Reader

I. Charta confirmationis ordinis et congregationis Fontis Ebraldi a Petro Pictaviensi episcopo. (Anno 1106.)[COSNIER, Exord. Font. Ebrald. p. 144.]

Ego PETRUS, Pictaviensis episcopus, notum facio omnibus tam praesentibus quam futuris, quod in nostro tempore quidam vir apostolicus nomine Robertus de Herbressello, verbo divinae praedicationis sagaciter invigilans, et tonitruo sanctae exhortationis, plures tam viros quam mulieres a saeculari luxu revocans, in nostrae dioecesi ecclesiam quamdam in honore sanctae Mariae virginis fundavit, in loco qui Fons Ebraudi vocatur, quem locum Arimburgis uxor Widonis filii Osmundi et Rivaria filia ejus ad aedificandam praedictam ecclesiam sibi sederunt, adjicientes terram quatuor bobus excolendam in duobus temporibus; ipse vero in praedicta ecclesia plures congregavit mulieres, quas sanctimoniales constituit, ut ibi regulariter viverent, et mundanis voluptatibus abrenuntiantes soli Deo deservirent. Non multo vero post tempore, ego domnum Paschalem apostolicum adiens, ab eo impetravi ut ibi semper sanctimoniales essent, et apostolica auctoritate firmavit. Ego quoque auctoritatem Paschalis papae secutus, vice a Deo mihi concessa idem confirmo, ut nulli personae liceat regulam sanctimonialium destruere, vel mutare, neque ipsas sanctimoniales inquietare, vel perturbare, neque de rebus quas juste possident, aliquid auferre, vel minuere, sed quidquid eis juste datum sive debitum, in perpetuum quiete possideant; et si quis aliquando contra privilegium apostolicum, et nostrum praeceptum facere praesumpserit, perpetuo maledictionis gladio feriatur, et illius machinatio irrita deficiat. Hoc autem factum est ex consensu venerabilium fratrum nostrorum Pictaviensis matricis Ecclesiae canonicorum, quod et firmum permaneret, manu propria signavimus, et aliis signandum tradidimus. Signum Petri episcopi. S. Aimerici decani. S. Vuillelmi archidiaconi. S. Arvei archidiaconi. S. Petri archidiaconi. S. Willelmi magistri scholarum. S. Reginaldi subd. S. Rainerii capicerii. S. Canonicorum.

Tradita Pictavis in capitulo anno ab Incarnatione Domini 1106, indictione XIV, epacta XIV, papa Paschali, Philippo rege Francorum, Petro episcopo Pictavorum, Willelmo duce Aquitanorum.