Fall of Troy
Choose a text
id="mobileReaderAuthor" class="mobile-reader-author" href="/authors/quintus-smyrnaeus" aria-label="More works by Quintus Smyrnaeus">
—
⋯
Original / primary: Perseus Grc2
6.1
Ἠὼς δʼ Ὠκεανοῖο ῥόον καὶ λέκτρα λιποῦσα
6.2
Τιθωνοῦ προσέβη μέγαν οὐρανόν, ἀμφὶ δὲ πάντη
6.3
κίδνατο παμφανόωσα· γέλασσε δὲ γαῖα καὶ αἰθήρ·
6.4
τοὶ δʼ εἰς ἔργα τράποντο βροτοὶ ῥεῖα φθινύθοντες·
6.5
ἄλλος δʼ ἀλλοίοισιν ἐπῴχετο· αὐτὰρ Ἀχαιοὶ
6.6
εἰς ἀγορὴν ἐχέοντο καλεσσαμένου Μενελάου·
6.7
καί ῥʼ ὅτε δὴ μάλα πάντες ἀνὰ στρατὸν ἠγερέθοντο,
6.8
δὴ τότʼ ἐνὶ μέσσοισιν ἀγειρομένοισι μετηύδα·
6.9
κέκλυτε μῦθον ἐμεῖο, θεηγενέες βασιλῆες,
6.10
ὡς ἐρέω· μέγα γάρ μοι ἐνὶ φρεσὶ τείρεται ἦτορ
6.11
λαῶν ὀλλυμένων, οἵ ῥʼ ἤλυθον εἵνεκʼ ἐμεῖο
6.12
δῆριν ἐς ἀργαλέην, τοὺς οὐχ ὑποδέξεται οἶκος,
6.13
οὐ τοκέες· πολέας γὰρ ὑπέκλασε δαίμονος Αἶσα.
6.14
ὡς ὄφελον Θανάτοιο βαρὺ σθένος ἀτλήτοιο
6.15
αὐτῷ ἐμοὶ ἐπόρουσε πρὶν ἐνθάδε λαὸν ἀγεῖραι·
6.16
νῦν δέ μοι ἀλλήκτους ὀδύνας ἐνεθήκατο δαίμων,
6.17
ὄφρʼ ὁρόω κακὰ πολλά· τίς ἂν φρεσὶ γηθήσειεν
6.18
εἰσορόων ἐπὶ δηρὸν ἀμήχανα ἔργα μόθοιο;
6.19
ἀλλʼ ἄγεθʼ ὅσσοι ἔτʼ εἰμὲν ἐπʼ ὠκυπόροισι νέεσσι
6.20
καρπαλίμως φεύγωμεν ἑὴν ἐπὶ γαῖαν ἕκαστος,
6.21
Αἴαντος φθιμένοιο πολυσθενέος τʼ Ἀχιλῆος,
6.22
τῶν ἐγὼ οὐκ ὀΐω κταμένων ὑπαλύξαι ὄλεθρον
6.23
ἡμέας, ἀλλʼ ὑπὸ Τρωσὶ δαμήμεναι ἀργαλέοισιν
6.24
εἵνεκʼ ἐμεῦ Ἑλένης τε κυνώπιδος, ἧς νύ μοι οὔτι
6.25
μέμβλεται ὡς ὑμέων, ὁπότε κταμένους ἐσίδωμαι
6.26
ἐν πολέμῳ· κείνη δʼ ἀλαπαδνοτάτῳ σὺν ἀκοίτῃ
6.27
ἐρρέτω· ἐκ γάρ οἱ πινυτὰς φρένας εἵλετο δαίμων
6.28
ἐκ κραδίης, ὅτʼ ἐμεῖο λίπεν δόμον ἠδὲ καὶ εὐνήν.
6.29
ἀλλὰ τὰ μὲν κείνης Πριάμῳ καὶ Τρωσὶ μελήσει·
6.30
ἡμεῖς δʼ αἶψα νεώμεθʼ, ἐπεὶ πολὺ λώιόν ἐστιν
6.31
ἐκφυγέειν πολέμοιο δυσηχέος ἢ ἀπολέσθαι.
6.32
ὣς ἔφατʼ Ἀργείων πειρώμενος· ἄλλα δέ οἱ κῆρ
6.33
ἐν κραδίῃ πόρφυρε περὶ ζηλήμονι θυμῷ,
6.34
Τρῶας ὅπως ὀλέσῃ καὶ τείχεα μακρὰ πόληος
6.35
ῥήξῃ ἐκ θεμέθλων, μάλα δʼ αἵματος ἄσῃ Ἄρηα
6.36
δίου Ἀλεξάνδροιο μετὰ φθιμένοισι πεσόντος·
6.37
οὐ γάρ τι ζήλοιο πέλει στυγερώτερον ἄλλο.
6.38
καὶ τὰ μὲν ὣς ὥρμαινεν, ἑῇ δʼ ἐπιίζανεν ἕδρῃ.
6.39
καὶ τότε Τυδείδης ἐγχέσπαλος ὦρτʼ ἐνὶ μέσσοις,
6.40
καί ῥα θοῶς νείκεσσεν ἀρηίφιλον Μενέλαον·
6.41
ἆ δείλʼ Ἀτρέος υἱέ, τί ἤ νύ σε δεῖμα κιχάνει
6.42
ἀργαλέον, καὶ τοῖα μετʼ Ἀργείοις ἀγορεύεις,
6.43
ὡς πάϊς ἠὲ γυνή, τῶνπερ σθένος ἔστʼ ἀλαπαδνόν;
6.44
ἀλλὰ σοὶ οὐ πείσονται Ἀχαιῶν φέρτατοι υἷες
6.45
πρὶν Τροίης κρήδεμνα ποτὶ χθόνα πάντα βαλέσθαι·
6.46
θάρσος γὰρ μερόπεσσι κλέος μέγα, φύζα δʼ ὄνειδος.
6.47
εἰ δʼ ἄρα τις καὶ τῶνδʼ ἐπιπείσεται, ὡς ἐπιτέλλεις,
6.48
αὐτίκα οἱ κεφαλὴν τεμέω ἰόεντι σιδήρῳ,
6.49
ῥίψω δʼ οἰωνοῖσιν ἀερσιπέτῃσιν ἐδωδήν.
6.50
ἀλλʼ ἄγεθʼ, οἷσι μέμηλεν ὀρινέμεναι μένἐ ἀνδρῶν,
6.51
λαοὺς αὐτίκα πάντας ὀτρυνάντων κατὰ νῆας
6.52
δούρατα θηγέμεναι, παρά τʼ ἀσπίδας ἄλλα τε πάντα
6.53
εὖ θέσθαι, καὶ δεῖπνον ἄφαρ πάσσασθαι Zimmermann, for e)fopli/ssasqai (sith lacuna) of Koechly. ἅπαντας
6.54
ἀνέρας ἠδʼ ἵππους, οἵ τʼ ἐς πόλεμον μεμάασιν·
6.55
ἐν πεδίῳ δʼ ὤκιστα διακρινέει μένος Ἄρης.
6.56
ὣς φάτο Τυδείδης· κατὰ δʼ ἕζετο, ᾗχι πάρος περ·
6.57
τοῖσι δὲ Θέστορος υἱὸς ἔπος ποτὶ τοῖον ἔειπεν
6.58
ἀνστὰς ἐν μέσσοισιν, ὅπῃ θέμις ἔστʼ ἀγορεύειν·
6.59
κέκλυτέ μευ, φίλα τέκνα μενεπτολέμων Ἀργείων·
6.60
ἴστε γάρ, ὡς σάφα οἶδα θεοπροπίας ἀγορεύειν.
6.61
ἤδη μὲν καὶ πρόσθʼ ἐφάμην δεκάτῳ λυκάβαντι
6.62
πέρσειν Ἴλιον αἰπύ· τὸ δὴ νῦν ἐκτελέουσιν
6.63
ἀθάνατοι· νίκη δὲ πέλει παρὰ ποσσὶν Ἀχαιῶν.
6.64
ἀλλʼ ἄγε, Τυδέος υἷα μενεπτόλεμόν τʼ Ὀδυσῆα
6.65
πέμψωμεν Σκῦρον δὲ θοῶς ἐν νηὶ μελαίνῃ,
6.66
οἵ ῥα παραιπεπίθοντες Ἀχιλλέος ὄβριμον υἷα
6.67
ἄξουσιν· μέγα δʼ ἄμμι φάος πάντεσσι πελάσσει.
6.68
ὣς φάτο Θέστορος υἱὸς ἐΰφρονος· ἀμφὶ δὲ λαοὶ
6.69
γηθόσυνοι κελάδησαν, ἐπεί σφισιν ἦτορ ἐώλπει
6.70
Κάλχαντος φάτιν ἔμμενʼ ἐτήτυμον, ὡς ἀγόρευε·
6.71
καὶ τότε Λαέρταο πάϊς μετέειπεν Ἀχαιοῖς·
6.72
ὦ φίλοι, οὐκέτʼ ἔοικε μεθʼ ὑμῖν πόλλʼ ἀγορεύειν
6.73
σήμερον· ἐν γὰρ δὴ κάματος πέλει ἀχνυμένοισιν·
6.74
οἶδα γὰρ ὡς λαοῖσι κεκμηκόσιν οὔτʼ ἀγορητὴς
6.75
ἁνδάνει οὔτʼ ἄρʼ ἀοιδός, ὃν ἀθάνατοι φιλέουσι
6.76
Πιερίδες· παύρων δʼ ἐπέων ἔρος ἔνθʼ ἀνθρώποις. Zimmermann, for e)/ros a)nqrw/poisi of MSS.
6.77
νῦν δʼ, ὅπερ εὔαδε πᾶσι κατὰ στρατὸν Ἀργείοισι,
6.78
Τυδείδαο μάλιστα συνεσπομένου τελέσαιμι·
6.79
ἄμφω γάρ κεν ἰόντε φιλοπτολέμου Ἀχιλῆος
6.80
ἄξομεν ὄβριμον υἷα παρακλίναντʼ ἐπεεσσιν,
6.81
εἰ καί μιν μάλα πολλὰ κινυρομένη κατερύκει
6.82
μήτηρ ἐν μεγάροισιν, ἐπεὶ κρατεροῖο τοκῆος
6.83
ἔλπομʼ ἐμὸν κατὰ θυμὸν ἀρήιον ἔμμεναι υἷα.
6.84
ὣς φάμενον προσέειπε πύκα φρονέων Μενέλαος·
6.85
ὦ Ὀδυσεῦ, μέγʼ ὄνειαρ ἐϋσθενέων Ἀργείων,
6.86
ἤνπερ Ἀχιλλῆος μεγαλόφρονος ὄβριμος υἱὸς
6.86a
σῇσι παραιφασίῃσι λιλαιομένοισιν ἀρωγὸς *werse inserted by Zimmermann ex *i).
6.87
ἔλθοι ἀπὸ Σκύροιο πόροι δέ τις οὐρανιώνων
6.88
νίκην εὐχομένοισι καὶ Ἑλλάδα γαῖαν ἱκῶμαι,
6.89
δώσω οἱ παράκοιτιν ἐμὴν ἐρικυδέα κούρην
6.90
Ἑρμιόνην, καὶ πολλὰ καὶ ὄλβια δῶρα σὺν αὐτῇ
6.91
προφρονέως· οὐ γάρ μιν ὀΐομαι οὔτε γυναῖκα
6.92
οὔτʼ ἄρα πενθερὸν ἐσθλὸν ὑπερφιάλως ὀνόσασθαι.
6.93
ὣς ἄρʼ ἔφη· Δαναοὶ δὲ συνευφήμησαν ἔπεσσι.
6.94
καὶ τότε λῦτʼ ἀγορή· τοὶ δʼ ἐσκίδναντʼ ἐπὶ νῆας
6.95
ἱέμενοι δείπνοιο, τὸ δὴ πέλει ἀνδράσιν ἀλκή·
6.96
καί ῥʼ ὅτε δὴ παύσαντο κορεσσάμενοι μέγʼ ἐδωδῆς,
6.97
δὴ τόθʼ ὁμῶς Ὀδυσῆι περίφρονι Τυδέος υἱὸς
6.98
νῆα θοὴν εἴρυσσεν ἀπειρεσίης ἁλὸς εἴσω·
6.99
καρπαλίμως δʼ ἤια καὶ ἄρμενα πάντα βάλοντο·
6.100
ἐν δὲ καὶ αὐτοὶ ἔβαν· μετὰ δέ σφισιν εἴκοσι φῶτες
6.101
ἴδμονες εἰρεσίης, ὁπότʼ ἀντίαι ὦσιν ἄελλαι,
6.102
ἠδʼ ὁπότʼ εὐρέα πόντον ὑποστορέῃσι γαλήνη.
6.103
καί ῥʼ ὅτε δὴ κληῖσιν ἐπʼ εὐτύκτοισι κάθισσαν,
6.104
τύπτον ἁλὸς μέγα κῦμα· πολὺς δʼ ἀμφέζεεν ἀφρός·
6.105
ὑγραὶ δʼ ἀμφʼ ἐλάτῃσι διεπρήσσοντο κέλευθοι
6.106
νηὸς ἐπεσσυμένης· τοὶ δʼ ἱδρώοντες ἔρεσσον·
6.107
ὡς δʼ ὅθʼ ὑπὸ ζεύγλῃσι βόες μέγα κεκμηῶτες
6.108
δουρατέην ἐρύσωσι πρόσω μεμαῶτες ἀπήνην
6.109
ἄχθεϊ τετριγυῖαν ὑπʼ ἄξονι δινήεντι
6.110
τειρόμενοι, πουλὺς δὲ κατʼ αὐχένος ἠδὲ καὶ ὤμων
6.111
ἱδρὼς ἀμφοτέροισι κατέσσυται ἄχρις ἐπʼ οὖδας·
6.112
ὣς τῆμος μογέεσκον ὑπὸ στιβαρῇς ἐλάτῃσιν
6.113
αἰζηοί· μάλα δʼ ὦκα διήνυον εὐρέα πόντον.
6.114
τοὺς δʼ ἄλλοι μὲν Ἀχαιοὶ ἀποσκοπίαζον ἰόντας·
6.115
θῆγον δʼ αἰνὰ βέλεμνα καὶ ἔγχεα, τοῖσι μάχοντο.
6.116
Τρῶες δʼ ἄστεος ἐντὸς ἀταρβέες ἐντύνοντο
6.117
ἐς πόλεμον μεμαῶτες ἰδʼ εὐχόμενοι μακάρεσσι
6.118
λωφῆσαί τε φόνοιο καὶ ἀμπνεῦσαι καμάτοιο.
6.119
τοῖσι δʼ ἐελδομένοισι θεοὶ μέγα πήματος ἄλκαρ
6.120
ἤγαγον Εὐρύπυλον κρατεροῦ γένος Ἡρακλῆος·
6.121
καί οἱ λαοὶ ἕποντο δαήμονες ἰωχμοῖο
6.122
πολλοί, ὅσοι δολιχοῖο παρὰ προχοῇσι Καΐκου
6.123
ναίεσκον κρατερῇσι πεποιθότες ἐγχείῃσιν.
6.124
ἀμφὶ δέ οἱ κεχάροντο μέγα φρεσὶ Τρώιοι υἷες·
6.125
ὡς δʼ ὁπόθʼ ἕρκεος ἐντὸς ἐεργμένοι ἀθρήσωσιν
6.126
ἥμεροι ἀνέρα χῆνες, ὅτις σφίσιν εἴδατα βάλλῃ,
6.126a
ἀμφὶ δέ μιν στομάτεσσι περισταδὸν ἰύζοντες Verse inserted by Zimmermann ex P.
6.127
σαίνουσιν, τοῦ δʼ ἦτορ ἰαίνεται εἰσορόωντος·
6.128
ὣς ἄρα Τρώιοι υἷες ἐγήθεον, εὖτʼ ἐσίδοντο
6.129
ὄβριμον Εὐρύπυλον, τοῦ δʼ ἐν φρεσὶ θαρσαλέον κῆρ
6.130
τέρπετʼ ἀγειρομένοισιν· ἀπὸ προθύρων δὲ γυναῖκες
6.131
θάμβεον ἀνέρα δῖον· ὁ δʼ ἔξοχος ἔσσυτο λαῶν
6.132
ἠΰτε τις θώεσσι λέων ἐν ὄρεσσι μετελθών.
6.133
τὸν δὲ Πάρις δείδεκτο, τίεν δέ μιν Ἕκτορι ἶσον·
6.134
τοῦ γὰρ ἀνεψιὸς ἔσκεν, ἰῆς τʼ ἐτέτυκτο γενέθλης·
6.135
τὸν γὰρ δὴ τέκε δῖα κασιγνήτη Πριάμοιο
6.136
Ἀστυόχη κρατερῇσιν ὑπʼ ἀγκοίνῃσι μιγεῖσα
6.137
Τηλέφου, ὅν ῥα καὶ αὐτὸν ἀταρβέϊ Ἡρακλῆι
6.138
λάθρῃ ἑοῖο τοκῆος ἐϋπλόκαμος τέκεν Αὔγη·
6.139
καί μιν τυτθὸν ἐόντα καὶ ἰσχανόωντα γάλακτος
6.140
θρέψε θοή ποτε κεμμάς, ἑῷ δʼ ἴσα φίλατο νεβρῷ
6.141
μαζὸν ὑποσχομένη βουλῇ Διός· οὐ γὰρ ἐῴκει
6.142
ἔκγονον Ἡρακλῆος ὀϊζυρῶς ἀπολέσθαι.
6.143
τοῦ δʼ ἄρα κύδιμον υἷα Πάρις μάλα πρόφρονι θυμῷ
6.144
ἦγεν ἑὸν ποτὶ δῶμα διʼ εὐρυχόροιο πόληος
6.145
σῆμα πάρʼ Ἀσσαράκοιο καὶ Ἕκτορος αἰπὰ μέλαθρα
6.146
νηόν τε ζάθεον Τριτωνίδος, ἔνθα οἱ ἄγχι
6.147
δώματʼ ἔσαν καὶ βωμὸς ἀκήρατος Ἑρκείοιο·
6.148
καί μιν ἀδελφειῶν πηῶν θʼ ὕπερ ἠδὲ τοκήων
6.149
εἴρετο προφρονέως· ὁ δέ οἱ μάλα πάντʼ ἀγόρευεν·
6.150
ἄμφω δʼ ὣς ὀάριζον ἅμʼ ἀλλήλοισι κιόντες.
6.151
ἦλθον δʼ ἐς μέγα δῶμα καὶ ὄλβιον· ἔνθα δʼ ἄρʼ ἧστο
6.152
ἀντιθέη Ἑλένη Χαρίτων ἐπιειμένη εἶδος·
6.153
καί ῥά μιν ἀμφίπολοι πίσυρες περιποιπνύεσκον,
6.154
ἄλλαι δʼ αὖτʼ ἀπάνευθεν ἔσαν κλειτοῦ θαλάμοιο
6.155
ἔργα τιτυσκόμεναι, ὁπόσα δμωῇσιν ἔοικεν.
6.156
Εὐρύπυλον δʼ Ἑλένη μέγʼ ἐθάμβεεν εἰσορόωσα,
6.157
κεῖνος δʼ αὖθʼ Ἑλένην· μετὰ δʼ ἀλλήλους ἐπέεσσιν
6.158
ἄμφω δεικανόωντο δόμῳ ἐνὶ κηώεντι·
6.159
δμῶες δʼ αὖτε θρόνους δοιὼ θέσαν ἐγγὺς ἀνάσσης·
6.160
αἶψα δʼ Ἀλέξανδρος κατʼ ἄρʼ ἕζετο, πὰρ δʼ ἄρα τῷ γε
6.161
Εὐρύπυλος. λαοὶ δὲ πρὸ ἄστεος αὖλιν ἔθεντο,
6.162
ᾗχι φυλακτῆρες Τρώων ἔσαν ὀβριμόθυμοι·
6.163
αἶψα δὲ τεύχεα θῆκαν ἐπὶ χθόνα, πὰρ δὲ καὶ ἵππους
6.164
στῆσαν ἔτι πνείοντας ὀϊζυροῖο μόγοιο·
6.165
ἐν δὲ φάτνῃσι βάλοντο, τά τʼ ὠκέες ἵπποι ἔδουσι.
6.166
καὶ τότε νὺξ ἐπόρουσε, μελαίνετο δʼ αἶα καὶ αἰθήρ·
6.167
οἱ δʼ ἄρα δαῖτʼ ἐπάσαντο πρὸ τείχεος αἰπεινοῖο
6.168
Κήτειοι Τρῶές τε· πολὺς δʼ ἐπὶ μῦθος ὀρώρει
6.169
δαινυμένων· πάντῃ δὲ πυρὸς μένος αἰθαλόεντος
6.170
δαίετο πὰρ κλισίῃσιν· ἐπίαχε δʼ ἠπύτα σύριγξ
6.171
αὐλοί τε λιγυροῖσιν ἀρηράμενοι καλάμοισιν,
6.172
ἀμφὶ δὲ φορμίγγων ἰαχὴ πέλεν ἱμερόεσσα.
6.173
Ἀργεῖοι δʼ ἀπάνευθεν ἐθάμβεον εἰσορόωντες
6.173a
ἐν πεδίῳ πυρὰ πολλὰ καὶ ἄσπετον εἰσαΐοντες
6.174
αὐλῶν φορμίγγων τʼ ἰαχὴν ἀνδρῶν καὶ ἵππων
6.175
σύριγγός θʼ, ἣ δαιτὶ μεταπρέπει ἠδὲ νομεῦσι·
6.176
τοὔνεκʼ ἄρʼ οἷσιν ἕκαστος ἐπὶ κλισίῃσι κέλευσε
6.177
νῆας ἀμοιβαίῃσι φυλασσέμεν ἄχρις ἐς ἠῶ,
6.178
μή σφεας Τρῶες ἀγαυοὶ ἐνιπρήσωσι κιόντες
6.179
οἵ ῥα τότʼ αἰπεινοῖο πρὸ τείχεος εἰλαπίναζον.
6.180
ὣς δʼ αὕτως κατὰ δώματʼ Ἀλεξάνδροιο δαΐφρων
6.181
δαίνυτο Τηλεφίδης μετʼ ἀγακλειτῶν βασιλήων·
6.182
πολλὰ δʼ ἄρα Πρίαμός τε καὶ ἄλλοι Τρώιοι υἷες
6.183
ἑξείης ηὔχοντο μιγήμεναι Ἀργείοισιν
6.184
αἴσῃ ἐν ἀργαλέῃ· ὁ δʼ ὑπέσχετο πάντα τελέσσειν.
6.185
αὐτὰρ ἐπεὶ δόρπησαν, ἔβαν ποτὶ δώμαθʼ ἕκαστος·
6.186
Εὐρύπυλος δʼ αὐτοῦ κατελέξατο βαιὸν ἄπωθεν
6.187
ἐς τέγος εὐποίητον, ὅπῃ πάρος αὐτὸς ἴαυεν
6.188
ἠῢς Ἀλέξανδρος μετʼ ἀγακλειτῆς ἀλόχοιο·
6.189
κεῖνο γὰρ ἔκπαγλόν τε καὶ ἔξοχον ἔπλετο πάντων·
6.190
ἔνθʼ ὅ γε λέξατʼ ἰών· τοὶ δʼ ἄλλοσε κοῖτον ἕλοντο
6.191
μέχρις ἐπʼ Ἠριγένειαν ἐΰθρονον. αὐτὰρ ἅμʼ ἠοῖ
6.192
Τηλεφίδης ἀνόρουσε καὶ ἐς στρατὸν εὐρὺν ἵκανε
6.193
σύν τʼ ἄλλοις βασιλεῦσιν, ὅσοι κατὰ Ἴλιον ἦσαν·
6.194
λαοὶ δʼ αὐτίκʼ ἔδυσαν ἐν ἔντεσι μαιμώωντες,
6.195
πάντες ἐνὶ πρώτοισι λιλαιόμενοι πονέεσθαι·
6.196
ὣς δὲ καὶ Εὐρύπυλος μεγάλοις περικάτθετο γυίοις
6.197
τεύχεα μαρμαρέῃσιν ἐειδόμενα στεροπῇσι·
6.198
καί οἱ δαίδαλα πολλὰ κατʼ ἀσπίδα δῖαν ἔκειτο,
6.199
ὁππόσα πρόσθεν ἔρεξε θρασὺ σθένος Ἡρακλῆος.
6.200
ἐν μὲν ἔσαν βλοσυρῇσι γενειάσι λιχμώωντες
6.201
δοιὼ κινυμένοισιν ἐοικότες οἶμα δράκοντες
6.202
σμερδαλέον μεμαῶτες· ὁ δέ σφεας ἄλλοθεν ἄλλον
6.203
νηπίαχός περ ἐὼν ὑπεδάμνατο· καί οἱ ἀταρβὴς
6.204
ἔσκε νόος καὶ θυμός, ἐπεὶ Διὶ κάρτος ἐῴκει
6.205
ἐξ ἀρχῆς· οὐ γάρ τι θεῶν γένος οὐρανιώνων
6.206
ἄπρηκτον τελέθει καὶ ἀμήχανον, ἀλλά οἱ ἀλκὴ
6.207
ἕσπετʼ ἀπειρεσίη καὶ νηδύος ἔνδον ἐόντι.
6.208
ἐν δὲ Νεμειαίοιο βίη ἐτέτυκτο λέοντος
6.209
ὀβρίμου Ἡρακλῆος ὑπὸ στιβαρῇσι χέρεσσι
6.210
τειρόμενος κρατερῶς· βλοσυρῇς δέ οἱ ἀμφὶ γένυσσιν
6.211
αἱματόεις ἀφρὸς ἔσκεν· ἀποπνείοντι δʼ ἐῴκει.
6.212
ἄγχι δέ οἱ πεπόνητο μένος πολυδειράδος ὕδρης
6.213
αἰνὸν λιχμώωσα· καρήατα δʼ ἀλγινόεντα
6.214
ἄλλα μὲν ἄρ δέδμητο κατὰ χθονός, ἄλλα δʼ ἄεξεν
6.215
ἐξ ὀλίγων μάλα πολλά· πόνος δʼ ἔχεν Ἡρακλῆα
6.216
θαρσαλέον τʼ Ἰόλαον, ἐπεὶ κρατερὰ φρονέοντε
6.217
ἄμφω, ὁ μὲν τέμνεσκε καρήατα μαιμώωντα
6.218
ἅρπῃ ὑπʼ ἀγκυλόδοντι θοῶς, ὁ δὲ καῖε σιδήρῳ
6.219
αἰθομένῳ· κρατερὴ δὲ κατήνυτο θηρὸς ὁμοκλή.
6.220
ἑξείης δʼ ἐτέτυκτο βίη συὸς ἀκαμάτοιο
6.221
ἀφριόων γενύεσσι· φέρεν δέ μιν, ὡς, ἐτεόν περ,
6.222
ζωὸν ἐς Εὐρυσθῆα μέγα σθένος Ἀλκείδαο.
6.223
Κεμμὰς δʼ εὖ ἤσκητο θοὴ πόδας, ἥ τʼ ἀλεγεινῶν
6.224
ἀμφὶ περικτιόνων μέγʼ ἐσίνετο πᾶσαν ἀλωήν·
6.225
καὶ τὴν μὲν χρυσέοιο κεράατος ὄβριμος ἥρως
6.226
ἄμφεχεν οὐλομένοιο πυρὸς πνείουσαν ἀϋτμήν.
6.227
ἀμφὶ δʼ ἄρα στυγεραὶ Στυμφηλίδες· αἱ μὲν ὀϊστοῖς
6.228
βλήμεναι ἐν κονίῃσιν ἀπέπνεον, αἱ δʼ ἔτι φύζης
6.229
μνωόμεναι πολιοῖο διʼ ἠέρος ἐσσεύοντο·
6.230
τῇσι δʼ ἔφʼ Ἡρακλέης κεχολωμένος ἄλλον ἐπʼ ἄλλῳ
6.231
ἰὸν ἀεὶ προΐαλλε μάλα σπεύδοντι ἐοικώς.
6.232
ἐν δὲ καὶ Αὐγείαο μέγας σταθμὸς ἀντιθέοιο
6.233
τεχνήεις ἤσκητο κατʼ ἀκαμάτοιο βοείης·
6.234
τῷ δʼ ἄρα θεσπεσίοιο βαθὺν ῥόον Ἀλφειοῖο
6.235
ὄβριμος Ἡρακλέης ἐπαγίνεεν· ἀμφὶ δὲ Νύμφαι
6.236
θάμβεον ἄσπετον ἔργον. ἀπόπροθι δʼ ἔπλετο ταῦρος
6.237
πύρπνοος, ὅν ῥα καὶ αὐτὸν ἀμαιμάκετόν περ ἐόντα
6.238
γνάμπτε βίῃ κρατεροῖο κεράατος· οἱ δέ οἱ ἄμφω
6.239
ἀκάματοι μυῶνες ἐρειδομένοιο τέταντο·
6.240
καί ῥʼ ὁ μέν ὡς μυκηθμὸν ἱεὶς πέλεν. ἄγχι δʼ ἄρʼ αὐτοῦ
6.241
ἀμφὶ σάκος πεπόνητο θεῶν ἐπιειμένη εἶδος
6.242
Ἱππολύτη· καὶ τὴν μὲν ὑπὸ κρατερῇσι χέρεσσι
6.243
δαιδαλέου ζωστῆρος ἀμερσέμεναι μενεαίνων
6.244
εἶλε κόμης ἵπποιο κατʼ ὠκέος· αἱ δʼ ἀπάτερθεν
6.245
ἄλλαι ὑποτρομέεσκον Ἀμαζόνες. ἀμφὶ δὲ λυγραὶ
6.246
Θρηικίην ἀνά γαῖαν ἔσαν Διομήδεος ἵπποι
6.247
ἀνδροβόροι· καί τάς μέν ἐπὶ στυγερῇσι φάτνῃσιν
6.248
αὐτῷ σύν βασιλῆι κακὰ φρονέοντι δάϊξεν.
6.249
ἐν δὲ καὶ ἀκαμάτοιο δέμας πέλε Γηρυονῆος
6.250
τεθναότος παρὰ βουσί· καρήατα δʼ ἐν κονίῃσιν
6.251
αἱματόεντα κέχυντο βίῃ ῥοπάλοιο δαμέντα·
6.252
πρόσθε δέ οἱ δέδμητο κύων ὀλοώτατος ἄλλων
6.253
ὄρθρος, ἀνιηρῷ ἐναλίγκιος ὄβριμον ἀλκὴν
6.254
Κερβέρῳ, ὅς ῥά οἱ ἔσκεν ἀδελφεός· ἀμφὶ δʼ ἔκειτο
6.255
βουκόλος Εὐρυτίων μεμορυγμένος αἵματι πολλῷ.
6.256
ἀμφὶ δέ χρύσεα μῆλα τετεύχατο μαρμαίροντα
6.257
Ἑσπερίδων ἀνὰ πρέμνον ἀκήρατον· ἀμφὶ δʼ ἄρʼ αὐτῷ
6.258
σμερδαλέος δέδμητο δράκων· ταὶ δʼ ἄλλοθεν ἄλλαι
6.259
πτώσσουσαι θρασύν υἷα Διός μεγάλοιο φέβοντο.
6.260
ἐν δʼ ἄρʼ ἔην μέγα δεῖμα καὶ ἀθανάτοισιν ἰδέσθαι
6.261
Κέρβερος, ὅν ῥʼ ἀκάμαντι Τυφωέϊ γείνατʼ Ἔχιδνα
6.262
ἄντρῳ ὑπʼ ὀκρυόεντι μελαίνης ἀγχόθι νυκτὸς
6.262a
ἀργαλέης· ὁ δʼ ἄρʼ ἦεν ἀεικέλιόν τι πέλωρον Verse inserted by Zimmermann ex P.
6.263
ἀμφʼ ὀλοῇσι πύλῃσι πολυκλαύτου Ἀΐδαο
6.264
εἴργων νεκρὸν ὅμιλον ὑπʼ ἠερόεντι βερέθρῳ·
6.265
ῥεῖα δέ μιν Διός υἱὸς ὑπὸ πληγῇσι δαμάσσας
6.266
ἦγε καρηβαρέοντα παρὰ Στυγὸς αἰπὰ ῥέεθρα,
6.267
ἕλκων οὐκ ἐθέλοντα βίῃ πρὸς ἀήθεα χῶρον
6.268
θαρσαλέως. ἐτέτυκτο δʼ ἀπόπροθεν ἄγκεα μακρὰ
6.269
Καυκάσου· ἀμφὶ δὲ δεσμὰ Προμηθέος ἄλλυδις ἄλλα
6.270
αὐτῇς σὺν πέτρῃσιν ἀναρρήξας ἀραρυίαις
6.271
λῦε μέγαν Τιτῆνα· λυγρὸς δέ οἱ ἀγχόθι κεῖτο
6.272
αἰετὸς ἀλγινόεντι δέμας βεβλημένος ἰῷ.
6.273
Κενταύρων δʼ ἐτέτυκτο πολυσθενέων μέγα κάρτος
6.274
ἀμφὶ Φόλοιο μέλαθρον· ἔρις δʼ ὀρόθυνε καὶ οἶνος
6.275
ἀντίον Ἡρακλῆι τεράατα κεῖνα μάχεσθαι·
6.276
καὶ ῥʼ οἱ μὲν πεύκῃσι περὶ δμηθέντες ἔκειντο,
6.277
τὰς ἔχον ἐν χείρεσσι μάχης ἄκος· οἱ δʼ ἔτι μακρῇς
6.278
δηριόωντʼ ἐλάτῃσι μεμαότες, οὐδʼ ἀπέληγον
6.279
ὑσμίνης· πάντων δὲ καρήατα δεύετο λύθρῳ
6.280
θεινομένων ἀνὰ δῆριν ἀμείλιχον, ὡς ἐτεόν περ·
6.281
οἴνῳ δʼ αἷμα μέμικτο, συνηλοίητο δὲ πάντα
6.282
εἴδατα καὶ κρητῆρες ἐΰξεστοί τε τράπεζαι.
6.283
Νέσσον δʼ αὖθʼ ἑτέρωθι παρὰ ῥόον Εὐηνοῖο
6.284
κείνης ἐκπροφυγόντα μάχης ὑπεδάμνατʼ ὀϊστῷ
6.285
ἀμφʼ ἐρατῆς αλόχοιο χολούμενος, ἐν δʼ ἐτέτυκτο
6.286
ὀβρίμου Ἀνταίοιο μέγα σθένος, ὅν ῥα καὶ αὐτὸν
6.287
ἀμφὶ παλαισμοσύνης ἄμοτον περιδηριόωντα
6.288
ὑψοῦ ἀειράμενος κρατερῇς συνέαξε χέρεσσι.
6.289
κεῖτο δʼ ἐπὶ προχοῇσιν ἐϋρρόου Ἑλλησπόντου
6.290
ἀργαλέον μέγα κῆτος ἀμειλίκτοισιν ὀϊστοῖς
6.291
βλήμενον· Ἡσιόνης δέ κακούς ἀπελύετο δεσμούς.
6.292
ἄλλα δʼ ἄρʼ Ἀλκείδαο θρασύφρονος ἄσπετα ἔργα
6.293
ἄμφεχεν Εὐρυπύλοιο διοτρεφέος σάκος εὐρύ.
6.294
φαίνετο δʼ ἶσος Ἄρηι μετὰ στίας ἀΐσσοντι·
6.295
Τρῶες δʼ ἀμφιέποντες ἐγήθεον, εὖτʼ ἐσίδοντο
6.296
τεύχεά τʼ ἠδέ καί ἄνδρα θεῶν ἐπιειμένον εἶδος·
6.297
τὸν δὲ Πάρις ποτὶ δῆριν ἐποτρύνων προσέειπε·
6.298
χαίρω σεῖο κιόντος, ἐπεί νύ μοι. ἦτορ ἔολπεν
6.299
Ἀργείους μάλα πάντας ὀϊζυρῶς ἀπολέσθαι
6.300
αὐτῇς σὺν νήεσσιν, ἐπεὶ βροτὸν οὔποτε τοῖον
6.301
ἔδρακον ἐν Τρώεσσιν ἐϋπτολέμοισί τʼ Ἀχαιοῖς.
6.302
ἀλλὰ σύ, πρὸς μεγάλοιο καὶ ὀβρίμου Ἡρακλῆος,
6.303
τῷ μέγεθός τε βίην τε καὶ ἀγλαὸν εἶδος ἔοικας,
6.304
κείνου μνωόμενος φρονέων τʼ ἀντάξια ἔργα
6.305
θαρσαλέως Τρώεσσι δαϊζομένοις ἐπάμυνον,
6.306
ἤν πως ἀμπνεύσωμεν· ἐπεὶ σέγε μοῦνον όΐω
6.307
ἄστεος ὀλλυμένοιο κακὰς ἀπό κῆρας ἀλέξαι.
6.308
ἦ μέγʼ ἐποτρύνων· ὁ δέ μιν προσεφώνεε μύθῳ·
6.309
Πριαμίδη μεγάθυμε, δέμας μακάρεσσιν ἐοικώς,
6.310
ταῦτα μὲν ἀθανάτων ἐνὶ γούνασιν ἐστήρικται,
6.311
ὅς τε θάνῃ κατὰ δῆριν ὑπέρβιον ἠὲ σαωθῇ·
6.312
ἡμεῖς δʼ, ὥσπερ ἔοικε καὶ ὡς σθένος ἐστὶ μάχεσθαι,
6.313
στησόμεθα πρὸ πόληος· ἔπειτα δέ καὶ τόδʼ ὀμοῦμαι,
6.314
μὴ πρὶν ὑποστρέψειν, πρὶν ἢ κτάμεν ἢ ἀπολέσθαι.
6.315
ὣς φάτο θαρσαλέως· Τρῶες δʼ ἐπὶ μακρὰ χάροντο.
6.316
καὶ τότʼ Ἀλέξανδρόν τε καὶ Αἰνείαν ἐρίθυμον
6.317
Πουλυδάμαντά τʼ ἐϋμμελίην καὶ Πάμμονα δῖον
6.318
Δηίφοβόν τʼ ἐπὶ τοῖσι καὶ Αἴθικον, ὃς περὶ πάντων
6.319
Παφλαγόνων ἐκέκαστο μάχῃ ἔνι τλῆναι ὅμιλον,
6.320
τοὺς ἅμα λέξατο πάντας ἐπισταμένους πονέεσθαι,
6.321
ὅππως δυσμενέεσσιν ἐπὶ πρώτοισι μάχωνται
6.322
ἐν πολέμῳ· μάλα δʼ ὦκα κίον προπάροιθεν ὁμίλου·
6.323
προφρονέως δʼ οἴμησαν ἀπʼ ἄστεος· ἀμφὶ δέ λαοὶ
6.324
πολλοὶ ἕπονθʼ, ὡς εἴ τε μελισσάων κλυτὰ φῦλα
6.325
ἡγεμόνεσσιν ἑοῖσι κατηρεφέος σίμβλοιο
6.326
ἐκχύμεναι καναχηδόν, ὅτʼ εἴαρος ἦμαρ ἵκηται·
6.327
ὥς ἄρα τοῖσιν ἕποντο βροτοὶ ποτὶ δῆριν ἰοῦσι·
6.328
τῶν δʼ ἄρα νισσομένων πολὺς αἰθέρα δοῦπος ἵκανεν
6.329
αὐτῶν ἠδʼ ἵππων· περὶ δʼ ἔβρεμεν ἄσπετα τεύχη.
6.330
ὡς δʼ ὁπόταν μεγάλοιο βίη ἀνέμοιο θοροῦσα
6.331
κινήσῃ προθέλυμνον ἁλὸς βυθὸν ἀτρυγέτοιο,
6.332
κύματα δʼ ὦκα κελαινὰ πρὸς ἠιόνας βοόωντα
6.333
φῦκος ἀποπτύωσιν ἐρευγομένοιο κλύδωνος,
6.334
ἠχὴ δʼ ἀτρυγέτοισι παρʼ αἰγιαλοῖσιν ὄρωρεν·
6.335
ὣς τῶν ἐσσυμένων μέγʼ ὑπέβραχε γαῖα πελώρη.
6.336
Ἀργεῖοι δʼ ἀπάνευθε πρὸ τείχεος ἐξεχέοντο
6.337
ἀμφʼ Ἀγαμέμνονα δῖον· ἀϋτὴ δʼ ἔπλετο λαῶν
6.338
ἀλλήλοις ἐπικεκλομένων, ὀλοοῦ πολέμοιο
6.339
ἀντιάαν καὶ μή τι καταπτώσσοντας ἐνιπὴν
6.340
μίμνειν πὰρ νήεσσιν· ἐπειγομένων μαχέσασθαι. Zimmermann, for ἐπειγομένῳ δὲ μάχεσθαι, with lacuna, of Koechly.
6.341
Τρωσὶ δʼ ἄρʼ ἐσσυμένοισι συνήντεον, εὖτε βόεσσι
6.342
πόρτιες ἐκ ξυλόχοιο ποτὶ σταθμὸν ἐρχομένῃσιν
6.343
ἐκ νομοῦ εἰαρινοῖο κατʼ οὔρεος, ὁππότʼ ἄρουραι
6.344
πυκνὸν τηλεθάουσι, βρύει δ̓ἅλις ἄνθεσι γαῖα,
6.345
πλήθει δʼ αὖτε κύπελλα βοῶν γλάγος ἠδὲ καὶ οἰῶν,
6.346
μυκηθμὸς δʼ ἄρα πουλὺς ὀρίνεται ἔνθα καὶ ἔνθα
6.347
μισγομένων, γάνυται δὲ μετὰ σφίσι, βουκόλος ἀνήρ·
6.348
ὣς τῶν ἀλλήλοισι μετεσσυμένων ὀρυμαγδὸς
6.349
ὠρώρει· δεινὸν γὰρ ἀΰτεον ἀμφοτέρωθεν.
6.350
οὺν δὲ μάχην ἐτάνυσσαν ἀπείριτον· ἐν δέ Κυδοιμὸς
6.351
στρωφᾶτʼ ἐν μέσσοισι μετʼ ἀργαλέοιο Φόνοιο·
6.352
σὺν δʼ ἔπεσον ῥινοί τε καἲ ἔγχεα καὶ τρυφάλειαι
6.353
πλησίον· ἀμφὶ δὲ χαλκὸς ἴσον πυρὶ μαρμαίρεσκε·
6.354
φρῖξε δʼ ἄρʼ ἐγχείῃσι μάχη· περὶ δʼ αἵματι πάντῃ
6.355
δεύετο γαῖα μέλαινα δαϊζομένων ἡρώων
6.356
ἵππων τʼ ὠκυπόδων, οἵ θʼ ἅρμασιν ἀμφεκέχυντο,
6.357
οἱ μὲν ἔτʼ ἀσπαίροντες ὑπʼ ἄξοσιν, οἱ δʼ ἐφύπερθεν
6.358
πίπτοντες· στυγερὴ δὲ διʼ ἠέρος ἔσσυτʼ ἀϋτή·
6.359
ἐν γὰρ δὴ χάλκειος ἔρις πέσεν ἀμφοτέροισι·
6.360
καί ῥʼ οἱ μὲν λάεσσιν ἀταρτηροῖσι μάχοντο, Zimmermann, for ἀταρτηρῶς ἐμάχοντο of v.
6.361
οἱ δʼ αὖτʼ αἰγανέῃσι νεήκεσιν ἠδὲ βέλεσσιν,
6.362
ἄλλοι δʼ ἀξίνῃσι καὶ ἀμφιτόμοις πελέκεσσι
6.363
καὶ κρατεροῖς ξιφέεσσι καὶ ἀγχεμάχοις δοράτεσσιν,
6.364
ἄλλος δʼ ἄλλο χέρεσσι μάχης ἀλκτήριον εἶχε.
6.365
πρῶτοι δʼ Ἀργεῖοι Τρώων ὤσαντο φάλαγγας
6.366
βαιὸν ἀπὸ σφείων· τοὶ δʼ ἔμπαλιν ὁρμήσαντες
6.367
αἵματι δεῦον Ἄρηα μετʼ Ἀργείοισι θορόντες·
6.368
Εὐρύπυλος δʼ ἐν τοῖσι μελαίνῃ λαίλαπι ἶσος
6.369
λαὸν ἐπῴχετο πάντα καὶ Ἀργείους ἐνάριζε
6.370
θαρσαλέως· μάλα γάρ οἱ ἀάσπετον ὤπασε κάρτος
6.371
Ζεὺς ἐπίηρα φέρων ἐρικυδέϊ Ἡρακλῆι.
6.372
ἔνθʼ ὅ γε καὶ Νιρῆα θεοῖς ἐναλίγκιον ἄνδρα
6.373
μαρνάμενον Τρώεσσι βάλευ περιμήκεϊ δουρὶ
6.374
βαιὸν ὑπὲρ πρότμησιν· ὁ δʼ ἐς πέδον ἤριπε γαίης·
6.375
ἐκ δέ οἱ αἷμʼ ἐχύθη, δεύοντο δέ οἱ κλυτὰ τεύχη,
6.376
δεύετο δʼ ἀγλαὸν εἶδος ἄμʼ εὐθαλέεσσι κόμῃσι·
6.377
κεῖτο δʼ ἄρʼ ἐν κονίῃσι καὶ αἵματι σὺν κταμένοισιν,
6.378
ἔρνος ὅπως ἐριθηλὲς ἐλαίης εὐκεάτοιο,
6.379
ἥν τε βίη ποταμοῖο κατὰ ῥόον ἠχήεντα
6.380
σύν τʼ ὄχθῃς ἐλάσῃσι βόθρον διὰ πάντα κεδάσσας
6.381
ῥιζόθεν, ἡ δʼ ἄρα κεῖται ὑπʼ ἄνθεσι βεβριθυῖα·
6.382
ὣς τῆμος Νιρῆος ἐπὶ χθονὸς ἄσπετον οὖδας
6.383
ἐξεχύθη δέμας ἠῢ καὶ ἀγλαΐη ἐρατεινή·
6.384
τῷ δʼ ἄρʼ ἔπʼ Εὐρύπυλος μεγάλʼ εὔχετο δῃωθέντι·
6.385
κεῖσό νυν ἐν κονίῃσιν, ἐπεί νύ τοι εἶδος ἀγητὸν
6.386
οὔτι λιλαιομένῳ περ ἐπήρκεσεν, ἀλλά σʼ ἔγωγε
6.387
νοσφισάμην βιότοιο λιλαιόμενόν περ ἀλύξαι·
6.388
σχέτλιος, οὐδʼ ἐνόησας ἀμείνονος ἀντίον ἐλθών·
6.389
οὐ γὰρ κάρτεϊ κάλλος ἀνὰ κλόνον ἰσοφαρίζει.
6.390
ὣς εἰπὼν κταμένοιο περικλυτὰ τεύχἐ ἑλέσθαι
6.391
μήδετʼ ἐπεσσύμενος· τοῦ δʼ ἀντίος ἦλθε Μαχάων
6.392
χωόμενος Νιρῆος, ὅ οἱ σχεδὸν αἶσαν ἀνέτλη·
6.393
δουρὶ δέ μιν στονόεντι κατʼ εὐρέος ἤλασεν ὤμου
6.394
δεξιτεροῦ, σύτο δʼ αἷμα πολυσθενέος περ ἐόντος·
6.395
ἀλλʼ οὐδʼ ὣς ἀπόρουσεν ἀταρτηροῖο κυδοιμοῦ,
6.396
ἀλλʼ, ὥς τίς τε λέων ἢ ἄγριος οὔρεσι κάπρος
6.397
μαίνετʼ ἐνὶ μέσσοισιν, ὅπως Zimmermann, for ἕως of v. κʼ ἐπιόντα δαμάσσῃ,
6.398
ὅς ῥά μιν οὔτασε πρῶτος ὑποφθάμενος διʼ ὁμίλου·
6.399
τὰ φρονέων ἐπόρουσε Μαχάονι, καί ῥά μιν ὦκα
6.400
οὔτασεν ἐγχείῃ περιμήκεΐ τε στιβαρῇ τε
6.401
δεξιτερὸν κατὰ γλουτόν· ὁ δʼ οὐκ ἀνεχάζετʼ ὀπίσσω,
6.402
οὐδʼ ἐπιόντʼ ἀλέεινε, καὶ αἵματος ἐσσυμένοιο·
6.403
ἀλλʼ ἄρα καρπαλίμως περιμήκεα λᾶαν ἀείρας
6.404
κάββαλε κὰκ κεφαλῆς μεγαθύμου Τηλεφίδαο·
6.405
τοῦ δὲ κόρυς στονόεντα φόνον καὶ πῆμʼ Zimmermann, ex P; for κῆρʼ of n. ἀπάλαλκεν
6.406
ἐσσυμένως· ὁ δʼ ἔπειτα κραταιῷ χώσατο φωτὶ
6.407
Εὐρύπυλος μᾶλλον, μέγα δʼ ἀσχαλόων ἐνὶ θυμῷ
6.408
ὠκὺ διὰ στέρνοιο Μαχάονος ἤλασεν ἔγχος.
6.409
αἰχμὴ δʼ αἱματόεσσα μετάφρενον ἄχρις ἵκανεν·
6.410
ἤριπε δʼ ὡς ὅτε ταῦρος ὑπὸ γναθμοῖσι λέοντος·
6.411
ἀμφὶ δέ οἱ μελέεσσι μέγʼ ἔβραχεν αἰόλα τεύχη.
6.412
Εὐρύπυλος δέ οἱ αἶψα πολύστονον εἰρύσατʼ αἰχμὴν
6.413
ἐκ χροὸς οὐταμένοιο, καὶ εὐχόμενος μέγʼ ἀΰτει·
6.414
ἆ δείλʼ, οὔ νύ τοι ἦτορ ἀρηράμενον φρεσὶ πάμπαν
6.415
ἔπλετʼ, ὃς οὐτιδανός περ ἐὼν μέγʼ ἀμείνονι φωτὶ
6.416
ἄντα κίες· τῷ καί σε κακὴ λάχε δαίμονος Αἶσα.
6.417
ἀλλὰ σοὶ ἔσσετʼ ὄνειαρ, ὅτʼ οἰωνοὶ δατέονται
6.418
σάρκα τεὴν κταμένοιο κατὰ μόθον· ἢ ἔτʼ ἐέλπῃ
6.419
νοστήσειν καὶ ἐμεῖο μένος καὶ χεῖρας ἀλύξειν;
6.420
ἐσσὶ μὲν ἰητήρ, μάλα δʼ ἤπια φάρμακα οἶδας,
6.421
τοῖς πίσυνος τάχʼ ἔολπας ὑπεκφυγέειν κακὸν ἦμαρ.
6.422
ἀλλʼ οὐ μὰν οὐδʼ αὐτὸς ἀπʼ ἠνεμόεντος Ὀλύμπου
6.423
σεῖο πατὴρ τεὸν ἦτορ ἔτʼ ἐκ θανάτοιο σαώσει,
6.424
οὐδʼ εἴ τοι νέκταρ τε καὶ ἀμβροσίην καταχεύῃ.
6.425
ὣς φάτο· τὸν δʼ ὅ γε βαιὸν ἀναπνείων προσέειπεν·
6.426
Εὐρύπυλʼ, οὐδʼ ἄρα σοί γε πολὺν χρόνον αἴσιμόν ἐστι
6.427
ζώειν, ἀλλὰ σοὶ ἄγχι παρίσταται οὐλομένη Κὴρ
6.428
Τρώιον ἂμ πεδίον, τῷ καὶ νῦν αἴσυλα βάζεις. Zimmerman, for ῥέζεις of n.
6.429
ὣς φάμενον λίπε θυμός· ἔβη δʼ ἄφαρ Ἄϊδος εἴσω·
6.430
τὸν δὲ καὶ οὐκέτʼ ἐόντα προσηύδα κύδιμος ἀνήρ·
6.431
νῦν μὲν δὴ σύγε κεῖσο κατὰ χθονός· αὐτὰρ ἔγωγε
6.432
ὕστερον οὐκ ἀλέγω, εἰ καὶ πραὰ ποσσὶν ὄλεθρος
6.433
σήμερον ἡμετέροισι πέλει λυγρός· οὔτι γὰρ ἄνδρες
6.434
ζώομεν ἤματα πάντα· πότμος δʼ ἐπὶ πᾶσι τέτυκται.
6.435
ὣς εἰπὼν οὔταζε νέκυν· μέγα δʼ ἴαχε Τεῦκρος,
6.436
ὡς ἴδεν ἐν κονίῃσι Μαχάονα· τοῦ γὰρ ἄπωθεν
6.437
εἰστήκει μάλα πάγχυ πονεύμενος· ἐν γὰρ ἔκειτο
6.438
δῆρις ἐνὶ μέσσοισιν· ἐπʼ ἄλλῳ δʼ ἄλλος ὀρώρει.
6.439
ἀλλʼ οὐδʼ ὣς ἀμέλησε δεδουπότος ἀνδρὸς ἀγαυοῦ
6.440
Νιρῆός δʼ, ὃς κεῖτο παραυτόθι· τὸν δʼ ἐνόησεν
6.441
ὕστερον ἀντιθέοιο Μαχάονος ἐν κονίῃσιν·
6.442
αἶψα δʼ ὅ γʼ Ἀργείοισιν ἐκέκλετο μακρὰ βοήσας·
6.443
ἔσσυσθʼ, Ἀργεῖοι, μηδʼ εἴκετε δυσμενέεσσιν
6.444
ἐσσυμένοις· νῶιν γὰρ ἀάσπετον ἔσσετʼ ὄνειδος,
6.445
αἴ κε Μαχάονα δῖον ἅμʼ ἀντιθέῳ Νιρῆι
6.446
Τρῶες ἐρυσσάμενοι ποτὶ Ἴλιον ἀπονέωνται.
6.447
ἀλλʼ ἄγε δυσμενέεσσι μαχώμεθα πρόφρονι θυμῷ,
6.448
ὄφρα δαϊκταμένους εἰρύσσομεν ἠὲ καὶ αὐτοὶ
6.449
κείνοις ἀμφιθάνωμεν, ἐπεὶ θέμις ἀνδράσιν αὕτη
6.450
οἶσιν ἀμυνέμεναι, μηδʼ ἄλλοις κύρμα λιπέσθαι· Zimmermann, for dhi/ois mh\ ku/rma gene/sqai, sith lacuna, of Koechly.
6.451
οὐ γὰρ ἀνιδρωτί γε μετʼ ἀνδράσι κῦδος ἀέξει.
6.452
ὣς ἄρʼ ἔφη· Δαναοῖσι δʼ ἄχος γένετʼ· ἀμφὶ δʼ ἄρʼ αὐτοῖς
6.453
πολλοὶ γαῖαν ἔρευθον ὑπʼ Ἄρεϊ δῃωθέντες
6.454
μαρναμένων ἑκάτερθεν· ἴση δʼ ἐπὶ δῆρις ὀρώρει.
6.455
ὀψὲ δʼ ἀδελφειοῖο φόνον στονόεντα νόησε
6.456
βλημένου ἐν κονίῃ Ποδαλείριος, οὕνεκα νηυσὶν
6.457
ἧστο παρʼ ὠκυπόροισι τετυμμένα δούρασι φωτῶν
6.458
ἕλκἐ ἀκειόμενος. περὶ δʼ ἔντεα δύσατο πάντα
6.459
θυμὸν ἀδελφειοῖο χολούμενος· ἐν δέ οἱ ἀλκὴ
6.460
σμερδαλέον στέρνοισιν ἀέξετο μαιμώωντι
6.461
ἐς πόλεμον στονόεντα· μέλαν δέ οἱ ἔζεεν αἷμα
6.462
λάβρον ὑπὸ κραδίῃ· τάχα δʼ ἔνθορε δυσμενέεσσι
6.463
χερσὶ θοῇσιν ἄκοντα τανυγλώχινα τινάσσων·
6.464
εἶλε δʼ ἄρʼ ἐσσυμένως Ἀγαμήστορος υἱέα δῖον
6.465
κλεῖον, ὃν ἠΰκομος Νύμφη τέκεν ἀμφὶ ῥεέθροις
6.466
Παρθενίου, ὅς τʼ εἶσι διὰ χθονὸς ἠΰτʼ ἔλαιον
6.467
πόντον ἐπʼ Εὔξεινον προχέων καλλίρροον ὕδωρ.
6.468
ἄλλον δʼ ἀμφὶ κασιγνήτῳ κτάνε δήιον ἄνδρα
6.469
Λᾶσσον, ὃν ἀντίθεος Προνόη τέκεν ἀμφὶ ῥεέθροις
6.470
Νυμφαίου ποταμοῖο μάλα σχεδὸν εὐρέος ἄντρου,
6.471
ἄντρου θηητοῖο, τὸ δὴ φάτις ἔμμεναι αὐτῶν
6.472
ἱρὸν Νυμφάων, ὁπόσαι περὶ μακρὰ νέμονται
6.473
οὔρεα Παφλαγόνων καὶ ὅσαι περὶ βοτρυόεσσαν
6.474
ναίουσʼ Ἡράκλειαν· ἔοικε δὲ κεῖνο θεοῖσιν
6.475
ἄντρον, ἐπεί ῥα τέτυκται ἀπειρέσιον μὲν ἰδέσθαι
6.476
λαΐνεον, ψυχρὸν δὲ διὰ σπέος ἔρχεται ὕδωρ
6.477
κρυστάλλῳ ἀτάλαντον, ἐνὶ μυχάτοισι δὲ πάντῃ
6.478
λαΐνεοι κρητῆρες ἐπὶ στυφελῇσι πέτρῃσιν
6.479
αἰζηῶν ὡς χερσὶ τετυγμένοι ἰνδάλλονται·
6.480
ἀμφʼ αὐτοῖσι δὲ Πᾶνες ὁμῶς Νύμφαι τʼ ἐρατειναί,
6.481
ἱστοί τʼ ἠλακάται τε, καὶ ἄλλʼ ὅσα τεχνήεντα
6.482
ἔργα πέλει θνητοῖσι, τὰ καὶ περὶ θαῦμα βροτοῖσιν
6.483
εἴδεται ἐρχομένοισιν ἔσω ἱεροῖο μυχοῖο·
6.484
τῷ ἔνι δοιαὶ ἔνεισι καταιβασίαι τʼ ἄνοδοί τε,
6.485
ἡ μὲν πρὸς βορέαο τετραμμένη ἠχήεντος
6.486
πνοιάς, ἡ δὲ νότοιο καταντίον ὑγρὸν ἀέντος,
6.487
τῇ θνητοὶ νίσσονται ὑπὸ σπέος εὐρὺ θεάων·
6.488
ἡ δ ἑτέρη μακάρων πέλεται ὁδός, οὐδέ μιν ἄνδρες
6.489
ῥηιδίως πατέουσιν, ἐπεὶ χάος εὐρὺ τέτυκται
6.490
μέχρις ἐπʼ Ἀΐδονῆος ὑπερθύμοιο βέρεθρον·
6.491
ἀλλὰ τὰ μὲν μακάρεσσι πέλει θέμις εἰσοράασθαι.
6.492
τῶνδʼ αὖτʼ ἀμφὶ Μαχάονʼ ἰδʼ Ἀγλαΐης κλυτὸν υἷα Zimmermann, for ἀμφὶ Μαχάονα δῖον, with lacuna, of Koechly.
6.493
μαρναμένων ἑκάτερθεν ἀπέφθιτο πουλὺς ὅμιλος·
6.494
ὀψὲ δὲ δὴ Δαναοί σφεας εἴρυσαν ἀθλήσαντες
6.495
πολλά περ· αἶψα δὲ νῆας ἐπὶ σφετέρας ἐκόμισσαν
6.496
παῦροι, ἐπεὶ πλεόνεσσι κακὴ περιπέπτατʼ ὀϊζὺς
6.497
ἀργαλέου πολέμοιο· πόνῳ δʼ ἐνέμιμνον ἀνάγκῃ.
6.498
ἀλλʼ ὅτε δὴ μάλα πολλοὶ ἐνεπλήσαντο κελαινὰς
6.499
κῆρας ἀνʼ αἱματόεντα καὶ ἀλγινόεντα κυδοιμόν,
6.500
δὴ τότʼ ἄρʼ Ἀργείων πολέες φύγον ἔνδοθι νηῶν,
6.501
ὅσσους Εὐρύπυλος μέγʼ ἐπῴχετο πῆμα κυλίνδων.
6.502
παῦροι δʼ ἀμφʼ Αἴαντα καὶ Ἀτρέος υἷε κραταιὼ
6.503
μίμνον ἐν ὑσμίνῃ· καὶ τάχα πάντες ὄλοντο
6.504
δυσμενέων παλάμῃσι περιστρωφῶντες ὁμίλῳ,
6.505
εἰ μὴ Ὀϊλέος υἱὸς εΰφρονα Πουλυδάμαντα
6.506
ἔγχεϊ τύψε παρʼ ὦμον ἀριστερὸν ἀγχόθι μαζοῦ·
6.507
ἐκ δέ οἱ αἷμʼ ἐχύθη· ὁ δʼ ἐχάσσατο τυτθὸν ὁπίσσω.
6.508
Δηίφοβον δʼ οὔτησε περικλειτὸς Μενέλαος
6.509
δεξιτερὸν παρὰ μαζόν· ὁ δ̓ἔκφυγε ποσσὶ θοοῖσιν.
6.510
ἔνθʼ Ἁγαμέμνων δῖος ἐνήρατο πουλὺν ὅμιλον
6.511
πληθύος ἐξ ὀλοῆς· μετὰ δʼ Αἴθικον ᾤχετο δῖον
6.512
θύων ἐγχείῃσιν· ὁ δʼ εἰς ἑτάρους ἀλέεινε.
6.513
τοὺς δʼ ὁπότʼ Εὐρύπυλος λαοσσόος εἰσενόησε
6.514
χαζομένους ἅμα πάντας ἀπὸ στυγεροῖο κυδοιμοῦ,
6.515
αὐτίκα κάλλιπε λαόν, ὅσον κατὰ νῆας ἔλασσε,
6.516
καί ῥα θοῶς οἴμησεν ἐπʼ Ἀτρέος υἷε κραταιὼ
6.517
παῖδά τε καρτερόθυμον Ὀϊλέος, ὃς περὶ μὲν θεῖν
6.518
ἔσκε θοός, περὶ δ αὖτε μάχῃ ἔνι φέρτατος ἦεν.
6.519
τοῖς ἔπι κραιπνὸν ὄρουσεν ἔχων περιμήκετον ἔγχος·
6.520
σὺν δέ οἱ ἦλθε Πάρις τε καὶ Αἰνείας ἐρίθυμος,
6.521
ὅς ῥα θοῶς Αἴαντα βάλεν περιμήκεϊ πέτρῃ
6.522
κὰκ κόρυθα κρατερήν· ὁ δʼ ἄρʼ ἐν κονίῃσι τανυσθεὶς
6.523
ψυχὴν οὐ τι κάπυσσεν, ἐπεί νύ οἱ αἴσιμον ἦμαρ
6.524
ἐν νόστῳ ἐτέτυκτο Καφηρίσιν ἀμφὶ πέτρῃσι·
6.525
καί ῥά μιν ἁρπάξαντες ἀρηίφιλοι θεράποντες
6.526
βαιὸν ἔτʼ ἀμπνείοντα φέρον ποτὶ νῆας Ἀχαιῶν.
6.527
καὶ τότʼ ἄρʼ οἰώθησαν ἀγακλειτοὶ βασιλῆες
6.528
Ἀτρεῖδαι· περὶ δέ σφιν ὀλέθριος ἵσταθʼ ὅμιλος
6.529
βαλλόντων ἑκάτερθεν, ὅ τι σθένε χερσὶν ἑλέσθαι·
6.530
οἱ μὲν γὰρ στονόεντα βέλη χέον, οἱ δέ νυ λᾶας,
6.531
ἄλλοι δʼ αἰγανέας· τοὶ δʼ ἐν μέσσοισιν ἐόντες
6.532
στρωφῶντʼ, εὖτε σύες μέσῳ ἕρκεϊ ἠὲ λέοντες
6.533
ἤματι τῷ, ὅτʼ ἄνακτες ἀολλίσσωσʼ ἀνθρώπους
6.534
ἀργαλέως τʼ εἰλέωσι κακὸν τεύχοντες ὄλεθρον
6.535
θηρσὶν ὑπὸ κρατεροῖς, οἱ δʼ ἕρκεος ἐντὸς ἐόντες
6.536
δμῶας δαρδάπτουσιν, ὅ τις σφίσιν ἐγγὺς ἵκηται·
6.537
ὣς οἵ γʼ ἐν μέσσοισιν ἐπεσσυμένους ἐδάϊζον.
6.538
ἀλλʼ οὐδʼ ὣς μένος εἶχον ἐελδόμενοί περ ἀλύξαι,
6.539
εἰ μὴ Τεῦκρος ἵκανε καὶ Ἰδομενεὺς ἐρίθυμος
6.540
Μηριόνης τε Θόας τε καὶ ἰσόθεος Θρασυμήδης,
6.541
οἵ ῥα πάρος φοβέοντο θρασὺ σθένος Εὐρυπύλοιο,
6.542
καί κε φύγον κατὰ νῆας ἀλευάμενοι βαρὺ πῆμα,
6.543
εἰ μὴ ἄρʼ Ἀτρείδῃσι περιδδείσαντες ἵκοντο
6.544
ἄντην Εὐρυπύλοιο· μάχη δʼ ἀΐδηλος ἐτύχθη.
6.545
ἔνθα τότʼ Αἰνείαο κατʼ ἀσπίδος ἔγχος ἔρεισε
6.546
Τεῦκρος ἐϋμμελίης· τοῦ δʼ οὐ χρόα καλὸν ἴαψεν·
6.547
ἤρκεσε γάρ οἱ πῆμα σάκος μέγα τετραβόειον·
6.548
ἀλλὰ καὶ ὣς δείσας ἀνεχάσσατο τυτθὸν ὀπίσσω.
6.549
Μηριόνης δʼ ἐπόρουσεν ἀμύμονι Λαοφόωντι
6.550
Παιονίδῃ, τὸν ἐγείνατʼ ἐϋπλόκαμος Κλεομήδη
6.551
Ἀξιοῦ ἀμφὶ ῥέεθρα· κίεν δʼ ὅ γε Ἴλιον ἱρὴν
6.552
Τρωσὶν ἀρηξέμεναι μετʼ ἀμύμονος Ἀστεροπαίου·
6.553
τὸν δʼ ἄρα Μηριόνης νύξ̓ ἔγχεϊ ὀκριόεντι
6.554
αἰδοίων ἐφύπερθε· θοῶς δέ οἱ εἴρυσεν αἰχμὴ
6.555
ἔγκατα· τοῦ δʼ ὤκιστα ποτὶ ζόφον ἔσσυτο θυμός.
6.556
Αἴαντος δʼ ἄρʼ ἑταῖρος Ὀϊλιάδαο δαΐφρων
6.557
Ἀλκιμέδης ἐς ὅμιλον ἐϋσθενέων βάλε Τρώων·
6.558
ἧκε δʼ ἐπευξάμενος δηίων ἐς φύλοπιν αἰνὴν
6.559
σφενδόνῃ ἀλγινόεντα λίθον· διὰ δʼ ἔτρεσαν ἄνδρες
6.560
ῥοῖζον ὁμῶς καὶ λᾶα περιδδείσαντες ἰόντα.
6.561
τὸν δʼ ὀλοὴ φέρε Μοῖρα ποτὶ θρασὺν ἡνιοχῆα
6.562
Πάμμονος Ἱππασίδην· τὸν δʼ ἡνία χερσὶν ἔχοντα
6.563
πλῆξε κατὰ κροτάφοιο· θοῶς δέ μιν ἔκβαλε δίφρου
6.564
πρόσθεν ἑοῖο τροχοῖο· θοὸν δέ οἱ ἅρμα πεσόντος
6.565
λυγρὸν ἐπισσώτροισι δέμας διελίσσετʼ ὀπίσσω
6.566
ἵππων ἱεμένων· θάνατος δέ μιν αἰνὸς ἐδάμνα
6.567
ἐσσυμένως μάστιγα καὶ ἡνία νόσφι λιπόντα·
6.568
Πάμμονι δʼ ἔμπεσε πένθος· ἄφαρ δέ ἑ θῆκεν ἀνάγκη
6.569
ἄμφω καὶ βασιλῆα καὶ ἡνιοχεῖν θοὸν ἅρμα·
6.570
καί νύ κεν αὐτοῦ κῆρα καὶ ὕστατον ἦμαρ ἀνέτλη,
6.571
εἰ μή οἱ Τρώων τις ἀνὰ κλόνον αἱματόεντα
6.572
ἡνία δέξατο χερσὶ καὶ ἐξεσάωσεν ἄνακτα
6.573
ἤδη τειρόμενον δηίων ὀλοῇσι χέρεσσιν.
6.574
ἀντίθεον δʼ Ἀκάμαντα καταντίον ἀΐσσοντα
6.575
Νέστορος ὄβριμος υἱὸς ὑπὲρ γόνυ δούρατι τύψεν·
6.576
ἕλκεϊ δʼ οὐλομένῳ στυγερὰς ὑπεδύσατʼ ἀνίας·
6.577
χάσσατο δʼ ἐκ πολέμοιο· λίπεν δʼ ἑτάροισι κυδοιμὸν
6.578
δακρυόεντʼ· οὐ γάρ οἱ ἔτι πτολέμοιο μεμήλει.
6.579
καὶ τότε δὴ θεράπων ἐρικυδέος Εὐρυπύλοιο
6.580
τύψε Θόαντος ἑταῖρον Ἐχέμμονα δηϊοτῆτι
6.581
ὤμου τυτθὸν ἔνερθε· περὶ κραδίην δέ οἱ ἔγχος
6.582
ἷξεν ἀνιηρόν· σὺν δʼ αἵματι κήκιεν ἱδρὼς
6.583
ψυχρὸς ἀπὸ μελέων· καί μιν στρεφθέντα φέρεσθαι
6.584
εἰσοπίσω κατέμαρψε μέγα σθένος Εὐρυπύλοιο·
6.585
κόψε δέ οἱ θοὰ νεῦρα· πόδες δʼ ἀέκοντες ἔμιμνον
6.586
αὐτοῦ, ὅπῃ μιν τύψε· λίπεν δέ μιν ἄμβροτος αἰών.
6.587
ἐσσυμένως δὲ Θόας νύξεν Πάριν ὀξέϊ δουρὶ
6.588
δεξιτερὸν κατὰ μηρόν· ὁ δʼ ᾤχετο τυτθὸν ὀπίσσω
6.589
οἰσόμενος θοὰ τόξα, τά οἱ μετόπισθε λέλειπτο.
6.590
Ἰδομενεὺς δʼ ἄρα λᾶαν, ὅσον σθένε, χερσὶν ἀείρας
6.591
κάββαλεν Εὐρυπύλοιο βραχίονα· τοῦ δὲ χαμᾶζε
6.592
κάππεσε λοίγιον ἔγχος· ἄφαρ δʼ ἀνεχάσσατʼ ὀπίσσω
6.593
οἰσέμεν ἐγχείην· τὴν γάρ τʼ ἔχεν ἔκβαλε χειρός.
6.594
Ἀτρεῖδαι δ̓ἄρα τυτθὸν ἀνέπνευσαν πολέμοιο.
6.595
τῷ δὲ θοῶς θεράποντες ἔβαν σχεδόν, οἵ οἱ ἔνεγκαν
6.596
ἀαγὲς δόρυ μακρόν, ὃ πολλῶν γούνατʼ ἔλυσε·
6.597
δεξάμενος δʼ ὅ γε λαὸν ἐπῴχετο κάρτεϊ θύων,
6.598
κτείνων ὅν κε κίχῃσι, πολὺν δʼ ὑπεδάμναθʼ ὅμιλον.
6.599
Ἔνθʼ οὔτʼ Ἀτρεῖδαι μένον ἔμπεδον οὔτε τις ἄλλος
6.600
ἀγχεμάχων Δαναῶν· μάλα γὰρ δέος ἔλλαβε πάντας
6.601
ἀργαλέον· πᾶσιν γὰρ ἐπέσσυτο πῆμα κορύσσων
6.602
Εὐρύπυλος· μετόπισθε δʼ ἐπισπόμενος κεράϊζε.
6.603
κέκλετο δʼ αὖ Τρώεσσιν ἰδʼ ἱπποδάμοις ἑτάροισιν·
6.604
ὦ φίλοι, εἰ δʼ ἄγε θυμὸν ἐνὶ στέρνοισι λαβόντες
6.605
τεύξωμεν Δαναοῖσι φόνον καὶ κῆρʼ ἀΐδηλον,
6.606
οἳ δὴ νῦν μήλοισιν ἐοικότες ἀπονέονται
6.607
νῆας ἐπὶ σφετέρας· ἀλλὰ μνησώμεθα πάντες
6.608
ὑσμίνης ὀλοῆς, ἧς παιδόθεν ἴδμονές εἰμεν.
6.609
ὣς φάτο· τοὶ δʼ ἐπόρουσαν ἀολλέες Ἀργείοισιν·
6.610
οἱ δὲ μέγα τρομέοντες ἀπʼ ἀργαλέοιο κυδοιμοῦ
6.611
φεῦγον· τοὶ δʼ ἐφέποντο κύνες ὣς ἀργιόδοντες
6.612
κεμμάσιν ἀγροτέρῃσιν ἀνʼ ἄγκεα μακρὰ καὶ ὕλην.
6.613
πολλοὺς δʼ ἐν κονίῃσι βάλον μάλα περ μεμαῶτας
6.614
ἐκφυγέειν ὀλοοῖο φόνου στονόεσσαν ὁμοκλήν.
6.615
Εὐρύπυλος μὲν ἔπεφνεν ἀμύμονα Βουκολίωνα
6.616
νῆσόν τε Χρόμιόν τε καὶ Ἄντιφον· οἱ δὲ Μυκήνην
6.617
ᾤκεον εὐκτέανον, τοὶ δʼ ἐν Λακεδαίμονι ναῖον·
6.618
τοὺς ἄρʼ ὅ γʼ ἐξενάριξεν ἀριγνώτους περ ἐόντας.
6.619
ἐκ δʼ ἄρα πληθύος εἷλεν ἀάσπετα φῦλʼ ἀνθρώπων
6.620
ὅσσα μοι οὐ σθένος ἐστὶ λιλαιομένῳ περ ἀεῖσαι,
6.621
οὐδʼ εἴ μοι στέρνοισι σιδήρεον ἦτορ ἐνείη.
6.622
Αἰνείας δὲ Φέρητα καὶ Ἀντίμαχον κατέπεφνεν
6.623
ἀμφοτέρους Κρήτηθεν ἅμʼ Ἰδομενῆι κιόντας.
6.624
αὐτὰρ Ἀγήνωρ δῖος ἀμύμονα Μῶλον ἔπεφνεν,
6.625
ὅς περ ἀπʼ Ἄργεος ἦλθεν ὑπὸ Σθενέλῳ βασιλῆι·
6.626
τὸν βάλεν αἰγανέῃ νεοθηγέϊ πολλὸν ὀπίσσω
6.627
φεύγοντʼ ἐκ πολέμοιο τυχὼν ὑπὸ νείατα κνήμης
6.628
δεξιτερῆς· αἰχμὴ δέ διὰ πλατὺ νεῦρον ἔκερσεν
6.629
ἄντικρυς ἱεμένη· παρὰ δʼ ἔθρισεν ὀστέα φωτὸς
6.630
ἀργαλέως· ὀδύνῃ δὲ μίγη μόρος, ἔφθιτο δʼ ἀνήρ.
6.631
ἔνθα Πάρις Μόσυνόν τʼ ἔβαλεν καὶ ἀγήνορα Φόρκυν
6.632
ἄμφω ἀδελφειούς, οἵ τʼ ἐκ Σαλαμῖνος ἵκοντο
6.633
Αἴαντος νήεσσι, καὶ οὐκέτι νόστον ἴδοντο.
6.634
τοῖσι δʼ ἔπι Κλεόλαον εῢν θεράποντα Μέγητος
6.635
εἷλε βαλὼν κατὰ μαζὸν ἀριστερόν· ἀμφὶ δέ μιν νὺξ
6.636
μάρψε κακή, καὶ θυμὸς ἀπέπτατο· τοῦ δὲ δαμέντος
6.637
ἔνδον ὑπὸ στέρνοισιν ἔτι κραδίη ἀλεγεινὴ
6.638
ταρφέα παλλομένη πτερόεν πελέμιξε βέλεμνον.
6.639
ἄλλον δʼ ἰὸν ἀφῆκεν ἐπὶ θρασὺν Ἠετίωνα
6.640
ἐσσυμένως· τοῦ δʼ αἶψα διὰ γναθμοῖο πέρησε
6.641
χαλκός· ὁ δʼ ἐστονάχησε· μίγη δέ οἱ αἵματι δάκρυ.
6.642
ἄλλος δʼ ἄλλον ἔπεφνε· πολὺς δʼ ἐστείνετο χῶρος
6.643
Ἀργείων ἰληδὸν ἐπʼ ἀλλήλοισι πεσόντων.
6.644
καί νύ κε δὴ τότε Τρῶες ἐνέπρησαν πυρὶ νῆας,
6.645
εἰ μὴ νὺξ ἐπόρουσε βαθύσκιον ἠέρʼ ἄγουσα.
6.646
χάσσατο δʼ Εὐρύπυλος, σὺν δʼ ἄλλοι Τρώιοι υἷες
6.647
νηῶν βαιὸν ἄπωθε ποτὶ προχοὰς Σιμόεντος
6.648
ᾗχί περ αὖλιν ἔθεντο γεγηθοτες. οἱ δʼ ἐνὶ νηυσὶν
6.649
Ἀργεῖοι γοάασκον ἐπὶ ψαμάθοισι πεσόντες
6.650
πολλὰ μάλʼ ἀχνύμενοι κταμένων ὕπερ, οὕνεκʼ ἄρʼ αὐτῶν
6.651
πολλοὺς ἐν κονίῃσι μέλας ἐκιχήσατο πότμος.