Fabulae
Choose a text
id="mobileReaderAuthor" class="mobile-reader-author" href="/authors/phaedrus" aria-label="More works by Phaedrus">
—
⋯
Original / primary: Perseus Lat2
appendix.1.1
Vulpem rogabat partem caudae simius,
appendix.1.2
Contegere honeste posset ut nudas nates;
appendix.1.3
Cui sic maligna: Longior fiat licet,
appendix.1.4
Tamen illam citius per lutum et spinas traham,
appendix.1.5
Quam parvam quamvis partem impertiar tibi.
appendix.2.1
Arbitrio si natura finxisset meo
appendix.2.2
Genus mortale, longe foret instructius:
appendix.2.3
Nam cuncta nobis attribuisset commoda,
appendix.2.4
Quaecumque indulgens Fortuna animali dedit:
appendix.2.5
Elephanti vires, et leonis impetum,
appendix.2.6
Cornicis aevum, gloriam tauri trucis,
appendix.2.7
Equi velocis placidam mansuetudinem,
appendix.2.8
Et adesset homini sua tamen sollertia.
appendix.2.9
Nimirum in caelo secum ridet Iuppiter,
appendix.2.10
Haec qui negavit magno consilio homini,
appendix.2.11
Ne sceptrum mundi raperet nostra audacia.
appendix.2.12
Ergo contenti munere invicti Iovis
appendix.2.13
Fatalis annos decurramus temporis,
appendix.2.14
Nec plus conemur quam sinit mortalitas.
appendix.3.1
Mercurium hospitio mulieres olim duae
appendix.3.2
Illiberali et sordido receperant:
appendix.3.3
Quarum una in cunis parvum habebat filium,
appendix.3.4
Quaestus placebat alteri meretricius.
appendix.3.5
Ergo ut referret gratiam officiis parem,
appendix.3.6
Abiturus et iam limen excedens ait:
appendix.3.7
Deum videtis; tribuam vobis protinus
appendix.3.8
Quod quaeque optarit. Mater suppliciter rogat
appendix.3.9
Barbatum ut videat natum quam primum suum;
appendix.3.10
Moecha ut sequatur sese quicquid tetigerit.
appendix.3.11
Volat Mercurius, intro redeunt mulieres.
appendix.3.12
Barbatus infans ecce vagitus ciet.
appendix.3.13
Id forte meretrix cum rideret validius,
appendix.3.14
Nares replentur umore, ut fieri solet.
appendix.3.15
Emungere igitur se volens prendit manu
appendix.3.16
Traxitque ad terram nasi longitudinem,
appendix.3.17
Et aliam ridens ipsa ridenda exstitit.
appendix.4.1
Olim Prometheus saeculi figulus novi
appendix.4.2
Cura subtili Veritatem fecerat,
appendix.4.3
Ut iura posset inter homines reddere.
appendix.4.4
Subito accersitus nuntio magni Iovis
appendix.4.5
Commendat officinam fallaci Dolo,
appendix.4.6
In disciplinam nuper quem receperat.
appendix.4.7
Hic studio accensus, facie simulacrum pari,
appendix.4.8
Una statura, simile et membris omnibus,
appendix.4.9
Dum tempus habuit, callida finxit manu.
appendix.4.10
Quod prope iam totum mire cum positum foret,
appendix.4.11
Lutum ad faciendos illi defecit pedes.
appendix.4.12
Redit magister; quo festinanter Dolus
appendix.4.13
Metu turbatus in suo sedit loco.
appendix.4.14
Mirans Prometheus tantam similitudinem,
appendix.4.15
Propriae videri voluit artis gloriam.
appendix.4.16
Igitur fornaci pariter duo signa intulit;
appendix.4.17
Quibus percoctis atque infuso spiritu,
appendix.4.18
Modesto gressu sancta incessit Veritas;
appendix.4.19
At trunca species haesit in vestigio.
appendix.4.20
Tunc falsa imago atque operis furtivi labor
appendix.4.21
Mendacium appellatum est; quod negantibus
appendix.4.22
Pedes habere facile et ipse assentio.
appendix.5.1
Ixion quod versari narratur rota,
appendix.5.2
Volubilem Fortunam iactari docet.
appendix.5.3
Adversus altos Sisyphus montes agit
appendix.5.4
Saxum labore summo, quod de vertice
appendix.5.5
Sudore semper irrito revolvitur,
appendix.5.6
Ostendit hominum sine fine esse miserias.
appendix.5.7
Quod stans in amne Tantalus medio sitit,
appendix.5.8
Avari describuntur, quos circumfluit
appendix.5.9
Usus bonorum, sed nil possunt tangere.
appendix.5.10
Urnis scelestas Danaides portant aquas,
appendix.5.11
Pertusa nec complere possunt dolia;
appendix.5.12
Immo luxuriae quicquid dederis perfluet.
appendix.5.13
Novem porrectus Tityos est per iugera,
appendix.5.14
Tristi renatum suggerens poenae iecur;
appendix.5.15
Quo quis maiorem possidet terrae locum,
appendix.5.16
Hoc demonstratur cura graviore affici.
appendix.5.17
Consulto involvit veritatem antiquitas,
appendix.5.18
Ut sapiens intellegeret, erraret rudis.
appendix.6.1
Utilius nobis quid sit dic, Phoebe, obsecro,
appendix.6.2
Qui Delphos et formosum Parnasum incolis.
appendix.6.3
Quid hoc? sacratae vatis horrescunt comae,
appendix.6.4
Tripodes moventur, mugit adytis Religio,
appendix.6.5
Tremuntque lauri et ipse pallescit dies.
appendix.6.6
Voces resolvit icta Python numine:
appendix.6.7
Audite, gentes, Delii monitus dei:
appendix.6.8
Pietatem colite; vota superis reddite;
appendix.6.9
Patriam, parentes, natos, castas coniuges
appendix.6.10
Defendite armis, hostem ferro pellite;
appendix.6.11
Amicos sublevate; miseris parcite;
appendix.6.12
Bonis favete, subdolis ite obviam;
appendix.6.13
Delicta vindicate; †cohibete impios;
appendix.6.14
Punite turpi thalamos qui violant stupro;
appendix.6.15
Malos cavete; nulli nimium credite.
appendix.6.16
Haec elocuta concidit virgo furens:
appendix.6.17
Furens profecto, nam quae dixit perdidit.
appendix.7.1
Aesopo quidam scripta recitarat mala,
appendix.7.2
In quis inepte multum se iactaverat.
appendix.7.3
Scire ergo cupiens quidnam sentiret senex,
appendix.7.4
Numquid tibi inquit visus sum superbior?
appendix.7.5
Haud vana nobis ingeni fiducia est.
appendix.7.6
Confectus ille pessimo volumine:
appendix.7.7
Ego inquit quod te laudas vehementer probo,
appendix.7.8
Namque hoc ab alio numquam continget tibi.
appendix.8.1
Magni Pompei miles vasti corporis
appendix.8.2
Fracte loquendo et ambulando molliter
appendix.8.3
Famam cinaedi traxerat certissimam.
appendix.8.4
Hic insidiatus nocte iumentis ducis,
appendix.8.5
Cum veste et auro et magno argenti pondere
appendix.8.6
Avertit mulos. Factum rumor dissipat;
appendix.8.7
Arguitur miles, rapitur in praetorium.
appendix.8.8
Tum Magnus: Quid ais? tune me, commilito,
appendix.8.9
Spoliare es ausus? Ille continuo exscreat
appendix.8.10
Sibi in sinistram et sputum digitis dissipat.
appendix.8.11
Sic, imperator, oculi exstillescant mei,
appendix.8.12
Si vidi aut tetigi. Tum vir animi simplicis
appendix.8.13
Id dedecus castrorum propelli iubet,
appendix.8.14
Nec cadere in illum credit tantam audaciam.
appendix.8.15
Breve tempus intercessit, et fidens manu
appendix.8.16
Unum e Romanis provocabat barbarus.
appendix.8.17
Sibi quisque metuit; primi mussitant duces.
appendix.8.18
Tandem cinaedus habitu, sed Mars viribus,
appendix.8.19
Adit sedentem pro tribunali ducem,
appendix.8.20
Et voce molli: Licet? Enimvero eici
appendix.8.21
Virum ut in re atroci Magnus stomachans imperat.
appendix.8.22
Tum quidam senior ex amicis principis:
appendix.8.23
Hunc ego committi satius fortunae arbitror,
appendix.8.24
In quo iactura levis est, quam fortem virum,
appendix.8.25
Qui casu victus temeritatis te arguat.
appendix.8.26
Assensit Magnus et permisit militi
appendix.8.27
Prodire contra; qui mirante exercitu,
appendix.8.28
Dicto celerius hostis abscidit caput
appendix.8.29
Victorque rediit. His tunc Pompeius super:
appendix.8.30
Corona, miles, equidem te dono libens,
appendix.8.31
Quia vindicasti laudem Romani imperi;
appendix.8.32
Sed exstillescant oculi sic inquit mei,
appendix.8.33
Turpe illud imitans ius iurandum militis,
appendix.8.34
Nisi tu abstulisti sarcinas nuper meas.
appendix.9.1
Cum castitatem Iuno laudaret suam,
appendix.9.2
Iucunditatis causam haud depellit Venus,
appendix.9.3
Nullamque ut affirmaret esse illi parem,
appendix.9.4
Interrogasse sic gallinam dicitur:
appendix.9.5
Dic sodes quanto possis satiari cibo.
appendix.9.6
Respondit illa: Quicquid dederis, satis erit,
appendix.9.7
Sic ut concedas pedibus aliquid scalpere.
appendix.9.8
Ne scalpas inquit satis est modius tritici?
appendix.9.9
Plane, immo nimium est, sed permittes scalpere?
appendix.9.10
Ex toto, ne quid scalpas, quid desideras?
appendix.9.11
Tum denique illa fassa est naturae malum:
appendix.9.12
Licet horreum mi pateat, ego scalpam tamen.
appendix.9.13
Risisse Iuno dicitur Veneris iocos,
appendix.9.14
Quia per gallinam denotarit feminas.
appendix.10.1
Paterfamilias saevum habebat filium.
appendix.10.2
Hic e conspectu cum patris recesserat,
appendix.10.3
Verberibus servos afficiebat plurimis
appendix.10.4
Et exercebat fervidam adulescentiam.
appendix.10.5
Aesopus ergo narrat hoc breviter seni:
appendix.10.6
Quidam iuvenco vetulum adiungebat bovem.
appendix.10.7
Is cum refugiens impari collo iugum
appendix.10.8
Aetatis excusaret vires languidas:
appendix.10.9
Non est quod timeas, inquit illi rusticus;
appendix.10.10
Non ut labores dico, sed ut istum domes,
appendix.10.11
Qui calce et cornu multos reddit debiles.
appendix.10.12
Et tu nisi istum tecum assidue detines
appendix.10.13
Feroxque ingenium comprimis clementia,
appendix.10.14
Vide ne querela maior accrescat domus.
appendix.10.15
Atrocitati mansuetudo est remedium.
appendix.11.1
Victorem forte gymnici certaminis
appendix.11.2
Iactantiorem cum vidisset Phryx sophus,
appendix.11.3
Interrogavit an plus adversarius
appendix.11.4
Valuisset eius. Ille: Ne istud dixeris;
appendix.11.5
Multo fuere vires maiores meae.
appendix.11.6
Quod inquit ergo, stulte, meruisti decus,
appendix.11.7
Minus valentem si vicisti fortior?
appendix.11.8
Ferendus esses, forte si te diceres
appendix.11.9
Superasse, melior qui fuisset viribus.
appendix.12.1
Asinus iacentem vidit in prato lyram.
appendix.12.2
Accessit et temptavit chordas ungula;
appendix.12.3
Sonuere tactae. Bella res sed mehercules
appendix.12.4
Male cessit inquit artis quia sum nescius.
appendix.12.5
Si repperisset aliquis hanc prudentior,
appendix.12.6
Divinis aures oblectasset cantibus.
appendix.12.7
Sic saepe ingenia calamitate intercidunt.
appendix.13.1
Per aliquot annos quaedam dilectum virum
appendix.13.2
Amisit et sarcophago corpus condidit;
appendix.13.3
A quo revelli nullo cum posset modo
appendix.13.4
Et in sepulcro lugens vitam degeret,
appendix.13.5
Claram assecuta est famam castae virginis.
appendix.13.6
Interea fanum qui compilarant Iovis,
appendix.13.7
Cruci suffixi luerunt poenas numini.
appendix.13.8
Horum reliquias ne quis posset tollere,
appendix.13.9
Custodes dantur milites cadaverum
appendix.13.10
Monumentum iuxta mulier quo se incluserat.
appendix.13.11
Aliquando sitiens unus de custodibus
appendix.13.12
Aquam rogavit media nocte ancillulam,
appendix.13.13
Quae forte dominae tunc assistebat suae
appendix.13.14
Dormitum eunti; namque lucubraverat
appendix.13.15
Et usque in serum vigilias perduxerat.
appendix.13.16
Paulum reclusis foribus miles prospicit
appendix.13.17
Videtque et aegram et facie pulchra feminam.
appendix.13.18
Corruptus animus ilico succenditur
appendix.13.19
Et uritur impudentis sensim cupiditas.
appendix.13.20
Sollers acumen mille causas invenit,
appendix.13.21
Per quas videre possit illam saepius.
appendix.13.22
Cotidiana capta consuetudine
appendix.13.23
Paulatim facta est advenae submissior;
appendix.13.24
Mox artior revinxit animum copula.
appendix.13.25
Hic dum consumit noctes custos diligens,
appendix.13.26
Desideratum est corpus ex una cruce.
appendix.13.27
Turbatus miles factum exponit mulieri.
appendix.13.28
At sancta mulier: Non est quod timeas, ait,
appendix.13.29
Virique corpus tradit figendum cruci,
appendix.13.30
Ne subeat ille poenas neglegentiae.
appendix.13.31
Sic turpitudo laudis obsedit locum.
appendix.14.1
Unam expetebant virginem iuvenes duo;
appendix.14.2
Vicit locuples genus et formam pauperis.
appendix.14.3
Ut nuptiarum dictus advenit dies,
appendix.14.4
Amans dolorem quia non poterat perpeti,
appendix.14.5
Maerens propinquos contulit se in hortulos,
appendix.14.6
Quos ultra paulo villa splendida divitis
appendix.14.7
Erat acceptura virginem e matris sinu,
appendix.14.8
Parum ampla in urbe visa quod fuerat domus.
appendix.14.9
Pompa explicatur, turba concurrit frequens,
appendix.14.10
Et coniugalem praebet Hymenaeus facem.
appendix.14.11
Asellus autem, qui solebat pauperi
appendix.14.12
Quaestum referre, stabat portae in limine.
appendix.14.13
Illum puellae casu conducunt suae,
appendix.14.14
Viae labores teneros ne laedant pedes.
appendix.14.15
Repente caelum, Veneris misericordia,
appendix.14.16
Ventis movetur, intonat mundi fragor
appendix.14.17
Noctemque densis horridam nimbis parat:
appendix.14.18
Lux rapitur oculis et simul vis grandinis
appendix.14.19
Effusa trepidos passim comites dissipat,
appendix.14.20
Sibi quemque cogens petere praesidium fuga.
appendix.14.21
Asellus notum proximum tectum subit
appendix.14.22
Et voce magna sese venisse indicat.
appendix.14.23
Procurrunt pueri, pulchram aspiciunt virginem
appendix.14.24
Et admirantur: deinde domino nuntiant.
appendix.14.25
Inter sodales ille paucos accubans
appendix.14.26
Amorem crebris avocabat poculis.
appendix.14.27
Ubi nuntiatum est, recreatus gaudiis
appendix.14.28
Hortante Baccho et Venere, dulces perficit
appendix.14.29
Aequalitatis inter plausus nuptias.
appendix.14.30
Quaerunt parentes per praeconem filiam;
appendix.14.31
Novus maritus coniuge amissa dolet.
appendix.14.32
Quid esset actum postquam populo innotuit,
appendix.14.33
Omnes favorem comprobarunt caelitum.
appendix.15.1
Aesopus turpi cum serviret feminae,
appendix.15.2
Quae se expingendo totum intricaret diem,
appendix.15.3
Vestem, uniones, aurum, argentum sumeret,
appendix.15.4
Nec inveniret digito qui se tangeret:
appendix.15.5
Licetne paucis? inquit—Dicas.—Censeo,
appendix.15.6
Quidvis efficies, cultum si deposueris.—
appendix.15.7
Adeone per me videor tibi meliuscula?—
appendix.15.8
Immo, nisi dederis, sponda cessabit tua.
appendix.15.9
—At non cessabunt latera respondit tua,
appendix.15.10
Et obiurgari iussit servum garrulum.
appendix.15.11
Post paulo armillam tollit fur argenteam.
appendix.15.12
Eam non apparere ut dictum est mulieri,
appendix.15.13
Furore plena vocat omnes et verbera
appendix.15.14
Proponit gravia, verum si non dixerint.
appendix.15.15
Aliis minare inquit me non falles, era;
appendix.15.16
Flagris sum caesus, verum quia dixi modo.
appendix.16.1
Feles habebat gallus lecticarios.
appendix.16.2
Hunc gloriosum vulpes ut vidit vehi,
appendix.16.3
Sic est locuta: Moneo praecaveas dolum;
appendix.16.4
Istorum vultus namque si consideras,
appendix.16.5
Praedam portare iudices, non sarcinam.
appendix.16.6
Postquam esurire coepit societas fera,
appendix.16.7
Discerpsit dominum et fecit partes facinoris.
appendix.17.1
Premente partu scrofa cum gemeret iacens,
appendix.17.2
Accurrit lupus et obstetricis partibus
appendix.17.3
Se posse fungi dixit, promittens opem.
appendix.17.4
Quae vero nosset pectoris fraudem improbi,
appendix.17.5
Suspectum officium repudiavit malefici
appendix.17.6
Et: Satis est inquit si recedis longius.
appendix.17.7
Quod si perfidiae se commisisset lupi,
appendix.17.8
Pari dolore fata deflesset sua.
appendix.18.1
Servus profugiens dominum naturae asperae,
appendix.18.2
Aesopo occurrit notus e vicinia.
appendix.18.3
Quid tu confusus?—Dicam tibi clare, pater,
appendix.18.4
Hoc namque es dignus appellari nomine,
appendix.18.5
Tuto querela quia apud te deponitur.
appendix.18.6
Plagae supersunt, desunt mihi cibaria;
appendix.18.7
Subinde ad villam mittor sine viatico.
appendix.18.8
Domi si cenat, totis persto noctibus,
appendix.18.9
Sive est vocatus, iaceo ad lucem in semita.
appendix.18.10
Emerui libertatem, canus servio.
appendix.18.11
Ullius essem culpae mihi si conscius,
appendix.18.12
Aequo animo ferrem; numquam sum factus satur
appendix.18.13
Et super infelix saevum patior dominium.
appendix.18.14
Has propter causas et quas longum est promere,
appendix.18.15
Abire destinavi quo tulerint pedes.
appendix.18.16
Ergo inquit audi: cum mali nil feceris,
appendix.18.17
Haec experiris, ut refers, incommoda;
appendix.18.18
Quid si peccaris? quae te passurum putas?
appendix.18.19
Tali consilio est a fuga deterritus.
appendix.19.1
Equum ex quadriga multis palmis nobilem
appendix.19.2
Abegit quidam et in pistrinum vendidit.
appendix.19.3
Productus ad bibendum cum foret a molis,
appendix.19.4
In circum aequales ire conspexit suos,
appendix.19.5
Ut grata ludis redderent certamina.
appendix.19.6
Lacrimis obortis: Ite felices ait;
appendix.19.7
Celebrate sine me cursu sollemnem diem;
appendix.19.8
Ego quo scelesta furis attraxit manus,
appendix.19.9
Ibi sorte tristi fata deflebo mea.
appendix.20.1
Si quando in silvis urso desunt copiae,
appendix.20.2
Scopulosum ad littus currit et prendens petram
appendix.20.3
Pilosa crura sensim demittit vado;
appendix.20.4
Quorum inter villos simul haeserunt canceres,
appendix.20.5
In terram abripiens excutit praedam maris
appendix.20.6
Escaque fruitur passim collecta vafer.
appendix.20.7
Ergo etiam stultis acuit ingenium fames.
appendix.21.1
Quidam per agros devium carpens iter
appendix.21.2
Ave exaudivit et moratus paululum,
appendix.21.3
Adesse ut vidit neminem, cepit gradum.
appendix.21.4
Iterum salutat idem ex occulto sonus.
appendix.21.5
Voce hospitali confirmatus restitit,
appendix.21.6
Ut quisquis esset par officium reciperet.
appendix.21.7
Cum circumspectans errore haesisset diu
appendix.21.8
Et perdidisset tempus aliquot milium,
appendix.21.9
Ostendit sese corvus et supervolans
appendix.21.10
Ave usque ingessit. Tum se lusum intellegens:
appendix.21.11
At male tibi sit inquit ales pessime,
appendix.21.12
Qui festinantis sic detinuisti pedes.
appendix.22.1
Pastor capellae cornu baculo fregerat:
appendix.22.2
Rogare coepit ne se domino proderet.
appendix.22.3
Quamvis indigne laesa, reticebo tamen;
appendix.22.4
Sed res clamabit ipsa quid deliqueris.
appendix.23.1
Serpens lacertam forte aversam prenderat;
appendix.23.2
Quam devorare patula cum vellet gula,
appendix.23.3
Arripuit illa prope iacentem surculum,
appendix.23.4
Et pertinaci morsu transversum tenens,
appendix.23.5
Avidum sollerti rictum frenavit mora.
appendix.23.6
Praedam dimisit ore serpens irritam.
appendix.24.1
Odiosa cornix super ovem consederat;
appendix.24.2
Quam dorso cum tulisset invita et diu:
appendix.24.3
Hoc inquit si dentato fecisses cani,
appendix.24.4
Poenas dedisses. Illa contra pessima:
appendix.24.5
Despicio inermes, eadem cedo fortibus;
appendix.24.6
Scio quem lacessam, cui dolosa blandiar;
appendix.24.7
Ideo senectam mille in annos prorogo.
appendix.25.1
Cum servus nequam Socrati malediceret,
appendix.25.2
Uxorem domini qui corrupisset sui,
appendix.25.3
Idque ille sciret notum circumstantibus:
appendix.25.4
Places tibi inquit quia cui non debes places;
appendix.25.5
Sed non impune, quia cui debes non places.
appendix.26.1
Cum venatorem celeri pede fugeret lepus
appendix.26.2
Et a bubulco visus veprem irreperet:
appendix.26.3
Per superos oro perque spes omnes tuas,
appendix.26.4
Ne me indices, bubulce; nihil umquam mali
appendix.26.5
Huic agro feci. Et rusticus: Ne timueris;
appendix.26.6
Late securus. Iamque venator sequens:
appendix.26.7
Quaeso, bubulce, numquid huc venit lepus?
appendix.26.8
Venit, sed abiit hac ad laevam; et dexteram
appendix.26.9
Demonstrat nutu partem. Venator citus
appendix.26.10
Non intellexit seque e conspectu abstulit.
appendix.26.11
Tunc sic bubulcus: Ecquid est gratum tibi,
appendix.26.12
Quod te celavi? Linguae prorsus non nego
appendix.26.13
Habere atque agere maximas me gratias;
appendix.26.14
Verum oculis ut priveris opto perfidis.
appendix.27.1
Cum blandiretur iuveni meretrix perfida,
appendix.27.2
Et ille laesus multis saepe iniuriis
appendix.27.3
Tamen praeberet sese facilem mulieri,
appendix.27.4
Sic insidiatrix: Omnes muneribus licet
appendix.27.5
Contendant, ego te plurimi facio tamen.
appendix.27.6
Iuvenis recordans quotiens deceptus foret:
appendix.27.7
Libenter, inquit, mea lux, hanc vocem audio,
appendix.27.8
Non quod fidelis, sed quod iucunda est mihi.
appendix.28.1
Canes effugere cum iam non possit fiber,
appendix.28.2
(Graeci loquaces quem dixerunt castorem
appendix.28.3
Et indiderunt bestiae nomen dei,
appendix.28.4
Illi qui iactant se verborum copia),
appendix.28.5
Abripere morsu fertur testiculos sibi,
appendix.28.6
Quia propter illos sentiat sese peti.
appendix.28.7
Divina quod ratione fieri non negem;
appendix.28.8
Venator namque simul invenit remedium,
appendix.28.9
Omittit ipsum persequi et vocat canes.
appendix.28.10
Hoc si praestare possent homines, ut suo
appendix.28.11
Vellent carere, tuti posthac viverent;
appendix.28.12
Haud quisquam insidias nudo faceret corpori.
appendix.29.1
Papilio vespam praetervolitans viderat.
appendix.29.2
O sortem iniquam! dum vivebant corpora,
appendix.29.3
Quorum ex reliquiis animam nos accepimus,
appendix.29.4
Ego eloquens in pace, fortis proeliis,
appendix.29.5
Arte omni princeps inter aequales fui.
appendix.29.6
En cuncta: levitas putris et volito cinis!
appendix.29.7
Tu qui fuisti mulus clitellarius,
appendix.29.8
Quemcumque visum est laedis infixo aculeo.
appendix.29.9
Et vespa dignam moribus vocem edidit:
appendix.29.10
Non qui fuerimus, sed qui nunc simus vide.
appendix.30.1
Avis quam dicunt terraneolam rustici,
appendix.30.2
In terra nidum quia componit scilicet,
appendix.30.3
Forte occucurrit improbae vulpeculae;
appendix.30.4
Qua visa, pennis altius se sustulit.
appendix.30.5
Salve inquit illa cur me fugisti, obsecro?
appendix.30.6
Quasi non abunde sit mihi in prato cibus,
appendix.30.7
Grilli, scarabaei, locustarum copia:
appendix.30.8
Nihil est quod metuas: ego te multum diligo
appendix.30.9
Propter quietos mores et vitam probam.
appendix.30.10
Respondit contra: Tu quidem bene praedicas;
appendix.30.11
In campo non sum, sed par sub divo tibi.
appendix.30.12
Quin sequere: salutem tibi non committo meam.
appendix.epilogus.1
Hoc qualecumque est Musa quod ludit mea,
appendix.epilogus.2
Nequitia pariter laudat et frugalitas,
appendix.epilogus.3
Sed haec simpliciter; illa tacite irascitur.