Fall of Troy
Choose a text
id="mobileReaderAuthor" class="mobile-reader-author" href="/authors/quintus-smyrnaeus" aria-label="More works by Quintus Smyrnaeus">
—
⋯
Original / primary: Perseus Grc2
14.1
καὶ τότʼ ἀπʼ Ὠκεανοῖο θεὰ χρυσόθρονος Ἠὼς
14.2
οὐρανὸν εἰσανόρουσε· χάος δʼ ὑπεδέξατο νύκτα.
14.3
οἱ δὲ βίη Τροίην εὐερκέα δῃώσαντο
14.4
Ἀργεῖοι καὶ κτῆσιν ἀπείρονα ληίσσαντο,
14.5
χειμάρροις ποταμοῖσιν ἐοικότες, οἵ τε φέρονται
14.6
ἐξ ἐρέων καναχηδὸν ὀρινομένου ὑετοῖο,
14.7
πολλὰ δὲ δένδρεα μακρὰ καὶ ὁππόσα φύετʼ ὄρεσφιν
14.8
αὐτοῖς σὺν πρώνεσσιν ἔσω φορέουσι θαλάσσης·
14.9
ὣς Δαναοὶ πέρσαντες ὑπαὶ πυρὶ Τρώιον ἄστυ
14.10
κτήματα πάντα φέρεσκον ἐϋσκάρθμους ἐπὶ νῆας.
14.11
σὺν δʼ ἄρα Τρωιάδας καταγίνεον ἄλλοθεν ἄλλας,
14.12
τὰς μὲν ἔτʼ ἀδμῆτας καὶ νηίδας οἷο γάμοιο,
14.13
τίς δʼ ἄρʼ ὑπʼ αἰζηοῖσι νέον φιλότητι δαμείσας,
14.14
ἄλλας δʼ αὖ πολιοπλοκάμους, ἑτέρας δʼ ἄρʼ ἐκείνων
14.15
ὁπλοτέρας, ὧν παῖδας ἀπειρύσσαντʼ ἀπὸ μαζῶν
14.16
ὑστάτιον χείλεσσι γλάγος περιμαιμώωντας.
14.17
τοῖσιν δὴ Μενέλαος ἐνὶ μέσσοισι καὶ αὐτὸς
14.18
ἦγεν ἑὴν παράκοιτιν ἀπʼ ἄστεος αἰθομένοιο
14.19
ἐξανύσας μέγα ἔργον· ἔχεν δέ ἑ χάρμα καὶ αἰδώς.
14.20
Κασσάνδρην δʼ ἄγε δῖαν ἐϋμμελίης Ἀγαμέμνων·
14.21
Ἀνδρομάχην δʼ Ἀχιλῆος ἐῢς πάϊς· αὐτὰρ Ὀδυσεὺς
14.22
εἷλκε βίῃ Ἑκάβην· τῆς δʼ ἁθρόα δάκρὐ ἀπʼ ὄσσων
14.23
πίδακος ὣς ἐχέοντο· περιτρομέεσκε δὲ γυῖα,
14.24
καὶ κραδίη ἀλάλυκτο φόβῳ, δεδάϊκτο δὲ χαίτας
14.25
κράατος ἐκ πολιοῖο· τέφρη δʼ ἐπεπέπτατο πολλή,
14.26
τήν που ἀπʼ ἐσχαρεῶνος ἄδην κατεχεύατο χερσὶν
14.27
ὀλλυμένου Πριάμοιο καὶ ἄστεος αἰθομένοιο·
14.28
καί ῥα μέγα στονάχιζεν, ὅτʼ ἄμφεχε δούλιον ἦμαρ
14.29
μὰψ ἀεκαζομένην· ἕτερος δʼ ἑτέρην γοόωσαν
14.30
ἦγεν Τρωιάδων σφετέρας ἐπὶ νῆας ἀνάγκῃ·
14.31
αἱ δʼ ἀδινὸν γοόωσαι ἀνίαχον ἄλλοθεν ἄλλαι
14.32
νηπιάχοις ἅμα παισὶ κινυρόμεναι μάλα λυγρῶς·
14.33
ὡς δʼ ὁπότʼ ἀργιόδουσιν ὁμῶς συσὶ νήπια τέκνα
14.34
σταθμοῦ ἀπὸ προτέροιο ποτὶ σταθμὸν ἄλλον ἄγωσιν
14.35
ἀνέρες ἐγρομένῳ ὑπὸ χείματι, τοὶ δʼ ἀλεγεινὸν
14.36
μίγδα περιτρύζουσι διηνεκὲς ἀλλήλοισιν·
14.37
ὣς Τρῳαὶ Δαναοῖσιν ὑπʼ ἐστενάχοντο δαμεῖσαι·
14.38
ἴσην δʼ αὖ καὶ ἄνασσα φέρεν καὶ δμωὶς ἀνάγκην.
14.39
ἀλλʼ οὐ μὰν Ἑλένην γόος ἄμφεχεν· ἀλλά οἱ αἰδὼς
14.40
ὄμμασι κυανέοισιν ἐφίζανε, καί οἱ ὕπερθεν
14.41
καλὰς ἀμφερύθηνε παρηίδας· ἐν δέ οἱ ἦτορ
14.42
ἄσπετα πορφύρεσκε κατὰ φρένα, μή ἑ κιοῦσαν
14.43
κυανέας ἐπὶ νῆας ἀεικίσσωνται Ἀχαιοί·
14.44
τοὔνεχʼ ὑποτρομέουσα φίλῳ περιπάλλετο θυμῷ.
14.45
καί ῥα καλυψαμένη κεφαλὴν ἐφύπερθε καλύπτρῃ
14.46
ἕσπετο νισσομένοιο κατʼ ἴχνιον ἀνδρὸς ἑοῖο
14.47
αἰδοῖ πορφύρουσα παρήιον, ἠΰτε Κύπρις,
14.48
εὖτέ μιν Οὐρανίωνες ἐν ἀγκοίνησιν Ἄρηος
14.49
ἀμφαδὸν εἰσενόησαν ἑὸν λέχος αἰσχύνουσαν
14.50
δεσμοῖς ἐν θαμινοῖσι δαήμονος Ἡφαίστοιο,
14.51
τοῖς ἔνι κεῖτʼ ἀχέουσα περὶ φρεσὶν αἰδομένη τε
14.52
ἰλαδὸν ἀγρομένων μακάρων γένος ἠδὲ καὶ αὐτὸν
14.53
Ἥφαιστον· δεινὸν γὰρ ἐν ὀφθαλμοῖσιν ἀκοίτεω
14.54
ἀμφαδὸν εἰσοράασθαι ἐπʼ αἴσχεϊ θηλυτέρῃοι.
14.55
τῇ Ελένη εἰκυῖα δέμας καὶ ἀκήρατον αἰδῶ
14.56
ἤιε σὺν Τρῳῇσι δορυκτήτοισι καὶ αὐτὴ
14.57
νῆας ἔπʼ Ἀργείων εὐήρεας· ἀμφὶ δὲ λαοὶ
14.58
θάμβεον ἀθρήσαντες ἀμωμήτοιο γυναικὸς
14.59
ἀγλαΐην καὶ κάλλος ἐπήρατον· οὐδέ τις ἔτλη
14.60
κείνην οὔτε κρυφηδὸν ἐπεσβολίῃσι χαλέψαι,
14.61
οὔτʼ οὖν ἀμφαδίην, ἀλλʼ ὡς θεὸν εἰσορόωντο
14.62
ἀσπασίως· πᾶσιν γὰρ ἐελδομένοισι φαάνθη.
14.63
ὡς δʼ ὅτʼ ἀλωομένοισι διʼ ἀκαμάτοιο θαλάσσης
14.64
πατρὶς ἑὴ μετὰ δηρὸν ἐελδομένοισι φανείη,
14.65
οἱ δὲ καὶ ἐκ πόντοιο καὶ ἐκ θανάτοιο φυγόντες
14.66
πάτρῃ χεῖρʼ ὀρέγουσι γεγηθότες ἄσπετα θυμῷ·
14.67
ὣς Δαναοὶ περὶ πάντες ἐγήθεον· οὐ γὰρ ἔτʼ αὐτοῖς
14.68
μνῆστις ἔην καμάτοιο δυσαλγέος οὐδὲ κυδοιμοῦ·
14.69
τοῖον γὰρ Κυθέρεια νόον ποιήσατο πάντων
14.70
ἦρα φέρουσʼ Ἑλένῃ ἑλικώπιδι καὶ Διὶ πατρί.
14.71
καὶ τότʼ ἄρʼ, ὡς ἐνόησε φίλον δεδαϊγμένον ἄστυ
14.72
Ξάνθος ἔθʼ αἱματόεντος ἀναπνείων ὀρυμαγδοῦ
14.73
μύρετο σὺν Νύμφῃσιν, ἐπεὶ κακὸν ἔμπεσε Τροίῃ
14.74
ἔκποθε καὶ Πριάμοιο κατημάλδυνε πόληα·
14.75
ὡς δʼ ὅτε λήιον αὖον ἐπιβρίσασα χάλαζα
14.76
τυτθὰ διατμήξῃ, στάχυας δʼ ἀπὸ πάντας ἀμέρσῃ
14.77
ῥιπῇ ὑπʼ ἀργαλέῃ, καλάμη δʼ ἄρα χεύατʼ ἔραζε
14.78
μαψιδίη καρποῖο κατʼ οὔδεος ὀλλυμένοιο
14.79
λευγαλέως, λυγρῷ δὲ πέλει μέγα πένθος ἄνακτι·
14.80
ὣς ἄρα καὶ Ξάνθοιο περὶ φρένας ἤλυθεν ἄλγος
14.81
Ἰλίου οἰωθέντος· ἔχεν δέ μιν αἰὲν ὀϊζὺς
14.82
ἀθάνατόν περ ἐόντα· μακρὴ δʼ ἀμφέστενεν Ἴδη
14.83
καὶ Σιμόεις· μύροντο δʼ ἀπόπροθι πάντες ἔναυλοι
14.84
Ἰδαῖοι Πριάμοιο πόλιν περικωκύοντες.
14.85
Ἀργεῖοι δʼ ἐπὶ νῆας ἔβαν μέγα καγχαλόωντες
14.86
μέλποντες νίκης ἐρικυδέος ὄβριμον ἀλκήν,
14.87
ἄλλοτε δὲ ζάθεον μακάρων γένος ἠδὲ καὶ αὐτῶν
14.88
θυμὸν τολμήεντα καὶ ἄφθιτον ἔργον Ἐπειοῦ.
14.89
μολπὴ δʼ οὐρανὸν ἷκε διʼ αἰθέρος, εὖτε κολοιῶν
14.90
κλαγγὴ ἀπειρεσίη, ὁπότʼ εὔδιον ἦμαρ ἵκηται
14.91
χείματος ἐξ ὀλοοῖο, πέλει δʼ ἄρα νήμενος αἰθήρ·
14.92
ὣς τῶν πὰρ νήεσσι μέγʼ ἔνδοθι γηθομένοων κῆρ
14.93
ἀθάνατοι τέρποντο κατʼ οὐρανόν, ὅσσοι ἀρωγοὶ
14.94
ἐκ θυμοῖο πέλοντο φιλοπτολέμων Ἀργείων·
14.95
ἄλλοι δʼ αὖ χαλέπαινον, ὅσοι Τρώεσσιν ἄμυνον,
14.96
δερκόμενοι Πριάμοιο καταιθόμενον πτολίεθρον·
14.97
ἀλλʼ οὐ μὰν ὑπὲρ Αἶσαν ἐελδόμενοί περ ἀμύνειν
14.98
ἔσθενον· οὐδὲ γὰρ αὐτὸς ὑπὲρ μόρον οὐδὲ Κρονίων
14.99
ῥηιδίως δύνατʼ Αἶσαν ἀπωσέμεν, ὃς περὶ πάντων
14.100
ἀθανάτων σθένος ἐστί, Διὸς δʼ ἐκ πάντα πέλονται.
14.101
Ἀργεῖοι δʼ ἄρα πολλὰ βοῶν ἐπὶ μηρία θέντες
14.102
καῖον ὁμῶς σχίζῃσι, καὶ ἐσσύμενοι περὶ βωμοὺς
14.103
λείβεσκον μέθυ λαρὸν ἐπʼ αἰθομένῃσι θυηλῇς
14.104
ἦρα θεοῖσι φέροντες, ἐπεὶ μέγα ἤνυσαν ἔργον.
14.105
πολλὰ δʼ ἐν εἰλαπίνῃ θυμηδέϊ κυδαίνεσκον
14.106
πάντας, ὅσους ὑπέδεκτο σὺν ἔντεσι δούριος ἵππος·
14.107
θαύμαζον δὲ Σίνωνα περικλυτόν, οὕνεχʼ ὑπέτλη
14.108
λώβην δυσμενέων πολυκηδέα· καί ῥά ἑ πάντες
14.109
μολπῇ καὶ γεράεσσιν ἀπειρεσίοισι τίεσκον·
14.110
ὃς δʼ ἄρʼ ἐνὶ φρεσὶν ᾗσιν ἐγήθεε τλήμονι θυμῷ
14.111
νίκῃ ἔπʼ Ἀργείων, σφετέρῃ δʼ οὐκ ἄχνυτο λώβῃ·
14.112
ἀνέρι γὰρ πινυτῷ καὶ ἐπίφρονι πολλὸν ἄμεινον
14.113
κῦδος καὶ χρυσοῖο καὶ εἴδεος ἠδὲ καὶ ἄλλων
14.114
ἐσθλῶν, ὁππόσα τʼ ἐστὶ καὶ ἔσσεται ἀνθρώποισιν.
14.115
οἱ δʼ ἄρα πὰρ νήεσσιν ἀταρβέα θυμὸν ἔχοντες
14.116
δόρπεον ἀλλήλοισι διηνεκέως ἐνέποντες·
14.117
ἠνύσαμεν πολέμοιο μακροῦ τέλος· ἠράμεθʼ εὐρὺ
14.118
κῦδος ὁμῶς δηΐοισι μέγα πτολίεθρον ἑλόντες·
14.119
ἀλλά, Ζεῦ, καὶ νόστον ἐελδομένοις κατάνευσον.
14.120
ὣς ἔφαν· ἀλλʼ οὐ πᾶσι πατὴρ ἐπὶ νόστον ἔνευσε.
14.121
τοῖς δέ τις ἐν μέσσοισιν ἐπιστάμενος
14.122
οὐ γὰρ ἔτʼ αὐτοῖς
14.123
δεῖμα πέλεν πολέμοιο δυσηχέος, ἀλλʼ ἐπὶ ἔργα
14.124
εὐνομίης ἐτράποντο καὶ εὐφροσύνης ἐρατεινῆς.
14.125
ὃς δʼ ἤτοι πρῶτον μὲν ἐελδομένοισιν ἄειδεν,
14.126
λαοὶ ὅπως συνάγερθεν ἐς Αὐλίδος ἱερὸν οὖδας,
14.127
ἠδʼ ὡς Πηλείδαο μέγα σθένος ἀκαμάτοιο
14.128
δώδεκα μὲν κατὰ πόντον ἰὼν διέπερσε πόληας,
14.129
ἕνδεκα δʼ αὖ κατὰ γαῖαν ἀπείριτον, ὅσσα τʼ ἔρεξε
14.130
Τήλεφον ἀμφὶς ἄνακτα καὶ ὄβριμον Ἠετίωνα,
14.131
ὡς δὲ Κύκνον κατέπεφνεν ὑπέρβιον, ἠδʼ ὅσʼ Ἀχαιοὶ
14.132
μαρνάμενοι κατὰ μῆνιν Ἀχιλλέος ἔργα κάμοντο,
14.133
Ἕκτορα δʼ ὡς εἴρυσσεν ἑῆς περὶ τείχεα πάτρης,
14.134
ὥς τʼ ἕλε Πενθεσίλειαν ἀνὰ μόθον, ὥς τʼ ἐδάμασσεν
14.135
υἱέα Τιθωνοῖο, καὶ ὡς κτάνε καρτερὸς Αἴας
14.136
Γλαῦκον ἐϋμμελίην, ἠδʼ ὡς ἐρικυδέα φῶτα
14.137
Εὐρύπυλον κατέπεφνε θοοῦ πάϊς Αἰακίδαο,
14.138
ὡς δὲ Πάριν δαμάσαντο Φιλοκτήταο βέλεμνα,
14.139
ἠδʼ ὁπόσοι δολόεντος ἐσήλυθον ἔνδοθεν ἵππου
14.140
ἀνέρες, ὥς τε πόληα θεηγενέος Πριάμοιο
14.141
πέρσαντες δαίνυντο κακῶν ἀπὸ νόσφι κυδοιμῶν.
14.142
ἄλλα δʼ ἄρʼ ἄλλος ἄειδεν, ὅ τι φρεσὶν ᾗσι μενοίνα.
14.143
ἀλλʼ ὅτε δαινυμένοισι μέσον περιτέλλετο νυκτός,
14.144
δὴ τότε που δόρποιο καὶ ἀκρήτοιο πότοιο
14.145
παυσάμενοι πάντες λαθικηδέα κοῖτον ἕλοντο·
14.146
χθιζὸν γὰρ καμάτοιο μένος κατεδάμνατο πάντας·
14.147
τῷ καὶ παννύχιοι λελιημένοι εἰλαπινάζειν
14.148
παύσανθʼ, οὕνεκεν ὕπνος ἄδην ἀέκοντας ἔρυκεν·
14.149
ἄλλῃ δʼ ἄλλος ἴαυεν· ὁ δʼ ἐν κλισίῃσιν ἑῇσιν
14.150
Ἀτρείδης ὀάριζε μετʼ ἠϋκόμοιο γυναικός·
14.151
οὐ γάρ πω κείνοισιν ἐπʼ ὄμμασιν ὕπνος ἔπιπτεν,
14.152
ἀλλὰ Κύπρις πεπόνητο περὶ φρένας, ὄφρα παλαιοῦ
14.153
λέκτρου ἐπιμνήσωνται, ἄχος δʼ ἀπὸ νόσφι βάλωνται.
14.154
πρώτη δʼ αὖθʼ Ἑλένη τοῖον ποτὶ μῦθον ἔειπε·
14.155
μή νύ μοι, ὦ Μενέλαε, χόλον ποτιβάλλεο θυμῷ·
14.156
οὐ γὰρ ἐγὼν ἐθέλουσα λίπον σέο δῶμα καὶ εὐνήν,
14.157
ἀλλά μʼ Ἀλεξάνδροιο βίη καὶ Τρώιοι υἷες
14.158
σεῦ ἀπὸ νόσφιν ἐόντος ἀνηρείψαντο κιόντες,
14.159
καί μʼ ἄμοτον μεμαυῖαν ὀϊζυρῶς ἀπολέσθαι
14.160
ἢ βρόχῳ ἀργαλέῳ ἢ καὶ ξίφεϊ στονόεντι
14.161
εἶργον ἐνὶ μεγάροισι παρηγορέοντες ἔπεσσι
14.162
σεῦ ἕνεκʼ ἀχνυμένην καὶ τηλυγέτοιο θυγατρός·
14.163
τῆς νύ σε πρός τε γάμου πολυγηθέος ἠδὲ σεῦ αὐτοῦ
14.164
λίσσομαι, ἀμφʼ ἐμέθεν στυγερῆς λελαθέσθαι ἀνίης.
14.165
ὣς φαμένην προσέειπε πύκα φρονέων Μενέλαος·
14.166
μηκέτι νῦν μέμνησʼ, ἀλλʼ ἰσχέμεν ἄλγεα θυμῷ·
14.167
ἀλλὰ τὰ μέν που πάντα μέλας δόμος ἐντὸς ἐέργοι
14.168
λήθης· οὐ γὰρ ἔοικε κακῶν μεμνῆσθαι ἔτʼ ἔργων.
14.169
ὣς φάτο· τὴν δʼ ἕλε χάρμα, δέος δʼ ἐξέσσυτο θυμοῦ·
14.170
ἔλπετο γὰρ παύσασθαι ἀνιηροῖο χόλοιο
14.171
ὃν πόσιν· ἀμφὶ δέ μιν βάλε πήχεε· καί σφιν ἅμʼ ἄμφω
14.172
δάκρυ κατὰ βλεφάροιιν ἐλείβετο ἡδὺ γοώντων.
14.173
ἀσπασίως δʼ ἀρα τώ γε παρʼ ἀλλήλοισι κλιθέντε
14.174
σφωιτέρου κατὰ θυμὸν ἀνεμνήσαντο γάμοιο·
14.175
ὡς δʼ ὅτε που κισσός τε καὶ ἡμερὶς ἀμφιβάλωνται
14.176
ἀλλήλους περὶ πρέμνα, τὰ δʼ οὔποτε ἲς ἀνέμοιο
14.177
σφῶν ἄπο νόσφι βαλέσθαι ἐπισθένει· ὣς ἄρα τώ γε
14.178
ἀλλήλοις συνέχοντο λιλαιόμενοι φιλότητος.
14.179
ἀλλʼ ὅτε δὴ καὶ τοῖσιν ἐπήλυθεν ὕπνος ἀπήμων,
14.180
δὴ τότʼ Ἀχιλλῆος κρατερὸν κῆρ ἰσοθέοιο
14.181
ἔστη ὑπὲρ κεφαλῆς οὗ νἱέος, οἷος ἔην περ
14.182
ζωὸς ἐών, ὅτε Τρωσὶν ἄχος πέλε, χάρμα δʼ Ἀχαιοῖς.
14.183
κύσσε δέ οἱ δειρὴν καὶ φάεα μαρμαίροντα
14.184
ἀσπασίως· καὶ τοῖα παρηγορέων προσέειπε·
14.185
χαῖρε, τέκος, καὶ μήτι δαΐζεο πένθεϊ θυμὸν
14.186
εἵνεκʼ ἐμεῖο θανόντος, ἐπεὶ μακάρεσσι θεοῖσιν
14.187
ἤδη ὁμέστιός εἰμι· σὺ δʼ ἴσχεο τειρόμενος κῆρ
14.188
ἀμφʼ ἐμέθεν, καὶ κάρτος ἄδην ἐμὸν ἔνθεο θυμῷ.
14.189
αἰεὶ δʼ Ἀργείων πρόμος ἵστασο μηδενὶ εἴκων
14.190
ἠνορέῃ· ἀγορῇ δὲ παλαιοτέροισι βροτοῖσι
14.191
πείθεο· καὶ νύ σε πάντες ἐΰφρονα μυθήσονται.
14.192
τῖε δʼ ἀμύμονας ἄνδρας, ὅσοις νόος ἔμπεδός ἐστιν·
14.193
ἐσθλῷ γὰρ φίλος ἐσθλὸς ἀνήρ, χαλεπῷ δ̓ἀλεγεινός.
14.194
ἢν δʼ ἀγαθὸν φρονέῃς, ἀγαθῶν καὶ τεύξεαι ἔργων·
14.195
κεῖνος δʼ οὔποτʼ ἀνὴρ Ἀρετῆς ἐπὶ τέρμαθʼ ἵκανεν,
14.196
ᾧτινι μὴ νόος ἐστὶν ἐναίσιμος· οὕνεκʼ ἄρʼ αὐτῆς
14.197
πρέμνον δύσβατόν ἐστι, μακρὸν δέ οἱ ἄχρις ἐπʼ αἴθρην
14.198
ὄζοι ἀνηέξηνθʼ· ὁπόσοισι δὲ κάρτος ὀπηδεῖ
14.199
καὶ πόνος, ἐκ καμάτου πολυγηθέα καρπὸν ἀμῶνται
14.200
εἰς Ἀρετῆς ἀναβάντες ἐϋστεφάνου κλυτὸν ἔρνος.
14.201
ἀλλʼ ἄγε, κύδιμος ἔσσο, καὶ ἐν φρεσὶ πευκαλίμῃσι
14.202
μήτʼ ἐπὶ πήματι πάγχυ δαΐζεο θυμὸν ἀνίῃ,
14.203
μήτʼ ἐσθλῷ μέγα χαῖρε· νόος δέ τοι ἤπιος ἔστω
14.204
ἔς τε φίλους ἑτάρους ἔς θʼ υἱέας ἔς τε γυναῖκα Zimmermann, ex P, for gunai=kas of v.
14.205
μνωομένῳ κατὰ θυμόν, ὅτι σχεδὸν ἀνθρώποισιν
14.206
οὐλομένοιο μόροιο πύλαι καὶ δώματα νεκρῶν·
14.207
ἀνδρῶν γὰρ γένος ἐστὶν ὁμοίιον ἄνθεσι ποίης,
14.208
ἄνθεσιν εἰαρινοῖσι· τὰ μὲν φθινύθει, τὰ δʼ ἀέξει·
14.209
τοὔνεκα μείλιχος ἔσσο. καὶ Ἀργείοισιν ἔνισπε
14.210
Ἀτρείδῃ δὲ μάλιστʼ Ἀγαμέμνονι, εἴ γέ τι θυμῷ
14.211
μέμνηνθʼ, ὅσσʼ ἐμόγησα περὶ Πριάμοιο πόληα,
14.212
ἠδʼ ὅσα ληισάμην πρὶν Τρώιον οὖδας ἱκέσθαι,
14.213
τῷ μοι νῦν ποτὶ τύμβον ἐελδομένῳ περ ἀγόντων Zimmermann, for kata\ qumo\n e)eld. peri\ pa/ntwn of v.
14.214
ληίδος ἐκ Πριάμοιο Πολυξείνην εὔπεπλον
14.215
ὄφρα θοῶς ῥέξωσιν, ἐπεί σφισι χώομαι ἔμπης
14.216
μᾶλλον ἔτʼ ἢ τὸ πάρος Βρισηίδος· ἀμφὶ δʼ ἄρʼ οἶδμα
14.217
κινήσω πόντοιο, βαλῶ δʼ ἐπὶ χείματι χεῖμα,
14.218
ὄφρα καταφθινύθοντες ἀτασθαλίῃσιν ἑῇσι
14.219
μίμνωσʼ ἐνθάδε πολλὸν ἐπὶ χρόνον, εἰσόκʼ ἔμοιγε
14.220
λοιβὰς ἀμφιχέωνται ἐελδόμενοι μέγα νόστου·
14.221
αὐτὴν δʼ, εἴ κʼ ἐθέλωσιν, ἐπὴν ἀπὸ θυμὸν ἕλωνται,
14.222
κούρην ταρχύσασθαι ἀπόπροθεν οὔτι μεγαίρω.
14.223
ὣς εἰπὼν ἀπόρουσε θοῇ ἐναλίγκιος αὔρῃ·
14.224
αἶψα δʼ ἐς Ἠλύσιον πεδίον κίεν, ᾗχι τέτυκται
14.225
οὐρανοῦ ἐξ ὑπάτοιο καταιβασίη τʼ ἄνοδός τε
14.226
ἀθανάτοις μακάρεσσιν· ὁ δʼ, ὁππότε μιν λίπεν ὕπνος,
14.227
μνήσατο πατρὸς ἑοῖο· νόος δέ οἱ ἠῢς ἰάνθη.
14.228
ἀλλʼ ὅτʼ ἐς οὐρανὸν εὐρὺν ἀνήιεν Ἠριγένεια
14.229
νύκτα διασκεδάσασα, φάνη δʼ ἄρα γαῖα καὶ αἰθήρ,
14.230
δὴ τότʼ Ἀχαιῶν υἷες ἀπὲκ λεχέων ἀνόρουσαν
14.231
ἱέμενοι νόστοιο, νέας δʼ ἐς βένθεα πόντου
14.232
εἷλκον καγχαλόωντες ἀνὰ φρένας, εἰ μὴ ἄρʼ αὐτοὺς
14.233
ἐσσυμένους κατέρυκεν Ἀχιλλέος ὄβριμος υἱός,
14.234
εἰς ἀγορήν τʼ ἐκάλεσσε καὶ ἔκφατο πατρὸς ἐφετμήν·
14.235
κέκλυτέ μευ, φίλα τέκνα μενεπτολέμων Ἀργείων,
14.236
πατρὸς ἐφημοσύνην ἐρικυδέος, ἥν μοι ἔνισπε
14.237
χθιζὸς ἐνὶ λεχέεσσι διὰ κνέφας ὑπνώοντι·
14.238
φῆ γὰρ ἀειγενέεσσι μετέμμεναι ἀθανάτοισιν·
14.239
ἠνώγει δʼ ὑμέας τε καὶ Ἀτρείδην βασιλῆα,
14.240
ὄφρα οἱ ἐκ πολέμοιο γέρας περικαλλὲς ἄγοιτε Zimmermann, for a)/roite of v.
14.241
τύμβον ἐπʼ εὐρώεντα Πολυξείνην εὔπεπλον·
14.242
καί μιν ἔφη ῥέξαντας ἀπόπροθι ταρχύσασθαι·
14.243
εἰ δέ οἱ οὐκ ἀλέγοντες ἐπιπλώοιτε θάλασσαν,
14.244
ἠπείλει κατὰ πόντον ἐναντία κύματʼ ἀείρας
14.245
λαὸν ὁμῶς νήεσσι πολὺν χρόνον ἐνθάδʼ ἐρύξειν.
14.246
ὣς φαμένου πείθοντο, καὶ ὡς θεῷ εὐχετόωντο·
14.247
καὶ γὰρ δὴ κατὰ βένθος ἀέξετο κῦμα θυέλλῃ
14.248
εὐρύτερον καὶ μᾶλλον ἐπήτριμον, ἢ πάρος ἦεν,
14.249
μαινομένου ἀνέμοιο· μέγας δʼ ὀροθύνετο πόντος
14.250
χερσὶ Ποσειδάωνος· ὁ γὰρ κρατερῷ Ἀχιλῆι
14.251
ἦρα φέρεν· πᾶσαι δὲ θοῶς ἐνόρουσαν ἄελλαι
14.252
ἐς πέλαγος· Δαναοὶ δὲ μέγʼ εὐχόμενοι Ἀχιλῆι
14.253
πάντες ὁμῶς μάλα τοῖα πρὸς ἀλλήλους ὀάριζον·
14.254
ἀτρεκέως γενεὴ μεγάλου Διὸς ἦεν Ἀχιλλεύς·
14.255
τῷ καὶ νῦν θεός ἐστι, καὶ εἰ πάρος ἔσκε μεθʼ ἡμῖν·
14.256
οὐ γὰρ ἀμαλδύνει μακάρων γένος ἄμβροτος αἰών.
14.257
ὣς φάμενοι ποτὶ τύμβον Ἀχιλλέος ἀπονέοντο·
14.258
τὴν δʼ ἄγον, ἠῢτε πόρτιν ἐς ἀθανάτοιο θυηλὰς
14.259
μητρὸς ἀπειρύσσαντες ἐνὶ ξυλόχοισι βοτῆρες,
14.260
ἡ δʼ ἄρα μακρὰ βοῶσα κινύρεται ἀχνυμένη κῆρ·
14.261
ὣς τῆμος Πριάμοιο πάϊς περικωκύεσκε
14.262
δυσμενέων ἐν χερσίν· ἄδην δέ οἱ ἔκχυτο δάκρυ·
14.263
ὡς δʼ ὁπότε βριαρῷ ὑπὸ χέρματι καρπὸς ἐλαίης
14.264
οὔπω χειμερίῃσι μελαινόμενος ψεκάδεσσι
14.265
χεύῃ πολλὸν ἄλειφα, περιτρίζωσι δὲ μακρὰ
14.266
ἄρμενʼ ὑπὸ σπάρτοισι βιαζομένων αἰζηῶν·
14.267
ὣς ἄρα καὶ Πριάμοιο πολυτλήτοιο θυγατρὸς
14.268
ἑλκομένης ποτὶ τύμβον ἀμειλίκτου Ἀχιλῆος
14.269
αἰνὸν ὁμῶς στοναχῇσι κατὰ βλεφάρων ῥέε δάκρυ·
14.270
καί οἱ κόλπος ἔνερθεν ἐπλήθετο· δεύετο δὲ χρὼς
14.271
ἀτρεκέως ἀτάλαντος ἐϋκτεάνῳ ἐλέφαντι.
14.272
καὶ τότε λευγαλέοις ἐπὶ πένθεσι κύντερον ἄλγος
14.273
τλήμονος ἐς κραδίην Ἑκάβης πέσεν· ἐν δέ οἱ ἦτορ
14.274
μνήσατʼ ὀϊζυροῖο καὶ ἀλγινόεντος ὀνείρου,
14.275
τόν ῥʼ ἴδεν ὑπνώουσα παροιχομένῃ ἐνὶ νυκτί·
14.276
ἦ γὰρ ὀΐετο τύμβον ἔπʼ ἀντιθέου Ἀχιλῆος
14.277
ἑστάμεναι γοόωσα, κόμαι δέ οἱ ἄχρις ἐπʼ οὖδας
14.278
ἐκ κεφαλῆς ἐκέχυντο, καὶ ἀμφοτέρων ἀπὸ μαζῶν
14.279
ἔρρεε φοίνιον αἷμα ποτὶ χθόνα, δεῦε δὲ σῆμα·
14.280
τοῦ πέρι δειμαίνουσα καὶ ὀσσομένη μέγα πῆμα
14.281
οἰκτρὸν ἀνοιμώζεσκε, γόῳ δʼ ἐπὶ μακρὸν ἀΰτει·
14.282
εὖτε κύων προπάροιθε κινυρομένη μεγάροιο
14.283
μακρὸν ὑλαγμὸν ἵησι, νέον σπαραγεῦσα γάλακτι,
14.284
τῆς ἄπο νήπια τέκνα πάρος φάος εἰσοράασθαι
14.285
νόσφι βάλωσιν ἄνακτες ἕλωρ ἔμεν οἰωνοῖσιν,
14.286
ἡ δʼ ὁτὲ μέν θʼ ὑλακῇσι κινύρεται, ἄλλοτε δʼ αὖτε
14.287
ὠρυθμῷ, στυγερὴ δὲ διʼ ἠέρος ἔσσυτʼ ἀϋτή·
14.288
ὡς Ἑκάβη γοόωσα μέγʼ ἴαχεν ἀμφὶ θυγατρί·
14.289
ὤ μοι ἐγώ, τί νυ πρῶτα, τί δʼ ὕστατον ἀχνυμένη κῆρ
14.290
κωκύσω πολέεσσι περιπλήθουσα κακοῖσιν,
14.291
υἱέας ἢ πόσιν αἰνὰ καὶ οὐκ ἐπίελπτα παθόντας,
14.292
ἢ πόλιν ἠὲ θύγατρας ἀεικέας, ἢ ἐμὸν αὐτῆς
14.293
ἦμαρ ἀναγκαῖον καὶ δούλιον; οὕνεκα Κῆρες
14.294
σμερδαλέαι πολέεσσί μʼ ἐνειλήσαντο κακοῖσι.
14.295
τέκνον ἐμόν, σοὶ δʼ αἰνὰ καὶ οὐκ ἐπίελπτα καὶ αὐτῇ
14.296
ἄλγἐ ἐπεκλώσαντο· γάμου δʼ ἄπο νόσφι βάλοντο
14.297
ἐγγὺς ἐόνθʼ Ὑμεναῖον, ἐπεκρήναντο δʼ ὄλεθρον
14.298
ἄσχετον ἀργαλέον τε καὶ οὐ φατόν· ἦ γὰρ Ἀχιλλεὺς
14.299
καὶ νέκυς ἡμετέρῳ ἔτʼ ἰαίνεται αἵματι θυμόν·
14.300
ὥς μʼ ὄφελον μετὰ σεῖο, φίλον τέκος, ἤματι τῷδε
14.301
γαῖα χανοῦσα κάλυψε, πάρος σέο πότμον ἰδέσθαι.
14.302
ὣς φαμένης ἄλληκτα κατὰ βλεφάροιιν ἔχυντο
14.303
δάκρυα· λευγαλέον γὰρ ἔχεν μετὰ πένθεσι πένθος.
14.304
οἱ δʼ ὅτʼ ἔβαν ποτὶ τύμβον Ἀχιλλῆος ζαθέοιο,
14.305
δὴ τότε οἱ φίλος υἱὸς ἐρυσσάμενος θοὸν ἆορ
14.306
σκαιῇ μὲν κούρην κατερήτυε, δεξιτερῇ δὲ
14.307
τύμβῳ ἐπιψαύων τοῖον ποτὶ μῦθον ἔειπε·
14.308
κλῦθι, πάτερ, σέο παιδὸς ἐπευχομένοιο καὶ ἄλλων
14.309
Ἀργείων, μηδʼ ἧμιν ἔτʼ ἀργαλέως χαλέπαινε·
14.310
ἤδη γάρ τοι πάντα τελέσσομεν, ὅσσα μενοινᾷς
14.311
σῇσιν ἐνὶ πραπίδεσσι· σὺ δʼ ἵλαος ἄμμι γένοιο
14.312
τεύξας εὐχομένοισι θοῶς θυμηδέα νόστον.
14.313
ὣς εἰπὼν κούρης διὰ λοίγιον ἤλασεν ἆορ
14.314
λευκανίης· τὴν δʼ αἶψα λίπεν πολυήρατος αἰὼν
14.315
οἰκτρὸν ἀνοιμώξασαν ἐφʼ ὑστατίῃ βιότοιο·
14.316
καί ῥʼ ἡ μὲν πρηνὴς χαμάδις πέσε· τῆς δʼ ὑπὸ δειρῇ
14.317
φοινίχθη περὶ πάντα, χιὼν ὥς, ἥ τʼ ἐν ὄρεσσιν
14.318
ἥ συὸς ἢ ἄρκτοιο κατουταμένης ὑπʼ ἄκοντι
14.319
αἵματι πορφυρόεντι θοῶς ἐρυθαίνεθʼ ὕπερθεν.
14.320
Ἀργεῖοι δέ μιν αἶψα δόσαν ποτὶ ἄστυ φέρεσθαι
14.321
ἐς δόμον ἀντιθέου Ἀντήνορος, οὕνεκʼ ἄρʼ αὐτὴν
14.322
κεῖνος ἐνῖ Τρώεσσιν ἑῷ πάρος υἱέϊ δίῳ
14.323
Εὐρυμάχῳ ἀτίταλλεν ἐνὶ μεγάροισιν ἄκοιτιν.
14.324
ὃς δʼ ἐπεὶ οὖν τάρχυσε κλυτὴν Πριάμοιο θύγατρα
14.325
ἐγγὺς ἑοῖο δόμοιο, παραὶ Γανυμήδεος ἱρῷ
14.326
σήματι Zimmermann, for ἱρὰ δώματα of MS. καὶ νηοῖο καταντίον Ἀτρυτώνης,
14.327
δὴ τότε παύσατο κῦμα, κατευνήθη δὲ θύελλα
14.328
σμερδαλέη, καὶ χεῦμα κατεπρήϋνε γαλήνη.
14.329
οἱ δὲ θοῶς ἐπὶ νῆας ἔβαν μέγα καγχαλόωντες
14.330
μέλποντες μακάρων ἱερὸν γένος ἠδʼ Ἀχιλῆα.
14.331
αἶψα δὲ δαῖτʼ ἐπάσαντο βοῶν ἀπὸ μῆρα ταμόντες
14.332
ἀθανάτοις· ἐρατὴ δὲ θυηπολίη πέλε πάντῃ·
14.333
οἱ δέ που ἀργυρέοισι καὶ ἐν χρυσέοισι κυπέλλοις
14.334
πῖνον ἀφυσσάμενοι λαρὸν μέθυ· γήθεε δέ σφι
14.335
θυμὸς ἐελδομένων σφετέρην ἐπὶ γαῖαν ἱκέσθαι.
14.336
ἀλλʼ ἄτε δὴ δόρποιο καὶ εἰλαπίνης κορέσαντο,
14.337
δὴ τότε Νηλέος υἱὸς ἐελδομένοισιν ἔειπεν·
14.338
κλῦτε, φίλοι, πολέμοιο μακρὴν προφυγόντες ὁμοκλήν,
14.339
ὄφρα λιλαιομένοισιν ἔπος θυμῆρες ἐνίσπω·
14.340
ἤδη γὰρ νόστοιο πέλει θυμηδέος ὥρη·
14.341
ἀλλʼ ἴομεν· δὴ γάρ που Ἀχιλλέος ὄβριμον ἦτορ
14.342
παύσατʼ ὀϊζυροῖο χόλου· κατέρυξε δὲ κῦμα
14.343
ὄβριμον Ἐννοσίγαιος· ἐπιπνείουσι δʼ ἀῆται
14.344
μείλιχοι· οὐδʼ ἔτι κῦμα κορύσσεται ἀλλʼ ἄγε νῆας
14.345
εἰς ἁλὸς οἶδμʼ ἐρύσαντες ἀναμνησώμεθα νόστου.
14.346
ὣς φάτʼ ἐελδομένοις· οἱ δʼ ἐς πλόον ἐντύνοντο.
14.347
ἔνθα τέρας θηητὸν ἐπιχθονίοισι φαάνθη,
14.348
οὕνεκα δὴ Πριάμοιο δάμαρ πολυδακρύτοιο
14.349
ἐκ βροτοῦ ἀλγινόεσσα κύων γένετʼ· ἀμφὶ δὲ λαοὶ
14.350
θάμβεον ἀγρόμενοι· τῆς δʼ ἅψεα λάϊνα πάντα
14.351
θῆκε θεός, μέγα θαῦμα καὶ ἐσσομένοισι βροτοῖσι·
14.352
καὶ τὴν μὲν Κάλχαντος ὑπʼ ἐννεσίῃσιν Ἀχαιοὶ
14.353
νηὸς ἐπʼ ὠκυπόροιο πέραν θέσαν Ἑλλησπόντου.
14.354
καρπαλίμως δʼ ἄρα νῆας ἔσω ἁλὸς εἰρύσσαντες
14.355
κτήματα πάντʼ ἐβάλονθʼ, ὁπόσʼ Ἴλιον εἰσανιόντες
14.356
ληΐσσαντο πάροιθε περικτίονας δαμάσαντες,
14.357
ἠδʼ ὁπόσʼ ἐξ αὐτῆς ἄγον Ἰλίου, οἷσι μάλιστα
14.358
γήθεον, οὕνεκʼ ἕσαν μάλα μυρία· τοῖς δʼ ἅμα πολλαὶ
14.359
ληιάδες συνέποντο μάλʼ ἀχνύμεναι κατὰ θυμόν·
14.360
αὐτοὶ δʼ ἐντὸς ἵκοντο νεῶν. ἀλλʼ οὔ σφισι Κάλχας
14.361
ἕσπετʼ ἐπειγομένοισιν ἔσω ἁλός, ἀλλὰ καὶ ἄλλους
14.362
Ἀργείους κατέρυκε· Καφηρίσι γὰρ περὶ πέτρῃς
14.363
δείδιεν αἰνὸν ὄλεθρον ἐπεσσύμενον Δαναοῖσιν.
14.364
οἱ δέ οἱ οὔτι πίθοντο· παρήπαφε γὰρ νόον ἀνδρῶν
14.365
αἶσα κακή· μοῦνος δὲ θεοπροπίας εὖ εἰδὼς
14.366
Ἀμφίλοχος, θοὸς υἱὸς ἀμύμονος Ἀμφιαράου,
14.367
μίμνεν ὁμῶς Κάλχαντι περίφρονι· τοῖσι γὰρ ἦεν
14.368
αἴσιμον ἀμφοτέροισιν ἑῆς ἀπὸ τηλόθι γαίης
14.369
Παμφύλων Κιλίκων τε ποτὶ πτολίεθρα νέεσθαι.
14.370
ἀλλὰ τὰ μὲν μετόπισθε θεοὶ θέσαν· αὐτὰρ Ἀχαιοὶ
14.371
νηῶν πείσματʼ ἔλυσαν ἀπὸ χθονὸς ἠδὲ καὶ εὐνὰς
14.372
ἐσσυμένως ἀνάειραν· ἐπίαχε δʼ Ἑλλήσποντος
14.373
σπερχομένων· νῆες δὲ περικλύζοντο θαλάσσῃ·
14.374
ἀμφὶ δʼ ἄρα σφίσι πολλὰ περὶ πρώρῃσιν ἔκειντο
14.375
ἔντἐ ἀποκταμένων· καθύπερθε δὲ σήματα νίκης
14.376
μυρίʼ ἀπῃώρηντο· κατεστέψαντο δὲ νῆας
14.377
καὶ κεφαλὶς καὶ δοῦρα καὶ ἀσπίδας, οἷσι μάχοντο
14.378
ἀντία δυσμενέων· ἀπὸ δὲ πρώρηθεν ἄνακτες
14.379
εἰς ἅλα κυανέην λεῖβον μέθυ πολλὰ θεοῖσιν
14.380
εὐχόμενοι μακάρεσσιν ἀκηδέα νόστον ὀπάσσαι·
14.381
εὐχωλαὶ δʼ ἀνέμοισι μίγεν καὶ ἀπόπροθι νηῶν
14.382
μαψιδίως νεφέεσσι καὶ ἠέρι συμφορέοντο.
14.383
αἱ δʼ ἄρα παπταίνεσκον ἐς Ἴλιον ἀχνύμεναι κῆρ
14.384
ληιάδες· καὶ πολλὰ κινυρόμεναι γοάασκον
14.385
κρύβδην Ἀργείων μέγʼ ἐνὶ φρεσὶ πένθος ἔχουσαι·
14.386
καί ῥʼ αἱ μὲν περὶ γούνατʼ ἔχον χέρας· αἱ δὲ μέτωπα
14.386a
χερσὶν ἐπηρείδοντο δυσάμμορι· αἱ δʼ ἄρα τέκνα Verse supplied by Zimmerman, ex P.
14.387
ἄμφεχον ἀγκοίνῃσι· τὰ δʼ οὔπω δούλιον ἦμαρ
14.388
ἔστενον οὐδὲ πάτρης ἐπὶ πήμασιν, ἀλλʼ ἐπὶ μαζῷ
14.389
θυμὸν ἔχον· κηδέων γὰρ ἀπόπροθι νήπιον ἦτορ.
14.390
πάσῃσιν δʼ ἑλέλυντο κόμαι καὶ στήθεα λυγρὰ
14.391
ἀμφʼ ὀνύχεσσι δέδρυπτο· παρειῇσιν δʼ ἔπι δάκρυ
14.392
αὐαλέον περίκειτο, κατείβετο δʼ ἄλλʼ ἐφύπερθε
14.393
πυκνὸν ἀπὸ βλεφάρων· δέρκοντο δὲ τλήμονα πάτρην
14.394
αἰθομένην ἔτι πάγχυ, πολὺν δʼ ἀνὰ καπνὸν ἰόντα·
14.395
ἀμφὶ δὲ Κασσάνδρην περικυδέα παπταίνουσαι
14.396
πᾶσαί μιν θηεῦντο θεοπροπίης ἀλεγεινῆς
14.397
μνωόμεναι· ἡ δέ σφιν ἐπεγγελάασκε γοώσαις,
14.398
καίπερ ἀκηχεμένη στυγεροῖς ἐπὶ πήμασι πάτρης.
14.399
Τρώων δʼ ὅσσοι ἄλυξαν ἀνηλέος ἐκ πολέμοιο,
14.400
ἀγρόμενοι κατὰ ἄστυ περὶ νέκυας πονέοντο
14.401
θαπτέμεναι μεμαῶτες· ἄγεν δʼ ἀλεγεινὸν ἐς ἔργον
14.402
Ἀντήνωρ· αὐτὴν δὲ πυρὴν πολέεσσι τίθεντο.
14.403
Ἀργεῖοι δʼ ἄλληκτον ἐνὶ φρεσὶ καγχαλόωντες
14.404
ἄλλοτε μὲν κώπῃσι διέπρησσον μέλαν ὕδωρ,
14.405
ἄλλοτε δʼ ἱστία νηυσὶ μεμαότες ἐντύνοντο
14.406
ἐσσυμένως· ὀπίσω δὲ θοῶς ἀπελείπετο πᾶσα
14.407
Δαρδανίη καὶ τύμβος Ἀχιλλέος· οἱ δʼ ἀνὰ θυμὸν
14.408
καίπερ ἰαινόμενοι κταμένων μνησθέντες ἑνὰ θυμὸν
14.409
ἀργαλέως ἀκάχοντο καὶ ἀλλοδαπῶν ἐπὶ γαῖαν
14.410
ὄσσε βάλον. ἡ δέ σφιν ἐφαίνετο τηλόθι νηῶν
14.411
χαζομένη· τοὶ δʼ αἶψα παρʼ ἀγχιάλοιο φέροντο
14.412
ῥηγμῖνας Τενέδοιο· παρημείβοντο δὲ Χρῦσαν
14.413
καὶ Φοίβου Σμινθῆος ἕδος ζαθέοιό τε Κίλλης·
14.414
Λέσβος δʼ ἠνεμόεσσʼ ἀνεφαίνετο· κάμπτετο δʼ ἄκρη
14.415
ἐσσυμένως Λεκτοῖο, τόθι ῥίον ὕστατον Ἴδης.
14.416
λαίφεα δὲ πρησθέντα περίαχεν· ἀμφὶ δὲ πρώραις
14.417
ἔβραχεν οἶδμα κελαινόν· ἐπεσκιόωντο δὲ μακρὰ
14.418
κύματα· λευκαίνοντο δʼ ὑπὲρ πόντοιο κέλευθοι.
14.419
καί νύ κεν Ἀργεῖοι κίον Ἑλλάδος ἱερὸν οὖδας
14.420
πάντες ἁλὸς κατὰ βένθος ἀκηδέες, εἰ μὴ ἄρα σφι
14.421
κούρη ἐριγδούποιο Διὸς νεμέσησεν Ἀθήνη·
14.422
καί ῥʼ ὁπότʼ Εὐβοίης σχεδὸν ἤλυθον ἠνεμοέσσης,
14.423
δὴ τότε μητιόωσα βαρὺν καὶ ἀνηλέα πότμον
14.424
ἀμφὶ Λοκρῶν βασιλῆι καὶ ἄσχετον ἀσχαλόωσα
14.425
Ζηνὶ θεῶν μεδέοντι παρισταμένη φάτο μῦθον
14.426
ἀθανάτων ἀπάνευθε· χόλον δέ οἱ οὐ χάδε θυμός·
14.427
Ζεῦ πάτερ, οὐκέτʼ ἀνεκτὰ θεοῖς ἐπιμηχανόωνται
14.428
ἀνέρες, οὐκ ἀλέγοντες ἀνὰ φρένας οὔτε σεῦ αὐτοῦ
14.429
οὔτʼ ἄλλων μακάρων, ἐπεὶ ἦ τίσις οὐκέτʼ ὀπηδεῖ
14.430
ἀνδράσι λευγαλέοισι, κακοῦ δʼ ἄρα πλλάκις ἐσθλὸς
14.431
συμφέρετʼ ἄλγεσι μᾶλλον, ἔχει δʼ ἄλληκτον ὀϊζύν·
14.432
τοὔνεκʼ ἄρʼ οὔτε δίκην τις ἔθʼ ἅζεται, οὐδέ τις αἰδὼς
14.433
ἔστι παρʼ ἀνθρώποισιν· ἔγωγε μὲν οὔτʼ ἐν Ὀλύμπῳ
14.434
ἔσσομαι, οὔτʼ ἔτι σεῖο κεκλήσομαι, εἰ μὴ Ἀχαιῶν
14.435
τίσομʼ ἀτασθαλίην, ἐπεὶ ἦ νύ μοι ἔνδοθι νηοῦ
14.436
υἱὸς Ὀϊλῆος μέγʼ ἐνήλιτεν, οὐδʼ ἐλέαιρε
14.437
Κασσάνδρην ὀρέγουσαν ἀκηδέας εἰς ἐμὲ χεῖρας
14.438
πολλάκις, οὐδʼ ὅ γʼ ἔδεισεν ἐμὸν μένος, οὐδέ τι θυμῷ
14.439
ᾐδέσατʼ ἀθανάτην, ἀλλʼ ἄσχετον ἔργον ἔρεξε.
14.440
τῷ νύ μοι ἀμβροσίῃσι περὶ φρεσὶ μή τι μεγήρῃς
14.441
ῥέξαι, ὅπως μοι θυμὸς ἐέλδεται, ὄφρα καὶ ἄλλοι
14.442
αἰζηοὶ τρομέωσι θεῶν ἀρίδηλον ὁμοκλήν.
14.443
ὣς φαμένην προσέειπε πατὴρ ἀγανοῖς ἐπέεσσιν·
14.444
ὦ τέκος, οὔτι ἔγωγʼ ἀνθίσταμαι εἵνεκʼ Ἀχαιῶν,
14.445
ἀλλὰ καὶ ἔντεα πάντα, τά μοι πάρος ἦρα φέροντες
14.446
χερσὶν ὑπʼ ἀκαμάτῃσιν ἐτεκτήναντο Κύκλωπες
14.447
δώσω ἐέλδομένῃ· σὺ δὲ σῷ κρατερόφρονι θυμῷ
14.448
αὐτὴ χεῖμʼ ἀλεγεινὸν ἐπʼ Ἀργείοισιν ὄρινον.
14.449
ὣς εἰπὼν στεροπήν τε θοὴν ὀλοόν τε κεραυνὸν
14.450
καὶ βροντὴν στονόεσσαν ἀταρβέος ἀγχόθι κούρης
14.451
θήκατο· τῆς δʼ ἄρα θυμὸς ὑπὸ κραδίῃ μέγʼ ἰάνθη.
14.452
αὐτίκα δʼ αἰγίδα θοῦριν ἐδύσατο παμφανόωσαν,
14.453
ἄρρηκτον βριαρήν τε καὶ ἀθανάτοισιν ἀγητήν·
14.454
ἐν γάρ οἱ πεπόνητο κάρη βλοσυροῖο Μεδούσης
14.455
σμερδαλέον· κρατεροὶ δὲ καὶ ἀκαμάτου πυρὸς ὁρμὴν
14.456
λάβρον ἀποπνείοντες ἔσαν καθύπερθε δράκοντες·
14.457
ἔβραχε δʼ αἰγὶς ἅπασα περὶ στήθεσσιν ἀνάσσης,
14.458
οἷον ὅτε στεροπῇσιν ἐπιβρέμει ἄσπετος αἰθήρ.
14.459
λάζετο δʼ ἔντεα πατρός, ἅπερ θεὸς οὔτις ἀείρει
14.460
νόσφι Διὸς μεγάλοιο· τίναξε δὲ μακρὸν Ὄλυμπον·
14.461
σὺν δʼ ἔχεεν νεφέλας τε καὶ ἠέρα πᾶσαν ὕπερθε·
14.462
νὺξ δʼ ἐχύθη περὶ γαῖαν, ἐπήχλυσεν δὲ θάλασσα·
14.463
Ζεὺς δὲ μέγʼ εἰσορόων ἐπετέρπετο· κίνυτο δʼ εὐρὺς
14.464
οὐρανὸς ἀμφὶ πόδεσσι θεῆς· περὶ δʼ ἔβραχεν αἰθήρ,
14.465
ὡς Διὸς ἀκαμάτοιο ποτὶ κλόνον ἐμμεμαῶτος.
14.466
ἡ δʼ ἄφαρ ἠερόεντος ὑπὲρ πόντοιο φέρεσθαι
14.467
οὐρανόθεν προέηκεν ἐς Αἴολον ἄμβροτον Ἶριν,
14.468
ὄφρʼ ἀνέμους ἅμα πάντας ἐπιβρίσαντας ἰάλλῃ
14.469
ἐλθέμεναι κραναοῖο Καφηρέος ἐγγύθεν ἄκρων Zimmermann, for ἔνθεν Ἀχαιῶν of MSS.
14.470
νωλεμέως χριμφθέντας, ἀνοιδῆναί τε θάλασσαν,
14.471
λευγαλέῃς ῥιπῇσι μεμηνότας. ἡ δʼ ἀΐουσα
14.472
ἐσσυμένως οἴμησε περιγναμφθεῖσα νέφεσσι·
14.473
φαίης κεν πῦρ ἔμμεν ἅμʼ ἠέρι καὶ μέλαν ὕδωρ.
14.474
ἵκετο δʼ Αἰολίην, ἀνέμων ὅθι λάβρον ἀέντων
14.475
ἄντρα πέλει στυφελῇσιν ἀρηράμενʼ ἀμφὶ πέτρῃσι
14.476
κοῖλα καὶ ἠχήεντα· δόμοι δʼ ἄγχιστα πέλονται
14.477
Αἰόλου Ἱπποτάδαο. κίχεν δέ μιν ἔνδον ἐόντα
14.478
σύν τʼ ἀλόχῳ καὶ παισὶ δυώδεκα· καί οἱ ἔειπεν,
14.479
ὁππόσʼ Ἀθηναίη Δαναῶν ἐπεμήδετο νόστῳ.
14.480
αὐτὰρ ὅ γʼ οὐκ ἀπίθησε, μολὼν δʼ ἔκτοσθε μελάθρων
14.481
χερσὶν ὑπʼ ἀκαμάτῃσιν ὅρος μέγα τύψε τριαίνῃ,
14.482
ἔνθʼ ἄνεμοι κελαδεινὰ δυσηχέες ηὐλίζοντο
14.483
ἐν κενεῷ κευθμῶνι· περίαχε δʼ αἰὲν ἰωὴ
14.484
βρυχομένη ἀλεγεινά· βίῃ δʼ ἔρρηξε κολώνην.
14.485
οἱ δʼ ἄφαρ ἐξεχέοντο· κέλευσε δὲ πάντας ἐρεμνὴν
14.486
λαίλαπα συμφορέοντας ἀήμεναι, ὄφρʼ ἀλεγεινὸν
14.487
ὀρνυμένης ἁλὸς οἶδμα Καφηρέος ἄκρα καλύψῃ.
14.488
οἱ δὲ θοῶς ὤρνυντο πάρος βασιλῆος ἀκοῦσαι
14.489
πᾶν ἔπος· ἐσσυμένοισι δʼ ἐπεστενάχιζε θάλασσα
14.490
ἄσχετον· ἠλιβάτοισι δʼ ἐοικότα κύματʼ ὄρεσσιν
14.491
ἄλλοθεν ἄλλα φέροντο. κατεκλάσθη δʼ ἄρʼ Ἀχαιῶν
14.492
θυμὸς ἐνὶ στέρνοισιν, ἐπεὶ νέας ἄλλοτε μέν που
14.493
ὑψηλὴν φέρε κῦμα διʼ ἠέρος, ἄλλοτε δʼ αὖτε
14.494
οἷα κατὰ κρημνοῖο κυλινδομένας φορέεσκε
14.495
βυσσόν ἐς ἠερόεντα· βίη δέ τις ἄσχετος αἰεὶ
14.496
ψάμμον ἀναβλύζεσκε διοιγομένοιο κλύδωνος.
14.497
οἱ δʼ ἄρʼ ἀμηχανίη βεβολημένοι οὔτʼ ἐπʼ ἐρετμῷ
14.498
χεῖρα βαλεῖν ἐδύναντο τεθηπότες οὔτʼ ἄρα λαίφη
14.499
ἔσθενον ἀμφὶ κέρα λελιημένοι εἰρύσσασθαι
14.500
ῥηγνύμενʼ ἐξ ἀνέμων, οὐδʼ ἔμπαλιν ἰθύνασθαι
14.501
ἐς πλόον· ἀργαλέαι γὰρ ἐπεκλονέοντο θύελλαι·
14.502
οὐδὲ κυβερνήτῃσι πέλεν μένος εἰσέτι νηῶν
14.503
χερσὶν ἐπισταμένῃσι θοῶς οἰήϊα νωμᾶν·
14.504
πάντα γὰρ ἄλλυδις ἄλλα κακαὶ διέχευον ἄελλαι.
14.505
οὐδέ τις ἐλπωρὴ βιότου πέλεν, οὕνεκʼ ἐρεμνὴ
14.506
νὺξ ἅμα καὶ μέγα χεῖμα καὶ ἀθανάτων χόλος αἰνὸς
14.507
ὦρτο· Ποσειδάων γὰρ ἀνηλέα πόντον ὄρινεν
14.508
ἦρα κασιγνήτοιο φέρων ἐρικυδέϊ κούρῃ,
14.509
ἥ ῥα καὶ αὐτὴ ὕπερθεν ἀμείλιχα μαιμώωσα
14.510
θῦνε μετʼ ἀστεροπῇσιν· ἐπέκτυπε δʼ οὐρανόθεν Ζεὺς
14.511
κυδαίνων ἀνὰ θυμὸν ἑὸν τέκος, ἀμφὶ δὲ πᾶσαι
14.512
νῆσοί τʼ ἤπειροί τε κατεκλύζοντο θαλάσσῃ
14.513
Εὐβοίης οὐ πολλὸν ἀπόπροθεν, ᾗχι μάλιστα
14.514
τεῦχεν ἀμειλίκτοισιν ἐπʼ ἄλγεσιν ἄλγεα δαίμων
14.515
Ἀργείοις. στοναχὴ δὲ καὶ οἰμωγὴ κατὰ νῆας
14.516
ἔπλετʼ ἀπολλυμένων· κανάχιζε δὲ δούρατα νηῶν
14.517
ἀγνυμένων· αἱ γάρ ῥα συνωχαδὸν ἀλλήλῃσιν
14.518
αἰὲν ἐπερρήγνυντο· πόνος δʼ ἄπρηκτος ὀρώρει·
14.519
καί ῥʼ οἱ μὲν κώπῃσιν ἀπωσέμεναι μεμαῶτες
14.520
νῆας ἐπεσσυμένας αὐτοῖς ἅμα δούρασι λυγροὶ
14.521
κάππεσον ἐς μέγα βένθος, ἀμειλίκτῳ δʼ ὑπὸ πότμῳ
14.522
κάτθανον, οὕνεκʼ ἄρα σφιν ἐπέχραον ἄλλοθεν ἄλλα
14.523
νηῶν δούρατα μακρά· συνηλοίηντο δὲ πάντων
14.524
σώματα λευγαλέως· οἱ δʼ ἐν νήεσσι πεσόντες
14.525
κεῖντο καταφθιμένοισιν ἐοικότες· οἱ δʼ ὑπʼ ἀνάγκης
14.526
νήχοντʼ ἀμφιπεσόντες ἐϋξέστοισιν ἐρετμοῖς·
14.527
ἄλλοι δʼ αὖ σανίδεσσιν ἐπέπλεον· ἔβραχε δʼ ἅλμη
14.528
βυσσόθεν, ὥστε θάλασσαν ἰδʼ οὐρανὸν ἠδὲ καὶ αἶαν
14.529
φαίνεσθʼ ἀλλήλοισιν ὁμῶς συναρηρότα πάντα.
14.530
ἡ δʼ ἄρʼ Οὐλύμποιο βαρύκτυπος Ἀτρυτώνη
14.531
οὔτι καταισχύνεσκε βίην πατρός· ἀμφὶ δʼ ἄρʼ αἰθὴρ
14.532
ἴαχεν. ἡ δʼ Αἴαντι χόλον καὶ πῆμα φέρουσα
14.533
ἔμβαλε νηὶ κεραυνόν· ἄφαρ δέ μιν ἄλλυδις ἄλλῃ
14.534
ἐσκέδασεν διὰ τυτθά· περίαχε δʼ αἶα καὶ αἰθήρ·
14.535
ἐκλύσθη δʼ ἄρα πᾶσα περίδρομος Ἀμφιτρίτη.
14.536
οἱ δʼ ἔκτοσθε νεὸς πέσον ἀθρόοι· ἀμφὶ δʼ ἄρʼ αὐτοὺς
14.537
κύματα μακρὰ φέροντο· περὶ στεροπῇσι δʼ ἀνάσσης
14.538
αἴγλη μαρμαίρεσκε διὰ κνέφας ἀΐσσουσα·
14.539
οἱ δʼ ἄποτον λάπτοντες ἁλὸς πολυηχέος ἅλμην
14.540
θυμὸν ἀποπνείοντες ὑπὲρ πόντοιο φέροντο.
14.541
Ληιάσιν δʼ ἄρα χάρμα καὶ ὀλλυμένῃσι τέτυκτο·
14.542
καί ῥʼ αἱ μὲν κατέδυσαν ἔσω ἁλὸς ἀμφιβαλοῦσαι
14.543
χεῖρας ἑοῖς τεκέεσσι δυσάμμοροι· αἱ δʼ ἀλεγεινὰ
14.544
δυσμενέων περὶ κρᾶτα βάλον χέρας, οἷς ἅμα λυγραὶ
14.545
σπεῦδον ἀποφθίσασθαι ἑῆς ἀντάξια λώβης
14.546
τινύμεναι Δαναούς· ἡ δʼ ὑψόθεν εἰσορόωσα
14.547
τέρπεθʼ ἑὸν κατὰ θυμὸν ἀγαυὴ Τριτογένεια.
14.548
Αἴας δʼ ἄλλοτε μὲν περινήχετο δούρατι νηός,
14.549
ἄλλοτε δʼ αὖ χείρεσσι διήνυεν ἁλμυρὰ βένθη
14.550
ἀκαμάτῳ Τιτῆνι βίην ὑπέροπλον ἐοικώς·
14.551
σχίζετο δʼ ἁλμυρὸν οἶδμα περὶ κρατερῇσι χέρεσσιν
14.552
ἀνδρὸς ὑπερθύμοιο· θεοὶ δέ μιν εἰσορόωντες
14.553
ἠνορέην καὶ κάρτος ἐθάμβεον· ἀμφὶ δὲ κῦμα
14.554
ἄλλοτε μὲν φορέεσκε πελώριον ἠΰτʼ ἐπʼ ἄκρην
14.555
οὔρεος ὑψηλοῖο διʼ ἠέρος, ἄλλοτε δʼ αὖτε
14.556
ὑψόθεν οἷα φάραγξιν ἐνέκρυφεν· οὐδʼ ὅ γε χεῖρας
14.557
κάμνε πολυτλήτους· πολλοί γε μὲν ἔνθα καὶ ἔνθα
14.558
σβεννύμενοι σμαράγιζον ἔσω πόντοιο κεραυνοί·
14.559
οὔπω γάρ οἱ θυμὸν ἐμήδετο κηρὶ δαμάσσαι
14.560
κούρη ἐριγδούποιο Διὸς μάλα περ κοτέουσα,
14.561
πρὶν τλῆναι κακὰ πολλὰ καὶ ἄλγεσι πάγχυ μογῆσαι·
14.562
τοὔνεκά μιν κατὰ βένθος ἐδάμνατο δηρὸν ὀϊζὺς
14.563
πάντοθε τειρόμενον· περὶ γὰρ κακὰ μυρία Κῆρες
14.564
ἀνδρὶ περιστήσαντο· μένος δʼ ἐνέπνευσεν ἀνάγκη·
14.565
φῆ δέ, καὶ εἰ μάλα πάντες Ὀλύμπιοι εἰς ἓν ἵκωνται
14.566
χωόμενοι καὶ πᾶσαν ἀναστήσωσι θάλασσαν
14.567
ἐκφυγέειν· ἀλλʼ οὔτι θεῶν ὑπάλυξεν ὁμοκλήν·
14.568
δὴ γάρ οἱ νεμέσησεν ὑπέρβιος Ἐννοσίγαιος,
14.569
εὖτέ μιν εἰσενόησεν ἐφαπτόμενον χερὶ πέτρης
14.570
Γυραίης, καί οἱ μέγʼ ἐχώσατο· σὺν δʼ ἐτίναξε
14.571
πόντον ὁμῶς καὶ γαῖαν ἀπείριτον· ἀμφὶ δὲ πάντῃ
14.572
κρημνοὶ ὑπεκλονέοντο Καφηρέος· αἱ δʼ ἀλεγεινὸν
14.573
θεινόμεναι ῥηγμῖνες ἐπέβραχον οἴδματι λάβρῳ
14.574
χωομένοιο ἄνακτος· ἀπέσχισε δʼ εἰς ἅλα πέτρον
14.575
εὐρέα, τοῦ περ ἐκεῖνος ἑῇς ἐπεμαίετο χερσί.
14.576
καί ῥά οἱ ἀμφὶ πάγοισιν ἑλισσομένου μάλα δηρὸν
14.577
χεῖρες ἀπεδρύφθησαν, ὑπέδραμε δʼ αἷμʼ ὀνύχεσσι·
14.578
μορμῦρον δέ οἱ αἰὲν ὀρινομένου περὶ κῦμα
14.579
ἀφρὸς ἄδην λεύκαινε κάρη λάσιόν τε γένειον·
14.580
καὶ νύ κεν ἐξήλυξε κακὸν μόρον, εἰ μὴ ἄρʼ αὐτῷ
14.581
ῥήξας γαῖαν ἔνερθεν ἐπιπροέηκε κολώνην·
14.582
εὖτε πάρος μεγάλοιο κατʼ Ἐγκελάδοιο δαΐφρων
14.583
Παλλὰς ἀειραμένη Σικελὴν ἐπικάββαλε νῆσον,
14.584
ἥ ῥʼ ἔτι καίεται αἰὲν ὑπʼ ἀκαμάτοιο Γίγαντος
14.585
αἰθαλόεν πνείοντος ἔσω χθονός· ὣς ἄρα Λοκρῶν
14.586
ἀμφεκάλυψεν ἄνακτα δυσάμμορον οὔρεος ἄκρη
14.587
ὑψόθεν ἐξεριποῦσα, βάρυνε δὲ καρτερὸν ἄνδρα·
14.588
ἀμφὶ δέ μιν θανάτοιο μέλας ἐκιχήσατʼ ὄλεθρος
14.589
γαίῃ ὁμῶς δμηθέντα καὶ ἀτρυγέτῳ ἐνὶ πόντῳ.
14.590
ὣς δὲ καὶ ἄλλοι Ἀχαιοὶ ὑπὲρ μέγα λαῖτμα φέροντο,
14.591
οἱ μὲν ἄρʼ ἐν νήεσσι τεθηπότες, οἱ δὲ πεσόντες
14.592
ἔκτοσθεν νηῶν· ὀλοὴ δʼ ἔχε πάντας ὀϊζύς·
14.593
αἱ μὲν γὰρ φορέοντʼ ἐπικάρσιαι εἰν ἁλὶ νῆες,
14.594
ἄλλαι δʼ ἀνστρέψασαι ἄνω τρόπιν· ὧν δέ που ἱστοὶ
14.595
ἐκ δοράτων Zimmermann, for κεράτων of v. ἐάγησαν ἐπισπέρχοντος ἀήτεω·
14.596
τῶν δὲ διὰ ξύλα πάντα θοαὶ σκεδάσαντο θύελλαι·
14.597
αἱ δὲ καὶ ἐς μέγα βένθος ὑποβρύχιαι κατέδυσαν
14.598
ὄμβρου ἐπιβρίσαντος ἀπείρονος, οὐδʼ ὑπέμειναν
14.599
λάβρον ὁμῶς ἀνέμοισι θαλάσσης καὶ Διὸς ὕδωρ
14.600
μισγόμενον. ποταμῷ γὰρ ἀλίγκιος ἔρρεεν αἰθὴρ
14.601
συνεχές· ἡ δʼ ὑπένερθεν ἐμαίνετο δῖα θάλασσα·
14.602
καί τις ἔφη· τάχα τοῖον ἐπέχραεν ἀνδράσι χεῖμα,
14.603
ὁππότε Δευκαλίωνος ἀθέσφατος ὑετὸς ἦλθε,
14.604
ποντώθη δʼ ἄρα γαῖα, βυθὸς δʼ ἐπεχεύατο πάντῃ.
14.605
ὣς ἄρʼ ἔφη Δαναῶν τις ἐνὶ φρεσὶ χεῖμα τεθηπὼς
14.606
λευγαλέον· πολλοὶ δὲ κατέφθιθεν· ἀμφὶ δὲ νεκρῶν
14.607
πλήθεθʼ ἁλὸς μέγα χεῦμα, περιστείνοντο δὲ πᾶσαι
14.608
ἠιόνες· πολέας γὰρ ἀπέπτυσε κῦμʼ ἐπὶ χέρσον·
14.609
ἀμφὶ δὲ νήια δοῦρα βαρύβρομον Ἀμφιτρίτην
14.610
πᾶσαν ἄδην ἐκάλυψε· μέσον δʼ ἀνεφαίνετο κῦμα.
14.611
ἄλλοι δʼ ἄλλην κῆρα κακὴν λάχον· οἱ μὲν ἀνʼ εὐρὺν
14.612
πόντον ὀρινομένης ἁλὸς ἄσχετον, οἱ δʼ ἐνὶ πέτρῃς·
14.613
ἄξαντες περὶ νῆας ὀϊζυρῶς ἀπόλοντο
14.614
Ναυπλίου ἐννεσίῃσιν· ὁ γὰρ κοτέων μάλα παιδὸς
14.615
χείματος ὀρνυμένοιο καὶ ὀλλυμένων Ἀργείων
14.616
καίπερ ἀκηχέμενος μέγʼ ἐγήθεεν, οὕνεκʼ ἄρʼ αὐτῷ
14.617
δῶκε τίσιν θεὸς αἶψα καὶ ἔδρακεν ἐχθρὸν ὅμιλον
14.618
τειρόμενον κατὰ βένθος, ἑῷ δʼ ἄρα πολλὰ τοκῆι
14.619
εὔχεθʼ ὁμῶς νήεσσιν ὑπόβρυχα πάντας ὀλέσθαι.
14.620
τοῦ δὲ Ποσειδάων μάλʼ ἐπέκλυεν, ἄγχι δὲ πάντας Zimmermann’s reading.
14.621
ἄμ Zimmermann, for ἄψ of v. μέλαν οἶδμα φέρεσκεν· ὁ δʼ οὐρεὺς ὣς Zimmermann, for ἁψάμενος of Koechly. χερὶ πεύκην
14.622
αἰθομένην ἀνάειρε· δόλῳ δʼ ἐπέλασσεν Ἀχαιοὺς
14.623
ἐλπομένους εὔορμον ἕδος λιμένων ἀφικέσθαι·
14.624
αἰνῶς γὰρ πέτρῃσι περὶ στυφελῇσι δάμησαν
14.625
αὐτῇς σὺν νήεσσι· κακῷ δʼ ἔπι κύντερον ἄλγος
14.626
τλῆσαν ἀνιηρῇσι προσαγνύμενοι περὶ πέτρῃς
14.627
νυκτὶ θοῇ· παῦροι δὲ φύγον μόρον, οὕς τʼ ἐσάωσεν
14.628
ἢ θεὸς ἢ δαίμων τις ἐπίρροθος· αὐτὰρ Ἀθήνη
14.629
ἄλλοτε μὲν θυμῷ μέγʼ ἐγήθεεν, ἄλλοτε δʼ αὖτε
14.630
ἄχνυτʼ Ὀδυσσῆος πινυτόφρονος, οὕνεκʼ ἔμελλε
14.631
πάσχειν ἄλγεα πολλὰ Ποσειδάωνος ὁμοκλῇ,
14.632
ὅς ῥα τότʼ ἀκαμάτῃσι περὶ φρεσὶ πάγχυ μεγαίρων
14.633
τείχεσι καὶ πύργοισιν ἐϋσθενέων Ἀργείων,
14.634
οὓς ἔκαμον Τρώων στυγερῆς ἔμεν ἄλκαρ ἀϋτῆς,
14.635
ἐσσυμένως μάλα πᾶσαν ἀνεπλήμμυρε θάλασσαν,
14.636
ὅσση ἀπʼ Εὐξείνοιο κατέρχεται Ἑλλήσποντον,
14.637
καί μιν ἐπʼ ἠιόνας Τροίης βάλεν· ὗε δʼ ὕπερθε
14.638
Ζεὺς ἐπίηρα φέρων ἐρικυδέϊ Ἐννοσιγαίῳ·
14.639
οὐ μὴν οὐδʼ Ἑκάεργος ἄτερ καμάτοιο τέτυκτο,
14.640
ἀλλʼ ἄρʼ ἀπʼ Ἰδαίων ὀρέων μάλα πάντα ῥέεθρα
14.641
εἰς ἕνα χῶρον ἄγεσκε, κατέκλυσε δʼ ἔργου Ἀχαιῶν·
14.642
ἐκλύσθη δὲ θάλασσα καὶ εἰσέτʼ ἴσαν Zimmermann, καὶ τόσση δ. θ. κ. εἰσέτι of MSS. κελάδοντες
14.643
χείμαρροι ἀλεγεινὸν ἀεξόμενοι Διὸς ὄμβρῳ,
14.644
τοὺς μέλαν οἶδμʼ ἀνέεργε πολυστόνου Ἀμφιτρίτης
14.645
πόντον ἐπελθέμεναι, πρὶν τείχεα πάντʼ ἀμαθῦναι
14.646
ἀργαλέως Δαναῶν· αὐτὸς δʼ ἄρα γαῖαν ἔνερθε
14.647
ῥῆξε Ποσειδάων, ἀνὰ δʼ ἔβλυσεν ἄσπετον ὕδωρ
14.648
ἰλύν τε ψάμαθόν τε· βίῃ δʼ ἐλέλιξε κραταιῇ
14.649
Σίγεον· ἠιόνες δὲ μέγʼ ἔβραχον ἠδὲ θέμεθλα
14.650
Δαρδανίης, Zimmermann, for ἐκ δὲ θέμεθλα Δαρδανίη of v. καὶ ἄϊστον ὑποβρύχιόν τʼ ἐκαλύφθη
14.651
ἕρκος ἀπειρέσιον, κατεδύσατο δʼ ἔνδοθι γαίης
14.652
μακρὰ διισταμένης· ψάμαθος δʼ ἔτι φαίνετο μούνη
14.653
χασσαμένου πόντου, καὶ ἀπʼ ἀκτάων Zimmermann, for πόντοιο καὶ ἐκ δαναῶν of MSS. ἐριδούπων
14.654
νόσφιν ἀπʼ αἰγιαλοῖο κατεκτάθη. ἀλλὰ τὰ μέν που
14.655
ἀθανάτων ἐτέλεσσε κακὸς νόος· οἱ δʼ ἐνὶ νηυσὶν
14.656
Ἀργεῖοι πλώεσκον, ὅσους διὰ χεῖμα κέδασσεν·
14.657
ἄλλῃ δʼ ἄλλος ἵκανεν, ὅπῃ θεὸς ἦγεν ἕκαστον,
14.658
ὅσσοι ὑπὲρ πόντοιο λυγρὰς ὑπάλυξαν ἀέλλας.