Notkerus Balbulusc.840-912
Martyrologium
Mart 5.1.92
Choose a text
More by Notkerus Balbulusc.840-912
—
9344 Martyr9
5.1
MARTIUS. Martius habet dies XXXI, lun. XXX. Et in hoc mense erit jejunium primum, de Quatuor Temporibus.
5.1
KAL. MART.-- Romae sanctorum martyrum ducentorum sexaginta temporibus Claudii, qui via Salaria arenam fodientes, damnati fuerant pro Christi nomine. Quos jussit Claudius ut in figlina foris muros portae Salariae mitterentur, et eo loco inclusi in civitatis amphitheatro militum sagittis interficerentur. Ibidem Simplicii papae, qui sedit Romae annis quindecim. Hic Acacium Constantinopolitanum episcopum, et Petrum Alexandrinum episcopum Eutychianos damnavit.
5.2
Andegavis, Albini episcopi.
5.1.1
NON. MART.-- Romae, via Latina, sanctorum Jovini et Brasilei, qui passi sunt sub Gallieno et Valeriano imperatoribus.
5.1.2
Eodem die martyrum plurimorum sub Alexandro imperatore passorum, quos diu cruciatos impius Alexander capitali sententia damnavit.
5.1.3
V NON. MART.-- In Hispania, civitate Calagurritana, nativitas sanctorum martyrum Emetherii[ Hemiterii] et Cheledonii: qui primum apud Legoniensem Galliciae civitatem milites, exsurgente persecutionis procella, pro confessione nominis Christi plurimis afflicti tormentis, Calagurrim usque perducti, atque ibidem martyrio affecti sunt et coronati. Cumque eorum capita lictor incideret, miraculum populis grande apparuit. Nam unius annulus orariumque alterius, nube susceptum et in coelos evectum est. Viderunt haec omnes qui aderant, et usquequo acies oculorum intendere potuit, fulgorem auri candoremque lintei attonito sequebantur intuitu. Scribit Aureolus in libro coronatorum.
5.1.4
Apud Caesaream Palestinae sanctorum martyrum Marini militis, et Asterii senatoris, sub persecutione Valeriani. Quorum prior cum accusatus fuisset a commilitonibus quod esset Christianus, et interrogatus a judice Christianum se esse clara voce testaretur, tres ei horae ad deliberandum indultae sunt. Cumque a tribunalibus fuisset egressus, a beato Theotecno ejusdem urbis episcopo plurimum in fide confortatus, repetens continuo tribunal judicis confidentissime respondit: Obedire oportet Deo magis quam hominibus, et illico martyrii coronam capitis abscissione suscepit. Cumque praefatus Asterius capite truncatum martyris corpus subjectis humeris et substrata veste qua induebatur, exciperet, honorem quem martyri detulit, continuo ipse martyrium accepit. Scriptum in Historiae Ecclesiasticae libro septimo.
5.1.5
IV NON. MART.-- Nativitas sancti Lucii papae et martyris. Hic praecepit ut duo presbyteri et duo diaconi in omni loco episcopum non desererent propter testimonium ecclesiasticum. Qui persecutione Valeriani et Gallieni ob fidem Christi exsilio relegatus, et postmodum divino nutu ad ecclesiam suam redire permissus, martyrium capitis obtruncatione complevit. Postea positus est via Appia ad sanctum Xystum. Sedit autem in episcopatu annos tres, menses tres, dies tres.
5.1.6
Item Romae, via Appia, sanctorum martyrum nongentorum, qui positi in coemeterio ad sanctam Caeciliam.
5.1.7
Eodem die S. Gaii, Palatini in mare demersi.
5.1.8
III NON. MART.-- Apud Antiochiam sancti Focae martyris. Qui per multas, quas pro Redemptoris Christi nomine perpessus est, injurias, qualiter de antiquo illo serpente triumphaverat, hodieque populis declaratur. Denique in quempiam loci illius coluber morsum figens venena diffuderit, extemplo qui percussus est, ut januam basilicae martyris credens attigerit, evacuata virtute veneni, salvatur.
5.1.9
Item ipso die. Eusebii et Palatini et aliorum octo martyrum.
5.1.10
Item in Antiochia, Saturnini, Casti, Syriae.
5.1.11
Item Saturnini, Martini, Petri et aliorum non paucorum.
5.1.12
II NON. MART.-- Nicomediae nativitas sanctorum Victoris et Victorini, qui per triennium cum Claudiano et Bassa uxore ejus tormentis afflicti, et retrusi in carcerem, ibidem vitae suae cursum impleverunt.
5.1.13
Nicopoli papiae, Alexandri et Diodori martyrum.
5.1.14
In Italia, villa Fagoniae, Victorini et Sylvani.
5.1.15
NONIS MART.-- In Mauritania, civitate Tiburbitanorum, passio sanctarum martyrum Perpetuae et Felicitatis, et cum eis Revocati, Saturnini et Secunduli. Quorum ultimus in carcere quievit. Reliqui omnes ad bestias sunt traditi, sub Severo principe, die nativitatis ejus. Quique cum adhuc servarentur in carcere, et Felicitas parturiret, omnium sanctorum commilitonum precibus impetratum est ut octavo mense pareret. Jam vero Perpetuae inter alia concessum est, ut ejus mens quodammodo averteretur a corpore, in quo vaccae impetum pertulit, ita ut adhuc futurum exspectaretur quod in se jam gestum esse nesciret.
5.1.16
In Antiochia, Leuci, Saturi et Nestoris.
5.1.17
In Thracia Dandae, Eunicae, Secundi, Sergii, Optati.
5.1.18
VIII ID. MART.-- Apud Carthaginem sancti Pontii diaconi, beati Cypriani episcopi. Qui usque ad passionis suae diem cum ipso exsilium sustinens, egregium volumen Vitae et passionis ipsius reliquit. Atque Dominum semper in passionibus suis glorificans, coronam vitae promeruit.
5.1.19
In Nicomedia, Quintilis episcopi et Capitulini.
5.1.20
In Africa, Rogati et Felicis, nativitas etiam Cyrilli episcopi, Sylvani et Manilii.
5.1.21
VII ID. MART.-- Apud Misenam[ Nyssenam] civitatem sancti, Gregorii episcopi, fratris beati Basilii Caesariensis, viri doctissimi et eloquentia clarissimi.
5.1.22
Apud Barcillonem, Paciani episcopi, tam vita quam sermone clari. Qui optima senectute mortuus est, Theodosii principis temporibus.
5.1.23
In Africa Felicis et Philippi, Mariani, Rogati et Concessi, Gorgonii et Esychii.
5.1.24
VI ID. MART.-- Nativitas sanctorum martyrum Alexandri et Gaii de Eumenia, qui apud Apamiam persecutione Antonini Veri Martyrio coronati sunt. Scribit Apollinaris Hierapolitanus episcopus in libro adversus Cataphrygas.
5.1.25
In Perside, sanctorum martyrum numero quadraginta duorum.
5.1.26
In Antiochia, Agapae[ Agapes] virginis et Marinae.
5.1.27
In Nicomedia, Palatini, Firmani et Rustici martyrum.
5.1.28
In Alexandria, Heraclii, Zosimi, Alexandri et Gaii.
5.1.29
In Italia, in monasterio Bobio, sancti Atalae abbatis, admirandae sanctitatis viri discipuli beati Columbani.
5.1.30
V ID. MART.-- Apud Sebasten Armeniae Minoris nativitas martyrum quadraginta, qui temporibus Lucinii[ Licinii] imperatoris et Agricolai praesidis et Lysiae ducis, pro nomine Christi martyrio sunt coronati. Quos Agricolaus praeses cum ad culturam idolorum convertere non posset, lapidibus obrui praecepit. Sed tortores eorum, alterutrum se lapidibus caedentes, martyribus nocere non poterant. Dux vero Lysias, exardescens ira, tulit lapidem ut percuteret aliquem sanctorum. Sed miro Dei nutu ipse lapis in faciem praesidis pervenit. Qui furore commotus sanctos Dei in stagnum glacie constrictum mitti praecepit. Divino autem nutu glacies dissoluta et frigidissima aqua in balnearum temperiem conversa est, ita ut in laudem Dei, sancto Spiritu confortati, erumperent. Unus autem ex eorum numero, pusillanimis effectus, refugiens ad balneum juxta paratum, mox ut attigit calorem, dissolutus et mortuus est. Porro cunctis qui eos custodiendos acceperant somno gravatis, clavicularius tantum vigilabat. Qui audiens eos orantes, vidensque lucem immensam atque glaciem resolutam, respiciens unde ortum lux ipsa haberet, vidit super sanctos coronas descendentes numero triginta novem; coepit cogitare:« Quadraginta, inquit, sunt, unius corona ubi est?» et Christi confessione praemissa, exsiliens in stagnum supplevit numerum definitum. Mane autem facto invenientes eos incolumes, crura eorum fustibus confregerunt, et igni corpora comburentes, in fluvium projecerunt. Sed divina dispensatione reliquiae ipsorum in profundo aquae religiosis viris revelatae et honore digno sunt conditae.
5.1.31
In Nicomedia Eunici et Gorgonii, Firmi et Agapiti.
5.1.32
IV ID. MART.-- Romae beatorum pontificum Gregorii doctoris et apostoli Anglorum, quos per fidelissimos evangelistas Augustinum et Mellitum atque Joannem ad fidem Christi convertit. Qui sedit in episcopatu annos tredecim, menses sex, dies decem.
5.1.33
Item Innocentii, qui rexit Ecclesiam annos quindecim, menses duos, dies viginti et unum. Hic constitutum fecit de Ecclesia Dei, et Pelagium atque Coelestinum haereticos damnavit, et constituit ut qui natus fuisset de Christianis parentibus, per baptismum regeneraretur. Quod Pelagius damnabat. Hoc Innocentius. Gregorius vero augmentavit, sed[ f. addens] in precatione Canonis: diesque nostros in tua pace dispone.
5.1.34
Apud Nicomediam, beati Petri martyris, qui unus fuit ex Dorothei et Gorgonii martyrum sodalibus, qui in cubiculo regis erant. Hic jubente Diocletiano, eo quod de suppliciis martyribus irrogatis liberius clausaretur[ causaretur], in equuleo suspensus, et flagris toto laniatus corpore, ac visceribus jam pelle denudatis, aceto et sale perfunditur. Cumque hoc tormenti genus constanter ac fortiter tolerasset, craticula prunis subterstratis poni jubetur in medio, ibique quod reliquum fuerat verberibus absumpti corporis superponi, et non ad subitum sed sensim paulatimque succendi, quo scilicet poena protelaretur in longum. Hoc Petrus martyrio coronatus, vere Petri exstitit et fidei haeres et nominis.
5.1.35
Item Nicomediae nativitas, sanctorum Egduni presbyteri et aliorum septem, qui singuli diebus singulis suffocabantur, ut caeteris metus incuteretur.
5.1.36
Eodem die passio Maximiliani martyris et aliorum plurimorum.
5.1.37
III ID. MART.-- Apud Nicomediam nativitas sanctorum Macedonii presbyteri, et Patricae uxoris ejus, et filiae Modestae.
5.1.38
Nicaea civitate nativitas sanctorum Theuseae et Horis[ Theusetae et Horrisae] filii ejus, Theodorae, Nymphodorae, Marci, Arabae[ Arabiae], qui omnes igni sunt traditi.
5.1.39
Item Julii episcopi et Alexandri.
5.1.40
Item Nicomediae multorum martyrum.
5.1.41
PRIDIE ID. MART.-- Romae martyrum quadraginta septem, qui baptizati sunt a beato Petro apostolo, cum teneretur in custodia Mamertini cum coapostolo suo Paulo, ubi novem menses in vinculis detenti sunt.
5.1.42
Item Zachariae pontificis, qui sedit Romae annos decem. Hic in patriarchio beati Gregorii[ Georgii Baron.] Martyris caput reperit in capsa reconditum; in qua et pitatium pariter invenit, hoc ipsum Graecis litteris habens exaratum. Sepultus est in ecclesia beati apostoli Petri.
5.1.43
Apud Carthaginem, Donati, Eufrosii, Fronimi.
5.1.44
In Nicomedia, Felicissimi, Dativi, Frontinae.
5.1.45
In Africa Dionae, Alexandri, Petri, Mammarii et Nabotis martyrum.
5.1.46
ID. MART.-- In Cappadocia sancti Longini martyris: qui cum in passione Domini lancea latus ejus aperuit, viso terraemotu et signis quae fiebant, credidit in Christum, poenitentiam agens de pristinis operibus, et per triginta et octo annos Christo militans, multosque ad fidem Dei convertens, ad extremum in Cappadocia sub Octavio praeside consummavit. Quem propter infidelitatem animi corporea caecitate percussum post martyrium suum illuminavit.
5.1.47
Apud Thessalonicam, sanctae Matronae: quae cum esset Plautillae cujusdam viduae ancilla et occulte Christum colens, quotidie furtivis orationibus ecclesiam frequentaret, deprehensa a domina sua, in scamno extenta atque ligata, et pene usque ad mortem flagellata, atque vincta in scamno, obsignatis diligentissime januis per noctem relicta, die altera divinitus soluta, et cum ingenti oris gratia orans inventa est. Rursumque crudis nervis in eodem scamno constricta, et loris quousque obmutesceret caesa, ibique per triduum obsignatis januis est relicta. Facta autem die tertia, iterum divinitus soluta et orans inventa est. Tunc robustis fustibus usque ad mortem caesa est. In confessione Christi incorruptum spiritum reddidit.
5.1.48
In Nicomedia, Lucii episcopi et martyris.
5.1.49
Carthagine, Pauli, Salutaris.
5.1.50
Item Alexandri, Theophili.
5.1.51
XVII KAL. APRIL.-- Romae, Cyriaci martyris, qui a beato Marcello papa diaconus ordinatus simul cum Sisinnio multa mirabilia fecit sub Diocletiano et Maximiano imperatoribus, et daemones ab obsessis corporibus expulit, et post multa ac nimia tormenta quae pertulit, novissime per Carpasium vicarium jussu Maximiani decollatus est.
5.1.52
In Aquilegia, Hilarii.
5.1.53
In Nicomedia, Castoris, Dionysii et Nonni.
5.1.54
In Graecia, Cyriacae, Florentii et Joviani.
5.1.55
XVI KAL. APRIL.-- In Aquilegia Largi, Tatiani, Catonis et Dativi.
5.1.56
Romae, Alexandri episcopi et Theoduli diaconi.
5.1.57
In Scotia nativitas sancti Patricii episcopi, natione Britanni, qui in Hibernia insula Scotis primum evangelizavit nomen Domini nostri Jesu Christi, et eos per miraculorum ostensionem ad fidem veram convertit.
5.1.58
Eodem die passio sanctae Mariae martyris; quae cum esset ancilla cujusdam Tertulli praeclari viri, et nollet in nativitate filii ejus prandiis domini sui interesse, sed magis Christianorum more jejuniis operam dare, flagellis atrocibus ab eodem domino suo lacerata est. Sed cum non posset per hoc ab instantia Christi servitii ad idolorum cultum revocari, judici publico ad puniendum tradita est. Ubi dum carnifices eam incendio tradere voluissent, precibus populi datae sunt ei induciae trium dierum. Triduo ergo completo, cum iterum eam punire unanimiter instarent, mirabiliter Dei misericordia erepta est. Nam cum orationem ad Deum fudisset, una petra ingens, quae ante eam fuerat, per medium scissa, illam in se recipiebat, et undique concludens, hostium furori resistebat. Ad quam populus concurrens, cum vellet secundum jussum principis ipsum lapidem destruere, fulmine ac tonitru coelitus emisso, plurimi eorum interierunt, ita ut duo millia et septingenti ex ipsis divino judicio exstincti fuerint, pauci vero qui remanserant, conversi ad Dominum, in Christiana religione permanserunt.
5.1.59
Eodem die nativitas sanctae Gertrudis virginis, de cujus miraculis hoc celeberrimum fertur, quod cum in die natalis ejus quaedam anus nuper monasterium ingressa propter imminentem Paschalis festi propinquitatem jejunium solvere cogi non potuerit, filia ipsius ad hauriendam aquam de puteo claustri directa, sed in eumdem ipsa demersa mortua extracta, meritis sanctae virginis resuscitata, gaudium non solum matri, sed et cunctae congregationi ad cumulum solemnitatis S. Patricii atque ipsius Gertrudae sua recuperatione triplicaverit.
5.1.60
XV KAL. APRIL.-- Nativitas sancti Alexandri episcopi. Qui de Cappadocia civitate sua veniens, cum desiderio sanctorum locorum Hierosolymam pergeret, et Narcissus episcopus ejusdem urbis jam senex regeret Ecclesiam, et ipsi Narcisso et multis clericorum ejus revelatum est altera die mane intrare episcopum, qui adjutor sacerdotalis cathedrae esse deberet. Itaque re ita completa ut praedicta fuerat, cunctis in Palaestina in unum congregatis, adnitente vel maxime Narcisso, Hierosolymitanae ecclesiae cum eo gubernaculum suscepit. Quique persecutione Decii cum jam longaevae aetatis veneranda canitie praefulgeret, ductus Gaesaream, et clausus carcere, ob confessionem Christi martyrio coronatus est.
5.1.61
In Alexandria, Collegii et Colyti diaconorum.
5.1.62
In Nicomedia, Aprilis et Servuli.
5.1.63
In Campania, Quinti, Rogati et Ingenuae.
5.1.64
In Mauritania, Timothei et Saldae.
5.1.65
XIV KAL. APRIL.-- Apud Pinarensem[ Pinnensem] urbem, beati Joannis, magnae sanctitatis viri. Qui de Syria oriundus pervenit ad Italiam, et angelo Dei, non longe ab eadem urbe locum permansionis sibi demonstrante, sed et a venatoribus hiemis tempore sub arbore foliis vestita repertus, et per hanc famam populo commendatus, monasterium statuit. In quo per quadraginta quatuor annos, multorum servorum Dei Pater exstitit, et in pace quiescens, quotidianis miraculis clarus effulsit.
5.1.66
Eodem die apud Sorrentum[ Surrentum], Quinti, Quintilis, Quartillae, Marci cum aliis novem.
5.1.67
In Caesarea Cappadociae, Theodori presbyteri sancti et pii.
5.1.68
In Africa, Bassae, Lucillae, Fusciani et aliorum multorum.
5.1.69
XIII KAL. APRIL.-- Apud Colossos, Archippi episcopi, commilitonis beati apostoli Pauli.
5.1.70
In Antiochia, sancti Joseph.
5.1.71
In Syria, Pauli, Cyrilli, Engenii, Serapionis, Victorici et aliorum.
5.1.72
In Britannia, sancti Cudberti, qui ex anachoreta Ecclesiae Lindisfernensis antistes, totam ab infantia usque ad senium vitam miraculorum signis inclytam duxit. Cujus dum undecim annos maneret corpus humatum, incorruptum post haec, quasi eadem hora defunctum, simul cum veste qua tegebatur inventum est. Scribit S. Beda presbyter in libello de Vita ipsius.
5.1.73
XII KAL. APRIL.-- Apud Alexandriam, sancti Serapionis monachi.
5.1.74
Item Josephi, Volutiani, Philocali.
5.1.75
Apud castrum Cassinum Beneventanae civitatis, sancti Benedicti abbatis. Cujus vitam, virtutibus et miraculis gloriosam, in Dialogorum libris beatus papa scribit Gregorius. Quem etiam regulam monachorum cum magna discretione et luculento sermone scripsisse commendat.
5.1.76
In territorio Lugdunensi, sancti Lupicini abbatis Virensium. Qui cum fratre Romano post anachore ticam vitam, quam ab adolescentia austerissimam duxerant, fundator monasteriorum et rector exstitit animarum, uterque vero effector miraculorum. Cumque post agones plurimos, quos contra diabolum et angelos ejus visibiliter desudaverunt, atque militiam quam Christo per annos plurimos fideliter impenderunt finem sibi laborum et perceptionem praemiorum appropinquare cognoscerent, decrevit. Lucipinus ut in remotiori solitudinis monasterio in uno conderentur sepulcro. Quod Romanus, qui mitioris erat ingenii, intuitu pietatis abnuens, salva charitate impetravit ab eo ut, ipso ad tutionem fratrum in monasterio tumulate, se ad remedium pauperum et maxime feminarum incommodo laborantium, in oratorio ad introitum salutis poni pateretur. Quod cum primo ita factum fuisset, nunc corpus B. Lupicini, incertum ex qua causa, in finibus Vesontionum apud Laconense monasterium celeberrime frequentatur.
5.1.77
XI KAL. APRIL.-- Apud Narbonem civitatem, a qua Gallia Narbonensis nomen assumpsit, nativitas S. Pauli, quem beati apostoli ordinatum eidem urbi episcopum direxerunt. Quem tradunt eumdem ipsum fuisse Sergium Paulum proconsulem, virum prudentem, a quo ipse Paulus apostolus sortitus est nomen, quia illum fidei Christi subegerat. Qui in eadem regione praedicationis officio non segniter impleto, clarus miraculis confessione Christi coronatus sepelitur.
5.1.78
In Africa, Saturnini et aliorum novem.
5.1.79
X KAL. APRIL.-- Nativitas sanctorum martyrum Victoriani, Frumentii et alterius Prumentii et duorum germanorum; qui omnes persecutione Wandalica, sub Henrico[ Hunnerico] rege Ariano, pro constantia catholicae confessionis immanissimis suppliciis excruciati, egregie coronati sunt in partibus Africae.
5.1.80
Item in Africa, Fidelis et aliorum viginti.
5.1.81
In Antiochia, Theodori presbyteri.
5.1.82
In Caesarea, Achatii et Alexandri.
5.1.83
IX KAL. APRIL.-- In Africa, Agapiti et Romuli.
5.1.84
In Mauritania, Secunduli, Veruli, Felicis, Saturnini et aliorum multorum.
5.1.85
Romae, S. Pigmenii presbyteri. Is Julianum apostatam et impium a puero nutrivit, et litteris etiam sacris erudivit. Qui factus imperator, culturam pietatis relinquens, audito quod corpora sanctorum martyrum qui ab eo necabantur idem Pigmenius sepeliret, mandavit ei:« Perge quo vis, hic enim non mercabitur vita tua. Tamen hoc servitiis tuis reddo, non tibi.» Tunc S. Pigmenius perrexit ad Persidem. Cumque quatuor menses reversus clivum Sacrae viae cum uno puero stipem petendo conscenderet, factum est ut offenderet Julianum imperatorem in rheda aurea sedentem. Qui eminus prospiciens Pigmenium, vocari eum praecepit, dixitque ei:« Gloria diis, deabusque meis, quia te video.» Cui vir Dei Pigmenius illico respondit:« Gloria Deo meo Jesu Christo Nazareno crucifixo, quia te video.» Ad hanc vocem iratus Julianus jussit eum per pontem in Tiberim praecipitari. Cujus corpus inventum et collectum sepultum est in coemeterio Pontiani, non longe a sanctis Abdon et Sennen.
5.1.86
VIII KAL. APRIL.-- Apud civitatem Galilaeae Nazareth, annuntiationis Dominicae.
5.1.87
Extra portam Hierosolymorum Dominus noster Jesus Christus crucifixus, occulta prophetarum maxima ex parte revelavit.
5.1.88
In monte visionis immolatio Isaac.
5.1.89
Item Hierosolymis passio S. Jacobi fratris Domini, qui in Paschae solemnitate Judaeis Christum testificatus, de templi est culmine praecipitatus ac fullonis vecte percussus.
5.1.90
Romae Cyrini, qui interfectus a Claudio et in Tiberim jactatus, in insula Lycaonia inventus, et in coemeterio Pontiani conditus est. Scriptum in passione S. Valentini.
5.1.91
Apud Smyrnum[ Sirmium] nativitas S. Irenaei episcopi: qui tempore Maximiani imperatoris sub praeside Probo primo tormentis acerrimis vexatus, deinde diebus plurimis in carcere maceratus; novissime abscisso capite consummatus est.
5.1.92
VII KAL. APRIL.-- Romae, via Lavicana, in coemeterio ejusdem, nativitas S. Castuli. Qui cum esset notarius[ zetarius] palatii et hospes sanctorum, ut in B. Sebastiani gestis legitur, a persecutoribus arctatus, et tertio appensus, tertio auditus, in confessione Domini perseverans, missus est in foveam, et dimissa est super eum massa arenaria: atque ita cum palma martyrii migravit ad Christum.
5.1.93
Eodem die apud Pentapolim Libyae, Theodori episcopi, Irenaei diaconi, Serapionis et Ammonii lectorum.
5.1.94
Item apud Smyrnium[ Sirmium] nativitas S. Montani presbyteri, qui cum Maxima uxore tentus et in fluvium praecipitatus est. Quorum corpora nono ab urbe lapide inventa sunt.
5.1.95
VI KAL. APRIL.-- Hierosolymis resurrectio Domini nostri Jesu Christi.
5.1.96
In Africa, Romuli, Acutii, Pinarii, Missiae, Matutinae et aliorum.
5.1.97
Item Donati, Saturnini et Martiani.
5.1.98
In Aegypto, beati Joannis eremitae, admirandae sanctitatis viri. Qui praeter multa miracula quae gessit, etiam prophetico spiritu plenus, Theodosio imperatori Christianissimo victorias de tyrannorum immanitate praedixit.
5.1.99
V KAL. APRIL.-- Apud Caesaream Palaestinae nativitas SS. martyrum Prisci, Malchi et Alexandri. Qui persecutione Valeriana cum suburbanum agellum supradictae urbis habitarent, atque in ea coelestes martyrii proponerentur coronae, divino fidei calore succensi, ultro judicem adeuntes, cur tantum in sanguinem piorum desaeviret, objurgant. Quos ille continuo pro Christi nomine bestiis tradidit devorandos
5.1.100
Item..... Romae, Xyxti papae, qui sedit octo annos. Is criminatorem suum Bassum, nutu divino mortuum, manibus suis cum linteaminibus et aromatibus tractans, sepelivit apud B. Petrum.
5.1.101
Apud Cabillonensium civitatem, Cunderammi[ Gunthranni] regis Francorum, viri religiosi, qui ita se spiritualibus actionibus mancipavit, ut, relictis saeculi pompis, thesauros suos ecclesiis et pauperibus erogaret.
5.1.102
IV KAL. APRIL.-- In Nicomedia, Pastoris, Victorini, Saturnini, Juliani.
5.1.103
In Africa, sanctorum confessorum Armogastis, Archimimi et Satyri. Qui tempore Wandalicae persecutionis sub Geiserico rege Ariano, cum essent lucidissima membra Ecclesiae Christi, et pravitatem Arianorum libertate catholica frequenter arguerent, pro confessione veritatis multa et gravia perpessi supplicia atque opprobria, cursum gloriosi certaminis impleverunt.
5.1.104
In Burgundia depositio beati Eustasii abbatis discipuli S. Columbani. Qui Pater ferme sexcentorum exstitit monachorum, et vitae sanctitate conspicuus, etiam miraculis clarus effulsit.
5.1.105
In civitate Pisana, sancti Torpetis martyris.
5.1.106
III KAL. APRIL.-- Romae, Quirini tribuni et martyris sub Trajano imperatore. Qui cum ex praecepto ejus B. Alexandrum papam et Hermen praefectum in vincula conjecisset, haberetque filiam cujus collum struma circumdederat, exauditis orationibus B. Hermes de fide Christi, et visis signis quae Dominus in martyribus suis Alexandro et Herme operabatur, eamdem filiam suam obtulit eis ad sanandum. Cui dixit beatus Alexander:« Tolle boiam de collo meo et impone ei.» Quod cum obedienter pater exsequeretur, divino nutu subito sanata est. Vocabatur autem ipsa Balbina. Atque ita pater ejus Quirinus et ipsa cum universis qui in custodia tenebantur omnique domo sua baptizatus est. Quod ut nuntiavit commentariensis Aureliano Judici, iratus jussit ad se adduci Quirinum et dixit ei:« Ego te quasi filium dilexi. Tu autem irrides me, deceptus ab Alexandro.» Dixit ei Quirinus:« Ego Christianus sum factus, vis occidere? vis fustigare? vis incendere? aliud non ero. Nam omnes qui erant in carcere feci fieri Christianos, et noluerunt usquam ire.» Iratus Aurelianus fecit ei linguam abscindi, deinde in equuleo suspendi. Qui dum Aureliani non cederet injuriis, jussit ei manus ac pedes abscindi, et sic eum decollari et canibus projici. Sed Christiani corpus ejus raptum in via Appia sepeliverunt in coemeterio Praetextati.
5.1.107
In Thessalonica civitate. Domnini, Philopoli, Achaici, Palatini.
5.1.108
Alibi Victoris, Aquilinae virginis.
5.1.109
Aurelianis, depositio sancti Pastoris.
5.1.110
II KAL. APRIL.-- Romae, sanctae Balbinae virginis, filiae Quirini martyris. Quae cum Boiam beati Alexandri, per quam sanata fuerat, frequentius oscularetur, admonita ab eo ut illam osculari desineret, et magis vincula beati Petri perquireret, et ea osculari curaret, summo studio per desiderium magnum pervenit ad ipsa, tradiditque sanctae Theodorae religiosissimae, sorori sancti Hermetis praefecti et martyris. Ipsa vero Balbina, instructa a beato Alexandro, in virginitate, plena bonis operibus, permansit. Et post devictum saeculum juxta patrem suum Quirinum martyrem sepelitur.
5.1.111
In Africa, sanctorum Anesii, Felicis, Dioduli, Proti, Cornelii et Valeriae cum sociis eorum.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).