἤκουσας ἀρασσομένοιο καρήνου,
47.167
οὐ πολιὴν ἐνόησας ἐρευθομένην ὑπὸ λύθρῳ,
47.168
οὐ νέκυν ἀρτιδάικτον ἐπισπαίροντα κονίῃ,
47.169
πατροφόνους κορύνας οὐκ ἔδρακες· ἀλλά σε δαίμων
47.170
ἔκτοθι πατρὸς ἔρυκε, τεὴν δʼ ἐφύλαξεν ὀπωπήν,
47.171
μὴ μόρον ἀθρήσειε δαϊζομένου γενετῆρος.
47.172
αἵματι πορφύροντας ἐμοὺς σκοπίαζε χιτῶνας·
47.173
χθιζὰ γὰρ οἰνωθέντες ἀμοιβαίοισι κυπέλλοις
47.174
ἀγρονόμοι βλύζοντες ἀήθεος ἰκμάδα Βάκχου
47.175
ἀμφʼ ἐμὲ κυκλώσαντο· δαϊζόμενος δὲ σιδήρῳ
47.176
μηλονόμους ἐκάλεσσα, καὶ οὐκ ἤκουσαν ἰωήν·
47.177
μούνη δʼ ὑστερόφωνος ἐμὸν κτύπον ἔκλυεν Ἠχὼ
47.178
θρήνοις ἀντιτύποισι τεὸν στενάχουσα τοκῆα.
47.179
οὐκέτι κουφίζουσα καλαύροπα μεσσόθεν ὕλης
47.180
εἰς νομὸν ἀνθεμόεντα καὶ εἰς λειμῶνας ἱκάνεις,
47.181
σὴν ἀγέλην βόσκουσα σὺν ἀγραύλῳ So MSS.: Ludwich ἀγραύλου. παρακοίτῃ·
47.182
οὐκέτι δενδροκόμοιο τεῆς ψαύουσα μακέλλης
47.183
κῆπον ἐς εὐώδινα φέρεις ἀμαρήιον ὕδωρ·
47.184
ἀλλὰ μελιρραθάμιγγος ἐμῆς ἀκόρητος ὀπώρης
47.185
κλαῖε τεὸν γενέτην με δεδουπότα· καί σε νοήσω
47.186
ὀρφανικὴν ζώουσαν ἀπειρήτην ὑμεναίων.
47.187
ὣς φαμένη πτερόεσσα παρέδραμεν ὄψις ὀνείρου.
47.188
κούρη δʼ ἐγρομένη ῥοδέας ἤμυξε παρειάς,
47.189
πενθαλέοις δʼ ὀνύχεσσιν ἀκαμπέας ἔξεσε μαζούς,
47.190
καὶ δολιχῆς προθέλυμνον ἀνέσπασε βότρυν ἐθείρης·
47.191
καὶ βόας ἀθρήσασα παρισταμένους ἔτι πέτρῃ
47.192
παρθένος ἀχνυμένη κινυρῇ βρυχήσατο φωνῇ·
47.193
Πῇ νέκυς Ἰκαρίοιο, φίλαι φθέγξασθε κολῶναι·
47.194
πότμον ἐμοῦ γενετῆρος ἐθήμονες εἴπατε ταῦροι·
47.195
πατρὸς ἐμοῦ κταμένοιο τίνες γεγάασι φονῆες;
47.196
πῇ μοι ἐμὸς γενέτης γλυκὺς οἴχεται; ἦ ῥα διδάσκων
47.197
γείτονα καλλιφύτοιο νέους ὅρπηκας ὀπώρης
47.198
πλάζεται ἀγρονόμοισι παρήμενος, ἤ τινι βούτῃ
47.199
δενδροκόμῳ παρέμιμνε συνέστιος εἰλαπινάζων;
47.200
εἴπατε μυρομένῃ, καὶ τλήσομαι, εἰσόκεν ἔλθῃ.
47.201
εἰ μὲν ἔτι ζώει γενέτης ἐμός, ἔρνεα κήπου
47.202
ἀρδεύσω παλίνορσος ἅμα ζώουσα τοκῆι·
47.203
εἰ δὲ πατὴρ τέθνηκε καὶ οὐκέτι δένδρα φυτεύει,
47.204
ἀθρήσω μόρον ἶσον ἐπὶ φθιμένῳ γενετῆρι.
47.205
ὣς φαμένη ταχύγουνος ἀνέδραμεν εἰς ῥάχιν ὕλης,
47.206
ἴχνια μαστεύουσα νεοσφαγέος γενετῆρος.
47.207
οὐ δέ οἱ εἰρομένῃ θρασὺς αἰπόλος, οὐ παρὰ λόχμαις
47.208
παρθένον οἰκτείρων ἀγεληκόμος ἔννεπε βούτης
47.209
ἴχνιον ἀστήρικτον ἀκηρύκτοιο τοκῆος,
47.210
οὐ νέκυν Ἰκαρίοιο γέρων ἐπεδείκνυε ποιμήν·
47.211
ἀλλὰ μάτην ἀλάλητο· μόγις δέ μιν εὗρεν ἀλωεὺς
47.212
καὶ κινυροῖς στομάτεσσι δυσάγγελον ἴαχε φωνήν,
47.213
καὶ τάφον ἐγγὺς ἔδειξε νεοδμήτοιο τοκῆος.
47.214
παρθενικὴ δʼ ἀίουσα σαόφρονι μαίνετο λύσσῃ·
47.215
καὶ πλοκάμους τίλλουσα φίλῳ παρακάτθετο τύμβῳ
47.216
παρθένος ἀκρήδεμνος ἀσάμβαλος, αὐτοχύτοις δὲ
47.217
δάκρυσιν ἀενάοισι λελουμένον εἶχε χιτῶνα.
47.218
χείλεσι δʼ ἀφθόγγοισιν ἐπεσφρηγίσσατο σιγὴν
47.219
εἰς χρόνον· Ἠριγόνῃ δὲ κύων ὁμόφοιτος ἐχέφρων
47.220
κνυζηθμῷ γοόωντι συνέστιχε πενθάδι κούρῃ,
47.221
καί οἱ ὀδυρομένῃ συνοδύρετο. μαινομένη δὲ
47.222
εἰς φυτὸν ὑψικάρηνον ἀνέδραμεν· ἀμφὶ δὲ δένδρῳ
47.223
ἀγχονίῳ σφίγξασα περίπλοκον αὐχένα δεσμῷ
47.224
αὐτοφόνῳ στροφάλιγγι μετάρσιος ὤλετο κούρη,
47.226
ἀμφοτέρους δονέουσα πόδας βητάρμονι παλμῷ·
47.225
καὶ θάνε, καὶ μόρον εἶχεν ἑκούσιον· ἀμφὶ δὲ κούρην
47.227
πυκνὰ κύων δεδόνητο, καὶ ἴαχε πένθιμον ἠχὼ
47.228
ὄμμασι θηρείοισι νοήμονα δάκρυα λείβων.
47.229
οὐδὲ κύων ἀφύλακτον ἐρημάδα κάλλιπε κούρην,
47.230
ἀλλὰ φυτῷ παρέμιμνεν ἐπήλυδα θῆρα διώκων,
47.231
πόρδαλιν ἠὲ λέοντα· παρερχομένοισι δʼ ὁδίταις
47.232
νεύμασιν ἀφθόγγοις ἐπεδείκνυεν ἄζυγα κούρην
47.233
δεσμοῖς ἀγχονίοισι περίπλοκον ὑψόθι δένδρου.
47.234
οἱ δέ μιν οἰκτείροντες ἀνήιον εἰς φυτὸν ὕλης
47.235
ἴχνεσιν ἀκροτάτοισιν, ἀπʼ εὐπετάλων δὲ κορύμβων
47.236
παρθενικὴν ἀδμῆτα κατήγαγον· ἀγχιφανῆ δὲ
47.237
γαῖαν ἐκοιλαίνοντο πεδοσκαφέεσσι μακέλλαις.
47.238
τοῖς ἅμα καὶ πεπόνητο κύων πινυτόφρονι θυμῷ,
47.239
πενθαλέῳ δʼ ἐβάθυνε πέδον τεχνήμονι ταρσῷ,
47.240
θηγαλέοις ὀνύχεσσι χυτῆς χθονὸς ἄκρα χαράσσων.
47.241
καὶ νέκυν ἀρτιδάικτον ἐπεκτερέιξαν ὁδῖται·
47.242
καὶ ξυνῆς μεθέπων ὑποκάρδιον ὄγκον ἀνίης
47.243
εἰς ἑὸν ἔργον ἕκαστος ἀνέδραμεν ὀξέι ταρσῷ·
47.244
αὐτὰρ ὁ μοῦνος ἔμιμνε κύων παρὰ γείτονι τύμβῳ
47.245
Ἠριγόνης ὑπʼ ἔρωτι, θελήμονι δʼ ὤλολε πότμῳ.
47.246
Ζεὺς δὲ πατὴρ ἐλέαιρεν· ἐν ἀστερόεντι δὲ κύκλῳ
47.247
Ἠριγόνην στήριξε Λεοντείῳ παρὰ νώτῳ·
47.248
παρθενικὴ δʼ ἄγραυλος ἔχει στάχυν· οὐ γὰρ ἀείρειν
47.249
ἤθελεν οἴνοπα βότρυν ἑοῦ γενέταο φονῆα.
47.250
Ἰκάριον δὲ γέροντα συνήλυδα γείτονι κούρῃ
47.251
εἰς πόλον ἀστερόφοιτον ἄγων ὀνόμηνε Βοώτην
47.252
φαιδρόν, Ἁμαξαίης ἐπαφώμενον Ἀρκάδος Ἄρκτου·
47.253
καὶ Κύνα μαρμαίροντα καταΐσσοντα Λαγωοῦ
47.254
ἔμπυρον ἄστρον ἔθηκεν, ὅπῃ περὶ κύκλον Ὀλύμπου
47.255
ποντιὰς ἀστερόεντι τύπῳ ναυτίλλεται Ἀργώ.
47.256
καὶ τὰ μὲν ἔπλασε μῦθος Ἀχαιικὸς ἠθάδα πειθὼ
47.257
ψεύδεϊ συγκεράσας· τὸ δʼ ἐτήτυμον, ὑψιμέδων Ζεὺς
47.258
ψυχὴν Ἠριγόνης σταχυώδεος ἀστέρι Κούρης
47.259
οὐρανίης ἐπένειμεν ὁμόζυγον, αἰθερίου δὲ
47.260
ἄγχι Κυνὸς κύνα θῆκεν ὁμοίιον εἴδεϊ μορφῆς,
47.261
Σείριον, ὃν καλέουσιν ὀπωρινόν, Ἰκαρίου δὲ
47.262
ψυχὴν ἠερόφοιτον ἐπεξύνωσε Βοώτῃ.
47.263
καὶ τὰ μὲν οἰνοφύτῳ Κρονίδης πόρεν Ἀτθίδι γαίῃ,
47.264
ἓν γέρας ἐντύνων καὶ Παλλάδι καὶ Διονύσῳ.
47.265
Ἰλισσοῦ δὲ ῥέεθρα μελίρρυτα Βάκχος ἐάσας
47.266
ἁβρὸς ἐς ἀμπελόεσσαν ἐκώμασεν ἄντυγα Νάξου·
47.267
ἀμφὶ δέ μιν πτερὰ πάλλεν Ἔρως θρασύς, ἐρχομένου δὲ
47.268
μελλογάμου Κυθέρεια προηγεμόνευε Λυαίου.
47.269
ἄρτι γὰρ ὑπνώουσαν ἐπʼ αἰγιαλοῖσιν ἐάσας
47.270
παρθενικὴν λιπόπατριν ἀμείλιχος ἔπλεε Θησεύς,
47.271
συνθεσίας δʼ ἀνέμοισιν ἐπέτρεπεν. ὑπναλέην δὲ
47.272
ἀθρήσας Διόνυσος ἐρημαίην Ἀριάδνην
47.273
θαύματι μῖξεν ἔρωτα· χοροπλεκέεσσι δὲ Βάκχαις
47.274
γλώσσῃ θαμβαλέῃ πεφυλαγμένον ἔννεπε μῦθον·
47.275
Βασσαρίδες, μὴ ῥόπτρα τινάξατε, μὴ κτύπος ἔστω
47.276
ἢ ποδὸς ἢ σύριγγος· ἐάσατε Κύπριν ἰαύειν·
47.277
ἀλλʼ οὐ κεστὸν ἔχει σημάντορα Κυπρογενείης.
47.278
πείθομαι, ὡς δολόεντι Χάρις νυμφεύεται Ὕπνῳ·
47.279
ἀλλʼ ἐπεὶ ὄρθρος ἔλαμψε καὶ ἐγγύθι φαίνεται Ἠώς,
47.280
Πασιθέην εὕδουσαν ἐγείρατε· τίς παρὰ Νάξῳ,
47.281
τίς Χάριν ἐχλαίνωσεν ἀνείμονα; μὴ πέλεν Ἥβη;
47.282
ἀλλὰ δέπας μακάρων τίνι κάλλιπε; μῆ παρὰ πόντῳ
47.283
κέκλιται αἰγλήεσσα βοῶν ἐλάτειρα Σελήνη;
47.284
καὶ πόθεν Ἐνδυμίωνος ἐθήμονος ἐκτός ἰαύει;
47.285
μὴ Θέτιν ἀργυρόπεζαν ἐπʼ αἰγιαλοῖσι δοκεύω;
47.286
ἀλλʼ οὐ γυμνὸν ἔχει ῥοδόεν δέμας. εἰ θέμις εἰπεῖν,
47.287
Ναξιὰς ἰοχέαιρα πόνων ἀμπαύεται ἄγρης,
47.288
θηροφόνους ἱδρῶτας ἀποσμήξασα θαλάσσῃ·
47.289
τίκτει γὰρ γλυκὺν ὕπνον ἀεὶ πόνος· ἀλλʼ ἐνὶ λόχμῃ
47.290
Ἄρτεμιν ἑλκεχίτωνα τίς ἔδρακε; μίμνετε, Βάκχαι.
47.291
στῆθι, Μάρων· μῆ δεῦρο χορεύσατε· λῆγε λιγαίνων,
47.292
Πὰν φίλε, μὴ σκεδάσειας ἑώιον ὕπνον Ἀθήνης·
47.293
καὶ τίνι Παλλὰς ἔλειπεν ἑὸν δόρυ; καὶ τίς ἀείρει
47.294
χαλκείην τρυφάλειαν ἢ αἰγίδα Τριτογενείης;
47.295
τοῖα μέν ἔννεπε Βάκχος· ἀπὸ ψαμάθοιο δέ δειλὴ
47.296
ὕπνον ἀποσκεδάσασα δυσίμερος ἔγρετο κούρη,
47.297
καὶ στόλον οὐκ ἐνόησε καἰ οὐ πόσιν ἠπεροπῆα·
47.298
ἀλλὰ σὺν ἀλκυόνεσσι Κυδωνιὰς ἔστενε νύμφη
47.299
ἠιόνας μεθέπουσα, βαρύβρομον ἕδνον Ἐρώτων·
47.300
ἠίθεον δʼ ὀνόμηνεν· ἐμαίνετο δʼ ἐγγύθι πόντου
47.301
ὁλκάδα διζομένη· φθονερῷ δʼ ἐπεμήνιεν ὕπνῳ,
47.302
καὶ Παφίης πολὺ μᾶλλον ἐμέμφετο μητρὶ θαλάσσῃ·
47.303
καὶ Βορέην ἱκέτευε, καὶ ὅρκιον εἶπεν ἀήτην,
47.304
ὅρκιον Ὠρείθυιαν, ὅπως πάλιν εἰς χθόνα Νάξου
47.305
κοῦρον ἄγοι, γλυκερὴν δὲ τὸ δεύτερον ὁλκάδα λεύσσῃ·
47.306
Αἰόλον ᾔτεε μᾶλλον ἀθελγέα· λισσομένῃ δὲ
47.307
πείθετο καὶ κατένευσε, καὶ ἀντικέλευθον ἀήτην
47.308
πέμψεν, ἵνα πνεύσειε· ποθοβλήτοιο δὲ κούρης
47.309
οὐ Βορέης ἀλέγιζε δυσίμερος· ἀλλὰ καὶ αὐταὶ
47.310
παρθενικῇ κοτέοντο τάχα ζηλήμονες αὖραι,
47.311
αἳ τότε νῆα κόμισσαν ἐς Ἀτθίδα. παρθενικήν δὲ
47.312
αὐτὸς Ἔρως θάμβησεν, ἀπενθήτῳ δʼ ἐνὶ Νάξῳ
47.313
εἰσιδέειν ἐδόκησεν ὀδυρομένην Ἀφροδίτην·
47.314
ἦν δὲ φαεινοτέρη καὶ ἐν ἄλγεσι, καί μιν ἀνίη
47.315
ἀχνυμένην κόσμησε· κινυρομένῃ δʼ Ἀριάδνῃ
47.316
εἴκαθεν εἰς κρίσιν ἦκα φιλομμειδὴς Ἀφροδίτη
47.317
ἱμερόεν γελόωσα, καὶ εἴκαθεν ὄμματα Πειθοῦς
47.318
καὶ Χαρίτων καὶ Ἔρωτος ἐπήρατα δάκρυσι κούρης.
47.319
ὀψὲ δὲ δακρυόεσσα τόσην ἐφθέγξατο φωνήν·
47.320
Ὕπνος ἐμοὶ γλυκὺς ἦλθεν, ἕως γλυκὺς ᾤχετο Θησεύς·
47.321
αἴθε με τερπομένην So Mss.: Ludwich μετερχομένην. ἔτι κάλλιπεν· ὑπναλέη δὲ
47.322
Κεκροπίην ἐνόησα, καὶ ἔνδοθι Θησέος αὐλῆς
47.323
ἁβρὸς ἔην ὑμέναιος ἀειδομένης Ἀριάδνης
47.324
καὶ χορός, ἡμετέρη δʼ ἐπεκόσμεε τερπομένη χεὶρ
47.325
εἰαρινοῖς πετάλοισι τεθηλότα βωμὸν Ἐρώτων·
47.326
καὶ γάμιον στέφος εἶχον· ἔην δέ μοι ἐγγύθι Θησεὺς
47.327
εἵμασι νυμφιδίοισι θυηπολέων Ἀφροδίτῃ.
47.328
ὤμοι, ποῖον ὄνειρον ἴδον γλυκύν· ἀλλά με φεύγων
47.329
ᾤχετο καλλείψας ἔτι παρθένον· ἵλαθι, Πειθώ·
47.330
ταῦτά μοι ἀχλυόεσσα γαμοστόλος ὤπασεν ὀρφνή,
47.331
καὶ φθονερὴ τάδε πάντα φαεσφόρος ἥρπασεν Ἠώς·
47.332
ἐγρομένη δʼ οὐχ εὗρον ἐμὸν πόθον· ἦ ῥα καὶ αὐταὶ
47.333
εἰκόνες ἀντιτύπων ζηλήμονές εἰσιν Ἐρώτων,
47.334
ὅττι τελεσσιγάμων ἀπατήλιον ὄψιν ὀνείρων
47.335
ἱμερτὴν ἐνόησα, καἰ ἱμερόεις φύγε Θησεύς;
47.336
εἰς ἐμὲ καὶ φίλος Ὕπνος ἀνάρσιος· εἴπατε, πέτραι,
47.337
εἴπατέ μοι δυσέρωτι· τίς ἥρπασεν ἀστὸν Ἀθήνης;
47.338
εἰ Βορέης πνεύσειεν, ἐς Ὠρείθυιαν ἱκάνω·
47.339
ἀλλά μοι Ὠρείθυια χολώεται, ὅττι καἰ αὐτὴ
47.340
αἷμα φέρει Μαραθῶνος, ὅθεν φίλος ἔπλετο Θησεύς.
47.341
εἰ Ζέφυρος κλονέει, Ζεφυρηίδι δείξατε νύμφῃ
47.342
ἴριδι μητρὶ Πόθοιο βιαζομένην Ἀριάδνην·
47.343
εἰ Νότος, εἰ θρασὺς Εὖρος, ἐς ἠριγένειαν ἱκάνω
47.344
μεμφομένη ῥοθίων ἀνέμων δυσέρωτι τεκούσῃ.
47.345
δὸς κενεὴν πάλιν, Ὕπνε, φίλην χάριν, ἶσον ἐκείνῳ
47.346
πέμπων ἄλλον ὄνειρον ἐπήρατον, ὄφρα νοήσω
47.347
Κύπριδος ὑπναλέης γλυκερὴν ἀπατήλιον εὐνήν·
47.348
μοῦνον ἐμοῖς δήθυνον ἐπʼ ὄμμασιν, ὄφρα νοήσω
47.349
ἄπνοον οἶστρον Ἔρωτος ὀνειρείων ὑμεναίων.
47.350
εἰ μὲν ἐς Ἀτθίδα γαῖαν, ἐπίκλοπε νυμφίε Θησεῦ,
47.351
σὸν πλόον ἐκ Νάξοιο μετήγαγον ἅρπαγες αὖραι,
47.352
εἰπέ μοι εἰρομένῃ, καὶ ἐς Αἰόλον αὐτίκα βαίνω
47.353
μεμφομένη φθονεροῖσι καὶ οὐχ ὁσίοισιν ἀήταις·
47.354
εἰ δέ με τὴν λιπόπατριν ἐρημάδι πάρθετο Νάξῳ,
47.355
καὶ σέθεν ἀγνώσσοντος ἀμείλιχος ἔπλεε ναύτης,
47.356
ἤλιτεν εἰς Θησῆα καὶ εἰς Θέμιν, εἰς Ἀριάδνην·
47.357
μηκέτι ναυτίλος οὗτος ἴδοι ποτὲ πομπὸν ἀήτην,
47.358
μηδέ μιν ἀσταθέεσσι συνιππεύοντα θυέλλαις
47.359
ἵλαος ἀθρήσειε γαληναῖος Μελικέρτης·
47.360
ἀλλὰ Νότος πνεύσειεν, ὅτε χρέος ἐστὶ Βορῆος·
47.361
εὖρον ἴδοι Ζεφύρου κεχρημένος· εἰαρινοὶ δὲ
47.362
ποντοπόροις ὅτε πᾶσιν ἐπιπνείουσιν ἀῆται,
47.363
χειμερίῃ τότε μοῦνος ὁμιλήσειε θαλάσσῃ.
47.364
ἤλιτε ναυτίλος οὗτος ἀθέσμιος· ἀλλὰ καὶ αὐτὴ
47.365
ἀασάμην ποθέουσα σαόφρονος ἀστὸν Ἀθήνης.
47.366
αἴθέ μιν οὐκ ἐπόθησα δυσίμερος· εἰς Παφίην γὰρ
47.367
ὁππόσον ἱμερόεις, τόσον ἄγριος ἔπλετο Θησεύς·
47.368
οὐ τάδε μοι κατέλεξεν ἐμὸν μίτον εἰσέτι πάλλων·
47.369
οὐ τάδε μοι κατέλεξε παρʼ ἡμετέρῳ λαβυρίνθῳ.
47.370
αἴθέ μιν ἔκτανε ταῦρος ἀμείλιχος· ἴσχεο, φωνή,
47.371
ἀφροσύνης, μὴ κτεῖνε νέον γλυκύν· ὤμοι Ἐρώτων·
47.372
Θησεὺς ἔπλεε μοῦνος ἐς εὐώδινας Ἀθήνας.
47.373
οἶδα, πόθεν με λέλοιπε· μιῆς τάχα παρθενικάων
47.374
σύμπλοον ἔσχεν ἔρωτα, καὶ ἐν Μαραθῶνι χορεύει
47.375
εἰς ἑτέρης γάμον ἄλλον, ἐγὼ δʼ ἔτι Νάξον ὁδεύω.
47.376
παστὸς ἐμὸς πέλε Νάξος, ἐπίκλοπε νυμφίε Θησεῦ·
47.377
ὤλεσα καὶ γενέτην καὶ νυμφίον· ὤμοι Ἐρώτων·
47.378
οὐχ ὁρόω Μίνωα, καὶ οὐ Θησῆα δοκεύω·
47.379
Κνωσσὸν ἐμὴν προλέλοιπα, τεὰς δʼ οὐκ εἶδον Ἀθήνας·
47.380
πατρὸς ἐνοσφίσθην καὶ πατρίδος· ἆ μέγα δειλή,
47.381
ἕδνον ἐμῆς φιλότητος ὕδωρ ἁλός· εἰς τίνα φεύγω;
47.382
τίς θεὸς ἁρπάξει με καὶ εἰς Μαραθῶνα κομίσσει
47.383
Κύπριδι καὶ Θησῆι δικαζομένην Ἀριάδνην;
47.384
τίς με λαβὼν κομίσειε διʼ οἴδματος; αἴθε καὶ αὐτὴ
47.385
ἡμετέρης μίτον ἄλλον ἴδω πομπῆα κελεύθου·
47.386
τοῖον ἔχειν ἐθέλω καὶ ἐγὼ μίτον, ὥς κεν ἀλύξω
47.387
Αἰγαίης ἁλός οἶδμα καὶ εἰς Μαραθῶνα περήσω,
47.388
ὄφρα περιπτύξω σε, καὶ εἰ στυγέεις Ἀριάδνην,
47.389
ὄφρα περιπτύξω σε τὸν ὁρκαπάτην παρακοίτην.
47.390
δέξό με σῶν λεχέων θαλαμηπόλον, ἢν ἐθελήσῃς·
47.391
καὶ στορέσω σέο λέκτρα μετὰ Κρήτην Ἀριάδνη,
47.392
οἷά τε ληισθεῖσα· καὶ ὀλβίστῃ σέο νύμφῃ
47.393
τλήσομαι, ὡς θεράπαινα, πολύκροτον ἱστὸν ὑφαίνειν
47.394
καὶ φθονεροῖς ὤμοισιν ἀήθεα κάλπιν ἀείρειν,
47.395
καὶ γλυκερῷ Θησῆι φέρειν ἐπιδόρπιον ὕδωρ·
47.396
μοῦνον ἴδω Θησῆα· καὶ ἡμετέρη ποτὲ μήτηρ
47.397
ἀγρονόμοις θήτευε, καὶ αὐχένα κάμψε νομῆι,
47.398
βοσκομένῳ δʼ ὀάριζεν ἀφωνήτῳ τινὶ ταύρῳ,
47.399
καὶ βοῒ ταῦρον ἔτικτε· μελιζομένου δὲ βοτῆρος
47.400
πηκτίδος οὐ πόθον ἔσχεν, ὅσον μυκηθμὸν ἀκούειν.
47.401
οὐ μὲν ἐγὼ ψαύσαιμι καλαύροπος, οὐ παρὰ φάτνῃ
47.402
στήσομαι· ἡμετέρης δὲ παρέσσομαι ἐγγὺς ἀνάσσης
47.403
φθεγγομένῳ Θησῆι, καὶ οὐ μυκηθμὸν ἀκούσω·
47.404
καὶ τεὸν ἱμερόεντα γάμων ὑμέναιον ἀείσω
47.405
ζῆλον ὑποκλέπτουσα νεοζυγέος σέο νύμφης.
47.406
στῆσον Ναξιάδεσσι παρʼ ᾐόσι ποντοπορεύων,
47.407
στῆσον ἐμοὶ σέο νῆα· τί, ναυτίλε, καὶ σὺ χαλέπτεις;
47.408
ὣς ἄρα καὶ σὺ πέλεις Μαραθώνιος· εἰ μὲν ἱκάνεις
47.409
εἰς ἐρατήν σέο γαῖαν, ὅπῃ δόμος ἐστὶν Ἐρώτων,
47.410
δέξό με δειλαίην, ἵνα Κέκροπος ἄστυ νοήσω·
47.411
εἰ δέ με καλλείψεις καί, ἀμείλιχε, ποντοπορεύεις,
47.412
εἰπὲ τεῷ Θησῆι κινυρομένην Ἀριάδνην,
47.413
μεμφομένην ἀτέλεστον ἐπίκλοπον ὅρκον Ἐρώτων.
47.414
οἶδα, πόθεν Θησῆος ὑπόσχεσιν ἠπεροπῆος
47.415
θῆκεν Ἔρως βαρύμηνις ἀνήνυτον· ἀντὶ γάρ Ἥρης,
47.416
ἣν Ζυγίην καλέουσιν, ἀπειρογάμοιο θεαίνης
47.417
ὤμοσεν ἀχράντοιο γαμήλιον ὅρκον Ἀθήνης·
47.418
Παλλάδος ὅρκον ὄμοσσε· τί Παλλάδι καὶ Κυθερείῃ;
47.419
τοῖα κινυρομένης ἐπετέρπετο Βάκχος ἀκούων·
47.420
Κεκροπίην δʼ ἐνόησε καὶ οὔνομα Θησέος ἔγνω
47.421
καὶ στόλον ἐκ Κρήτης ἀπατήλιον· ἄγχι δὲ κούρης
47.422
ἔνθεον εἶδος ἔχων ἀμαρύσσετο· παρθενικὴν δὲ
47.423
φέρτερον εἰς πόθον ἄλλον ἐμάστιε κέντορι κεστῷ
47.424
θοῦρος Ἔρως περίφοιτος, ὅπως Μινωίδα κούρην
47.425
πειθομένην ζεύξειε κασιγνήτῳ Διονύσῳ.
47.426
καὶ κινυρὴν δυσέρωτα παρηγορέων Ἀριάδνην
47.427
τοῖον ἔπος φάτο Βάκχος ἐῇ φρενοθελγέι φωνῇ·
47.428
Παρθένε, τί στενάχεις ἀπατήλιον ἀστὸν Ἀθήνης;
47.429
μνῆστιν ἔα Θησῆος· ἔχεις Διόνυσον ἀκοίτην,
47.430
ἀντὶ μινυνθαδίου πόσιν ἄφθιτον· εἰ δέ σε τέρπει
47.431
ἥλικος ἠιθέου βρότεον δέμας, οὔ ποτε Θησεὺς
47.432
εἰς ἀρετὴν καὶ κάλλος ἐριδμαίνει Διονύσῳ.
47.433
ἀλλʼ ἐρέεις·ʼ ναετῆρα πεδοσκαφέος λαβυρίνθου
47.434
δισσοφυῆ φοίνιξεν ὁμόζυγον ἀνέρα ταύρᾠ·
47.435
οἶδας ἀοσσητῆρα τεὸν μίτον· οὐ γὰρ ἀγῶνα
47.436
εὗρεν ἀεθλεύειν κορυνηφόρος ἀστὸς Ἀθήνης,
47.437
εἰ μὴ θῆλυς ἄμυνε ῥοδόχροος· οὔ σε διδάξω
47.438
καὶ Παφίην καὶ Ἔρωτα καὶ ἠλακάτην Ἀριάδνης.
47.439
αἰθέρος οὐκ ἐρέεις ὅτι μείζονές εἰσιν Ἀθῆναι·
47.440
οὐ Διὶ παμμεδέοντι πανείκελος ἔπλετο Μίνως,
47.441
σὸς γενέτης· οὐ Κνωσσὸς ὁμοίιός ἐστιν Ὀλύμπῳ.
47.442
οὐδὲ μάτην στόλος οὗτος ἐμῆς ἀπεβήσατο Νάξου,
47.443
ἀλλὰ Πόθος σε φύλαξεν ἀρειοτέροις ὑμεναίοις·
47.444
ὀλβίη, ὅττι λιποῦσα χερείονα Θησέος εὐνὴν
47.445
δέμνιον ἱμερόεντος ἐσαθρήσεις Διονύσου.
47.446
τί πλέον ἤθελες εὖχος ὑπέρτερον; ἀμφότερον γὰρ
47.447
οὐρανὸν οἶκον ἔχεις, ἑκυρὸς δέ σοί ἐστι Κρονίων.
47.448
οὔ σοι Κασσιέπεια δυνήσεται ἰσοφαρίζειν
47.449
παιδὸς ἑῆς διὰ κόσμον Ὀλύμπιον· αἰθερίους γὰρ
47.450
δεσμοὺς Ἀνδρομέδῃ καὶ ἐν ἄστρασιν ὤπασε Περσεύς·
47.451
ἀλλά σοι ἀστερόεν τελέσω στέφος, ὥς κεν ἀκούσῃς
47.452
εὐνέτις αἰγλήεσσα φιλοστεφάνου Διονύσου.
47.453
εἶπε παρηγορέων· καὶ ἐπάλλετο χάρματι κούρη
47.454
μνῆστιν ὅλην Θησῆος ἀπορρίψασα θαλάσσῃ,
47.455
οὐρανίου μνηστῆρος ὑποσχεσίην ὑμεναίων
47.456
δεξαμένη. καὶ παστὸν Ἔρως ἐπεκόσμεε Βάκχῳ·
47.457
καὶ χορὸς ἐσμαράγησε γαμήλιος· ἀμφὶ δὲ παστῷ
47.458
ἄνθεα πάντα τέθηλε· καὶ εἰαρινοῖσι πετήλοις
47.459
Νάξον ἐκυκλώσαντο χορίτιδες Ὀρχομενοῖο·
47.460
καὶ θαλάμους ἐλίγαινεν Ἁμαδρυάς, ἀμφὶ δὲ πηγαῖς
47.461
νηιὰς ἀκρήδεμνος ἀσάμβαλος ᾔνεσε Νύμφη
47.462
δαίμονι βοτρυόεντι συναπτομένην Ἀριάδνην·
47.463
Ὀρτυγίη δʼ ὀλόλυζε, πολισσούχοιο δὲ Φοίβου
47.464
γνωτῷ νυμφίον ὕμνον ἀνακρούουσα Λυαίῳ
47.465
εἰς χορὸν ἐσκίρτησε καὶ ἀστυφέλικτος ἐοῦσα.
47.466
πορφυρέοις δὲ ῥόδοισι περίτροχον ἄνθος ἐρέπτων
47.467
μάντις Ἔρως πυρόεις στέφος ἔπλεκε, σύγχροον ἄστρων,
47.468
οὐρανίου Στεφάνοιο προάγγελον· ἀμφὶ νύμφης
47.469
Ναξιάδος σκίρτησε γαμοστόλος ἐσμὸς Ἐρώτων.
47.470
καὶ ζυγίοις θαλάμοισιν ὁμιλήσας ὑμεναίοις
47.471
Χρυσοπάτωρ πολύπαιδα γονὴν ἔσπειρεν ἀκοίτης.
47.472
καὶ δολιχὴν πολιοῖο χρόνου στροφάλιγγα κυλίνδων
47.473
μητέρος εὐώδινος ἑῆς ἐμνήσατο Ῥείης·
47.474
καὶ Χαρίτων πλήθουσαν ἀμεμφέα Νάξον ἐάσας
47.475
Ἑλλάδος ἄστεα πάντα μετήιεν· ἱπποβότου δὲ
47.476
Ἄργεος ἐγγὺς ἵκανε, καὶ εἰ λάχεν Ἴναχον Ἥρη.
47.477
οἱ δέ μιν οὐκ ἐδέχοντο, χοροπλεκέας δὲ γυναῖκας
47.478
καὶ Σατύρους ἐδίωκον, ἀπηρνήσαντο δὲ θύρσους,
47.479
μή ποτε δηλήσαιτο Πελασγικὸν ἕδρανον Ἥρη
47.480
ζηλήμων, βαρύμηνις ἐπιβρίθουσα Λυαίῳ·
47.481
Σειληνοὺς δὲ γέροντας ἐρήτυον. ἀχνύμενος δὲ
47.482
Ἰναχίδας Διόνυσος ὅλας οἴστρησε γυναῖκας·
47.483
μυκηθμῷ δʼ ἀλάλαζον Ἀχαιίδες· ἀντομένοις δὲ
47.484
ἔχραον ὲν τριόδοισιν· ἐπὶ σφετέροισι δὲ δειλαὶ
47.485
ἀρτιτόκοις βρεφέεσσιν ἐπωξύνοντο μαχαίρας,
47.486
ὦν ἡ μὲν ξίφος εἷλκε καὶ ἔκτανεν υἱέα μήτηρ,
47.487
ἄλλη δὲ τριέτηρον ἀπηλοίησε γενέθλην,
47.488
καί τις ἀνηκόντιζεν ἐς ἠέρα κοῦρον ἀλήτην
47.489
εἰσέτι μαστεύοντα φίλον γλάγος· ὀλλυμένων δὲ
47.490
Ἴναχος ἀρτιτόκων βρεφέων ἐπεμαίνετο πότμῳ·
47.491
μήτηρ δʼ ἔκτανεν υἷα, καὶ οὐ πόθος ἔπλετο μαζῶν
47.492
παιδοκόμων, οὐ μνῆστις ἀναγκαίου τοκετοῖο·
47.493
Ἀστερίων δʼ , ὅθι πολλὰ θαλύσια μείζονος ἤβης
47.494
ἠιθέων κείροντο λιπότριχος ἄνθεα κόρσης,
47.495
αὐτοὺς παῖδας ἔδεκτο καὶ οὐκέτι βόστρυχα χαίτης.
47.496
καί τις ἰδών τινα λάτριν ἐπερχομένοιο Λυαίου
47.497
τοῖον ἔπος κατέλεξε Πελασγίδας ἀστὸς ἀρούρης·
47.498
Οὗτος ὁ βότρυν ἔχων, διφυὲς γένος· ἄξιον Ἥρης
47.499
Αργος ἔχει Περσῆα καὶ οὐ χατέει Διονύσου·
47.500
ἄλλον ἔχω Διὸς υἷα καὶ οὐ Βάκχοιο χατίζω.
47.501
ποσσὶ πολυσκάρθμοισι πατεῖ Διόνυσος ὀπώρην·
47.502
ἴχνεσιν ὑψιπόροισιν ἐμὸς γόνος ἠέρα τέμνει.
47.503
μὴ κισσῷ δρεπάνην ἰσάζετε· καὶ γὰρ ἀρείων
47.504
Βάκχου θυρσοφόρου δρεπανηφόρος ἔπλετο Περσεύς·
47.505
εἰ στρατὸν Ἰνδὸν ἔπεφνεν, ἀέθλιον ἶσον ἐνίψω
47.506
Γοργοφόνῳ Περσῆι καὶ Ἰνδοφόνῳ Διονύσῳ·
47.507
εἰ δὲ πολυκλύστοιο παρʼ Ἑσπέριον κλίμα πόντου
47.508
ὁλκάδα λαϊνέην Τυρσηνίδα πῆξε θαλάσσῃ,
47.509
κῆτος ὅλον περίμετρον ἐμὸς πετρώσατο Περσεύς.
47.510
εἰ δὲ τεὸς Διόνυσος ἐρημονόμῳ παρὰ πόντῳ
47.511
ὑπναλέην ἐσάωσεν ἐπʼ ἠιόνων Ἀριάδνην,
47.512
δεσμοὺς Ἀνδρομέδης πτερόεις ἀνελύσατο Περσεύς,
47.513
ἄξιον ἕδνον ἔχων πετρώδεα θῆρα θαλάσσης·
47.514
οὔ πως Ἀνδρομέδην Παφίης χάριν, οὔ ποτε Περσεὺς
47.515
Θησέος ἱμείρουσαν ἑὴν ἐρρύσατο νύμφην·
47.516
ἀλλὰ σαοφρονέοντα γάμον λάχεν. ὡς Σεμέλην δέ,
47.517
οὐ Δανάην πυρόεντες ἐτεφρώσαντο κεραυνοί·
47.518
ἀλλὰ πατὴρ Περσῆος Ὀλύμπιος ὄμβρος Ἐρώτων
47.519
χρύσεος εἰς γάμον ἦλθε, καὶ οὐ φλογόεις παρακοίτης.
47.520
οὐκ ἄγαμαί ποτε τοῦτον ἐγὼ πρόμον· ἐν παλάμῃ γὰρ
47.521
ποῖον ἔχει δόρυ θοῦρον Ἀρήιον; ἴσχεο, Περσεῦ·
47.522
Γοργοφόνῳ δρεπάνῃ μὴ μάρναο θήλεϊ κισσῷ·
47.523
μὴ σέο χεῖρα μίαινε γυναικείοισι κοθόρνοις·
47.524
μὴ κυνέην Ἀίδαο τεοῖς κροτάφοισι τινάξῃς
47.525
στέμματος ἀμπελόεντος ἐναντίον· ἢν δʼ ἐθελήσῃς,
47.526
Ἀνδρομέδην θώρηξον ἀθωρήκτῳ Διονύσῳ·
47.527
χάζεό μοι, Διόνυσε, καὶ ἵππιον Ἄργος ἐάσας
47.528
Θήβης ἑπταπύλοιο πάλιν βάκχευε γυναῖκας·
47.529
κτεῖνε νέον Πενθῆα· τί Περσέι καὶ Διονύσῳ;
47.530
Ἴναχον ὠκυρέεθρον ἀναίνεο· καί σε δεχέσθω
47.531
Θήβης Ἀονίης ποταμὸς βραδύς· οὔ σε διδάξω
47.532
Ἀσωπὸν βαρύγουνον ἔτι ζείοντα κεραυνῷ.
47.533
τοῖον ἔπος κατέλεξεν ἐπεγγελόων Διονύσῳ.
47.534
Ἀργείην δὲ φάλαγγα Πελασγιὰς ὥπλισεν Ἥρη·
47.535
μαντιπόλῳ δʼ ἤικτο Μελάμποδι· χωομένη δὲ
47.536
Γοργοφόνῳ Περσῆι μαχήμονα ῥήξατο φωνήν·
47.537
Οὐρανίης βλάστημα γονῆς, κορυθαιόλε Περσεῦ,
47.538
σὴν δρεπάνην ἀνάειρε, μὴ ἀπτολέμῳ τινὶ θύρσῳ
47.539
ἀδρανέες τεὸν Ἄργος ἀιστώσωσι γυναῖκες
47.540
μὴ τρομέοις ἔνα μοῦνον ὄφιν ζωστῆρα κομάων,
47.541
ὅττι δαφοινήεσσα τεὴ θηροκτόνος ἅρπη
47.542
λήια τοσσατίων ὀφίων ἤμησε Μεδούσης·
47.543
Βασσαρίδων δὲ φάλαγγι κορύσσεο· χαλκορόφου δὲ
47.544
μνώεο παρθενεῶνος, ὅπῃ Δανάης διὰ κόλπου
47.545
χρύσεον ὄμβρον ἔχευε γαμοκλόπον ὑέτιος Ζεύς,
47.546
μὴ Δανάη μετὰ λέκτρα, μετὰ χρυσέους ὑμεναίους
47.547
οὐτιδανῷ γόνυ δοῦλον ὑπογνάμψειε Λυαίῳ·
47.548
δεῖξον, ὅτι Κρονίωνος ἐτήτυμον αἷμα κομίζεις,
47.549
δεῖξον, ὅτι χρύσειον ἔχεις γένος, οὐρανίου δὲ
47.550
λέκτρα τεοῦ κήρυξον ἐχεκτεάνου νιφετοῖο·
47.551
καὶ Σατύροις πολέμιζε· κορυσσομένῳ δὲ Λυαίῳ
47.552
φοίνιον ὄμμα τίταινε δρακοντοκόμοιο Μεδούσης,
47.553
καὶ μετὰ πικρὸν ἄνακτα πολυκλύστοιο Σερίφου
47.554
λαΐνεον νέον ἄλλον ἐσαθρήσω Πολυδέκτην.
47.555
σὺν σοὶ πανδαμάτειρα κορύσσεται Ἀργολὶς Ἥρη
47.556
μητρυιὴ Βρομίοιο προασπίζων δὲ Μυκήνης
47.557
σὴν δρεπάνην κούφιζε σαόπτολιν, ὄφρα νοήσω
47.558
ἑσπομένην Περσῆι δορικτήτην Ἀριάδνην·
47.559
κτεῖνε βοοκραίρων Σατύρων στίχα· Βασσαρίδων δὲ
47.560
ὄμματι Γοργείῳ βροτέην μετάμειψον ὀπωπὴν
47.561
εἰς βρέτας αὐτοτέλεστον ὁμοίιον· ἀντιτύπῳ δὲ
47.562
κάλλεϊ πετρήεντι τεὰς κόσμησον ἀγυιάς,
47.563
Ἰναχίαις ἀγορῇσιν ἀγάλματα ποικίλα τεύχων.
47.564
τί τρομέεις Διόνυσον, ὄν οὐ Διὸς ἤροσαν εὐναί;
47.565
εἰπέ, τί σοι ῥέξειε;μετάρσιον ἠεροφοίτην
47.566
πεζὸς ὑπὲρ δαπέδοιο πότε πτερόεντα κιχήσει;
47.567
ἔννεπε θαρσύνουσα· καὶ εἰς μόθον ἔπτατο Περσεύς.
47.568
καὶ ναέτας καλέουσα Πελασγιὰς ἔβρεμε σάλπιγξ,
47.569
ὧν ὁ μὲν αἰχμητῆρος ἐκούφισε Λυγκέος αἰχμήν,
47.570
ὅς δὲ παλαιοτέροιο Φορωνέος, ὅς δὲ Πελασγοῦ,
47.571
ἄλλος ἀνηέρταζεν Ἀβαντίδα χειρὶ βοείην
47.572
καὶ μελίην Προίτοιο, καὶ Ἀκρισίοιο φαρέτρην
47.573
ἄλλος ἀνὴρ κούφιζεν, ὁ δὲ θρασὺς εἰς μόθον ἔστη
47.574
ἆορ ἔχων Δαναοῖο, τὸ πέρ ποτε γυμνὸν ἀείρων
47.575
θυγατέρας θώρηξεν ἐς ἀνδροφόνους ὑμεναίους,
47.576
ἄλλος ἔην κρατέων πέλεκυν μέγαν, ὃν παρὰ βωμῷ
47.577
Ἴναχος ἀστυόχοιο θυηπόλος ἔνθεος Ἥρης
47.578
ἵστατο κουφίζων βοέων τμητῆρα μετώπων.
47.579
καὶ στρατὸς ἐγρεκύδοιμος ἀερσιπόδων ὑπὲρ ἵππων
47.580
ἔδραμε μαρναμένου μετὰ Περσέος· ὃς δὲ παρέστη
47.581
τρηχαλέοις στομάτεσσι μάχης ἀλαλαγμὸν ἰάλλων,
47.582
πεζὸς ἀνήρ, καὶ τόξα συνήρμοσε κυκλάδι νευρῇ,
47.583
καὶ γλαφυρὴν ἤειρεν ὑπὲρ νώτοιο φαρέτρην·
47.584
καὶ πρόμος Ἀργείων δρεπανηφόρος ἔπλετο Περσεύς,
47.585
καὶ πόδας ἠερίοισιν ἐπεσφήκωσε πεδίλοις,
47.586
καὶ κεφαλὴν κούφιζεν ἀθηήτοιο Μεδούσης.
47.587
Λυσικόμους δʼ Ἰόβακχος ἑὰς ἐκόρυσσε γυναῖκας
47.588
καὶ Σατύρους κερόεντας· ἐβακχεύθη δὲ κυδοιμῷ
47.589
ἠερίην πτερόεντος ἰδὼν προμάχοιο πορείην·
47.590
χειρὶ δὲ θύρσον ἄειρεν, ἑοῦ προβλῆτα προσώπου
47.591
κουφίζων ἀδάμαντα, Διὸς πετρούμενον ὄμβρῳ
47.592
λᾶαν, ἀλεξητῆρα λιθογλήνοιο Μεδούσης,
47.593
ὄφρα φύγῃ σέλας ἐχθρὸν ἀθηήτοιο προσώπου.
47.594
Βασσαρίδων δὲ φάλαγγας ἰδὼν καὶ θύσθλα Λυαίου,
47.595
φρικαλέον γελόων κορυθαιόλος ἔννεπε Περσεύς·
47.596
Ἡδὺς ὁ θύρσον ἔχων, χλοερὸν βέλος, εἰς ἐμὲ βαίνων
47.597
οὐτιδανοῖς πετάλοισι κορύσσεαι, Ἄρεα παίζων·
47.598
εἰ Διὸς ἔλλαχες αἷμα, τεὴν ἀνάφαινε γενέθλην·
47.599
εἰ ποταμοῦ χρύσειον ἔχεις Πακτώλιον ὕδωρ,
47.600
χρυσὸν ἔχω γενετῆρα, πατὴρ δʼ ἐμὸς ὑέτιος Ζεύς·
47.601
ἠνίδε φοινίσσοντα θεμείλια παρθενεῶνος,
47.602
λείψανα κεῖνα φέροντα ῥυηφενέος νιφετοῖο.
47.603
ἀλλὰ φύγε κλυτὸν Ἄργος, ἐπεὶ μενεδήιος Ἥρη
47.604
ἔλλαχεν ἕδρανα ταῦτα τεῆς ὀλέτειρα τεκούσης,
47.605
μή σε τὸν οἰστρήσαντα καὶ οἰστρηθέντα τελέσσῃ
47.606
μή σε πάλιν μανίῃ τεθοωμένον ὀψὲ νοήσω.
47.607
ὣς εἰπὼν προμάχιζεν· ἀνεπτοίησε δὲ Βάκχας
47.608
Ἄρεα θωρήξασα καὶ ἀμητῆρα Μεδούσης
47.609
Ἥρη πανδαμάτειρα· καταιθύσσουσα δὲ Βάκχου
47.610
ἀστεροπῆς μίμημα, θεόσσυτον ἁλλόμενον πῦρ,
47.611
ῥῖψε κατὰ Βρομίοιο σελασφόρον αἴθοπα λόγχην.
47.612
καὶ γελόων Διόνυσος ἀμείβετο θυιάδι φωνῇ·
47.613
Οὐ τόσον ἀστράπτουσαν ἔχεις ἀσίδηρον ἀκωκήν·
47.614
οὐ δύνασαι κλονέειν με, καὶ εἰ λάχες ἔμπυρον αἰχμήν·
47.615
οὐδέ με πημαίνει στεροπὴ Διός· ἡμιτελῆ γὰρ
47.616
νήπιον εἰσέτι Βάκχον ἐχυτλώσαντο κεραυνοὶ
47.617
ἀφλεγὲς ἄσθμα χέοντες ἀδηλήτῳ Διονύσῳ.
47.618
καὶ σὺ μέγα φρονέων δρεπανηφόρε παύεο Περσεῦ·
47.619
Γοργόνος οὐ μόθος οὗτος ὀλίζονος, οὐ μία νύμφη
47.620
Ἀνδρομέδη βαρύδεσμος ἀέθλιον· ἀλλὰ Λυαίῳ
47.621
δῆριν ἄγεις, ὃς Ζηνὸς ἔχει γένος, ᾧ ποτε μούνῳ
47.622
Ῥείη μαζὸν ὄρεξε φερέσβιον, ὅν ποτε πυρσῷ
47.623
ἀστεροπῆς γαμίης μαιώσατο μειλιχίη φλόξ,
47.624
ὃν δύσις, ὃν θάμβησεν Ἑωσφόρος, ᾧ στίχες Ἰνδῶν
47.625
εἴκαθον, ὃν τρομέων καὶ Δηριάδης καὶ Ὀρόντης
47.626
ἠλιβάτων ἀπέλεθρον ἔχων ἴνδαλμα Γιγάντων
47.627
ἤριπεν, ᾧ θρασὺς Ἄλπος ὑπώκλασεν, υἱὸς Ἀρούρης,
47.628
ἀγχινεφὲς περίμετρον ἔχων δέμας, ᾧ γόνυ κάμπτει
47.629
λαὸς Ἄραψ, Σικελὸς δὲ μελίζεται εἰσέτι ναύτης
47.630
Τυρσηνῶν νόθον εἶδος ἁλίδρομον, ὧν ποτε μορφὴν
47.631
ἀνδρομέην ἤμειψα μετάτροπον, ἀντὶ δὲ φωτῶν
47.632
ἰχθύες ὀρχηστῆρες ἐπισκαίρουσι θαλάσσῃ.
47.633
Θήβης δʼ ἑπταπύλου γόον ἔκλυες· οὔ σε διδάξω
47.634
αἰνομανῆ Πενθῆα καὶ ὠλεσίτεκνον Ἀγαύην·
47.635
φήμης δʼ οὐ χατέεις ἢ μάρτυρος, ὅττι Λυαίου
47.636
πειρήθη τεὸν Ἄργος, Ἀχαιιάδες δὲ καὶ αὐταὶ
47.637
σφωιτέρας ὠδῖνας ἔτι στενάχουσι γυναῖκες.
47.638
ἀλλὰ, φίλος, πολέμιζε, καὶ αἰχμάζοντα κορύμβοις
47.639
αἰνήσεις τάχα Βάκχον ὅτι πτερὰ σεῖο πεδίλων
47.640
ὄψεαι ἀρραγέεσσιν ἐμοῖς εἴκοντα κοθόρνοις·
47.641
οὔ ποτε Βασσαρίδων σκεδάσεις μόθον, οὔ ποτε λήξω
47.642
πέμπων οἴνοπα θύρσον, ἕως τεὸν Ἄργεϊ δείξω
47.643
ἔγχεϊ κισσήεντι πεπαρμένον ἀνθερεῶνα
47.644
καὶ δρέπανον πετάλοις νικώμενον· οὔ σε σαώσει
47.645
Ζεὺς ἐμός, οὐ γλαυκῶπις ὁμόγνιος, οὐ σέθεν Ἥρη,
47.646
καὶ μάλα περ κοτέουσα μενεπτολέμῳ Διονύσῳ·
47.647
ἀλλὰ κατακτείνω σε, καὶ αὐχήεσσα Μυκήνη
47.648
ὄψεται ἀμηθέντα τὸν ἀμητῆρα Μεδούσης·
47.649
ἤ σε περισφίγξας ἐνὶ λάρνακι μείζονι δεσμῷ
47.650
πλωτὸν ἀκοντίζω σε τὸ δεύτερον ἠθάδι πόντῳ·
47.651
ἢν δʼ ἐθέλῃς, ἐπίβηθι τεῆς πάλιν ὀψὲ Σερίφου.
47.652
ἢν δὲ τεῇ χρυσέῃ μεγαλίζεαι ἀμφὶ γενέθλῃ,
47.653
οὐτιδανὴν συνάεθλον ἔχε χρυσῆν Ἀφροδίτην.
47.654
ὣς εἰπὼν προμάχιζεν· ἐπεστρατόωντο δὲ Βάκχαι,
47.655
καὶ Σάτυροι πολέμιζον. ὑπὲρ Βρομίου δὲ καρήνου
47.656
αἰθύσσων πτερὰ κοῦφα μετάρσιος ἵπτατο Περσεύς·
47.657
ὑψώσας δʼ Ἰόβακχος ἑὸν δέμας, αἰθέρι γείτων
47.658
ἄπτερος ὑψικέλευθος ἀείρετο μείζονι ταρσῷ
47.659
ἱπταμένου Περσῆος ὑπέρτερος, ἑπταπόρῳ δὲ
47.660
αἰθέρι χεῖρα πέλασσε, καὶ ὡμίλησεν Ὀλύμπῳ,
47.661
καὶ νεφέλας ἔθλιψε· φόβῳ δʼ ἐλελίζετο Περσεὺς
47.662
δεξιτερὴν ἀκίχητον ὀπιπεύων Διονύσου
47.663
ἠελίου ψαύουσαν, ἐφαπτομένην δὲ σελήνης.
47.664
ἀλλὰ λιπὼν Διόνυσον ἐμάρνατο θυιάσι Βάκχαις·
47.665
καὶ παλάμῃ δονέων θανατηφόρον ὄμμα Μεδούσης
47.666
λαϊνέην ποίησε κορυσσομένην Ἀριάδνην.
47.667
καὶ πλέον ἔβρεμε Βάκχος ἰδὼν πετρώδεα νύμφην·
47.668
καί νύ κεν Ἄργος ἔπερσε καὶ ἐπρήνιξε Μυκήνας
47.669
καὶ Δαναῶν ἤμησεν ὅλην στίχα, καί νύ κεν αὐτὴν
47.670
μαρναμένην ἄγνωστον ἀνούτατον οὔτασεν Ἥρην
47.671
μάντιος ἀντιτύποιο νόθῃ βροτοειδέι μορφῇ,
47.672
καί νύ κεν ὠκυπέδιλος ὑπὲρ μόρον ἔφθιτο Περσεύς.
47.673
εἰ μή μιν κατόπισθε φανεὶς πτερόεντι πεδίλῳ
47.674
χρυσείης πλοκαμῖδος ἑλὼν ἀνεσείρασεν Ἑρμῆς,
47.675
καί μιν ἀλεξικάκῳ φιλίῳ μειλίξατο μύθῳ·
47.676
Ζηνὸς γνήσιον αἷμα, νόθος ζηλήμονος Ἥρης,
47.677
οἶσθα μέν, ὥς σε σάωσα διιπετέων ἀπὸ πυρσῶν,
47.678
καἰ σε Λάμου ποταμοῖο θυγατράσιν ὤπασα Νύμφαις
47.679
εἰσέτι κουρίζοντα, πάλιν δέ σε χερσὶν ἀείρων
47.680
εἰς δόμον ὑμετέρης, κουροτρόφον ἤγαγον Ἰνοῦς·
47.681
καὶ σὺ τεῷ ῥυτῆρι φέρων χάριν υἱέι Μαίης,
47.682
γνωτέ, μάχην εὔνησον ὁμόγνιον· ἀμφότεροι γὰρ
47.683
Περσεὺς καὶ Διόνυσος ἑνὸς βλάστημα τοκῆος·
47.684
μὴ στρατὸν Ἀργείων, μὴ μέμφεο Περσέος ἅρπην·
47.685
οὐ γὰρ ἑκὼν ἐς Ἄρηα κορύσσεται· ἀλλά μιν Ἥρη
47.686
ὥπλισε, μαντιπόλου δὲ Μελάμποδος εἴδεϊ μορφῆς
47.687
μάρναται ἀμφαδίην· σὺ δὲ χάζεο δῆριν ἐάσας,
47.688
μή σοι ἐπιβρίσειε πάλιν δυσμήχανος Ἥρη.
47.689
ἀλλʼ ἐρέεις ἀλόχοιο τεῆς μόρον· εὐκλέι πότμῳ.
47.690
μαρναμένη τέθνηκε, σὺ δὲ φθιμένην Ἀριάδνην
47.691
ὤφελες ὀλβίζειν, ὅτι τηλίκον εὗρε φονῆα
47.692
οὐρανίης γεγαῶτα καὶ οὐ βροτέης ἀπὸ φύτλης,
47.693
κήτεος ἀμητῆρα καὶ ἱπποτόκοιο Μεδούσης·
47.694
οὐ λίνα Μοιράων ἐπιπείθεται· οὐρανίου γὰρ
47.695
κάτθανεν Ἠλέκτρη Διὸς εὐνέτις, ᾤχετο δʼ αὐτὴ
47.696
τῷ Διὶ νυμφευθεῖσα κασιγνήτη σέο Κάδμου
47.697
Εὐρώπη μετὰ λέκτρον Ὀλύμπιον, ὑμετέρη δὲ
47.698
εἰσέτι γαστρὶ φέρουσα τεὸν τόκον ὤλετο μήτηρ·
47.699
οὐ Σεμέλη πρὸ μόροιο πύλας ἐπέρησεν Ὀλύμπου,
47.700
ἀλλʼ ὅτε πότμον ἔδεκτο. καὶ ὀλλυμένη σέο νύμφη
47.701
ἵξεται ἀστερόφοιτον ἐς οὐρανόν, ἡμετέρης δὲ
47.702
Πλειάδος ἑπταπόροιο φανήσεται ἐγγύθι Μαίης.
47.703
τί πλέον ἤθελεν ἄλλο φιλαίτερον ἢ χθονὶ λάμπειν
47.704
αἰθέρα ναιετάουσα μετὰ Κρήτην Ἀριάδνη;
47.705
ἀλλὰ σὺ κάτθεο θύρσον, ἔα δʼ ἀνέμοισιν Ἐνυώ,
47.706
καὶ βρέτας αὐτοτέλεστον ἐπιχθονίης Ἀριάδνης,
47.707
οὐρανίης στήριξον ὅπῃ βρέτας ἵσταται Ἥρης.
47.708
μὴ πόλιν ἐκπέρσειας, ὅπῃ σέθεν αἷμα τοκήων,
47.709
ὑμετέρης δὲ γέραιρε βοοκραίρου πέδον Ἰοῦς
47.710
εὐνήσας σέο θύρσον· Ἀχαιιάδας δὲ γυναῖκας
47.711
αἰνήσεις μετόπισθεν, ἐπεὶ ταυρώπιδος Ἥρης
47.712
βωμὸν ἀναστήσουσι καὶ εὐθαλάμου σέο νύμφης.
47.713
τοῖον ἔπος κατέλεξε, καὶ ἵππιον Ἄργος ἐάσας
47.714
εἰς πόλον αὖτις ἵκανεν ἐπʼ ἀμφοτέροισι κεράσσας
47.715
θεσμὸν ὁμοφροσύνης καὶ Περσέι καὶ Διονύσῳ.
47.716
οὐδὲ μὲν αὐτόθι μίμνεν ἐπὶ χρόνον Ἀργολὶς Ἥρη·
47.717
ἀλλὰ μεταστρέψασα νόθην βροτοειδέα μορφὴν
47.718
θέσκελον εἶδος ἔχουσα πάλιν νόστησεν Ὀλύμπῳ.
47.719
Ἰναχίῃ δὲ φάλαγγι γέρων ἀγόρευε Μελάμπους
47.720
Λυγκέος ἀρχεγόνοιο θεουδέος αἷμα Πελασγοῦ·
47.721
Μαντιπόλῳ πείθεσθε καὶ οἴνοπι σείσατε Βάκχῳ
47.722
σείσατε χάλκεα ῥόπτρα καὶ Εὔια τύμπανα Ῥείης,
47.723
Ἰναχίην μὴ πᾶσαν ἀιστώσειε γενέθλην,
47.724
μὴ μετὰ νήπια τέκνα καὶ ἡβητῆρας ὀλέσσῃ,
47.725
μὴ τεκέων μετὰ πότμον ἀποκτείνειε γυναῖκας·
47.726
ἀλλὰ θυηπολίην θεοτερπέα ῥέξατε Βάκχῳ
47.727
καὶ Διί, καὶ Περσῆι χορεύσατε καὶ Διονύσῳ.
47.728
ὣς εἰπὼν παρέπεισεν· ἀολλίζοντο δὲ λαοὶ
47.729
Βάκχῳ νυκτιχόρευτον ἀνακρούοντες ἀοιδήν,
47.730
καὶ τελετὰς στήσαντο· θεοκλήτῳ δὲ χορείῃ
47.731
ῥόπτρα μὲν ἐπλατάγησεν, ἐπεκροτέοντο δὲ ταρσοί,
47.732
καὶ δαΐδες σελάγιζον· ὁμηγερέες δὲ πολῖται
47.733
μυστιπόλῳ χρίοντο παρήια λευκάδι γύψῳ·
47.734
τύμπανα δʼ ἐπλατάγησεν, ἀρασσομένοιο δὲ χαλκοῦ
47.735
δίκτυπος ἔβρεμε δοῦπος· ἐφοινίσσοντο δὲ βωμοὶ
47.736
σφαζομένων στοιχηδὸν ἐπασσυτέρων ἀπὸ ταύρων,
47.737
κτείνετο δʼ ἄσπετα μῆλα· καὶ ἀνέρες αἴθοπι βωμῷ
47.738
Βάκχον ἐμειλίξαντο καὶ ἱλάσκοντο γυναῖκες·
47.739
καὶ μέλος ἠερόφοιτον ἐπέκτυπε θῆλυς ἰωὴ
47.740
κῶμον ἀμειβομένη ζωάγριον, Ἰναχίδες δὲ
47.741
μαινάδες ἐρρίψαντο λαθίφρονα λύσσαν ἀήταις.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).