Nonnus of Panopolis
Dionysiaca
Dion 6.113
Choose a text
More by Nonnus of Panopolis
—
Perseus Grc2
6.0
Δίζεο θέσκελον ἕκτον, ὅπῃ Ζαγρῆα γεραίρων γαίης ἕδρανα πάντα κατέκλυσεν ὑέτιος Ζεύς.
6.1
οὐδὲ πατὴρ τότε μοῦνος ἔχεν πόθον· ἀλλὰ καὶ αὐτοὶ
6.2
ἓν βέλος ἶσον ἔχοντες, ὅσοι ναετῆρες Ὀλύμπου,
6.3
Δηῴης ὑμέναιον ἑεδνώσαντο θεαίνης.
6.4
ἔνθα σέλας ῥοδέοιο διαλλάξασα προσώπου
6.5
ἄλγεσι κυμαίνοντα νόον μαστίζετο Δηώ·
6.6
καὶ κεφαλῆς γονόεσσαν ἀπεσφήκωσε καλύπτρην,
6.7
αὐχενίης λύσασα καθειμένα βόστρυχα χαίτης,
6.8
παιδὶ περιφρίσσουσα· βαρυνομένης δὲ θεαίνης
6.9
δάκρυσιν αὐτοχύτοισι καθικμαίνοντο παρειαί,
6.10
ὅττι τόσους μνηστῆρας ἑνὶ φλογόεντι βελέμνῳ
6.11
εἰς ἔριν οἰστρηθέντας ὁμοζήλων ὑμεναίων
6.12
ξυνὸς Ἔρως βάκχευεν, ἁμιλλητῆρας Ἐρώτων·
6.13
πάντας μὲν τρομέεσκε, τὸ δὲ πλέον ὄμπνια μήτηρ
6.14
παιδὸς ἔχειν Ἥφαιστον ἐδείδιε χωλὸν ἀκοίτην.
6.15
καὶ δόμον Ἀστραίοιο μετέστιχεν εὔποδι ταρσῷ,
6.16
δαίμονος ὀμφήεντος· ὀπισθοπόρων δὲ κομάων
6.17
ἄπλοκον ἀσταθέεσσιν ἐσείετο βόστρυχον αὔραις.
6.18
τὴν μὲν ἰδὼν ἤγγειλεν Ἑωσφόρος· εἰσαΐων δὲ
6.19
ὦρτο γέρων Ἀστραῖος· ὁ μὲν γραμμῇσι χαράσσων
6.20
κυανέην ἐνέπασσε κόνιν περὶ νῶτα τραπέζης,
6.21
καὶ τυπόων ἑλικηδὸν ὑπʼ ἀγκυλόδοντι σιδήρῳ
6.22
πυθμένα τετράπλευρον ἐπέγραφεν αἴθοπι τέφρῃ,
6.23
καὶ τύπον ἄλλον ἔτευξεν ἰσογλώχινι τριγώνῳ.
6.24
ἀλλὰ τὰ μὲν μεθέηκε καὶ ἤλυθεν ἄγχι θυράων
6.25
ἀντιόων Δήμητρι· διεσσυμένων δὲ μελάθρου
6.26
ἕσπερος ἡγεμόνευε, καὶ εἰς θρόνον ἵδρυε Δηὼ
6.27
πατρὸς ἑοῦ παρὰ θῶκον· ὁμοστόργῳ δὲ μενοινῇ
6.28
νεκταρέου κεράσαντες ἀπὸ κρητῆρος Ἀῆται
6.29
δαίμονα λυσιπόνοισιν ἐδεικανόωντο κυπέλλοις
6.30
υἱέες Ἀστραίοιο· πιεῖν δʼ ἠρνήσατο Δηὼ
6.31
Περσεφόνης μεθύουσα μεληδόνι· μουνοτόκοι γὰρ
6.32
τηλυγέτους διὰ παῖδας ἀεὶ τρομέουσι τοκῆες·
6.33
ἀλλὰ μόγις παρέπεισεν ἀναινομένην ἔτι Δηὼ
6.34
ἡδυεπὴς Ἀστραῖος ἔχων θελξίφρονα Πειθώ.
6.35
ἔνθα γέρων μέγα δεῖπνον ἐπήρτυεν, ὄφρα μερίμνας
6.36
θυμοδακεῖς Δήμητρος ἀποσκεδάσειε τραπέζῃ.
6.37
καὶ πίσυρες λαγόνεσσι καθαψάμενοι τελαμῶνας
6.38
πατρὸς ὑποδρηστῆρες ἐμιτρώθησαν Ἀῆται·
6.39
νεκταρέῳ δὲ κύπελλα παρὰ κρητῆρι τιταίνων
6.40
εὖρος ἐῳνοχόει, προχόῳ δʼ ἐπιδόρπιον ὕδωρ
6.41
εἶχε Νότος, Βορέης δὲ φέρων ἐπέθηκε τραπέζῃ
6.42
ἀμβροσίην, Ζέφυρος δὲ περιθλίβων θρόον αὐλοῦ
6.43
εἰαρινοῖς δονάκεσσι μελίζετο θῆλυς Ἀήτης·
6.44
καὶ στεφάνους ἔπλεξεν Ἑωσφόρος ἄνθεα δήσας
6.45
ὀρθρινοῖς κομόωντα δροσιζομένοισι κορύμβοις·
6.46
καὶ νυχίου λαμπτῆρος ἐθήμονα πυρσὸν ἀείρας
6.47
ἕσπερος ὀρχηστῆρι ποδῶν ἐλελίζετο ταρσῷ
6.48
πάλλων καμπύλον ἴχνος, ἐπεὶ πέλε πομπὸς Ἐρώτων,
6.49
καὶ σκαρθμῷ μεμέλητο χοροπλεκέων ὑμεναίων.
6.50
ἀλλʼ ὅτε δὴ μετὰ δαῖτα θεὰ κεκόρητο χορείης
6.51
σεισαμένη βαρὺ κέντρον ἀμερσινόοιο μερίμνης,
6.52
μαντοσύνην ἐρέεινε, φιλοστόργου δὲ γεραιοῦ
6.53
λαιῇ μὲν παλάμῃ γονάτων θίγε, λισσομένη δὲ
6.54
δεξιτερῇ ψαύεσκε βαθυσμήριγγος ὑπήνης·
6.55
καὶ πολέας μνηστῆρας ἑῆς μυθήσατο κούρης
6.56
θέσφατα μαστεύουσα παρήγορα· μαντοσύναι γὰρ
6.57
ἐλπίσιν ἐσσομένῃσιν ὑποκλέπτουσιν ἀνίας.
6.58
οὐδὲ γέρων Ἀστραῖος ἀναίνετο· μουνοτόκου δὲ
6.59
κούρης ἀρτιλόχευτα γενέθλια μέτρα νοήσας
6.60
καὶ χρόνον οὐ πταίοντα καὶ ἀπλανέος δρόμον Ὥρης
6.61
ἀρχεγόνου, κάμψας δὲ μετάτροπα δάκτυλα χειρῶν
6.62
ἀμφὶ παλιννόστοιο μετήλυδα κύκλον ἀριθμοῦ
6.63
ἐκ παλάμης παλάμῃ διεμέτρεε δίζυγι παλμῷ·
6.64
καί οἱ κεκλομένῳ θεράπων εὔκυκλον ἀείρας
6.65
σφαῖραν ἑλισσομένην, τύπον αἰθέρος, εἰκόνα κόσμου,
6.66
Ἀστερίων παρέθηκε λαβὼν ἐπὶ πώματι χηλοῦ.
6.67
ἔνθα γέρων πεπόνητο, καὶ ἄξονος ἄκρον ἑλίσσων
6.68
ζῳδιακὸν περὶ κύκλον ἑὴν ἐτίταινεν ὀπωπὴν
6.69
λεύσσων ἔνθα καὶ ἔνθα καὶ ἀπλανέας καὶ ἀλήτας·
6.70
καὶ πόλον ἀμφελέλιζε· πολυστροφάλιγγι δὲ ῥιπῇ
6.71
εἰς δρόμον ἀστήρικτον ἀτέρμονι κάμπτετο νύσσῃ
6.72
ἄστρασι ποιητοῖσι νόθος κυκλούμενος αἰθήρ,
6.73
ἄξονι μεσσατίῳ τετορημένος· εὗρε δὲ δαίμων
6.74
σφαῖραν ἰδὼν στεφανηδόν, ὅτι πλήθοντι προσώπῳ
6.75
ἀγκύλα συνδέσμοιο διέτρεχε νῶτα Σελήνη,
6.76
καὶ Φαέθων ἰσόμοιρος ἔην ἀντώπιδι Μήνῃ
6.77
κέντρῳ ὑποχθονίῳ πεφορημένος, ἀχλυόεις δὲ
6.78
κῶνος ἀερσιπότητος ἀπὸ χθονὸς ὀξὺς ἀνέρπων
6.79
ἀντίτυπον Φαέθοντος ὅλην ἐκάλυψε Σελήνην·
6.80
καὶ γαμίης φιλότητος ἁμιλλητῆρας ἀκούων
6.81
Ἄρεα δίζετο μᾶλλον, ὑπὲρ δυτικοῦ δὲ μελάθρου
6.82
φῶρα γάμων ἐνόησε σὺν ἀστέρι Κυπρογενείης
6.83
ἑσπερίῳ· καὶ κλῆρον ἐπώνυμον εὗρε τοκήων
6.84
παρθενικῆς ἀστραῖον ὑπὸ στάχυν· ἀμφὶ δʼ ἄρʼ αὐτῷ
6.85
ὀμβροτόκου Κρονίδαο Φαεσφόρος ἔτρεχεν ἀστήρ.
6.86
ἀλλʼ ὅτε πάντα νόησεν ἀριθμήσας ἴτυν ἄστρων,
6.87
σφαῖραν ἀειδίνητον ἀνέκρυφε κοιλάδι κίστῃ,
6.88
σφαῖραν ποικιλόνωτον· ἀνειρομένῃ δὲ θεαίνῃ
6.89
τριπλόον ὀμφαίης ἀνερεύγετο θέσφατον ἠχοῦς·
6.90
Δημῆτερ φιλότεκνος, ὑπὸ σκιοειδέι κώνῳ
6.91
κλεπτομένης ἀκτῖνος ἀφωτίστοιο Σελήνης
6.92
νυμφίον ἁρπακτῆρα φυλάσσεο Περσεφονείης
6.93
κρυπτὸν ἀσυλήτοιο τεῆς ληίστορα κούρης,
6.94
εἰ λίνα Μοιράων ἐπιπείθεται· ἀπροϊδῆ δὲ
6.95
ἀθρήσεις πρὸ γάμοιο νόθον λαθραῖον ἀκοίτην
6.96
θηρομιγῆ δολόμητιν, ἐπεὶ δυτικῷ παρὰ κέντρῳ
6.97
σὺν Παφίῃ στείχοντα γαμοκλόπον Ἄρεα λεύσσω,
6.98
ἀμφοτέροις δὲ Δράκοντα παραντέλλοντα δοκεύω.
6.99
ὀλβίστην ἐνέπω σε· σὺ γὰρ τετράζυγι κόσμῳ
6.100
ἔσσεαι ἀγλαόκαρπος, ὅτι χθονὶ καρπὸν ὀπάσσεις
6.101
ἀτρυγέτῳ· κούρης γὰρ ὑπὲρ κλήροιο τοκήων
6.102
παρθένος Ἀστραίη σταχυώδεα χεῖρα τιταίνει.
6.103
ὣς φάμενος μαντῷον ὑπὸ στόμα κοίμισεν ὀμφήν.
6.104
ἀλλʼ ὅτε Δημήτηρ δρεπανηφόρος ἐλπίδα καρπῶν
6.105
ἐσσομένων ἤκουσε καὶ αὐτοκέλευστον ἀκοίτην
6.106
τηλυγέτης ἀδμῆτος ἀνέγγυον ἅρπαγα κούρης,
6.107
ἔστενε μειδιόωσα· διʼ ὑψιπόρου δὲ κελεύθου
6.108
οἶκον εὸν σπεύδουσα κατηφέι δύσατο ταρσῷ
6.109
καὶ ζυγὸν εὐδίνητον ἐχιδναίῃ παρὰ φάτνῃ
6.110
ἀμφιταλαντεύσασα λόφῳ διδυμάονι θηρῶν
6.111
ἄζυγας ἑρπηστῆρας ἐπεσφήκωσε λεπάδνῳ·
6.112
καὶ γένυν ἀγκυλόδοντι περισφίγγουσα χαλινῷ
6.113
ξανθοφυὴς βλοσυροῖο διʼ ἅρματος ἤγαγε Δηὼ
6.114
παῖδα καλυπτομένην νεφέλης κυανάμπυκι μίτρῃ,
6.115
καὶ κτύπον ἀντικέλευθον ἐπιβρομέοντος ἀπήνῃ
6.116
θηρονόμῳ μάστιγι κατερροίζησε Βορῆος,
6.117
ἠερίης ἱππηδὸν ἐπεσσυμένων δρόμον αὔρης
6.118
ἀσταθέων πτερὰ κοῦφα περιστέλλουσα δρακόντων
6.119
ἀμφὶ κέρας Λιβυκοῖο παλίσσυτον Ὠκεανοῖο.
6.120
Δικταίης δʼ ἀίουσα μέλος κορυθαιόλον ἠχοῦς
6.121
Κρῆτα χορὸν παράμειβε βαρυσμαράγοιο βοείης
6.122
νῶτα περισκαίροντα κυβιστητῆρι σιδήρῳ.
6.123
καί τινα λάινον οἶκον ἐποπτεύουσα θεαίνη
6.124
Σικελίης τριλόφοιο Πελωρίδα δύσατο πέτρην
6.125
Ἀδριάδας παρὰ θῖνας, ὅπῃ χύσις ἄστατος ἅλμης
6.126
εἰς δύσιν ἑλκομένη περικάμπτεται εἴκελος ἅρπῃ,
6.127
εἰς Λίβα πομπεύουσα Βορειόθεν ἀγκύλον ὕδωρ·
6.128
καί, Κυανῆν ὅθι πυκνὰ ῥόος χυτλώσατο κούρην
6.129
κρηναίῳ στροφάλιγγι χέων ὀπτήριον ὕδωρ,
6.130
γείτονα κόλπον ὄπωπεν ἰσοσταθέοντα μελάθρῳ,
6.131
λαϊνέης ὀρόφοιο περιστεφθέντα καλύπτρῃ,
6.132
ὃν φύσις ἐθρίγκωσε χαραδραίῳ πυλεῶνι
6.133
λάινον ἱστὸν ἔχοντα μεμηλότα γείτοσι Νύμφαις.
6.134
καὶ θεὸς ὀρφναίοιο διερπύζουσα μελάθρου
6.135
παῖδα πολυσφρήγιστον ἐνέκρυφε φωλάδι πέτρῃ·
6.136
λυσαμένη δὲ δράκοντας ἐυπτερύγων ἀπὸ δίφρων
6.137
τὸν μὲν δεξιτεροῖο παρὰ πρηῶνα θυρέτρου,
6.138
τὸν δὲ λιθογλώχινα πύλης παρὰ λαιὸν ὀχῆα
6.139
στῆσεν ἀθηήτοιο φυλάκτορα Περσεφονείης·
6.140
κεῖθι δὲ Καλλιγένειαν, ἑὴν εὔπαιδα τιθήνην,
6.141
κάλλιπε σὺν ταλάροισι, καὶ ὁππόσα θήλεϊ φύτλῃ
6.142
Παλλάδος εὐπαλάμοιο νέμει ταλασήιος ἱδρώς·
6.143
καὶ ποσὶν ἠέρα τέμνεν, ἐρημονόμοις δὲ φυλάξαι
6.144
καμπύλα πετραίῃσιν ἐπέτρεπεν ἅρματα Νύμφαις.
6.145
ἀμφὶ δὲ καρχαρόδοντα γένυν πεπόνητο σιδήρου
6.146
εἰροκόμῳ ξαίνουσα περὶ κτενὶ λήνεα κούρη,
6.147
ἠλακάτῃ δʼ ἐνέλισσε· πολυστροφάδεσσι δὲ ῥιπαῖς
6.148
εἰλυφόων ἄτρακτος ἕλιξ βητάρμονι παλμῷ
6.149
νηθομένων ἐχόρευε μίτων κυκλούμενος ὁλκῷ·
6.150
καὶ ποσὶ φοιταλέοισι παλίνδρομος ἄκρον ἀπʼ ἄκρου
6.151
πρωτοπαγῆ ποίησε διάσματα, φάρεος ἀρχήν,
6.152
ἱστῷ δʼ ἀμφὶς ἕλισσεν· ὕφαινε δὲ κερκίδι κούρη
6.153
πηνίον ἐξέλκουσα παρὲκ μίτον, ἀμφὶ δὲ πέπλῳ
6.154
γνωτὴν ἰστοτέλειαν ἑὴν ἐλίγαινεν Ἀθήνην.
6.155
παρθένε Περσεφόνεια, σὺ δʼ οὐ γάμον εὗρες ἀλύξαι,
6.156
ἀλλὰ δρακοντείοισιν ἐνυμφεύθης ὑμεναίοις,
6.157
Ζεὺς ὅτε πουλυέλικτος ἀμειβομένοιο προσώπου
6.158
νυμφίος ἱμερόεντι δράκων κυκλούμενος ὁλκῷ
6.159
εἰς μυχὸν ὀρφναίοιο διέστιχε παρθενεῶνος,
6.160
σείων δαυλὰ γένεια· παρισταμένων δὲ θυρέτρῳ
6.161
εὔνασεν ἰσοτύπων πεφορημένος ὄμμα δρακόντων
6.162
καὶ γαμίαις γενύεσσι δέμας λιχμάζετο κούρης
6.164
μείλιχος. αἰθερίων δὲ δρακοντείων ὑμεναίων
6.163
Περσεφόνης γονόεντι τόκῳ κυμαίνετο γαστήρ,
6.165
Ζαγρέα γειναμένη, κερόεν βρέφος, ὃς Διὸς ἕδρης
6.166
μοῦνος ἐπουρανίης ἐπεβήσατο, χειρὶ δὲ βαιῇ
6.167
ἀστεροπὴν ἐλέλιζε νεηγενέος δὲ φορῆος
6.168
νηπιάχοις παλάμῃσιν ἐλαφρίζοντο κεραυνοί.
6.169
οὐδὲ Διὸς θρόνον εἶχεν ἐπὶ χρόνον· ἀλλά ἑ γύψῳ
6.170
κερδαλέῃ χρισθέντες ἐπίκλοπα κύκλα προσώπου
6.171
δαίμονος ἀστόργοιο χόλῳ βαρυμήνιος Ἥρης
6.172
Ταρταρίῃ Τιτῆνες ἐδηλήσαντο μαχαίρῃ
6.173
ἀντιτύπῳ νόθον εἶδος ὀπιπεύοντα κατόπτρῳ.
6.174
ἔνθα διχαζομένων μελέων Τιτῆνι σιδήρῳ
6.175
τέρμα βίου Διόνυσος ἔχων παλινάγρετον ἀρχὴν
6.176
ἀλλοφυὴς μορφοῦτο πολυσπερὲς εἶδος ἀμείβων,
6.177
πῇ μὲν ἅτε Κρονίδης δόλιος νέος αἰγίδα σείων,
6.178
πῇ δὲ γέρων βαρύγουνος ἅτε Κρόνος ὄμβρον ἰάλλων·
6.179
ἄλλοτε ποικιλόμορφον ἔην βρέφος, ἄλλοτε κούρῳ
6.180
εἴκελος οἰστρηθέντι, νέον δέ οἱ ἄνθος ἰούλων
6.181
ἀκροκελαινιόωντα κατέγραφε κύκλα προσώπου·
6.182
πῇ δὲ χόλῳ δασπλῆτι λέων μιμηλὸς ἰάλλων
6.183
φρικαλέον βρύχημα σεσηρότι μαίνετο λαιμῷ,
6.184
ὀρθώσας πυκινῇσι κατάσκιον αὐχένα χαίταις,
6.185
ἀμφελελιζομένης λασιότριχος ὑψόθι νώτου
6.186
αὐτομάτῃ μάστιγι περιστίζων δέμας οὐρῆς·
6.187
ἔνθα λεοντείοιο λιπὼν ἴνδαλμα προσώπου
6.188
ὑψιλόφῳ χρεμετισμὸν ὁμοίιον ἔβρεμεν ἵππῳ
6.189
ἄζυγι, γαῦρον ὀδόντα μετοχμάζοντι χαλινοῦ,
6.190
καὶ πολιῷ λεύκαινε περιτρίβων γένυν ἀφρῷ·
6.191
ἄλλοτε ῥοιζήεντα χέων συριγμὸν ὑπήνης
6.192
ἀμφιλαφὴς φολίδεσσι δράκων ἐλέλικτο κεράστης,
6.193
γλῶσσαν ἔχων προβλῆτα κεχηνότος ἀνθερεῶνος,
6.194
καὶ βλοσυρῷ Τιτῆνος ἐπεσκίρτησε καρήνῳ
6.195
ὁρμὸν ἐχιδνήεντα περίπλοκον αὐχένι δήσας·
6.196
καὶ δέμας ἑρπηστῆρος ἀειδίνητον ἐάσας
6.197
τίγρις ἔην, στίξας δέμας αἰόλον· ἄλλοτε ταύρῳ
6.198
ἰσοφυής, στομάτων δὲ νόθον μυκηθμὸν ἰάλλων
6.199
θηγαλέῃ Τιτῆνας ἀνεστυφέλιξε κεραίῃ.
6.200
καὶ ψυχῆς προμάχιζεν, ἕως ζηλήμονι λαιμῷ
6.201
τρηχαλέον μύκημα διʼ ἠέρος ἔβρεμεν Ἥρη,
6.202
μητρυιὴ βαρύμηνις, ἰσοφθόγγῳ δὲ θεαίνῃ
6.203
αἰθέριον κελάδημα πύλαι κανάχιζον Ὀλύμπου,
6.204
καὶ θρασὺς ὤκλασε ταῦρος· ἀμοιβαίῃ δὲ φονῆες
6.205
ταυροφυῆ Διόνυσον ἐμιστύλλοντο μαχαίρῃ.
6.206
Ζεὺς δὲ πατήρ, προτέροιο δαϊζομένου Διονύσου
6.207
γινώσκων σκιόεντα τύπον δοδίοιο κατόπτρου,
6.208
μητέρα Τιτήνων ἐλάσας ποινήτορι πυρσῷ
6.209
Ζαγρέος εὐκεράοιο κατεκλήισσε φονῆας
6.210
Ταρταρίῳ πυλεῶνι· καὶ αἰθομένων ἀπὸ δένδρων
6.211
θερμὰ βαρυνομένης ἐμαραίνετο βόστρυχα γαίης.
6.212
ἀντολίην δʼ ἔφλεξε καὶ αἰθαλόεντι βελέμνῳ
6.213
αἴθετο Βάκτριον οὖδας ἑώιον, ἀγχιπόροις δὲ
6.214
κύμασιν Ἀσσυρίοισιν ἐδαίετο Κάσπιον ὕδωρ,
6.215
Ἰνδῷοί τε τένοντες· Ἐρυθραίοιο δὲ κόλπου
6.216
ἔμπυρα κυμαίνοντος Ἄραψ θερμαίνετο Νηρεύς.
6.217
καὶ δύσιν ἀντικέλευθον ἑῷ πρήνιξε κεραυνῷ
6.218
Ζεὺς πυρόεις φιλότεκνος· ὑπὸ Ζεφύροιο δὲ ταρσῷ
6.219
ἡμιδαὴς σέδας ὑγρὸν ἀπέπτυεν ἑσπερὶς ἅλμη,
6.220
Ἀρκτῷοί τε τένοντες· ὁμοφλεγέος δὲ καὶ αὐτῆς
6.221
πηγνυμένης πάφλαζε Βορήια νῶτα θαλάσσης·
6.222
καὶ Νοτίου νιφόεσσαν ὑπὸ κλίσιν Αἰγοκερῆος
6.223
θερμοτέρῳ σπινθῆρι μεσημβρινὸς ἔζεεν ἀγκών.
6.224
καὶ διεροῖς βλεφάροις ποταμήια δάκρυα λείβων
6.225
Ὠκεανὸς λιτάνευε χέων ἱκετήσιον ὕδωρ·
6.226
Ζεὺς δὲ χόλον πρήυνε, μαραινομένην δὲ καραυνῷ
6.227
γαῖαν ἰδὼν ἐλέαιρε, καὶ ἤθελεν ὕδατι νίψαι
6.228
λύματα τεφρήεντα καὶ ἔμπυρον ἕλκος ἀρούρης.
6.229
καὶ τότε γαῖαν ἅπασαν ἐπέκλυσεν ὑέτιος Ζεὺς
6.230
πυκνώσας νεφέεσσιν ὅλον πόλον, οὐρανίη δὲ
6.231
βρονταίοις πατάγοισι Διὸς μυκήσατο σάλπιγξ,
6.232
ἀστέρες ὁππότε πάντες ἐνὶ σφετέροισι μελάθροις
6.233
κεκριμένοι δρόμον εἶχον, ἐπεὶ τετράζυγι δίφρῳ
6.234
ἠέλιος σελάγιζε λεοντείων ἐπὶ νώτων
6.235
ἱππεύων ἑὸν οἶκον· ἐπιτροχόωσα δὲ δίφρῳ
6.236
καρκίνον ὀκταπόδην τριφυὴς κυκλοῦτο Σελήνη,
6.237
καὶ δροσερὴν ὑπὸ πέζαν ἰσημερίῳ παρὰ κύκλῳ
6.238
Κύπρις ἀπὸ Κριοῖο μεταστήσασα κεραίης
6.239
εἰαρινὸν δόμον εἶχεν, ἀχείμονα Ταῦρον Ὀλύμπου,
6.240
γείτων δʼ Ἠελίοιο προάγγελον Ἱστοβοῆος
6.241
σκορπίον εἶχεν Ἄρης, μιτρούενον αἴθοπι Ταύρῳ,
6.242
δόχμιος ἀντικέλευθον ὀπιπεύων Ἀφροδίτην,
6.243
καὶ τελέων λυκάβαντα δυωδεκάμηνος ὁδίτης
6.244
ἰχθύας ἀστερόεντας ἐπέτρεχεν ἀκρόνυχος Ζεύς,
6.245
δεξιτερὴν τρίπλευρον ἔχων ἑλικώδεα Μήνην,
6.246
καὶ Κρόνος ὄμβρια νῶτα διέστιχεν Αἰγοκερῆος
6.247
φέγγεϊ παχνήεντι διάβροχος, ἀμφὶ δὲ φαιδρῇ
6.248
παρθενικῇ πτερύγεσσιν ἔην ὑψούμενος Ἑρμῆς,
6.249
ὅττι Δίκην δόμον εἶχε δικασπόλος. ἑπταπόρου δὲ
6.250
αἰθέρος ὑδατόεντες ἀνωίχθησαν ὀχῆες
6.251
Ζηνὸς ἐπομβρήσαντος· ἐριφλοίσβοιο δὲ κόλπου
6.252
κρουνοῖς πλειοτέροισιν ἐμυκήσαντο χαράδραι,
6.253
ὑδρηλαὶ δὲ θύγατρες ἀποσπάδες Ὠκεανοῖο
6.254
λίμναι ἐκουφίζοντο, καὶ ἠέρι νέρτερον ὕδωρ
6.255
κρουνοὶ ἀκοντιστῆρες ἀνέβλυον Ὠκεανοῖο,
6.256
καὶ σκοπιαὶ ῥαθάμιζον, ὀρεσσιχύτῳ δὲ ῥεέθρῳ
6.257
δοψαλέαι ποταμηδὸν ἐμορμύροντο κολῶναι·
6.258
ὑψώθη δὲ θάλασσα, καὶ εἰς ὄρος ὑψόθι λόχμης
6.259
Νηρεΐδες γεγάασιν Ὀρειάδες. ἆ μέγα δειλή,
6.260
χερσὶν ἀπειρήτοισιν ἐνήχετο παρθένος Ἠχὼ
6.261
ἀρχαίης φόβον ἄλλον ἀμειβομένη περὶ μίτρης,
6.262
μή ποτε Πᾶνα φυγοῦσα Ποσειδάωνι μιγείη.
6.263
ποντοπόροι δὲ λέοντες ἀήθεος ἔνδοθι πέτρης
6.264
χερσαίων ἐχόρευον ἐνὶ σπήλυγγι λεόντων
6.265
μυδαλέοις μελέεσσι· χαραδραίῳ δʼ ἐνὶ κόλπῳ
6.266
εἰναλίῳ δελφῖνι συνήντετο κάπρος ἀλήτης·
6.267
καὶ ξυνοῖς ῥοθίοισιν ὀρεσσιχύτου νιφετοῖο
6.268
θῆρες ἐναυτίλλοντο σὺν ἰχθύσιν· εἱλικόεις δὲ
6.269
πούλυπος οὐρεσίφοιτος ἐπεσκίρτησε λαγωῷ.
6.270
καὶ διεροὶ Τρίτωνες ὑπὸ σφυρὰ φωλάδος ὕλης
6.271
ἔγχλοον αἰθύσσοντες ἐπʼ ἐξύι δίπτυχον οὐρὴν
6.272
Πανὸς ὀρεσσαύλοισιν ἐνεκρύπτοντο μελάθροις,
6.273
σύμπλοον ἠερίοισιν ἐπτιρέψαντες ἀήταις
6.274
στικτὴν ἠθάδα κόχλον· ἐν εὐύδρῳ δὲ κολώνῃ
6.275
Πανὶ φιλοσκοπέλῳ μετανάστιος ἤντετο Νηρεύς,
6.277
καὶ ναέτης πετραῖος ὄρος μετὰ πόντον ἀμείβων
6.276
μυδαλέην σύριγγα διαπλώουσαν ἐάσσας· 276 placed after 277 by Marcellus. ἐάσσας MSS. and edd., ἐλάσσας Ludwich.
6.278
ἰκμαλέον σπέος εἶχεν ὑπωροφίης δόμον Ἠχοῦς.
6.279
καὶ διερῷ τότε φῶτες ἀνοιδαίνοντες ὀλέθρῳ
6.280
ὕδασι τυμβεύοντο, πολὺς δέ τις ἄλλος ἐπʼ ἄλλῳ
6.281
πλώετο κυματόεντι νέκυς πεφορημένος ὁλκῷ·
6.282
καὶ νιφετῷ κελάδοντι κεχηνότος ἀνθερεῶνος
6.283
χανδὸν ἀπὸ σκοπέλοιο πιὼν ὀρεσίδρομον ὕδωρ
6.284
πῖπτε λέων, πέσε κάπρος. ὁμοζεύκτῳ δὲ ῥεέθρῳ
6.285
λίμναι ὁμοῦ ποταμοῖσι, Διὸς ῥόος, ὕδατα πόντου
6.286
ἀλλήλοις κεκέραστο, καὶ εἰν ἑνὶ τέσσαρες αὖραι
6.287
συμμιγέων ἀνέμων ἐπεμάστιον ἄκριτον ὕδωρ.
6.288
καὶ διερὴν χθόνα πᾶσαν ἰδὼν ὑπὸ μείζονι παλμῷ
6.289
μοῦνον ἀπειλητῆρι τινασσομένην Διὸς ὄμβρῳ
6.290
πόντιος ἐννοσίγαιος ἑὴν ἔρριψεν ἀκωκὴν
6.291
ἀσχαλόων, τίνα γαῖαν ἀνοχλίσσειε τριαίνῃ.
6.292
Νηρεΐδων δὲ φάλαγγες ἐπέπλεον ἄβροχον Ludwich later restored ἄβροχον from LΩ. ὕδωρ·
6.293
καὶ χλοερῆς Θέτιν εἶχεν ἐπʼ ἰξύος ὑγρὸς ὁδίτης,
6.294
τρίτων εὐρυγένειος, ἐπʼ ἰχθυόεντι δὲ νώτῳ
6.295
πομπίλον ἡνιόχευεν ἐν ἠέρι φοιτὰς Ἀγαύη,
6.296
καὶ λόφον ὑδατόεντι φέρων κυκλούμενον ὁλκῷ,
6.297
Δωρίδα κουφίζων, μετανάστιος ἔτρεχε δελφίς.
6.298
καὶ βυθίη φάλλαινα περισκαίρουσα κολώναις
6.299
πλάζετο, μαστεύουσα χαμευνάδος ἄντρα λεαίνης.
6.300
καὶ τότε κυματόεσσαν ἰδὼν ὑπὸ γείτονα πέτρην
6.301
νηχομένην Γαλάτειαν ἀνίαχε μυδαλέος Πάν·
6.302
Πῇ φέρεαι, Γαλάτεια, διʼ οὔρεος ἀντὶ θαλάσσης;
6.303
μὴ τάχα μαστεύεις ἐρατὴν Κύκλωπος ἀοιδήν;
6.304
πρὸς Παφίης λίτομαί σε καὶ ὑμετέρου Πολυφήμου,
6.305
μὴ κρύψῃς δεδαυῖα βαρὺν πόθον, εἰ παρὰ πέτραις
6.306
νηχομένην ἐνόησας ἐμὴν ὀρεσίδρομον Ἠχώ.
6.307
ἦ ῥά σοι ἶσον ἔχει διεπὸν δρόμον; ἦ ῥα καὶ αὐτὴ
6.308
ἑζοθένη δελφῖνι θαλασσαίης Ἀφροδίτης,
6.309
ὡς Θέτις ἀκρήδεμνος, ἐμὴ ναυτίλλεται Ἠχώ;
6.310
δείδια, μή μιν ὄρινε δυσάντεα κύματα πόντου·
6.311
δείδια, μή μιν ἔκευθε μέγας ῥόος· ὣς ἄρα δειλὴ
6.312
ἄστατος ἐν πελάγεσσι μετʼ οὔρεα κύματα βαίνει·
6.313
ἥ ποτε πετρήεσσα φανήσεται ὑδριὰς Ἠχώ.
6.314
ἀλλὰ τεὸν Πολύφημον ἔα βραδύν· ἢν ἐθελήσῃς,
6.315
αὐτὸς ἐμοῖς ὤμοισιν ἀερτάζων σε σαώσω·
6.316
οὔ με κατακλύζει κελάδων ῥόος· ἢν ἐθελήσω,
6.317
ἴχνεσιν αἰγείοισιν ἐλεύσομαι εἰς πόλον ἄστρων.
6.318
ὥς φαμένῳ Γαλάτεια τόσην ἀντίαχε φωνήν·
6.319
Πὰν φίλε, σὴν ἀνάειρε διʼ οἴδματος ἄπλοον Ἠχώ·
6.320
μή με μάτην ἐρέεινε, τί σήμερον ἐνθάδε βαίνω·
6.321
ἄλλον ἐμοὶ πλόον εὗρεν ὑπέρτερον ὑέτιος Ζεύς.
6.322
καὶ γλυκερήν περ ἐοῦσαν ἔα Κύκλωπος ἀοιδήν.
6.323
οὐκέτι μαστεύω Σικελὴν ἅλα· τοσσατίου γὰρ
6.324
τάρβος ἔχω νιφετοῖο καὶ οὐκ ἀλέγω Πολυφήμου.
6.325
εἶπε, καὶ ὑγροπόροιο παρήλυθε Πανὸς ἐναύλους.
6.326
πυκνά δὲ κυμαίνοντος ἀμαιμακέτου νιφετοῖο
6.327
πᾶσα πόλις, πᾶς δῆμος ἔην ῥόος· οὐδέ τις ἀγκὼν
6.328
ἄβροχος ἦν, οὐ γυμνὸς ἔην λόφος, οὐ ῥίον Ὄσσης,
6.329
οὐ τότε Πήλιον ἄκρον· ὑπὸ τριλόφῳ δὲ κολώνῃ
6.330
Τυρσηνὸς κελάδησεν· ἱμασσομένοιο δὲ πόντου
6.331
Ἀδριάδες Σικελοῖσιν ἐρόχθεον ὕδασι πέτραι
6.332
ὀμβρηροῖς ῥοθίοισιν. ἐν ἠερίῃ δὲ κελεύθῳ
6.333
μαρμαρυγαὶ Φαέθοντος ἐθηλύνοντο ῥεέθροις·
6.334
ζώνῃ δʼ ἑβδομάτῃ χθαμαλῆς ὑπὲρ ἄντυγα πέζης
6.335
κύμασιν ἠλιβάτοισι σέλας ψύξασα Σελήνη
6.336
μυδαλέων ἀνέκοψε λελουμένον αὐχένα ταύρων·
6.337
ἀστραίῃ δὲ φάλαγγι μεμιγμένον ὄμβριον ὕδωρ
6.338
λευκοτέρην ποίησε Γαλαξαίην ἴτυν ἀφρῷ.
6.339
καὶ ῥοθίῳ γονόεντι χέων ἑπτάστομον ὕδωρ
6.340
Ἀλφειῷ δυσέρωτι συνήντετο Νεῖλος ἀλήτης,
6.341
ὧν ὁ μὲν εὐκάρποιο διʼ αὔλακος ἤθελεν ἕρπειν
6.342
τέρπων ἰκμαλέοισι φιλήμασι διψάδα νύμφην,
6.343
ὅς δὲ παραΐξας προτέρην ὁδὸν ἠθάδος ἄγρης
6.344
ἀχνύμενος πεφόρητο· συνερπύζοντα δὲ λεύσσων
6.345
Πύραμον ἱμερόεντα τόσην ἀνενείκατο φωνήν·
6.346
Νεῖλε, τί κεν ῥέξαιμι καλυπτομένης Ἀρεθούσης;
6.347
Πύραμε, τί σπεύδεις; τίνι κάλλιπες ἠθάδα Θίσβην;
6.348
ὄλβιος Εὐφρήτης, ὅτι μὴ λάχε κέντρον Ἐρώτων.
6.349
ζῆλον ἔχω καὶ δεῖμα μεμιγμένον· ὑδατόεις γὰρ
6.350
ἱμερτῇ παρίαυε τάχα Κρονίδης Ἀρεθούσῃ·
6.351
δείδια, μὴ προχοῇσι τεὴν νυμφεύσατο Θίσβην.
6.352
Πύραμος, Ἀλφειοῖο παραίφασις, ἡμέας ἄμφω
6.353
οὐ Διὸς ὄμβρος ὄρινεν, ὅσον βέλος ἀφρογενείης.
6.354
ἕσπεό μοι φιλέοντι, Φαέθοντι MSS., χατέοντι Ludwich, others φιλεοντι, φλεγέθοντι, etc. Συρηκοσίης δʼ Ἀρεθούσης
6.355
ἴχνια μαστεύσω, σὺ δέ, Πύραμε, δίζεο Θίσβην.
6.356
ἀλλʼ ἐρέεις, ὅτι γαῖα τινάσσεται, ὅττι χαλέπτει
6.357
οὐρανός, ὅττι θάλασσα βιάζεται, ὅττι καὶ αὐτὸς
6.358
ἄπλοος ἀφριόωντι ῥόῳ κυμαίνεται αἰθήρ·
6.359
οὐκ ἀλέγω νιφετοῖο μεμηνότος. ἆ μέγα θαῦμα·
6.360
αἰθομένην Διὸς ὄμβρος ὅλην χθόνα καὶ φλόγα πόντου
6.361
καὶ ποταμοὺς ἐκάθηρεν, ἀπʼ Ἀλφειοῖο δὲ μούνου
6.362
οὐτιδανὸν Παφίης οὐκ ἔσβεσεν ἁπτόμενον πῦρ.
6.363
ἔμπης, εἰ κλονέει με τόσος ῥόος, εἰ πυρὶ κάμνω,
6.364
βαιὸν ἐμῆς ὀδύνης πέλε φάρμακον, ὅττι καὶ αὐτὸς
6.365
πλάζεται ἁβρὸς Ἄδωνις ἀνιάζων Ἀφροδίτην.
6.366
οὔ πω μῦθος ἔληγε, φόβος δʼ ἐβιήσατο φωνήν.
6.367
καὶ τότε Δευκαλίων περόων ὑψούμενον ὕδωρ
6.368
ναυτίλος ἦν ἀκίχητος, ἔχων πλόον ἠεροφοίτην,
6.369
καὶ στόλος αὐτοκέλευθος ἄτερ ποδός, ἄμμορος ὅρμου,
6.370
λάρνακος αὐτοπόροιο κατέγραφε δύσνιφον ὕδωρ.
6.371
καί νύ κε κόσμος ἄκοσμος ἐγίνετο, καί νύ κεν ἀνδρῶν
6.372
ἄσπορον ἁρμονίην ἀνελύσατο πάντροφος Αἰών·
6.373
ἀλλὰ Διὸς ζαθέοις ὑπό νεύμασι κυανοχαίτης
6.374
Θεσσαλικοῦ σκοπέλοιο μεσόμφαλον ἄκρον ὀρύξας
6.375
γειοτόμῳ τριόδοντι διέσχισε, καὶ διὰ μέσσου
6.376
ῥηγνυμένου πρηῶνος ἐχάζετο μάρμαρον ὕδωρ·
6.377
καὶ χύσιν ὑψικέλευθον ἀπωσαμένη νιφετοῖο
6.378
γαῖα φάνη παλίνορσος· ἐλαυνομένων δὲ ῥεέθρων
6.379
εἰς βυθίους κευθμῶνας ἐγυμνώθησαν ἐρίπναι.
6.380
καὶ χθονὸς ὑγρὰ μέτωπα χέων πολυδίψιον αἴγλην
6.381
ἠέλιος ξήραινε· παχυνομένων δὲ ῥοάων
6.382
θερμοτέραις ἀκτῖσιν ἐχερσώθη πάλιν ἰλὺς
6.383
οἷα πάρος. βροτέῃ δὲ τετυγμένα μείζονι τέχνῃ
6.384
ἄστεα λαϊνέοισιν ἐνεστήρικτο θεμέθλοις,
6.385
δωμήθη δὲ μέλαθρα, νεοκτίστων δὲ πολήων
6.386
ἀρτιγόνοις μερόπεσσιν ἐρυμνώθησαν ἀγυιαί.
6.387
καὶ φύσις ἂψ ἐγέλασσε· συνιπταμένων δὲ θυέλλαις
6.388
ὀρνίθων πτερύγεσσιν ἐρετμώθη πάλιν ἀήρ.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).