Fall of Troy
Choose a text
id="mobileReaderAuthor" class="mobile-reader-author" href="/authors/quintus-smyrnaeus" aria-label="More works by Quintus Smyrnaeus">
—
⋯
Original / primary: Perseus Grc2
2.1
αὐτὰρ ἐπεὶ κορυφὰς ὀρέων ὑπέρ ἠχηέντων
2.2
λαμπρὸν ὑπὲρ φάος ἦλθεν ἀτειρέος ἠελίοιο,
2.3
οἱ μὲν ἄρʼ ἐν κλισίῃσιν Ἀχαιῶν ἄβριμοι υἷες
2.4
γήθεον ἀκαμάτῳ μέγʼ ἐπευχόμενοι Ἀχιλῆι.
2.5
Τρῶες δʼ αὖ μύροντο κατὰ πτόλιν· ἀμφὶ δὲ πύργους
2.6
ἐζόμενοι σκοπίαζον, ἐπεὶ φόβος ἔλλαβε πάντας,
2.7
μὴ δή που μέγα τεῖχος ὑπερθόρῃ ὄβριμος ἀνήρ
2.8
αὐτούς τε κτείνῃ κατά τε πρήσῃ πυρὶ πάντα.
2.9
τοῖσι δʼ ἄρʼ ἀχνυμένοισι γέρων μετέειπε Θυμοίτης·
2.10
ὦ φίλοι, οὐκέτʼ ἔγωγε περὶ φρεσὶν οἶδα νοῆσαι,
2.11
ὅππως ἔσσεται ἄλκαρ ἀνιηροῦ πολέμοιο
2.12
Ἕκτορος ἀγχεμάχοιο δεδουπότος, ὃς μέγα Τρώων
2.13
κάρτος ἔην τὸ πάροιθε· καὶ οὐδʼ ὅ γε Κῆρας ἄλυξεν,
2.14
ἀλλʼ ἐδάμη παλάμῃσιν Ἀχιλλέος, ᾧ περ ὀΐω
2.15
καὶ θεὸν ἀντιάσαντα μάχῃ ἔνι δῃωθῆναι·
2.16
οἵην τήνδʼ ἐδάμασσεν ἀνὰ κλόνον, ἥνπερ οἱ ἄλλοι
2.17
Ἀργεῖοι φοβέοντο, δαΐφρονα Πενθεσίλειαν·
2.18
καὶ γὰρ ἔην ἔκπαγλος· ἔγωγέ μιν ὡς ἐνόησα,
2.19
ὠισάμην μακάρων τίνʼ ἀπʼ οὐρανοῦ ἐνθάδʼ ἱκέσθαι
2.20
ἡμῖν χάρμα φέρουσαν· ὃ δʼ οὐκ ἄρʼ ἐτήτυμον ἦεν.
2.21
ἀλλʼ ἄγε φραζώμεσθα, τί λώιον ἄμμι γένηται,
2.22
ἢ ἔτι που στυγεροῖσι μαχώμεθα δυσμενέεσσιν,
2.23
ἢ ἤδη φεύγωμεν ἀπʼ ἄστεος ὀλλυμένοιο·
2.24
οὐ γὰρ ἔτʼ Ἀργείοισι δυνησόμεθʼ ἀντιφερίζειν
2.25
μαρναμένου κατὰ δῆρ ιν ἀμειλίκτου Ἀχιλῆος.
2.26
ὣς ἄρʼ ἔφη· τὸν δʼ υἱὸς ἀμείβετο Λαομέδοντος·
2.27
ὦ φίλος ἠδʼ ἄλλοι Τρῶες σθεναροί τʼ ἐπίκουροι,
2.28
μή νύ τι δειμαίνοντες ἑῆς χαζώμεθα πάτρης,
2.29
μηδʼ ἔτι δυσμενέεσσι μαχώμεθα τῆλε πόληος,
2.30
ἀλλά που ἐκ πύργων καὶ τείχεος, εἰσόκεν ἔλθῃ
2.31
Μέμνων ὀβριμόθυμος ἄγων ἀπερείσια φῦλα
2.32
λαῶν, οἳ ναίουσι μελάμβροτον Αἰθιόπειαν.
2.33
ἤδη γάρ ῥα καὶ αὐτὸν ὀΐομαι ἀγχόθι γαίης
2.34
ἔμμεναι ἡμετέρης· ἐπεὶ ἦ νύ οἱ οὔτι νέον γε
2.35
ἀγγελίην προέηκα μέγʼ ἀχνύμενος περί θυμῷ·
2.36
αὐτὰρ ὅ γʼ ἀσπασίως μοι ὑπέσχετο πάντα τελέσσαι
2.37
ἐλθὼν ἐς Τροίην· καί μιν σχεδὸν ἔλπομαι εἶναι.
2.38
ἀλλʼ ἄγε τλῆτʼ ἔτι βαιόν, ἐπεὶ πολὺ λώιόν ἐστι
2.39
θαρσαλέως ἀπολέσθαι ἀνὰ κλόνον, ἠὲ φυγόντας
2.40
ζώειν ἀλλοδαποῖσι παρʼ ἀνδράσιν αἴσχἐ ἔχοντας.
2.41
ἦ ῥʼ ὁ γέρων· ἀλλʼ οὔτι σαόφρονι Πουλυδάμαντι
2.42
ἥνδανεν εἰσέτι δῆρις, ἐΰφρονα δʼ ἔκφατο μῦθον·
2.43
εἰ μὲν δὴ Μέμνων τοι ἀριφραδέως κατένευσεν
2.44
ἡμέων αἰνὸν ὄλεθρον ἀπωσέμεν, οὔτι μεγαίρω
2.45
μίμνειν ἀνέρα δῖον ἀνὰ πτόλιν· ἀλλʼ ἄρα θυμῷ
2.46
δείδω, μὴ σὺν ἑοῖσι κιὼν ἑτάροισι δαμείη
2.47
κεῖνος ἀνήρ, πολλοῖς δὲ καὶ ἄλλοις πῆμα γένηται
2.48
ἡμετέροις· δεινὸν γὰρ ἐπὶ σθένος ὄρνυτʼ Ἀχαιῶν.
2.49
ἀλλʼ ἄγε, μηδὲ πόληος ἑῆς ἀπὸ τῆλε φυγόντες
2.50
αἴσχεα πολλὰ φέρωμεν ἀναλκείῃ ὑπὸ λυγρῇ
2.51
ἀλλοδαπὴν περόωντες ἐπὶ χθόνα, μηδʼ ἔτι πάτρῃ
2.52
μίμνοντες κτεινώμεθʼ ὑπʼ Ἀργείων ὀρυμαγδοῦ,
2.53
ἀλλʼ ἤδη Δαναοῖσι, καὶ εἰ βραδύ, λώιον εἴη
2.54
εἰσέτι κυδαλίμην Ἑλένην καὶ κτήματʼ ἐκείνης,
2.55
ἠμὲν ὅσα Σπάρτηθεν ἀνήγαγεν ἠδὲ καὶ ἄλλα,
2.56
διττάκι τόσσα φέροντας ὑπὲρ πόλιός τε καὶ αὐτῶν
2.57
ἐκδόμεν, ἕως οὐ κτῆσιν ἀνάρσια φῦλα δέδασται
2.58
ἡμετέρην, οὐδʼ ἄστυ κατήνυκε πῦρ ἀΐδηλον.
2.59
νῦν δʼ ἄγʼ ἐμοὶ πείθεσθε περὶ φρεσίν· οὐ γὰρ ὁΐω
2.60
ἄλλον ἀμείνονα μῆτιν ἐνὶ Τρώεσσι φράσασθαι·
2.61
εἴθʼ ὄφελον καὶ πρόσθεν ἐμῆς ἐπάκουσεν ἐφετμῆς
2.62
Ἕκτωρ, ὁππότε μιν κατερήτυον ἔνδοθι πάτρης.
2.63
ὣς φάτο Πουλυδάμαντος ἐῢ σθένος· ἀμφὶ δὲ Τρῶες
2.64
ᾔνεον εἰσαΐοντες ἐνὶ φρεσίν, οὐδʼ ἀναφανδὸν
2.65
μῦθον ἔφαν· πάντες γὰρ ἑὸν τρομέοντες ἄνακτα
2.66
ἅζοντʼ ἠδʼ Ἑλένην, κείνης ἕνεκʼ ὀλλύμενοί περ.
2.67
τὸν δὲ καὶ ἐσθλὸν ἐόντα Πάρις μέγα νείκεσεν ἄντην·
2.68
Πουλυδάμα, σὺ μὲν ἐσσὶ φυγοπτόλεμος καὶ ἄναλκις,
2.69
οὐδὲ σοὶ ἐν στέρνοισι πέλει μενεδήιον ἦτορ,
2.70
ἀλλὰ δέος καὶ φύζα· σὺ δʼ εὔχεαι εἶναι ἄριστος
2.71
ἐν βουλῇ· πάντων δὲ χερείονα μήδεα οἶδας.
2.72
ἀλλʼ ἄγε δὴ σὺ μὲν αὐτὸς ἀπόσχεο δηιοτῆτος,
2.73
μίμνε δʼ ἐνὶ μεγάροισι καθήμενος· αὐτὰρ οἱ ἄλλοι
2.74
ἀμφʼ ἐμὲ θωρήξονται ἀνὰ πτόλιν, εἴσοκε μῆχος
2.75
εὕρωμεν θυμῆρες ἀνηλεγέος πολέμοιο·
2.76
οὐ γὰρ νόσφι πόνοιο καὶ ἀργαλέου πολέμοιο
2.77
ἀνθρώποις μέγα κῦδος ἀέξεται ἠδὲ καὶ ἔργον·
2.78
φύζα δὲ νηπιάχοισι μάλʼ εὔαδεν ἠδὲ γυναιξί·
2.79
κείνῃς θυμὸν ἔοικας· ἐγὼ δέ τοι οὔτι πέποιθα
2.80
μαρναμένῳ· πάντων γὰρ ἀμαλδύνεις θρασὺ κάρτος.
2.81
ἦ μέγα νεικείων· ὁ δὲ χωόμενος φάτο μῦθον
2.82
Πουλυδάμας· οὐ γάρ οἱ ἐναντίον ἅζετʼ ἀῧσαι
2.83
κεῖνος, ἐπεὶ στυγερὸς καὶ ἀτάσθαλος ἠδʼ ἀεσίφρων,
2.84
ὃς φίλα μὲν σαίνῃσιν ἐνωπαδόν, ἄλλα δὲ θυμῷ
2.85
πορφύρει καὶ κρύβδα τὸν οὐ παρεόντα χαλέπτῃ·
2.86
τῷ ῥα καὶ ἀμφαδίῃ μέγα νείκεσε δῖον ἄνακτα·
2.87
ὦ μοι ἐπιχθονίων πάντων ὀλοώτατε φωτῶν,
2.88
σὸν θράσος ἤγαγε νῶιν ὀϊζύα, σὸς νόος ἔτλη
2.89
δῆριν ἀπειρεσίην καὶ τλήσεται, εἰσόκε πάτρην
2.90
σὺν λαοῖς σφετέροισι δαϊζομένην ἐσίδηαι·
2.91
ἀλλʼ ἐμὲ μὴ τοιόνδε λάβοι θράσος, ἀμφὶ δὲ τάρβος
2.92
ἀσφαλὲς αἰὲν ἔχοιμι, σόον δέ μοι οἶκον ὀφέλλοι.
2.93
ὣς ἄρʼ ἔφη. ὁ δʼ ἄρʼ οὔτι προσέννεπε Πουλυδάμαντα·
2.94
μνήσατο γάρ, Τρώεσσιν ὅσας ἐφέηκεν ἀνίας
2.95
ἠδʼ ὁπόσας ἔτʼ ἔμελλεν, ἐπεί ῥά οἱ αἰθόμενον κῆρ
2.96
μᾶλλον ἐφώρμαινεν θανέειν ἢ νόσφι γενέσθαι
2.97
ἀντιθέης Ἑλένης, ἧς εἵνεκα Τρώιοι υἷες
2.98
ὑψόθεν ἐσκοπίαζον ἀπʼ ἄστεος αἰπεινοῖο
2.99
δέγμενοι Ἀργείους ἠδʼ Αἰακίδην Ἀχιλῆα.
2.100
τοῖσι δʼ ἄρʼ οὐ μετὰ δηρὸν ἀρήιος ἤλυθε Μέμνων,
2.101
Μέμνων κυανέοισι μετʼ Αἰθιόπεσσιν ἀνάσσων,
2.102
ὃς κίε λαὸν ἄγων ἀπερείσιον· ἀμφὶ δὲ Τρῶες
2.103
γηθόσυνοί μιν ἴδοντο κατὰ πτόλιν, ἠΰτε ναῦται
2.104
χείματος ἐξ ὀλοοῖο διʼ αἰθέρος ἀθρήσωσιν
2.105
ἤδη τειρόμενοι Ἑλίκης περιηγέος αἴγλην·
2.106
ὣς λαοὶ κεχάροντο περισταδόν, ἔξοχα δʼ ἄλλων
2.107
Λαομεδοντιάδης· μάλα γάρ νύ οἱ ἦτορ ἐώλπει
2.108
δῃώσειν πυρὶ νῆας ὑπʼ ἀνδράσιν Αἰθιόπεσσιν,
2.109
οὕνεκʼ ἔχον βασιλῆα πελώριον ἠδὲ καὶ αὐτοὶ
2.110
πολλοὶ ἔσαν καὶ πάντες ἐς Ἄρεα μαιμώωντες·
2.111
τῷ ῥʼ ἄμοτον κύδαινεν ἐῢν γόνον Ἠριγενείης
2.112
δωτίνῃς ἀγαθῇσι καὶ εὐφροσύνῃ τεθαλυίῃ·
2.113
ἀλλήλοις δʼ ὀάριζον ἐπʼ εἰλαπίνῃ καὶ ἐδωδῇ,
2.114
ὃς μὲν ἀριστῆας Δαναῶν καὶ ὅσʼ ἄλγἐ ἀνέτλη
2.115
ἐξενέπων, ὁ δὲ πατρὸς ἑοῦ καὶ μητέρος Ἠοῦς
2.116
ἀθάνατον βίον αἰέν, ἀπειρεσίης τε ῥέεθρα
2.117
Τηθύος, ὠκεανοῦ τε βαθυρρόου ἱερὸν οἶδμα
2.118
ἠδέ καὶ ἀκαμάτου πέρατα χθονός, ἀντολίας τε
2.119
ἠελίου, καὶ πᾶσαν ἀπʼ ὠκεανοῖο κέλευθον
2.120
μέχρις ἐπὶ Πριάμοιο πόλιν καὶ πρώονας Ἴδης,
2.121
ἠδὲ καὶ ὡς ἐδάϊξεν ὑπὸ στιβαρῇσι χέρεσσιν
2.122
ἀργαλέων Σολύμων ἱερὸν στρατόν, οἵ μιν ἰόντα
2.123
εἶργον, ὃ καὶ σφίσι πῆμα καὶ ἄσχετον ὤπασε πότμον.
2.124
καὶ τὰ μὲν ὣς ἀγόρευε καὶ ὡς ἴδεν ἔθνεα φωτῶν
2.125
μυρία· τοῦ δʼ ἀΐοντος ὑπὸ φρεσὶ τέρπετο θυμός,
2.126
καί ἑ καθαπτόμενος γεραρῷ προσεφώνεε μύθῳ·
2.127
ὦ Μέμνον, τό μὲν ἄρ με θεοὶ ποίησαν ἰδέσθαι
2.128
σὸν στρατὸν ἠδὲ καὶ αὐτὸν ἐν ἡμετέροισι μελάθροις·
2.129
ὥς μοι ἔτι κρήνειαν, ἵνʼ Ἀργείους ἐσίδωμαι
2.130
ὀλλυμένους ἅμα πάντας ὑπʼ ἐγχείῃσι τεῇσι·
2.131
καὶ γὰρ δὴ μακάρεσσιν ἀτειρέσι πάντα ἔοικας
2.132
ἐκπάγλως, ὡς οὔτις ἐπιχθονίων ἡρώων·
2.133
τῷ σʼ ὀΐν κείνοισι φόνον στονόεντα βαλέσθαι.
2.134
νῦν δʼ ἄγε τέρπεο θυμὸν ἐπʼ εἰλαπίνῃσιν ἐμῇσι
2.135
σήμερον· αὐτὰρ ἔπειτα μαχήσεαι, ὡς ἐπέοικεν.
2.136
ὣς εἰπὼν παλάμῃσι δέπας πολυχανδὲς ἀείρας
2.137
Μέμνονα προφρονέως στιβαρῷ δείδεκτο κυπέλλῳ
2.138
χρυσείῳ, τό ῥα δῶκε περίφρων ἀμφιγυήεις
2.139
Ἥφαιστος κλυτὸν ἔργον, ὅτʼ ἤγετο Κυπρογένειαν,
2.140
Ζηνὶ μεγασθενέϊ· ὁ δʼ ἄρʼ ὤπασεν υἱέϊ δῶρον
2.141
Δαρδάνῳ ἀντιθέῳ· ὁ δʼ Ἐριχθονίῳ πόρε παιδί·
2.142
Τρωὶ δʼ Ἐριχθόνιος μεγαλήτορι· αὐτὰρ ὅ γʼ Ἰλῷ
2.143
κάλλιπε σὺν κτεάτεσσιν· ὁ δʼ ὤπασε Λαομέδοντι·
2.144
αὐτὰρ ὁ Λαομέδων Πριάμῳ πόρεν, ὅς μιν ἔμελλεν
2.145
υἱέϊ δωσέμεναι· τὸ δέ οἱ θεὸς οὐκ ἐτέλεσσεν.
2.146
κεῖνο δέπας περικαλλὲς ἐθάμβεεν ἐν φρεσὶ Μέμνων
2.147
ἀμφαφόων καὶ τοῖον ὑποβλήδην φάτο μῦθον·
2.148
οὐ μὲν χρὴ παρὰ δαιτὶ πελώριον εὐχετάασθαι
2.149
οὐδʼ ἄρʼ ὑποσχεσίην κατανευέμεν, Zimmermann, for kataneu/saimen of MSS. ἀλλὰ ἕκηλον
2.150
δαίνυσθʼ ἐν μεγάροισι καὶ ἄρτια μηχανάασθαι·
2.151
εἴτε γὰρ ἐσθλός τʼ εἰμὶ καὶ ἄλκιμος εἴτε καὶ οὐκί,
2.152
γνώσῃ ἐνὶ πτολέμῳ, ὁπότʼ ἀνέρος εἴδεται ἀλκή.
2.153
νῦν δʼ ἄγε δὴ κοίτοιο μεδώμεθα, μηδʼ ἀνὰ νύκτα
2.154
πίνωμεν· χαλεπὸς γὰρ ἐπειγομένοισι μάχεσθαι
2.155
οἶνος ἀπειρέσιος καὶ ἀϋπνοσύνη ἀλεγεινή.
2.156
ὣς φάτο· τὸν δʼ ὁ γεραιὸς ἀγασσάμενος προσέειπεν·
2.157
αὐτὸς ὅπως ἐθέλεις μεταδαίνυσο, πείθεο δʼ αὐτῷ·
2.158
αὐ γὰρ ἐγώ σʼ ἀέκοντα βιήσομαι· οὐ γὰρ ἔοικεν
2.159
οὔτʼ ἀπιόντʼ ἀπὸ δαιτὸς ἐρυκέμεν οὔτε μένοντα
2.160
σεύειν ἐκ μεγάροιο· θέμις νύ τοι ἀνδράσιν αὕτως.
2.161
ὣς φάθʼ· ὁ δʼ ἐκ δόρποιο μεθίστατο· βῆ δὲ πρὸς εὐνὴν
2.162
ὑστατίην· ἅμα δʼ ἄλλοι ἔβαν κοίτοιο μέδεσθαι
2.163
δαιτυμόνες· τάχα δέ σφιν ἐπήλυθε νήδυμος ὕπνος.
2.164
αὐτὰρ ἐνὶ μεγάροισι Διὸς στεροπηγερέταο
2.165
ἀθάνατοι δαίνυντο· πατὴρ δʼ ἐν τοῖσι Κρονίων
2.166
εὖ εἰδώς ἀγόρευε δυσηχέος ἔργα μόθοιο·
2.167
ἴστε θεοὶ περὶ πάντες ἐπεσσύμενον βαρὺ πῆμα
2.168
αὔριον ἐν πολέμῳ· μάλα γὰρ πολλῶν μένος ἵππων
2.169
ὄψεσθʼ ἀμφʼ ὀχέεσσι δαϊζομένων ἑκάτερθεν
2.170
ἄνδρας δʼ ὀλλυμένους· τῶν καὶ πέρι κηδόμενός τις
2.171
μιμνέτω ὑμείων μνδʼ ἀμφʼ ἐμὰ γούναθʼ ἱκάνων
2.172
λισσέσθω· κῆρες γὰρ ἀμείλιχοί εἰσι καὶ ἡμῖν.
2.173
ὣς ἔφατʼ ἐν μέσσοισιν ἐπισταμένοισι καὶ αὐτοῖς,
2.174
ὄφρα καὶ ἀσχαλόων τις ἀπὸ πτολέμοιο τράπηται,
2.175
μηδέ ἑ λισσόμενος περὶ υἱέος ἠὲ φίλοιο
2.176
μαψιδίως ἀφίκηται ἀτειρέος ἔνδον Ὀλύμπου.
2.177
καὶ τὰ μὲν ὡς ἐσάκουσαν ἐριγδούπου Κρονίδαο,
2.178
τλῆσαν ἐνὶ στερνοισι καὶ οὐ βασιλῆος ἔναντα
2.179
μῆθον ἔφαν· μάλα γάρ μιν ἀπειρέσιον τρομέεσκον·
2.180
ἀχνύμενοι δʼ ἵκανον· ὅπῃ δόμος ἦεν ἑκάστου
2.181
καὶ λέχος· ἀμφὶ δὲ τοῖσι καὶ ἀθανάτοις περ ἐοῦσιν
2.182
ὕπνου βληχρὸν ὄνειαρ ἐπὶ βλεφάροισι τανύσθη.
2.183
ἦμος δʼ ἠλιβάτων ὀρέων ὑπερέσσυται ἄκρας
2.184
λαμπρὸς ἀνʼ οὐρανὸν εὐρὺν ἑωσφόρος, ὅς τʼ ἐπὶ ἔργον
2.185
ἡδὺ μάλα κνώσσοντασʼ ἀμαλλοδετῆρας ἐγείρει·
2.186
τῆμος ἀρήιον υἷα φαεσφόρου Ἠριγενείης
2.187
ὕστατος ὕπνος ἀνῆκεν· ὁδʼ ἐν φρεσὶ κάρτος ἀέξων
2.188
ἤδη δυσμενέεσσι λιλαίετο δηριάασθαι.
2.189
Ἠὼς δʼ οὐρανὸν εὐρὺν ἀνήιεν οὐκ ἐθέλουσα.
2.190
καὶ τότε Τρῶες ἕσαντο περὶ χροῒ δήια τεύχη,
2.191
τοῖσι δʼ ἅμʼ Αἰθίοπές τε καὶ ὁππόσα φῦλα πέλοντο
2.192
ἀμφὶ βίην Πριάμοιο συναγρομένων ἐπικούρων
2.193
πανσυδίῃ· μάλα δʼ ὦκα πρὸ τείχεος ἐσσεύοντο
2.194
κυανέοις νεφέεσσιν ἐοικότες, οἷα Κρονίων
2.195
χείματος ὀρνυμένοιο κατʼ ἠέρα πουλὺν ἀγείρει.
2.196
αἶψα δʼ ἄρʼ ἐπλήσθη πεδίον πᾶν· οἱ δʼ ἐκέχυντο
2.197
ἀκρίσι πυροβόροισιν ἀλίγκιον, αἵ τε φέρονται
2.198
ὡς νέφος ἢ πολὺς ὄμβρος ὑπὲρ χθονὸς εὐρυπέδοιο
2.199
ἄπλητοι μερόπεσσιν ἀεικέα λιμὸν ἄγουσαι·
2.200
ὣς οἱ ἴσαν πολλοί τε καὶ ὄβριμοι, ἀμφὶ δʼ ἀγυιαὶ
2.201
στείνοντʼ ἐσσυμένων, ὑπὸ δʼ ἔγρετο ποσσὶ κονίη.
2.202
Ἀργεῖοι δʼ ἀπάνευθεν ἐθάμβεον, εὖτʼ ἐσίδοντο
2.203
ἐσσυμένους· εἶθαρ δὲ περὶ χροῒ χαλκὸν ἕσαντο
2.204
κάρτεϊ Πηλείδαο πεποιθότες· ὃς δʼ ἐνὶ μέσσοις
2.205
ἤιε Τιτήνεσσι πολυσθενέεσσιν ἐοικὼς
2.206
κυδιόων ἵπποισι καὶ ἅρμασι· τοῦ δʼ ἄρα τεύχη
2.207
πάντη μαρμαίρεσκον ἀλίγκιον ἀστεροπῇσιν.
2.208
οἶος δʼ ἐκ περάτων γαιηόχου ὠκεανοῖο
2.209
ἔρχεται ἠέλιος φαεσίμβροτος οὐρανὸν εἴσω
2.210
μφανόων, τραφερὴ δὲ γελᾷ περὶ γαῖα καὶ αἰθήρ·
2.211
τοῖος ἐν Ἀργείοισι τότʼ ἔσσυτο Πηλέος υἱός.
2.212
ὣς δὲ καὶ ἐν Τρώεσσιν ἀρήιος ἤιε Μέμνων
2.213
Ἄρεϊ μαιμώωντι πανείκελος, ἀμφὶ δὲ λαοὶ
2.214
προφρονέως ἐφέποντο παρεσσύμενοι βασιλῆι.
2.215
αἶψα δʼ ἄρʼ ἀμφοτέρων δολιχαὶ πονέοντο φάλαγγες
2.216
Τρώων καὶ Δαναῶν, μετὰ δʼ ἔπρεπον Αἰθιοπῆες·
2.217
σὺν δʼ ἔπεσον καναχηδὸν ὁμῶς, ἅτε κύματα πόντου
2.218
πάντοθεν ἐγρομένων ἀνέμων ὑπὸ χείματος ὥρῃ·
2.219
ἀλλήλους δʼ ἐδάϊζον ἐϋξέστῃς μελίῃσι
2.220
βάλλοντες, μετὰ δέ σφι γόος καναχή τε δεδήει·
2.221
ὡς δʼ ὅτʼ ἐρίγδουποι ποταμοὶ μεγάλα στενάχωσιν
2.222
εἰς ἅλα χευόμενοι, ὅτε λαβρότατος πέλει ὄμβρος
2.223
ἐκ Διός, εὖτʼ ἀλίαστον ἐπὶ νέφεα κτυπέωσι
2.224
θηγόμενʼ ἀλλήλοισι, πυρὸς δʼ ἐξέσσυτʼ ἀϋτμή·
2.225
ὣς τῶν μαρναμένων μέγʼ ὑπαὶ ποσὶ γαῖα πελώρη
2.226
ἔβραχε, θεσπεσίου δὲ διʼ ἠέρος ἔσσυτʼ ἀϋτὴ
2.227
σμερδαλέη· δεινὸν γὰρ ἐΰτεον ἀμφοτέρωθεν.
2.228
Ἔνθʼ ἕλε Πηλείδης Θάλιον καὶ ἀμύμονα Μέντην
2.229
ἄμφω ἀριγνώτω, βάλε δʼ ἄλλων πολλὰ κάρηνα.
2.230
εὖτʼ αἰγὶς βερέθροισιν Zimmermann, for εὖτε γαίης μελάθροισιν of MSS. ὑποχθονίοις ἐπορούσῃ
2.231
λάβρος, ἄφαρ δέ τε πάντα κατὰ χθονὸς ἀμφιχέηται
2.232
ἐκ θεμέθλων· μάλα γάρ ῥα περιτρομέει βαθὺ γαῖα·
2.233
ὣς οἵ γʼ ἐν κονίῃσι κατήριπον ὠκέϊ πότμῳ
2.234
αἰχμῇ Πηλείωνος· ὁ γὰρ μέγα μαίνετο θυμῷ.
2.235
ὣς δʼ αὕτως ἑτέρωθεν ἐῢς πάϊς Ἠριγενείης
2.236
Ἀργείους ἐδέϊζε κακῇ ἐναλίγκιος Αἴσῃ,
2.237
ἥ τε φέρει λαοῖσι κακὸν καὶ ἀεικέα λοιγόν.
2.238
πρῶτον δʼ εἷλε Φέρωνα διὰ στέρνοιο τυχήσας
2.239
δούρατι λευγαλέῳ, ἐπὶ δʼ ἔκτανε δῖον Ἔρευθον,
2.240
ἄμφω ἐελδομένω πόλεμον καὶ ἀεικέα χάρμῃν,
2.241
οἳ Θρύον ἀμφενέμοντο παρʼ Ἀλφειοῖο ῥεέθροις,
2.242
καί ῥʼ ὑπὸ Νέστορι βῆσαν ἐς Ἰλίου ἱερὸν ἄστυ·
2.243
τοὺς δʼ ὁπότʼ ἐξενάριξεν, ἐπῴχετο Νηλέος υἱὸν
2.244
κτεῖναί μιν μεμαώς· τοῦ δʼ Ἀντίλοχος θεοειδὴς
2.245
πρόσθʼ ἐλθὼν ἴθυνε μακρὸν δόρυ, καί οἱ ἅμαρτε
2.246
τυτθὸν ἀλευαμένοιο· φίλον δέ οἱ εἷλεν ἑταῖρον
2.247
αἴθοπα Πυρρασίδην· ὁ δὲ χωσάμενος κταμένοιο
2.248
Ἀντιλόχῳ ἐπιᾶλτο, λέων ὣς ὀβριμόθυμος
2.249
καπρίῳ, ὅς ῥα καὶ αὐτὸς ἐναντίον οἶδε μάχεσθαι
2.250
ἀνδράσι καὶ θήρεσσι, πέλει δέ οἱ ἄσπετος ὁρμή·
2.251
ὣς ὁ θοῶς ἐπόρουσεν, ὁ δʼ εὐρέϊ μιν βάλε πέτρῳ
2.252
Ἀντίλοχος· τοῦ δʼ οὔτι λύθη κέαρ, οὕνεκʼ ἄρʼ αὐτοῦ
2.253
ἀλγινόεντʼ ἀπάλαλκε φόνον κρατερὴ τρυφάλεια·
2.254
σμερδαλέον δέ οἱ ἦτορ ἐνὶ στέρνοισιν ὀρίνθη
2.255
βλημένου· ἀμφὶ δέ οἱ κόρυς ἴαχε· καί ῥʼ ἔτι μᾶλλον
2.256
μαίνετʼ ἐπʼ Ἀντιλόχῳ. κρατερὴ δέ οἱ ἔζεεν ἀλκή·
2.257
τοὔνεκα Νέστορος υἷα καὶ αἰχμητήν περ ἐόντα
2.258
τύψεν ὑπὲρ μαζοῖο· διήλασε δʼ ὄβριμον ἔγχος
2.259
ἐς κραδίην, θνητοῖσιν ὅπῃ πέλει ὠκὺς ὄλεθρος.
2.260
τοῦ δʼ ὑποδῃωθέντος ἄχος Δαναοῖσιν ἐτύχθη
2.261
πᾶσι, μάλιστα δὲ πατρὶ περὶ φρένας ἤλυθε πένθος
2.262
Νέστορι παιδὸς ἑοῖο παρʼ ὀφθαλμοῖσι δαμέντος·
2.263
οὐ γὰρ δὴ μερόπεσσι κακώτερον ἄλγος ἔπεισιν,
2.264
ἢ ὅτε παῖδες ὄλωνται ἑοῦ πατρὸς εἰσορόωντος·
2.265
τοὔνεκα καὶ στερεῇσιν ἀρηράμενος φρεσὶ θυμὸν
2.266
ἄχνυτο παιδὸς ἑοῖο κακῇ περὶ Κηρὶ δαμέντος·
2.267
κέκλετο δʼ ἐσσυμένως Θρασυμήδεα νόσφιν ἐόντα·
2.268
ὄρσο μοι, ὦ Θρασύμηδες ἀγακλεές, ὄφρα φονῆα
2.269
σεῖο κασιγνήτοιο καὶ υἱέος ἡμετέροιο
2.270
νεκροῦ ἑκὰς σεύωμεν ἀεικέος, ἠὲ καὶ αὐτοὶ
2.271
ἀμφʼ αὐτῷ στονόεσσαν ἀναπλήσωμεν ὀϊζύν.
2.272
εἰ δὲ σοὶ ἐν στέρνοισι πέλει δέος, οὐ σύ γʼ ἐμεῖο
2.273
υἱὸς ἔφυς οὐδʼ ἐσσὶ Περικλυμένοιο γενέθλης,
2.274
ὅς τε καὶ Ἡρακλῆι καταντίον ἐλθέμεν ἔτλη.
2.275
ἀλλʼ ἄγε δὴ πονεώμεθʼ, ἐπεὶ μέγα κάρτος ἀνάγκη
2.276
πολλάκι μαρναμένοισι καὶ οὐτιδανοῖσιν ὀπάζει.
2.277
ὣς φάτο· τοῦ δʼ ἀΐοντος ὑπὸ φρεσὶ σύγχυτο θυμὸς
2.278
πένθεσι λευγαλέοισιν· ἄφαρ δέ οἱ ἤλυθεν ἄγχι
2.279
Φηρεύς, ὅν ῥα καὶ αὐτὸν ἀποκταμένοιο ἄνακτος
2.280
εἷλεν ἄχος· κρατεροῖο δʼ ἐναντία δηριάασθαι
2.281
Μέμνονος ὡρμήθησαν ἀνʼ αἱματόεντα κυδοιμόν.
2.282
ὠς δʼ ὅταν ἀγρευτῆρε κατὰ πτύχας ὑληέσσας
2.283
οὔρεος ἠλιβάτοιο λιλαιόμενοι μέγα θήρης
2.284
ἢ συὸς ἢ ἄρκτοιο καταντίον ἀΐσσωσι Zimmermann, for ἀΐσσονσι of v.
2.285
κτεινέμεναι μεμαῶτες, ὁ δʼ ἀμφοτέροις ἐπορούσας
2.286
θυμῷ μαιμώωντι βίην ἀπαμύνεται ἀνδρῶν·
2.287
ὣς τότε καὶ Μέμνων φρόνεεν μέγα· τοὶ δέ οἱ ἄγχι
2.288
ἤλυθον· ἀλλά μιν οὔτι κατακτανέειν ἐδύναντο
2.289
μακρῇσιν μελίῃσιν· ἀπέπλαγχθεν δέ οἱ αἰχμαὶ
2.290
τῆλε χροός· μάλα γάρ που ἀπέτραπεν Ἠριγένεια·
2.291
δούρατα δʼ οὐχ ἁλίως χαμάδις πέσεν· ἀλλʼ ὁ μὲν ὦκα
2.292
ἐμμεμαὼς κατέπεφνε Πολύμνιον υἷα Μέγητος
2.293
Φηρεὺς ὀβριμόθυμος, ὁ δʼ ἔκτανε Λαομέδοντα
2.294
Νέστορος ὄβριμος υἱὸς ἀδελφειοῖο χολωθείς,
2.295
ὃν Μέμνων ἐδάϊξε κατὰ μόθον, ἀμφὶ δʼ ἄρʼ αὐτῷ
2.296
χερσὶν ὑπʼ ἀκαμάτῃσι λύεν παγχάλκεα τεύχη
2.297
οὔτε βίην ἀλέγων Θρασυμήδεος οὔτε μὲν ἐσθλοῦ
2.298
Φηρέος, οὕνεκα πολλὸν ὑπείροχος. οἱ δʼ ἅτε θῶε
2.299
ἀμφʼ ἔλαφον βεβαῶτα μέγαν φοβέοντο λέοντα
2.300
οὔτι πρόσω μεμαῶτες ἔτʼ ἐλθέμεν· αἰνὰ δὲ Νέστωρ
2.301
ἐγγύθεν εἰσορόων ὀλοφύρετο, κέκλετο δʼ ἄλλους
2.302
σφοὺς ἑτάρους δηίοισιν ἐπελθέμεν· ἂν δὲ καὶ αὐτὸς
2.303
ὥρμαινεν πονέεσθαι ἀφʼ ἅρματος, οὕνεκʼ ἄρʼ αὐτὸν
2.304
παιδὸς ἀποφθιμένοιο ποθὴ ποτὶ μῶλον ἄγεσκε
2.305
πὰρ δύναμιν· μέλλεν δὲ φίλῳ περὶ παιδὶ καὶ αὐτὸς
2.306
κεῖσθαι ὁμῶς κταμένοις ἐναρίθμιος, εἰ μὴ ἄρʼ αὐτὸν
2.307
Μέμνων ὀβριμόθυμος ἐπεσσύμενον προσέειπεν
2.308
αἰδεσθεὶς ἀνὰ θυμὸν ὁμήλικα πατρὸς ἑοῖο·
2.309
ὧ γέρον, οὔ μοι ἔοικε καταντία σεῖο μάχεσθαι
2.310
πρεσβυτέροιο γεγῶτος, ἐπεί γʼ εὖ οἶδα νοῆσαι·
2.311
ἦ γὰρ ἔγωγʼ ἐφάμην σε νέον καὶ ἀρήιον ἄνδρα
2.312
ἀντιάαν δηίοισι· θρασὺς δέ μοι ἔλπετο θυμὸς
2.313
χειρὸς ἐμῆς καὶ δουρὸς ἐπάξιον ἔμμεναι ἔργον.
2.314
ἀλλʼ ἀναχάζεο τῆλε μόθου στυγεροῦ τε φόνοιο,
2.315
χάζεο, μή σε βάλοιμι καὶ οὐκ ἐθέλων περ ἀνάγκῃ,
2.316
μηδὲ τεῷ περὶ παιδὶ πέσῃς μέγʼ ἀμείνονι φωτὶ
2.317
μαρνάμενος, μὴ δή σε καὶ ἄφρονα μυθήσωνται
2.318
ἀνέρες· οὐ γὰρ ἔοικεν ὑπερτέρῳ ἀντιάασθαι.
2.319
ὣς φάτο· τὸν δʼ ἑτέρωθι γέρων ἠμείβετο μύθῳ·
2.320
ὦ Μέμνον, τὰ μὲν ἄρ που ἐτώσια πάντʼ ἀγορεύεις·
2.321
οὐ μὲν γὰρ δηίοισι πονεύμενον εἵνεκα παιδὸς
2.322
ἀφραίνειν ἐρέει τις ἀνηλέα παιδοφονῆα
2.323
νεκροῦ ἑκὰς σεύοντα κατὰ μόθον· ὡς ὄφελόν μοι
2.324
ἀλκὴ ἔτʼ ἔμπεδος ἦεν, ἵνα γνώῃς ἐμὸν ἔγχος·
2.325
νῦν δὲ σὺ μὲν μάλα πάγχυ μέγʼ εὔχεαι, οὕνεκα θυμὸς
2.326
θαρσαλέος νέου ἀνδρὸς ἐλαφρότερον δὲ νόημα·
2.327
τῷ ῥα καὶ ὑψηλὰ φρονέων ἀποφώλια βάζεις.
2.328
εἰ δέ μοι ἡβώωντι καταντίον εἰληλούθεις,
2.329
οὐκ ἄν τοι κεχάροντο φίλοι κρατερῷ περ ἐόντι·
2.330
νῦν δʼ ὥς τίς τε λέων ὑπὸ γήραος ἄχθομαι αἰνοῦ,
2.331
ὅν τε κύων σταθμοῖο πολυρρήνοιο δίηται
2.332
θαρσαλέως, ὁ δʼ ἄρʼ οὔτι λιλαιόμενός περ ἀμύνει
2.333
οἷ αὐτῷ, οὐ γάρ οἱ ἔτʼ ἔμπεδοί εἰσιν ὀδόντες
2.334
οὐδὲ βίη, κρατερὸν δὲ χρόνῳ ἀμαθύνεται ἦτορ·
2.335
ὣς ἐμοὶ οὐκέτι κάρτος ἐνὶ στήθεσσιν ὄρωρεν,
2.336
οἷόν. περ τὸ πάροιθεν· ὅμως δʼ ἔτι φέρτερός εἰμι
2.337
πολλῶν ἀνθρώπων, παύροισι δέ γῆρας ὑπείκει
2.337a
ἡμέτερον, τοῖς κάρτος ὁμῶς πέλει ἠδὲ καὶ ἥβη.
2.338
ὣς εἰπὼν ἀπὸ βαιὸν ἐχάσσατο· λεῖπε δʼ ἄρʼ υἷα
2.339
κείμενον ἐν κονίῃσιν, ἐπεί νύ οἱ οὐκέτι πάμπαν
2.340
γναμπτοῖς ἐν μελέεσσι πέλε σθένος ὡς τὸ πάροιθεν·
2.341
γήραϊ γὰρ καθύπερθε πολυτλήτῳ βεβάρητο.
2.342
ὣς δʼ αὕτως ἀπόρουσεν ἑϋμμελίης Θρασυμήδης
2.343
Φηρεύς τʼ ὀβριμόθυμος ἰδʼ ἄλλοι πάντες ἑταῖροι
2.344
δειδιότες· μάλα γάρ σφιν ἐῴχετο λοίγιος ἀνήρ.
2.345
Ὡς δʼ ὅτʼ ἀπὸ μεγάλων ὀρέων ποταμὸς βαθυδίνης
2.346
καχλάζων φορέηται ἀπειρεσίῳ ὀρυμαγδῷ
2.347
ὁππότε συννεφὲς ἦμαρ ἐπʼ ἀνθρώποισι τανύσσῃ
2.348
Ζεὺς κλονέων μέγα χεῖμα, περικτυπέουσι δὲ πάντῃ
2.349
βρονταὶ ὁμῶς στεροπῇσιν ἄδην νεφέων συνιόντων
2.350
θεσπεσίων, κοῖλαι δὲ περικλύζονται ἄρουραι
2.351
ὄμβρου ἐπεσσυμένοιο δυσηχέος, ἀμφὶ δὲ μακραὶ
2.352
σμερδαλέον βοόωσι κατʼ οὔρεα πάντα χαράδραι·
2.353
ὣς Μέμνων σεύεσκεν ἐπʼ ᾐόνας Ἑλλησπόντου
2.354
Ἀργείους· μετόπισθε δʼ ἐπισπόμενος κεράϊζε·
2.355
πολλοὶ δʼ ἐν κονίῃσι καὶ αἵματι θυμὸν ἔλειπον
2.356
Αἰθιόπων ὑπὸ χερσί· λύορῳ δʼ ἐφορύνετο γαῖα
2.357
ὀλλυμένων Δαναῶν. μέγα δʼ ἐν φρεσὶ γήθεε Μέμνων
2.358
αἰὲν ἐπεσσύμενος δηίων στίχας· ἀμφὶ δὲ νεκρῶν
2.359
στείνετο Τρώιον οὖδας· ὁ δʼ οὐκ ἀπέληγε κυδοιμοῦ·
2.360
ἔλπετο γὰρ Τρώεσσι φάος, Δαναοῖσι δὲ πῆμα
2.361
ἔσσεσθʼ· ἀλλά ἑ Μοῖρα πολύστονος ἠπερόρευεν
2.362
ἐγγύθεν ἱσταμένη καὶ ἐπὶ κλόνον ὀτρύνουσα.
2.363
ἀμφὶ δὲ οἱ θεράποντες ἐϋσθενέες πονέοντο,
2.364
Ἀλκυονεὺς Νύχιός τε καὶ Ἀσιάδης ἐρίθυμος
2.365
αἰχμητής τε Μένεκλος Ἀλέξιππός τε Κλύδων τε
2.366
ἄλλοι τʼ ἰωχμοῖο μεμαότες, οἵ ῥα καὶ αὐτοὶ
2.367
καρτύναντʼ ἀνὰ δῆριν ἑῷ πίσυνοι βασιλῆι.
2.368
καὶ τότε δή ῥα Μένεκλον ἐπεσσύμενον Δαναοῖσι
2.369
Νηλείδης κατέπεφνεν. ὁ δʼ ἀσχαλόων ἑτάροιο
2.370
Μέμνων ὀβριμόθυμος ἐνήρατο πουλὺν ὅμιλον·
2.371
ὡς δʼ ὅτε τις κραιπνῇσιν ἐπιβρίσας ἐλάφοισι
2.372
θηρητὴρ ἐν ὄρεσσι λίνων ἔντοσθεν ἐρεμνῶν
2.373
ἰλαδὸν ἀγρομένῃσιν ἐς ὑστάτιον δόλον ἄγρης
2.374
αἰζηῶν ἰότητι, κύνες δʼ ἐπικαγχαλόωσιν,
2.375
πυκνὸν ὑλακτιόωντες, ὁ δʼ ἐμμεμαὼς ὑπʼ ἄκοντι
2.376
κεμμάσιν ὠκυτάτῃσι φόνον στονόεντα τίθησιν·
2.377
ὣς Μέμνων ἐδάϊζε πολὺν στρατόν· ἀμφὶ δʼ ἑταῖροι
2.378
γήθεον· Ἀργεῖοι δὲ περικλυτὸν ἄνδρʼ ἐφέβοντο.
2.379
ὡς δʼ ὁπότʼ ἐξεριπόντος ἀπʼ οὔρεος ἠλιβάτοιο
2.380
πέτρου ἀπειρεσίοιο, τὸν ὑψόθεν ἀκάματος Ζεὺς
2.381
ὤσῃ ἀπὸ κρημνοῖο βαλὼν στονόεντι κεραυνῷ,
2.382
τοῦ δʼ ἄρʼ ἀνὰ δρυρὰ πυκνὰ καὶ ἄγκεα μακρὰ ῥαγέντος
2.383
βῆσσαι ἐπικτυπέουσι, περιτρομέουσι δʼ ἀνʼ ὕλην,
2.384
εἴ που μῆλʼ ὑπένερθε κυλινδομένοιο νέμονται
2.385
ἢ βόες ἠέ τινʼ ἄλλα, καὶ ἐξαλέονται ἰόντος
2.386
ῥιπὴν ἀργαλέην καὶ ἀμείλιχον· ὣς ἄρʼ Ἀχαιοὶ
2.387
Μέμνονος ὄβριμον ἔγχος ἐπεσσυμένοιο φέβοντο.
2.388
καὶ τότε δὴ κρατεροῖο μόλε σχεδὸν Αἰακίδαο
2.389
Νέστωπ, ἀμφὶ δὲ παιδὶ μέγʼ ἀχνύμενος φάτο μῦθον·
2.390
ὦ Ἀχιλεῦ μέγα ἕρκος ἐϋσθενέων Ἀργείων,
2.391
ὤλετό μοι φίλος υἱός, ἔχει δέ μοι ἔντεα Μέμνων
2.392
τεθνεότος, δείδω δὲ κυνῶν μὴ κῦρμα γένηται·
2.393
ἀλλὰ θοῶς ἐπάμυνον, ἐπεὶ φίλος ὅστις ἑταίρου
2.394
μέμνηται κταμένοιο καὶ ἄχνυται οὐκέτʼ ἐόντος.
2.395
ὣς φάτο· τοῦ δʼ ἀΐοντος ὑπὸ φρένας ἔμπεσε πένθος·
2.396
Μέμνονα δʼ ὡς ἐνόησεν ἀνὰ στονόεντα κυδοιμὸν
2.397
Ἀργείους ἰληδὸν ὑπʼ ἔγχεϊ δηιόωντα,
2.398
αὐτίκα κάλλιπε Τρῶας, ὅσους ὑπὸ χερσὶ δάϊξεν
2.399
ἀμφʼ ἄλλῃσι φάλαγξι, καὶ ἰσχανόων πολέμοιο
2.400
ἤλυθέ οἱ κατέναντα χολούμενος Ἀντιλόχοιο
2.401
ἠδʼ ἄλλων κταμένων· ὁ δʼ ἀνείλετο χείρεσι πέτρην,
2.402
τήν ῥα βροτοὶ θέσαν οὖρον ἐϋστάχυος πεδίοιο,
2.403
καὶ βάλεν ἀκαμάτοιο κατʼ ἀσπίδα Πηλείωνος
2.404
δῖος ἀνήρ· ὁ δʼ ἄρʼ οὔτι τρέσας περιμήκεα πέτρην
2.405
σὐτίκα οἱ σχεδὸν ἦλθε μακρὸν δόρυ πρόσθε τιταίνων,
2.406
πεζός, ἐπεί ῥά οἱ ἵπποι ἔσαν μετόπισθε κυδοιμοῦ,
2.407
καί οἱ δεξιὸν ὦμον ὑπὲρ σάκεος στυφέλιξεν·
2.408
ὃς δὲ καὶ οὐτάμενός περ ἀταρβίϊ μάρνατο θυμῷ·
2.409
τύψε δʼ ἄρʼ Αἰακίδαο βραχίονα δουρὶ κραταιῷ·
2.410
τοῦ δʼ ἐχύθη φίλον αἷμα· χάρη δʼ ἄρʼ ἐτώσιον ἥρως,
2.411
καί μιν ἄφαρ προσέειπεν ὑπερφιάλοις ἐπέεσσι·
2.412
νῦν σʼ ὀΐω μόρον αἰνὸν ἀναπλήσειν ὑπʼ ὀλέθρῳ
2.413
χερσὶν ἐμῇσι δαμέντα καὶ οὐκέτι μῶλον ἀλύξαι.
2.414
σχέτλιε, τίπτε σὺ Τρῶας ἀνηλεγέως ὀλέεσκες
2.415
πάντων εὐχόμενος πολὺ φέρτατος ἔμμεναι ἀνδρῶν,
2.416
μητρός τʼ ἀθανάτης Νηρηίδος; ἀλλὰ σοὶ ἤδη
2.417
ἤλυθεν αἴσιμον ἦθαρ, ἐπεὶ θεόθεν γένος εἰμὶ
2.418
Ἠοῦς ὄβριμος υἱός, ὃν ἔκποθι λειριόεσσαι
2.419
Ἑσπερίδες θρέψαντο παρὰ ῥόον ὠκεανοῖο.
2.420
τοὔνεκά σευ καὶ δῆριν ἀμείλιχον οὐκ ἀλεείνω
2.421
εἰδὼς μητέρα δῖαν, ὅσον προφερεστέρη ἐστὶ
2.422
Νηρεΐδος, τῆς αὐτὸς ἐρεύχεαι ἔκγονος εἶναι·
2.423
ἡ μὲν γὰρ μακάρεσσι καὶ ἀνθρώποισι φαείνει,
2.424
τῇ ἐπὶ πάντα τελεῖται ἀτείρεος ἔνδον Ὀλύμπου
2.425
ἐσθλά τε καὶ κλυτὰ ἔργα, τά τʼ ἀνδράσι γίνετʼ ὄνειαρ·
2.426
ἡ δʼ ἐν ἁλὸς κευθμῶσι καθημένη ἀτρυγέτοισι
2.427
ναίει ὁμῶς κήτεσσι μετʼ ἰχθύσι κυδιόωσα
2.428
ἄπρηκτος καὶ ἀΐστος· ἐγὼ δέ μιν οὐκ ἀλεγίζω
2.429
οὐδέ μιν ἀθανάτῃσιν ἐπουρανίῃσιν ἐΐσκω.
2.430
ὣς φάτο· τὸν δʼ ἐνένιπε θρασὺς πάϊς Αἰακίδαο·
2.431
ὦ Μέμνον, πῇ νῦν σε κακαὶ φρένες ἐξορόθυναν
2.432
ἐλθέμεν ἀντίʼ ἐμεῖο καὶ ἐς μόθον ἰσοφαρίζειν;
2.433
ὃς σέο φέρτερός εἰμι βίῃ γενεῇ τε φυῇ τε
2.434
Ζνηὸς ὑπερθύμοιο λαχὼν ἀριδείκετον αἷμα
2.435
καὶ σθεναροῦ Νηρῆος, ὃς εἰναλίας τέκε καύρας
2.436
Νηρεΐδας, τὰς δή ῥα θεοὶ τίουσʼ ἐν Ὀλύμπῳ,
2.437
πασάων δὲ μάλιστα Θέτιν κλυτὰ μητιόωσαν,
2.438
οὕνεκά που Διόνυσον ἑοῖς ὑπέδεκτο μελάθροις,
2.439
ὁππότε δειμαίνεσκε βίην ὀλοοῖο Λυκούργου,
2.440
ἠδὲ καὶ ὡς Ἥφαιστον ἐΰφρονα χαλκεοτέχνην
2.441
δέξαθʼ ἑπῖσι δόμοισιν ἀπʼ Οὐλύμποιο πεσόντα,
2.442
αὐτόν τʼ Ἀργικέραυνον ὅπως ὑπελύσατο δεσμῶν·
2.443
τῶν μιμνησκόμενοι πανδερκέες Οὐρανίωνες
2.444
μητέρʼ ἐμὴν τίουσι Θέτιν ζαθέῳ ἐν Ὀλύμπῳ.
2.445
γνώσῃ δʼ ὡς θεός ἐστιν, ἐπὴν δόρυ χάλκεον εἴσω
2.446
ἐς τεὸν ἧπαρ ἵκηται ἐμῇ βεβλημένον ἀλκῇ·
2.447
Ἕκτορα γὰρ Πατρόκλοιο, σὲ δʼ Ἀντιλόχοιο χολωθεὶς
2.448
τίσομαι· οὐ γὰρ ὄλεσσας ἀνάλκιδος ἀνδρὸς ἑταῖρον.
2.449
ἀλλὰ τί νηπιάχοισιν ἐοικότες ἀφραδέεσσιν
2.450
ἕσταμεν ἡμετέρων μυθεύμενοι ἔργα τοκήων
2.451
ἠδʼ αὐτῶν; ἐγγὺς καὶ Ἄρης, ἐγγὺς δὲ καὶ ἀλκή.
2.452
ὣς εἰπὼν παλάμῃσι λάβεν πολυμήκετον ἆορ
2.453
Μέμνων δʼ αὖθʼ ἑτέρωθι, καὶ ὀτραλέως συνόρουσαν·
2.454
τύπτον δʼ ἀλλήλων ἄμοτον φρεσὶ μαιμώωντες
2.455
ἀσπίδας, ἃς Ἥφαιστος ὑπʼ ἀμβροσίῃ κάμε τέχνῃ,
2.456
πυκνὰ συναΐσσοντες· ἐπέψαυον δὲ λόφοισιν
2.457
ἀλλήλαις ἑκάτερθεν ἐρειδόμεναι τρυφάλειαι.
2.458
Ζεὺς δὲ μέγʼ ἀμφοτέροισι φίλα φρονέων βάλε κάρτος,
2.459
τεῦξε δʼ ἄρʼ ἀκαμάτους καὶ μείζονας, οὐδὲν ὁμοίους
2.460
ἀνδράσιν, ἀλλὰ θεοῖσιν· ἔρις δʼ ἐπεγήθεεν ἄμφω.
2.461
οἱ δʼ αἰχμὴν μεμαῶτες ἄφαρ χροὸς ἐντὸς ἐλάσσαι
2.462
μεσσηγὺς σάκεός τε καὶ ὑψιλόφου τρυφαλείης
2.463
πολλάκις ἰθύνεσκον ἑὸν μένος, ἄλλοτε δʼ αὖτε
2.464
βαιὸν ὑπὲρ κνημῖδος, ἔνερθε δὲ δαιδαλέοιο
2.465
θώρηκος βριαροῖσιν ἀρηρότος ἀμφὶ μέλεσσιν,
2.466
ἄμφω ἐπειγόμενοι· περὶ δέ σφισιν ἄμβροτα τεύχη
2.467
ἀμφʼ ὤμοις ἀράβησε· βοὴ δʼ ἵκετʼ αἰθέρα δῖον
2.468
Τρώων Αἰθιόπων τε καὶ Ἀργείων ἐριθύμων
2.469
μαρναμένων ἑκάτερθε· κόνις δʼ ὑπὸ ποσσὶν ὀρώρει
2.470
ἄχρις ἐς οὐρανὸν εὐρύν, ἐπεὶ μέγα κίνυτο ἔργου.
2.471
Εὖτʼ ὀμίχλη κατʼ ὄρεσφιν ὀρινομένου ὑετοῖο,
2.472
ὁππότε δὴ κελάδοντες ἐνιπλήθονται ἔναυλοι
2.473
ὕδατος ἐσσυμένοιο, βρέμει δʼ ἄρα πᾶσα χαράδρη
2.474
ἄσπετον, οἱ δʼ ἄρα πάντες ἐπιτρομέουσι νομῆες
2.475
χειμάρρους ὀμίχλην τε φίλην ὀλοοῖσι λύκοισιν
2.476
ἠδʼ ἄλλοις θήρεσσιν, ὅσους τρέφει ἄσπετος ὕλη·
2.477
ὣς τῶν ἀμφὶ πόδεσσι κόνις πεπότητʼ ἀλεγεινή,
2.478
ἥ ῥά τε καὶ φάος ἠῢ κατέκρυφεν ἠελίοιο
2.479
αἰθέρʼ ἐπισκιάουσα· κακὴ δʼ ὑπεδάμνατʼ ὀϊζὺς
2.480
λαοὺς ἐν κονίῃ τε καὶ αἰνομόρῳ ὑσμίνῃ.
2.481
καὶ τὴν μὲν μακάρων τις ἀπώσατο δηιοτῆτος
2.482
ἐσσυμένως· ὀλοαὶ δὲ θοὰς ἑκάτερθε φάλαγγας
2.483
κῆρες ἐποτρύνεσκον ἀπειρέσιον πονέεσθαι
2.484
δῆριν ἀνὰ στονόεσσαν· Ἄρης δʼ οὐ λῆγε φόνοιο
2.485
λευγαλέου, πάντη δὲ πέριξ ἐφορύνετο γαῖα
2.486
αἵματος ἐκχυμένοιο· μέλας δʼ ἐπετέρπετʼ Ὄλεθρος·
2.487
στείνετο δὲ κταμένων πεδίον μέγα θʼ ἱππόβοτόν τε,
2.488
ὁππόσον ἀμφὶ ῥοαῖς Σιμόεις καὶ Ξάνθος ἐέγργει
2.489
Ἴδηθεν κατιόντες ἐς ἱερὸν Ἑλλήσποντον.
2.490
Ἀλλʼ ὅτε δὴ πολλὴ μέν ἄδην μηκύνετο δῆρις
2.491
μαρναμένων, ἶσον δὲ μένος τέτατʼ ἀμφοτέποισι,
2.492
δὴ τότε τούς γʼ ἀπάνευθεν Ὀλύμπιοι εἰσορόωντες,
2.493
οἱ μὲν θυμὸν ἔτερπον ἀτειρέϊ Πηλείωνι,
2.494
οἱ δʼ ἄπα Τιθωνοῖο καὶ Ἠοῦς υἱέϊ δίῳ.
2.495
ὑψόθι δʼ οὐρανὸς εὐρὺς ἐπέβραχεν· ἀμφὶ δὲ πόντος
2.496
ἴαχε· κυανέη δὲ πέπιξ ἐλελίζετο γαῖα
2.497
ἀμφοτέρων ὑπὸ ποσσί· περιτρομέοντο δὲ πᾶσαι
2.498
ἀμφὶ Θέτιν Νηρῆος ὑπερθύμοιο θύγατρες
2.499
ὀβρίμου ἀμφʼ Ἀχιλῆος ἰδʼ ἄσπετα δειμαίνοντο·
2.500
δείδιε δʼ Ἠριγένεια φίλῳ περὶ παιδὶ καὶ αὐτὴ
2.501
ἵπποις ἐμβεβαυῖα διʼ αἰθέρος· αἱ δέ οἱ ἄγχι
2.502
Ἠελίοιο θύγατρες ἐθάμβεον ἑστηυῖαι
2.503
θεσπεσιον περὶ κύκλον, ὃν ἠελίῳ ἀκάμαντι
2.504
Ζεὺς πόρεν εἰς ἐνιαυτὸν ἐῢν δρόμον, ᾦ περὶ πάντα
2.505
ζώει τε φθινύθει τε περιπλομένοιο κατʼ ἦμαρ
2.506
νωλεμέως αἰῶνος ἑλισσομένων ἐνιαυτῶν.
2.507
καί νύ κε δὴ μακάρεσσιν ἀμείλιχος ἔμπεσε δῆρις,
2.508
εἰ μὴ ὑπʼ ἐννεσίῃσι Διὸς μεγαλοβρεμέταο
2.509
δοιαὶ ἄρʼ ἀμφοτέροισι θοῶς ἑκάτερθε παρέσταν
2.510
κῆρες, ἐρεμναίη μὲν ἔβη ποτὶ Μέμνονος ἦτορ,
2.511
φαιδρὴ δʼ ἀμφʼ Ἀχιλῆα δαΐφρονα· τοὶ δʼ ἐσιδόντες
2.512
ἀθάνατοι μέγʼ ἄϋσαν, ἄφαρ δʼ ἕλε τοὺς μὲν ἀνίη
2.513
λευγαλέη, τοὺς δʼ ἠῢ καὶ ἀγλαὸν ἔλλαβε χάρμα.
2.514
ἥρωες δʼ ἐμάχοντο καθʼ αἱματόεντα κυδοιμὸν
2.515
ἔμπεδον, οὐδέ τι Κῆρας ἐποιχομένας ἐνόησαν
2.516
θυμὸν καὶ μέγα κάρτος ἐπʼ ἀλλήλοισι φέροντες·
2.517
θαίης κε στονόεντα κατὰ μόθον ἤματι κείνῳ
2.518
μάρνασθʼ ἠὲ Γίγαντας ἀτειρέας ἠὲ κραταιοὺς
2.519
Τιτῆνας· σθεναρὴ γὰρ ἐπί σφισι δῆρις ὀρώρει,
2.520
ἠμὲν ὅτε ξιφέεσσι συνέδραμον, ἠδʼ ὅτε λᾶας
2.521
βάλλον ἐπεσσύμενοι περιμήκεας· οὐδέ τις αὐτῶν
2.522
χάζετο βαλλομένων, οὐδʼ ἔτρεσαν, ἀλλʼ ἅτε πρῶνες
2.523
ἕστασαν ἀδμῆτες καταείμενοι ἄσπετον ἀλκήν·
2.524
ἄμφω γὰρ μεγάλοιο Διὸς γένος εὐχετόωντο·
2.525
τοὔνεκʼ ἄρα σφίσι δῆριν ἴσην ἐτάνυσσεν Ἐνυὼ
2.526
πολλὸν έπειδομένοισιν ἐπὶ χρόνον ἐν δαῒ κείνῃ,
2.527
αὐτοῖς ἠδʼ ἑτάροισιν ἀταρβέσιν, οἳ μετʼ ἀνάκτων
2.528
νωλεμέως πονέοντο μεμαότες, ἄχρι καμόντων
2.529
αἰχμαὶ ἀνεγνάμφθησαν ἐν ἀσπίσιν· οὐδέ τις ἦεν
2.530
θεινομένων ἑκάτερθεν ἀνούτατος, ἀλλʼ ἄρα πάντων
2.531
ἐκ μελέων εἰς οὖδας ἀπέρρεεν αἶμα καὶ ἱδρὼς
2.532
αἰὲν ἐρειδομένων, κεκάλυπτο δὲ γαῖα νέκυσσιν
2.533
οὐρανὸς ὡς νεφέεσσιν ἐς αἰγοκερῆα κιόντος
2.534
ἠελίου, ὅτε πόντον ὑποτρομέει μέγα ναύτης.
2.535
τοὺς δʼ ἵπποι χρεμέθοντες ἐπεσσυμένοις ἅμα λαοῖς
2.536
τεθνεότας στείβεσκον, ἅτʼ ἄσπετα φύλλα κατʼ ἄλσος
2.537
χείματος ἀρχομένου μετὰ τηλεθόωσαν ὀπώρην.
2.538
οἱ δέ που ἐν νεκύεσσι καὶ αἵματι δηριόωντο
2.539
υἱῆες μακάρων ἐρικυδέες, οὐδʼ ἀπέληγον
2.540
ἀλλήλοις κοτέοντες· ἔρις δʼ ἴθυνε τάλαντα
2.541
ὑσμίνης ἀλεγεινά, τὰ δʼ οὐκ ἔτι ἶσα πέλοντο·
2.542
ἀλλʼ ἄρα Μέμνονα δῖον ὑπὸ στέρνοιο θέμεθλα
2.543
Πηλείδης οὔτησε· τὸ δʼ ἀντικρὺ μέλαν ἆορ
2.544
ἐξέθορεν· τοῦ δʼ αἶψα λύθη πολύηρατος αἰών·
2.545
κάππεσε δʼ ἐς μέλαν αἷμα, βράχεν δέ οἱ ἄσπετα τεύχη·
2.546
γαῖα δʼ ὑπεσμαράγησε, καὶ ἀμφεφόβηθεν ἑταῖροι·
2.547
τὸν δʼ ἄρα Μυρμιδόνες μὲν ἐσύλεον· ἀμφὶ δὲ Τρῶες
2.548
φεῦγον· ὁ δʼ αἶψα δίωκε μένος μέγα λαίλαπι ἶσος.
2.549
Ἠὼς δʼ ἐστονάχησε καλυψαμένη νεφέεσσιν·
2.550
ἠχλύνθη δʼ ἄρα γαῖα. θοοὶ δʼ ἅμα πάντες ἀῆται
2.551
μητρὸς ἐφημοσύνῃσι νίῃ φορέοντο κελεύθῳ
2.552
ἐς πεδίον Πριάμοιο καὶ ἀμφεχέοντο θανόντι,
2.553
ἦκα δʼ ἀνηρείψαντο θοῶς Ἠώιον υἷα,
2.554
καί ἑ φέρον πολιοῖο διʼ ἠέρος· ἄχνυτο δέ σφι
2.555
θυμὸς ἀδελφειοῖο δεδουπότος· ἀμφὶ δʼ ἄρʼ αἰθὴρ
2.556
ἔστενε. τοῦ δʼ ἐπὶ γαῖαν ὅσαι πέσον αἱματόεσσαι
2.557
ἐκ μελέων ῥαθάμιγγες, ἐν ἀνθρώποισι τέτυκται
2.558
σῆμα καὶ ἐσσομένοις· τὰς γὰρ θεοὶ ἄλλοθεν ἄλλην
2.559
εἰς ἓν ἀγειράμενοι ποταμὸν θέσαν ἠχήεντα,
2.560
τόν ῥά τε Παφλαγόνειον ἐπιχθόνιοι καλέουσι
2.561
πάντες, ὅσοι ναίουσι μακρῆς ὑπὸ δειράσιν Ἴδης·
2.562
ὅς τε καὶ αἱματόεις τραφερὴν ἐπινίσσεται αἶαν,
2.563
ὁππότε Μέμνονος ἦμαρ ἔῃ λυγρόν, ᾧ ἔνι κεῖος
2.564
κάτθανε· λευγαλέη δὲ καὶ ἄσχετος ἔσσυται ὀδμὴ
2.565
ἐξ ὕδατος· φαίης κεν ἔθʼ ἕλκεος οὐλομένοιο
2.566
πυθομένους ἰχῶρας ἀποπνείειν ἀλεγεινόν.
2.567
ἀλλὰ τὸ μὲν βουλῇσι θεῶν γένεθʼ. οἱ δʼ ἐπέτοντο
2.568
Ἠοῦς ὄβριμον υἷα θοοὶ φορέοντες ἀῆται
2.569
τυτθὸν ὑπέρ γαίης δνοφερῇ κεκαλυμμένον ὄρφνῃ·
2.570
οὐδὲ μὲν Αἰθιοπῆες ἀποκταμένοιο ἄνακτος
2.571
νόσφιν ἀπεπλάγχθησαν, ἐπεὶ θεὸς αἶψα καὶ αὐτοὺς
2.572
ἦγε λιλαιομένοισι βαλὼν τάχος, οἶον ἔμελλον
2.573
οὐ μετὰ δηρὸν ἔχοντες ἐπηέριοι φορέεσθαι·
2.574
τοὔνεχʼ ἕποντʼ ἀνέμοισιν ὀδυρόμενοι βασιλῆα.
2.575
ὡς δʼ ὅταν ἀγρευτῆρος ἐνὶ ξυλόχοισι δαμέντος
2.576
ἢ συὸς ἠὲ λέοντος ὑπὸ βλοσυρῇσι γένυσσι
2.577
σῶμʼ ἀναειρόμενοι μογεροὶ φορέουσιν ἑταῖροι
2.578
ἀχνύμενοι, μετὰ δέ σφι κύνες ποθέοντες ἄνακτα
2.579
κνυζηθμῷ ἐφέπονται ἀνιηρῆς ἕνεκʼ ἄγρης·
2.580
ὣς οἵ γε προλιπόντες ἀνηλέα δηιοτῆτα
2.581
λαιψηροῖς ἐφέποντο μέγα στενάχοντες ἀήταις
2.582
ἀχλύϊ θεσπεσίῃ κεκαλυμμένοι, ἀμφὶ δὲ Τρῶες
2.583
καὶ Δαναοὶ θάμβησαν ἅμα σφετέρῳ βασιλῆι
2.584
πάντας ἀϊστωθέντας, ἀπειρεσίῃ δʼ ἀνὰ θυμὸν
2.585
ἀμφασίῃ βεβόληντο. νέκυν δʼ ἀκάμαντες ἀῆται
2.586
Μέμνονος ἀγχεμάχοιο θέσαν βαρέα στενάχουτες
2.587
πὰρ ποταμοῖο ῥέεθρα βαθυρρόου Αἰσήποιο,
2.588
ᾗχί τε Νυμσάων καλλιπλοκάμων πέλει ἄλσος
2.589
καλόν, ὃ δὴ μετόπισθε μακρὸν περὶ σῆμα βάλοντο
2.590
Αἰσηποῖο θύγατρες ἄδην πεπυκασμένον ὕλῃ
2.591
παντοίῃ· καὶ πολλὰ θεαὶ περικωκύσαντο,
2.592
υἱέα κυδαίνουσαι ἐϋθρόνου Ἠριγενείης.
2.593
δύσετο δʼ ἠελίοιο φάος· κατὰ δʼ ἤλυθεν Ἠὼς
2.594
οὐρανόθεν κλαίουσα φίλον τέκος, ἀμφὶ δʼ ἄρʼ αὐτῇ
2.595
κοῦραι ἐϋπλόκαμοι δυοκαίδεκα, τῇσι μέμηλεν
2.596
αἰὲν ἑλισσομένου Ὑπερίονος αἰπά κέλευθα
2.597
νύξ τε καὶ ἠριγένεια καὶ ἐκ Διὸς ὁππόσα βουλῆς
2.598
γίνεται, οὗ περὶ δῶμα καὶ ἀρρήκτους πυλεῶνας
2.599
στρωφῶντʼ ἔνθα καὶ ἔνθα πέριξ λυκάβαντα φέρουσαι
2.600
καρποῖσι βρίθοντα κυλινδομένου περὶ κύκλου
2.601
χειμῶνος κρυεροῖο καὶ εἴαρος ἀνθεμόεντος
2.602
ἠδὲ θέρευς ἐρατοῖο πολυσταφύλοιό τʼ ὀπώρης.
2.603
αἱ τότε δὴ κατέβησαν ἀπʼ αἰθέρος ἠλιβάτοιο
2.604
ἄσπετʼ ὀδυρόμεναι περὶ Μέμνονα σὺν δʼ ἄρα τῇσι
2.605
Πληιάδες μύροντο· περίαχε δʼ οὔρεα μακρὰ
2.606
καὶ ῥόος Αἰσήποιο· γόος δʼ ἄλλητος ὀρώρει.
2.607
ἡ δʼ ἄρʼ ἐνὶ μέσσῃσιν ἐῷ περὶ παιδὶ χυθεῖσα
2.608
μακρὸν ἀνεστονάχνησε πολύστονος Ἠριγένεια·
2.609
ὤλεό μοι, φίλε τέκνον, ἐῇ δʼ ἄρα μητέρι πένθος
2.610
ἀργαλέον περίθηκας· ἐγὼ δʼ οὐ σεῖο δαμέντος
2.611
τλήσομαι ἀθανάτοισιν ἐπουρανίοισι φαείνειν,
2.612
ἀλλὰ καταχθονίων ἐσλύσομαι αἰνὰ βέρεθρα,
2.613
ψυχὴ ὅπου σέο νόσφιν ἀποφθιμένοιο ποτᾶται,
2.612a
γαῖαν ἀμαυρώσουσα καὶ οὐρανὸν ἠδὲ θάλασσαν
2.614
πάντʼ ἐπικιδναμένου χάεος καὶ ἀεικέος ὄρφνης,
2.615
ὄφρα τι καὶ Κρονίδαο περὶ φρένας ἄλγος ἵκηται·
2.616
οὐ γὰρ ἀτιμοτέρη Νηρηίδος ἐκ Διὸς αὐτοῦ
2.617
πάντʼ ἐπιδερκομένη, πάντʼ ἐς τέλος ἄχρις ἄγουσα·
2.618
μαψιδίως γὰρ ἐμὸν φάος οὐ νῦν ὠπίσατο Ζεύς.
2.619
τοὔνεχʼ ὑπὸ ζόφον εἶμι· Θέτιν δʼ ἐς Ὄλυμπον ἀγέσθω
2.620
ἐξ ἁλός, ὄφρα θεοῖσι καὶ ἀνθρώποισι φαείνῃ·
2.621
αὐτὰρ ἐμοὶ στονόεσσα μετʼ οὐρανὸν εὔαδεν ὄρφνη,
2.622
μὴ δὴ σεῖο φονῆι φάος περὶ σῶμα βάλοιμι.
2.623
ὣς φαμένης ῥέε δάκρυ κατʼ ἀμβροσίοιο προσώπου
2.624
ἀενάῳ ποταμῷ ἐναλίγκιον· ἀμφὶ δὲ νεκρῷ
2.625
δεύετο γαῖα μέλαινα· συνάχνυτο δʼ ἀμβροσίη Νὺξ
2.626
παιδὶ φίλῃ, καὶ πάντα κατέκρυφεν οὐρανὸς ἄστρα
2.627
ἀχλύϊ καὶ νεφέεσσι φέρων χάριν Ἠριγενείῃ.
2.628
Τρῶες δʼ ἄστεος ἔνδον ἔσαν περὶ Μέμνονι θυμὸν
2.629
ἀχνύμενοι· πόθεον γὰρ ὁμῶς ἑτάροισιν ἄνακτα.
2.630
οὐδὲ μὲν Ἀργεῖοι μέγʼ ἐγήθεον, ἀλλὰ καὶ αὐτοὶ
2.631
ἐν πεδίῳ κταμένοισι παρʼ ἀνδράσιν αὖλιν ἔχοντες
2.632
ἄμφω ἐϋμμελίην μὲν Ἀχιλλέα κυδαίνεσκον,
2.633
Ἀντίλοχον δʼ ἄρα κλαῖον· ἔχον δʼ ἅμα χάρματι πένθος.
2.634
παννυχίη δʼ ἀλεγεινὸν ἀνεστονάχιζε γοῶσα
2.635
Ἠώς· ἀμφὶ δέ οἱ κέχυτο ζόφος· οὐδέ τι θυμῷ
2.636
ἀντολίης ἀλέγιζε, μέγαν δʼ ἤχθηρεν Ὄλυμπον.
2.637
ἄγχι δέ οἱ μάλα πολλὰ ποδώκεες ἔστενον ἵπποι
2.638
γαῖαν ἐπιστείβοντες ἀηθέα, καὶ βασίλειαν
2.639
ἀχνυμένην ὁρόωντες, ἐελδόμενοι μέγα νόστου.
2.640
Ζεὺς δʼ ἄμοτον βρόντησε χολούμενος, ἀμφὶ δὲ γαῖα
2.641
κινήθη περὶ πᾶσα· τρόμος δʼ ἕλεν ἄμβροτον Ἠῶ.
2.642
τὸν δʼ ἄρα καρπαλίμως μελανόχροες Αἰθιοπῆες
2.643
θάψαν ὀδυρόμενοι· τοὺς δʼ Ἠριγένεια βοῶπις
2.644
πόλλʼ ὀλοφυρομένους κρατεροῦ περὶ σήματι παιδὸς
2.645
οἰωνοὺς ποίησε καὶ ἠέρι δῶκε φέρεσθαι,
2.646
τοὺς καὶ νῦν καλέουσι βροτῶν ἀπερείσια φῦλα
2.647
Μέμνονας· οἵ ῥʼ ἐπὶ τύμβον ἔτι σφετέρου βασιλῆος
2.648
ἐσσύμενοι γοόωσι κόνιν καθύπερθε χέοντες
2.649
σήματος· ἀλλήλοις δὲ περικλονέουσι κυδοιμὸν
2.650
Μέμνονι ἦρα φέροντες· ὁ δʼ εἰν Ἀΐδαο δόμοισιν
2.651
ἠέ που ἐν μακάρεσσι κατʼ Ἠλύσιον πέδον αἴης
2.652
καγχαλάᾳ· καὶ θυμὸν ἰαίνεται ἄμβροτος Ἠὼς
2.653
δερκομένη· τοῖσιν δὲ πέλει πόνος ἄχρι καμόντες
2.654
εἷς ἕνα δῃώσωνται ἀνὰ κλόνον, ἠὲ καὶ ἄμφω
2.655
πότμον ἀναπλήσωσι πονεύμενοι ἀμφὶς ἄνακτα.
2.656
καὶ τὰ μὲν ἐννεσίῃσι φαεσφόρου Ἠριγενείης
2.657
οἰωνοὶ τελέουσι θοοί· τότε δʼ ἄμβροτος Ἠὼς
2.658
οὐρανὸν εἰσανόρουσεν ὁμῶς πολυαλδέσιν Ὥραις,
2.659
αἵ ῥά μιν οὐκ ἐθέλουσαν ἀνήγαγον ἐς Διὸς οὖδας
2.660
παρφάμεναι μύθοισιν, ὅσοις βαρὺ πένθος ὑπείκει,
2.661
καίπερ ἔτʼ ἀχνυμένην. ἡ δʼ οὐ λάθεθʼ οἶο δρόμοιο·
2.662
δείδιε γὰρ δὴ Ζηνὸς ἄδην ἄλληκτον ἐνιπήν,
2.663
ἐξ οὗ πάντα πέλονται, ὅσʼ ὠκεανοῖο ῥέεθρα
2.664
ἐντὸς ἔχει καὶ γαῖα καὶ αἰθομένων ἕδος ἄστρων.
2.665
τῆς ἄρα Πληιάδες πρότεραι ἴσαν· ἡ δὲ καὶ αὐτὴ
2.666
αἰθερίας ὤιξε πύλας, ἐκέδασσε δ ἄρʼ αἴγλην.