Fall of Troy
Choose a text
id="mobileReaderAuthor" class="mobile-reader-author" href="/authors/quintus-smyrnaeus" aria-label="More works by Quintus Smyrnaeus">
—
⋯
Original / primary: Perseus Grc2
1.1
Εὖθʼ ὑπὸ Πηλείωνι δάμη θεοείκελος Ἕκτωρ
1.2
καί ἑ πυρὴ κατέδαψε καὶ ὀστέα γαῖα κεκεύθει,
1.3
δὴ τότε Τρῶες ἔμιμνον ἀνὰ Πριάμοιο πόληα
1.4
δειδιότες μένος ἠῢ θρασύφρονος Αἰακίδαο·
1.5
ἠΰτʼ ἐνὶ ξυλοχοισι βόες βλοσυροῖο λέοντος
1.6
ἐλθέμεν οὐκ ἐθέλουσιν ἐναντίαι, ἀλλὰ φέβουται
1.7
ἰληδὸν πτώσσουσαι ἀνὰ ῥωπήια πυκνά·
1.8
ὥς οἱ ἀνὰ πτολίεθρον ὑπέτρεσαν ὄβριμου ἄνδρα
1.9
μνησάμενοι προτέρων, ὁπόσων ἀπὸ θυμὸν ἴαψεν
1.10
θύων Ἰδαίοιο περὶ προχοῇσι Σκαμάνδρου,
1.11
ἠδʼ ὅσσους φεύγοντας ὑπὸ μέγα τεῖχος ὄλεσσεν,
1.12
Ἕκτορά θʼ ὡς ἐδάμασσε καὶ ἀμφείρυσσε πόληι,
1.13
ἄλλους θʼ ὡς ἐδάϊξε διʼ ἀκαμάτοιο θαλάσσης
1.14
ὁππότε δὴ τὰ πρῶτα φέρε Τρώεσσιν ὄλεθρον.
1.15
τῶν οἵ γε μνησθέντες ἀνὰ πτολίεθρον ἔμιμνον.
1.16
ἀμφὶ δʼ ἄρα σφίσι πένθος ἀνιηρὸν πεπότητο
1.17
ὡς ἤδη στονόεντι καταιθομένης πυρὶ Τροίης.
1.18
καὶ τότε Θερμώδοντος ἀπʼ εὐρυπόροιο ῥεέθρων
1.19
ἤλυθε Πενθεσίλεια θεῶν ἐπιειμένη εἶδος,
1.20
ἄμφω καὶ στονόεντος ἐελδομένη πολέμοιο
1.21
καὶ μέγʼ ἀλευαμένη στυγερὴν καὶ ἀεικέα φήμην,
1.22
μή τις ἑὸν κατὰ δῆμον ἐλεγχείῃσι χαλέψῃ
1.23
ἀμφὶ κασιγνήτης, ἧς εἵνεκα πένθος ἄεξεν,
1.24
Ἱππολύτης· τὴν γάρ ῥα κατέκτανε δουρὶ κραταιῷ,
1.25
οὐ μὲν δή τι ἑκοῦσα, τιτυσκομένη δʼ ἐλάθοιο·
1.26
τοὔνεκʼ ἄρα Τροίης ἐρικυδέος ἵκετο γαῖαν.
1.27
πρὸς δʼ ἔτι οἱ τόδε θυμὸς ἀρήιος ὁρμαίνεσκεν,
1.28
ὄφρα καθηραμένη περὶ λύματα λυγρὰ φόνοιο
1.29
σμερδαλέας θυέεσσιν Ἐριννύας ἱλάσσηται,
1.30
αἵ οἱ ἀδελφειῆς κεχολωμέναι αὐτίχʼ ἕποντο
1.31
ἄφραστοι· κεῖναι γὰρ ἀεὶ περὶ ποσσὶν ἀλιτρῶν
1.32
στρωφῶντʼ, οὐδέ τινʼ ἐστὶ θεὰς ἀλιτόνθʼ ὑπαλύξαι.
1.33
σὺν δέ οἱ ἄλλαι ἕποντο δυώδεκα πᾶσαι ἀγαυαί,
1.34
πᾶσαι ἐελδόμεναι πόλεμον καὶ ἀεικέα χάρμην,
1.35
αἵ οἱ δμωίδες ἔσκον ἀγακλειταί περ ἐοῦσαι·
1.36
ἀλλʼ ἄρα πασάων μέγʼ ὑπείρεχε Πενθεσίλεια·
1.37
ὡς δʼ ὅτʼ ἀνʼ οὐρανὸν εὐρὺν ἐν ἀστράσι δῖα σελήνη
1.38
ἐκπρέπει ἐν πάντεσσιν ἀριζήλη γεγαυῖα
1.39
αἰθέρος ἀμφιραγέντος ὑπὸ νεφέων ἐριδούπων,
1.40
εὖτʼ ἀνέμων εὕδῃσι μένος μέγα λάβρον ἀέντων·
1.41
ὣς ἥ γʼ ἐν πάσῃσι μετέπρεπεν ἐσσυμένῃσιν.
1.42
ἔνθʼ ἄρʼ ἔην Κλονίη Πολεμοῦσά τε Δηρινόη τε
1.43
Εὐάνδρη τε καὶ Ἀντάνδρη καὶ δῖα Βρέμουσα
1.44
ἠδὲ καὶ Ἱπποθόη, μετὰ δʼ Ἁρμοθόη κυανῶπις
1.45
Ἀλκιβίη τε καὶ Ἀντιβρότη καὶ Δηριμάχεια,
1.46
τῇ δʼ ἔπι Θερμώδωσα μέγʼ ἔγχεϊ κυδιόωσα·
1.47
τόσσαι ἄρʼ ἀμφιέποντο δαΐφρονι Πενθεσιλείῃ·
1.48
οἵη δʼ ἀκαμάτοιο κατέρχεται Οὐλύμποτο
1.49
Ἠὼς μαρμαρέοισιν ἀγαλλομένη φρένας ἵπποις
1.50
Ὡράων μετʼ ἐϋπλοκάμων, μετὰ δέ σφισι πάσῃς
1.51
ἐκπρέπει ἀγλαὸν εἶδος ἀμωμήτοις περ ἐούσῃς·
1.52
τοίη Πενθεσίλεια μόλεν ποτὶ Τρώιον ἄστυ
1.53
ἔξοχος ἐν πάσῃσιν Ἀμαζόσιν· ἀμφὶ δὲ Τρῶες
1.54
πάντοθεν ἐσσύμενοι μέγʼ ἐθάμβεον, εὖτʼ ἐσίδοντο
1.55
Ἄρες ἀκαμάτοιο βαθυκνήμιδα θύγατρα
1.56
εἰδομένην μακάρεσσιν, ἐπεί ῥά οἱ ἀμφὶ προσώπῳ
1.57
ἄμφω σμερδαλέον τε καὶ ἀγλαὸν εἶδος ὀρώρει,
1.58
μειδιόωσʼ ἐρατεινόν, ὑπʼ ὀφρύσι δʼ ἱμερόεντες
1.59
ὀφθαλμοὶ μάρμαιρον ἀλίγκιον ἀκτίνεσσιν,
1.60
αἰδὼς δʼ ἀμφερύθηνε παρήια, τῶν δʼ ἐφύπερθε
1.61
θεσπεσίη ἐπέκειτο χάρις καταειμένη ἀλκήν.
1.62
λαοὶ δʼ ἀμφεγάνυντο καὶ ἀχνύμενοι τὸ πάροιθεν·
1.63
ὡς δʼ ὁπότʼ ἀθρήσαντες ἀπʼ οὔρεος ἀγροιῶται
1.64
Ἶριν ἀνεγρομένην ἐξ εὐρυπόροιο θαλάσσης,
1.65
ὄμβρου ὅτʼ ἰσχανόωσι θεουδέος, ὁππότʼ ἀλωαὶ
1.66
ἤδη ἀπαυαίνονται ἐελδόμεναι Διὸς ὕδωρ,
1.67
ὀψὲ δʼ ὑπηχλύνθη μέγας οὐρανός, οἱ δʼ ἐσιδόντες
1.68
ἐσθλὸν σῆμʼ ἀνέμοιο καὶ ὑετοῦ ἐγγὺς ἐόντος
1.69
χαίρουσιν, τὸ πάροιθεν ἐπιστενάχοντες ἀρούραις·
1.70
ὣς ἄρα Τρώιοι υἷες, ὅτʼ ἔδρακον ἔνδοθι πάτρης
1.71
δεινὴν Πενθεσίλειαν ἐπὶ πτόλεμον μεμαυῖαν,
1.72
γήθεον· ἐλπωρὴ γὰρ ὅτʼ ἐς φρένας ἀνδρὸς ἵκηται
1.73
ἀμφʼ ἀγαθοῦ, στονόεσσαν ἀμαλδύνει κακότητα.
1.74
τοὔνεκα καὶ Πριάμοιο νόος πολέα στενάχοντος
1.75
καὶ μέγʼ ἀκηχεμένοιο περὶ φρεσὶ τυτθὸν ἰάνθη·
1.76
ὡς δʼ ὅτʼ ἀνὴρ ἀλαοῖσιν ἐπʼ ὄμμασι πολλὰ μογήσας
1.77
ἱμείρων ἰδέειν ἱερὸν φάος ἢ θανέεσθαι
1.78
ἢ πόνῳ ἰητῆρος ἀμύμονος ἠὲ θεοῖο
1.79
ὄμματʼ ἀπαχλύσαντος ἴδῃ φάος ἠριγενείης,
1.80
οὐ μὲν ὅσον τὸ πάροιθεν, ὅμως δʼ ἄρα βαιὸν ἰάνθη
1.81
πολλῆς ἐκ κακότητος, ἔχει δʼ ἔτι πήματος ἄλγος
1.82
αἰνὸν ὑπὸ βλεφάροισι λελειμμένον· ὣς ἄρα δεινὴν
1.83
υἱὸς Λαομέδοντος ἐσέδρακε Πενθεσίλειαν·
1.84
παῦρον μὲν γήθησε, τὸ δὲ πλέον εἰσέτι παίδων
1.85
ἄχνυτʼ ἀποκταμένων. ἄγε δʼ εἰς ἑὰ δώματʼ ἄνασσαν,
1.86
καί μιν προφρονέως τίεν ἔμπεδον εὖτε θύγατρα
1.87
τηλόθι νοστήσασαν ἐεικοστῷ λυκάβαντι,
1.88
καί οἱ δόρπον ἔτευξε πανείδατον, οἷον ἔδουσι
1.89
κυδάλιμοι βασιλῆες, ὅτʼ ἔθνεα δῃώσαντες
1.90
δαίνυντʼ ἐν θαλίῃσιν ἀγαλλόμενοι περὶ νίκης·
1.91
δῶρα δέ οἱ πόρε καλὰ καὶ ὄλβια, πολλὰ δʼ ὑπέστη
1.92
δωσέμεν, ἢν Τρώεσσι δαϊζομένοις ἐπαμύνῃ.
1.93
ἡ δʼ ἄρʼ ὑπέσχετο ἔργον, ὃ οὔποτε θνητὸς ἐώλπει,
1.94
δῃώσειν Ἀχιλῆα καὶ εὐρέα λαὸν ὀλέσσειν
1.95
Ἀργείων, πυρσὸν δὲ νεῶν καθύπερθε βαλέσθαι·
1.96
νηπίη· οὐδέ τι ᾔδη ἐϋμμελίην Ἀχιλῆα,
1.97
ὅσσον ὑπέρτατος ἦεν ἐνὶ φθισήνορι χάρμῃ.
1.98
τῆς δʼ ὡς οὖν ἐπάκουσεν ἐῢς πάϊς Ἠετίωνος
1.99
Ἀνδρομάχη, μάλα τοῖα φίλῳ προσελέξατο θυμῷ·
1.100
ἆ δειλή, τί νυ τόσσα μέγα φρονέουσʼ ἀγορεύεις;
1.101
οὐ γάρ τοι σθένος ἐστὶν ἀταρβέϊ Πηλείωνι
1.102
μάρνασθʼ, ἀλλὰ σοὶ ὦκα φόνον καὶ λοιγὸν ἐφήσει.
1.103
λευγαλέη, τί μέμηνας ἀνὰ φρένας; ἦ νύ τοι ἄγχι
1.104
ἕστηκευν Θανάτοιο τέλος καὶ δαίμονος Αἶσα.
1.105
Ἕκτωρ γὰρ σέο πολλὸν ὑπέρτερος ἔπλετο δουρί·
1.106
ἀλλʼ ἐδάμη κρατερός περ ἐών, μέγα δʼ ἤκαχε Τρῶας,
1.107
οἵ ἑ θεὸν ὣς πάντες ἀνὰ πτόλιν εἰσορόωντο·
1.108
καί μοι ἔην μέγα κῦδος ἰδʼ ἀντιθέοις τοκέεσσι
1.109
ζωὸς ἐών· ὡς εἴ με χυτὴ κατὰ γαῖα κεκεύθει,
1.110
πρίν ἑ διʼ ἀνθερεῶνος ὑπʼ ἔγχεϊ θυμὸν ὀλέσσαι.
1.111
νῦν δʼ ἄρʼ ἀάσπετον ἄλγος ὀϊζυρῶς ἐσάθρησα,
1.112
κεῖνον ὅτʼ ἀμφὶ πόληα ποδώκεες εἴρυον ἵπποι
1.113
ἀργαλέως Ἀχιλῆος, ὅ μʼ ἀνέρος εὖνιν ἔθηκε
1.114
κουριδίου, τό μοι αἰνπὸν ἄχος πέλει ἤματα πάντα.
1.115
ὣς φάθʼ ἑὸν κατὰ θυμὸν ἐΰσφυρος Ἠετιώνη
1.116
μνησαμένη πόσιος· μάλα γὰρ μέγα πένθος ἀέξει
1.117
ἀνδρὸς ἀποφθιμένοιο σαόφροσι θηλυτέρῃσιν.
1.118
ἠέλιος δὲ θοῇσιν ἑλισσόμενος περὶ δίνῃς
1.119
δύσατʼ ἐς ὠκεανοῖο βαθὺν ῥόον, ἤνυτο δʼ ἠώς.
1.120
οἱ δʼ ὅτε δὴ παύσαντο ποτοῦ δαιτός τʼ ἐρατεινῆς,
1.121
δὴ τότε που δμῳαὶ στόρεσαν θυμήρεα λέκτρα
1.122
ἐν Πριάμοιο δόμοισι θρασύφρονι Πενθεσιλείῃ·
1.123
ἡ δὲ κιοῦσʼ εὕδεσκεν· ὕπνος δέ οἱ ὄσσε κάλυψε
1.124
νήδυμος ἀμφιπεσών· μόλε δʼ αἰθέρος ἐξ ὑπάτοιο
1.125
Παλλάδος ἐννεσίῃσι μένος δολόεντος Ὀνείρου,
1.126
ὅππως μιν λεύσσουσα κακὸν Τρώεσσι γένηται
1.127
οἷ τʼ αὐτῇ, μεμαυῖα ποτὶ πτολέμου στροφάλιγγα. Zimmermann, for πτολέμοιο φάλαγγας of v.
1.128
καὶ τὰ μὲν ὣς ὥρμαινε δαΐφρων Τριτογένεια·
1.129
τῇ δʼ ἄρα λυγρὸς Ὄνειρος ἐφίστατο πατρὶ ἐοικώς,
1.130
καί μιν ἐποτρύνεσκε ποδάρκεος ἄντʼ Ἀχιλῆος
1.131
θαρσαλέως μάρνασθαι ἐναντίον· ἡ δʼ ἀΐουσα
1.132
γήθεεν ἐν φρεσὶ πάμπαν· ὀΐσσατο γὰρ μέγα ἔργου
1.133
ἐκτελέσειν αὐτῆμαρ ἀνὰ μόθον ὀκρυόεντα·
1.134
νηπίη· ἥ ῥʼ ἐπίθησεν ὀϊζυρῷ περ Ὀνείρῳ
1.135
ἑσπερίῳ, ὃς φῦλα πολυτλήτων ἀνθρώπων
1.136
θέλγει ἐνὶ λεχέεσσιν ἄδην ἐπικέρτομα βάζων,
1.137
ὅς μιν ἄρʼ ἐξαπάφησεν ἐποτρύνων πονέεσθαι.
1.138
ἀλλʼ ὅτε δή ῥʼ ἐπόρουσε ῥοδόσφυρος ἠριγένεια,
1.139
δὴ τότε Πενθεσίλεια μέγʼ ἐνθεμένη φρεσὶ κάρτος
1.140
ἐξ εὐνῆς ἀνέπαλτο καὶ ἀμφʼ ὤμοισιν ἔδυνε
1.141
τεύχεα δαιδαλόεντα, τά οἱ θεὸς ὤπασεν Ἄρης.
1.142
πρῶτα μὲν ἂρ κνήμῃσιν ἐπʼ ἀργυφέῃσιν ἔθηκε
1.143
κνημῖδας χρυσέας, αἵ οἱ ἔσαν εὖ ἀραρυῖαι·
1.144
ἕσσατο δʼ αὖ θώρηκα παναίολον· ἀμφὶ δʼ ἄρʼ ὤμοις
1.145
θήκατο κυδιόωσα μέγα ξίφος, ᾧ πέρι πάντη
1.146
κουλεὸς εὖ ἤσκητο διʼ ἀργύρου ἠδʼ ἐλέφαντος·
1.147
ἂν δʼ ἕλετʼ ἀσπίδα δῖαν ἀλίγκιον ἄντυγι μήνης,
1.148
ἥ θʼ ὑπὲρ ὠκεανοῖο βαθυρρόου ἀντέλλῃσιν
1.149
ἥμισυ πεπληθυῖα περὶ γναμπτῇσι κεραίῃς·
1.150
τοίη μαρμαίρεσκεν ἀάσπετον· ἀμφὶ δὲ κρατὶ
1.151
θῆκε κόρυν κομόωσαν ἐθείρῃσι χρυσέῃσιν·
1.152
ὣς ἡ μὲν μορόεντα περὶ χροΐ θήκατο τεύχη.
1.153
ἀστεροπῇ δʼ ἀτάλαντος ἐείδετο, τὴν ἀπʼ Ὀλύμπου
1.154
ές γαῖαν προΐησι Διὸς μένος ἀκαμάτοιο
1.155
δεικνὺς ἀνθρώποισι μένος βαρυηχέος ὄμβρου
1.156
ἠὲ πολυρροίζων ἀνέμων ἄλληκτον ἰωήν.
1.157
αὐτίκα δʼ ἐγκονέουσα διὲκ μεγάροιο νέεσθαι
1.158
δοιοὺς εἵλετʼ ἄκοντας ὑπʼ ἀσπίδα, δεξιτερῇ δὲ
1.159
βουπλῆγʼ ἀμφίτυπον, τόν οἱ Ἔρις ὤπασε δεινὴ
1.160
θυμοβόρου πολέμοιο πελώριον ἔμμεναι ἄλκαρ.
1.161
τῷ ἐπικαγχαλόωσα τάχʼ ἤλυθεν ἔκτοθι πύργων
1.162
Τρῶας ἐποτρύνουσα μάχην ἐς κυδιάνειραν
1.163
ἐλθέμεναι· τοὶ δʼ ὦκα συναγρόμενοι πεπίθοντο
1.164
ἄνδρες ἀριστῆες, καίπερ πάρος οὐκ ἐθέλοντες
1.165
στήμεναι ἄντʼ Ἀχιλῆος· ὁ γὰρ περιδάμνατο πάντας.
1.166
ἡ δʼ ἄρα κυδιάασκεν ἀάσχετον· ἕζετο δʼ ἵππῳ
1.167
καλῷ, ὠκυτάτῳ, τόν οἱ ἄλοχος Βορέαο
1.168
ὤπασεν Ὠρείθυια πάρος Θρῄκηνδε κιοήσῃ
1.169
ξείνιον, ὅς τε θοῇσι μετέπρεπεν Ἁρπυίῃσι.
1.170
τῷ ῥα τόθʼ ἑζομένη λίπεν ἄστεος αἰπὰ μέλαθρα
1.171
ἐσθλὴ Πενθεσίλεια· λυγραὶ δέ μιν ὀτρύνεσκον
1.172
κῆρες ὁμῶς πρώτην τε καὶ ὑστατίην ἐπὶ δῆριν
1.173
ἐλθέμεν· ἀμφὶ δὲ Τρῶες ἀνοστήτοισι πόδεσσι
1.174
πολλοὶ ἕποντʼ ἐπὶ δῆριν ἀναιδέα τλήμονι κούρῃ
1.175
ἰλαδόν, ἠΰτε μῆλα μετὰ κτίλου, ὅς θʼ ἅμα πάντων
1.176
νισσομένων προθέῃσι δαημοσύνῃσι νομῆος·
1.177
ὣς ἄρα τῇ γʼ ἐφέποντο βίῃ μέγα μαιμώωντες
1.178
Τρῶες ἐϋσθενέες καὶ Ἀμαζόνες ὀβριμόθυμοι.
1.179
ἡ δʼ οἵη Τριτωνίς, ὅτʼ ἤλυθεν ἄντα Γιγάντων,
1.180
ἢ Ἔρις ἐγρεκύδοιμος ἀνὰ στρατὸν ἀΐσσονσα,
1.181
τοίη ἐνὶ Τρώεσσι θοὴ πέλε Πενθεσίλεια.
1.182
καὶ τότε δὴ Κρονίωνι πολυτλήτους ἀναείρας
1.183
χεῖρας Λαομέδοντος ἐΰς γόνος ἀφνειοῖο
1.184
εὔχετʼ ἐς ἱερὸν αἰπὺ τετραμμένος Ἰδαίοιο
1.185
Ζηνός, ὃς Ἴλιον αἰὲν ἑοῖς ἐπιδέρκεται ὄσσοις·
1.186
κλῦθι, πάτερ, καὶ λαὸν Ἀχαιικὸν ἤματι τῷδε
1.187
δὸς πεσέειν ὑπὸ χερσὶν Ἀρηιάδος βασιλείης,
1.188
καὶ δʼ αὖ μιν παλίνορσον ἐμὸν ποτὶ δῶμα σάωσον
1.189
ἁζόμενος τεὸν υἷα πελώριον ὄβριμον Ἄρην,
1.190
αὐτήν θʼ, οὕνεκʼ ἔοικεν ἐπουρανίῃσι θεῇσιν
1.191
ἐκπάγλως, καὶ σεῖο θεοῦ γένος ἐστὶ γενέθλης.
1.192
αἴδεσσαι δʼ ἐμὸν ἦτορ, ἐπεὶ κακὰ πολλὰ τέτληκα
1.193
παίδων ὀλλυμένων, οὕς μοι περὶ Κῆρες ἔμαρψαν
1.194
Ἀργείων παλάμῃσι κατὰ στόμα δηιοτῆτος·
1.195
αἴδεο δʼ, ἕως ἔτι παῦροι ἀφʼ αἵματός εἰμεν ἀγαυοῦ
1.196
Δαρδάνου, ἕως ἀδάϊκτος ἔτι πτόλις, ὄφρα καὶ ἡμεῖς
1.197
ἐκ φόνου ἀργαλέοιο καὶ Ἄρεος ἀμπνεύσωμεν.
1.198
ἦ ῥα μέγʼ εὐχόμενος· τῷ δʼ αἰετὸς ὀξὺ κεκληγὼς
1.199
ἤδη ἀποπνείουσαν ἔχων ὀνύχεσσι πέλειαν
1.200
ἐσσυμένως οἴμησεν ἀριστερός· ἀμφὶ δὲ θυμῷ
1.201
τάρβησε Πριάμοιο νόος, φάτο δʼ οὐκέτʼ ἀθρήσειν
1.202
ζωὴν Πενθεσίλειαν ἀπὸ πτολέμοιο κιοῦσαν·
1.203
καὶ τὸ μὲν ὣς ἤμελλον ἐτήτυμον ἤματι κείνῳ
1.204
κῆρες ὑπεκτελέειν· ὁ δʼ ἄρʼ ἄχνυτο θυμὸν ἐαγώς.
1.205
Ἀργεῖοι δʼ ἀπάνευθεν ἐθάμβεον, εὖτʼ ἐσίδοντο
1.206
Τρῶας ἐπεσσυμένους καὶ Ἀρηίδα Πενθεσίλειαν,
1.207
τοὺς μὲν δὴ θήρεσσιν ἐοικότας, οἵ τʼ ἐν ὄρεσσι
1.208
ποίμνῃς εἰροπόκοισι φόνον στονόεντα φέρουσι,
1.209
τὴν δὲ πυρὸς ῥιπῇ ἐναλίγκιον, ἥ τʼ ἐπὶ θάμνοις
1.210
μαίνεται ἀζαλέοισιν ἐπειγομένου ἀνέμοιο·
1.211
καί τις ἅμʼ ἀγρομένοισιν ἔπος ποτὶ τοῖον ἔειπεν·
1.212
τίς δὴ Τρῶας ἔγειρε μεθʼ Ἕκτορα δῃωθέντα,
1.213
οὓς φάμεν οὐκέτι νῶιν ὑπαντιάσειν μεμαῶτας;
1.214
νῦν δʼ ἄφαρ ἀΐσσουσι λιλαιόμενοι μέγα χάρμης.
1.215
καί νύ τις ἐν μέσσοισιν ἐποτρύνει πονέεσθαι·
1.216
φαίης κεν θεὸν ἔμμεν, ἐπεὶ μέγα μήδεται ἔργον.
1.217
ἀλλʼ ἄγε θάρσος ἄατον ἐνὶ στέρνοισι λαβόντες
1.218
ἀλκῆς μνησώμεσθα δαΐφρονος· οὐδὲ γὰρ ἡμεῖς
1.219
νόσφι θεῶν Τρώεσσι μαχησόμεθʼ ἤματι τῷδε.
1.220
ὣς φάτο· τοὶ δὲ φαεινὰ περὶ σφίσι τεύχεα θέντες
1.221
νηῶν ἐξεχέοντο μένος καταειμένοι ὤμοις·
1.222
σὺν δʼ ἔβαλον θήρεσσιν ἐοικότες ὠμοβόροισι
1.223
δῆριν ἐς αἱματόεσσαν, ὁμοῦ δʼ ἔχον ἔντεα καλά,
1.224
ἔγχεα καὶ θώρηκας ἐϋσθενέαδ τε βοείας
1.225
καὶ κόρυθας βριαράς, ἕτερος δʼ ἑτέρου χρόα χαλκῷ
1.226
τύπτον ἀπηλεγέως· τὸ δʼ ἐρεύθετο Τρώιον οὖδας.
1.227
Ἔνθʼ ἕλε Πενθεσίλεια Μολίονα Περσίνοόν τε
1.228
Εἰλισσόν τε καὶ Ἀντίθεον καὶ ἀγήνορα Λέρνον
1.229
Ἵππαλμόν τε καὶ Αἱμονίδην κρατερόν τʼ Ἐλάσιππον·
1.230
Δηρινόη δʼ ἕλε Δαογόνον, Κλονίη δὲ Μένιππον,
1.231
ὅς ῥα πάρος Φυλακῆθεν ἐφέσπετο Πρωτεσιλάῳ,
1.232
ὅππως κε Τρώεσσιν ἐϋσθενέεσσι μάχηται.
1.233
τοῦ δʼ ἄρʼ ἀποφθμένοιο Ποδάρκεϊ θυμὸς ἀρίνθη
1.234
Ἰφικληιάδῃ· τὸν γὰρ μέγα φίλαθʼ ἑταίρων·
1.235
αἶψα δʼ ὅ γʼ ἀντιθέην Κλονίην βάλε, τῆς δὲ διαπρὸ
1.236
ἦλθε δόρυ στιβαρὸν κατὰ νηδύος, ἐκ δέ οἱ ὦκα
1.237
δουρὶ χύθη μέλαν αἷμα, συνέσπετο δʼ ἔγκατα πάντα·
1.238
τῆς δʼ ἄρα Πενθεσίλεια χολώσατο, καί ῥα Ποδάρκεα
1.239
οὔτασεν ἐς μυῶνα παχὺν περιμήκεϊ δουρὶ
1.240
χειρὸς δεξιτερῆς, διὰ δὲ φλέβας αἱματοέσσας
1.241
κέρσε, μέλαν δέ οἱ αἷμα διʼ ἕλκεος οὐταμένοιο
1.242
ἔβλυσεν ἐσσυμένως· ὁ δʼ ἄρα στενάχων ἀπόρουσεν
1.243
εἰσοπίσω· μάλα γάρ οἱ ἐδάμνατο θυμὸν ἀνίη·
1.244
τοῦ δʼ ἄρʼ ἀπεσσυμένοιο ποθὴ Φυλάκεσσιν ἐτύχθη
1.245
ἄσπετος· ὃς δʼ ἄρα βαιὸν ἀπὸ πτολέμοιο λιασθεὶς
1.246
κάτθανε καρπαλίμως σφετέρων ἐν χερσὶν ἑταίρων.
1.247
Ἰδομενεὺς δὲ Βρέμουσαν ἐνήρατο δούρατι τύψας
1.248
δεξιτερὸν παρὰ μαζόν, ἄφαρ δέ οἱ ἦτορ ἔλυσεν·
1.249
ἡ δʼ ἔπεσεν μελίῃ ἐναλίγκιος, ἥν τʼ ἐν ὄρεσσι
1.250
δουροτόμοι τέμνουσιν ὑπείροχον, ἡ δʼ ἀλεγεινὸν
1.251
ῥοῖζον ὁμῶς καὶ δοῦπον ἐρειπομένη προΐησιν·
1.252
ὣς ἡ ἀνοιμώξασα πέσεν, τῆς δʼ ἂψεα πάντα
1.253
λῦσε μόρος, ψυχὴ δʼ ἐμίγη πολυαέσιν αὔραις.
1.254
Εὐάνδρην δʼ ἄρα Μηριόνης ἰδὲ Θερμώδωσαν
1.255
εἷλεν ἐπεσσυμένας ὀλοὴν ἀνὰ δηιοτῆτα
1.256
τῇ μὲν ἄρʼ ἐς κραδίην ἐλάσας δόρυ, τῇ δʼ ὑπὸ νηδὺν
1.257
φάσγανον ἐγχρίμψας· τὰς δʼ ἐσσυμένως λίπεν αἰών.
1.258
Δηρινόην δʼ ἐδάμασσεν Ὀϊλέος ὄβριμος υἱὸς
1.259
ἔγχεϊ ὀκριόεντι διὰ κληῖδα τυχήσας.
1.260
Ἀλκιβίης δʼ ἄρα Τυδείδης καὶ Δηριμαχείης
1.261
ἄμφω κρᾶτ̓ἀπέκοψε σὺν αὐχέσιν ἄχρις ἐπʼ ὤμους
1.262
ἄορι λευγαλέῳ· ταὶ δʼ ἠΰτε πόρτιες ἄμφω
1.263
κάππεσον, ἅς τʼ αἰζηὸς ἄφαρ ψυχῆς ἀπαμέρσῃ
1.264
κόψας αὐχενίους στιβαρῷ βουπλῆγι τένοντας·
1.265
ὣς αἱ Τυδείδαο πέσον παλάμῃσι δαμεῖσαι
1.266
Τρώων ἂμ πεδίον σφετέρων ἀπὸ νόσφι καρήνων.
1.267
τῇσι δʼ ἔπι Σθένελος κρατερὸν κατέπεφνε Κάβειρον,
1.268
ὃς κίεν ἐκ Σηστοῖο λιλαιόμενος πολεμίζειν
1.269
Ἀργείοις, οὐδʼ αὖθις ἑὴν νοστήσατο πάτρην.
1.270
τοῦ δὲ Πάρις κραδίην ἐχολώσατο δῃωθέντος,
1.271
καί ῥʼ ἔβαλε Σθενέλοιο καταντίον· οὐδʼ ἄρα τόν γε
1.272
οὔτασεν ἐσσύμενός περ, ἀπεπλάγχθη γὰρ ὀϊστὸς
1.273
ἄλλῃ, ὅπῃ μιν Κῆρες ἀμείλιχοι ἰθύνεσκον·
1.274
κτεῖνε δʼ ἄρʼ ἐσσυμένως Εὐήνορα χαλκεομίτρην,
1.275
ὅς ῥʼ ἐκ Δουλιχίοιο κίεν Τρώεσσι μάχεσθαι.
1.276
τοῦ δʼ ἄρʼ ἀποφθιμένοιο πάϊς Φυλῆος ἀγαυοῦ Zimmermann, from P for ἀγαυὸς of v.
1.277
ὠρίνθη· μάλα δʼ ὦκα λέων ὣς πώεσι μήλων
1.278
ἔνθορε· τοὶ δʼ ἅμα πάντες ὑπέτρεσαν ὄβριμον ἄνδρα·
1.279
κτεῖνε γὰρ Ἰτυμονῆα καὶ Ἰππασίδην Ἀγέλαον,
1.280
οἵ ῥʼ ἀπὸ Μιλήτοιο φέρον Δαναοῖσιν ὁμοκλὴν
1.281
Νάστῃ ὑπʼ ἀντιθέῳ καὶ ὑπʼ Ἀμφιμάχῳ μεγαθύμῳ,
1.282
οἳ Μυκάλην ἐνέμοντο Λάτμοιό τε λευκὰ κάρηνα
1.283
Βράγχου τʼ ἄγκεα μακρὰ καὶ ἠιόεντα Πάνορμον
1.284
Μαιάνδρου τε ῥέεθρα βαθυρρόου, ὅς ῥʼ ἐπὶ γαῖαν
1.285
Καρῶν ἀμπελόεσσαν ἀπὸ Φρυγίης πολυμήλου
1.286
εἶσι πολυγνάμπτοισιν ἑλισσόμενος προχοῇσι.
1.287
καὶ τοὺς μὲν κατέπεφνε Μέγης δηιοτῆτι·
1.288
ἄλλους δʼ αὖτʼ ἐδάμασσεν, ὅσους κίχε δουρὶ κελαινῷ·
1.289
ἐν γάρ οἱ στέρνοισι θράσος βάλε Τριτογένεια,
1.290
ὄφρα κε δυσμενέεσσιν ὀλέθριον ἦμαρ ἐφείη.
1.291
Δρησαῖον δʼ ἐδάμασσεν ἀρηίφιλος Πολυποίτης,
1.292
τὸν τέκε δῖα Νέαιρα περίφρονι Θειοδάμαντι
1.293
μιχθεῖσʼ ἐν λεχέεσσιν ὑπαὶ Σιπύλῳ νιφόεντι,
1.294
ᾗχι θεοὶ Νιόβην λᾶαν θέσαν, ἧς ἔτι δάκρυ
1.295
πουλὺ μάλα στυφελῆς καταλείβεται ὑψόθι πέτρης,
1.296
καί οἱ συστοναχοῦσι ῥοαὶ πολυηχέος Ἕρμου
1.297
καὶ κορυφαὶ Σιπύλου περιμήκεες, ὧν καθύπερθεν
1.298
ἐχθρὴ μηλονόμοισιν ἁεὶ περιπέπτατʼ ὀμίχλη·
1.299
ἡ δὲ πέλει μέγα θαῦμα παρεσσυμένοισι βροτοῖσιν,
1.300
οὕνεκʼ ἔοικε γυναικὶ πολυστόνῳ, ἥ τʼ ἐπὶ λυγρῷ
1.301
πένθεϊ μυρομένη μάλα μυρία δάκρυα χεύει·
1.302
καὶ τὸ μὲν ἀτρεκέως φῂς ἔμμεναι, ὁππότʼ ἄρʼ αὐτὴν
1.303
τηλόθεν ἀθρήσειας· ἐπὴν δέ οἱ ἐγγὺς ἵκηαι,
1.304
φαίνεται αἰπήεσσα πέτρη Σιπύλοιό τʼ ἀπορρώξ.
1.305
ἀλλʼ ἡ μὲν μακάρων ἀλοὸν χόλον ἐκτελέουσα
1.306
μύρεται ἐν πέτρῃσιν ἔτʼ ἀχνυμένῃ εἰκυῖα.
1.307
ἄλλοι δʼ ἀμφʼ ἄλλοισι φόνον καὶ κῆρʼ ἐτίθεντο
1.308
ἀργαλέην· δεινὸς γὰρ ἐνεστρωφᾶτο Κυδοιμὸς
1.309
λαοῖς ἐν μέσσοισιν· ἀταρτηρὸν δέ οἱ ἄγχι
1.310
εἱστήκει Θανάτοιο τέλος, περὶ δέ σφισι Κῆρες
1.311
λευγαλέαι στρωφῶντο φόνον στονόεντα φέρουσαι.
1.312
πολλῶν δʼ ἐν κονίῃσι λύθη κέαρ ἤματι κείνῳ
1.313
Τρώων τʼ Ἀργείων τε, πολὺς δʼ ἀλαλητὸς ὀρώρει·
1.314
οὐ γάρ πως ἀπέληγε μένος μέγα Πενθεσιλείης,
1.315
ἀλλʼ ὥς τίς τε βόεσσι κατʼ οὔρεα μακρὰ λέαινα
1.316
ἐνθόρῃ ἀΐξασα βαθυσκοπέλου διὰ βήσσης
1.317
αἵματος ἱμείρουσα, τό οἱ μάλα θυμὸν ἰαίνει·
1.318
ὣς τῆμος Δαναοῖσιν Ἀρηιὰς ἔνθορε κούρη.
1.319
οἱ δʼ ὀπίσω χάζοντο τεθηπότα θυμὸν ἔχοντες,
1.320
ἡ δʼ ἕπετʼ ἠΰτε κῦμα βαρυγδούποιο θαλάσσης
1.321
νήεσιν ὠκείῃσιν, ὅθʼ ἱστία λευκὰ πετάσσῃ
1.322
οὖρος ἐπειγόμενος, βοόωσι δὲ πάντοθεν ἄκραι
1.323
πόντου ἐρευγομένοιο ποτὶ χθονὸς ᾐόνα μακρήν.
1.324
ὣς ἥ γʼ ἑσπομένη Δαναῶν ἐδάϊζε φάλαγγας,
1.325
καί σφιν ἐπηπείλησε μέγα φρεσὶ κυδιόωσα·
1.326
ὦ κύνες, ὡς Πριάμοιο κακὴν ἀποτίσετε λώβην
1.327
σήμερον· οὐ γάρ πώ τις ἐμὸν σθένος ἐξυπαλύξας
1.328
χάρμα φίλοις τοκέεσσι καὶ υἱάσιν ἠδʼ ἀλόχοισιν
1.329
ἔσσεται· οἰωνοῖς δὲ βόσις καὶ θηρσὶ θανόντες
1.330
κείσεσθʼ, οὐδέ τι τύμβος ἐφʼ ὑμέας ἵξεται αἴης.
1.331
πῇ νῦν Τυδείδαο βίη, πῇ δʼ Αἰακίδαο,
1.332
ποῦ δὲ καὶ Αἴαντος; τοὺς γὰρ φάτις ἔμμεν ἀρίστους·
1.333
ἀλλʼ ἐμοὶ οὐ τλήσονται ἐναντία δηριάασθαι,
1.334
μή σφιν ἀπὸ μελέων ψυχὰς φθιμένοισι πελάσσω.
1.335
ἦ ῥα καὶ Ἀργείοισι μέγα φρονέουσʼ ἐνόρουσε
1.336
θηρὶ βίην εἰκυῖα, πολὺν δʼ ὑπεσάμνατο λαὸν
1.337
ἄλλοτε μὲν βουπλῆγι βαρυστόμῳ, ἄλλοτε δʼ αὖτε
1.338
πάλλουσʼ ὀξὺν ἄκοντα· φέρεν δέ οἱ αἰόλος ἵππος
1.339
ἰοδόκην καὶ τόξον ἀμείλιχον, εἴ που ἄρʼ αὐτῇ
1.340
χρειὼ ἀνʼ αἱματόεντα μόθον βελέων ἀλεγεινῶν
1.341
καὶ τόξοιο πέλοιτο· θοοὶ δέ οἱ ἄνδρες ἕποντο
1.342
Ἕκτορος ἀγχεμάχοιο κασίγνητοί τε φίλοι τε
1.343
ὄβριμον ἐν στέρνοισιν ἀναπνείοντες Ἄρηα,
1.344
οἳ Δαναοὺς ἐδάϊζον ἐϋξέστῃς μελίῃσι·
1.345
τοὶ δὲ θοοῖς φύλλοισιν ἐοικότες ἢ ψεκάδεσσι
1.346
πίπτον ἐπασσύτεροι, μέγα δʼ ἔστενεν ἄσπετος αἶα
1.347
αἵματι δευομένη νεκύεσσί τε πεπληθυῖα·
1.348
ἵπποι δʼ ἀμφὶ βέλεσσι πεπαρμένοι ἢ μελίῃσιν
1.349
ὑστάτιον χρεμέτιζον ἑὸν μένος ἐκπνείοντες·
1.350
οἱ δὲ κόνιν βρυγμοῖσι Zimmermann, for λαχμοῖσι of Koechly, and δραχμοῖσι of AMP. δεδραγμένοι ἀσπαίρεσκον·
1.351
τοὺς δʼ ἄρα Τρώιοι ἵπποι ἑπεσσύμενοι μετόπισθεν
1.352
ἄντλον ὅπως στείβεσκον ὁμοῦ κταμένοισι πεσόντας.
1.353
καί τις ἐνὶ Τρώεσσιν ἀγάσσατο μακρὰ γεγηθώς,
1.354
ὡς ἴδε Πενθεσίλειαν ἀνὰ στρατὸν ἀΐσσουσαν
1.355
λαίλαπι κυανέῃ ἐναλίγκιον, ἥ τʼ ἐνὶ πόντῳ
1.356
μαίνεθʼ, ὅτʼ αἰγοκερῆι συνέρχεται ἠελίου ἴς·
1.357
καί ῥʼ ὅ γε μαψιδίῃσιν ἐπʼ ἐλπωρῇσιν ἔειπεν·
1.358
ὦ φίλοι, ὡς ἀναφανδὸν ἀπʼ οὐρανοῦ εἰλήλουθε
1.359
σήμερον ἀθανάτων τις, ἵνʼ Ἀργείοισι μάχηται
1.360
ἡμῖν ἦρα φέρουσα Διὸς κρατερόφρονι βουλῇ,
1.361
ὃς τάχα που μέμνηται ἐϋσθενέος Πριάμοιο,
1.362
ὅς ῥά οἱ εὔχεται εἶναι ἀφʼ αἵματος ἀθανάτοιο.
1.363
οὐ γὰρ τήνδε γυναῖκά γʼ ὀΐομαι εἰσοράασθαι
1.364
αὕτως θαρσαλέην τε καὶ ἀγλαὰ τεύχἐ ἔχουσαν,
1.365
ἀλλʼ ἄρʼ Ἀθηναίην ἢ καρτερόθυμον Ἐνυὼ
1.366
ἢ Ἔριδʼ ἢ κλειτὴν Λητωίδα· καί μιν ὀΐω
1.367
σήμερον Ἀργείοισι φόνον στονόεντα βαλέσθαι
1.368
νῆάς τʼ ἐμπρήσειν ὀλοῷ πυρί, τῇσι πάροιθεν
1.369
ἤλυθον ἐς Τροίην νῶιν κακὰ πολλὰ φέροντες,
1.370
ἤλυθον ἄσχετον ἄμμιν ὑπʼ Ἄρεϊ πῆμα φέροντες·
1.371
ἀλλʼ οὐ μὰν παλίνορσοι ἐς Ἑλλάδα νοστήσαντες
1.372
πάτρην εὐφρανέουσιν, ἐπεὶ θεὸς ἄμμιν ἀρήγει.
1.373
ὣς ἄρʼ ἔφη Τρώων τις ἐνὶ φρεσὶ πάγχυ γεγηθώς,
1.374
νήπιος· οὐδʼ ἄρʼ ἐφράσσατʼ ἐπεσσύμενον βαρὺ πῆμα
1.375
οἷ αὐτῷ καὶ Τρωσὶ καὶ αὐτῇ Πενθεσιλείῃ.
1.376
οὐ γάρ πώ τι μόθοιο δυσηχέος ἀμφιπέπυστο
1.377
Αἴας ὀβριμόθυμος ἰδὲ πτολίπορθος Ἀχιλλεύς,
1.378
ἀλλʼ ἄμφω περὶ σῆμα Μενοιτιάδαο κέχυντο
1.379
μνησάμενοι ἑτάροιο· γόος δʼ ἔχεν ἄλλυδις ἄλλον.
1.380
τοὺς γὰρ δὴ μακάρων τις ἐρήτυε νόσφι κυδοιμοῦ,
1.381
ὄφρʼ ἀλεγεινὸν ὄλεθρον ἀναπλήσωσι δαμέντες
1.382
πολλοὶ ὑπὸ Τρώεσσι καὶ ἐσθλῇ Πενθεσιλείῃ,
1.383
ἥ σφιν ἐπασσυτέροις κακὰ μήδετο, καί οἱ ἄεξεν
1.384
ἀλκὴ ὁμῶς καὶ θάρσος ἐπὶ πλέον, οὐδέ ποτʼ αἰχμὴν
1.385
μαψιδίην ἴθυνεν, ἀεὶ δʼ ἢ νῶτα δάϊζε
1.386
φευγόντων ἢ στέρνα καταντίον ἀϊσσόντων·
1.387
θερμῷ δʼ αἵματι πάμπαν ἐδεύετο, γυῖα δʼ ἐλαφρὰ
1.388
ἔπλετʼ ἐπεσσυμένης· κάματος δʼ οὐ δάμνατο θυμὸν
1.389
ἄτρομον, ἀλλʼ ἀδάμαντος ἔχεν μένος· εἰσέτι γάρ μιν,
1.389a
οὔπω ἐπὶ κλόνον αἰνὸν ἐποτρύνουσʼ Ἀχιλῆα, Zimmermann, for MS. οὕνεκα μοῖρα ποτὶ κλεινὸν ὀτρύνουσ’ ἀχιλῆα.
1.390
αἶσα λυγρὴ κύδαινεν, ἀπόπροθι δʼ ἑστηυῖα
1.391
χάρμης κυδιάασκεν ὀλέθριον, οὕνεκʼ ἔμελλε
1.392
κούρην οὐ μετὰ δηρὸν ὑπʼ Αἰακίδαο χέρεσσι
1.393
δάμνασθʼ· ἀμφὶ δέ μιν ζόφος ἔκρυφε· τὴν δʼ ὀρόθυνεν
1.394
αἰὲν ἄϊστος ἐοῦσα καὶ ἐς κακὸν ἦγεν ὄλεθρον
1.395
ὕστατα κυδαίνουσʼ· ἡ δʼ ἄλλοθεν ἄλλον ἔναιρεν,
1.396
ὡς δʼ ὁπόθʼ ἑρσήεντος ἔσω κήποιο θοροῦσα
1.397
ποίης ἐλδομένη θυμηδέος εἴαρι πόρτις
1.398
ἀνέρος οὐ παρεόντος ἐπέσσυται ἄλλοθεν ἄλλῃ
1.399
σινομένη φυτὰ πάντα νέον μάλα τηλεθόωντα,
1.400
καὶ τὰ μὲν ἂρ κατέδαψε, τὰ δʼ ἐν ποσὶν ἠμάλδυνεν·
1.401
ὣς ἄρʼ Ἀχαιῶν υἷας ἐπεσσυμένη καθʼ ὅμιλον
1.402
κούρη Ἐνυαλίη τοὺς μὲν κτάνε, τοὺς δʼ ἐφόβησε.
1.403
Τρωιάδες δʼ ἀπάνευθεν ἀρήια ἔργα γυναικὸς
1.404
θαύμαζον, πολέμοιο δʼ ἔρως λάβεν ἱπποδάμοιο
1.405
Ἀντιμάχοιο θύγατρα Μενεπτολέμοιο δʼ ἄκοιτιν
1.406
Τισιφόνην· κρατερῇσι δʼ ὑπὸ φρεσὶν ἐμμεμαυῖα
1.407
θαρσαλέον φάτο μῦθον ὁμήλικας ὀτρύνουσα
1.408
δῆριν ἐπὶ στονόεσσαν· ἔγειρε δέ οἱ θράσος ἀλκήν·
1.409
ὦ φίλαι, ἄλκιμον ἦτορ ἐνὶ στέρνοισι λαβοῦσαι
1.410
ἀνδράσιν ἡμετέροισιν ὁμοίιον, οἳ περὶ πάτρης
1.411
δυσμενέσιν μάρνανται ὑπὲρ τεκέων τε καὶ ἡμέων,
1.412
οὔποτʼ ἀναπνείοντες ὀϊζύος—ἀλλὰ καὶ αὐταὶ
1.413
παρθέμεναι φρεσὶ θυμὸν ἴσης μνησώμεθα χάρμης·
1.414
οὐ γὰρ ἀπόπροθέν εἰμεν ἐϋσθενέων αἰζηῶν,
1.415
ἀλλʼ οἷον κείνοισι πέλει μένος ἔστι καὶ ἡμῖν·
1.416
ἶσοι δʼ ὀφθαλμοὶ καὶ γούνατα, πάντα δʼ ὁμοῖα,
1.417
ξυνὸν δʼ αὖ πάντεσσι φάος καὶ νήχυτος ἀήρ,
1.418
φορβὴ δʼ οὐχ ἑτέρη· δί δʼ ἐπʼ ἀνδράσι λώιον ἄλλο
1.419
θῆκε θεός; τῷ μή τι φεβώμεθα δηιοτῆτα.
1.420
ἢ οὐχ ὁράατε γυναῖκα μέγʼ αἰζηῶν προφέρουσαν
1.421
ἀγχεμάχων; τῆς δʼ οὔτι πέλει σχεδὸν οὔτε γενέθλη
1.422
οὔτʼ ἄρʼ ἑὸν πτολίεθρον, ὑπὲρ ξείνοιο δʼ ἄνακτος
1.423
μάρναται ἐκ θυμοῖο καὶ οὐκ ἐμπάζεται ἀνδρῶν
1.424
ἐνθεμένη φρεσὶ θάρσος ἀταρτηρόν τε νόημα·
1.425
ἡμῖν δʼ ἄλλοθεν ἄλλα παραὶ ποσὶν ἄλγεα κεῖται·
1.426
τῇς μὲν γὰρ φίλα τέκνα καὶ ἀνέρες ἀμφὶ πόληι
1.427
ὤλλυνθʼ, αἱ δὲ τοκῆας ὀδυρόμεθʼ οὐκέτʼ ἐόντας·
1.428
ἄλλαι δʼ αὖτʼ ἀκάχηνται ἀδελφειῶν ἐπʼ ὀλέθρῳ
1.429
καὶ πηῶν· οὐ γάρ τις ὀϊζυρῆς κακότητος
1.430
ἄμμορος· ἐλπωρὴ δὲ πέλει καὶ δούλιον ἦμαρ
1.431
εἰσιδέειν· τῷ μή τις ἔτʼ ἀμβολίη πολέμοιο
1.432
εἴη τειρομένῃσιν· ἔοικε γὰρ ἐν δαῒ μᾶλλον
1.433
τεθνάμεν ἢ μετόπισθεν ὑπʼ ἀλλοδαποῖσιν ἄγεσθαι
1.434
νηπιάχοις ἅμα παισὶν ἀνιηρῇ ὑπʼ ἀνάγκῃ
1.435
ἄστεος αἰθομένοιο καὶ ἀνδρῶν οὐκέτʼ ἐόντων.
1.436
ὣς ἄρʼ ἔθη· πάσῃσι δʼ ἔρως στυγεροῖο μόθοιο
1.437
ἔμπεσεν· ἐσσυμένως δὲ πρὸ τείχεος ὁρμαίνεσκον
1.438
βήμεναι ἐν τεύχεσσιν ἀρηγέμεναι μεμαυῖαι
1.439
ἄστεϊ καὶ λαοῖσιν· ὀρίνετο δέ σφισι θυμός.
1.440
ὡς δʼ ὅτʼ ἔσω σίμβλοιο μέγʼ ἰύζωσι μέλισσαι
1.441
χείματος οὐκέτʼ ἐόντος, ὅτʼ ἐς νομὸν ἐντύνονται
1.442
ἐλθέμεν, οὐδʼ ἄρα τῇσι φίλον πέλει ἔνδοθι μίμνειν,
1.443
ἄλλη δʼ αὖθʼ ἑτέρην προκαλίζεται ἐκτὸς ἄγεσθαι·
1.444
ὣς ἄρα Τρωιάδες ποτὶ φύλοπιν ἐγκονέουσαι
1.445
ἀλλήλας ὤτρυνον· ἀπόπροθι δʼ εἴρια θέντο
1.446
καὶ ταλάρους, ἀλεγεινὰ δʼ ἐπʼ ἔντεα χεῖρας ἴαλλον.
1.447
καί νύ κεν ἄστεος ἐκτὸς ἅμα σφετέροισιν ὄλοντο
1.448
ἀνδράσι καὶ σθεναρῇσιν Ἀμαζόσιν ἐν δαῒ κείνῃ,
1.449
εἰ μή σφεας κατέρυξε πύκα φρονέουσα Θεανὼ
1.450
ἐσσυμένας πινυτοῖσι παραυδήσασʼ ἐπέεσσι·
1.451
τίπτε ποτὶ κλόνον αἰνὸν ἐελδόμεναι πονέεσθαι,
1.452
σχέτλιαι, οὔτι πάροιθε πονησάμεναι περὶ χάρμης,
1.453
ἀλλʼ ἄρα νηίδες ἔργον ἐπʼ ἄτλητον μεμαυῖαι
1.454
ὄρνυσθʼ ἀφραδέως; οὐ γὰρ σθένος ἔσσεται ἶσον
1.455
ἡμῖν καὶ Δαναοῖσιν ἐπισταμένοισι μάχεσθαι.
1.456
αὐτὰρ Ἀμαζόσι δῆρις ἀμείλιχος ἱππασίαι τε
1.457
εὔαδον ἐξ ἀρχῆς καὶ ὅσʼ ἀνέρες ἔργα μέλονται·
1.458
τοὔνεκʼ ἄρα σφίσι θυμὸς ἀρήιος αἰὲν ὄρωρεν,
1.459
οὐδʼ ἀνδρῶν δεύονται, ἐπεὶ πόνος ἐς μέγα κάρτος
1.460
θυμὸν ἀνηέξησε καὶ ἄτρομα γούνατʼ ἔθηκε.
1.461
τὴν δὲ φάτις καὶ Ἄρηος ἔμεν κρατεροῖο θύγατρα·
1.462
τῷ οἱ θηλυτέρην τινʼ ἐριζέμεν οὔτι ἔοικεν·
1.463
ἠὲ τάχʼ ἀθανάτων τις ἐπήλυθεν εὐχομένοισιν.
1.464
πᾶσι δʼ ἄρʼ ἀνθρώποισιν ὁμὸν γένος, ἀλλʼ ἐπὶ ἔργα
1.465
στρωφῶντʼ ἄλλος ἐπʼ ἄλλα· πέλει δʼ ἄρα κεῖνο φέριστον
1.466
ἔργον, ὅ τι φρεσὶν ᾖσιν ἐπιστάμενος πονέηται·
1.467
τοὔνεκα δηιοτῆτος ἀποσχόμεναι κελαδεινῆς
1.468
ἱστὸν ἐπεντύνεσθε φίλων ἔντοσθε μελάθρων.
1.469
ἁνδράσι δʼ ἡμετέροισι περὶ πτολέμοιο μελήσει.
1.470
ἐλπωρὴ δʼ ἀγαθοῖο τάχʼ ἔσσεται, οὕνεκʼ Ἀχαιοὺς
1.471
δερκόμεθʼ ὀλλυμένους, μέγα δὲ κράτος ὄρνυται ἀνδρῶν
1.472
ἡμετέρων· οὐδʼ ἔστι κακοῦ δέος· οὔτι γὰρ ἄστυ
1.473
δήιοι ἀμφὶς ἔχουσιν ἀνηλέες, οὔτʼ ἀλεγεινὴ
1.474
γίνετʼ ἀναγκαίη καὶ θηλυτέρῃσι μάχεσθαι.
1.475
ὣς φάτο· ταὶ δʼ ἐπίθοντο παλαιοτέρῃ περ ἐούσῃ,
1.476
ὑσμίνην δʼ ἀπάνευθεν ἐσέδρακον, ἡ δʼ ἔτι λαοὺς
1.477
δάμνατο Πενθεσίλεια, περιτρομέοντο δʼ Ἀχαιοί,
1.478
οὐδέ σφιν θανάτοιο πέλε στονόεντος ἄλυξις·
1.479
ἀλλʼ ἅτε μηκάδες αἶγες ὑπὸ βλοσυρῇσι γένυσσι
1.480
πορδάλιος κτείνοντο, ποθὴ δʼ ἔχεν οὐκέτι χάρμης
1.481
ἀνέρας ἀλλὰ φόβοιο, καὶ ἄλλυδις ἤιον ἄλλοι
1.482
οἱ μὲν ἀπορρίψαντες ἐπὶ χθόνα τεύχἐ ἀπʼ ὤμων,
1.483
οἱ δʼ ἄρα σὺν τεύχεσσι, καὶ ἡνιόχων ἀπάνευθεν
1.484
ἵπποι ἴσαν φεύγοντες· ἐπεσσυμένοις δʼ ἄρα χάρμα
1.485
ἔπλετʼ, ἀπολλυμένων δὲ πολὺς στόνος· οὐδέ τις ἀλκὴ
1.486
γίνετο τειρομένοισι· μινυνθάδιοι δὲ πέλοντο
1.487
πάντες, ὅσους ἐκίχανεν ἀνὰ κρυερὸν στόμα χάρμης.
1.488
ὡς δʼ ὅτʼ ἐπιβρίσασα μέγα στονόεσσα θύελλα
1.489
ἄλλα μὲν ἐκ ῥιζέων χαμάδις βάλε δένδρεα μακρὰ
1.490
ἄνθεσι τηλεθόωντα, τὰ δʼ ἐκ πρέμνοιο κέδασσεν
1.491
ὑψόθεν, ἀλλήλοισι δʼ ἐπὶ κλασθέντα κέχυνται·
1.492
ὣς Δαναῶν κέκλιντο πολὺς στρατὸς ἐν κονίῃσι
1.493
Μοιράων ἰότητι καὶ ἔγχεϊ Πενθεσιλείης.
1.494
αὐτὰρ ἐπεὶ καὶ νῆες ἐνιπρήσεσθαι ἔμελλον
1.495
χερσὶν ὕπο Τρώων, τότε που μενεδήιος Αἴας
1.496
οἰμωγῆς ἐσάκουσε καὶ Αἰακίδην προσέειπεν·
1.497
ὦ Ἀχιλεῦ, περὶ δή μοι ἀπείριτος ἤλυθεν αὐδὴ
1.498
οὔασιν ὡς πολέμοιο συνεσταότος μεγάλοιο·
1.499
ἀλλʼ ἴομεν, μὴ Τρῶες ὑποφθάμενοι παρὰ νηυσὶν
1.500
Ἀργείους ὀλέσωσι, καταφλέξωσι δὲ νῆας·
1.501
νῶιν δʼ ἀμφοτέροισιν ἐλεγχείη ἀλεγεινὴ
1.502
ἔσσεται· οὐ γὰρ ἔοικε Διὸς μεγάλοιο γεγῶτας
1.503
αἰσχύνειν πατέρων ἱερὸν γένος, οἵ ῥα καὶ αὐτοὶ
1.504
τὸ πρὶν ἅμʼ Ἡρακλῆι δαΐφρονι Δαομέδοντος
1.505
Τροίην, Zimmermann (for MS. *troi/hsʼ, shose arrangement of lines is adopted. ἀγλαὸν ἄστυ, διέπραθον ἐγχείῃσι·
1.506
ὡς καὶ νῦν τελέεσθαι ὑφʼ ἡμετέρῃσιν ὀΐω
1.507
χερσίν, ἐπεὶ μέγα κάρτος ἀέξεται ἀμφοτέροισιν.
1.508
ὣς φάτο· τῷ δʼ ἐπίθησε θρασὺ σθένος Αἰακίδαο·
1.509
κλαγγὴν γὰρ στονόεσσαν ὑπέκλυεν οὔασιν οἷσιν.
1.510
ἄμφω δʼ ὡρμήθησαν ἐπʼ ἔντεα μαρμαίροντα·
1.511
καὶ τὰ μὲν ἑσσάμενοι κατεναντίον ἔσταν ὁμίλου·
1.512
τῶν δʼ ἄρα τεύχεα καλὰ μέγʼ ἔβραχε· μαίνετο δέ σφιν
1.513
ἶσον θυμὸς Ἄρηι· τόσον σθένος ἀμφοτέροισι
1.514
δῶκεν ἐπειγομένοισι σακέσπαλος Ἀτρυτώνη.
1.515
Ἀργεῖοι δʼ ἐχάρησαν, ἐπεὶ ἴδον ἄνδρε κραταιὼ
1.516
εἰδομένω παίδεσσιν Ἀλωῆος μεγάλοιο,
1.517
οἵ ποτʼ ἐπʼ εὐρὺν Ὄλυμπον ἔφαν θέμεν οὔρεα μακρὰ
1.518
Ὄσσαν τʼ αἰπεινὴν καὶ Πήλιον ὑψικάρηνον,
1.519
ὅππως δὴ μεμαῶτε καὶ οὐρανὸν εἰσαφίκωνται·
1.520
τοῖοι ἄρʼ ἀντέστησαν ἀταρτηροῦ πολέμοιο
1.521
Αἰακίδαι, μέγα χάρμα λιλαιομένοισιν Ἀχαιοῖς,
1.522
ἄμφω ἐπειγόμενοι δηίων ἀπὸ λαὸν ὀλέσσαι.
1.523
πολλοὺς δʼ ἐγχείῃσιν ἀμαιμακέτῃσι δάμασσαν·
1.524
ὡς δʼ ὅτε πίονα μῆλα βοοδμητῆρε λέοντε
1.525
εὑρόντʼ ἐν ξυλόχοισι φίλων ἀπάνευθε νομήων
1.526
πανσυδίῃ κτείνωσιν, ἄχρις μέλαν αἷμα πιόντες
1.527
σπλάγχνων ἐμπλήσωνται ἑὴν πολυχανδέα νηδύν·
1.528
ὣς οἵ γʼ ἄμφω ὄλεσσαν ἀπειρέσιον στρατὸν ἀνδρῶν.
1.529
Ἔνθʼ Αἴας ἕλε Δηίοχον καὶ ἀρήιον Ὕλλον,
1.530
Εὐρύνομόν τε φιλοπτόλεμον καὶ Ἐνυέα δῖον.
1.531
Ἀντάνδρην δʼ ἄρα Πηλείδης ἕλε καὶ Πολεμοῦσαν
1.532
ἠδὲ καὶ Ἀντιβρότην, μετὰ δʼ Ἱπποθόην ἐρίθυμον,
1.533
τῇσι δʼ ἔφʼ Ἀρμοθόην· ἐπὶ δʼ ᾤχετο λαὸν ἅπαντα
1.534
αὺν Τελαμωνιάδῃ μεγαλήτορι· τῶν δʼ ὑπὸ χερσὶ
1.535
πυκναί τε σθεναραί τε κατηρείποντο φάλαγγες
1.536
ῥεῖα καὶ ὀτραλέως, ὡσεὶ πυρὶ δάσκιος ὕλη
1.537
οὔρεος ἐν ξυνοχῇσιν ἐπισπέρχοντος ἀήτεω.
1.538
τοὺς δʼ ὁπότʼ εἰσενόησε δαΐφρων Πενθεσίλεια
1.539
θῆρας ὅπως θύνοντας ἀνὰ μόθον ὀκρυόεντα,
1.540
ἀμφοτέρων ὥρμησε καταντίον, ἠΰτε λυγρὴ
1.541
πόρδαλις ἐν ξυλόχοισιν ὀλέθριον ἦτορ ἔχουσα
1.542
αἰνὰ περισσαίνουσα θόρῃ κατέναντʼ ἐπιόντων
1.543
ἀγρευτέων, οἵπερ μιν ἐν ἔντεσι θωρηχθέντες.
1.544
ἐσσυμένην μίμνουσι πεποιθότες ἐγχείῃσιν·
1.545
ὣς ἄρα Πενθεσίλειαν ἀρήιοι ἄνδρες ἔμιμνον
1.546
δούρατʼ ἀειράμενοι· περὶ δέ σφισι χαλκὸς ἀΰτει
1.547
κινυμένων· πρώτη δʼ ἔβαλεν περιμήκετον ἔγχος
1.548
ἐσθλὴ Πενθεσίλεια· τὸ δʼ ἐς σάκος Αἰακίδαο
1.549
ἷξεν, ἀπεπλάγχθη δὲ διατρυφὲν εὖτʼ ἀπὸ πέτρης·
1.550
τοἶ ἔσαν Ἡφαίστοιο περίφρονος ἄμβροτα δῶρα.
1.551
ἡ δʼ ἕτερον μετὰ χερσὶ τιτύσκετο θοῦρον ἄκοντα
1.552
Αἴαντος κατέναντα καὶ ἀμφοτέροισιν ἀπείλει·
1.553
νῦν μὲν ἐμῆς ἀπὸ χειρὸς ἐτώσιον ἔκθορεν ἔγχος·
1.554
ἀλλʼ ὀΐω τάχα τῷδε μένος καὶ θυμὸν ὀλέσσειν
1.555
ὑμέων ἀμφοτέρων, οἵ τʼ ἄλκιμοι εὐχετάασθε
1.556
ἔμμεναι ἐν Δαναοῖσιν· ἐλαφροτέρη δὲ μόθοιο
1.557
ἔσσεται ἱπποδάμοισι τότε Τρώεσσιν ὀϊζύς.
1.558
ἀλλά μοι ἆσσον ἵκεσθε κατὰ κλόνον, ὄφρʼ ἐσίδησθε,
1.559
ὅσσον Ἀμαζόσι κάρτος ἐνὶ στήθεσσιν ὄρωρεν·
1.560
καὶ γάρ μευ γένος ἐστὶν Ἀρήιον· οὐδέ με θνητὸς
1.561
γείνατʼ ἀνήρ, ἀλλʼ αὐτὸς Ἄρης ἀκόρητος ὁμοκλῆς·
1.562
τοὔνεκά μοι μένος ἐστὶ πολὺ προφερέστατον ἀνδρῶν.
1.563
ἦ, μέγα καγχαλόωσα κατὰ φρένας· ἧκε δʼ ἄρʼ ἔγχος
1.563a
δεύτερον· οἱ δʼ ἐγέλασσαν, ἄφαρ δέ οἱ ἤλασεν αἰχμὴ
1.564
Αἴαντος κνημῖδα πανάργυρον. οὐδέ οἱ εἴσω
1.565
ἤλυθεν ἐς χρόα καλὸν ἐπειγομένη περ ἱκέσθαι·
1.566
οὐ γὰρ δὴ πέπρωτο μιγήμεναι αἵματι κείνου
1.567
δυσμενέων στονόεσσαν ἐπὶ πτολέμοισιν ἀκωκήν.
1.568
Αἴας δʼ οὐκ ἀλέγιζεν Ἀμαζόνος, ἀλλʼ ἄρα Τρώων
1.569
ἐς πληθὺν ἀνόρουσε· λίπεν δʼ ἄρα Πηλείωνι
1.570
οἴῳ Πενθεσίλειαν, ἐπεί ῥά οἱ ἐν φρεσὶ θυμὸς
1.571
ᾔδεεν, ὡς Ἀχιλῆι καὶ ἰφθίμη περ ἐοῦσα
1.572
ῥηίδιος πόνος ἔσσεθʼ ὅπως ἴρηκι πέλεια.
1.573
Ἡ δὲ μέγα στονάχησεν ἐτώσια δοῦρα βαλοῦσα·
1.574
καί μιν κερτομέων προσεφώνεε Πηλέος υἱός·
1.575
ὦ γύναι, ὡς ἁλίοισιν ἀγαλλομένη ἐπέεσσιν
1.576
ἡμέων ἤλυθες ἄντα λιλαιομένη πολεμίζειν,
1.577
οἳ μέγα φέρτατοί εἰμεν ἐπιχθονίων ἡρώων·
1.578
ἐκ γὰρ δὴ Κρονίωνος ἐριγδούποιο γενέθλης
1.579
εὐχόμεθʼ ἐκγεγάμεν· τρομέεσκε δὲ καὶ θοὸς Ἕκτωρ
1.580
ἡμέας, εἰ καὶ ἄπωθεν ἐσέδρακεν ἀΐσσοντας
1.581
δῆριν ἐπὶ στονόεσσαν· ἐμὴ δέ μιν ἔκτανεν αἰχμὴ
1.582
καὶ κρατερόν περ ἐόντα· σὺ δʼ ἐν φρεσὶ πάγχυ μέμηνας,
1.583
ἣ μέγʼ ἔτλης καὶ νῶιν ἐπηπείλησας ὄλεθρον
1.584
σήμερον· ἀλλὰ σοὶ εἶθαρ ἐλεύσεται ὕστατον ἦμαρ·
1.585
οὐδὲ γὰρ οὐδʼ αὐτός σε πατὴρ ἔτι ῥύσεται Ἄρης
1.586
ἐξ ἐμέθεν· τίσεις δὲ κακὸν μόρον, εὖτʼ ἐν ὄρεσσι
1.587
κεμμὰς ὁμαρτήσασα βοοδμητῆρι λέοντι.
1.588
ἣ οὔπω τόδʼ ἄκουσας, ὅσων ὑποκάππεσε γυῖα
1.589
Ξάνθου πὰρ προχοῇσιν ὑφʼ ἡμετέρῃς παλάμῃσιν;
1.590
ἤ σευ πευθομένης μάκαρες φρένας ἐξείλοντο
1.591
καὶ νόον, ὄφρα σε Κῆρες ἀμείλιχοι ἀμφιχάνωσιν;
1.592
ὣς εἰπὼν οἴμησε κραταιῇ χειρὶ τιταίνων
1.593
λαοφόνον δόρυ μακρὸν ὑπαὶ Χείρωνι πονηθέν·
1.594
αἶψα δʼ ὑπὲρ μαζοῖο δαΐφρονα Πενθεσίλειαν
1.595
οὔτασε δεξιτεροῖο· μέλαν δέ οἱ ἔρρεεν αἷμα
1.596
ἐσσυμένως· ἡ δʼ εἶθαρ ὑπεκλάσθη μελέεσσιν·
1.597
ἐκ δʼ ἔβαλεν χειρὸς πέλεκυν μέγαν· ἀμφὶ δέ οἱ νὺξ
1.598
ὀφθαλμοὺς ἤχλυσε καὶ ἐς φρένα δῦσαν ἀνῖαι.
1.599
ἀλλὰ καὶ ὣς ἄμπνυε καὶ εἴσιδε δήιον ἄνδρα
1.600
ἤδη μιν μέλλοντα καθελκέμεν ὠκέος ἵππου·
1.601
ὥρμηνεν δʼ ἢ χειρὶ μέγα ξίφος εἰρύσσασα
1.602
μεῖναι ἐπεσσυμένοιο θοοῦ Ἀχιλῆος ἐρωήν,
1.603
ἢ κραιπνῶς ἵπποιο κατʼ ὠκυτάτοιο θοροῦσα
1.604
λίσσεσθʼ ἀνέρα δῖον, ὑποσχέσθαι δέ οἱ ὦκα
1.605
χαλκὸν ἅλις καὶ χρυσόν, ἅ τε φρένας ἔνδον ἰαίνει
1.606
θνητῶν ἀνθρώπων, εἰ καὶ μάλα τις θρασὺς εἴη,
1.607
τοῖς ἤν πως πεπίθοιτʼ ὀλοὸν σθένος Αἰακίδαο·
1.608
ἢ καὶ ὁμηλικίην αἰδεσσάμενος κατὰ θυμὸν·
1.609
δῴη νόστιμον ἦμαρ ἐελδομένῃ περ ἀλύξαι.
1.610
καὶ τὸ μὲν ὣς ὥρμαινε· θεοὶ δʼ ἑτέρωσε βάλοντο.
1.611
τῇ γὰρ ἐπεσσύμενος μέγʼ ἐχώσατο Πηλέος υἱός,
1.612
καί οἱ ἄφαρ συνέπειρεν ἀελλόποδος δέμας ἵππου·
1.613
εὖτέ τις ἀμφʼ ὀβελοῖσιν ὑπὲρ πυρὸς αἰθαλόεντος
1.614
σπλάγχνα διαμπείρῃσιν ἐπειγόμενος ποτὶ δόρπον,
1.615
ἢ ὥς τις στονόεντα βαλὼν ἐν ὄρεσσιν ἄκοντα
1.616
θηρητὴρ ἐλάφοιο μέσην διὰ νηδύα κέρσῃ
1.617
ἐσσυμένως, πταμένη δὲ διαμπερὲς ὄβριμος αἰχμὴ
1.618
πρέμνον ἐς ὑψικόμοιο πάγη δρυὸς ἠέ νυ πεύκης·
1.619
ὣς ἄρα Πενθεσίλειαν ὁμῶς περικαλλέϊ ἵππῳ
1.620
ἀντικρὺ διάμησεν ὑπʼ ἔγχεϊ μαιμώωντι
1.621
Πηλείδης· ἡ δʼ ὦκα μίγη κονίῃ καὶ ὀλέθρῳ
1.622
εὐσταλέως ἐριποῦσα κατʼ οὔδεος· οὐδέ οἱ αἰδὼς
1.623
ᾔσχυνεν δέμας ἠΰ· τάθη δʼ ἐπὶ νηδύα μακρῷ
1.624
δουρὶ περισπαίρουσα, θοῷ δʼ ἐπεκέκλιτο ἵππῳ·
1.625
εὖτʼ ἐλάτη κλασθεῖσα βίῃ κρυεροῦ Βορέαο,
1.626
ἥν τέ που αἰπυτάτην ἀνά τʼ ἄγκεα μακρὰ καὶ ὕλην,
1.627
οἷ αὐτῇ μέγʼ ἄγαλμα, τρέφει παρὰ πίδακι γαῖα·
1.628
τοίη Πενθεσίλεια κατʼ ὠκέος ἤριπεν ἵππου
1.629
θηητή περ ἐοῦσα· κατεκλάσθη δέ οἱ ἁλκή.
1.630
Τρῶες δʼ ὡς ἐσίδοντο δαϊκταμένην ἐνὶ χάρμῃ,
1.631
πανσυδίῃ τρομέοντες ἐπὶ πτόλιν ἐσσεύοντο
1.632
ἄσπετʼ ἀκηχέμενοι μεγάλῳ περὶ πένθεϊ θυμόν.
1.633
ὡς δʼ ὅτʼ ἀνʼ εὐρέα πόντον ἐπιβρίσαντος ἀήτεω
1.634
ναῦται νἦ ὀλέσαντες ὑπεκπροφύγωσιν ὄλεθρον,
1.635
παῦροι πολλὰ καμόντες ὀϊζυρῆς ἀλὸς εἴσω,
1.636
ὀψὲ δʼ ἄρα σφίσι γαῖα φάνη σχεδὸν ἠδὲ καὶ ἄστυ,
1.637
τοὶ δὲ μόγῳ στονόεντι τετρυμένοι ἅψεα πάντα
1.638
ἐξ ἁλὸς ἀΐσσουσι μέγʼ ἀχνύμενοι περὶ νηὸς
1.639
ἠδʼ ἐτάρων, οὓς αἰνὸν ὐπὸ ζόφον ἤλασε κῦμα·
1.640
ὣς Τρῶες ποτὶ ἄστυ πεφυζότες ἐκ πολέμοιο
1.641
κλαῖον πάντες Ἄρηος ἀμαιμακέτοιο θύγατρα
1.642
καὶ λαούς, οἳ δῆριν ἀνὰ στονόεσσαν ὄλοντο.
1.643
Τῇδʼ ἔπικαγχλόων μεγάλʼ εὔχετο Πηλέος υἱός·
1.644
κεῖσό νυν ἐν κονίῃσι κυνῶν βόσις ἠδʼ οἰωνῶν,
1.645
δειλαίη· τίς γάρ σε παρήπαφεν ἀντίʼ ἐμεῖο
1.646
ἐλθέμεν; ἦ που ἔφησθα μάχης ἄπο νοστήσασα
1.647
οἰσέμεν ἄσπετα δῶρα παρά Πριάμοιο γέροντος
1.648
κτείνασʼ Ἀργείους· ἀλλʼ οὐ τόδε σοίγε νόημα
1.649
ἀθάνατοι ἐτέλεσσαν, ἐπεὶ μέγα φέρτατοί εἰμεν
1.650
ἡρώων, Δαναοῖσι φάος μέγα, Τρωσὶ δὲ πῆμα
1.651
ἠδὲ σοὶ αἰνομόρῳ, ἐπειή νύ σε Κῆρες ἐρεμναὶ
1.652
καὶ νόος ἐξορόθυνε γυναικῶν ἔργα λιποῦσαν
1.653
βήμεναι ἐς πόλεμον, τόν περ τρομέουσι καὶ ἄνδρες.
1.654
ὣς εἰπὼν μελίην ἐξείρυσε Πηλέος υἱὸς
1.655
ὠκέος ἐξ ἵπποιο καὶ αἰνῆς Πενθεσιλείης·
1.656
ἄμφω δʼ ἀσπαίρεσκον ὑφʼ ἓν δόρυ δῃωθέντες.
1.657
ἀμφὶ δέ οἱ κρατὸς κόρυν εἵλετο μαρμαίρουσαν
1.658
ἠελίου ἀκτῖσιν ἀλίγκιον ἢ Διὸς· αἴγλῃ·
1.659
τῆς δὲ καὶ ἐν κονίῃσι καὶ αἵματι πεπτηυίης
1.660
ἐξεφάνη ἐρατῇσιν ὑπʼ ὀφρύσι καλά πρόσωπα
1.661
καίπερ ἀποκταμένης. οἱ δʼ, ὡς ἴδον, ἀμφιέποντες
1.662
Ἀργεῖοι θάμβησαν, ἐπεὶ μακάρεσσιν ἐῴκει.
1.663
κεῖτο γὰρ ἐν τεύχεσσι κατὰ χθονὸς ἠΰτʼ ἀτειρὴς
1.664
Ἄρτεμις ὑπνώουσα, Διὸς τέκος, εὖτε κάμῃσι
1.665
γυῖα κατʼ οὔρεα μακρὰ θοοὺς βάλλουσα λέοντας·
1.666
αὐτὴ γάρ μιν ἔτευξε καὶ ἐν φθιμένοισιν ἀγητὴν
1.667
Κύπρις ἐϋστέφανος κρατεροῦ παράκοιτις Ἄρηος,
1.668
ὄφρα τι καὶ Πηλῆος ἀμύμονος υἷʼ ἀκαχήσῃ.
1.669
πολλοὶ δʼ εὐχετόωντο κατʼ οἰκία νοστήσαντες
1.670
τοίης ἧς ἀλόχοιο ταρὰ λεχέεσσιν ἰαῦσαι.
1.671
καὶ δʼ Ἀχιλεὺς ἀλίαστον ἑῷ ἐνετείρετο θυμῷ,
1.672
οὕνεκά μιν κατέπεφνε καὶ οὐκ ἄγε δῖαν ἄκοιτιν
1.673
Φθίην εἰς εὔπωλον, ἐπεὶ μέγεθός τε καὶ εἶδος
1.674
ἔπλετʼ ἀμώμητός τε καὶ ἀθανάτῃσιν ὁμοίη.
1.675
Ἄρεϊ δʼ ἔμπεσε πένθος ὑπὸ φρένας ἀμφὶ θυγατρὸς
1.676
θυμὸν ἀκηχεμένῳ· τάχα δʼ ἔκθορεν Οὐλύμποιο
1.677
σμερδαλέῳ ἀτάλαντος ἐΰ κτυπέοντι κεραυνῷ,
1.678
ὅν τε Ζεὺς προΐησιν, ὁ δʼ ἀκαμάτης ἀπὸ χειρὸς
1.679
ἔσσυται ἢ ἐπὶ πόντον ἀπείριτον ἢ ἐπὶ γαῖαν
1.680
μαρμαίρων, τῷ δʼ ἀμφὶ μέγας πελεμίζετʼ Ὄλυμπος·
1.681
τοῖος Ἄρης ταναοῖο διʼ ἠέρος ἀσχαλόων κῆρ
1.682
ἔσσυτο σὺν τεύχεσσιν, ἐπεὶ μόρον αἰνὸν ἄκουσε
1.683
παιδὸς ἑῆς· τῷ γάρ ῥα κατʼ οὐρανὸν εὐρὺν ἐόντι
1.684
αὖραι μυθήσαντο θοαὶ Βορέαο θύγατρες
1.685
κούρης αἰνὸν ὄλεθρον· ὁ δʼ ὡς κλύεν, ἶσος ἀέλλῃ
1.686
Ἰδαίων ὀρέων ἐπεβήσατο· τοῦ δʼ ὑπὸ ποσσὶν
1.687
ἄγκεα κίνυτο μακρὰ βαθύρρωχμοί τε χαράδραι
1.688
καὶ ποταμοὶ καὶ πάντες ἀπειρέσιοι πόδες Ἴδης.
1.689
καί νύ κε Μυρμιδόνεσσι πολύστονον ὤπασεν ἦμαρ,
1.690
εἰ μή μιν Ζεὺς αὐτὸς ἀπʼ Οὐλύμποιο φόβησε
1.691
σμερδαλέῃς στεροπῇσι καὶ ἀργαλέοισι κεραυνοῖς,
1.692
οἵ οἱ πρόσθε ποδῶν θαμέες ποτόωντο διʼ αἴθγης
1.693
δεινὸν ἀπαιθόμενοι· ὁ δʼ ἄρʼ εἰσορόων ἐνόησε
1.694
πατρὸς ἐριγδούποιο μέγα βρομέουσαν ὁμοκλήν·
1.695
ἔστη δʼ ἐσσύμενός περ ἐπὶ πτολέμοιο κυδοιμόν.
1.696
ὡς δʼ ὅτʼ ἀπʼ ἠλιβάτου σκοπιῆς περιμήκεα λᾶαν
1.697
λάβρος ὁμῶς ἀνέμοισιν ἀπορρήξῃ Διὸς ὄμβρος,
1.698
ὄμβρος ἄρʼ ἠὲ κεραυνός, ἐπικτυπέουσι δὲ βῆσσαι
1.699
λάβρα κυλινδομένοιο, ὁ δʼ ἀκαμάτῳ ὑπὸ ῥοίζῳ
1.700
ἔσσυτʼ ἁναθρώσκων μάλα ταρφέα, μέχρις ἵκηται
1.701
χῶρον ἐπʼ ἰσόπεδον, σταίη δʼ ἄφαρ οὐκ ἐθέλων περ·
1.702
ὣς Διὸς ὄβριμος υἱὸς Ἄρης ἀέκοντί γε θυμῷ
1.703
ἔστη ἐπειγόμενός περ, ἐπεὶ μακάρων μεδέοντι
1.704
πάντες ὁμῶς εἴκουσιν Ὀλύμπιοι, οὕνεκʼ ἄρʼ αὐτῶν
1.705
πολλὸν ὑπέρτατός ἐστι, πέλει δέ οἱ ἄσπετος ἀλκή.
1.706
πολλὰ δέ πορφύροντα θοὸς νόος ὀτρύνεσκεν
1.707
ἄλλοτε μέν Κρονίδαο μέγʼ ἀσχαλόωντος ἐνιπὴν
1.708
σμερδαλέην τρομέοντα πρὸς οὐρανὸν ἀπονέεσθαι,
1.709
ἄλλοτε δʼ οὐκ ἀλέγειν σφετέρου πατρός, ἀλλʼ Ἀχιλῆι
1.710
μῖξαι ἐν αἵματι χεῖρας ἀτειρέας. ὀψὲ δέ οἱ κῆρ
1.711
μνήσαθʼ, ὅσοι καὶ Ζηνὸς ἐνὶ πτολέμοισι δάμησαν
1.712
υἱέες, οἷς οὐδʼ αὐτὸς ἐπήρκεσεν ὀλλυμένοισιν·
1.713
τοὔνεκʼ ἀπʼ Ἀργείων ἑκάς ἤϊεν· ἦ γὰρ ἔμελλεν
1.714
κεῖσθαι ὁμῶς Τιτῆσι δαμεὶς στονόεντι κεραυνῷ,
1.715
εἰ Διὸς ἀθανάτοιο παρὲκ νόον ἄλλα μενοίνα.
1.716
καὶ τότʼ ἀρήϊοι υἷες ἐϋσθενέων Ἀργείων
1.717
σύλεομ ἐσσυμένως βεβροτωμένα τεύχεα νεκρῶν
1.718
πάντῃ ἐπεσσύμενοι· μέγα δʼ ἄχνυτο Πηλέος υἱὸς
1.719
κούρης εἰσορόων ἐρατὸν σθένος ἐν κουίῃσι·
1.720
τοὔνεκά οἱ κραδίην ὀλοαὶ κατέδαπτον ἀνῖαι
1.721
ὁππόσον ἀμφʼ ἑτάροιο πάρος Πατρόκλοιο δαμέντος.
1.722
Θερσίτης δέ μιν ἄντα κακῷ μέγα νείκεσε μύθῳ·
1.723
ὦ Ἀχιλεῦ φρένας αἰνέ, τίη νύ σευ ἤπαφε δαίμων
1.724
θυμὸν ἐνὶ στέρνοισιν Ἀμαζόνος εἵνεκα λυγρῆς,
1.725
ἣ νῶιν κακὰ πολλὰ λιλαίετο μητίσασθαι;
1.726
τῆς τοι ἐνὶ φρεσὶ σῇσι γυναιμανές ἦτορ ἔχουτι
1.727
μέμβλεται ὡς ἀλόχοιο πολύφρονος, ἥν τʼ ἐπὶ ἕδνοις
1.728
κουριδίην μνήστευσας ἐελδόμενος γαμέεσθαι.
1.729
ὥς σʼ ὄφελον κατὰ δῆριν ὑποφθαμένη βάλε δουρί,
1.730
οὕνεκα θηλυτέρῃσιν ἄδην ἐπιτέρπεαι ἦτορ,
1.731
οὐδέ νύ σοί τι μέμηλεν ἐνὶ φρεσὶν οὐλομένῃσιν
1.732
ἀμθʼ ἀρετῆς κλυτὸν ἔργου, ἐπὴν ἐσίδησθα γυναῖκα.
1.733
σχέτλιε, ποῦ νύ τοί ἐστιν ἐῢ σθένος ἠδὲ νόημα;
1.734
πῇ δὲ βίη βασιλῆος ἀμύμονος; οὐδέ τι οἶαθα
1.735
ὅσσον ἄχος Τρώεσσι γυναιμανέουσι τέτυκται;
1.736
οὐ γὰρ τερπωλῆς ὀλοώτερον ἄλλο βροτοῖσιν
1.737
ἐς λέχος ἱεμένης, ἥ τʼ ἄφρονα φῶτα τίθησι
1.738
καὶ πινυτόν περ ἐόντα· πόνῳ δʼ ἄρα κῦδος ὀπηδεῖ·
1.739
ἀνδρὶ γὰρ αἰχμητῇ νίκης κλέος ἔργα τʼ Ἄρηος
1.740
τερπνά· φυγοπτολέμῳ δὲ γυναικῶν εὔαδεν εὐνή.
1.741
ἦ μέγα νεικείων· ὁ δέ οἱ περιχώσατο θυμῷ
1.742
Πηλείδης ἐρίθυμος· ἄφαρ δέ ἑ χειρὶ κραταιῇ
1.743
τύψε κατὰ γναθμοῖο καὶ οὔατος· οἱ δʼ ἅμα πάντες
1.744
ἐξεχύθνσαν ὀδόντες ἐπὶ χθόνα, κάππεσε δʼ αὐτὸς
1.745
πρηνής· ἐκ δέ οἱ αἷμα διὰ στόματος πεφόρητο
1.746
ἀθρόον· αἶψα δʼ ἄναλκις ἀπὸ μελέων φύγε θυμὸς
1.747
ἀνέρος οὐτιδανοῖο· χάρη δʼ ἄρα λαὸς Ἀχαιῶν·
1.748
τοὺς γὰρ νείκεε πάμπαν ἐπεσβολίῃσι κακῇσιν
1.749
αὐτὸς ἐὼν λωβητός· ὁ γὰρ Δαναῶν πέλεν αἰδώς.
1.750
καί ῥά τις ὧδʼ εἴπεσκεν ἀρηϊθόων Ἀργείων·
1.751
οὐκ ἀγαθὸν βασιλῆας ὑβριζέμεν ἀνδρὶ χέρηι
1.752
ἀμφαδὸν οὔτε κρυφηδόν, ἐπεὶ χόλος αἰνὸς ὀπηδεῖ·
1.753
ἔστι Θέμις, καὶ γλῶσσαν ἀναιδέα τίνυται Ἄτη,
1.754
ἥ τʼ αἰεὶ μερόπεσσιν ἐπʼ ἄλγεσιν ἄλγος ἀέξει.
1.755
ὣς ἄρʼ ἔφη Δαναῶν τις· ὁ δʼ ἀσχαλόων ἐνὶ θυμῷ
1.756
Πηνείδης ἐρίθυμος ἔπος ποτὶ τοῖον ἔειπεν·
1.757
κεῖσό νυν ἐν κονίῃσι λελασμένος ἀφροσυνάων·
1.758
οὐ γὰρ ἀμείνονι φωτὶ χρεών κακὸν ἀντίʼ ἐρίζειν·
1.759
ὣ καί που τὸ πάροιθεν Ὀδυσσῆος ταλαὸν κῆρ
1.760
ἀργαλέως ὤρινας ἐλέγχεα μυρία βάζων·
1.761
ἀλλʼ οὐ Πηλείδης τοι ὁμοίιος ἐξεφαάνθην,
1.762
ὅς σευ θυμὸν ἔλυσα καὶ οὐκέτι Zimmermann, for ou)k e)pi\ of v. χειρὶ βαρείῃ
1.763
πληξάμενος· σὲ δὲ πότμος ἀμείλιχος ἀμφεκάλυψεν,
1.764
σῇ δʼ ὀλιγοδρανίῃ θυμὸν λίπες· ἀλλʼ ἀπʼ Ἀχαιῶν
1.765
ἔρρε καὶ ἐν φθιμένοισιν ἐπεσβολίας ἀγόρευε.
1.766
ὣς ἔφατʼ Αἰακίδαο θρασύφρονος ἄτρομος υἱός.
1.767
Τυδείδης δʼ ἄρα μοῦνος ἐν Ἀργείοις Ἀχιλῆι
1.768
χώετο Θερσίταο δεδουπότος, οὕνεκʼ ἄρʼ αὐτοῦ
1.769
εὔχετʼ ἀφʼ αἵματος εἶναι, ἐπεὶ πέλεν ὃς μὲν ἀγαυοῦ
1.770
Τυδέος ὄβριμος υἱός, ὁ δʼ Ἀγρίου ἰσοθέοιο,
1.771
ἀγρίου, ὅς τʼ Οἰνῆος ἀδελφεὸς ἔπλετο δίου·
1.772
Οἰνεὺς δʼ υἱέα γείνατʼ ἀρήιον ἐν Δαναοῖσι
1.773
Τυδέα· τοῦ δʼ ἐτέτυκτο πάϊς σθεναρὸς Διομήδης.
1.774
τοὔνεκα Θερσίταο περὶ κταμένοιο χαλέφθη.
1.775
καί νύ κε Πηλείωνος ἐναντίου ἤρατο χεῖρας,
1.776
εἰ μή μιν κατέρυξαν Ἀχαιῶν φέρτατοι υἷες,
1.777
πολλὰ παρηγορέοντες ὁμιλαδόν· ὣς δὲ καὶ αὐτὸν
1.778
Πηλείδην ἑτέρωθεν ἐρήτυον· ἦ γὰρ ἔμελλον
1.779
ἤδη καὶ ξιφέεσσιν ἐριδμαίνειν οἱ ἄριστοι
1.780
Ἀργείων· τοὺς γάρ ῥα κακὸς χόλος ὀτρύνεσκεν.
1.781
ἀλλʼ οἱ μὲν πεπίθοντο παραιφασίῃσιν ἑταίρων.
1.782
οἱ δὲ μέγʼ οἰκτείραντες ἀγαυὴν Πενθεσίλειαν
1.783
Ἀτρεῖδαι βασιλῆες ἀγασσάμενοί ἑ καὶ αὐτοὶ
1.784
Τρωσὶ δόσαν ποτὶ ἄστυ φέρειν ἐρικυδέος Ἴλου
1.785
σὺν σφοῖσιν τεύχεσσιν, ἐπεὶ Πριάμοιο νόησαν
1.786
ἀγγελίην προϊέντος· ὁ γὰρ φρεσὶν ᾗσι μενοίνα
1.787
κούρην ὀβριμόθυμον ὁμῶς τεύχεσσι καὶ Ἵππῳ
1.788
ἐς μέγα σῆμα βαλέσθαι ἀφνειοῦ Λαομέδοντος.
1.789
καί οἱ πυρκαϊὴν νηήσατο πρόσθε πόληος
1.790
ὑψηλήν, εὐρεῖαν· ὕπερθε δὲ θήκατο κούρην
1.791
πολλοῖς σὺν κτεάτεσσιν, ὅσα κταμένῃ ἐπεῴκει
1.792
ἐν πυρὶ συγκείασθαι ἐϋκτεάνῳ βασιλείῃ·
1.793
καὶ τὴν μὲν κατέδαψε θοὸν μένος Ἡφαίστοιο,
1.794
φλὸξ ὀλοή· λαοὶ δὲ περισταδὸν ἄλλοθεν ἄλλοι
1.795
πυρκαϊὴν σβέσσαντο θοῶς εὐώδεϊ οἴνῳ.
1.796
ὀστέα δʼ ἀλλέξαντες ἄδην ἐπέχευαν σἄλειφα
1.797
ἡδὺ καὶ ἐς κοίλην χηλὸν θέσαν· ἀμφὶ δʼ ἄρʼ αὐτοῖς
1.798
πίονα δημὸν ὕπερθε βάλον βοός, ἥ τʼ ἀγέλῃσιν
1.799
Ἰδαίοις ἐν ὄρεσσι μετέπρεπε φερβομένῃσι.
1.800
Τρῶες δʼ ὥστε θύγατρα φίλην περικωκύσαντες
1.801
ἀχνύμενοι τάρχυσαν ἐΰδμητον περὶ τεῖχος
1.802
πύργῳ ἔπι προὔχοντι παρʼ ὀστέα Λαομέδοντος
1.803
ἦρα φέροντες Ἄρηι καὶ αὐτῇ Πενθεσιλείῃ.
1.804
καί οἱ παρκατέθαψαν Ἀμαζόνας, ὅσσαι ἅμʼ αὐτῇ
1.805
ἐσπόμεναι ποτὶ δῆριν ὑπʼ Ἀργείοισι δάμησαν·
1.806
οὐ γάρ σφιν τύμβοιο πολυκλαύτοιο μέγηραν
1.807
Ἀτρεῖδαι, Τρώεσσι δʼ ἐϋπτολέμοισιν ὄπασσαν
1.808
ἐκ βελέων ἐρύσασθαι ὁμῶς κταμένοισι καὶ ἄλλοις·
1.809
οὐ γὰρ ἐπὶ φθιμένοισι πέλει κότος, ἀλλʼ ἐλεεινοὶ
1.810
δήιοι οὐκέτʼ ἐόντες, ἐπὴν ἀπὸ θυμὸς ὄληται.
1.811
Ἀργεῖοι δʼ ἀπάνευθε δόσαν πυρὶ πολλὰ κάρηνα
1.812
ἡρώων, οἳ δή δή ὁμοῦ κτάθεν ἠδʼ ἐδάμησαν
1.813
Τρώων ἐν παλάμῃσιν ἀνὰ στόμα δηιοτῆτος,
1.814
πολλὰ μάλʼ ἀχνύμενοι κταμένων ὕπερ. ἔξοχα δʼ ἄλλων
1.815
ἀμφʼ ἀγαθοῦ μύροντο Ποδάρκεος· οὐ γάρ ἐπʼ ἐσθλοῦ
1.816
δεύετʼ ἀδελφειοῖο μάχῃ ἔνι Πρωτεσιλάου·
1.817
ἀλλʼ ὁ μὲν ἤδη πρόσθεν ὑφʼ Ἕκτορι κεῖτο δαϊχθεὶς
1.818
ἠΰς Πρωτεσίλαος· ὀ δʼ ἔγχεϊ Πενθεσιλείης
1.819
βλήμενος Ἀργείοισι λυγρὸν περικάββαλε πένθος·
1.820
τοὔνεκά οἱ πληθὺν μὲν ἀπόπροθι ταρχύσαντο
1.821
τεθναότων· κείνῳ δέ πέριξ ἐβάλοντο καμόντες
1.822
οἴῳ σῆμʼ ἀρίδηλον, ἐπεὶ θρασὺς ἔπλετο θυμῷ.
1.823
νόσφι δὲ Θερσίταο λυγρὸν δέμας οὐτιδανοῖο
1.824
θάψαντες ποτὶ νῆας ἐϋπρώρους ἀφίκοντο
1.825
Αἰακίδην Ἀχιλῆα μέγα φρεσὶ κυδαίνοντες.
1.826
ἦμος δʼ αἰγλήεσσα κατʼ ὠκεανοῖο βεβήκει
1.827
ἠώς, ἀμφὶ δὲ γαῖαν ἐκίδνατο θεσπεσίη νύξ,
1.828
δὴ τότʼ ἄρʼ ἐν κλισίῃς Ἀγαμέμνονος ἀφνειοῖο
1.829
δαίνυτο Πηλείδαο βίη· σὺν δʼ ἄλλοι ἄριστοι
1.830
τέρποντʼ ἐν θαλίῃς μέχρις ἠὼ δῖαν ἱκέσθαι.