Quintus Smyrnaeus
Fall of Troy
Troy 12.1
Choose a text
More by Quintus Smyrnaeus
—
Perseus Grc2
12.1
ἀλλʼ ὅτε δὴ μάλα πολλὰ κάμον περὶ τείχεα Τροίης
12.2
αἰχμηταὶ Δαναοί, πολέμου δʼ οὐ γίνετο τέκμωρ,
12.3
δὴ τότʼ ἀριστήων ἄγυριν ποιήσατο Κάλχας
12.4
εὖ εἰδὼς ἀνὰ θυμὸν ὑπʼ ἐννεσίῃς Ἑκάτοιο
12.5
πτήσιας οἰωνῶν ἠδʼ ἀστέρας ἄλλα τε πάντα
12.6
σήμαθʼ, ὅσʼ ἀνθρώποισι θεῶν ἰότητι πέλονται,
12.7
καί σφιν ἀγειρομένοισιν ἔπος ποτὶ τοῖον ἔειπε·
12.8
μηκέτι πὰρ τείχεσσιν ἐφεζόμενοι πονέεσθε,
12.9
ἀλλʼ ἄλλην τινὰ μῆτιν ἐνὶ φρεσὶ μητιάασθε
12.10
καὶ δόλον, ὅς λαοῖσι καὶ ἡμῖν ἔσσετʼ ὄνειαρ·
12.11
ἦ γὰρ ἔγωγε χθιζὸν ἐσέδρακον ἐνθάδε σῆμα·
12.12
ἴρηξ σεῦε πέλειαν· ἐπειγομένη δʼ ἄρα κείνη
12.13
χηραμὸν ἐς πέτρης κατεδύσατο· τῇ δʼ ὁ χολωθεὶς
12.14
ἀργαλέως μάλα πολλὸν ἐπὶ χρόνον ἀγχόθι μίμνε
12.15
χηραμοῦ· ἡ δʼ ἀλέεινεν· ὁ δʼ ἐνθέμενος χόλον αἰνὸν
12.16
θάμνῳ ὑπεκρύφθη· ἡ δʼ ἔκθορεν ἀφραδίῃσιν
12.17
ἔμμεναι ἐλπομένη μιν ἀπόπροθεν· ὅς δʼ ἐπαερθεὶς
12.18
δειλαίῃ τρήρωνι φόνον στονόεντʼ ἐφέηκε·
12.19
τῷ νῦν μήτι βίῃ πειρώμεθα Τρώιον ἄστυ
12.20
περσέμεν, ἀλλʼ εἴ πού τι δόλος καὶ μῆτις ἀνύσσῃ.
12.21
ὣς ἄρʼ ἔφη· τῶν δʼ οὔτις ἔφη φρεσὶ τεκμήρασθαι
12.22
ἄλκαρ ὀϊζυροῖο μόθου· δίζοντο δὲ μῆχος
12.23
εὑρέμεναι· μοῦνος δὲ σαοφροσύνῃσι νόησεν
12.24
υἱὸς Λαέρταο καὶ ἀντίον ἔκφατο μῦθον·
12.25
ὦ φίλʼ, ἐπουρανίοισι τετιμένε πάγχυ θεοῖσιν,
12.26
εἰ ἐτεὸν πέπρωται ἐϋπτολέμοισιν Ἀχαιοῖς
12.27
ἐκπέρσαι Πριάμοιο δολοφροσύνῃσι πόληα,
12.28
ἵππον τεκτήναντες ἀριστέες ἐς λόχον ἄνδρες
12.29
βησόμεθʼ ἀσπασίως· λαοὶ δʼ ἀπὸ νόσφι νέεσθαι
12.30
ἐς Τένεδον σὺν νηυσίν, ἐνιπρῆσαι δʼ ἄρα πάντες
12.31
ἃς κλισίας, ἵνα Τρῶες ἀπʼ ἄστεος ἀθρήσαντες
12.32
ἐς πεδίον προχέωνται ἀταρβέες· ἀλλά τις ἀνὴρ
12.33
θαρσαλέος, τόν γʼ οὔτις ἐπίσταται ἐν Τρώεσσι,
12.34
μιμνέτω ἔκτοθεν ἵππου ἀρήϊον ἐνθέμενος κῆρ,
12.35
ὅστις ὑποκρίναιτο βίην ὑπέροπλον Ἀχαιῶν
12.36
ῥέξαι ὑπὲρ νόστοιο λιλαιομένων μέγʼ Zimmermann, for me/n of Koechly. ἀλύξαι,
12.37
ἵππῳ ὑποπτήξας εὐεργέϊ· τὸν δʼ ἐκάμοντο
12.38
Παλλάδι χωομένῃ Τρώων ὕπερ αἰχμητάων·
12.39
καὶ τὰ μὲν ὣς ὲπὶ δηρὸν ἀνειρομένοισι πιφαύσκειν,
12.40
εἰσόκε οἱ πεπίθωνται ἀταρτηροί περ ἐόντες,
12.41
ἐς δὲ πόλιν μιν ἄγωσι θοῶς ἐλεεινὸν ἐόντα,
12.42
ὄφρʼ ἡμῖν ἀλεγεινὸν ἐς Ἄρεα σῆμα πέληται,
12.43
τοῖς μὲν ἄρʼ αἰθαλόεντα θοῶς ἀνὰ πυρσὸν ἀείρας,
12.44
τοὺς δʼ ἄρʼ ἐποτρύνας ἐκβήμεναι εὐρέος ἵππου
12.45
ὁππότε Τρώιοι υἷες ἀκηδέες ὑπνώωσιν.
12.46
ὣς φάτο· τὸν δʼ ἄρα πάντες ἐπῄνεον· ἔξοχα δʼ ἄλλων
12.47
Κάλχας μιν θαύμαζεν, ὅπως ὑπεθήκατʼ Ἀχαιοῖς
12.48
μῆτιν καὶ δόλον ἐσθλόν, ὃς Ἀργείοισιν ἔμελλε
12.49
νίκης ἔμμεναι ἄλκαρ, ἀτὰρ μέγα Τρώεσι πῆμα·
12.50
τοὔνεκʼ ἀριστήεσσιν ἐϋπτολέμοισι μετηύδα·
12.51
μηκέτι νῦν δόλον ἄλλον ἐνὶ φρεσὶ μητιάασθε,
12.52
ὦ φίλοι, ἀλλὰ πιθέσθαι ἐϋπτολέμῳ Ὀδυσῆι·
12.53
οὐδέ οἱ ἔσσετʼ ἄπρηκτον ἐϋφρονέοντι νόημα·
12.54
ἤδη γὰρ Δαναοῖσι θεοὶ τελέουσιν ἐέλδωρ,
12.55
σήματα δʼ οὐκ ἀτέλεστʼ ἀναφαίνεται ἄλλοθεν ἄλλα·
12.56
Ζηνὸς μὲν γὰρ ὕπερθε μέγα κτυπέουσι διʼ αἴθρης
12.57
βρονταὶ ὁμῶς στεροπῇστ· παραΐσσουσι δὲ λαοὺς
12.58
δεξιοὶ ὄρνιθες ταναῇ ὀπὶ κεκλήγοντες.
12.59
ἀλλʼ ἄγε μηκέτι πολλὸν ἐπὶ χρόνον ἀμφὶ πόληα
12.60
μίμνωμεν· Τρωσὶν γὰρ ἐνέπνευσεν μέγʼ ἀνάγκη
12.61
θάρσος, ὅ περ πρὸς Ἄρηα καὶ οὐτιδανόν περ ἐγείρει·
12.62
κάρτιστοι δὲ τότʼ ἄνδρες ἐπὶ μόθον, ὁππότε θυμὸν
12.63
παρθέμενοι στονόεντος ἀφειδήσωσιν ὀλέθρου·
12.64
ὡς νῦν Τρώιοι υἷες ἀταρβέες ἀμφιμάχονται
12.65
ἄστυ περὶ σφέτερον· μέγα δέ σφισι μαίνεται ἦτορ.
12.66
ὣς φάμενον προσέειπεν Ἀχιλλέος ὄβριμος υἱός·
12.67
ὦ Κάλχαν, δήϊοισι καταντίον ἄλκιμοι ἄνδρες
12.68
μάρνανται· τοὶ δʼ ἐντὸς ἀλευάμενοι ἀπὸ πύργων
12.69
οὐτιδανοὶ πονέονται, ὅσων φρένα δεῖμα χαλέπτει·
12.70
τῷ νῦν μήτε δόλον φραζώμεθα, μήτε τι μῆχος
12.71
ἄλλο· πόνῳ γὰρ ἔοικεν ἀριστέας ἔμμεναι ἄνδρας
12.72
καὶ δορί· θαρσαλέοι γὰρ ἀμείνονες ἐν δαῒ φῶτες.
12.73
ὣς φάμενον προσέειπε μένος Λαερτιάδαο·
12.74
ὦ τέκος ὀβριμόθυμον ἀταρβέος Αἰακίδαο,
12.75
ταῦτα μέν, ὡς ἐπέοικεν ἀμύμονι φωτὶ ἐσθλῷ,
12.76
θαρσαλέως μάλα πάντα διίκεο χερσὶ πεποιθώς·
12.77
ἀλλʼ οὔτʼ ἀκαμάτοιο τεοῦ πατρὸς ἄτρομος ἀλκὴ
12.78
ἔσθενεν ὄλβιον ἄστυ διαπραθέειν Πριάμοιο
12.79
οὔθʼ ἡμεῖς μάλα πολλὰ πονεύμενοι· ἀλλʼ ἄγε θᾶσσον
12.80
Κάλχαντος βουλῇσι θοάς ἐπὶ νῆας ἰόντες
12.81
ἵππον τεκταίνωμεν ὑπαὶ παλάμῃσιν Ἐπειοῦ,
12.82
ὅς ῥά τε πολλὸν ἄριστος ἐν Ἀργείοισι τέτυκται
12.83
εἵνεκα τεκτοσύνης· δέδαεν δέ μιν ἔργον Ἀθήνη.
12.84
ὣς φάτο· τῷ δʼ ἄρα πάντες ἀριστῆες πεπίθοντο
12.85
νόσφι Νεοπτολέμοιο δαΐφρονος· οὐδὲ μὲν ἐσθλὸν
12.86
πεῖθε Φιλοκτήταο νόον κρατερὰ φρονέοντος·
12.87
ὑσμίνης γὰρ ἔτʼ ἔσκον ὀϊζυρῆς ἀκόρητοι.
12.88
ὥρμαινον δὲ μάχεσθαι ἀνὰ κλόνον· ἀμφὶ δὲ λαοὺς
12.89
σφωιτέρους ἐκέλευον ἀπειρέσιον περὶ τεῖχος
12.90
πάντα φέρειν, ὅσα δῆριν ἐνὶ πτολέμοισιν ὀφέλλει,
12.91
ἐλπόμενοι πτολίεθρον ἐΰκτιτον ἐξαλαπάξαι·
12.92
ἄμφω γὰρ βουλῇσι θεῶν ἐς δῆριν ἵκοντο.
12.93
καί νύ κεν αἶψα τέλεσσαν, ὅσα σφίσιν ἤθελε θυμός,
12.94
εἰ μὴ Ζεὺς νεμέσησεν ἀπʼ αἰθέρος, ἀμφὶ δὲ γαῖαν
12.95
Ἀργείων ἐλέλιξεν ὑπαὶ ποσί, σὺν δʼ ἐτίναξεν
12.96
ἠέρα πᾶσαν ὕπερθε, βάλεν δʼ ἀκάμαντα κεραυνὸν
12.97
ἡρώων προπάροιθεν· ὑπεσμαράγησε δὲ πᾶσα
12.98
Δαρδανίη· τῶν δʼ αἶψα μετετράπετʼ ἠῢ νόημα
12.99
ἐς φόβον· ἐκ δʼ ἐλάθοντο βίης καὶ κάρτεος ἐσθλοῦ,
12.100
καί ῥα κλυτῷ Κάλχαντι καὶ οὐκ ἐθέλοντε πίθοντο·
12.101
ἐς δʼ ἄρα νῆας ἵκοντο σὺν Ἀργείοισι καὶ ἄλλοις
12.102
μάντιν ἀγασσάμενοι, τὸν ἄρʼ ἐκ Διὸς ἔμμεν ἔφαντο,
12.103
ἐκ Διὸς ἢ Φοίβοιο· πίθοντο δέ οἱ μάλα πάντα.
12.104
ἦμος δʼ αἰγλήεντα περιστρέφετʼ οὐρανὸν ἄστρα
12.105
πάντοθε μαρμαίροντα, πόνου δʼ ἐπιλήθεται ἀνήρ,
12.106
δὴ τότʼ Ἀθηναίη μακάρων ἕδος αἰπὺ λιποῦσα
12.107
ἤλυθε παρθενικῇ ἁπαλόχροϊ πάντʼ εἰκυῖα
12.108
ἐς νῆας καὶ λαόν· ἀρηιφίλου δʼ ἄρʼ Ἐπειοῦ
12.109
ἔστη ὑπὲρ κεφαλῆς ἐν ὀνείραϊ, καί μιν ἀνώγει
12.110
τεῦξαι δούριον ἵππον· ἔφη δέ οἱ ἐγκονέοντι
12.111
αὐτὴ συγκαμέειν, αὐτὴ δʼ ἄφαρ ἀγχόθι βῆναι
12.112
ἔργον ἐς ὀτρύνουσα. Θεῆς δʼ ὅ γε μῦθον ἀκούσας
12.113
καγχαλόων ἀνὰ θυμὸν ἀκηδέος ἔκθορεν ὕπνου·
12.114
ἔγνω δʼ ἀθάνατον θεὸν ἄμβροτον· οὐδέ οἱ ἦτορ
12.115
ἄλλο παρὲξ ὥρμαινε, νόον δʼ ἔχεν αἰὲν ἐπʼ ἔργῳ
12.116
θεσπεσίῳ· πινυτὴ δὲ περὶ φρένας ἤιε τέχνη.
12.117
Ἠὼς δʼ ὁππόθʼ ἵκανεν ἀπωσαμένη κνέφας ἠῢ
12.118
εὶς ἔρεβος, χαροπὴ δὲ διʼ ἠέρος ἤιεν αἴγλη,
12.119
δὴ τότε θεῖον ὄνειρον ἐν Ἀργείοισιν Ἐπειός,
12.120
ὡς ἴδεν, ὡς ἤκουσεν, ἐελδομένοισιν ἔειπεν·
12.121
οἱ δέ οἱ εἰσαΐοντες ἀπειρέσιον κεχάροντο.
12.122
καὶ τότʼ ἄρʼ Ἀτρέος υἷες ἐς ἄγκεα τηλεθάοντα
12.123
Ἴδης ὑψικόμοιο θοοὺς προέηκαν ἱκέσθαι
12.124
ἀνέρας· οἱ δʼ ἐλάτῃσιν ἐπιβρίσαντες ἀνʼ ὕλην,
12.125
τάμνον δένδρεα μακρά· περικτυπέοντο δὲ βῆσσαι
12.126
θεινομένων· δολιχαὶ δὲ κατʼ οὔρεα μακρὰ κολῶναι
12.127
δεύοντʼ ἐκ ξυλόχοιο· νάπη δʼ ἀνεφαίνετο πᾶσα
12.128
θήρεσιν οὐκέτι τόσσον ἐπήρατος, ὡς τὸ πάροιθε·
12.129
πρέμνα δʼ ἀπαυαίνοντο βίην ποθέοντʼ ἀνέμοιο.
12.130
καὶ τὰ μὲν ἂρ πελέκεσσι διατμήγοντες Ἀχαιοὶ
12.131
ἐσσυμένως φορέεσκον ἐπʼ ᾐόνας Ἑλλησπόντου
12.132
ἐξ ὄρεος λασίοιο· μόγησε δὲ θυμὸς ἐπʼ ἔργῳ
12.133
αἰζηῶν τε καὶ ἡμιόνων· πονέοντο δὲ λαοὶ
12.134
ἄσπετον Supplied by Zimmermann. ἄλλοθεν ἄλλος ὑποδρήσσοντες Ἐπειῷ·
12.135
οἱ μὲν γὰρ τέμνεσκον ὑπʼ ὀκριόεντι σιδήρῳ
12.136
δούρατα καὶ σανίδας διεμέτρεον· οἱ δʼ ἄρʼ ἀπʼ ὄζους
12.137
λείαινον πελέκεσσιν ἔτʼ ἀπρίστων ἀπὸ φιτρῶν,
12.138
ἄλλος δʼ ἄλλο τι ῥέζε πονεύμενος· αὐτὰρ Ἐπειὸς
12.139
ἵππου δουρατέοιο πόδας κάμεν, αὐτὰρ ἔπειτα
12.140
νηδύα, τῇ δʼ ἐφύπερθε συνήρμοσε νῶτα καὶ ἰξὺν
12.141
ἐξόπιθεν, δειρὴν δὲ πάρος, καθύπερθε δὲ χαίτην
12.142
αὐχένος ὑψηλοῖο καθήρμοσεν, ὡς ἐτεόν περ
12.143
κινυμένην, λάσιον δὲ κάρη καὶ ἐΰτριχον οὐρήν,
12.144
οὔατά τʼ ὀφθαλμούς τε διειδέας ἄλλα τε πάντα,
12.145
οἷς ἐπικίνυται ἵππος· ἀέξετο δʼ ἱερὸν ἔργον
12.146
ὡς ἐτεὸν ζώοντος, ἐπεὶ θεὸς ἀνέρι τέχνην
12.147
δῶκʼ ἐρατήν· τετέλεστο δʼ ἐνὶ τρισὶν ἤμασι πάντα
12.148
Παλλάδος ἐννεσίῃσι· πολὺς δʼ ἐπεγήθεε λαὸς
12.149
Αργείων· θαύμαζε δʼ ὅπως ἐπὶ δούρατι θυμὸς
12.150
καὶ τάχος ἐκπεπόνητο ποδῶν, χρεμέθοντί τʼ ἐῴκει.
12.151
καὶ τότε δῖος Ἐπειὸς ὑπὲρ μεγακήτεος ἵππου
12.152
εὔχετʼ ἐπʼ ἀκαμάτῳ Τριτωνίδι χεῖρας ὀρέξας·
12.153
κλῦθι, θεὰ μεγάθυμε, σάου δʼ ἐμὲ καὶ τεὸν ἵππον.
12.154
ὣς φάτο· τοῦ δʼ ἐσάκουσε θεὰ πολύμητις Ἀθήνη,
12.155
καί ῥά οἱ ἔργον ἔτευξεν ἐπιχθονίοισιν ἀγητὸν
12.156
πᾶσιν, ὅσοι μιν ἴδοντο καὶ οἳ μετόπισθε πύθοντο.
12.157
ἀλλʼ ὅτε δὴ Δαναοὶ μὲν ἐγήθεον ἔργον Ἐπειοῦ
12.158
δερκόμενοι, Τρῶες δὲ πεφυζότες ἔνδοθι πύργων
12.159
μίμνον ἀλευάμενοι θάνατον καὶ ἀνηλέα κῆρα,
12.160
δὴ τότʼ ἐπʼ Ὠκεανοῖο ῥοὰς καὶ Τηθύος ἄντρα
12.161
Ζηνὸς ὑπερθύμοιο θεῶν ἀπάτερθε μολόντος
12.162
ἔμπεσεν ἀθανάτοισιν ἔρις· δίχα δέ σφισι θυμὸς
12.163
ἔπλετʼ ὀρινομένων· ἀνέμων δʼ ἐπιβάντες ἀέλλαις
12.164
οὐρανόθεν φορέοντο ποτὶ χθόνα· τοῖσι δʼ ὕπʼ αἰθὴρ
12.165
ἔβραχεν· οἱ δὲ μολόντες ἐπὶ Ξάνθοιο ῥέεθρα
12.166
ἀλλήλων ἵσταντο καταντίον, οἱ μὲν Ἀχαιῶν
12.167
οἱ δʼ ἄρʼ ὑπὲρ Τρώων· πολέμου δʼ ἔρος ἔμπεσε θυμῷ.
12.168
τοῖσι δʼ ὁμῶς ἀγέροντο καὶ οἳ λάχον εὐρέα πόντον.
12.169
καί ῥʼ οἱ μὲν δολόεντα κοτεσσάμενοι μενέαινον
12.170
ἵππον ἀμαλδῦναι σὺν νήεσιν, οἱ δʼ ἐρατεινὴν
12.171
Ἴλιον· αἶσα δʼ ἔρυκε πολύτροπος, ἐς δὲ κυδοιμὸν
12.172
τρέψε νόον μακάρεσσιν· Ἄρης δʼ ἐξῆρχε μόθοιο,
12.173
ἆλτο δʼ Ἀθηναίης κατεναντίον· ὣς δὲ καὶ ἄλλοι
12.174
σύμπεσον ἀλλήλοισι· περί σφισι δʼ ἄμβροτα τεύχη
12.175
χρύσεα κινυμένοισι μέγʼ ἴαχεν· ἀμφὶ δὲ πόντος
12.176
εὐρὺς ἐπεσμαράγησε· κελαινὴ δʼ ἔτρεμε γαῖα
12.177
ἀθανάτων ὑπὸ ποσσί· μακρὸν δʼ ἅμα πάντες ἄϋσαν.
12.178
σμερδαλέη δʼ ἐνοπὴ μέχρις οὐρανὸν εὐρὺν ἵκανε,
12.179
μέχρις ἐπʼ Ἀϊδονῆος ὑπερθύμοιο βέρεθρον·
12.180
Τιτῆνες δʼ ὑπένερθε μέγʼ ἔτρεσαν· ἀμφὶ δὲ μακρὴ
12.181
Ἴδη ἐπέστενε πᾶσα καὶ ἠχήεντα ῥέεθρα
12.182
ἀενάων ποταμῶν, δολιχαὶ δʼ ἅμα τοῖσι χαράδραι
12.183
νῆές τʼ Ἀργείων Πριάμοιό τε κύδιμον ἄστυ.
12.184
ἀλλʼ οὐκ ἀνθρώποισι πέλεν δέος· οὐδʼ ἐνόησαν
12.185
αὐτῶν ἐννεσίῃσι θεῶν ἔριν· οἱ δὲ κολώνας
12.186
χερσὶν ἀπορρήξαντες ἀπʼ οὔρεος Ἰδαίοιο
12.187
βάλλον ἐπʼ ἀλλήλους· αἱ δὲ ψαμάθοισιν ὁμοῖαι
12.188
ῥεῖα διεσκίδναντο θεῶν ἀμφʼ ἄσχετα γυῖα
12.189
ῥηγνύμεναι διὰ τυτθά. Διὸς δʼ ἐπὶ πείρασι γαίης
12.190
οὐ λάθον ἠῢ νόημα· λιπὼν δʼ ἄφαρ Ὠκεανοῖο
12.191
χεύματʼ ἐς οὐρανὸν εὐρὺν ἀνήιε· τὸν δὲ φέρεσκον
12.192
εὖρος καὶ Βορέης, Ζέφυρος δʼ ἐπὶ τοῖσι Νότος τε,
12.193
τοὺς ὑπὸ θεσπέσιον ζυγὸν αἰόλος ἤγαγεν Ἶρις
12.194
ἅρματος αἰὲν ἐόντος, ὅ οἱ κάμεν ἄμβροτος Αἰὼν
12.195
χερσὶν ὑπʼ ἀκαμάτῃσιν ἀτειρέος ἐξ ἀδάμαντος.
12.196
ἵκετο δʼ Οὐλύμποιο ῥίον μέγα· σὺν δʼ ἐτίναξεν
12.197
ἠέρα πᾶσαν ὕπερθε χολούμενος· ἄλλοθε δʼ ἄλλαι
12.198
βρονταὶ ὁμῶς στεροπῇσι μέγʼ ἔκτυπον· ἐκ δὲ κεραυνοὶ
12.199
ταρφέες ἐξεχέοντο ποτὶ χθόνα· καίετο δʼ ἀὴρ
12.200
ἄσπετον· ἀθανάτοισι δʼ ὑπὸ φρένας ἔμπεσε δεῖμα·
12.201
πάντων δʼ ἔτρεμε γυῖα καὶ ἀθανάτων περ ἐόντων.
12.202
τῶν δὲ περιδδείσασα κλυτὴ Θέμις εὖτε νόημα
12.203
ἆλτο διὰ νεφέων· τάχα δέ σφεας εἰσαφίκανεν·
12.204
οἴη γάρ στονόεντος ἀπόπροθι μίμνε μόθοιο·
12.205
τοῖον δʼ ἔκφατο μῦθον ἐρυκανόωσα μάχεσθαι·
12.206
ἴσχεσθʼ ἰωχμοῖο δυσηχέος· οὐ γὰρ ἔοικε
12.207
Ζηνὸς χωομένοιο μινυνθαδίων ἕνεκʼ ἀνδρῶν
12.208
μάρνασθʼ αἰὲν ἐόντας, ἐπεὶ τάχα πάντες ἄϊστοι
12.209
ἔσσεσθʼ· ἦ γὰρ ὕπερθεν ἐφʼ ὑμέας οὔρεα πάντα
12.210
εἰς ἓν ἀναρρήξας οὔθʼ υἱῶν οὔτε θυγατρῶν
12.211
φείσεται, ἀλλʼ ἄρα πάντας ὁμῶς ἐφύπερθε καλύψει
12.212
γαίῃ ἀπειρεσίῃ· οὐδʼ ἔσσεται ὔμμιν ἄλυξις
12.213
ἐς φάος· ἀργαλέος δὲ περὶ ζόφος αἰὲν ἐρύξει.
12.214
ὣς φάτο· τοὶ δʼ ἐπίθοντο Διὸς τρομέοντες ὁμοκλήν,
12.215
ὑσμίνης δʼ ἴσχοντο, χόλον δʼ ἀπὸ νόσφι Βάλοντο
12.216
ἀργαλέον, φιηότητα δʼ ὁμήθεα ποιήσαντο·
12.217
καί ῥʼ οἱ μὲν νίσσοντο πρὸς οὐρανόν, οἱ δʼ ἁλὸς εἴσω,
12.218
οἱ δʼ ἀνὰ γαῖαν ἔμιμνον. ἐϋπτολέμοιστ δʼ Ἀχαιοῖς
12.219
υἱὸς Λαέρταο πύκα φρονέων φάτο μῦθον·
12.220
ὦ κλυτοὶ Ἀργείων σημάντορες ὀβριμόθυμοι,
12.221
νῦν μοι ἐελδομένῳ τεκμήρατε, οἵτινές ἐστε
12.222
ἐκπάγλως κρατεροὶ καὶ ἀμύμονες· ἦ γὰρ ἱκάνει
12.223
ἔργον ἀναγκαίης· ἀλλὰ μνησώμεθʼ Ἄρηος,
12.224
ἐς δʼ ἵππον βαίνωμεν ἐΰξοον, ὄφρα κε τέκμωρ
12.225
εὕρωμεν πολέμοιο δυσηχέος· ὣς γάρ ἄμεινον
12.226
ἔσσεται ἤν κε δόλῳ καὶ μήδεσιν ἀργαλέοισιν
12.227
ἄστυ μέγʼ ἐκπέρσωμεν, οὖ εἵνεκα δεῦρο μολόντες
12.228
πάσχομεν ἄλγεα πολλὰ φίλης ἀπὸ τηλόθι γαίης.
12.229
ἀλλʼ ἄγε δή, μένος ἠΰ καὶ ἄλκιμον ἐν φρεσί θέντες
12.230
καὶ γάρ τις κατὰ δῆριν ἀνιηρῇ ὑπʼ ἀνάγκῃ
12.231
θαρσήσας ἀνὰ θυμὸν ἀμείνονα φῶτα κατέκτα
12.232
χειρότερος γεγαώς· μάλα γὰρ μέγα θυμὸν ἀέξει
12.233
θάρσος, ὅ πέρ τε μάλιστα πέλει κλέος ἀνθ ρώποισιν.
12.234
ἀλλʼ ἄγʼ, ἀριστῆες μὲν ἐῢν λόχου ἐντύνεσθε·
12.235
οἱ δʼ ἄλλοι Τενέδοιο πρὸς ἱερὸν ἄστυ μολόντες
12.236
μιμνέμεν, εἰσόκεν ἄμμε ποτὶ πτόλιν εἰρύσσωσι
12.237
δήϊοι ἐλπόμενοι Τριτωνίδι δῶρον ἄγεσθαι.
12.238
αἰζηῶν δέ τις ἐσθλός, ὃν οὐ σάφα Τρῶες ἴσασι,
12.239
μιμνέτω ἄγχʼ ἵπποιο σιδήρεον ἐνθέμενος κῆρ·
12.240
καί οἱ πάντα μέλοιτο μάλʼ ἔμπεδον, ὁππόσʼ ἔγωγε
12.241
πρόσθʼ ἐφάμην· καὶ μή τι περὶ φρεσὶν ἄλλο νοήσῃ,
12.242
ὄφρα μὴ ἀμφαδὰ Τρωσὶν Ἀχαιῶν ἔργα πέληται.
12.243
ὣς φάτο· τὸν δὲ Σίνων ἀπαμείβετο κύδιμος ἀνὴρ
12.244
ἄλλων δειδιότων· μάλα γὰρ μέγα ἔργον ἔμελλεν
12.245
ἐκτελέειν· τῷ καί μιν ἐϋφρονέοντʼ ἀνὰ θυμὸν
12.246
εὐρὺς ἀγάσσατο λαός· ὁ δʼ ἐν μέσσοισιν ἔειπεν·
12.247
ὦ Ὀδυσεῦ καὶ πάντες Ἀχαιῶν φέρτατοι υἷες,
12.248
ἔργον μὲν τόδʼ ἔγωγε λιλαιομένοισι τελέσσω,
12.249
εἰ καὶ ἀεικίζωσι καὶ εἰ πυρὶ μητιόωνται
12.250
βάλλειν ζωὸν ἐόντα· τὸ γάρ νύ μοι εὔαδε θυμῷ,
12.251
ἢ θανέειν δηΐοισιν ὑπʼ ἀνδράσιν, ἢ ὑπαλύξαι
12.252
Ἀργείοις μέγα κῦδος ἐελδομένοισι φέροντα.
12.253
ὣς φάτο θαρσαλέως· μέγα δʼ Ἀργεῖοι κεχάροντο·
12.254
καί τις ἔφη· ὡς τῷδε θεὸς μέγα θάρσος ἔδωκε
12.255
σήμερον· οὐ γὰρ πρόσθεν ἔην θρασύς· ἀλλά ἑ δαίμων
12.256
ὀτρύνει πάντεσσι κακὸν Τρώεσσι γενέσθαι
12.257
ἢ νῶιν· νῦν γάρ που ὀΐομαι ἐσσυμένως περ
12.258
ἀργαλέου πολέμοιο τέκμωρ ἀΐδηλον ἔσεσθαι.
12.259
ὣς ἄρʼ ἔφη κατὰ λαὸν ἀρηϊφίλων τις Ἀχατῶν·
12.260
Νέστωρ δʼ αὖθʼ ἑτέρωθεν ἐποτρύνων μετέειπε·
12.261
νῦν χρειώ, φίλα τέκνα , βίης καὶ θάρσεος ἐσθλοῦ·
12.262
νῦν γὰρ τέρμα πόνοιο θεοὶ καὶ ἀμύμονα νίκην
12.263
ἧμιν ἐελδομένοισι φίλας ἐς χεῖρας ἄγουσιν·
12.264
ἀλλʼ ἄγε θαρσαλέως πολυχανδέος ἔνδοθεν ἵππου
12.265
βαίνετʼ, ἐπεὶ μερόπεσσι κλέος μέγα θάρσος ὀπάξει·
12.266
ὡς ὄφελον μέγα κάρτος ἐμοῖς ἔτι γούνασι κεῖτο,
12.267
οἶον ὅτʼ Αἴσονος υἱὸς ἔσω νεὸς ὠκυπόροιο
12.268
Ἀργῴης καλέεσκεν ἀριστέας, ὁππότʼ ἔγωγε
12.269
πρῶτος ἀριστήων καταβήμεναι ὁρμαίνεσκον,
12.270
εἰ μὴ ἄρʼ ἀντίθεος Πελίης ἀέκοντά μʼ ἔρυκε·
12.271
νῦν δέ με γῆρας ἔπεισι πολύστονον· ἀλλʼ ἄρα καὶ ὥς,
12.272
ὡς νέος ἡβώων, καταβήσομαι ἔνδοθεν ἵππου
12.273
θαρσαλέως· θάρσος δὲ κλέος καὶ κῦδος ὁπάσσει.
12.274
ὣς φάμενον προσέειπε πάϊς ξανθοῦ Ἀχιλῆος·
12.275
ὧ Νέστορ, σὺ μέν ἐσσὶ νόῳ προφερέστατος ἀνδρῶν
12.276
πάντων· ἀλλά σε γῆρας ἀμείλιχον ἀμφιμέμαρπεν,
12.277
οὐδέ τοι ἔμπεδός ἐστι βίη χατέοντι πόνοιο·
12.278
τῷ σε χρὴ Τενέδοιο πρὸς ῇόνας ἀπονέεσθαι·
12.279
ἐς δὲ λόχον νέοι ἄνδρες ἔθʼ ὑσμίνης ἀκόρητοι
12.280
βησόμεθʼ ὡς σύ, γεραιέ, λιλαιομένοις ἐπιτέλλεις.
12.281
ὣς φάτο· τοῦ δʼ ἄγχιστα κιὼν Νηλήιος υἱὸς
12.282
ἀμφοτέρας οἱ ἔκυσσε χέρας κεφαλήν τʼ ἐφύπερθεν,
12.283
οὕνεχʼ ὑπέσχετο πρῶτος ἐς εὐρέα δύμεναι ἵππον,
12.284
αὐτὸν δʼ αὖτε κέλευε γεραίτερον ἔκτοθι μίμνειν
12.285
ἄλλοις σὺν Δαναοῖσιν· ἐέλδετο γὰρ πονέεσθαι·
12.286
καί ῥά μιν ἰωχμοῖο λιλαιόμενον προσέειπεν·
12.287
ἐσσὶ πατρὸς κείνοιο βίῃ καὶ εΰφρονι μύθῳ
12.288
ἀντιθέου Ἀχιλῆος· ἔολπα δὲ σῇσι χέρεσσιν
12.289
Ἀργείους Πριάμοιο διαπραθέειν κλυτὸν ἄστυ·
12.290
ὀψὲ δʼ ἄρʼ ἐκ καμάτοιο μέγα κλέος ἔσσεται ἡμῖν
12.291
πολλὰ πονησαμένοισι κατὰ κλόνον ἄλγεα λυγρά·
12.292
ἄλγεα μὲν παρὰ ποσσὶ θεοὶ θέσαν ἀνθρώποισιν,
12.293
ἐσθλὰ δὲ πολλὸν ἄπωθε· πόνον δʼ ἐς μέσσον ἔλασσαν·
12.294
τούνεκα ῥηιδίη μέν ἐς ἀργαλέην κακότητα
12.295
αἰζηοῖσι κέλευθος, ἀνιηρὴ δʼ ἐπὶ κῦδος,
12.296
μέσφʼ ὅτε τις στονόεντα πόνον διὰ ποσσὶ περήσῃ.
12.297
ὣς φάτο· τὸν δʼ Ἀχιλῆος ἀμείβετο κύδιμος υἱός·
12.298
ὦ γέρον, ὡς σύ γʼ ἔολπας ἐνὶ φρεσί, τοῦτο πέλοιτο
12.299
ἡμῖν εὐχομένοισιν, ἐπεὶ πολὺ λώιον οὕτως·
12.300
εἰ δʼ ἑτέρως ἐθέλουσι θεοί , καὶ τοῦτο τετύχθω·
12.301
βουλοίμην γὰρ ὑπʼ Ἄρεϊ ἐϋκλειῶς ἀπολέσθαι,
12.302
ἠὲ φυγὼν Τροίηθεν ὀνείδεα πολλὰ φέρεσθαι.
12.303
ὣς εἰπὼν ὤμοισι κατʼ ἄμβροτα θήκατο τεύχη
12.304
πατρὸς ἑοῦ· τοὶ δʼ αἶψα καὶ αὐτοὶ θωρήχθησαν
12.305
ἡρώων οἱ ἄριστοι, ὅσοις θρασὺς ἔπλετο θυμός.
12.306
τούς μοι νῦν καθʼ ἕκαστον ἀνειρομένῳ σάφα Μοῦσαι
12.307
ἔσπεθʼ , ὅσοι κατέβησαν ἄσω πολυχανδέος ἵππου·
12.308
ὑμεῖς γὰρ πᾶσάν μοι ἐνὶ φρεσὶ θήκατʼ ἀοιδήν,
12.309
πρίν μοι ἔτʼ ἀμφὶ παρειὰ κατασκίδνασθαι ἴουλον,
12.310
σμύρνης ἐν δαπέδοισι περικλυτὰ μῆλα νέμοντι
12.311
τρὶς τόσον Ἑρμοῦ ἄπωθεν, ὅσον βοόωντος ἀκοῦσαι,
12.312
Ἀρτέμιδος περὶ νηὸν Ἐλευθερίῳ ἐνὶ κήπῳ,
12.313
οὔρεΐ τʼ οὔτε λίην χθαμαλῷ οὔθʼ ὑψόθι πολλῷ.
12.314
πρῶτος μὲν κατέβαινεν ἐς ἵππον κητώεντα
12.315
υἱὸς Ἀχιλλῆος, σὺν δὲ κρατερὸς Μενέλαος
12.316
ἠδʼ Ὀδυσεὺς Σθένελός τε καὶ ἀντίθεος Διομήδης·
12.317
βῆ δὲ Φιλοκτήτης τε καὶ Ἄντικλος ἠδὲ Μενεσθεύς,
12.318
σὺν δὲ Θόας ἐρίθυμος ἰδὲ ξανθὸς Πολυποίτης,
12.319
Αἴας τʼ Εὐρύπυλός τε καὶ ἰσόθεος Θρασυμήδης,
12.320
Μηριόνης τε καὶ Ἰδομενεὺς ἀριδεικέτω ἄμφω,
12.321
σὺν δʼ ἄρʼ ἐϋμμελίης Ποδαλείριος Εὐρύμαχός τε
12.322
Τεῦκρός τʼ ἀντίθεος καὶ Ἰάλμενος ὀβριμόθυμος,
12.323
Θάλπιος Ἀντίμαχός τε μενεπτόλεμός τε Λεοντεύς·
12.324
σὺν δʼ Εὔμηλος ἔβη θεοείκελος Εὐρύαλός τε
12.325
Δημοφόων τε καὶ Ἀμφίμαχος κρατερός τʼ Ἀγαπήνωρ,
12.326
σὺν δʼ Ἀκάμας τε Μέγης τε κραταιοῦ Φυλέος υἱός·
12.327
ἄλλοι δʼ αὖ κατέβαινον, ὅσοι ἔσαν ἔξοχʼ ἄριστοι,
12.328
ὅσσους χάνδανεν ἵππος ἐΰξοος ἐντὸς ἐέργειν.
12.329
ἐν δέ σφιν πύματος κατεβήσατο δῖος Ἐπειός,
12.330
ὅς ῥα καὶ ἵππον ἔτευξεν· ἐπίστατο δʼ ᾦ ἐνὶ θυμῷ
12.331
ἠμὲν ἀναπτύξαι κείνου πτύχας ἠδʼ ἐπερεῖσαι·
12.332
τοὔνεκα δὴ πάντων βῆ δεύτατος· εἴρυσε δʼ εἴσω
12.333
κλίμακας, ᾖς ἀνέβησαν· ὁ δʼ αὖ μάλα πάντʼ ἐπερείσας
12.334
αὐτοῦ πὰρ κληῖδι καθέζετο· τοὶ δὲ σιωπῇ
12.335
πάντες ἔσαν μεσσηγὺς ὁμῶς νίκης καὶ ὀλέθρου.
12.336
οἱ δʼ ἄλλοι νήεσιν ἐπέπλεον εὐρέα πόντον
12.337
ἃς κλισίας πρήσαντες, ὅπῃ πάρος αὐτοὶ ἴαυον.
12.338
τοῖσι δὲ κοιρανέοντε δύω κρατερόφρονε φῶτε
12.339
σήμαινον, Νέστωρ τε καὶ αἰχμητὴς Ἀγαμέμνων·
12.340
τοὺς δὲ καἰ ἐλδομένους καταβήμεναι ἔνδοθεν ἵππου
12.341
Ἀργεῖοι κατέρυξαν, ἵνʼ ἐν νήεσσι μένοντες
12.342
λαοῖς σημαίνωσιν, ἐπεὶ πολὺ λώιον ἄνδρες
12.343
ἔργον ἐποίχονται, ὁπότʼ εἰσορόωσιν ἄνακτες·
12.344
τοὔνεκʼ ἄρʼ ἔκτοθι μίμνον ἀριστῆές περ ἐόντες.
12.345
οἱ δὲ θοῶς ἀφίκοντο πρὸς ἠιόνας Τενέδοιο·
12.346
εὐνὰς δʼ ἔνθʼ ἔβαλον κατὰ βένθεος· ἐκ δʼ ἔβαν αὐτοὶ
12.347
νηῶν ἐσσυμένως· ἀπὸ δʼ ἔκτοθι πείσματʼ ἔδησαν
12.348
ἠιόνων· αὐτοὶ δὲ παραυτόθι μίμνον ἕκηλοι
12.349
δέγμενοι, ὁππότε πυρσὸς ἐελδομένοισι φανείη.
12.350
οἱ δʼ ἄρʼ ἐν ἵππῳ ἔσαν δηΐων σχεδόν, ἄλλοτε μέν που
12.351
φθεῖσθαι ὀϊόμενοι, ὁτὲ ἱερὸν ἄστυ δαΐξαι·
12.352
καὶ τὰ μὲν ἐλπομένοισιν ἐπήλυθεν Ἠριγένεια.
12.353
Τρῶες εἰσενόησαν ἐπʼ ᾐόσιν Ἑλλησπόντου
12.354
καπνὸν ἔτʼ ἀΐσσοντα διʼ ἠέρος· οὐδʼ ἄρα νῆας
12.355
δέρκονθʼ, αἵ σφιν ἔνεικαν ἀφʼ Ἑλλάδος αἰνὸν ὄλεθρον.
12.356
γηθόσυνοι δʼ ἄρα πάντες ἐπέδραμον αἰγιαλοῖσι
12.357
τεύχἐ ἐφεσσάμενοι· ἔτι γὰρ δέος ἄμφεχε θυμόν·
12.358
ἵππον δʼ εἰσενόησαν ἐΰξοον. ἀμφὶ δʼ ἄρʼ αὐτῷ
12.359
θάμβεον ἑσταότες· μάλα γὰρ μέγα ἔργον ἐτὺχθη·
12.360
ἀγχόθι δʼ αὖτε Σίνωνα δυσάμμορον εἰσενόησαν·
12.361
καί μιν ἀνειρόμενοι Δαναῶν ὕπερ ἄλλοθεν ἄλλος
12.362
μέσσον ἐκυκλώσαντο περισταδόν· ἀμφὶ δὲ μύθοις
12.363
μειλιχίοις εἴροντο πάρος· μετέπειτα δʼ ὁμοκλῇ
12.364
σμερδαλέῃ· καὶ πολλὰ δολόφρονα φῶτα δάϊζον
12.365
πολλὸν ἐπὶ χρόνον αἰέν· ὁ δʼ ἔμπεδον ἠΰτε πέτρη
12.366
μίμνεν ἀτειρέα γυἶ ἐπιειμένος· ὀψὲ δʼ ἄρʼ αὐτοῦ
12.367
οὔαθʼ ὁμῶς καὶ ῥῖνας ἀπὸ μελέων ἐτάμοντο
12.368
πάμπαν ἀεικίζοντες, ὅπως νημερτέα εἴπῃ,
12.369
ὅππῃ ἔβαν Δαναοὶ σὺν νήεσιν, ἢ τί καὶ ἵππος
12.370
ἔνδον ἐρητύεσκεν. ὁ δʼ ἐνθέμενος φρεσὶ κάρτος
12.371
λώβης οὐκ ἀλέγιζεν ἀεικέος, ἀλλʼ ἐνὶ θυμῷ
12.372
ἔτλη καὶ πληγῇσι καὶ ἐν πυρὶ τειρόμενός περ
12.373
ἀργαλέως· Ἥρη γὰρ ἐνέπνευσεν μέγα κάρτος·
12.374
τοῖα δʼ ἄρʼ ἐν μέσσοισι δολοφρονέων ἀγόρευεν·
12.375
Ἀργεῖοι μέν νηυσὶν ὑπὲρ πόντοιο φέβονται
12.376
μακρῷ ἀκηδήσαντες ἐπὶ πτολέμῳ καὶ ἀνίῃ·
12.377
Κάλχαντος δʼ ἰότητι δαΐφρονι Τριτογενείῃ
12.378
ἵππον ἐτεκτήναντο, θεῆς χόλον ὄφρʼ ἀλέωνται
12.379
πάγχυ κοτεσσαμένης Τρώων ὕπερ· ἀμφὶ δὲ νόστου
12.380
ἐννεσίῃς Ὀδυσῆος ἐμοὶ μενέαινον ὄλεθρον,
12.381
ὄφρα με δῃώσωσι δυσηχέος ἄγχι θαλάσσης
12.382
δαίμοσιν εἰναλίοις. ἐμὲ δʼ οὐ λάθον, ἀλλʼ ἀλεγεινὰς
12.383
σπονδάς τʼ οὐλοχύτας τε μάλʼ ἐσσυμένως ὑπαλύξας
12.384
ἀθανάτων βουλῇσι παραὶ ποσὶ κάππεσον ἵππου·
12.385
οἱ δὲ καὶ οὐκ ἐθέλοντες ἀναγκαίῃ με λίποντο
12.386
ἁζόμενοι μεγάλοιο Διὸς κρατερόφρονα κούρην.
12.387
ὣς φάτο κερδοσύνῃσι καὶ οὐ κάμεν ἄλγεσι θυμόν·
12.388
ἀνδρὸς γὰρ κρατεροῖο κακὴν ὑποτλῆναι ἀνάγκην.
12.389
τῷ δʼ οἱ μὲν πεπίθοντο κατὰ στρατόν, οἱ δʼ ἄρʼ ἔφαντο
12.390
ἔμμεναι ἠπεροπῆα πολύτροπον, οἷς ἄρα βουλὴ
12.391
ἥνδανε Λαοκόωντος· ὁ γὰρ πεπνυμένα βάζων
12.392
φῆ δόλον ἔμμεναι αἰνὸν ὑπʼ ἐννεσίῃσιν Ἀχαιῶν,
12.393
πάντας δʼ ὀτρύνεσκε θοῶς ἐμπρησέμεν ἵππον,
12.394
ἵππον δουράτεον καὶ γνώμεναι εἴ τι κεκεύθει.
12.395
καί νύ κέ οἱ πεπίθοντο καὶ ἐξήλυξαν ὄλεθρον,
12.396
εἰ μὴ Τριτογένεια, κοτεσσαμένη περὶ θυμῷ
12.397
αὐτῷ καὶ Τρώεσσι καὶ ἄστεϊ, γαῖαν ἔνερθεν
12.398
θεσπεσίην ἐλέλιξεν ὑπαὶ ποσὶ Λαοκόωντος.
12.399
τῷ δʼ ἄφαρ ἔμπεσε δεῖμα· τρόμος δʼ ἀμφέκλασε γυῖα
12.400
ἀνδρὸς ὑπερθύμοιο· μέλαινα δέ οἱ περὶ κρατὶ
12.401
νὺξ ἐχύθη· στυγερὸν δὲ κατὰ βλεφάρων πέσεν ἄλγος,
12.402
σὺν δʼ ἔχεεν λασίῃσιν ὑπʼ ὀφρύσιν ὄμματα φωτός·
12.403
γλῆναι δʼ ἀργαλέῃσι πεπαρμέναι ἀμφʼ ὀδύνῃσι
12.404
ῥιζόθεν ἐκλονέοντο· περιστρωφῶντο δʼ ὀπωπαὶ
12.405
τειρόμεναι ὑπένερθεν· ἄχος δʼ ἀλεγεινὸν ἵκανεν
12.406
ἄχρι καὶ ἐς μήνιγγας ἰδʼ ἐγκεφάλοιο θέμεθλα·
12.407
τοῦ δʼ ὁτὲ μὲν φαίνοντο μεμιγμένοι αἵματι πολλῷ
12.408
ὀφθαλμοί, ὁτὲ δʼ αὖτε δυσαλθέα γλαυκιόωντες·
12.409
πολλάκι δʼ ἔρρεον οἷον ὅτε στυφελῆς ἀπὸ πέτρης
12.410
εἴβεται ἐξ ὀρέων νιφετῷ πεπαλαγμένον ὕδωρ·
12.411
μαινομένῳ δʼ ἤικτο, καὶ ἔδρακε διπλόα πάντα
12.412
αἰνὰ μάλα στενάχων. καὶ ἔτι Τρώεσσι κέλευεν,
12.413
οὐδʼ ἀλέγιζε μόγοιο· φάος δέ οἱ ἐσθλὸν ἄμερσε
12.414
δῖα θεά· λευκαὶ δʼ ἄρʼ ὑπὸ βλέφαρʼ ἔσταν ὀπωπαὶ
12.415
αἵματος ἐξ ὀλοοῖο· περιστενάχιζε δὲ λαὸς
12.416
οἰκτείρων φίλον ἄνδρα, καὶ ἀθανάτην Ἀγελείην
12.417
ἐρριγώς, μή τι παρήλιτεν ἀφραδίῃσιν,
12.418
καί σφιν ἐς αἰνὸν ὄλεθρον ἀνεγνάμφθη νόος ἔνδον,
12.418a
δειδιότων, μὴ δή σφι καὶ αὐτοῖς ἄλγος ἕπηται
12.419
οὕνεκα λωβήσαντο δέμας μογεροῖο Σίνωνος
12.420
ἐλπόμενοι κατὰ θυμὸν ἐτήτυμα πάντʼ ἀγορεύσειν· Zimmermann, for ἀγορεύειν of v.
12.421
τοὔνεκα προφρονέως μιν ἄγον ποτὶ Τρώιον ἄστυ
12.422
ὀψέ περ οἰκτείραντες. ἀγειρόμενοι δʼ ἅμα πάντες
12.423
σειρὴν ἀμφεβάλοντο θοῶς περιμήκεϊ ἵππῳ
12.424
δησάμενοι καθύπερθεν, ἐπεί ῥά οἱ ἐσθλὸς Ἐπειὸς
12.425
ποσσὶν ὑπὸ βριαροῖσιν ἐΰτροχα δούρατʼ ἔθηκεν,
12.426
ὄφρα κεν αἰζηοῖσιν ἐπὶ πτολίεθρον ἕπηται
12.427
ἑλκόμενος Τρώων ὑπὸ χείρεσιν. οἱ δʼ ἅμα πάντες
12.428
εἷλκον ἐπιβρίσαντες ἀολλέες, ἠΰτε νῆα
12.429
ἕλκωσιν μογέοντες ἔσω ἁλὸς ἠχηέσσης
12.430
αἰζηοί, στιβαραὶ δὲ περιστενάχουσι φάλαγγες
12.431
τριβόμεναι, δεινὸν δὲ τρόπις περιτετριγυῖα
12.432
ἀμφὶς ὀλισθαίνουσα κατέρχεται εἰς ἁλὸς οἶδμα·
12.433
ὣς οἵ γε σφίσι πῆμα ποτὶ πτόλιν ἔργον Ἐπειοῦ
12.434
πανσυδίῃ μογέοντες ἀνείρυον· ἀμφὶ δʼ ἄρʼ αὐτῷ
12.435
πολλὸν ἄδην στεφέων ἐριθηλέα κόσμον ἔθεντο·
12.436
αὐτοὶ δʼ ἐστέψαντο κάρη· μέγα δʼ ἤπυον αὐλοὶ
12.437
ἀλλήλοις ἐπικεκλομένοι· ἐγέλασσε δʼ Ἐνυὼ
12.438
δερκομένη πολέμοιο κακὸν τέλος· ὑψόθι δʼ Ἥρη
12.439
τέρπετʼ· Ἀθηναίη δʼ ἐπεγήθεεν· οἱ δὲ μολόντες
12.440
ἄστυ ποτὶ σφέτερον μεγάλης κρήδεμνα πόληος
12.441
λυσάμενοι λυγρὸν ἵππον ἐσήγαγον· αἱ δʼ ὀλόλυξαν
12.442
Τρωιάδες, πᾶσαι δὲ περισταδὸν εἰσορόωσαι
12.443
θάμβεον ὄβριμον ἔργον· ὃ δέ σφισιν ἔκρυφε πῆμα.
12.444
Λαοκόων δʼ ἔτʼ ἔμιμνεν ἐποτρύνων ἑτάροισιν
12.445
ἵππον ἀμαλδῦναι μαλερῷ πυρί· τοὶ δέ οἱ οὔτι
12.446
πείθοντʼ, ἀθανάτων γὰρ ὑποτρομέεσκον ὁμοκλήν.
12.447
τῷ δʼ ἔπι κύντερον ἄλλο θεὰ μεγάθυμος Ἀθὴνη
12.448
δυστήνοις τεκέεσσιν ἐμήδετο Λαοκόωντος.
12.449
δὴ γάρ που πέλεν ἄντρον ὑπὸ στυφελώδεϊ πέτρῃ
12.450
ἠερόεν, θνητοῖσιν ἀνέμβατον, ᾧ ἔνι θῆρες
12.451
σμερδαλέοι ναίεσκον ἔτʼ οὐλομένοιο γενέθλης
12.452
Τυφῶνος νήσοιο κατὰ πτύχας, ἥν τε Καλύδνην
12.453
λαοὶ ἐπικλείουσιν ἔσω ἁλὸς ἀντία Τροίης.
12.454
ἔνθεν ἀναστήσασα βίην καλέεσκε δρακόντων
12.455
ἐς Τροίην· οἱ δʼ αἶψα θεῆς ὕπο κινηθέντες
12.456
νῆσον ὅλην ἐτίναξαν· ἐπεσμαράγησε δὲ πόντος
12.457
νισσομένων, καὶ κῦμα διΐστατο· τοὶ δʼ ἐφέροντο
12.458
αἰνὸν λιχμώωντες· ἔφριξε δὲ κήτεα πόντου·
12.459
ἀμφὶ δʼ ἄρα στενάχοντο μέγα Ξάνθοιο θύγατρες
12.460
νύμφαι καὶ Σιμόεντος· ἀπʼ Οὐλύμποιο δὲ Κύπρις
12.461
ἄχνυτο· τοὶ δʼ ἄφαρ ἷξον ὅπῃ θεὸς ὀτρύνεσκε,
12.462
θήγοντες βλοσυρῇσι γενειάσι λοιγὸν ὀδόντων
12.463
δυστήνοις ἐπὶ παισί· κακὴ δʼ ἐπενίσσετο φύζα
12.464
Τρῶας, ὅτʼ εἰσενόησαν ἀνὰ πτόλιν αἰνὰ πέλωρα·
12.465
οὐδέ τις αἰζηῶν οὐδʼ εἰ μένος ἄτρομος ἦεν
12.466
μεῖναι ἔτλη· πάντας γὰρ ἀμείλιχον ἄμφεχε δεῖμα
12.467
θῆρας ἀλευομένους, ὀδύνη δʼ ἔχεν· ἂν δὲ γυναῖκες
12.468
οἴμωζον· καί πού τις ἑῶν ἐπελήσατο τέκνων
12.469
αὐτὴ ἀλευομένη στυγερὸν μόρον· ἀμφὶ δὲ Τροίη
12.470
ἔστενʼ ἐπεσσυμένων· πολλοὶ δʼ ἄφαρ εἰς ἓν ἰόντες
12.471
γυῖα περιδρύφθησαν· ἐνεστείνοντο δʼ ἀγυιαῖς
12.472
ἀμφιπεριπτώσσοντες. ἔλειπτο δὲ μοῦνος ἄπωθεν
12.473
Λαοκόων ἅμα παισί· πέδησε γὰρ οὐλομένη Κὴρ
12.474
καὶ θεός. οἱ δέ οἱ υἷας ὑποτρομέοντας ὄλεθρον
12.475
ἀμφοτέρους ὀλοῇσιν ἀνηρείψαντο γένυσσι
12.476
πατρὶ φίλῳ ὀρέγοντας ἑὰς χέρας· οὐδʼ ὅ γʼ ἀμύνειν
12.477
ἔσθενεν· ἀμφὶ δὲ Τρῶες ἀπόπροθεν εἰσορόωντες
12.478
κλαῖον ὑπὸ κραδίῃσι τεθηπότες. οἱ δʼ ἄρʼ Ἀθήνης
12.479
προφρονέως τελέσαντες ἀπεχθέα Τρωσὶν ἐφετμὴν
12.480
ἄμφω ἀϊστώθησαν ὑπὸ χθόνα· τῶν δʼ ἔτι σῆμα
12.481
φαίνεθʼ, ὅπου κατέδυσαν ἐς ἱερὸν Ἀπόλλωνος·
12.482
Περγάμῳ ἐν ζαθέῃ. προπάροιθε δὲ Τρώιοι υἷες
12.483
παίδων Λαοκόωντος ἀμείλιχα δῃωθέντων
12.484
τεῦξαν ἅμʼ ἀγρόμενοι κενεὸν τάφον, ᾧ ἔπι δάκρυ
12.485
χεῦε πατὴρ ἀλαοῖσιν ὑπʼ ὄμμασιν· ἀμφὶ δὲ μήτηρ
12.486
πολλὰ κινυρομένη κενεῷ ἐπαΰτεε τύμβῳ
12.487
ἐλπομένη τι καὶ ἄλλο κακώτερον, ἔστενε δʼ ἄτην
12.488
ἀνέρος ἀφραδίῃς, μακάρων δʼ ὑπεδείδιε μῆνιν·
12.489
ὡς δʼ ὅτʼ ἐρημαίην περιμύρεται ἀμφὶ καλιὴν
12.490
πολλὰ μάλʼ ἀχνυμένη κατὰ δάσκιον ἄγκος ἀηδών,
12.491
ἧς ἔτι νήπια τέκνα, πάρος κελαδεινὸν ἀείδειν,
12.492
δάμναθʼ ὑπὸ γναθμοῖσι μένος βλοσυροῖο δράκοντος,
12.493
μητέρι δʼ ἄλγεα θῆκε, καὶ ἄσπετον ἀσχαλόωσα
12.494
μύρεται ἀμφὶ δόμον κενεὸν μάλα κεκληγυῖα·
12.495
ὣς ἥ γε στενάχιζε λυγρῷ τεκέων ἐπʼ ὀλέθρῳ
12.496
μυρομένη κενεῷ περὶ σήματι· σὺν δέ οἱ ἄλλο
12.497
πῆμα μάλʼ ἀργαλέον πόσιος πέλεν ἀμφʼ ἀλαοῖο.
12.498
καί ῥʼ ἡ μὲν φίλα τέκνα καὶ ἀνέρα κωκύεσκε
12.499
τοὺς μὲν ἀποφθιμένους τὸν δʼ ἄμμορον ἠελίοιο·
12.500
Τρῶες δʼ ἀθανάτοισιν ἐπεντύνοντο θυηλὰς
12.501
λείβοντες μέθυ λαρόν, ἐπεί σφισιν ἦτορ ἐώλπει
12.502
λευγαλέου πολέμοιο βαρὺ σθένος ἐξυπαλύξειν.
12.503
ἱερὰ δʼ οὐ καίοντο, πυρὸς δʼ ἐσβέννυτʼ ἀϋτμή,
12.504
ὄμβρου ὅπως καθύπερθε δυσηχέος ἐσσυμένοιο·
12.505
καπνὸς δʼ αἱματόεις ἀνεκήκιε· μηρὰ δὲ πάντα
12.506
πῖπτε χαμαὶ τρομέοντα· κατηρείποντο δὲ βωμοί·
12.507
σπονδαὶ δʼ αἷμα γένοντο· θεῶν δʼ ἐξέρρεε δάκρυ,
12.508
καὶ νηοὶ δεύοντο λύθρῳ· στοναχαὶ δʼ ἐφέροντο
12.509
ἔκποθεν ἀπροφάτοιο· περισσείοντο δὲ μακρὰ
12.510
τείχεα καὶ πύργοι μεγάλʼ ἔκτυπον, ὡς ἀχέοντες· Zimmermann, for ἐτεόν περ of v.
12.511
αὐτόματοι δʼ ἄρʼ ὀχῆες ἀνωίγνυντο πυλάων
12.512
αἰνὸν κεκλήγοντες· ἐπεστενάχοντο δὲ λυγρὸν
12.513
ἐννύχιοι ὄρνιθες ἐρημαῖον βοόωντες·
12.514
ἄστρα δὲ πάντʼ ἐφύπερθε θεοδμήτοιο πόληος
12.515
ἀχλὺς ἀμφεκάλυψε καὶ ἀννεφέλου περ ἐόντος
12.516
οὐρανοῦ αἰγλήεντος· ἀπαυαίνοντο δὲ δάφναι
12.517
πὰρ νηῷ Φοίβοιο πάρος θαλεραί περ ἐοῦσαι·
12.518
ἐν δὲ λύκοι καὶ θῶες ἀναιδέες ὠρύσαντο
12.519
ἔντοσθεν πυλέων· μάλα μυρία δʼ ἄλλα φαάνθη
12.520
σήματα Δαρδανίδῃσι καὶ ἄστεϊ πῆμα φέροντα.
12.521
ἀλλʼ οὐ δεῖμʼ ἀλεγεινὸν ὑπὸ Τρώων φρένας ἷξε
12.522
δερκομένων ἀλεγεινὰ τεράατα πάντα κατʼ ἄστυ·
12.523
κῆρες γὰρ πάντων νόον ἔκβαλον, ὄφρʼ ἐπὶ δαιτὶ
12.524
πότμον ἀναπλήσωσιν ὑπʼ Ἀργείοισι δαμέντες.
12.525
οἴη δʼ ἔμπεδον ἦτορ ἔχεν πινυτόν τε νόημα
12.526
Κασσάνδρη, τῆς οὔποτʼ ἔπος γένετʼ ἀκράαντον,
12.527
ἀλλʼ ἄρʼ ἐτήτυμον ἔσκεν· ἀκούετο δʼ ἔκ τινος αἴσης
12.528
ὡς ἀνεμώλιον αἰέν, ἵνʼ ἄλγεα Τρωσὶ γένηται.
12.529
ἡ ῥʼ ὅτε σήματα λυγρὰ κατὰ πτόλιν εἰσενόησεν
12.530
εἰς ἕν ἅμʼ ἀΐσσοντα, μέγʼ ἴαχεν, εὖτε λέαινα,
12.531
ἥν ῥά τʼ ἐνὶ ξυλόχοισιν ἀνὴρ λελιημένος ἄγρης
12.532
οὐτάσῃ ἠὲ βάλῃ, τῆς δʼ ἐν φρεσὶ μαίνεται ἦτορ
12.533
πάντῃ ἀνʼ οὔρεα μακρά, πέλει δέ οἱ ἄσχετος ἀλκή·
12.534
ὥς ἄρα μαιμώωσα θεόπροπον ἔνδοθεν ἦτορ
12.535
ἤλυθεν ἐκ μεγάροιο· κόμαι δέ οἱ ἀμφεκέχυντο
12.536
ὤμοις ἀργυφέοισι μετάφρενον ἄχρις ἰοῦσαι·
12.537
ὄσσε δέ οἱ μάρμαιρεν ἀναιδέα· τῆς ὑπὸ δειρή,
12.538
ἐξ ἀνέμων ἅτε πρέμνον, ἄδην ἐλελίζετο πάντῃ.
12.539
καί ῥα μέγα στονάχησε καὶ ἴαχε παρθένος ἐσθλή·
12.540
ἆ δειλοί, νῦν βῆμεν ὑπὸ ζόφον· ἀμφὶ γὰρ ἡμῖν
12.541
ἔμπλειον πυρὸς ἄστυ καὶ αἵματος ἠδὲ καὶ οἴτου
12.542
λευγαλέου· πάντῃ δὲ τεράατα δακρυόεντα
12.543
ἀθάνατοι φαίνουσι, καὶ ἐν ποσὶ τέρματʼ ὀλέθρου.
12.544
σχέτλιοι, οὐδέ τι ἴστε κακὸν μόρον, ἀλλʼ ἅμα πάντες
12.544a
χαίρετʼ ἄρʼ ἀφραδέοντες, οἳ ἠγάγετʼ ἐς πόλιν αὐτοὶ
12.545
Ἀργείων λυγρὸν ἵππον Stadtmueller’s suggested supplementum of lacuna, ὃ γὰρ μέγα πῆμα κέκευθεν.
12.546
ἀλλά μοι οὐ πείθεσθʼ, οὐδʼ εἰ μάλα πόλλʼ ἀγορεύω,
12.547
οὕνεκʼ Ἐριννύες ἄκρα γάμου κεχολωμέναι αἰνοῦ
12.548
ἀμφʼ Ἑλένης, καὶ Κῆρες ἀμείλιχοι ἀΐσσουσι
12.549
πάντῃ ἀνὰ πτολίεθρον· ἐπʼ εἰλαπίνῃ δʼ ἀλεγεινῇ
12.550
δαίνυσθʼ ὕστατα δόρπα κακῷ πεφορυγμένα λύθρῳ
12.551
ἤδη ἐπιψαύοντες ὁμὴν ὁδὸν εἰδώλοισι.
12.552
καί τις κερτομέων ὀλοφώιον ἔκφατο μῦθον·
12.553
ὦ κούρη Πριάμοιο, τί ἤ νύ σε μάργος ἀνώγει
12.554
γλῶσσα κακοφραδίη τʼ ἀνεμώλια πάντʼ ἀγορεύειν;
12.555
οὐδέ σε παρθενικὴ καὶ ἀκήρατος ἀμφέχει αἰδώς,
12.556
ἀλλά σε λύσσʼ ὀλοὴ περιδέδρομε· τῷ νύ σε πάντες
12.557
αἰὲν ἀτιμάζουσι βροτοὶ πολύμυθον ἐοῦσαν.
12.558
ἔρρε καὶ Ἀργείοισι κακὴν προτιόσσεο φήμην
12.559
ἠδʼ αὐτῇ· τάχα γάρ σε καὶ ἀργαλεώτερον ἄλγος
12.560
μίμνει Λαοκόωντος ἀναιδέος· οὐ γὰρ ἔοικεν
12.561
ἀθανάτων φίλα δῶρα δαϊζέμεν ἀφραδέοντα.
12.562
ὣς ἄρʼ ἔφη Τρώων τις ἀνὰ πτόλιν· ὥς δὲ καὶ ἄλλοι
12.563
κούρην μωμήσαντο καὶ οὐ φάσαν ἄρτια βάζειν,
12.564
οὕνεκʼ ἄρα σφίσι πῆμα καὶ ἀργαλέον μένος Αἴσης
12.565
ἄγχι παρειστήκει· τοὶ δʼ οὐ νοέοντες ὄλεθρον
12.566
κείνην κερτομέοντες ἀπέτρεπον εὐρέος ἵππου·
12.567
ἦ γάρ οἱ μενέαινε διὰ ξύλα πάντα κεδάσσαι,
12.568
ἠὲ καταπρῆσαι μαλερῷ πυρί· τοὔνεκα πεύκης
12.569
αἰθομένης ἔτι δαλὸν ἀπʼ ἐσχαρεῶνος ἑλοῦσα
12.570
ἔσσυτο μαιμώωσʼ· ἑτέρῃ δʼ ἐν χειρὶ φέρεσκεν
12.571
ἀμφίτυπον βουπλῆγα· λυγροῦ δʼ ἐπεμαίετο ἵππου,
12.572
ὄφρα λόχον στονόεντα καὶ ἀμφαδὸν ἀθρήσωσι
12.573
Τρῶες· τοὶ δέ οἱ αἶψα χερῶν ἀπὸ νόσφι βαλόντες
12.574
πῦρ ὀλοόν τε σίδηρον, ἀκηδέες ἐντύνοντο
12.575
δαῖτα λυγρήν· μάλα γάρ σφας ἐπήιεν ὑστατίη νύξ.
12.576
Ἀργεῖοι δʼ ἔντοσθεν ἐγήθεον εἰσαΐοντες
12.577
δαινυμένων ὅμαδον κατὰ Ἴλιον οὐδʼ ἀλεγόντων
12.578
Κασσάνδρης, τήν ῥʼ αὐτοὶ ἐθάμβεον, ὡς ἐτέτυκτο
12.579
ἀτρεκέως εἰδυῖα νόον καὶ μῆτιν Ἀχαιῶν.
12.580
Ἡ δʼ ἅτε πόρδαλις ἔσσυτʼ ἐν οὔρεσιν ἀσχαλόωσα,
12.581
ἥν τʼ ἀπὸ μεσσαύλοιο κύνες μογεροί τε νομῆες
12.582
σεύοντʼ ἐσσυμένως, ἡ δʼ ἄγριον ἦτορ ἔχουσα
12.583
ἐντροπαλιζομένη ἀναχάζεται τειρομένη περ·
12.584
ὣς ἥ εὐρέος ἵππου ἀπέσσυτο τειρομένη κῆρ
12.585
Τρώων ἀμφὶ φόνῳ· μάλα γὰρ μέγα δέχνυτο πῆμα.
Variation units
Dual references show Vulgate ↔ LXX loci for each oracle block. Selected-witness order follows the left compare column (or primary version).