Reader

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT PRIMUM. DE RICHARDO.

Richardus, Casinensis abbas et cardinalis, scripsit expositionem super Regulam sanctissimi Patris nostri Benedicti. Claruit anno Dom. 1256, et sepultus est Casini, cum sedisset annis septem.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT II. DE BERNARDO.

Bernardus Gallus abbas Casinensis. Scripsit et ipse super Regulam sancti Benedicti. Edidit quoque Speculum monachorum. Fecit etiam regesta duo, unum collationum beneficiorum et officiorum; alterum, omnium inquisitionum, jurium et bonorum in castris et villis monasterii Casinensis. Floruit anno 1272. Sepultus vero est in Casino, cum sedisset annis viginti duobus.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT III. DE IGNATIO.

Ignatius Florentinus, monachus monasterii Florentiae, et abbas Casinensis, nobilitate insignis, et in divinis, et humanis scientiis apprime eruditus. Scripsit sermonem pulcherrimum in honorem sanctissimi Benedicti, eumque coram magno monasterii et populi coetu habuit, quando solemniter capta est possessio monasterii Casinensis sub Eusebio Mutinensi ejusdem coenobii abbate, anno Domini 1505. Scripsit et carmen saphicum in honorem et laudem sanctissimae Trinitatis. Edidit quoque hymnos in honorem sancti Bertharii martyris et abbatis Casinensis. Claruit temporibus Leonis X, cujus dicebatur affinis. Sepultus vero est in abbatia civitatis Florentiae, cum sedisset annos novem in hac Casinensi abbatia.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT IV. DE BENEDICTO.

Benedictus de Sancto Severino monachus Casinensis, in philosophia et divinis scripturis apprime eruditus. Fuit temporibus Caroli V, et sepultus est in Casino.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT V. DE JUSTINO.

Justinus Hispanus monachus professus monasterii S. Justinae, et hujus coenobii abbas nonagesimus septimus, vir in philosophia et divinis scientiis doctissimus, ac historiae amator. Fuit temporibus Caroli V imperatoris; sepultus est in monasterio Sanctae Justinae, cum sedisset anno uno in hoc coenobio.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT VI. DE AUGUSTINO.

Augustinus Paduanus monachus professus monasterii S. Justinae, et abbas Casinensis nonagesimus nonus, vir in philosophia ac divinis scientiis doctissimus. Floruit temporibus supradicti imperatoris. Obiit Brixiae, et sepultus est in monasterio Sancti Faustini, cum sedisset in abbatia Casinensi annis tribus.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT VII. DE INNOCENTIO.

Innocentius de Novaria, professus monachus monasterii Florentiae, et hujus monasterii abbas centesimus quartus, vir disertus et valde eruditus in divinis Scripturis, verum in philosophia et mathesi versatissimus. Claruit temporibus Caroli V et Maximiliani imperatorum. Obiit Venetiis, et sepultus est in monasterio S. Georgii, cum sedisset in hoc monasterio annis tribus.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT VIII. DE ANGELO

Angelus Sangrinus abbas et restaurator coenobii Casinensis, sub Vincentio Neapolitano abbate hujus monasterii. Monachus ab adolescentia in Casino factus est, vir reverendus, et omni bonitate et sanctitate redimitus, religione et vita probatus, et in divinis scripturis versatissimus, poeta insignis et admirabilis. Scripsit innumera pene opera, inter quae haec tantum brevitati consulens referam: Carmen heroicum de ineffabili Jesu nomine; Meditationes septem in septem novissima verba Jesu Christi, eodem genere carminis exaratas; similiter De misericordia, amore et bonitate Dei erga peccatores; De spe peccatoris in Deum; Speculum peccatoris; paraeneses sex in hebdomada sancta; de nominibus Jesu; de contemptu divitiarum, et vanitate humanae vitae; elegias duodecim de Jesu pietate, et amore in peccatores; triumphum divini amoris; carmen saphicum in Nativitate Domini, et in omnes alias ejusdem festivitates: epicaedium in mortem Domini; de Jesu beneficiis in homines. Scripsit et librum unum diverso carminum genere de laudibus beatae Mariae virginis. Exstant quoque libri duo, in quibus celeberrima nonnulla sanctorum et sanctarum sacra vario describuntur metro, eorumque gesta hymnidicis proferuntur modulis. Aureas etiam, divinasque sententias ex Davidis psalmis excerptas elegiaco carmine conscripsit. Insuper Vitam sanctissimi Patris nostri Benedicti, carmine heroico conscripsit; elegias duodecim de Passione Domini; paraphrasim vario metri genere excultam in Psalterium Davidis regis; de martyrio monachi; Vitam B. Guillelmi anachroretae carmine sapphico; Vitam S. Patris Benedicti, sanctorum Mauri, Placidi et Joannis Baptistae carmine heroico; Vitam aliam S. Benedicti carmine sapphico, et soluta oratione moralem expositionem continentem; tractatum orationis quadraginta horarum, et Psalterium gloriosae Virginis Mariae carmine sapphico. Scripsit etiam quamplura alia poetica, quae longum esset singula enarrare. Edidit etiam dialogos, homilias, et sermones multos soluta oratione. Vivit usque hodie et septuagesimum octavum excessit annum.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT IX. DE HONORATO.

Honoratus Hiserniensis, ex familia Fascitella, in Casino monachus susceptus est sub Vencentio Neapolitano. Postea vero creatus est episcopus de Insula in Calabria; Vir in Graecis, humanis, et divinis litteris versatissimus, poeta insignis. Scripsit quamplurima opera, quae temporum calamitate ad manus nostras non devenerunt. Floruit temporibus Caroli V et Maximiliani imperatorum.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT X. DE GREGORIO.

Gregorius de Viterbio, monachus Casinensis, utriusque juris doctissimus. Floruit temporibus dictorum imperatorum, et sepultus est in Casino.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XI. DE BENEDICTO.

Benedictus Canophilus Sangrinus, monachus in Casino factus est sub Ignatio Florentino, abbate Casinensi, vir utriusque juris doctissimus. Scripsit quamplurimos libros in jure canonico; edidit quoque Repertorium quoddam in jure civili, et extractum de foro fori, et foro poli, qui quidem est impressus. Claruit temporibus Caroli V, et sepultus est in Casino.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XII. DE CHRYSOSTOMO.

Chrysostomus de S. Gemiliano Calaber, monachus Casinensis factus sub Chrysostomo Neapolitano abbate, postea archiepiscopus Ragusinus creatus est; vir sanctitate insignis, reformator monasteriorum insulae Melitae prope Ragusium, in scientiis doctissimus; sed et in Graeca lingua valde eruditus. Transtulit diversos tractatus e Graeco in Latinum sermonem. Claruit temporibus supradicti imperatoris. Obiit Ragusii temporibus nostris, et sepultus est in suo archiepiscopatu.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XIII. DE FLAVIO.

Flavius de Ferraria, monachus Casinensis, et postea episcopus Ravellensis, Graeca et Latina lingua valide instructus, a papa Julio III plurimum dilectus, atque ob hoc ab eodem episcopus creatus est. Floruit temporibus Maximiliani imperatoris.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XIV. DE SEVERO.

Severus Aversanus, in Casino monachus sub Chrysostomo abbate susceptus, vir in philosophia versatissimus, et in divinis Scripturis studiosissimus. Floruit temporibus supradicti imperatoris, et sepultus est in Casino in coemeterio S. Annae.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XV. DE LUCA.

Lucas Fratensis monachus in Casino sub Chrysostomo abbate factus est. Vir acer ingenio, et in divinis Scripturis, et in philosophia doctissimus. Claruit temporibus Maximiliani imperatoris, et sepultus est in monasterio Sancti Benedicti Mantuanae dioecesis, in quo philosophiam publice docuit.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XVI. DE HIERONYMO.

Hieronymus patria Neapolitanus, ex nobili et illustri Caracciolorum familia oriundus, monachus ab adolescentia factus est sub Hieronymo de Monte Rubeo. Vir humilitate summus, castitate pudicus, prudentia, animi magnitudine, morum gravitate, ac religionis conversatione insignis: nobilis carne, sed nobilior spiritu, humanis et divinis litteris sufficienter instructus. Floruit temporibus nostris, et adhuc vivit, abbasque titularis existit.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XVII. DE PAULO.

Paulus de Alta Villa, monachus in Casino susceptus sub Hieronymo de Placentia abbate; vir in Graecis, Hebraicis et Latinis litteris doctissimus, memoria tenax, ingenio vivax. Fuit temporibus nostris, et sepultus est in Casino, in coemeterio S. Annae

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XVIII. DE MATTHIA.

Matthias de Bergamo Casinensis monachus, vir in divinis litteris versatus, et memoria adeo pollebat, ut plures Novi et Veteris Testamenti libros memoriter recitaret. Obiit temporibus nostris, et sepultus est in Casino, in coemeterio S. Annae.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XIX. DE BENEDICTO.

Benedictus de Sancto Germano, in Casino sub Hieronymo de Placentia abbate monachus factus est. Vir egregius, et ingenio magnus; in Latinis, Graecis et Hebraicis litteris valde eruditus; in philosophia autem et theologia doctissimus, adeo ut suis temporibus in nostra congregatione nemini fuerit secundus. Scripsit commentaria in Psalterium Hebraicum, in Epistolam Pauli ad Romanos; tractatum De usuris. Edidit quoque expositiones super Psalmos. Scripsit praeterea super libros Perihermenias, priorum et posteriorum Aristotelis, super libros De anima ejusdem. Est quoque in lucem editus, et impressioni traditus ipsius tractatus De imitatione Ciceronis. Exstant disputationes in libros Praedicamentorum Aristotelis, et pulcherrimum illud opus quod inscribitur Proverbia animalium. Scripsit etiam Apologiam contra calumniantes ejus opera. Claruit nostris temporibus, et adhuc vivit.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XX. DE BERNARDO.

Bernardus de Janua, monachus Casinensis factus est sub Hieronymo de Placentia, hujus monasterii abbate. Vir disertus et eruditus in philosophia et divinis Scripturis. Fuit temporibus Maximiliani imperatoris, et sepultus in Casino.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXI. DE ANTONIO.

Antonius Frachensis monachus in Casino, sub Lauro de Mantua hujus coenobii abbate susceptus est. Vir acri et magno ingenio, in Graecis et humanis litteris versatissimus, in jure etiam pontificio valde instructus. Scripsit quoddam Repertorium Polyanthea dictum, alphabeti ordine distinctum pro archivio Casinensi; in quo quidem opusculo et jurisdictiones, et dignitates, et quaecunque bona fuerint vel sint monasterii Casinensis, facile est invenire. Edidit quoque librum quemdam confinium bonorum Casinensis coenobii, sed, morte praeventus, imperfectum reliquit; qui postea a me Placido Romano monacho Casinensi repurgatus et perfectus fuit. Floruit temporibus Maximiliani imperatoris, et sepultus est in monasterio Sancti Liberatoris de Majella.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXII. DE LUCA.

Lucas Antonius de Firmo, in Casino sub Hieronymo de Placentia abbate monachus factus est, vir in philosophia et medicina doctissimus. Floruit temporibus supradicti imperatoris. Obiit Cajetae temporibus nostris, et sepultus est in monasterio Sancti Angeli.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXIII. DE PIO.

Pius patria Neapolitanus, ex nobili et antiqua familia Lottheriorum civitatis Florentiae ducens originem, monachus in Casino factus est, sub Innocentio de Novaria hujus coenobii abbate. Vir religione, et bonitate perspicuus, in divinis Scripturis doctus, et notitia juris civilis, et ecclesiasticorum dogmatum sufficienter instructus. Qui cum 25 annis religiose et laudabiliter vixisset in nostra congregatione Casinensi, existens prior S. Severini in civitate Neapolis, a papa Gregorio XIII episcopus Fundanus creatus est, de quo, quia adhuc vivit, meum judicium subtraham, ne in alterutram partem aut adulatio in me reprehendatur, aut veritas.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXIV. DE THEOPHILO.

Theophilus Senensis in Casino sub Angelo Sangrino abbate monachus factus est, vir ingenio perspicax, in scientiis valde eruditus, verum in philosophia, mathematica et theologia doctissimus, adeo ut suis temporibus in congregatione nostra Casinensi admirabilis haberetur. Floruit temporibus nostris, et adhuc vivit. Hic bis vocatus a Romano pontifice fuit, ut ejus opera in quibusdam ecclesiasticis negotiis uteretur. Edidit tractatum De nova restitutione Kalendarii.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXV. DE BENEDICTO.

Benedictus Gapuanus in Casino sub Angelo Sangrino abbate monachus susceptus est, vir discretus, et valde eruditus in divinis et humanis litteris. Verum in scribendis carminibus in materna lingua poeta insignis, et nostris temporibus admirabilis. Edidit librum unum carminum materna lingua, in quo martyrium D. Agnetis, Agathae, Luciae, Justinae, et Catharinae decantat. Scripsit quoque eadem lingua et metro tractatum de cogitatione mortis; Triumphum martyrum, confessorum et virginum; librum unum piorum carminum diverso metri genere. Exstat etiam ejusdem tragoedia Jephtae ducis Israelitici populi. Scripsit et commentaria in Dantem poetam. Edidit quoque librum unum epistolarum materna lingua. Floruit temporibus nostris, et adhuc vivit.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXVI. DE JOANNE.

Joannes Evangelista patria Neapolitanus, et nobili Mormiliorum familia oriundus, monachus in Casino ab Ignatio Neapolitano susceptus est. Vir ingenio perspicax, et divina et humana eruditione valde instructus. Verum in versificandi scientia antiquis per omnia comparandus. Scripsit quamplurimos tractatus Librum scilicet in quo continentur praecipuae Domini festivitates, vario metri genere illustratae; librum De laude gloriosae virginis Mariae, in cujus calce ejus Psalterium elegiaco carmine concinitur; librum, qui nonnullorum sanctorum Vitas, hymnosque vario carminum genere continet. Exstat et alius ejusdem liber carminum, in quo illa praesertim opuscula continentur: De insigni Christianorum victoria contra Turcas, temporibus Maximiliani imperatoris, et Pii V pontificis max.; De laudibus Casinensis juventutis; ibidemque liber odarum appenditur, et in fine continetur liber Tristium, ubi suas et amicorum aerumnas elegiace decantat; sunt et quatuor ejusdem eclogae. Scripsit praeterea innumera epigrammata; edidit quoque declamationes et sermones aliquot, homilias duas prosa oratione. Item expositionem in Epistolam divi Pauli ad Romanos, et in librum Perihermenias Aristotelis. Materna autem lingua quamplurima pia carmina de laudibus gloriosae virginis Mariae, et usque in praesentem diem scribit.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXVII. DE THOMA.

Thomas ab Ebulo, Casinensis monachus, sub Angelo Sangrino abbate factus est. Vir prudentia et ingenio insignis, in Philosophia et divinis Scripturis doctissimus. Scripsit librum Synodalium; librum Examinis confessorum, et promovendorum ad sacros ordines, et eorum, qui mittendi sunt ad parochiales Ecclesias. Edidit quoque materna lingua Conciones quinquaginta. Floruit temporibus nostris, et adhuc vivit, et vicarius generalis in tota dioecesi Casinensi existit.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXVIII. DE HIERONYMO.

Hieronymus ex nobili Sersalium familia civitatis Cosentiae originem ducens, in Casino sub Hieronymo de Placentia hujus sacri coenobii abbate monachus effectus est. Vir callido quidem et subtili ingenio, in humanis et divinis litteris mediocriter eruditus; verum in rerum humanarum experientia, et in peragendis negotiis insignis et admirabilis. Floruit temporibus nostris, et hujus Casinensis coenobii abbas exstitit, Sepultus vero est Parmae in monasterio Sancti Joannis Evangelistae, ubi capitulum generale nostrae congregationis celebratur. In anno Domini 1577.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXIX. DE APOLLINARE.

Apollinaris a Bauco ab adolescentia sub Lauro de Mantua abbate in Casino monachalem vestem induit, ubi per triginta ferme annos angelicam potius quam humanam vitam duxit. Hic vir vitae integerrimae, humanis et divinis litteris satis instructus, adeo in Seripturis sacris deditus erat, ut exercitationis causa, atque ne otio torpesceret, ex Veteri et Novo Testamento, atque ex diversis catholicis orthodoxisque Patribus innumeras aureas sententias excerpserit et scripserit. Decanus praeterea in hoc Casinensi monasterio existens, novitiorum curam invitus ac renitens suscepit. Tali igitur fungens officio, me, licet indignum, Casinensium monachorum coetui ascripsit, sub domino Matthia de Lignano, hujus coenobii abbate, cum viginti essem annorum, in anno Domini 1570. De hoc magistro meo illud silentio non praetereundum esse judicavi, quod ad vitae integritatem et puritatem pertinet. Nam talis ejus vita fuit, ut mortis suae tempore, in vigilia scilicet Nativitatis S. Joannis Baptistae, cum in missa, Gloria in excelsis Deo cantaretur in ecclesia, ejus anima ab ergastulo corporis egrediens in coelum ab angelis deferri cerneretur. Sepultus vero est in coemeterio S. Annae, anno Domini 1581.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXX. DE ANDREA.

Andreas a Suessa, juvenis praeclarae indolis, et vivacis ingenii, de civitate Neapolitana, ubi a parentibus studiis litterarum erudiendus traditus fuerat, egrediens, Casinum advenit, atque ab Isidoro de Placentia hujus sacri coenobii abbate monachus factus est. Hic exiguus quidem corpore, sed ingenio magnus, ab ipso fere suae conversationis initio, ob sui ingenii vivacitatem, et rerum mundanarum experientiam, cum singulari quadam prudentia ac solertia conjunctam, multis annis hujus nostri monasterii negotiis operam dedit. Inter multa praeclara ingenii sui monumenta, existens in regimine terrae nostrae Citrarii scripsit regesta duo omnium jurium et bonorum quae impraesentiarum in eadem terra a nostro monasterio possidentur. Humanis insuper et divinis litteris apprime eruditus, magnam sui apud omnes adhuc vivens exspectationem concitavit. Vivit etiam, et temporibus nostris hujus Casinensis monasterii praepositus existit.

SUPPLEMENTUM VIRORUM ILLUSTRIUM MONASTERII CASINENSIS CONFLATUM PER DOMNUM PLACIDUM ROMANUM MONACHUM ET DIACONUM CASINENSEM. CAPUT XXXI. DE GREGORIO.

Gregorius Cortesius Mutinensis abbas primum Sancti Petri de Perusio, deinde Sancti Benedicti de Mantua, et S. R. E. cardinalis a papa Paulo tertio creatus, anno Dom. 1542. Vir utriusque juris doctor, et in divinis Scripturis valde instructus. Scripsit quamplurima carmina in laudem D. Petri, quae impressa reperiuntur. Obiit Romae, et sepultus est in ecclesia Sanctorum Apostolorum anno Dom. 1584.

Explicit supplementum domni Placidi Romani et diaconi De Viris illustribus coenobii Casinensis.